Maŋtsɛyeli Jajelɔi Bɔ Amaniɛ

Weku Shihilɛ ni Miishɛɛ Yɔɔ Mli Gbalaa Mɛi Krokomɛi Kɛbaa Nyɔŋmɔ Ŋɔɔ

YEHOWA kɛ nilee kɛ sɛɛyoomɔ babaoo jɔɔ Yosef. (Bɔfoi lɛ Asaji 7:10) Yɛ enɛ hewɔ lɛ, Yosef saneshishinumɔ lɛ “sa Farao kɛ etsuji lɛ fɛɛ hiɛ.”—1 Mose 41:37.

Nakai nɔŋŋ hu ŋmɛnɛ, Yehowa kɛ saneshishinumɔ kɛ sɛɛyoomɔ haa ewebii kɛtsɔɔ Biblia lɛ ni amɛkaseɔ lɛ nɔ. (2 Timoteo 3:16, 17) Nɛkɛ nilee kɛ sɛɛyoomɔ nɛɛ woɔ yibii kpakpai yɛ be mli ni akɛ ŋaawoo ni damɔ Biblia lɛ nɔ lɛ tsuɔ nii lɛ. Bei pii lɛ, amɛ jeŋba kpakpa lɛ efee ‘nɔ ni saa mɛi ni naa lɛ ahiɛ,’ taakɛ niiashikpamɔi ni nyiɛ sɛɛ ni jɛ Zimbabwe nɛɛ feɔ he nɔkwɛmɔnɔ lɛ.

• Yoo ko kɛ Yehowa Odasefoi komɛi yɛ akutsoŋ. Eyɛ mli akɛ esumɔɔɔ Odasefoi lɛ asane moŋ, shi amɛjeŋba feɔ lɛ fɛo, titri lɛ amɛshihilɛ yɛ shia. Ena akɛ suɔmɔ ni mli wa waa kã wu lɛ kɛ ŋa lɛ teŋ, ni amɛbii lɛ feɔ toiboo. Eje gbɛ eyɔse akɛ wu lɛ sumɔɔ eŋa lɛ jogbaŋŋ.

Hemɔkɛyeli ko ni egbɛ eshwã Afrika kusum nifeemɔi komɛi amli ji akɛ, kɛji akɛ wu ko sumɔɔ eŋa lɛ, belɛ ekolɛ ŋa lɛ kɛ tsofa “ewo ehiɛ.” No hewɔ lɛ, yoo nɛɛ ba ŋa Odasefonyo lɛ ŋɔɔ ni ebi lɛ akɛ: “Ofainɛ ani obaasumɔ ni oha mi tsofa ni okɛha owu lɛ eko koni miwu asumɔ mi waa tamɔ bɔ ni owu sumɔɔ bo lɛ?” Odasefonyo lɛ ha hetoo akɛ: “Oo, hɛɛ, mikɛ eko baaba abaha bo wɔ́ shwane.”

Enɔ jetsɛremɔ lɛ, nyɛmi yoo lɛ kɛ “tsofa” lɛ tee ekutsoŋnyo lɛ ŋɔɔ. Mɛni ni? No ji Biblia lɛ, kɛ Nilee Ni Kɛ Mɔ Yaa Naanɔ Wala Mli wolo lɛ. Beni amɛsusu Nilee wolo lɛ mli sane ni kɔɔ “Ni Aaatswa Weku ni Kɛ Woo Haa Nyɔŋmɔ Ama Shi” lɛ he lɛ amɛgbe naa lɛ, ekɛɛ yoo lɛ akɛ: “Enɛ ji ‘tsofa’ ni mi kɛ miwu fɛɛ kɛtsuɔ nii ni ‘wɔkɛwoɔ’ wɔteŋ mɔ fɛɛ mɔ ‘hiɛ’ lɛ, ni no hewɔ ni wɔsumɔɔ wɔhe jogbaŋŋ nakai lɛ.” Aje Biblia mli nikasemɔ shishi, ni yoo lɛ shwere yɛ nilee mli oyayaayai kɛyashɛ he ni ekɛ numiimɔ fee ehenɔjɔɔmɔ kɛha Yehowa lɛ he okadi.

• Gbɛgbalɔi krɛdɛɛi enyɔ ni aha amɛ nitsumɔ yɛ asafo bibioo ko ni bɛŋkɛ Zimbabwe kɛ Mozambique kooyi bokagbɛ husu lɛ naa lɛ mli lɛ kɛ amɛhe wooo shia kɛ shia sɔɔmɔ lɛ mli aahu otsii enyɔ. Mɛni hewɔ? Ejaakɛ gbɔmɛi miiba amɛŋɔɔ ni amɛbabo nɔ ni amɛyɔɔ kɛɛmɔ lɛ toi. Gbɛgbalɔi lɛ ateŋ mɔ kome gba bɔ ni fee ni eba lɛ nakai, akɛ: “Wɔfãa gbɛ kilomitai 15 ni wɔkɛ mɔ ko ni yɔɔ wiemɔ lɛ he miishɛɛ lɛ yafeɔ shia Biblia mli nikasemɔ daa otsi. Nɛkɛ hé nɛɛ yaa bɛ mlɛo. Ehe bahiaa ni wɔnyiɛ kɛtsɔ ŋmɔtɔ mli, ní wɔfo faai ni eje ŋa ni taraa wɔkuɛi ahe. Enɛ biɔ ni wɔtere wɔ atadei kɛ aspaaterei yɛ wɔyiteŋ, ni wɔkɛfo faa lɛ, kɛkɛ lɛ wɔyasaa wɔhe ekoŋŋ yɛ faa lɛ sɛɛ.

“Mɔ ni yɔɔ wiemɔ lɛ he miishɛɛ nɛɛ akutsoŋbii lɛ ahiɛ sɔ ekãa ni wɔjieɔ lɛ kpo nɛɛ babaoo. Mɔ ni fata mɛi ni yɔse enɛ lɛ ahe ji jamɔ gbɛjianɔtoo ko ni yɔɔ jɛmɛ lɛ hiɛnyiɛlɔ lɛ. Ekɛɛ esɛɛnyiɛlɔi lɛ akɛ: ‘Ani nyɛsumɔɔɔ ni nyɛfeɔ ekãa tamɔ oblahii enyɔ ni ji Yehowa Odasefoi lɛ?’ Enɔ jetsɛremɔ lɛ, esɛɛnyiɛlɔi lɛ ateŋ mɛi pii ba wɔshia lɛ koni amɛbabi nɔ hewɔ ni wɔkã he wɔtsuɔ nii waa nakai lɛ. Kɛfata he lɛ, mɛi babaoo ba wɔ saramɔ yɛ otsii enyɔ ni nyiɛ sɛɛ ba lɛ mli aahu akɛ wɔnáaa dekã po ni wɔkɛaahoo wɔ niyenii!”

Mɛi ni ba gbɛgbalɔi lɛ ashia yɛ nɛkɛ otsii enyɔ be nɛɛ mli lɛ ateŋ mɔ kome ji jamɔ mli hiɛnyiɛlɔ lɛ. Susumɔ miishɛɛ ni gbɛgbalɔi lɛ ná beni ekpɛlɛ ni akɛ lɛ afee shia Biblia mli nikasemɔ lɛ he okwɛ!