Nɛgbɛ Obaanyɛ Oná Ŋaawoo Kpakpa Yɛ?

Amrɔ nɛɛ, “nitsumɔhei ni kɛ ŋaawoo haa” lɛ náa shika waa daa afi, shika ni shɛɔ dɔlai akpekpei akpei abɔ. Gbɔmɛi miitao ni aye abua amɛ. Jwɛŋmɔŋ hela tsalɔ, Heinz Lehmann wie akɛ: “Sane eba bɔ ni atsuɔ wolo kasemɔ kɛ maŋ saji ahe nii ahaa lɛ he [yɛ adesai ashihilɛ mli ŋmɛnɛ]. Abuuu jamɔŋ jeŋbai tamɔ eji tsutsu lɛ dɔŋŋ. Wekui ashihilɛ bɛ shiŋŋ . . . , ni nɔ ni ejɛ mli eba ji akɛ, gbɔmɛi efee yuuyaa. Woloŋmalɔ Eric Maisel kɛɛ akɛ: “Mɛi ni be ko lɛ amɛtaoɔ yelikɛbuamɔ kɛjɛɔ wɔŋtsɛ, osɔfo loo weku datrɛfonyo ŋɔɔ kɛha jwɛŋmɔŋ, mumɔŋ, kɛ gbɔmɔtsoŋ naagbai lɛ kɛ woji ni akɛɛ ekɛ ŋaawoo ni anyɛɔ atsuɔ he nii haa lɛ tsuɔ nii amrɔ nɛɛ kɛha hetoo.”

AMERICAN Psychological Association (Amerika Jwɛŋmɔŋ He Naagbai Akuu) lɛ to kuu ko he gbɛjianɔ koni amɛpɛi nii ni nɛkɛ nitsumɔhei ni faa babaoo nɛɛ tsuɔ lɛ mli amɛkwɛ. Amɛkɛɛ akɛ, eyɛ mli akɛ “amɛnyɛɔ amɛyeɔ amɛbuaa aŋkroaŋkroi waa ni amɛnuɔ amɛ kɛ mɛi krokomɛi ashishi moŋ, . . . shi ehe adafitswaa mli wiemɔi lɛ kɛ gbɛi ni akɛwo lɛ lɛ mli wiemɔi lɛ ji nɔ ni awo he tsɔ, ni enáa mɛi ahenumɔi anɔ hewalɛ waa diɛŋtsɛ.” Toronto Star ŋmalɔ ko kɛɛ akɛ: “Kwɛmɔ jogbaŋŋ yɛ mumɔŋ jamɔi gbohii lɛ ahe . . . Kwɛmɔ ohe nɔ jogbaŋŋ titri yɛ woji ni akɛwoɔ he ŋaa, saji ni amɔmɔ awo kasɛtii anɔ aloo kpeei ni kɛ saji babaoo aloo ekɛ tsɔsemɔ haa yɛ be kukuoo mli ni agbooo he deŋme kwraa lɛ ahe.” Anɔkwale sane ji akɛ, mɛi babaoo diɛŋtsɛ yɛ ni miisumɔ ni amɛye amɛbua mɛi ni ehia amɛ lɛ yɛ anɔkwale mli. Shi kɛlɛ, dɔlɛ sane diɛŋtsɛ ji akɛ, aŋkroaŋkroi komɛi ni bɛ jeŋba miiná gbɔmɛi ni efee shoo ni piŋɔ lɛ ahe sɛɛ, ni amɛkɛ yelikɛbuamɔ diɛŋtsɛ aloo tsabaa kpakpa ko haaa amɛ.

Yɛ enɛ hewɔ lɛ, nɛgbɛ titri wɔbaanyɛ wɔná yelikɛbuamɔ ni akɛ he fɔ̃ɔ nɔ yɛ? Nɛgbɛ wɔbaanyɛ wɔná ŋaawoo ni abaanyɛ akɛtsu nii be fɛɛ be yɛ?

Gbɛtsɔɔmɔ ni Yeɔ Omanye lɛ Jɛɛhe

Amerikanyo Henry Ward Beecher ni ji afii ohai 19 lɛ mli shiɛlɔ lɛ kɛɛ akɛ: “Biblia lɛ ji Nyɔŋmɔ gbɛtsɔɔmɔ wolo kɛha bo, eyeɔ ebuaa bo ní okudɔ olɛlɛ lɛ, ni ehaaa okɛyasha shi, ni etsɔɔ bo he ni lɛjiadaamɔhe lɛ yɔɔ, kɛ bɔ ni ooofee oshɛ jɛmɛ ni okɛshiii tɛsaai aloo shia gɔji.” Nuu kroko ko hu wie Biblia lɛ he akɛ: “Mɔ ko mɔ ko yeko Ŋmalɛi lɛ onukpa pɛŋ; beni wɔdaraa lɛ, wolo lɛ mli wiemɔi lɛ bafeɔ faŋŋ ni wɔnuɔ shishi.” Mɛni hewɔ esa akɛ osusu nɛkɛ jɛɛhe nɛɛ he waa nakai lɛ?

Beni Biblia lɛ diɛŋtsɛ jieɔ ehe yi lɛ, ekɛɛ akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.” (2 Timoteo 3:16, 17) Saji ni jɛ Biblia lɛ mli lɛ Jɛɛhe ji he tuuntu ni wɔwala jɛ lɛ nɔŋŋ, Yehowa Nyɔŋmɔ ŋɔɔ. (Lala 36:10) Enɛ hewɔ lɛ, ele bɔ ni afee wɔ aha jogbaŋŋ, taakɛ  Lala 103:14 kaiɔ wɔ lɛ, akɛ: “Ejaakɛ ele wɔsu kɛ wɔbaŋ ejaakɛ ekaiɔ akɛ su kɛkɛ ji wɔ.” Enɛ hewɔ lɛ, wɔbaanyɛ wɔná hekɛnɔfɔɔ ni mli wa yɛ Biblia lɛ ŋaawoi lɛ amli.

Yɛ anɔkwale mli lɛ, Biblia lɛ yɛ shishitoo mlai kɛ gbɛtsɔɔmɔi babaoo ni wɔ diɛŋtsɛ wɔbaanyɛ wɔkɛtsu shihilɛ fɛɛ shihilɛ ni wɔbaaje mli lɛ he nii, ni wɔbaaná he sɛɛ. Nyɔŋmɔ tsɔɔ nɔ ekɛɔ wɔ akɛ: “Gbɛ lɛ nɛ! nyɛnyiɛa nɔ!” (Yesaia 30:21) Ani Biblia lɛ baanyɛ atsu aŋkroaŋkroi ni yɔɔ ŋmɛnɛ lɛ ahiamɔ nii ahe nii lɛɛlɛŋ? Nyɛhaa wɔkwɛa.

Biblia lɛ Tsuɔ Wɔhiamɔ Nii Ahe Nii . . .

Yɛ Yeyeeyefeemɔ He Nitsumɔ Mli. Biblia lɛ kɛɔ wɔ akɛ: “Nyɛkahaoa yɛ nɔ ko nɔ ko he, shi moŋ nɔ fɛɛ nɔ mli lɛ nyɛkɛ sɔlemɔ kɛ faikpamɔ kɛ shidaa atsĩa nyɛtutɔmɔi lɛ atã yɛ Nyɔŋmɔ hiɛ; ni Nyɔŋmɔ hejɔlɛ ni fe jwɛŋmɔi fɛɛ lɛ aaato nyɛtsuii kɛ nyɛjwɛŋmɔi lɛ yɛ Kristo Yesu mli!” (Filipibii 4:6, 7) Ani sɔlemɔ nyɛɔ etsuɔ yeyeeyefeemɔ henumɔi ni jɛɔ ohia, bɔlɛnamɔ mli niseniianiifeemɔ kɛ mɔ jɛmɔ, aloo nɔ ni jɛɔ suɔlɔ ko gbele mli baa lɛ he nii jogbaŋŋ? Susumɔ niiashikpamɔ ni nyiɛ sɛɛ nɛɛ he okwɛ.

Beni Jackie ná ele bɔlɛnamɔ mli niseniianii ni afee ebiyoo lɛ sɛɛ lɛ, ekɛɛ akɛ: “Fɔyeli henumɔi ni miná akɛni minyɛɛɛ mabu mi bi lɛ he lɛ ji nɔ ko ni minyɛŋ matsɔɔ mli. Ehe bahia ni makpee awerɛho, mlifu henumɔi kɛ mlila naa. Nɛkɛ henumɔi nɛɛ je shishi ebɔi mishihilɛ fitemɔ. Yehowa he bahia mi waa diɛŋtsɛ koni ebu mitsui he.” Yɛ be mli ni ekane Filipibii 4:6, 7 lɛ, ni esaa ekane mli ekoŋŋ lɛ, emia ehiɛ waa ni ekɛ emli ŋaawoo lɛ tsu nii. Jackie kɛɛ akɛ: “Misɔle daa gbi, mibi Yehowa shii abɔ ni ekaha mikɛ jwɛŋmɔi gbohii fite mi diɛŋtsɛ mihe, ni eye ebua mi ni miná tsui ni nyɔɔ mɔ mli ni yɔɔ miishɛɛ. Minuɔ he akɛ miyɛ mligbɛ toiŋjɔlɛ.”

Ekolɛ, obaana akɛ bo hu oyɛ shihilɛ ko ni onyɛɛɛ otsu he nii aloo onáaa enaa tsabaa ko, ni eeha oofee yeyeeye yɛ henumɔŋ. Kɛ okɛ Biblia mli ŋaawoo akɛ asɔle lɛ tsu nii lɛ, obaanyɛ otsu he nii jogbaŋŋ kɛmɔ shi. Lalatsɛ lɛ kɛ nɛkɛ wiemɔi nɛɛ woɔ wɔ hewalɛ akɛ: “Gbɛ ní onyiɛ nɔ lɛ, ŋɔɔfɔ̃ Yehowa nɔ, ní oŋɔ ohiɛ ofɔ̃ enɔ, ni eeefee.”—Lala 37:5.

Kɛha Hewalɛwoo. Lalatsɛ lɛ wie nɛkɛ hiɛsɔɔ wiemɔi nɛɛ: “Yehowa, miisumɔ owe shihilɛhe lɛ kɛ he ni onunyam lɛ hiɔ lɛ. Minane ma he ni ja tɔrɔmɔɔ. Majie Yehowa yi yɛ gwabɔi amli!” (Lala 26:8, 12) Aawo wɔ hewalɛ yɛ Biblia lɛ mli koni wɔkpe kutuu daa gbi ni wɔjá Yehowa. Mɛɛ gbɛ nɔ nɛkɛ naanyobɔɔ nɛɛ baanyɛ atsu ohiamɔ nii lɛ ahe nii yɛ? Mɛni mɛi krokomɛi eyɔse?

Becky kɛɛ akɛ: “Mifɔlɔi sɔmɔɔɔ Yehowa, no hewɔ lɛ, amɛhaa shihilɛ waa ehaa mi kɛji akɛ miibɔ mɔdɛŋ ni mafee nɔ fɛɛ nɔ ni kɔɔ sɔɔmɔ ni mikɛaaha Nyɔŋmɔ lɛ he lɛ. Ebiɔ mɔdɛŋbɔɔ babaoo diɛŋtsɛ yɛ migbɛfaŋ dani miyaa kpeei.” Becky nuɔ he akɛ enine shɛɔ jɔɔmɔi babaoo nɔ akɛni emiaa ehiɛ koni eya Kristofoi akpeei daa lɛ hewɔ. “Kpeei lɛ wajeɔ mihemɔkɛyeli, ni ehaa minyɛɔ midamɔɔ daa gbi nɔnyɛɛi ni mikɛkpeɔ akɛ skulnyo, biyoo, kɛ Yehowa tsulɔ lɛ naa. Gbɔmɛi ni yɔɔ Maŋtsɛyeli Asa lɛ nɔ lɛ yɛ srɔto kwraa yɛ mɛi ni mikɛ yaa skul lɛ ahe! Amɛsusuɔ mɔ he, ni amɛyeɔ amɛbua mɛi, ni saji ni wɔgbaa be fɛɛ be lɛ ji nɔ ni woɔ mɔ hewalɛ. Amɛji nanemɛi kpakpai.”

Hɛɛ, kɛtsɔ Biblia lɛ gbɛtsɔɔmɔ akɛ akpe kutuu daa gbi lɛ sɛɛnyiɛmɔ nɔ lɛ, wɔbaanyɛ wɔha Yehowa atsu wɔhiamɔ nii kɛha hewalɛwoo lɛ he nii. Biɛ ji he ni wɔnaa anɔkwale ni lalatsɛ lɛ wiemɔi lɛ ji lɛ yɛ akɛ: “Naa Nyɔŋmɔ ji wɔbobaahe kɛ wɔ hewalɛ, wɔbuamɔ ni wɔnáa yɛ fimɔi amli.”—Lala 46:2.

Kɛha Nitsumɔ ni Sɛɛnamɔ Yɔɔ He ni Haa Mɔ Tsui Nyɔɔ Emli. Biblia lɛ woɔ ŋaa akɛ: “Nyɛfia shi ni nyɛkagbugbaa, ni nyɛtekea nɔ yɛ Nuntsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛmɔdɛŋbɔɔ lɛ efeee yaka yɛ Nuntsɔ lɛ mli.” (1 Korintobii 15:58) Ani “Nuntsɔ lɛ nitsumɔ lɛ” haa mɔ tsui nyɔɔ emli lɛɛlɛŋ? Ani Kristofoi asɔɔmɔ nitsumɔ lɛ nyɛɔ etsuɔ nɔ ko ni sɛɛnamɔ yɔɔ he?

 Amelia tsɔɔ bɔ ni enuɔ he ehaa: “Mikɛ gbalashihilɛ mli hefatalɔi komɛi ni miihe atse gbala lɛ kase Biblia lɛ. Miye mibua yoo ko hu ni agbe ebiyoo yɛ yiwalɛ gbɛ nɔ. Yoo lɛ hao yɛ shihilɛ mli diɛŋtsɛ ni gbohii lɛ yɔɔ ni eleee lɛ hewɔ. Yɛ saji enyɔ lɛ fɛɛ mli lɛ, Biblia shishitoo mlai lɛ ní amɛkɛ tsu nii lɛ ha amɛná toiŋjɔlɛ, ni amɛná hiɛnɔkamɔ yɛ amɛshihilɛi amli. Akɛni mi hu mifata he ni aye abua amɛ hewɔ lɛ, miná miishɛɛ waa diɛŋtsɛ ni mitsui nyɔ mimli.” Scott kɛɛ akɛ: “Kɛji akɛ oyɛ shiɛmɔ nitsumɔ lɛ mli niiashikpamɔ ko ni kɔɔ Biblia mli nikasemɔ hee ko shishi ni oje, aloo omanyeyeli yɛ trukaa odaseyeli mli lɛ, no lɛ, obaawie he be fɛɛ yɛ owala shihilɛ mli. Be fɛɛ be ni okaiɔ ni ogbaa he sane lɛ, onáa miishɛɛ ekoŋŋ! Sɔɔmɔ nitsumɔ lɛ mli ji he ni miishɛɛ ni da fe fɛɛ ni sɛɛ tsɛɔ lɛ jɛɔ kɛbaa.”

Eyɛ faŋŋ akɛ, Biblia gbɛtsɔɔmɔ ni aŋkroaŋkroi nɛɛ kɛtsu nii koni amɛtsɔmɔ sɔɔlɔi ni yɔɔ ekãa lɛ ji nɔ ni ha amɛnine shɛ amɛhiamɔ nii ni ji nitsumɔ ni sɛɛnamɔ yɔɔ he ni haa mɔ tsui nyɔɔ emli lɛ nɔ. Aafɔ̃ bo hu nine koni okɛ ohe awo nɛkɛ nitsumɔ ni akɛtsɔɔ mɛi krokomɛi Nyɔŋmɔ gbɛ̀i lɛ kɛ eshishitoo mlai lɛ, ní yɛ nakai beaŋ nɔŋŋ lɛ, bo diɛŋtsɛ hu onáa he sɛɛ lɛ mli.—Yesaia 48:17; Mateo 28:19, 20.

Nyɔŋmɔ Wiemɔ lɛ ni Wɔɔná He Sɛɛ

Ŋwanejee ko bɛ he akɛ, abaanyɛ akɛ he afɔ̃ he ni Biblia lɛ jɛ lɛ nɔ kɛha gbɛtsɔɔmɔi ni anyɛɔ atsuɔ he nii yɛ ŋmɛnɛŋmɛnɛ jeŋ ni wɔyɔɔ mli nɛɛ mli. Bɔni afee ni wɔná he sɛɛ lɛ, ehe miihia ni wɔya nɔ wɔkɛ mɔdɛŋbɔɔ atsu he nii be fɛɛ be. Esa akɛ wɔkane, wɔkase, ni wɔjwɛŋ nɔ daa gbi. Paulo wo ŋaa akɛ: “Bɔɔ nii nɛɛ ahe mɔdɛŋ, okɛ ohe awo mli kwraa, koni mɛi fɛɛ ana oshweremɔ lɛ faŋŋ.” (1 Timoteo 4:15; 5 Mose 11:18-21) Nyɔŋmɔ ema nɔ mi eha wɔ akɛ, kɛ wɔkɛ eŋaawoo ni yɔɔ Biblia lɛ mli lɛ tsu nii lɛ, wɔbaaye omanye. Ewo shi akɛ: “Okɛ ohiɛ afɔ̃ Yehowa nɔ . . . kaimɔ lɛ yɛ ogbɛ̀i fɛɛ mli, ni lɛ eeejaje otempɔŋi lɛ!”—Abɛi 3:5, 6.

[Mfonirii ni yɔɔ baafa 31]

Biblia mli ŋaawoo ni akɛtsuɔ nii lɛ haa mɔ náa miishɛɛ yɛ shihilɛ mli