Sanekpakpai Lɛ—Yinɔsane loo Adesã?

YESU ni jɛ Nazaret—oblanyo ko ni tsake adesai ayinɔsane—lɛ he sane ebafee nɔ ko ni he hiaa waa yɛ shihilɛ mli yɛ je lɛŋ fɛɛ. Eji gbɔmɛi awolokasemɔ ni maŋ lɛ eto he gbɛjianɔ kɛ nɔ ni jeee nakai lɛ fã ko. Gbɔmɛi babaoo buɔ Sanekpakpai lɛ akɛ anɔkwalei kɛ abɛbuai ni bɛ naagbee lɛ ajɛɛhei, tamɔ “Nyɛhaa nyɛwiemɔ afea: Hɛɛ, hɛɛ! dabi, dabi!” (Mateo 5:37, wɔma efã ko nɔ mi.) Yɛ anɔkwale mli lɛ, ekolɛ Sanekpakpai lɛ ji nɔ ni ofɔlɔi kɛtsɔɔ bo nii, kɛ́ amɛji Kristofoi loo amɛjeee Kristofoi.

Yɛ Kristo anɔkwa sɛɛnyiɛlɔi akpe toi akpei abɔ lɛ agbɛfaŋ lɛ, Sanekpakpai lɛ kɛ sane ko ha ni tsɔɔ nuu ni amɛsumɔɔ akɛ amɛaana amanehulu amɛha lɛ ni amɛgboi amɛha lɛ. Agbɛnɛ hu, Sanekpakpai lɛ kɛ nɔ ni aaadamɔ nɔ aná ekãafeemɔ, tsuishiŋmɛɛ, hemɔkɛyeli, kɛ hiɛnɔkamɔ eha kɛ bɔ ni aaaná nɔ ni baakanya mɔ kɛha enɛɛmɛi. Belɛ, ani osusuuu akɛ ebiɔ ni aná odaseyeli ni anyɛŋ awie ashi kɛ́ eeeba lɛ akɛ aaajie saji nɛɛ kɛaajɛ jwɛŋmɔ mli akɛ nɔ ni ji adesãi kɛkɛ? Kɛ osusu hewalɛ babaoo ni Sanekpakpai lɛ ená yɛ adesa susumɔ kɛ nifeemɔ nɔ lɛ he lɛ, ani obiŋ koni akɛ odaseyeli ni kɔneɔ mɔ yiŋ aha kɛ́ mɔ ko miisumɔ ni eha aná yiŋkɔshikɔshifeemɔ yɛ ja ni enɛɛmɛi ja lɛ he?

Wɔmiifɔ̃ bo nine koni osusu sanebimɔi komɛi ni teeɔ sane hesusumɔ shi yɛ Sanekpakpai lɛ ahe lɛ he okwɛ. Bo diɛŋtsɛ kwɛmɔ nɔ ni Sanekpakpai lɛ he nikaselɔi komɛi susuɔ yɛ saji nɛɛ ahe, eyɛ mli akɛ amɛteŋ mɛi komɛi tsɛɛɛ amɛhe Kristofoi moŋ. Kɛkɛ lɛ, obaanyɛ odamɔ nilee ni oná lɛ nɔ omu saji anaa.

SANEBIMƆI NI ABAASUSU HE

◆ Ani Sanekpakpai lɛ baanyɛ afee susumɔ ni ejaaa ni akɛ hesaa ná?

Robert Funk ni ji Jesus Seminar (Yesu He Kpee) lɛ shishitolɔ lɛ kɛɛ akɛ: “Mateo, Marko, Luka kɛ Yohane ‘ji mɛi ni kɛ Mesia lɛ he sane ha’ koni amɛkɛha ekɛ Kristofoi atsɔɔmɔ ni ba yɛ Yesu gbele sɛɛ lɛ akpã gbee.” Shi kɛlɛ, yɛ be mli ni aŋmaa Sanekpakpai lɛ, no mli lɛ mɛi babaoo ni enu Yesu wiemɔi lɛ, ní amɛna enifeemɔi, ní amɛna lɛ yɛ eshitee lɛ sɛɛ lɛ yɛ wala mli lolo. Amɛfolɔɔɔ mɛi ni ŋma Sanekpakpai lɛ anaa kwraa akɛ amɛkɛ shishiumɔ ko tsu nii.

Susumɔ Kristo gbele kɛ shitee lɛ he okwɛ. Jeee Sanekpakpai lɛ pɛ mli Yesu gbele lɛ kɛ shitee lɛ he saji ni akɛ he fɔ̃ɔ nɔ lɛ yɔɔ, shi eyɛ klɛŋklɛŋ wolo ni bɔfo Paulo ŋma ni ji Ŋmalɛ lɛ mli saji lɛ ateŋ eko ni eŋma kɛyaha blema Korinto Kristofoi lɛ hu mli. Eŋma akɛ: “Klɛŋklɛŋ saji ni mikɛha nyɛ lɛ ateŋ eko ji nɔ ni mi hu akɛha mi, akɛ Kristo gbo yɛ wɔhe eshai lɛ ahewɔ yɛ ŋmalɛi lɛ anaa, ni akɛ afũ lɛ, ni akɛ atee lɛ shi ekoŋŋ yɛ gbi ni ji gbi etɛ lɛ nɔ yɛ ŋmalɛi lɛ anaa; ni akɛ ejie ehe kpo etsɔɔ Kefa, no sɛɛ lɛ mɛi nyɔŋma kɛ enyɔ lɛ. No sɛɛ lɛ ejie ehe kpo etsɔɔ aaafee nyɛmimɛi ohai enumɔ loo nɔ̃ shikome, mɛi ni amɛteŋ mɛi pii yɔɔ kɛbashi ŋmɛnɛ, shi mɛi komɛi hu éwɔ. No sɛɛ lɛ ejie ehe kpo etsɔɔ Yakobo, no sɛɛ lɛ bɔfoi lɛ fɛɛ. Shi amɛ fɛɛ amɛ sɛɛ lɛ ejie ehe kpo etsɔɔ mi hu ni mitamɔ mɔ ko ni akpatu afɔ lɛ lɛ.” (1 Korintobii 15:3-8) Mɛi ni tamɔ nɛkɛ ni ye he odase lɛ ji mɛi ni buɔ yinɔsane mli anɔkwalei ni kɔɔ Yesu wala shihilɛ he lɛ he.

Anaaa hesaa babaoo ni ŋmɛnɛŋmɛnɛ beaŋ bii ni wieɔ shiɔ nii lɛ susuɔ akɛ akɛtsu nii yɛ saji amli lɛ yɛ Kristofoi a-Hela Ŋmalɛi lɛ amli. Yɛ no najiaŋ lɛ, afii ohai enyɔ Ŋ.B. lɛ ahe woji amli enɛɛmɛi yɔɔ. No hewɔ lɛ, ato saji komɛi ni agba ni ŋmalɛ fĩii sɛɛ ni kɔɔ Kristo he lɛ he gbɛjianɔ beni hemɔkɛyeli kwamɔ ni jɛ anɔkwa Kristojamɔ mli lɛ teɔ shi fiofio yɛ mɛi ni etsi amɛhe kɛjɛ bɔfoi asafo lɛ he lɛ ateŋ lɛ.—Bɔfoi lɛ Asaji 20:28-30.

 ◆ Ani Sanekpakpai lɛ baanyɛ afee blema adesãi?

Ewa kɛha C. S. Lewis ni ji woloŋmalɔ kɛ mɔ ni wieɔ shiɔ nii lɛ akɛ eeebu Sanekpakpai lɛ akɛ blema adesãi komɛi kɛkɛ. Eŋma akɛ: “Ákɛ yinɔsaneŋmalɔ ni ŋmaa woji lɛ, mile jogbaŋŋ akɛ, bɔ fɛɛ bɔ ni Sanekpakpai lɛ ji ha lɛ, jeee blema adesãi komɛi kɛkɛ ni. Amɛjeee nɔ ko ni ŋaa ni akɛto he gbɛjianɔ lɛ fa bɔ ni aaatsɛ nomɛi akɛ blema adesãi. . . . Wɔleee Yesu shihilɛ lɛ he saji babaoo, ni gbɔmɔ ko gbɔmɔ ko kwraa bɛ ni toɔ blema adesã he gbɛjianɔ ní baaha efee tamɔ nakai.” Miishɛɛ sane hu ji akɛ, eyɛ mli akɛ yinɔsaneŋmalɔ H. G. Wells ni ale lɛ jogbaŋŋ lɛ ekɛɛɛ akɛ Kristofonyo ji lɛ moŋ, shi ekpɛlɛ nɔ akɛ: “[Sanekpakpa ŋmalɔi] ejwɛ lɛ fɛɛ . . . kpãa gbee yɛ gbɔmɔ pɔtɛɛ ni hi shi diɛŋtsɛ ni amɛkɛhaa wɔ lɛ mli; amɛkɛ . . . yiŋtsɔmɔ ni tsɔɔ shihilɛ diɛŋtsɛ he odaseyeli haa wɔ.”

Susumɔ shihilɛ ko ni tsɔɔ beni Yesu ni atee lɛ shi lɛ pue yɛ ekaselɔi lɛ ahiɛ lɛ he okwɛ. Ekolɛ blema adesã he gbɛjianɔtolɔ ko ni he esa waa lɛ baasumɔ ni eha Yesu afee nii yɛ shwɛmɔ nifeemɔhe koni mɛi akwɛ, koni ekɛ ekãa aha wiemɔ ko, aloo ni kane kɛ anunyam akpɛ́ kɛbɔle ehe. Yɛ no najiaŋ lɛ, mɛi ni ŋma Sanekpakpai lɛ wieɔ ehe kɛkɛ akɛ edamɔ ekaselɔi lɛ ahiɛ. Eha amɛkɛ amɛnine ta ehe, kɛkɛ ni ebi akɛ: “Bii, nyɛyɛ niyenii ko lo?” (Yohane 21:5) Woloŋlelɔ Gregg Easterbrook mu sane naa akɛ: “Enɛɛmɛi ji saji babaoo ni tsɔɔ anɔkwale sane, shi jeee adesã he gbɛjianɔtoo.”

Naafolɔmɔ ni tsɔɔ akɛ Sanekpakpai lɛ ji blema adesãi lɛ hu haa ebafeɔ nɔ ni wa akɛ aaahe rabifoi anitsɔɔmɔ gbɛ ni yɔɔ kpɛŋŋ ni akɛtsuɔ nii waa yɛ be mli ni aŋmaa Sanekpakpai lɛ aye. Nɔ ni nakai nifeemɔ gbɛ lɛ kɛtsuɔ nii waa diɛŋtsɛ ji nii ni akɛɔ ni akaseɔ awoɔ yitsoŋ—nii ni akaseɔ awoɔ yitsoŋ yɛ be mli ni atĩɔ mli sɔŋŋ akɛɔ loo ni akɛɔ lɛ shii abɔ. Enɛ haa ehiɔ haa saji ni Yesu wie kɛ enitsumɔi ni akɛha yɛ gbɛ ni ja nɔ, ní akwɛ jogbaŋŋ afee ní tamɔɔɔ saji ni awo he afee lɛ.

◆ Eji Sanekpakpai lɛ ji blema adesãi kulɛ, ani abaanyɛ abua naa mramra yɛ Yesu gbele sɛɛ?

Taakɛ odaseyeli ni yɔɔ tsɔɔ lɛ, aŋma Sanekpakpai lɛ kɛjɛ afi 41 kɛyashi afi 98 Ŋ.B. Yesu gbo yɛ afi 33 Ŋ.B. Enɛ tsɔɔ akɛ kɛ́ akɛ aaato he lɛ, abua saji ni kɔɔ ewala shihilɛ he lɛ naa be fioo beni egbe esɔɔmɔ nitsumɔ lɛ naa lɛ. Enɛ tsĩɔ naataamɔ ni akɛhaa akɛ Sanekpakpai lɛ mli saji ni agbaa lɛ ji blema adesãi komɛi kɛkɛ lɛ naa waa diɛŋtsɛ. Ehe bahia ni aná be koni blema adesãi aya hiɛ. Ákɛ nɔkwɛmɔnɔ lɛ, susumɔ Iliad kɛ Odyssey ni blema Hela lalafolɔ Homer fee lɛ he okwɛ. Mɛi komɛi susuɔ akɛ nakai blema adesãi enyɔ ni ji lala ni afo lɛ mli wiemɔi lɛ ba shihilɛ mli ni ebatsɔ nɔ ko ni ma shi shiŋŋ fe afii ohai abɔ. Ni Sanekpakpai lɛ hu?

Yinɔsaneŋmalɔ Will Durant ŋma yɛ ewolo ni ji Caesar and Christ lɛ mli akɛ: “Ákɛ gbɔmɛi foji fioo ko . . . kɛ gbɔmɔ ko ni náa mɛi anɔ hewalɛ ni abuɔ lɛ waa aaaba shihilɛ mli, mɔ ni jeŋba nɔ kwɔ kɛ mɔ ni kanyaa adesai anyɛmifeemɔ he ninaa lɛ baafee naakpɛɛ nɔ ko ni anyɛŋ ahe aye fe ekrokomɛi fɛɛ ni aŋmala yɛ Sanekpakpai lɛ amli. Yɛ afii ohai enyɔ Saji Amlipɛimɔ Jogbaŋŋ lɛ sɛɛ lɛ, Kristo shihilɛ, esubaŋ, kɛ nitsɔɔmɔ mli saji kukuji lɛ kã he eyɛ faŋŋ lolo bɔ ni sa, ni nomɛi ji nifeemɔ ko ni anáa he miishɛɛ fe fɛɛ eko yɛ Anaigbɛ gbɔmɔ lɛ yinɔsane mli.”

◆ Ani ato Sanekpakpai lɛ ahe gbɛjianɔ yɛ sɛɛ mli koni etsu mra be mli Kristofoi lɛ ahiamɔ nii ahe nii?

Mɛi ni wieɔ shiɔ nii lɛ ekomɛi taa naa akɛ maŋkwramɔ ni mra be mli Kristofoi lɛ kɛ amɛhe wo mli lɛ ha mɛi ni ŋma Sanekpakpai lɛ to Yesu he sane lɛ he gbɛjianɔ loo amɛkɛ eko fata he. Shi kɛlɛ, Sanekpakpai lɛ amlipɛimɔ jogbaŋŋ tsɔɔ akɛ, tsakemɔ ni tamɔ nɛkɛ ni afeɔ kɛfiteɔ nɔ ko lɛ bɛ. Kɛ afee tsakemɔ yɛ Sanekpakpai lɛ mli saji ni kɔɔ Yesu he lɛ mli yɛ lakamɔ ni tee nɔ yɛ klɛŋklɛŋ afii oha Kristofoi ateŋ hewɔ lɛ, mɛni hewɔ ni saji gbohii ni awieɔ yɛ Yudafoi kɛ Jeŋmajiaŋbii ahe lɛ yɔɔ nɔ ni aŋma lɛ mli lolo lɛ?

Anaa eko he nɔkwɛmɔnɔ yɛ Mateo 6:5-7, he ni atsɛ Yesu wiemɔi asɛɛ akɛ ekɛɛ: “Kɛ́ oosɔle lɛ, kaatamɔ osatofoi lɛ; shi amɛsumɔɔ akɛ amɛdamɔ kpeehei lɛ kɛ gbɛjegbɛi akoji lɛ anaa amɛsɔle, koni mɛi ana amɛ. Lɛɛlɛŋ, miikɛɛ nyɛ akɛ: Amɛnine eshɛ amɛnyɔmɔwoo nɔ momo.” Eka shi faŋŋ akɛ enɛ ji nɔ ni akɛbu Yuda jamɔŋ hiɛnyiɛlɔi lɛ fɔ. Yesu tee nɔ ekɛɛ akɛ: “Kɛ́ nyɛmiisɔle lɛ, nyɛkawiea  trilii tamɔ wɔŋjalɔi lɛ [Jeŋmajiaŋbii lɛ]; shi amɛsusuɔ akɛ amɛwiemɔ babaoo hewɔ aaabo amɛ toi.” Kɛtsɔ Yesu wiemɔ ni mɛi ni ŋma Sanekpakpai lɛ tsɛ sɛɛ yɛ nɛkɛ gbɛ nɔ lɛ nɔ lɛ, amɛbɔɔɔ mɔdɛŋ akɛ amɛaatsake mɛi amɛwo jamɔ mli. No mli lɛ amɛmiiŋmala wiemɔi kɛkɛ ni Yesu Kristo wie diɛŋtsɛ lɛ.

Agbɛnɛ hu susumɔ Sanekpakpai lɛ mli saji ni kɔɔ yei ni yasara Yesu gbonyobu lɛ ni amɛnaaa nɔ ko nɔ ko yɛ mli lɛ he okwɛ. (Marko 16:1-8) Taakɛ Gregg Easterbrook tsɔɔ lɛ, “yɛ blema Boka Teŋgbɛ adesai ashihilɛ he nilee mli lɛ, abuɔ odaseyeli ni yei kɛhaa lɛ akɛ nɔ ni anyɛŋ akɛ he afɔ̃ nɔ kwraa: ákɛ nɔkwɛmɔnɔ lɛ, odaseyeli ni hii enyɔ kɛhaa lɛ bafeɔ nɔ ko ni fa ni no aaaha abu yoo fɔ akɛ ekɛ ehe ewo gbalafitemɔ mli, yɛ be mli ni odaseyeli ni yoo kɛhaa lɛ nyɛŋ aha abu nuu fɔ nakai.” Lɛɛlɛŋ, Yesu diɛŋtsɛ kaselɔi lɛ heee yei lɛ amɛyeee! (Luka 24:11) No hewɔ lɛ enyɛŋ efee nɔ ni fɔɔ kaa kwraa akɛ aje gbɛ akɛ sane ni tamɔ nɛkɛ ba shihilɛ mli.

Abɛbuai ni bɛ Hela ŋmalɛi lɛ mli woji ni aŋmalaa kɛmajeɔ lɛ kɛ wolo ni ji Bɔfoi lɛ Asaji lɛ mli lɛ, ji sane naataamɔ ni naa wa ni tsɔɔ akɛ jeee mra be mli Kristofoi lɛ ji mɛi ni kɛ abɛbuai ni yɔɔ Sanekpakpai lɛ amli lɛ wo mli shi moŋ Yesu diɛŋtsɛ ji mɔ ni wie. Kɛfata he lɛ, Sanekpakpai lɛ ni akɛtoɔ Hela ŋmalɛi lɛ mli woji ni aŋmalaa kɛmajeɔ lɛ he jogbaŋŋ lɛ tsɔɔ akɛ, jeee ŋaa gbɛ nɔ atsɔ asaa ato Paulo wiemɔi loo mɛi krokomɛi ni ŋma Hela Ŋmalɛi lɛ awiemɔ ni amɛwie lɛ he gbɛjianɔ koni akɛɛ akɛ Yesu ji mɔ ni wie. Kɛ mra be mli Kristofoi lɛ efee nɔ ko ni tamɔ nɛkɛ lɛ, belɛ esa akɛ wɔkpa gbɛ akɛ kɛ hoo lɛ wɔɔna saji komɛi ni jɛ Hela ŋmalɛi lɛ mli woji ni aŋmalaa kɛmajeɔ lɛ mli ni jɛ Sanekpakpai lɛ amli. Akɛni wɔnaaa saji lɛ hewɔ lɛ, wɔbaanyɛ wɔmu sane naa yɛ faŋŋ mli akɛ Sanekpakpai lɛ mli saji lɛ ji klɛŋklɛŋ nɔ̃ ni yɔɔ kɛjɛ blema, ni emli saji lɛ ja.

◆ Ni nɔ ni tamɔ saji ni teɔ shi woɔ ehe yɛ Sanekpakpai lɛ amli lɛ hu?

Mɛi ni wieɔ shiɔ nii lɛ ejɛ jeeŋmɔ beebe amɛjaje akɛ Sanekpakpai lɛ amli eyi obɔ kɛ saji ni teɔ shi woɔ ehe. Yinɔsaneŋmalɔ Durant bɔ mɔdɛŋ koni epɛi Sanekpakpai lɛ mli saji lɛ amli bɔ ni ehenumɔi naŋ hewalɛ yɛ nɔ kwraa—nɔ ni ji yinɔsane odaseyeli he woji. Eyɛ mli akɛ ekɛɛ akɛ etamɔ nɔ ni emli saji lɛ teɔ shi woɔ ehe moŋ, shi emu sane naa akɛ: “Saji ni teɔ shi woɔ ehe lɛ ji saji fioo [saji bibii], jeee saji ni he hiaa; nɔ ni he hiaa ji akɛ klɛŋklɛŋ sanekpakpai etɛ lɛ kɛ amɛhe kpãa gbee waa diɛŋtsɛ, ni amɛkɛ amɛhe kpãa gbee yɛ Kristo he wiemɔ yɛ mfonirifeemɔ gbɛ nɔ lɛ mli.”

Bei pii lɛ, ajajeɔ nɔ ni feɔ tamɔ nɔ ni teɔ shi woɔ ehe yɛ Sanekpakpai lɛ amli lɛ yɛ gbɛ ni waaa kwraa nɔ. Ákɛ nɔkwɛmɔnɔ lɛ: Mateo 8:5 kɛɔ akɛ ‘Asraafoi-oha-atsɛ ko ba Yesu ŋɔɔ ebakpa lɛ fai’ koni etsa ewenuu. Wɔkaneɔ yɛ Luka 7:3 lɛ akɛ, asraafoi-oha-atsɛ lɛ, ‘etsu Yudafoi lɛ anukpai kɛba Yesu ŋɔɔ ní amɛbakpa lɛ fai akɛ éba ni ebatsá tsulɔ lɛ.’ Asraafoi-oha-atsɛ lɛ tsu onukpai akɛ enajiaŋdamɔlɔi. Mateo kɛɛ akɛ, asraafoi-oha-atsɛ lɛ diɛŋtsɛ yakpa Yesu fai, ejaakɛ nuu lɛ kɛ enibimɔ  lɛ tsɔ onukpai lɛ anɔ, ni amɛtsu nii akɛ enaawielɔ. Enɛ ji nɔkwɛmɔnɔ kome pɛ ni tsɔɔ akɛ abaanyɛ ajaje nɔ ni asusuɔ akɛ eji srɔtofeemɔi yɛ Sanekpakpai lɛ amli lɛ.

Ni nɔ ni mɛi ni wieɔ shiɔ nii waa diɛŋtsɛ lɛ kɛɔ akɛ Sanekpakpai lɛ shɛɛɛ nɔ ni baaha anyɛ abu lɛ akɛ yinɔsane diɛŋtsɛ lɛ hu? Durant tee nɔ ekɛɛ: “Yɛ be mli ni kuu ni ji Wiemɔi ni Mli Wa ni Akɛshiɔ Nii lɛ kɛ ekãa taoɔ nii amli lɛ, amɛkɛ ja ni nɔ ko ja lɛ he nii ni akaa akwɛɔ lɛ tsu nii waa tsɔ̃ yɛ Kpaŋmɔ Hee lɛ he aahu akɛ yɛ amɛ gbɛfaŋ lɛ, blema gbɔmɛi oha ni abuɔ amɛ waa—tamɔ Hammurabi, David kɛ Socrates—baanyɛ afee mɛi ni abuɔ amɛ akɛ blema adesã mli bii. Yɛ hetsɛ̃ kɛ Nyɔŋmɔ jamɔ he nikasemɔ he susumɔ ni ejaaa ni mɛi ni ŋma sanekpakpai lɛ yɔɔ lɛ fɛɛ sɛɛ lɛ, amɛŋmalaa saji babaoo ni kulɛ mɛi kɛkɛ ni toɔ saji ahe gbɛjianɔ lɛ baatsĩmɔ nɔ—akaŋshii ni bɔfoi lɛ kɛtsu nii kɛha hegbɛi ni nɔ kwɔlɔ yɛ Maŋtsɛyeli lɛ mli, foi ni amɛje beni amɔ Yesu, kɛ Petro ni kwa lɛ lɛ . . . Mɔ ko kwraa bɛ ni kaneɔ saji nɛɛ ni baanyɛ aje gbɔmɔ diɛŋtsɛ ni enɛ kɔɔ ehe lɛ he ŋwane.”

◆ Ani ŋmɛnɛŋmɛnɛ beaŋ Kristojamɔ damɔ shi kɛha Yesu ni yɔɔ Sanekpakpai lɛ amli lɛ?

Yesu He Kpee lɛ jaje akɛ Sanekpakpai lɛ saji amli ni amɛpɛi lɛ “jeee nɔ ko ni famɔi ni jɛɔ sɔlemɔ gwabɔi lɛ adɛŋ lɛ ná nɔ hewalɛ.” Shi yinɔsaneŋmalɔ Wells yɔse akɛ srɔtofeemɔ agbo kã Yesu tsɔɔmɔi ni yɔɔ Sanekpakpai lɛ amli kɛ Kristendom nɔ̃ lɛ teŋ. Eŋma akɛ: “Odaseyeli ko kwraa bɛ ni tsɔɔ akɛ Yesu bɔfoi lɛ enu Triniti he sane pɛŋ—jeee kɛjɛ lɛ diɛŋtsɛ po enaa. . . . Asaŋ [Yesu] ekɛɛɛ nɔ ko kwraa ni kɔɔ enyɛ Maria jamɔ he tamɔ bɔ ni afeɔ ahaa Isis, ŋwɛi Maŋnyɛ lɛ. Ekpoo nɔ ni tamɔ Kristendom tsɔɔmɔi ni yaa nɔ yɛ jamɔ mli diɛŋtsɛ lɛ kɛ bɔ ni akɛtsuɔ nii ahaa lɛ fɛɛ.” No hewɔ lɛ, mɔ ko mɔ ko nyɛŋ atsɔɔ bɔ ni Sanekpakpai lɛ yɔɔ ha kɛ́ edamɔ Kristendom tsɔɔmɔi lɛ anɔ.

 TE OMUƆ SANE NAA OHAA TƐŊŊ?

Beni osusu saji otii ni tsɔ hiɛ lɛ he lɛ, te osusuɔ tɛŋŋ? Ani odaseyeli kpakpa ni kɔneɔ mɔ yiŋ yɛ ni tsɔɔ akɛ Sanekpakpai lɛ ji adesã kɛkɛ? Mɛi babaoo naa sanebimɔi kɛ yiŋkɔshikɔshifeemɔi ni ateeɔ lɛ shi yɛ ja ni Sanekpakpai lɛ ja ha lɛ he lɛ akɛ nɔ ni anyɛŋ akɛ he afɔ̃ nɔ kɛ nɔ ni nyɛɛɛ akɔne mɔ yiŋ. Bɔni afee ni otsɔɔ ojwɛŋmɔ yɛ he lɛ, ehe baahia ni okɛ jwɛŋmɔ ni mli kã shi faŋŋ akane Sanekpakpai lɛ. (Bɔfoi lɛ Asaji 17:11) Kɛ osusu gbeekpamɔ, anɔkwayeli, kɛ bɔ ni Sanekpakpai lɛ tsɔɔ Yesu subaŋ yɛ gbɛ ni ja ha nɔ lɛ he lɛ, obaayɔse akɛ saji nɛɛ jeee adesãi kwraa ni abua naa. *

Kɛ opɛi Biblia lɛ mli jogbaŋŋ ni okɛ emli ŋaawoo lɛ tsu nii lɛ, obaana bɔ ni ebaanyɛ etsake oshihilɛ jogbaŋŋ. (Yohane 6:68) Enɛ ji anɔkwale titri yɛ saji ni Yesu wie ni aŋma yɛ Sanekpakpai lɛ amli lɛ ahe. Kɛfata he lɛ, obaanyɛ okase wɔsɛɛ shihilɛ ni yɔɔ naakpɛɛ ni asaa ato adesai ni feɔ toiboo lɛ kɛjɛ mli.—Yohane 3:16; 17:3, 17.

[Shishigbɛ niŋmaa]

[Akrabatsa ni yɔɔ baafa 7]

Odaseyeli ni Tsɔɔ akɛ Akɛ Amaniɛbɔɔ ni Ja Ha

AFII komɛi ni eho lɛ Australia woloŋmalɔ ko ni tsutsu ko lɛ eji mɔ ni wieɔ eshiɔ Biblia lɛ kpɛlɛ nɔ akɛ: “Yɛ mishihilɛ ni tsɔ hiɛ lɛ mli lɛ, mifee nɔ ni afɔɔ lɛ tsɛmɔ akɛ saji ahe amaniɛbɔlɔ klɛŋklɛŋ nifeemɔ lɛ: mikwɛɔ akɛ saji ni miná lɛ yɛ mli anɔkwale lo. . . . Ni minaa kpɛɔ mihe, ejaakɛ nɔ ni mikaneɔ [yɛ Sanekpakpai lɛ saji amli lɛ] jeee blema adesã ni ejeee adesã ni tamɔ nɔ ko diɛŋtsɛ ni yɔɔ. Eji sane he amaniɛbɔɔ. Nibii ni ba ni yɔɔ srɔto ni anu kɛjɛ he ni sa lɛ kɛ hei krokomɛi . . . Saji ahe amaniɛbɔɔ yɛ kadimɔ nɔ ko, ni nakai kadimɔ nii lɛ yɛ Sanekpakpai lɛ amli.”

Nakai nɔŋŋ E. M. Blaiklock ni ji blema saji ni aŋmaa he nilelɔ ni yɔɔ Auckland University lɛ taa naa akɛ: “Mikɛɔ akɛ yinɔsaneŋmalɔ ji mi. Bɔ ni mifeɔ minii yɛ Saji Aŋmaa he lɛ ji yinɔsane mli nifeemɔ. Ni miikɛɛ bo kɛ nɔmimaa akɛ, Kristo wala, egbele, kɛ eshitee lɛ he odaseyeli ji nɔ ko ni afee koni aha eja jogbaŋŋ fe blema yinɔsane he anɔkwa saji babaoo.”

[Shikpɔŋ he mfoniri/Mfonirii ni yɔɔ baafa 8, 9]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

FOINIKE

GALILEA

Yordan Faa

YUDEA

[Mfoniri]

Kristo wala, egbele, kɛ eshitee lɛ he odaseyeli ji nɔ ko ni afee koni aha eja jogbaŋŋ fe blema yinɔsane he anɔkwa saji babaoo.”—PROFESSOR E. M. BLAIKLOCK

[He ni Sane lɛ Jɛ]

Shikpɔŋ he mfonirii lɛ: Based on a map copyrighted by Pictorial Archive (Near Eastern History) Est. and Survey of Israel.