Hã ‘Oyiwalaheremɔ Hiɛnɔkamɔ lɛ’ Mli Awa!
Hã ‘Oyiwalaheremɔ Hiɛnɔkamɔ lɛ’ Mli Awa!
“Wɔbumɔ dadefai ni ji yiwalaheremɔ nɔhiɛkamɔ lɛ.”—1 TESALONIKABII 5:8.
1. “Yiwalaheremɔ nɔhiɛkamɔ lɛ” yeɔ ebuaa yɛ tsuishiŋmɛɛ mli yɛ ŋmɛɛ gbɛ nɔ?
HIƐNƆKAMƆ ni mɔ ko yɔɔ akɛ abaahere eyiwala lɛ baanyɛ aye abua lɛ ni edamɔ shihilɛi ni mli wa fe fɛɛ po naa. Mɔ ko ni kɛ lɛlɛ eyasha shi, ní ekã ŋmoŋmolo nɔ yɛ nu mli lɛ baanyɛ aŋmɛ etsui shi babaoo kɛji ele akɛ etsɛŋ ni enine baashɛ yelikɛbuamɔ nɔ. Nakai nɔŋŋ ‘Yehowa yiwalaheremɔ’ he hiɛnɔkamɔ lɛ eye ebua hii kɛ yei ni yɔɔ hemɔkɛyeli lɛ yɛ haomɔ bei amli afii akpei abɔ, ni nɛkɛ hiɛnɔkamɔ nɛɛ hako amɛnijiaŋ aje wui kɔkɔɔkɔ. (2 Mose 14:13; Lala 3:9; Romabii 5:5; 9:33) Bɔfo Paulo kɛ “yiwalaheremɔ nɔhiɛkamɔ lɛ” to Kristofoi amumɔŋ tawuu nii ni ji “dadefai lɛ” he. (1 Tesalonikabii 5:8; Efesobii 6:17) Hɛɛ, hekɛnɔfɔɔ ni wɔyɔɔ akɛ Nyɔŋmɔ baahere wɔyiwala lɛ buɔ wɔjwɛŋmɔŋ nyɛmɔi ahe, ni eyeɔ ebuaa wɔ ni ehaa wɔhiɛ hiɔ wɔhe nɔ yɛ fimɔ be, shitee-kɛ-woo, kɛ kaa fɛɛ sɛɛ.
2. Mɛɛ gbɛ̀i anɔ “yiwalaheremɔ nɔhiɛkamɔ lɛ” ji anɔkwa jamɔ shishijee nibii lɛ eko?
2 The International Standard Bible Encyclopedia lɛ kɛɛ akɛ: “Wɔŋjalɔi ajeŋ,” ni ji jeŋ ni ebɔle klɛŋklɛŋ afii oha lɛ mli Kristofoi lɛ ahe kɛkpe lɛ “bɛ wɔsɛɛ be he hiɛnɔkamɔ ko kwraa.” (Efesobii 2:12; 1 Tesalonikabii 4:13) Ni kɛlɛ, “yiwalaheremɔ nɔhiɛkamɔ lɛ” ji anɔkwa jamɔ shishijee nibii lɛ eko. Yɛ mɛɛ gbɛ nɔ? Klɛŋklɛŋ lɛ, Yehowa tsuji ayiwalaheremɔ kɛ lɛ diɛŋtsɛ egbɛi lɛ yɛ tsakpaa. Lalatsɛ Asaf sɔle akɛ: “Ye obua wɔ, wɔyiwalaheremɔ Nyɔŋmɔ, yɛ ogbɛi lɛ hiɛnyam hewɔ, ni ojie wɔ.” (Lala 79:9; Ezekiel 20:9) Agbɛnɛ hu, hekɛnɔfɔɔ ni wɔɔná yɛ Yehowa jɔɔmɔi ahe shiwoi amli lɛ he miihia koni wɔná wɔkɛ lɛ teŋ wekukpaa kpakpa. Paulo wie he yɛ nɛkɛ gbɛ nɔ, akɛ: “Kɛ hemɔkɛyeli bɛ lɛ, anyɛŋ Nyɔŋmɔ hiɛ asa; ejaakɛ mɔ ni baa Nyɔŋmɔ ŋɔɔ lɛ, ja ehe eye akɛ eyɛ ni eji mɛi ni taoɔ esɛɛgbɛ lɛ anyɔmɔwolɔ hu.” (Hebribii 11:6) Kɛfata he lɛ, Paulo tsɔɔ mli akɛ, mɛi ni etsake amɛtsui lɛ ayiwalaheremɔ ji yiŋtoi titrii ahewɔ ni Yesu ba shikpɔŋ lɛ nɔ lɛ ateŋ ekome. Ejaje akɛ: “Eji anɔkwa wiemɔ ni sa akɛ amɔ mli kwraa, akɛ Kristo Yesu ba je nɛŋ eba eshafeelɔi ayiwalaheremɔ.” (1 Timoteo 1:15) Ni bɔfo Petro wie yiwalaheremɔ he akɛ ‘wɔhemɔkɛyeli lɛ naagbee, loo nɔ ni baajɛ mli kɛba.’ (1 Petro 1:9) Eyɛ faŋŋ akɛ, esa akɛ wɔná yiwalaheremɔ he hiɛnɔkamɔ. Shi mɛni diɛŋtsɛ ji yiwalaheremɔ? Ni mɛni ataoɔ dani wɔnine anyɛ ashɛ nɔ?
Mɛni Ji Yiwalaheremɔ?
3. Mɛɛ yiwalaheremɔ Yehowa tsuji ni hi shi yɛ blema beaŋ lɛ ná mli niiashikpamɔ?
3 Yɛ Hebri Ŋmalɛi lɛ amli lɛ, bei pii lɛ “yiwalaheremɔ” tsɔɔ jiemɔ loo kpɔmɔ kɛmiijɛ nɔnyɛɛ ni mli wa loo kpatu gbele ko mli. Ákɛ nɔkwɛmɔnɔ lɛ, beni David tsɛɔ Yehowa akɛ “Miherelɔ” lɛ, ewie akɛ: “Nyɔŋmɔ ni ji mitɛsaa, . . . Mibobaahe hu; miyiwalaherelɔ, bo ohereɔ miyiwala kɛjɛɔ yiwalɛ mli. Mabó matsɛ Yehowa, mɔ ni sa yijiemɔ lɛ, ni aaahere miyiwala yɛ mihenyɛlɔi lɛ adɛŋ.” (2 Samuel 22:2-4) David le akɛ kɛ Yehowa tsuji anɔkwafoi bolɔ amɛtsɛ lɛ kɛha yelikɛbuamɔ lɛ, E-boɔ toi.—Lala 31:23, 24; 145:19.
4. Mɛɛ wɔsɛɛ shihilɛ he hiɛnɔkamɔ Yehowa tsuji ni hi shi dani Kristofoi abe lɛ shɛ lɛ ná?
4 Yehowa tsuji ni hi shi dani Kristofoi abe lɛ shɛ lɛ hu ná wɔsɛɛ be shihilɛ he hiɛnɔkamɔ. (Hiob 14:13-15; Yesaia 25:8; Daniel 12:13) Yɛ anɔkwale mli lɛ, yiwalaheremɔ he shiwoi babaoo ni anaa yɛ Hebri Ŋmalɛi lɛ amli lɛ ji gbalɛi ní kɔɔ yiwalaheremɔ kpeteŋkpele ko he—nɔ ni kɛ mɔ yaa naanɔ wala mli lɛ. (Yesaia 49:6, 8; Bɔfoi lɛ Asaji 13:47; 2 Korintobii 6:2) Yɛ Yesu gbii lɛ amli lɛ, Yudafoi babaoo ná naanɔ shihilɛ he hiɛnɔkamɔ, shi amɛkpoo akɛ amɛaakpɛlɛ Yesu nɔ akɛ mɔ titri ni baaha amɛhiɛnɔkamɔ lɛ aba mli. Yesu kɛɛ jamɔ mli hiɛnyiɛlɔi ni yɔɔ egbii lɛ amli lɛ akɛ: “Nyɛtaoa ŋmalɛi lɛ amli, ejaakɛ nyɛ diɛŋtsɛ nyɛsusuɔ akɛ nomɛi amli nyɛnáa naanɔ wala yɛ, ni nomɛi nɔŋŋ ji nii ni yeɔ mihe odase lɛ.”—Yohane 5:39.
5. Yɛ naagbee lɛ, mɛni yiwalaheremɔ tsɔɔ?
5 Nyɔŋmɔ tsɔ Yesu nɔ ejie nɔ ni yiwalaheremɔ diɛŋtsɛ tsɔɔ lɛ kpo. Nɔ ni fata enɛ he ji jiemɔ kɛmiijɛ esha nɔyeli shishi, kɛmiijɛ apasa jamɔ nyɔŋyeli mli, kɛmiijɛ jeŋ ni yɔɔ Satan kudɔmɔ shishi lɛ mli, kɛmiijɛ gbɔmɔ gbeyeishemɔ mli, kɛ agbɛnɛ hu kɛmiijɛ gbele gbeyeishemɔ po mli. (Yohane 17:16; Romabii 8:2; Kolosebii 1:13; Kpojiemɔ 18:2, 4) Nɔ ni fe fɛɛ lɛ, yɛ Nyɔŋmɔ tsuji anɔkwafoi lɛ agbɛfaŋ lɛ, yiwalaheremɔ ni Nyɔŋmɔ kɛhaa lɛ etsɔɔɔ kpɔmɔ kɛmiijɛ yiwaa kɛ haomɔ shishi pɛ, shi moŋ etsɔɔ hegbɛ hu ni akɛaaná naanɔ wala. (Yohane 6:40; 17:3) Yesu tsɔɔ akɛ, yɛ “asafoku bibioo” lɛ gbɛfaŋ lɛ, yiwalaheremɔ tsɔɔ akɛ abaatee amɛ shi kɛya ŋwɛi shihilɛ mli ní amɛkɛ Kristo aná Maŋtsɛyeli nɔyeli lɛ mli gbɛfaŋnɔ. (Luka 12:32) Yɛ adesai ni eshwɛ lɛ agbɛfaŋ lɛ, yiwalaheremɔ tsɔɔ akɛ abaaha amɛná wala ni yeɔ emuu, ni amɛbaaná amɛkɛ Nyɔŋmɔ teŋ wekukpaa ni Adam kɛ Hawa ná mli ŋɔɔmɔ yɛ Eden abɔɔ lɛ mli dani amɛfee esha lɛ. (Bɔfoi lɛ Asaji 3:21; Efesobii 1:10) Naanɔ shihilɛ yɛ nakai paradeiso shihilɛi lɛ ashishi ji Nyɔŋmɔ shishijee yiŋtoo kɛha adesai aweku lɛ. (1 Mose 1:28; Marko 10:30) Shi kɛlɛ, mɛɛ gbɛ nɔ abaatsɔ akɛ nakai shihilɛ lɛ aba ekoŋŋ?
Nɔdaamɔ Nɔ Kɛha Yiwalaheremɔ—Kpɔmɔ Nɔ Lɛ
6, 7. Mɛɛ gbɛfaŋnɔ Yesu tsuɔ yɛ wɔyiwalaheremɔ mli?
6 Kristo kpɔmɔ afɔleshaa lɛ nɔ pɛ abaanyɛ atsɔ aná naanɔ yiwalaheremɔ. Mɛni hewɔ? Biblia lɛ tsɔɔ mli akɛ, beni Adam fee esha lɛ, ‘ehɔ̀ɔ’ lɛ diɛŋtsɛ ehe kɛ eseshibii ní ebaaná wɔsɛɛ, ni wɔ hu wɔfata he lɛ ewo esha mli—no hewɔ lɛ, kɛ́ adesai baaná hiɛnɔkamɔ kpakpa diɛŋtsɛ lɛ, no lɛ, kpɔmɔ nɔ he miihia. (Romabii 5:14, 15; 7:14) Akɛ kooloi ni akɛshã afɔle yɛ Mose Mla lɛ shishi lɛ fee kpɔmɔ nɔ ni Nyɔŋmɔ kɛbaaha adesai fɛɛ lɛ he mfoniri. (Hebribii 10:1-10; 1 Yohane 2:2) Yesu ji mɔ ni kɛ efɔleshaa lɛ ha nakai gbalɛ mli mfonirii lɛ ba mli. Dani abaafɔ́ Yesu lɛ, Yehowa bɔfo lɛ tswa adafi akɛ: “Ebaahere emaŋ lɛ yiwala kɛjɛ amɛhe eshai lɛ amli.”—Mateo 1:21; Hebribii 2:10.
7 Oblayoo fro Maria fɔ́ Yesu yɛ naakpɛɛ gbɛ nɔ, ni ákɛ Nyɔŋmɔ Bi lɛ, Adam gbele lɛ naaa hewalɛ yɛ enɔ. Nɛkɛ anɔkwa sane nɛɛ kɛ enɔkwayeli shihilɛ gbɛ ni yeɔ emuu lɛ ha ewala fee nɔ ni hiɛ jarawalɛ ni he hiaa ni akɛhe adesai aweku lɛ kɛjɛ esha kɛ gbele mli lɛ. (Yohane 8:36; 1 Korintobii 15:22) Ákɛ mɔ ni tamɔɔɔ gbɔmɛi krokomɛi fɛɛ lɛ, abuuu Yesu fɔ akɛ ebaagbo yɛ esha hewɔ. Yiŋtoo hewɔ ni eba shikpɔŋ nɔ ji “ni eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28) Akɛni efee enɛ hewɔ lɛ, Yesu ni amrɔ nɛɛ átee lɛ shi ni awo lɛ maŋtsɛ lɛ baanyɛ ehere mɛi fɛɛ ni shɛɔ Nyɔŋmɔ taomɔ nii ahe lɛ ayiwala.—Kpojiemɔ 12:10.
Mɛni Ataoɔ Koni Aná Yiwalaheremɔ?
8, 9. (a) Yesu ha oblanyo nɔyelɔ niiatsɛ ko sanebimɔ ni kɔɔ yiwalaheremɔ he lɛ hetoo yɛ mɛɛ gbɛ nɔ? (b) Yesu kɛ shihilɛ nɛɛ tsu nii ni ekɛtsɔɔ ekaselɔi lɛ anii yɛ mɛɛ gbɛ nɔ?
8 Be ko lɛ, oblanyo Israelnyo nɔyelɔ niiatsɛ ko bi Yesu akɛ: “Mɛni mafee ni maná naanɔ wala?” (Marko 10:17) Ekolɛ esanebimɔ lɛ jieɔ Yudafoi asusumɔ ni ehe shi yɛ nakai beaŋ lɛ kpo—ákɛ Nyɔŋmɔ biɔ nitsumɔi kpakpai komɛi kɛjɛɔ mɔ dɛŋ, ni ákɛ kɛ́ mɔ ko tsu nakai nitsumɔi kpakpai lɛ babaoo bɔ ni sa lɛ, no baaha ená yiwalaheremɔ kɛjɛ Nyɔŋmɔ dɛŋ. Shi nakai hiɛaŋhiɛaŋ sɔɔmɔ lɛ baanyɛ afee nɔ ni jɛ pɛsɛmkunya henumɔi amli. Nitsumɔi ni tamɔ nakai haaa anyɛ aná hiɛnɔkamɔ diɛŋtsɛ, ejaakɛ adesa ni yeee emuu ko nyɛŋ ashɛ Nyɔŋmɔ shishitoo mlai ahe kɛmɔ shi.
9 Beni Yesu haa nuu lɛ sanebimɔ lɛ hetoo lɛ, ekai lɛ kuku akɛ esa akɛ eye Nyɔŋmɔ kitai lɛ anɔ. Oya nɔŋŋ kɛkɛ ni oblanyo niiatsɛ lɛ ma nɔ mi eha Yesu akɛ eye enɛɛmɛi anɔ kɛjɛ egbekɛbiiashi tɔ̃ɔ. Ehetoo lɛ tsirɛ Yesu ni ená suɔmɔ eha lɛ. Yesu kɛɛ lɛ akɛ: “Eshwɛo nɔ̃ kome: yaa ni oyahɔ̀ɔ nii fɛɛ ni oyɔɔ, ni oŋɔha ohiafoi, ni oooná jwetri yɛ ŋwɛi; ni owo sɛŋmɔtso lɛ ni oba obanyiɛ misɛɛ.” Shi kɛlɛ, oblanyo lɛ kɛ awerɛho shi etee, “ejaakɛ eyɛ nii babaoo.” No sɛɛ lɛ, Yesu ma nɔ mi eha ekaselɔi lɛ akɛ je nɛŋ heloonaa nii ni mɔ ko baadi sɛɛ babaoo lɛ baatsĩ eyiwalaheremɔ namɔ naa. Ekɛ fata he akɛ, mɔ ko nyɛŋ aná yiwalaheremɔ kɛtsɔ lɛ diɛŋtsɛ ehewalɛ nɔ. Shi Yesu tee nɔ ema nɔ mi eha amɛ akɛ: “Gbɔmɛi agbɛfaŋ lɛ anyɛŋ enɛ afee, shi Nyɔŋmɔ gbɛfaŋ lɛ aaanyɛ; ejaakɛ aaanyɛ nii fiaa afee yɛ Nyɔŋmɔ gbɛfaŋ.” (Marko 10:18-27; Luka 18:18-23) Te aaafee tɛŋŋ aná yiwalaheremɔ?
10. Mɛɛ shihilɛi esa akɛ wɔshɛ he dani wɔná yiwalaheremɔ?
10 Yiwalaheremɔ ji nikeenii ni jɛ Nyɔŋmɔ ŋɔɔ, shi nine shɛɛɛ nɔ kɛkɛ ni atsuuu he nii. (Romabii 6:23) Nibii pɔtɛɛ komɛi yɛ ni esa akɛ aŋkroaŋkroi fɛɛ ashɛ he dani amɛfee mɛi ni sa kɛha nakai nikeenii lɛ. Yesu kɛɛ akɛ: “Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” Ni bɔfo Yohane kɛfata he akɛ: “Mɔ ni heɔ bi lɛ nɔ yeɔ lɛ, eyɛ naanɔ wala; shi mɔ ni booo bi lɛ toi lɛ, enaŋ wala, shi moŋ Nyɔŋmɔ mlifu hiɔ enɔ.” (Yohane 3:16, 36) Eyɛ faŋŋ akɛ, Nyɔŋmɔ miibi hemɔkɛyeli kɛ toiboo kɛmiijɛ mɔ fɛɛ mɔ ni sumɔɔ akɛ ená naanɔ wala lɛ dɛŋ. Esa akɛ mɔ fɛɛ mɔ akpɛ eyiŋ akɛ ebaakpɛlɛ kpɔmɔ nɔ lɛ nɔ ni enyiɛ Yesu nanemaahei lɛ asɛɛ.
11. Te gbɔmɔ ni yeee emuu lɛ aaafee tɛŋŋ aná Yehowa nɔkpɛlɛmɔ?
11 Akɛni wɔyeee emuu hewɔ lɛ, ejeee wɔ su diɛŋtsɛ akɛ wɔɔfee toiboo, ni wɔnyɛŋ wɔfee toiboo ní yeɔ emuu kɛmɔ shi. Enɛ hewɔ ni Yehowa ha wɔ kpɔmɔ nɔ lɛ, koni ehà wɔhe eshai lɛ anɔ. Shi kɛlɛ, esa akɛ wɔya nɔ wɔbɔ mɔdɛŋ ni wɔhi shi yɛ Nyɔŋmɔ gbɛ̀i lɛ kɛ gbeekpamɔ naa. Taakɛ Yesu kɛɛ oblanyo nɔyelɔ niiatsɛ lɛ, esa akɛ wɔye Nyɔŋmɔ kitai lɛ anɔ. Kɛ wɔfee nakai lɛ, jeee Nyɔŋmɔ nɔkpɛlɛmɔ pɛ kɛkɛ wɔbaaná, shi moŋ wɔbaaná miishɛɛ babaoo hu, ejaakɛ “ekitai lɛ waaa”; amɛhaa ‘mɔ tsui nyɔɔ emli.’ (1 Yohane 5:3; Abɛi 3:1, 8) Shi fɛɛ mli lɛ, ebɛ mlɛo akɛ wɔɔya nɔ wɔhiɛ yiwalaheremɔ hiɛnɔkamɔ lɛ mli.
‘Nyɛwua Hemɔkɛyeli lɛ He Ta lɛ Waa’
12. Yiwalaheremɔ hiɛnɔkamɔ lɛ baanyɛ awo Kristofonyo ko hewalɛ ni ete shi eshi jeŋba shara he kaai yɛ mɛɛ gbɛ nɔ?
12 Kaselɔ Yuda miisumɔ ni eŋma mra be mli Kristofoi lɛ ‘amɛyiwalaheremɔ lɛ he sane.’ Shi kɛlɛ, jeŋba gbonyo ni yaa nɔ lɛ ha ewo enyɛmimɛi lɛ ŋaa akɛ ‘amɛwuu hemɔkɛyeli lɛ he ta lɛ waa.’ Hɛɛ, kɛ́ wɔɔná yiwalaheremɔ lɛ, no lɛ efaaa akɛ wɔɔná hemɔkɛyeli, ní wɔkpɛtɛ anɔkwa Kristofoi ahemɔkɛyeli lɛ he, ni wɔbo toi kɛji nɔ fɛɛ nɔ miiya nɔ pɛpɛɛpɛ kɛkɛ. Esa akɛ wɔ hetuu-kɛhamɔ kɛha Yehowa lɛ mli awa bɔ ni eeenyɛ eye ebua wɔ ni wɔkpee kaai kɛ jeŋba shara ní náa mɔ nɔ hewalɛ lɛ anaa. Shi kɛlɛ, bɔlɛnamɔ mli jeŋba shara kɛ ajwamaŋbɔɔ, bulɛ ni abɛ kɛha hegbɛi, mligbalamɔi, kɛ yiŋkɔshikɔshifeemɔi miiná klɛŋklɛŋ afii oha lɛ mli asafo lɛ mumɔ nɔ hewalɛ. Bɔni afee ni Yuda aye abua amɛ ni amɛwuu amɛshi hewalɛ ni tamɔ nakai lɛ, ewo nanemɛi Kristofoi lɛ hewalɛ ni amɛha oti ni ma amɛhiɛ lɛ afee faŋŋ yɛ amɛjwɛŋmɔ mli: “Suɔmɔmɛi, nyɛ lɛ nyɛhaa nyɛnane amɔa shi yɛ nyɛhemɔkɛyeli ni yɔɔ krɔŋkrɔŋ fe fɛɛ lɛ nɔ, ni nyɛsɔlea yɛ Mumɔ krɔŋkrɔŋ lɛ mli, ni nyɛtoa nyɛhe yɛ Nyɔŋmɔ suɔmɔ lɛ mli, ni nyɛkwɛa wɔ-Nuntsɔ Yesu Kristo mɔbɔnalɛ lɛ gbɛ, koni nyɛná naanɔ wala.” (Yuda 3, 4, 8, 19-21) Hiɛnɔkamɔ ni amɛyɔɔ akɛ amɛbaaná yiwalaheremɔ lɛ baanyɛ awo amɛ hewalɛ yɛ ta ni amɛwuɔ ni amɛhi shi yɛ jeŋba ni he tse mli lɛ mli.
13. Te wɔɔfee tɛŋŋ wɔtsɔɔ akɛ wɔhéko Nyɔŋmɔ duromɔ ní wɔsaaa lɛ yakatswaa?
13 Yehowa Nyɔŋmɔ miikpá jeŋba kpakpa he nɔkwɛmɔnɔ gbɛ kɛmiijɛ mɛi ni ebaahere amɛyiwala lɛ adɛŋ. (1 Korintobii 6:9, 10) Shi kɛlɛ, Nyɔŋmɔ jeŋba he shishitoo mlai lɛ amlihiɛmɔ etsɔɔɔ akɛ esa akɛ wɔkojo mɛi krokomɛi. Jeee wɔ ji mɛi ni baakpɛ yiŋ yɛ nɔ ni esa akɛ eba wɔnanemɛi adesai anɔ kɛya naanɔ lɛ he. Shi moŋ, Nyɔŋmɔ ji mɔ ni baafee nakai, taakɛ Paulo kɛɛ Helabii lɛ yɛ Ateene lɛ, akɛ: “Eto gbi ko, nɔ̃ nɔ ni ebaatsɔ nuu ni eto”—ni ji Yesu Kristo—“nɔ ekojo jeŋ muu lɛ fɛɛ yɛ jalɛ naa.” (Bɔfoi lɛ Asaji 17:31; Yohane 5:22) Kɛ́ wɔmiihi shi yɛ Yesu kpɔmɔ nɔ lɛ mli hemɔkɛyeli ní wɔyɔɔ lɛ naa lɛ, no lɛ ehe ehiaŋ ni wɔshe kojomɔ gbi ko ni baa lɛ he gbeyei. (Hebribii 10:38, 39) Nɔ ni he hiaa ji akɛ esaaa akɛ “wɔhéɔ Nyɔŋmɔ duromɔ [ni ji wɔkɛ lɛ teŋ ní akpata kɛtsɔ kpɔmɔ nɔ lɛ nɔ] lɛ yakatswaa” kɛtsɔ wɔhe ni wɔɔŋmɛɛ ni aka wɔ ní wɔkɛ wɔhe awo susumɔi kɛ jeŋba gbonyo mli lɛ nɔ. (2 Korintobii 6:1) Kɛfata he lɛ, kɛ wɔye wɔbua mɛi krokomɛi koni amɛná yiwalaheremɔ lɛ, wɔtsɔɔ akɛ wɔhéko Nyɔŋmɔ duromɔ lɛ yakatswaa. Te wɔɔfee tɛŋŋ wɔye wɔbua amɛ?
Yiwalaheremɔ He Hiɛnɔkamɔ lɛ ni Wɔɔgba Mɛi Krokomɛi
14, 15. Namɛi Yesu kɛ nitsumɔ wo amɛdɛŋ ni amɛshiɛ yiwalaheremɔ he sanekpakpa lɛ?
14 Beni etsɛɔ gbalɔ Yoel wiemɔ yisɛɛ lɛ, Paulo ŋma akɛ: “Mɔ fɛɛ mɔ ni aaabo atsɛ́ [Yehowa, NW] gbɛi lɛ, aaahere eyiwala.” Kɛkɛ ni ekɛfata he akɛ: “Shi te aaafee tɛŋŋ ni amɛaabo amɛtsɛ́ mɔ ni amɛheko lɛ amɛyeko lɛ? ni te aaafee tɛŋŋ ni amɛaahe mɔ ni amɛnuko ehe sane lɛ amɛyeŋ? ni asaŋ te aaafee tɛŋŋ ni amɛaanu kɛ́ shiɛlɔ ko bɛ lɛ?” Kukuji fioo komɛi asɛɛ lɛ, Paulo tsɔɔ mli akɛ hemɔkɛyeli baaa trukaa; shi moŋ “sane toiboo mli jɛɔ,” ni ji, ‘Kristo he wiemɔ lɛ.’—Romabii 10:13, 14, 17; Yoel 3:5.
15 Namɔ kɛ ‘Kristo he wiemɔ’ lɛ baaha jeŋmaji lɛ? Yesu kɛ nakai nitsumɔ lɛ wo ekaselɔi lɛ adɛŋ—mɛi ni etsɔɔ amɛ nakai “wiemɔ” lɛ momo lɛ. (Mateo 24:14; 28:19, 20; Yohane 17:20) Kɛ́ wɔkɛ wɔhe wo Maŋtsɛyeli shiɛmɔ kɛ kaselɔfeemɔ nitsumɔ lɛ mli lɛ, belɛ, wɔmiifee nɔ ni bɔfo Paulo ŋma lɛ pɛpɛɛpɛ, beni agbɛnɛ etsɛ Yesaia wiemɔi asɛɛ lɛ, akɛ: “Kwɛ bɔ ni hejɔlɛ he sanekpakpa shiɛlɔi ni shiɛɔ nii kpakpai lɛ anaji yɔɔ fɛo ha!” Kɛ mɛi babaoo ekpɛlɛɛɛ sanekpakpa ni wɔkɛhaa lɛ nɔ po lɛ, wɔnaji yɛ “fɛo” lolo yɛ Yehowa hiɛ.—Romabii 10:15; Yesaia 52:7.
16, 17. Mɛɛ yiŋtoi srɔtoi enyɔ wɔshiɛmɔ nitsumɔ lɛ tsuɔ he nii?
16 Nitsumɔ nɛɛ tsumɔ kɛyashi naagbee lɛ tsuɔ yiŋtoi enyɔ ni he hiaa he nii. Klɛŋklɛŋ lɛ, esa akɛ ashiɛ sanekpakpa lɛ bɔni afee ni awó Nyɔŋmɔ gbɛi lɛ nɔ, kɛkɛ lɛ mɛi ni miisumɔ ni amɛná yiwalaheremɔ lɛ baale he ni amɛbaatsɔ amɛhe kɛya. Paulo nu nitsumɔ fã nɛɛ shishi. Ewie akɛ: “Ejaakɛ nakai [Yehowa, NW] wo wɔ kita akɛ: ‘Miŋɔo mito akɛ jeŋmaji lɛ ala, koni otsɔ̃ yiwalaheremɔ kɛyashi shikpɔŋ lɛ naagbeehei lɛ.’” No hewɔ lɛ, ákɛ Kristo kaselɔi lɛ, esa akɛ wɔteŋ mɔ fɛɛ mɔ aná yiwalaheremɔ shɛɛ sane lɛ ní wɔkɛaaha gbɔmɛi lɛ mli gbɛfaŋnɔ.—Bɔfoi lɛ Asaji 13:47; Yesaia 49:6.
17 Nɔ ni ji enyɔ lɛ, sanekpakpa lɛ shiɛmɔ lɛ feɔ shishitoo nɔ̃ kɛhaa Nyɔŋmɔ jalɛ kojomɔ lɛ. Yesu wie nakai kojomɔ lɛ he akɛ: “Shi beni gbɔmɔ bi lɛ aaaba yɛ enunyam lɛ mli, ni bɔfoi krɔŋkrɔŋi lɛ fɛɛ aaafata ehe lɛ, no mli lɛ eeeta enunyam sɛi lɛ nɔ; ni aaabua jeŋmaji lɛ fɛɛ naa yɛ ehiɛ, ni eeegbala amɛmli, taakɛ bɔ ni tookwɛlɔ gbalaa gwaŋtɛŋi kɛ abotiai amli lɛ.” Eyɛ mli akɛ abaatsu kojomɔ kɛ mligbalamɔ lɛ he nii “beni gbɔmɔ bi lɛ aaaba yɛ enunyam lɛ mli” lɛ moŋ, shi shiɛmɔ nitsumɔ lɛ miiha gbɔmɛi miiná hegbɛ ŋmɛnɛ koni amɛyɔse Kristo mumɔŋ nyɛmimɛi lɛ, ní amɛtsu nii ni amɛkɛfi amɛsɛɛ kɛha amɛ diɛŋtsɛ amɛnaanɔ yiwalaheremɔ.—Mateo 25:31-46.
Hiɛmɔ ‘Hiɛnɔkamɔ Nɔmimaa lɛ’ Mli Waa
18. Te wɔɔfee tɛŋŋ wɔha ‘wɔyiwalaheremɔ hiɛnɔkamɔ’ lɛ mli awa?
18 Wɔhe ni wɔkɛwoɔ shiɛmɔ nitsumɔ lɛ mli lɛ kɛ ekãa lɛ ji gbɛ ni yeɔ ebuaa wɔ koni wɔhiɛ wɔhiɛnɔkamɔ lɛ mli waa. Paulo ŋma akɛ: “Wɔmiitao akɛ nyɛteŋ mɔ fɛɛ mɔ atsɔɔ nɛkɛ mɔdɛŋbɔɔ nɛɛ nɔŋŋ, koni ama nɔhiɛkamɔ lɛ nɔ mi kɛyashi naagbee.” (Hebribii 6:11) Belɛ, eba akɛ wɔteŋ mɔ fɛɛ mɔ baabu ‘yiwalaheremɔ dadefai’ lɛ, ni wɔkai akɛ “Nyɔŋmɔ etooo wɔ ehaaa mlifu, shi moŋ eto wɔ eha yiwalaheremɔ namɔ yɛ wɔ-Nuntsɔ Yesu Kristo mli.” (1 Tesalonikabii 5:8, 9) Nyɛhaa wɔsusua hewalɛwoo wiemɔ ni Petro hu kɛha wɔ lɛ he, akɛ: “Nyɛfimɔa nyɛjwɛŋmɔ hɛ, nyɛhiɛ akãa shi, ni nyɛŋɔa nyɛhiɛ nyɛfɔa duromɔ ni akɛbaha nyɛ [lɛ nɔ].” (1 Petro 1:13) Mɛi fɛɛ ni feɔ nakai lɛ baana akɛ ‘amɛyiwalaheremɔ hiɛnɔkamɔ’ lɛ baaba mli anɔkwale!
19. Mɛni wɔbaasusu he yɛ nikasemɔ ni nyiɛ sɛɛ lɛ mli?
19 Shi amrɔ nɛɛ, te esa akɛ wɔsusu be ni eshwɛ kɛha gbɛjianɔtoo nɛɛ he wɔha tɛŋŋ? Mɛɛ gbɛ nɔ wɔɔtsɔ ní wɔkɛ nakai be lɛ atsu nii ní wɔkɛhere wɔ diɛŋtsɛ kɛ mɛi krokomɛi ayiwala? Wɔbaasusu sanebimɔi nɛɛ ahe yɛ nikasemɔ ni nyiɛ sɛɛ lɛ mli.
Ani Obaanyɛ Otsɔɔ Mli?
• Mɛni hewɔ esa akɛ wɔhiɛ ‘wɔyiwalaheremɔ hiɛnɔkamɔ’ lɛ mli waa lɛ?
• Mɛni fata yiwalaheremɔ he?
• Mɛni esa akɛ wɔfee koni wɔnine ashɛ yiwalaheremɔ nikeenii lɛ nɔ?
• Mɛni wɔshiɛmɔ nitsumɔ lɛ tsuɔ yɛ Nyɔŋmɔ yiŋtoo kɛ gbeekpamɔ naa?
[Nikasemɔ lɛ he Sanebimɔi]
[Mfonirii ni yɔɔ baafa 10]
Yiwalaheremɔ tsɔɔ babaoo fe kpɔmɔ kɛmiijɛ hiɛkpatamɔ mli kɛkɛ