Sanekpakpai Lɛ—Saji Anaataamɔ lɛ Miiya Nɔ

Ani Sanekpakpai lɛ amli sane ni kɔɔ Yesu Kristo fɔmɔ he lɛ ji anɔkwale?

Ani ekɛ Shiɛmɔ ha yɛ Gɔŋ lɛ nɔ?

Ani atee Yesu shi lɛɛlɛŋ?

Ani ewie lɛɛlɛŋ akɛ: “Mi nɔŋŋ ji gbɛ lɛ kɛ anɔkwale lɛ kɛ wala lɛ”?—YOHANE 14:6.

WOLOŊLELƆI aaashɛ 80 esusu saji ni tamɔ nɛkɛ he yɛ Jesus Seminar (Yesu He Kpee) ni afeɔ shii enyɔ daa afi kɛjɛ afi 1985 kɛbaa nɛɛ lɛ mli. Woloŋlelɔi akuu nɛɛ eha sanebimɔi ni tamɔ nɛkɛ lɛ hetoo yɛ gbɛ ni yɔɔ srɔto nɔ. Mɛi ni kɛ amɛhe wo kpee lɛ mli lɛ efɔ̃ oshiki yɛ saji fɛɛ ni akɛɛ Yesu kɛɛ yɛ Sanekpakpai lɛ amli lɛ he. Oshikifɔ̃ɔ wolo tsuru lɛ hiɛ susumɔ ni tsɔɔ akɛ Yesu wie nakai sane lɛ lɛɛlɛŋ. Oshikifɔ̃ɔ wolo ni hiɛ tsuɔ fioo lɛ tsɔɔ akɛ sane lɛ tamɔ wiemɔ ko ni ekolɛ Yesu wie. Oshikifɔ̃ɔ wolo lamululamulu lɛ tsɔɔ akɛ ekolɛ susumɔi lɛ  tamɔ saji ni Yesu wie lɛ fioo, shi jeee lɛ ji mɔ ni wie. Oshikifɔ̃ɔ wolo diŋ lɛ tsɔɔ nɔ ko ni tamɔɔɔ enɛɛmɛi kwraa, ní tsɔɔ akɛ aná wiemɔ lɛ kɛjɛ blemasane ni ba yɛ sɛɛ mli lɛ mli.

Yɛ nifeemɔ gbɛ nɛɛ ni akɛtsuɔ nii hewɔ lɛ, mɛi ni kɛ amɛhe wo Yesu He Kpee lɛ mli lɛ ejie saji otii ejwɛ ni akɛbi sane kɛjɛ shishijee lɛ fɛɛ kɛjɛ jwɛŋmɔ mli. Yɛ anɔkwale mli lɛ, amɛkɛ wolo diŋ efɔ̃ oshiki amɛha wiemɔi ni akɛɛ Yesu wie yɛ Sanekpakpai lɛ amli lɛ oha mlijaa 82. Taakɛ amɛtsɔɔ lɛ, saji ni tee nɔ yɛ Yesu he, ní abɔ he amaniɛ yɛ Sanekpakpai lɛ kɛ woji krokomɛi amli lɛ mli oha mlijaa 16 pɛ bafeɔ anɔkwale.

Saji ni awieɔ ashiɔ Sanekpakpai lɛ jeee nɔ̃ hee. Sanekpakpai lɛ ni atutuaa lɛ ba mli yɛ afi 1774 beni akala saji ni Hermann Reimarus, ni ji Bokagbɛ wiemɔi ahe nilelɔ lɛ ŋma yɛ Hamburg, Germany, yɛ egbele sɛɛ lɛ. Reimarus tée yiŋkɔshikɔshifeemɔ ni naa wa waa shi ni kɔɔ Sanekpakpai lɛ ahe yinɔsane lɛ he yɛ wolo lɛ mli. Saji ni ekɛmu sane naa lɛ damɔ wiemɔi amli ni apɛi kɛ nɔ ni tamɔ saji ni teɔ shi woɔ ehe ni yɔɔ Yesu shihilɛ he Sanekpakpai ejwɛ lɛ mli lɛ nɔ. Kɛjɛ nakai beaŋ kɛbaa nɛɛ, bei pii lɛ mɛi ni wieɔ shiɔ lɛ, etée ŋwanejeei ashi ni kɔɔ bɔ ni Sanekpakpai lɛ ji anɔkwale ha lɛ he, ni yɛ gbɛ ko nɔ lɛ, eefite hekɛnɔfɔɔ ni maŋbii náa yɛ saji ni aŋmala nɛɛ amli lɛ.

Nɔ kome ni yaa nɔ yɛ woloŋlelɔi ni tamɔ nɛkɛ lɛ ateŋ ji akɛ, amɛbuɔ Sanekpakpai lɛ akɛ jamɔŋ adesã ni aŋkroaŋkroi babaoo kɛtsu nii aahu kɛbashɛ wɔnɔ. Saji ni yɛ bei babaoo mli lɛ, woloŋlelɔi ni yiŋ feɔ amɛ kɔshikɔshi lɛ biɔ ji: Ani ekolɛ amɛhemɔkɛyelii lɛ eha Sanekpakpai aŋmalɔi ejwɛ lɛ ewo nɔ ni ji anɔkwale lɛ diɛŋtsɛ he? Ani mra be mli Kristofoi akuu lɛ mli maŋkwramɔŋ nifeemɔi lɛ ha amɛŋma Yesu he sane lɛ aloo amɛkɛ eko fata he? Sanekpakpai lɛ amli te nɔ ni baanyɛ afee amaniɛbɔɔ ni ja moŋ fe nɔ ni eji adesã lɛ?

Gbɔmɛi ni atsɔse amɛ yɛ hei ni akɛɔ akɛ Nyɔŋmɔ bɛ aloo hei ni atsɔɔ mɛi je lɛŋ saji ahe nii lɛ heɔ amɛyeɔ akɛ, Biblia lɛ—ní Sanekpakpai lɛ fata he lɛ—eyi obɔ kɛ blemasaji kɛ adesãi. Ni kɛlɛ, mɛi krokomɛi haoɔ waa yɛ yinɔsane ni tsɔɔ bɔ ni Kristendom kɛ ehe ewo láshishwiemɔ, yiwaa, mligbalamɔ, kɛ nifeemɔ ni teɔ shi woɔ Nyɔŋmɔ jamɔ lɛ hewɔ. Aŋkroaŋkroi ni tamɔ nɛkɛ lɛ enaaa yiŋtoo pɔtɛɛ hewɔ ni esa akɛ abo saji ni aŋmala ni abuɔ lɛ akɛ eyɛ krɔŋkrɔŋ yɛ Kristendom lɛ toi kwraa. Amɛsusuɔ akɛ, nifeemɔi ni eha aná jamɔ mli osatofeemɔ lɛ nyɛŋ afee nɔ ko nɔ ko akɛ ja adesãi ni he bɛ sɛɛnamɔ.

Te osusuɔ tɛŋŋ? Ani esa akɛ oha woloŋlelɔi komɛi ni biɔ yinɔsane ni kɔɔ Sanekpakpai lɛ ahe lɛ he sane lɛ atée yiŋkɔshikɔshifeemɔi ni tamɔ nakai shi yɛ ojwɛŋmɔ mli? Kɛ onu saji komɛi ahe ni tsɔɔ nɔ ni akɛɛ eji adesãi ni jɛ Sanekpakpa ŋmalɔi lɛ anaa lɛ, ani esa akɛ oha enɛ ahoso hekɛnɔfɔɔ ni oyɔɔ yɛ saji ni amɛŋma lɛ ahe? Ani esa akɛ saji ni Kristendom eŋma ni teɔ shi woɔ Nyɔŋmɔ jamɔ lɛ aha obi hekɛnɔfɔɔ ni aaaná yɛ Sanekpakpai lɛ ahe lɛ he sane? Wɔmiifɔ̃ bo nine koni opɛi anɔkwalei lɛ ekomɛi amli okwɛ.

[Mfoniri ni yɔɔ baafa 4]

Ani adesãi loo anɔkwalei yɔɔ Sanekpakpai lɛ amli?

[He ni Sane lɛ Jɛ]

Jesus Walking on the Sea/The Doré Bible Illustrations/Dover Publications

[He ni Mfoniri ni yɔɔ baafa 3 lɛ Jɛ]

Nɔ ni atɛŋ mfoniri lɛ yɛ nɔ, baafai 3-5 kɛ 8: Courtesy of the Freer Gallery of Art, Smithsonian Institution, Washington, D.C.