Bó Nyɔŋmɔ Gbalɛ Wiemɔ Kɛha Wɔ Gbii Nɛɛ lɛ Toi
Bó Nyɔŋmɔ Gbalɛ Wiemɔ Kɛha Wɔ Gbii Nɛɛ lɛ Toi
“Tɛ̃jemɔ ohiɛ okwɛ, gbɔmɔ bi; ejaakɛ naagbee be lɛ he ninaa nɛ!”—DANIEL 8:17.
1. Mɛni Yehowa taoɔ ni adesai fɛɛ ale yɛ wɔ gbii nɛɛ ahe?
YEHOWA etsĩii wɔsɛɛ be saji ahe nilee ni eyɔɔ lɛ naa ehaaa ekome ehe. Shi moŋ, eji teemɔŋ saji a-Kpojielɔ. Yɛ anɔkwale mli lɛ, eesumɔ ni adesai fɛɛ ale akɛ wɔshɛ shɔŋŋ yɛ “naagbee be lɛ” mli. Mɛɛ adafitswaa ni he hiaa po enɛ ji kɛha gbɔmɛi akpekpei toi akpei ekpaa ni yɔɔ shikpɔŋ nɔ bianɛ lɛ nɛkɛ!
2. Mɛni hewɔ gbɔmɛi susuɔ adesai awɔsɛɛ be he nakai lɛ?
2 Belɛ ani eyɛ naakpɛɛ mɔ akɛ je nɛɛ ebɛŋkɛ enaagbee? Gbɔmɔ baanyɛ anyiɛ nyɔɔŋtsere lɛ nɔ, shi shibɔlemɔ ŋulami nɛɛ nɔ gbɛjegbɛi pii yɛ ni enyɛŋ enyiɛ nɔ ni esheee gbeyei. Ebaanyɛ ni ekɛ ŋmɛnɛŋmɛnɛ beaŋ nibii heei ni afee lɛ awo eshia obɔ̃, shi enyɛɛɛ etsĩ weku ni fiteɔ ni gbɛɔ eshwãa lɛ naa. Ni ebaanyɛ ni ekɛ kɔmpiuta yinɔ aba, shi enyɛɛɛ etsɔɔ gbɔmɛi bɔ ni ahiɔ shi yɛ toiŋjɔlɛ mli yɛ he kome. Nibii ni enyɛɛɛ efee nɛɛ fiɔ Ŋmalɛ naa odaseyelii babaoo ni tsɔɔ akɛ naagbee be lɛ mli wɔyɔɔ lɛ sɛɛ.
3. Mɛɛ be akɛ wiemɔi “naagbee be lɛ” tsu nii klɛŋklɛŋ kwraa yɛ shikpɔŋ nɔ?
3 Ŋwɛibɔfo Gabriel ji mɔ ni kɛ nakai wiemɔi ni hɛleɔ mɔ shi—“naagbee be lɛ”—tsu nii klɛŋklɛŋ kwraa, aaafee afii 2,600 ni eho nɛ. Taakɛ Daniel 8:17 tsɔɔ lɛ, Nyɔŋmɔ gbalɔ ko ni tsui efã nu ni Gabriel miikɛɛ akɛ: “Tɛ̃jemɔ ohiɛ okwɛ, gbɔmɔ bi; ejaakɛ naagbee be lɛ he ninaa nɛ.”—Daniel 8:17.
“Naagbee Be Lɛ” Nɛ!
4. Biblia lɛ wieɔ naagbee be lɛ he yɛ mɛɛ gbɛ̀i krokomɛi anɔ?
4 Wiemɔi ni ji “naagbee be lɛ” kɛ “naagbee be ni ato lɛ” jeɔ kpo shii ekpaa yɛ Daniel wolo lɛ mli. (Daniel 8:17, 19; 11:35, 40; 12:4, 9) Amɛkɔɔ “naagbee gbii lɛ” ni bɔfo Paulo gba yɛ he lɛ ahe. (2 Timoteo 3:1-5) Yesu Kristo wie nɛkɛ be nɛɛ he akɛ ‘ba ni eba’ akɛ Maŋtsɛ ni akɛ eta sɛi nɔ yɛ ŋwɛi.—Mateo 24:37-39.
5, 6. Namɛi ‘ekane fitsofitso’ yɛ naagbee be lɛ mli lɛ, ni mɛni ejɛ mli kɛba?
5 Daniel 12:4 kɛɔ akɛ: “Shi bo, Daniel lɛ, tsiimɔ wiemɔi nɛɛ anɔ, ni osɔo wolo lɛ naa kɛyashi naagbee be lɛ; mɛi pii aaakane fitsofitso, ni nilee aaafa.” Afee saji ni Daniel ŋma lɛ mli babaoo akɛ teemɔŋ saji ni asɔo naa koni adesai akanu shishi afii ohai abɔ. Ni ŋmɛnɛ hu?
6 Kristofoi anɔkwafoi pii ‘ekane’ Nyɔŋmɔ Wiemɔ, ni ji Biblia lɛ mli baafai lɛ “fitsofitso” yɛ naagbee be nɛɛ mli. Mɛni ejɛ mli kɛba? Yɛ Yehowa jɔɔmɔ ni yɔɔ amɛ mɔdɛŋbɔɔi lɛ anɔ hewɔ lɛ, anɔkwale nilee éfa babaoo. Ákɛ nɔkwɛmɔnɔ lɛ, akɛ shishinumɔ ejɔɔ Yehowa Odasefoi ni afɔ amɛ mu lɛ, ni eye ebua amɛ ni amɛnu shishi akɛ Yesu Kristo batsɔ ŋwɛi Maŋtsɛ yɛ afi 1914. Yɛ bɔfo lɛ wiemɔi ni aŋmala yɛ 2 Petro 1:19-21 lɛ kɛ gbeekpamɔ naa lɛ, mɛi ni afɔ amɛ mu nɛɛ kɛ amɛnanemɛi anɔkwafoi lɛ ‘miibo gbalɛ wiemɔ lɛ toi’ ni amɛyɛ nɔmimaa diɛŋtsɛ akɛ naagbee be lɛ nɛ.
7. Mɛni ji saji ni haa Daniel wolo lɛ feɔ nɔ ni yɔɔ srɔto lɛ ekomɛi?
7 Daniel wolo lɛ yɛ srɔto yɛ gbɛ̀i pii anɔ. Anaa maŋtsɛ ko ni wo enilelɔi ahe gbeyei akɛ ebaagbe amɛ akɛni amɛnyɛɛɛ amɛtsɔɔ lɛ elamɔ ni eha ejwɛŋmɔ efutu lɛ, ni amɛnyɛɛɛ amɛtsɔɔ lɛ eshishi hu hewɔ lɛ yɛ ebaafai amli, shi Nyɔŋmɔ gbalɔ tsɔɔ lamɔ lɛ shishi. Ashɛrɛ oblahii etɛ ni kɛɛ akɛ amɛjáaa amaga kpeteŋkpele ko lɛ awo flɔnɔɔ ni edɔ waa fe nine mli, ni kɛlɛ amɛje mli shweshweeshwe ni lasũ tete ejeee fũ yɛ amɛhe. Yɛ okpɔlɔŋmɛɛ gbijurɔyeli ko shishi lɛ, gbɔmɛi ohai abɔ na ni nine ko miiŋma naakpɛɛ wiemɔi yɛ maŋtsɛwe lɛ gbogbo lɛ he. Apamyalɔi fɔji komɛi ha ashɛ nuumo ko awo jatai abu mli, shi eje kpo shweshweeshwe ni amɛyeee lɛ awui ko. Ana kooloi ejwɛ yɛ ninaa ko mli, ni akɛ gbalɛ shishinumɔ ni mli kpãa kɛbashɛɔ naagbee be lɛ mli tɔŋŋ ha yɛ he.
8, 9. Te aaafee tɛŋŋ ni Daniel wolo lɛ he aaaba sɛɛnamɔ aha wɔ, titri lɛ bianɛ, kɛ yɛ naagbee be lɛ mli lɛ?
8 Eyɛ faŋŋ akɛ, Daniel wolo lɛ hiɛ fãi enyɔ ni yɔɔ srɔto kwraa. Ekome gbaa bɔ ni saji ba ha, ni ekroko lɛ ji gbalɛ nɔ̃. Enyɔ lɛ fɛɛ baanyɛ atswa wɔhemɔkɛyeli ama shi. Nɔ ni wieɔ bɔ ni saji ba ha lɛ tsɔɔ wɔ akɛ, Yehowa Nyɔŋmɔ jɔ́ɔ mɛi ni hiɛɔ amɛ emuuyeli mli amɛhaa lɛ lɛ. Fãi ni ji gbalɛ nɔ̃ lɛ tswaa hemɔkɛyeli emaa shi kɛtsɔɔ tsɔɔmɔ ni etsɔɔ akɛ Yehowa leɔ bɔ ni yinɔsane baatamɔ aha afii ohai abɔ—afii akpei abɔ po—kɛtsɔɔ hiɛ lɛ nɔ.
9 Gbalɛi srɔtoi ni Daniel ŋmala eshwie shi lɛ gbalaa jwɛŋmɔ kɛyaa Nyɔŋmɔ Maŋtsɛyeli lɛ nɔ. Yɛ be mli ni wɔnaa gbalɛi nɛɛ amlibaa lɛ, ewajeɔ wɔhemɔkɛyeli, ni nakai ji wɔ yiŋtsɔmɔ hu, akɛ naagbee be lɛ mli wɔyɔɔ lɛ. Shi mɛi ni wieɔ shiɔ saji lɛ ateŋ mɛi komɛi tutuaa Daniel ákɛ, aŋmala gbalɛi ni yɔɔ wolo ni egbɛi kã nɔ lɛ mli lɛ beni saji ni eŋmala lɛ eba mli momo sɛɛ. Kɛji akɛ nɔ ni amɛkɛɔ nɛɛ ji anɔkwale lɛ, no lɛ enɛ baatee sanebimɔi ni hiɛdɔɔ yɔɔ mli ashi yɛ nɔ ni Daniel wolo lɛ gba yɛ naagbee be lɛ he lɛ he. Gbɔmɛi ni amɛyiŋ feɔ amɛ kɔshikɔshi lɛ hu kɛ ŋwanejee biɔ wolo lɛ mli saji lɛ ahe sane. No hewɔ lɛ, nyɛhaa wɔpɛia mli wɔkwɛa.
Aaye Sane!
10. Mɛɛ shishinumɔ naa afolɔɔ Daniel wolo lɛ naa lɛ?
10 Ŋɔɔ ohe akɛ oyɛ saneyelihe, ni aaye mɔ ko sane. Mlalelɔ ni damɔ nɔyeli lɛ najiaŋ lɛ miima nɔ mi akɛ mɔ ni fãa ehe lɛ eye shishiumɔ he fɔ. Ojogbaŋŋ, Daniel wolo lɛ kɛ ehe tsɔɔ akɛ wolo ni ji anɔkwale ni Hebri gbalɔ ko ni hi shi yɛ afii ohai kpawo kɛ afii ohai ekpaa D.Ŋ.B. lɛ mli lɛ ŋma. Shi mɛi ni wieɔ shiɔ lɛ lɛ kɛɔ akɛ wolo lɛ ji shishiumɔ nɔ̃. No hewɔ lɛ, klɛŋklɛŋ lɛ, nyɛhaa wɔkwɛa akɛ ani wolo lɛ fã ni ji saji ni aŋmala lɛ kɛ yinɔsane mli anɔkwa saji kpãa gbee lo?
11, 12. Mɛni ba naafolɔmɔ akɛ Belshazar ji adesã mli gbɔmɔ ko kɛkɛ lɛ nɔ?
11 Ŋɔɔ lɛ akɛ wɔmiisusu nɔ ni abaanyɛ atsɛ lɛ maŋtsɛ ni elaaje lɛ sane lɛ he. Daniel yitso 5 lɛ tsɔɔ akɛ Belshazar miiye nɔ akɛ maŋtsɛ yɛ Babilon beni abutu nakai maŋtiase lɛ yɛ afi 537 D.Ŋ.B. lɛ. Mɛi ni wieɔ shiɔ saji lɛ je sane nɛɛ he ŋwane, ejaakɛ yɛ Biblia lɛ sɛɛ lɛ, anaaa Belshazar gbɛi yɛ he ko he ko. Yɛ no najiaŋ lɛ, blema yinɔsaneŋmalɔi wieɔ Nabonidus he akɛ Babilonia naagbee maŋtsɛ.
12 Shi yɛ afi 1854 mli lɛ, atsa shi ana sũ mli nibii ni áshɔ̃ amɛ kutrukui bloblo ni aŋmala nibii yɛ nɔ yɛ blema Babilonia maŋtiase Ur, ni yɔɔ ŋmɛnɛŋmɛnɛ beaŋ Iraq lɛ. Nɔ ni fata blema tɛtaoi anɔ niŋmaai nɛɛ ahe ji sɔlemɔ ko ni emli lɛ Maŋtsɛ Nabonidus wie “Bel-sar-ussur, mibi nukpa” lɛ he. Ehe bahia ni mɛi ni wieɔ shiɔ saji lɛ po akpɛlɛ nɔ akɛ: Daniel wolo lɛ mli Belshazar lɛ nɛ. No hewɔ lɛ, maŋtsɛ ni elaaje lɛ elajeko, na kɛkɛ ni anako ale lɛ yɛ je lɛŋ woji amli. Enɛ ji odaseyelii babaoo ni tsɔɔ akɛ Daniel niŋmaai lɛ ji anɔkwale diɛŋtsɛ lɛ ateŋ ekome pɛ. Odaseyeli ni tamɔ nɛkɛ tsɔɔ akɛ Daniel wolo lɛ ji Nyɔŋmɔ Wiemɔ lɛ fã lɛɛlɛŋ, ni esa akɛ wɔsusu he jogbaŋŋ bianɛ, yɛ naagbee be lɛ mli.
13, 14. Namɔ ji Nebukadnezar, ni mɛɛ apasa nyɔŋmɔ etu ehe eha titri?
13 Nɔ ni yɔɔ Daniel wolo lɛ mli hu ji gbalɛi ni tsɔɔ bɔ ni ato jeŋ hewalɛi lɛ anaa aha kɛ amɛnɔyelɔi lɛ ateŋ mɛi komɛi anifeemɔi. Abaanyɛ atsɛ nɔyelɔi nɛɛ ateŋ mɔ kome akɛ tabilɔ ni to maŋtsɛyeli ko ema shi. Ákɛ mɔ ni baata Babilon maŋtsɛsɛi lɛ nɔ lɛ, lɛ kɛ esraafoi lɛ kpata Mizraim Farao Neko asraafoi lɛ ahiɛ yɛ Karkemish. Shi shɛɛ sane ko ha Babilonia maŋtsɛ bi kunimyelɔ lɛ shi mɛi ni eye amɛnɔ kunim lɛ ashishi ni eeebɛɛ kwraa lɛ eha etatsɛmɛi lɛ. Akɛni enu akɛ etsɛ Nabopolassar egbo hewɔ lɛ, oblanyo nɛɛ ni atsɛɔ lɛ Nebukadnezar lɛ bata maŋtsɛsɛi lɛ nɔ yɛ afi 624 D.Ŋ.B. Eto maŋtsɛyeli ko ni shikpɔŋkukuji ni tsutsu lɛ eji Ashur nɔ̃ lɛ fata he lɛ ema shi yɛ afii 43 ni ekɛye maŋtsɛ lɛ mli, ni elɛɛ enɔyelihe lɛ mli kɛtee Siria kɛ Palestina kɛyashi Mizraim husui anaa.
14 Nɔ ni Nebukadnezar tuu ehe eha yɛ jamɔ mli titri ji Marduk, Babilon nyɔŋmɔ titri lɛ. Maŋtsɛ lɛ kɛ ekunimyelii lɛ fɛɛ ahe yijiemɔ ha Marduk. Nebukadnezar mamɔ gbatsũi eha Marduk kɛ Babilonia nyɔŋmɔi krokomɛi babaoo, ni efee amɛ fɛfɛo yɛ Babilon. Ebaanyɛ efee akɛ Babilonia maŋtsɛ lɛ jɔɔ shika amaga ni ekɛma shi yɛ Dura ŋa lɛ nɔ lɛ nɔ eha Marduk. (Daniel 3:1, 2) Ni etamɔ nɔ ni Nebukadnezar kɛ ehe fɔ̃ ŋkunyaayeli nɔ waa yɛ be mli ni etoɔ etawuu nifeemɔi ahe gbɛjianɔ lɛ.
15, 16. Mɛni Nebukadnezar fee kɛha Babilon, ni mɛni ba beni epupuu ehe yɛ egbojee lɛ he lɛ?
15 Beni Nebukadnezar gbe Babilon gbogboi wuji ni bɔ he enyɔ ni etsɛ je etswaa shishi lɛ naa lɛ, eha maŋtiase lɛ fee tamɔ nɔ ni anyɛŋ aye enɔ kunim. Bɔni afee ni eha emaŋnyɛ Medianyo lɛ ni shweɔ emaŋ ŋmeŋmei kɛ kooi lɛ tsui anyɔ emli lɛ, abɔ amaniɛ akɛ Nebukadnezar fee abɔɔi ni tsotsoro shi—ni ji, blema je lɛ naakpɛɛ nibii kpawo lɛ ateŋ ekome. Efee Babilon maŋtiase ni atswa gbogboi wuji ni fe fɛɛ awo he yɛ nakai be lɛ mli. Ni kwɛ bɔ ni ewó ehe nɔ yɛ nakai apasa jamɔ shikwɛ̃ɛhe lɛ hewɔ!
16 Gbi ko lɛ Nebukadnezar pupuu ehe akɛ, ‘Ani jeee Babilon Kpeteŋkpele lɛ ni mima lɛ nɛ?’ Shi, taakɛ Daniel 4:30-36 tsɔɔ lɛ, “maŋtsɛ lɛ naa enyɔɔɔ shi,” ni eye sɛkɛ. Efee mɔ ni nyɛɛɛ aye maŋtsɛ afii kpawo, ni ekpe jwɛi tamɔ bɔ ni Daniel gba fɔ̃ shi lɛ pɛpɛɛpɛ. Kɛkɛ ni aku sɛɛ akɛ emaŋtsɛyeli lɛ ha lɛ ekoŋŋ. Ani ole nɔ ni enɛɛmɛi fɛɛ tsɔɔ yɛ gbalɛ naa? Ani obaanyɛ otsɔɔ bɔ ni emlibaa wulu lɛ kɛ wɔ baa naagbee be lɛ he kpaakpa lɛ mli?
Gbalɛ Mli Saji lɛ Ahalamɔ
17. Te obaatsɔɔ gbalɛ mli lamɔ ni Nyɔŋmɔ tsu akɛbaha Nebukadnezar yɛ enɔyeli afi ni ji enyɔ akɛ jeŋ nɔyelɔ lɛ mli lɛ mli oha tɛŋŋ?
17 Agbɛnɛ nyɛhaa wɔhalaa gbalɛ mli saji ni yɔɔ Daniel wolo lɛ mli lɛ ekomɛi. Yɛ Nebukadnezar nɔyeli afi ni ji enyɔ akɛ jeŋ nɔyelɔ yɛ Biblia gbalɛ naa (afi 606 kɛ 605 D.Ŋ.B.) lɛ mli lɛ, Nyɔŋmɔ ha ela lamɔ ko ni yɔɔ gbeyei waa. Taakɛ Daniel yitso 2 tsɔɔ lɛ, lamɔ lɛ kɔɔ amaga kpeteŋkpele ko ni eyitso ji shika, etsitsi kɛ eniji lɛ jwiɛtɛi ni, emusu kɛ eshwuɔi lɛ akɔɔble ni, enaji lɛ dade ni, enane tokota lɛ dade kɛ sũ ni akɛfutu lɛ he. Amaga lɛ fãi srɔtoi lɛ damɔ shi kɛha mɛni?
18. Lamɔ mli amaga lɛ shika yitso, ejwiɛtɛi tsitsii kɛ eniji, kɛ akɔɔble musu kɛ shwuɔi lɛ damɔ shi kɛha mɛni?
18 Nyɔŋmɔ gbalɔ lɛ kɛɛ Nebukadnezar akɛ: “Bo maŋtsɛ ji . . . shika yitso lɛ.” (Daniel 2:37, 38) Nebukadnezar batsɔ maŋtsɛmɛi awekukpaa ko ni yeɔ Babilonia Maŋtsɛyeli lɛ nɔ maŋtsɛ lɛ yitso. Media kɛ Persia, ni amaga lɛ jwiɛtɛi tsitsii kɛ eniji lɛ damɔ shi kɛha amɛ lɛ butu lɛ. Nɔ ni nyiɛ sɛɛ ba ji Hela Maŋtsɛyeli lɛ, ní akɔɔble musu kɛ shwuɔi lɛ damɔ shi kɛha lɛ lɛ. Te fee tɛŋŋ ni nakai jeŋ hewalɛ lɛ je shishi?
19, 20. Namɔ ji Alexander Kpeteŋkpele lɛ, ni mɛni etsu yɛ Hela ni eha ebatsɔ jeŋ hewalɛ lɛ mli?
19 Yɛ afii ohai ejwɛ D.Ŋ.B. lɛ, oblanyo ko tsu nitsumɔ ko ni sa kadimɔ waa yɛ Daniel gbalɛ lɛ mlibaa mli. Afɔ́ lɛ yɛ afi 356 D.Ŋ.B., ni je lɛ tsɛ́ lɛ Alexander Kpeteŋkpele lɛ. Beni aju shi agbe etsɛ, Philip, yɛ afi 336 D.Ŋ.B. lɛ, Alexander ni eye afii 20 lɛ bata Makedonia maŋtsɛsɛi lɛ nɔ.
20 Alexander je kunimyeli he tafãa ko shishi yɛ May shishijee gbɛ yɛ afi 334 D.Ŋ.B. Eyɛ asraafoi fioo ní he esa waa, ni ji 30,000 ni nyiɛɔ shikpɔŋ kɛ okpɔŋɔnɔtaralɔi 5,000. Alexander ye eklɛŋklɛŋ kunim yɛ Persiabii lɛ anɔ, yɛ Granicus Faa ni yɔɔ Asia Bibioo lɛ kooyi-anaigbɛ (amrɔ nɛɛ Turkey) lɛ naa yɛ afi 334 D.Ŋ.B. Beni shɛɔ afi 326 D.Ŋ.B. lɛ, kunimyelɔ ni ejɔɔɔ ehe nɛɛ eba Persiabii lɛ ashi, ni etee shɔŋŋ aahu kɛyashɛ Indus Faa lɛ bokagbɛ, yɛ he ni ŋmɛnɛŋmɛnɛ beaŋ Pakistan yɔɔ lɛ. Shi aye Alexander nɔ kunim yɛ enaagbee tawuu lɛ mli beni eyɔɔ Babilon lɛ. Yɛ June 13, 323 D.Ŋ.B., beni eye afii 32 kɛ nyɔji 8 pɛ lɛ, Alexander ba ehe shi eha henyɛlɔ ni he wa fe fɛɛ, ni ji gbele. (1 Korintobii 15:55) Shi, Hela batsɔ jeŋ hewalɛ, kɛtsɔ ekunimyelii lɛ anɔ, taakɛ agba afɔ̃ shi yɛ Daniel gbalɛ lɛ mli lɛ.
21. Kɛfata Roma Maŋtsɛyeli lɛ he lɛ, mɛɛ jeŋ hewalɛ kroko lamɔ mli amaga lɛ dade naji lɛ fee ehe mfoniri?
21 Mɛni amaga kpeteŋkpele lɛ dade naji lɛ damɔ shi kɛha? Ojogbaŋŋ, Roma ni tamɔ dade lɛ ji mɔ ni jwara Hela Maŋtsɛyeli lɛ. Akɛni ebɛ bulɛ ko kwraa kɛha Nyɔŋmɔ Maŋtsɛyeli lɛ ni Yesu Kristo shiɛ etsɔɔ lɛ hewɔ lɛ, Romabii lɛ gbe lɛ yɛ sɛŋmɔtso nɔ yɛ afi 33 Ŋ.B. Yɛ mɔdɛŋ ni Roma bɔ koni ekpata anɔkwa Kristojamɔ hiɛ hewɔ lɛ, ewa Yesu kaselɔi lɛ ayi. Shi kɛlɛ, jeee Roma Maŋtsɛyeli lɛ pɛ Nebukadnezar lamɔ mli amaga lɛ dade naji lɛ fee ehe mfoniri, shi moŋ nɔ ni kwɛ̃ kɛjɛ mli yɛ maŋkwramɔŋ lɛ hu—Anglo-Amerika Jeŋ Hewalɛ lɛ.
22. Yɛ mɛɛ gbɛ nɔ lamɔ mli amaga lɛ yeɔ ebuaa wɔ koni wɔna akɛ wɔshɛ shɔŋŋ yɛ naagbee be lɛ mli?
22 Nikasemɔ ni mɔɔ shi yeɔ odase akɛ wɔshɛ shɔŋŋ diɛŋtsɛ yɛ naagbee be lɛ mli, ejaakɛ wɔshɛ lamɔ mli amaga lɛ nane tokotai ni fã dade kɛ fã sũ lɛ nɔ. Ŋmɛnɛŋmɛnɛ beaŋ nɔyelii komɛi tamɔ dade loo amɛkɛ nɔnyɛɛ yeɔ mɛi anɔ, yɛ be mli ni ekrokomɛi tamɔ sũ. Yɛ bɔ ni sũ, ni akɛfee “gbɔmɛi aseshibii lɛ” waaa lɛ fɛɛ sɛɛ lɛ, nɔyelɔi ni tamɔ dade lɛ eŋmɛ gbɔmɛi foji lɛ agbɛ koni amɛna nɔ ko kɛɛmɔ yɛ nɔyelii ni yeɔ amɛnɔ lɛ amli. (Daniel 2:43; Hiob 10:9) Shi kɛlɛ, yiwalɛ nɔyeli kɛ gbɔmɛi foji lɛ nyɛɛɛ akpɛtɛ jogbaŋŋ tamɔ bɔ ni dade kɛ sũ nyɛɛɛ akpɛtɛ lɛ. Shi etsɛŋ ni Nyɔŋmɔ Maŋtsɛyeli lɛ kɛ jeŋ ni maŋkwramɔ eha emli egbála nɛɛ baaba naagbee.—Daniel 2:44.
23. Te obaatsɔɔ lamɔ kɛ ninaai ni Daniel na yɛ Belshazar klɛŋklɛŋ nɔyeli afi lɛ mli lɛ mli oha tɛŋŋ?
23 Daniel gbalɛ ni náa mɔ nɔ hewalɛ waa lɛ yitso 7 lɛ hu kɛ wɔ baa naagbee be lɛ mli. Egbaa sane ko ni ba yɛ Babilonia Maŋtsɛ Belshazar klɛŋklɛŋ afi lɛ mli. Kɛkɛ ni beni Daniel eye afii 70 kɛyaa lɛ ‘ela lamɔ ko ni ena ninaai yɛ eyitsoŋ, beni ekã esaa lɛ nɔ lɛ.’ Kwɛ bɔ ni nakai ninaai lɛ wo ehe gbeyei ha! Ebo akɛ: “Ni naa, ŋwɛi kɔɔyɔi ejwɛ lɛ fã yɛ ŋshɔ kpeteŋkpele lɛ hiɛ. Ni kooloi wuji ejwɛ fã kpo kɛjɛ ŋshɔ lɛŋ, soro eko, soro eko.” (Daniel 7:1-8, 15) Mɛɛ kooloi ni he yɔɔ naakpɛɛ nɛ! Klɛŋklɛŋ nɔ̃ lɛ tamɔ jata ni yɔɔ fiji, nɔ ni ji enyɔ lɛ tamɔ oshishibrishi. Kɛkɛ ni kootsɛ ni yɔɔ fiji ejwɛ kɛ yitsei ejwɛ ba! Kooloo ni ji ejwɛ ni he wa waa lɛ yɛ dade nyanyɔji kɛ akolontoi nyɔŋma. Ni akolonto “bibioo” ko te shi yɛ ekolontoi nyɔŋma lɛ ateŋ ni eyɛ ‘hiŋmɛii tamɔ gbɔmɔ hiŋmɛi’ “kɛ naabu ni wieɔ nibii wuji.” Mɛɛ bɔɔ nii ni he yɔɔ naakpɛɛ nɛ!
24. Taakɛ Daniel 7:9-14 tsɔɔ lɛ, mɛni Daniel na yɛ ŋwɛi, ni mɛni ninaa nɛɛ tsɔɔ?
24 No sɛɛ lɛ, Daniel ninaa lɛ tsɔ kɛtee ŋwɛigbɛ. (Daniel 7:9-14) Ana ni Yehowa Nyɔŋmɔ, “Mɔ ni Eye Gbi Pii Lɛ” ta maŋtsɛsɛi nɔ yɛ anunyam mli akɛ Kojolɔ. ‘Mɛi akpeiakpe sɔmɔɔ lɛ, ni mɛi akpei nyɔŋma toi akpei nyɔŋma damɔ ehiɛ.’ Akɛni Nyɔŋmɔ bu kooloi lɛ fɔ́ hewɔ lɛ, ehé nɔyeli kɛjɛ amɛdɛŋ ni ekpata kooloo ni ji ejwɛ lɛ hiɛ. Akɛ naanɔ nɔyeli ni baaye “majimaji kɛ asafoi kɛ wiemɔi” anɔ wo “mɔ ko tamɔ gbɔmɔ bi” lɛ dɛŋ. Enɛ kɔɔ naagbee be lɛ kɛ gbɔmɔ Bi, Yesu Kristo, ni akɛ lɛ ta maŋtsɛsɛi nɔ yɛ afi 1914 mli lɛ he.
25, 26. Mɛɛ sanebimɔi baanyɛ ate shi kɛ́ wɔkane Daniel wolo lɛ, ni mɛɛ wolo baanyɛ aye abua wɔ koni wɔha hetoo?
25 Bɔ fɛɛ bɔ ni eji lɛ, mɛi ni kaneɔ Daniel wolo lɛ yɛ sanebimɔi babaoo. Ákɛ nɔkwɛmɔnɔ lɛ, kooloi ejwɛ ni yɔɔ Daniel yitso 7 lɛ damɔ shi kɛha mɛni? Mɛni ji gbalɛ “otsii nyɔŋmai kpawo,” ni yɔɔ Daniel 9:24-27 lɛ mlitsɔɔmɔ? Ni Daniel yitso 11 lɛ kɛ gbalɛ mli béi ni kã “kooyigbɛ maŋtsɛ lɛ” kɛ “wuoyigbɛ maŋtsɛ lɛ” teŋ lɛ hu? Mɛni wɔbaanyɛ wɔkpa gbɛ kɛjɛ maŋtsɛmɛi nɛɛ adɛŋ yɛ naagbee be lɛ mli?
26 Yehowa kɛ sɛɛyoomɔ ni akɛnaa nɛkɛ saji nɛɛ anaa eha etsuji ni yɔɔ shikpɔŋ nɔ ni afɔ amɛ mu lɛ, ‘Mɔ ni Yɔɔ Ŋwɛi Shɔŋŋ lɛ mɛi krɔŋkrɔŋi lɛ’ taakɛ atsɛɔ amɛ yɛ Daniel 7:18 lɛ. Agbɛnɛ hu “tsulɔ anɔkwafo kɛ nilelɔ” lɛ eto gbɛjianɔ koni wɔnu gbalɔ Daniel niŋmaai ni jɛ mumɔŋ lɛ shishi lolo. (Mateo 24:45) Wɔnine eshɛ enɛ nɔ agbɛnɛ kɛtsɔ Bó Daniel Gbalɛ Wiemɔ lɛ Toi! wolo lɛ ni afee ni ajie lɛ kpo nyɛsɛɛ nɛɛ lɛ nɔ. Wolo ni hiɛ baafai 320 kɛ emli mfonirii fɛfɛji nɛɛ wieɔ Daniel wolo lɛ fãi lɛ fɛɛ he. Ewieɔ gbalɛ fɛɛ gbalɛ ni tswaa mɔ hemɔkɛyeli emaa shi kɛ saji fɛɛ ni gbalɔ Daniel ni asumɔɔ esane waa lɛ ŋmala eshwie shi lɛ ahe.
Eshishinumɔ Diɛŋtsɛ Kɛha Wɔgbi Nɛɛ
27, 28. (a) Mɛni ji anɔkwale yɛ gbalɛi ni yɔɔ Daniel wolo lɛ mli lɛ amlibaa he? (b) Mɛɛ be wɔyɔɔ mli bianɛ lɛ, ni mɛni esa akɛ wɔfee?
27 Susumɔ sane titri ni sa kadimɔ nɛɛ he: Gbalɛi ni yɔɔ Daniel wolo lɛ mli lɛ fɛɛ eba mli ja emlitsɔɔmɔi fioo ko pɛ. Ákɛ nɔkwɛmɔnɔ lɛ, wɔmiina jeŋ shihilɛ ni lamɔ mli amaga ni yɔɔ Daniel yitso 2 lɛ naji lɛ fee ehe mfoniri lɛ bianɛ. Afɛne Daniel yitso 4 lɛ mli tsoku lɛ kɛtsɔ Mesia Maŋtsɛ, Yesu Kristo, ni akɛ lɛ ta maŋtsɛsɛi nɔ yɛ afi 1914 mli lɛ nɔ. Hɛɛ, taakɛ agba afɔ̃ shi yɛ Daniel yitso 7 lɛ, nakai beaŋ Mɔ ni Eye Gbii Pii lɛ kɛ nɔyeli ha gbɔmɔ Bi lɛ.—Daniel 7:13, 14; Mateo 16:27–17:9.
28 Gbii 2,300 ni yɔɔ Daniel yitso 8 lɛ kɛ agbɛnɛ hu gbii 1,290 lɛ kɛ gbii 1,335 ni yɔɔ Daniel yitso 12 lɛ fɛɛ eho—amɛ́yaje wɔ sɛɛ yɛ be naa. Daniel yitso 11 lɛ kasemɔ tsɔɔ akɛ béi ni kã “kooyigbɛ maŋtsɛ lɛ” kɛ “wuoyigbɛ maŋtsɛ lɛ” teŋ lɛ eshɛ enaagbee fãi lɛ ahe. Enɛɛmɛi fɛɛ kɛ eko fataa Ŋmalɛ mli odaseyeli ni tsɔɔ akɛ wɔshɛ shɔŋŋ yɛ naagbee be lɛ mli lɛ he. Bɔ ni he ni wɔshɛ yɛ be naa lɛ yɔɔ srɔto ha hewɔ lɛ, mɛni esa akɛ wɔtswa wɔfai shi akɛ wɔbaafee? Ŋwanejee ko bɛ he akɛ, esa akɛ wɔbo Yehowa Nyɔŋmɔ gbalɛ wiemɔ lɛ toi.
Te Obaaha Hetoo Oha Tɛŋŋ?
• Mɛni Nyɔŋmɔ taoɔ ni adesai fɛɛ ale yɛ wɔgbii nɛɛ ahe?
• Daniel wolo lɛ baanyɛ atswa wɔhemɔkɛyeli ama shi yɛ mɛɛ gbɛ nɔ?
• Mɛɛ nibii yɔɔ Nebukadnezar lamɔ mli amaga lɛ he, ni mɛni he mfoniri enɛɛmɛi feɔ?
• Mɛni sa kadimɔ yɛ gbalɛi ni anaa yɛ Daniel wolo lɛ mli lɛ amlibaa he?
[Nikasemɔ lɛ he Sanebimɔ]