Wɔji Mɛi ni Yɔɔ Hemɔkɛyeli

Hemɔkɛyeli ni Atswaa Amaa Shi Kɛtsɔ Biblia Kasemɔ Nɔ yɛ India

KƐJƐ Himalaya Gɔji ni dara waa ni snoo ehà nɔ fɛɛ yɛ kooyigbɛ lɛ kɛyashi India Ŋshɔ lɛ naa ní lamɔ fãa yɛ jɛmɛ lɛ kɛtee wuoyigbɛ lɛ, ji he ni India ni ji shikpɔŋ ko ni yɔɔ srɔto yɛ eshikamɔ kɛ jamɔ gbɛfaŋ lɛ yɔɔ. Yɛ emli bii ayifalɛ ni fe akpekpei toi akpe kome lɛ mli lɛ, aaafee oha mlijaa 83 ji Hindubii, oha mlijaa 11 ji Muslimbii, ni mɛi ni eshwɛ lɛ bafeɔ mɛi ni tamɔ Kristofoi, Sikhbii, Buddhabii, kɛ Jainbii. Amɛ fɛɛ amɛnáa jamɔ mli heyeli mli ŋɔɔmɔ. The World Book Encyclopedia lɛ kɛɛ akɛ, “Jamɔ tsuɔ gbɛfaŋnɔ ko ni he hiaa he nii yɛ Indiabii ashihilɛ mli.”

Ní amɛaahi shi yɛ amɛ Kristofoi ahemɔkɛyeli naa lɛ tsɔɔ mɛi ni Yehowa Odasefoi ji jogbaŋŋ, mɛi ni amɛyibɔ fe 21,200 yɛ India lɛ. Taakɛ amɛmumɔŋ hefatalɔi ni yɔɔ je lɛŋ hei krokomɛi lɛ ji lɛ, Odasefoi ni yɔɔ India lɛ yɔseɔ akɛ eji hegbɛ ni amɛná akɛ amɛkɛaaye amɛbua amɛ akutsoŋbii lɛ kɛtswa hemɔkɛyeli ko ni mli wa amɛma shi yɛ Nyɔŋmɔ Wiemɔ ni ji Ŋmalɛ Krɔŋkrɔŋ lɛ mli. (2 Timoteo 3:16, 17) Susumɔ bɔ ni fee ni weku ko ni yɔɔ Chennai yɛ India wuoyigbɛ lɛ baná Biblia mli anɔkwa nilee lɛ he okwɛ.

Yɛ be ni tsɔ hiɛ dani amɛkɛ Yehowa Odasefoi aaakpe lɛ, weku nɛɛ ji mɛi ni yɔɔ ekãa yɛ Katolik mumɔŋ sɔlemɔi akui amli, ni amɛkɛɔ akɛ amɛnaa ninaa, amɛwieɔ lilɛii srɔtoi, ni amɛtsaa helai. Amɛhe gbɛi waa yɛ sɔlemɔ lɛ kɛ akutso lɛ mli, ni amɛtsɛɔ weku lɛ mli bii lɛ ekomɛi po akɛ “tsɔɔlɔ,” ni shishi ji “nuntsɔ.” Kɛkɛ ni gbi ko lɛ Odasefonyo ko yasara weku lɛ ni etsɔɔ amɛ kɛjɛ Biblia lɛ mli akɛ Yesu ji Nyɔŋmɔ Bi, shi jeee Nyɔŋmɔ Ofe, taakɛ mɛi babaoo heɔ amɛyeɔ lɛ. Odasefonyo lɛ tsɔɔ amɛ hu akɛ Nyɔŋmɔ gbɛi ji Yehowa ni ákɛ, Yehowa yiŋtoo kɛha shikpɔŋ lɛ ji ni efee lɛ paradeiso fɛfɛo.—Lala 83:19; Luka 23:43; Yohane 3: 16.

Akɛni amɛbuɔ Nyɔŋmɔ Wiemɔ lɛ ni amɛmiisumɔ nɔ ni amɛnu lɛ hewɔ lɛ, weku nɛɛ mli bii lɛ kpɛlɛ nɔ akɛ Yehowa Odasefoi kɛ amɛ abakase Biblia lɛ daa. Enɛ kɛ hefɛoyeli jɛ amɛ sɔlemɔ lɛ mli bii ni le amɛ lɛ aŋɔɔ kɛba. Fɛɛ sɛɛ lɛ, weku lɛ tswa amɛfai shi lolo akɛ amɛbaatsa amɛ Biblia kasemɔ lɛ nɔ. Beni amɛ nilee bɔi hiɛyaa ni amɛhemɔkɛyeli lɛ mli bawa jogbaŋŋ lɛ, amɛkpa amɛ apasa jamɔŋ nifeemɔi lɛ. Ŋmɛnɛ, weku lɛ mli bii etɛ ji Odasefoi ni abaptisi amɛ ni yɔɔ ekãa, ni nyɛ lɛ sɔmɔɔ akɛ gbɛgbalɔi awalɔ be fɛɛ be ni hegbɛ lɛ aaaba.

Hemɔkɛyeli ni Akɛaaye Gbɛtsii Nii Anɔ

Hemɔkɛyeli kɛ ekãa babaoo he bahia Sunder Lal, ni ji oblanyo ko ni yɔɔ akrowa ko ni yɔɔ Punjab lɛ mli bɔni afee ni enyɛ egba mɛi krokomɛi Nyɔŋmɔ Maŋtsɛyeli lɛ he sanekpakpa lɛ . (Mateo 24:14) Yiŋtoo kome ji akɛ, eshi eweku lɛ kɛ akrowa lɛ mli nyɔŋmɔi pii ajamɔ hemɔkɛyelii lɛ koni ebajá Yehowa, anɔkwa Nyɔŋmɔ lɛ. Nɔ kroko hu ji akɛ, Sunder Lal bɛ naji.

Kɛyashi afi 1992 mli lɛ, Sunder Lal bafee mɔ ko ni gbɛjianɔtoo kome lɛ nɔŋŋ ji nɔ ni etsuɔ he nii daa yɛ eshihilɛ mli. Etsuɔ nii akɛ datrɛfonyo sɛɛyelɔ, ni efataa lɛ diɛŋtsɛ eweku lɛ he yɛ nyɔŋmɔi srɔtoi ajamɔ mli yɛ amɛ jamɔ mli tsɔɔlɔ ni amɛhala lɛ gbɛtsɔɔmɔ naa. Kɛkɛ ni gbi ko gbɛkɛ lɛ, egbee shi beni efoɔ oketeke gbɛ ko mli lɛ. Oketeke ko batsɔ enɔ ni efolɔ enaji enyɔ lɛ fɛɛ kɛjɛ eshwuɔ he. Eyɛ mli akɛ ehi wala mli moŋ, shi eshihilɛ fite kwraa. Shishinumɔ yɛ he akɛ, Sunder Lal nijiaŋ baje wui  kwraa ni esusu po akɛ ebaasumɔ ni egbe ehe. Eweku lɛ ye bua lɛ, shi etamɔ nɔ ni hiɛnɔkamɔ ko kwraa bɛ ewɔsɛɛ shihilɛ he.

Kɛkɛ ni Yehowa Odasefoi lɛ ateŋ mɔ kome tee Sunder Lal ŋɔɔ, ni etsɔɔ lɛ kɛjɛ Biblia lɛ mli akɛ Nyɔŋmɔ ewo shi akɛ ebaafee shikpɔŋ lɛ paradeiso ni miishɛɛ babaoo yɔɔ mli, ni ekɛ gbɔmɔtsoŋ hewalɛ ni eye emuu baaha mɛi fɛɛ ni sumɔɔ lɛ ni sheɔ lɛ gbeyei lɛ. Sunder Lal kpɛlɛ Biblia mli nikasemɔ nɔ, ni yɛ afi kome mli lɛ ekase nii kɛ hiɛdɔɔ. Afɔ̃ lɛ nine koni eba Kristofoi akpeei, ni yɛ naagbee lɛ etaa enaanyo ko baisikel sɛɛ kɛyaa. Eyɛ mli akɛ enɔtamɔ tɔɔ mɔ waa diɛŋtsɛ moŋ, shi nyɔmɔwoo lɛ da waa. Ená nɔmimaa yɛ nɔ ni ekase yɛ eteemɔŋ Biblia mli nikasemɔ mli lɛ he be mli ni ekɛ mɛi krokomɛi ni heɔ shiwoi ni Nyɔŋmɔ Wiemɔ lɛ kɛhaa lɛ amɛyeɔ lɛɛlɛŋ ni amɛhiɔ shi yɛ Biblia tsɔɔmɔi kɛ gbeekpamɔ naa lɛ kpe lɛ.

Sunder Lal bɔi ekutsoŋbii lɛ sanekpakpa lɛ gbaa, ni yɛ afi 1995 mli lɛ, abaptisi lɛ. Klɛŋklɛŋ kwraa lɛ ekɛ ehe wo sɔɔmɔ nitsumɔ lɛ mli kɛtsɔ ehe shi ni egbalaa kɛyaa shinaai anaa yɛ ekrowa lɛ mli, ni ji nɔ ni efɔɔ feemɔ kɛnyiɛɔ lɛ. Shi amrɔ nɛɛ eyɛ nikeenii ko ni jɛ emumɔŋ nyɛmimɛi lɛ adɛŋ—baisikel kɛ enaji etɛ ni aje gbɛ afee koni akɛ niji “akudɔ.” Yɛ ebaisikel kɛ enaji etɛ lɛ hewɔ lɛ, amrɔ nɛɛ eyɛ heyeli babaoo ni lɛ diɛŋtsɛ enyɛɔ efãa gbɛ kilomitai 12 kɛyaa asafoŋ kpeei. Bei komɛi lɛ, lɛ diɛŋtsɛ etaa kɛtsɔɔ hei ni nugbɔ nɛɔ waa diɛŋtsɛ yɛ; bei komɛi amli lɛ jeŋ dɔlɛ lɛ fe Celsius 43.

Kɛfata kpeeiyaa he lɛ, Sunder Lal kɛ mɛi krokomɛi babaoo ni miisumɔ ni aye abua amɛ lɛ kaseɔ Biblia lɛ koni amɛtswa hemɔkɛyeli amɛma shi yɛ Yehowa, anɔkwa Nyɔŋmɔ lɛ mli. Yɛ anɔkwale mli lɛ, amrɔ nɛɛ abaptisi etsutsu Biblia mli nikaselɔi lɛ ateŋ mɛi kpawo, ni nakai nɔŋŋ abaptisi mɛi etɛ komɛi ni etee amɛŋɔɔ shi ehefatalɔi Odasefoi ji mɛi ni kɛ amɛ kase Biblia lɛ.

Taakɛ Biblia lɛ tsɔɔ lɛ, “jeee mɛi fɛɛ yɔɔ hemɔkɛyeli.” (2 Tesalonikabii 3:2) Shi kɛha mɛi ni “ajie ato naanɔ wala lɛ,” Nyɔŋmɔ Wiemɔ lɛ ní aaakase daa lɛ baanyɛ atswa hemɔkɛyeli ni mli wa ama shi. (Bɔfoi lɛ Asaji 13:48) Nikasemɔ ni tamɔ nɛkɛ hu haa hiŋmɛii anɔ tseɔ kɛ hiɛnɔkamɔ akɛ abaaná wɔsɛɛ be ni yɔɔ miishɛɛ—nɔ ko ni gbɔmɛi ayifalɛ ko ni yɔɔ India lɛ miijie hemɔkɛyeli yɛ mli.

[Shikpɔŋ he mfoniri ni yɔɔ baafa 30]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

AFGANISTAN

PAKISTAN

NEPAL

BHUTAN

CHINA

BANGLADESH

MYANMAR

LAOS

THAILAND

VIETNAM

CAMBODIA

SRI LANKA

INDIA

[He ni Sane lɛ Jɛ]

Mountain High Maps® Copyright © 1997 Digital Wisdom, Inc.