Lala ni Saa Nyɔŋmɔ Hiɛ

Awie lala he akɛ eji “ŋaa nitsumɔi fɛɛ amli nɔ ni etsɛ fe fɛɛ ni jieɔ adesai asui diɛŋtsɛ lɛ akpo etsɔɔ fe fɛɛ eko.” Taakɛ wiemɔ kasemɔ ji lɛ, eji nikeenii ko ni sa kadimɔ ni haa esoroɔ adesai yɛ kooloi ahe. Lala teeɔ henumɔi ashi. Ebaanyɛ eŋɔɔ toi lɛ naa, ní ekpa shi yɛ jwɛŋmɔ lɛ mli. Nɔ ni fe fɛɛ lɛ, lala baanyɛ asa Nyɔŋmɔ hiɛ.

TAAKƐ Biblia lɛ tsɔɔ lɛ, Israelbii lɛ sumɔɔ lala waa. Unger’s Bible Dictionary lɛ kɛɛ akɛ lala ji “ŋaa nifeemɔ ko ni egbɛ eshwã waa yɛ blema Biblia beaŋ.” Amɛkɛ lala ni akɛ gbee kɛ saŋku tswaa lɛ tsu nii waa yɛ amɛ jamɔ lɛ mli akɛ amɛ daa gbi shihilɛ lɛ fã. Shi adesa gbee ji nɔ ni akɛtsu nii waa titri.

Maŋtsɛ David hala najiaŋdamɔlɔi yɛ Levibii lɛ ateŋ ‘eto lala lɛ nɔ’ yɛ kpeebuu lɛ mli dani ajɔɔ sɔlemɔtsu ni ebi Salomo ma lɛ nɔ. (1 Kronika 6:16, 17) Beni akɛ kpaŋmɔ adeka ni tsɔɔ akɛ Yehowa yɛ amɛteŋ lɛ ba Yerusalem lɛ, David to gbɛjianɔ koni Levibii lɛ ekomɛi ‘ajie Yehowa yi ni amɛda lɛ shi ni amɛkafo lɛ.’ Amɛkɛ amɛgbee fataa ‘bɛji kɛ saŋkui, ŋmɛji ni naa wa lɛ, kɛ kpãa tɛtɛrɛmantɛrɛ lɛ’ he kɛjieɔ eyi. “Atsĩ” nɛkɛ hii nɛɛ ‘agbɛii atã koni amɛda Yehowa shi, ejaakɛ naanɔ emɔbɔnalɛ hiɔ shi kɛyaa.’—1 Kronika 16:4-6, 41; 25:1.

Lala nɔheremɔ wiemɔ ni ji ‘naanɔ Yehowa mɔbɔnalɛ hiɔ shi kɛyaa’ lɛ jeɔ kpo shii abɔ yɛ Lalai awolo ni ji Biblia mli wolo ni lala yɔɔ mli fe fɛɛ lɛ mli. Ákɛ nɔkwɛmɔnɔ lɛ, no ji nɔ ni feɔ Lala 136 lɛ mli kukuji 26 lɛ eko fɛɛ eko fã ni ji enyɔ lɛ. Biblia he woloŋlelɔ ko tsɔɔ mli akɛ: “Bɔ ni eyɔɔ kuku lɛ haa anyɛɔ akɛɔ lɛ jogbaŋŋ, mɔ fɛɛ mɔ ni nuɔ lɛ nyɛɔ ekaiɔ.”

Wiemɔi ni aŋmala yɛ lalai lɛ ayiteŋgbɛ lɛ tsɔɔ bɔ ni akɛ saŋkui tsuɔ nii waa diɛŋtsɛ. Lala 150 tsĩɔ tɛtɛrɛmantɛrɛ, saŋku, mĩji, blɛ, kɛ ŋoŋoi atã kɛfata kpãai-asaŋkui ahe. Fɛɛ sɛɛ lɛ, nɔ ni anyaa he titri ji adesa gbee. Kuku 6 lɛ woɔ hewalɛ  akɛ: “Nɔ fɛɛ nɔ ni muɔ lɛ ajie Yehowa yi! Haleluya!”

Akɛni lala jieɔ wɔhenumɔi akpo hewɔ lɛ, susumɔi ni yɔɔ awerɛho ni baa yɛ Biblia beaŋ lɛ haa alaa yaafo lalai loo alaa lalai. Shi kɛlɛ, nɛkɛ lala srɔto nɛɛ faaa yɛ Israelbii alalai amli. Biblia ensaiklopedia ni ji Insight on the Scriptures * lɛ kɛɛ akɛ: “Ja eji yaafo lala loo yaafo dani abaasumɔ ni bɔ ni alaa ahaa lɛ afee tamɔ lala ni ŋɔɔ loo wiemɔ diɛŋtsɛ mli tsakemɔ kɛ ewiemɔ ni akɛ naabu wieɔ.”

Yesu kɛ enɔkwa bɔfoi lɛ lá yijiemɔ lalai amɛha Yehowa gbɛkɛ dani Yesu gbo lɛ, ni ŋwanejee ko bɛ he akɛ amɛkɛ Hallel Lalai amli wiemɔi lɛ woɔ mli. (Lala 113-118) Kwɛ bɔ ni enɛ wo Yesu kaselɔi lɛ hewalɛ koni amɛdamɔ amɛ-Nuntsɔ lɛ gbele lɛ naa! Nɔ ni fe nakai lɛ, amɛfai shi ni amɛtswa koni amɛya nɔ amɛhi shi akɛ jeŋ muu fɛɛ Nɔyelɔ ni Fe Fɛɛ ni ji Yehowa anɔkwa sɔɔlɔi lɛ ji nɔ ni tee hiɛ waa akɛni amɛhere lala nɔ shii abɔ akɛ “ejaakɛ naanɔ emɔbɔnalɛ hiɔ shi kɛyaa” lɛ.—Lala 118:1-4, 29.

Mra be mli Kristofoi ni yɔɔ Efeso kɛ Kolose lɛ lá “lalai kɛ yijiemɔ lalai amɛha Nyɔŋmɔ” (yɛ faŋŋ mli lɛ, “Nyɔŋmɔ yijiemɔ lalai”). Amɛkɛ “mumɔŋ lalai” fata enɛɛmɛi ni amɛláa yɛ amɛtsuii amli lɛ ahe. (Efesobii 5:19, NW; Kolosebii 3:16) Amɛkɛ amɛnaabui tsu nii koni amɛkɛ yijiemɔ aha yɛ gbɛ ni ja nɔ kɛtsɔ lala kɛ wiemɔ nɔ. Ani Yesu ejajeko akɛ “nɔ ni eyi tsui obɔ kɛteke nɔ lɛ, no nɔŋŋ naabu wieɔ”?—Mateo 12:34.

Lala ni Esaaa Nyɔŋmɔ Hiɛ

Jeee lalai fɛɛ ni atsĩ tã yɛ Biblia lɛ mli lɛ saa Nyɔŋmɔ hiɛ. Susumɔ nɔ ni ba yɛ Sinai Gɔŋ lɛ nɔ beni Mose heɔ Mla lɛ ni Kitãi Nyɔŋma lɛ fata he lɛ he okwɛ. Beni Mose kpeleke shi kɛjɛ gɔŋ lɛ nɔ lɛ, mɛni ji nɔ ni enu? “Jeee kunimyeli he oshebɔɔ ni,” “jeee ta gbee he bolɔmɔ hu ni,” shi “lala nɔheremɔ moŋ.” Enɛ ji wɔŋjalɔi alala, nifeemɔ ni tée Nyɔŋmɔ mlifu shi ni nɔ ni jɛ mli ba ji nakai lalɔi aaafee 3,000 lɛ agbele.—2 Mose 32:18, 25-28.

Eyɛ mli akɛ adesai baanyɛ afee lala, ni amɛtswa, ni amɛha lala fɛɛ lala aŋɔɔ amɛnaa moŋ, shi no etsɔɔɔ akɛ fɛɛ saa Nyɔŋmɔ hiɛ. Mɛni hewɔ? Kristofonyo bɔfo Paulo tsɔɔ mli akɛ: “Mɛi fɛɛ efee esha, ni Nyɔŋmɔ anunyam lɛ ebɔ amɛ.” (Romabii 3:23) Bei pii lɛ akɛ fɔmɔ he wɔŋjalɔi akusum, adesa susuma ni gbooo lɛ tsɔɔmɔ lɛ, kɛ Maria ni akɛ woo haa lɛ akɛ “Nyɔŋmɔ nyɛ” lɛ tsuɔ nii akɛ saneyitsei kɛha lalai ni afeɔ. Ni kɛlɛ, nɛkɛ hemɔkɛyelii kɛ nifeemɔi nɛɛ wooo anɔkwa Nyɔŋmɔ lɛ hiɛ nyam, ejaakɛ amɛteɔ shi amɛwoɔ nɔ ni ajie lɛ kpo yɛ e-Wiemɔ ni jɛ mumɔŋ ni ji Biblia lɛ mli lɛ.—5 Mose 18:10-12; Ezekiel 18:4; Luka 1:35, 38.

Lala ni akɛ Nilee Halaa Mli

Lalai ni yɔɔ lɛ amli ni aaahala lɛ bafeɔ tamɔ nɔ ko ni futuɔ mɔ yiŋ. Afee woji ni hà kɔmpat disk srɔtoi lɛ ahe lɛ kɛ yiŋtoo lɛ akɛ akɛtsirɛ nihelɔi lɛ koni amɛhe lalai fɛɛ ni amɔmɔɔ awoɔ kpãa nɔ. Shi kɛ́ Nyɔŋmɔ jálɔ lɛ miisumɔ ni esa E-hiɛ lɛ, ebaakwɛ jogbaŋŋ koni ekɛ nilee ahala mli koni amɛkwa lala ni akɛ gbee loo saŋku tswaa ni apasa jamɔŋ hemɔkɛyelii kanyaa no loo egbalaa jwɛŋmɔ kɛyaa jeŋba shara kɛ daimonioi anifeemɔi anɔ lɛ.

Albert ni be ko lɛ esɔmɔ akɛ Kristofonyo maŋsɛɛ sanekpakpa shiɛlɔ yɛ Afrika lɛ kpɛlɛ nɔ akɛ, hegbɛ fioo ko pɛ enáa yɛ jɛmɛ ni ekɛtswaa saŋku. Shi kɛlɛ, ebo lalai fioo ni amɔmɔ awo kpãa nɔ ni akɛ be kakadaŋŋ tswaa ni ekɛtee lɛ toi ekoŋŋ shii abɔ. Amrɔ nɛɛ, Albert yasaraa Kristofoi asafoi lɛ yɛ emaŋ akɛ nɔkwɛlɔ gbɛfalɔ. Be fioo pɛ enáa ekɛtswaa lala ni eboɔ toi. Ekɛɛ akɛ: “Mɔ ni misumɔɔ elala waa ji Beethoven. Yɛ afii ni tsɔ hiɛ lɛ mli lɛ, miheɔ elala ni amɔmɔ awo kpãa nɔ, tamɔ lala ni akɛ lala gbeei etɛ loo ejwɛ láa, lala ni akɛ saŋku kome loo nɔ ni fa fe nakai tswaa, lala ni akɛ saŋku ni kɛ lala gbeei etɛ loo ejwɛ tswaa, kɛ lala ni mɛi ejwɛ tswaa loo amɛláa lɛ.” Enɛɛmɛi atoi ni eboɔ lɛ eha ená miishɛɛ babaoo diɛŋtsɛ. Anɔkwale sane ji akɛ, mɔ fɛɛ mɔ kɛ lala ni esumɔɔ, shi ákɛ Kristofoi lɛ, wɔhaa Paulo ŋaawoo lɛ hiɔ wɔjwɛŋmɔ mli, nɔ ni kɛɛ: “No hewɔ lɛ, kɛ́ nii nyɛyeɔ jio, nii nyɛnuɔ jio, aloo nɔ kroko ni nyɛfeɔ jio, nyɛfea fɛɛ nyɛkɛwoa Nyɔŋmɔ hiɛ nyam.”—1 Korintobii 10:31.

 Lala kɛ Henɔjɔɔmɔ

Susie sumɔɔ lala waa diɛŋtsɛ. Etsɔɔ mli akɛ: “Mibɔi saŋku lɛ tswaa beni miye afii 6, mibɔi saŋku ni hiɛ kpãai ejwɛ lɛ tswaa beni miye afii 10, ni yɛ naagbee lɛ kpãa saŋku lɛ beni miye afii 12.” Sɛɛ mli lɛ Susie tee Royal College of Music yɛ London, England koni eyakase kpãa saŋku lɛ tswaa. Ekɛ kpãa saŋkutswalɔ ni ale lɛ waa ni jɛ Spain lɛ kase nii afii ejwɛ ni ekase afi kroko hu yɛ Paris Conservatoire, ni ená lala kasemɔ ni yaa hiɛ lɛ naagbee he yijiemɔ wolo kɛ nikasemɔhe wulu naagbee he wolo hu kɛha kpãa saŋku lɛ tswaa kɛ saŋkutswaa he nitsɔɔmɔ.

Susie kɛ Yehowa Odasefoi asafo ko ni yɔɔ London lɛ bɔi bɔɔ. Ena akɛ anɔkwa miishɛɛ kɛ suɔmɔ miiya nɔ yɛ nanemɛi Odasefoi ateŋ. Suɔmɔ ni eyɔɔ kɛha Yehowa lɛ bɔi daa fiofio, ni ekãa ni eyɔɔ kɛha esɔɔmɔ lɛ tsirɛ lɛ koni etao gbɛ̀i ni eeetsɔ nɔ esɔmɔ lɛ. Enɛ ha ejɔɔ ehe nɔ ni abaptisi lɛ. Susie kɛɛ akɛ: “Lala ni mikɛfee minitsumɔ lɛ ji shihilɛ gbɛ ni mituu mihe fɛɛ miha, no hewɔ lɛ wala nɔ ni ajɔɔ lɛ jeee nɔ ko ni mileee.” Be ni enáa ni ekɛ lala jieɔ mɛi ahiɛtserɛ lɛ bɔi shibaa yɛ be mli ni ekɛ ehe woɔ Kristofoi asɔɔmɔ nitsumɔ ni ji Nyɔŋmɔ Maŋtsɛyeli lɛ he sanekpakpa lɛ shiɛmɔ lɛ mli lɛ koni ekɛfee toiboo eha famɔi ni Yesu kɛha lɛ.—Mateo 24:14; Marko 13:10.

Amrɔ nɛɛ ni be fioo pɛ ekɛ lala jieɔ mɛi ahiɛtserɛ nɛɛ, te enuɔ he ehaa tɛŋŋ? Ekpɛlɛ nɔ akɛ: “Bei komɛi lɛ minijiaŋ jeɔ wui fioo akɛ mináaa be babaoo ni mikɛaakase, shi miyaa nɔ mitswaa misaŋkui lɛ lolo ni mináa miishɛɛ yɛ milalai lɛ atswaa mli. Lala ji nikeenii ni jɛ Yehowa dɛŋ. Mináa he miishɛɛ waa, amrɔ nɛɛ ní mikɛ esɔɔmɔ lɛ eye klɛŋklɛŋ gbɛhe yɛ mishihilɛ mli lɛ.”—Mateo 6:33.

Lala ni Jieɔ Nyɔŋmɔ Yi

Albert kɛ Susie fataa Yehowa Odasefoi krokomɛi ni miihe ashɛ akpe toi akpei ekpaa lɛ ahe kɛ lala jieɔ Yehowa Nyɔŋmɔ yi daa. Yɛ Kristofoi akpeei ni afeɔ yɛ Maŋtsɛyeli Asai ni yɔɔ shikpɔji 234 lɛ amli lɛ ashishi lɛ, amɛláa amɛhaa Yehowa kɛjeɔ amɛkpeei ashishi ni amɛkɛkpáa kɛ́ hegbɛ aaaba. Lalai ni ŋɔɔŋɔi kɛ lalai amli wiemɔi ni damɔ Ŋmalɛ nɔ lɛ tsuɔ nii kɛjieɔ Yehowa Nyɔŋmɔ yi yɛ saŋkutswaa nibii wuji kɛ bibii fɛɛ amli.

Mɛi ni eba lɛ fɛɛ woɔ amɛgbeei anɔ ni amɛkɛ miishɛɛ alá akɛ Yehowa ji Nyɔŋmɔ ni susuɔ mɔ he (Lalawolo mli lala 44). Amɛláa yijiemɔ lala amɛhaa Yehowa (Lalawolo mli lala 190). Amɛlalai lɛ haa ayɔseɔ miishɛɛ kɛ gbɛnaa nii ni kã Kristofoi anyɛmifeemɔ, Kristofoi ashihilɛ, kɛ Kristofoi asubaŋi lɛ anɔ. Nɔ ni haa amɛmiishɛɛ lɛ daa hu ji gbɛ̀i srɔtoi ni atsɔɔ nɔ aláa ni Odasefoi ni yɔɔ Asia, Australia, Europe, kɛ North America kɛ South America kɛtsuɔ nii yɛ amɛlalai amli lɛ. *

Maŋtsɛmɛi alala ni yɔɔ nyam waa ni aŋma yɛ lalatsɛ lɛ gbii amli lɛ shishijee wiemɔi ji: “Nyɛlaa lala hee nyɛhaa Yehowa, shikpɔŋ lɛ fɛɛ, nyɛlaa nyɛhaa Yehowa! Nyɛlaa nyɛhaa Yehowa, nyɛjiea egbɛi lɛ yi! Nyɛgbaa eyiwalaheremɔ lɛ he sane gbi fɛɛ gbi! Nyɛjajea enunyam lɛ nyɛtsɔɔa yɛ jeŋmaji lɛ ateŋ, kɛ enaakpɛɛ nii lɛ yɛ maji fɛɛ ateŋ!” (Lala 96:1-3) Enɛ ji nɔ ni Yehowa Odasefoi feɔ yɛ nyɛ akutso lɛ mli, ni amɛmiifɔ̃ nine amɛmiitsɛ bo koni obafata amɛhe kɛlá yijiemɔ lala nɛɛ. Abaahere bo atuu yɛ amɛ Maŋtsɛyeli Asai amli, he ni obaanyɛ okase bɔ ni akɛ lala ni saa Yehowa hiɛ lɛ jieɔ eyi lɛ.

[Shishigbɛ niŋmai]

[Mfoniri ni yɔɔ baafa 28]

Nyɛláa yijiemɔ lalai nyɛhaa Yehowa