Awo Gilead Klas ni Ji 108 lɛ Hewalɛ ní Amɛkɛ Sɔɔmɔ Krɔŋkrɔŋ Aha

BEI pii lɛ, akɛ wiemɔ ni ji ‘jamɔ krɔŋkrɔŋ’ tsuɔ nii yɛ Biblia lɛ mli kɛkɔɔ Nyɔŋmɔ jamɔ he. Ejɛ Hela wiemɔ ni kɔɔ sɔɔmɔ ní akɛaaha Nyɔŋmɔ lɛ he lɛ mli. (Romabii 9:4) Mɛi 5,562 ni bo Buu Mɔɔ Biblia Gilead Skul klasbii ni Ji 108 lɛ skul naagbee nifeemɔ lɛ toi lɛ nu ni wielɔi lɛ kɛ ŋaawoo ní anyɛɔ akɛtsuɔ nii, ní baaye abua mɛi ni egbe nikasemɔ naa lɛ ni amɛkɛ jamɔ krɔŋkrɔŋ ní Yehowa Nyɔŋmɔ kpɛlɛɔ nɔ aha lɛ lɛ miiha. *

Theodore Jaracz, ni ji Yehowa Odasefoi a-Nɔyeli Kuu lɛ mlinyo lɛ fee sɛinɔtalɔ. Gbɛjianɔtoo lɛ je shishi kɛ lala 52, ‘Wɔ-Tsɛ lɛ Gbɛi.’ Nakai lala lɛ fã ni ji enyɔ lɛ jajeɔ akɛ: ‘Wɔtaoɔ gbɛ̀i ní wɔ hu wɔɔtsɔ nɔ wɔtse ogbɛi ní gbɛi ko kɛ lɛ yeee egbɔ lɛ he.’ Enɛ jie nikaselɔi aklas ni egbe nikasemɔ naa (ní amɛjɛ maji 10 mli kɛba) nɛɛ atsui mli shwelɛ kpo akɛ amɛkɛ tsɔsemɔ ní amɛná lɛ baatsu nii yɛ amɛ maŋsɛɛ sanekpakpa jajemɔ nitsumɔi, ni abaaha amɛ yɛ shikpɔji srɔtoi 17 nɔ lɛ amli.

Yɛ Nyɛminuu Jaracz shishijee wiemɔi lɛ amli lɛ, egbala jwɛŋmɔ kɛtee nyɔji enumɔ ní nikaselɔi lɛ kɛkase Biblia lɛ waa, ní esaa amɛ kɛha sɔɔmɔ yɛ maŋsɛɛ shikpɔji anɔ lɛ nɔ. Enɛ ye ebua amɛ koni ‘amɛka nii fiaa amɛkwɛ,’ ni tsɔɔ akɛ, ní amɛpɛi nɔ ni amɛkase amɛgbe naa lɛ mli jogbaŋŋ yɛ Nyɔŋmɔ Wiemɔ lɛ mli la lɛ kɛ gbeekpamɔ naa, ní ‘amɛmɔ nɔ ni hi lɛ mli.’ (1 Tesalonikabii 5:21) Ewo amɛ hewalɛ ní amɛkɛ amɛhe akpɛtɛ Yehowa, kɛ e-Wiemɔ lɛ, kɛ nitsumɔi ní no hewɔ atsɔse amɛ lɛ ahe yɛ anɔkwayeli mli. Mɛni baaye abua amɛ beni amɛfeɔ enɛɛmɛi fɛɛ lɛ?

Ŋaawoo ní Anyɛɔ Akɛtsuɔ Nii yɛ Sɔɔmɔ Krɔŋkrɔŋ Kɛhamɔ Mli

Lon Schilling, ni ji Betel Nitsumɔi Ajinafoi Akuu lɛ mlinyo lɛ wie saneyitso ni ji “Ani Obaaye Hiɛshikamɔ He Kaa lɛ Mli Omanye?” lɛ he. Ema sɛɛnamɔ ni yɔɔ hiɛshikamɔ ní akɛtsuɔ nii, ni jieɔ nilee ní Nyɔŋmɔ gbeyeishemɔ yɔɔ mli kpo lɛ he lɛ nɔ mi. (Yakobo 3:17) Hiɛshikamɔ tsɔɔ sane nɔkpɛlɛmɔ loo sane heŋmɛɛmɔ, hiɛaŋ ní akwɛɛɛ, nii ní afeee kɛtekeee nɔ, mɔ hesusumɔ, kɛ tsuishitoo. Nyɛminuu Schilling wie akɛ: “Gbɔmɛi ní hiɛ kã shi lɛ ŋmɛɔ pɛpɛɛpɛ yɛ bɔ ni amɛkɛ mɛi krokomɛi yeɔ haa lɛ mli. Amɛfeee amɛnii kɛtekeee nɔ.” Mɛni baanyɛ aye abua maŋsɛɛ sanekpakpa shiɛlɔ koni efee mɔ ni hiɛ kã shi? Esa akɛ ebu ehe akɛ mɔ ni baa shi, koni ekɛ hegbɛi ní enáa ní ekɛaabo mɛi krokomɛi atoi ní ekase nii kɛjɛ amɛŋɔɔ lɛ atsu nii, ní esumɔ akɛ eeebo mɛi krokomɛi asusumɔi atoi yɛ be mli ní eŋmɛɛɛ shishitoo mlai ni tsɔɔ Nyɔŋmɔ gbeyeishemɔ lɛ ahe ní ekɛsaa lɛ.—1 Korintobii 9:19-23.

 “Ohiɛ Akakpa nɔ akɛ Oooye Nii!” ji gbɛjianɔtoo lɛ fã ní nyiɛ sɛɛ lɛ saneyitso ni yɔɔ miishɛɛ, ni Samuel Herd, ni ji Nɔyeli Kuu lɛ mlinyo kroko ji mɔ ni wie he. Ema sɛɛnamɔ ni yɔɔ mumɔŋ niyenii kpakpa ní mɔ ko aaaye koni no aha eya nɔ ehe awa yɛ sɔɔmɔ krɔŋkrɔŋ he nitsumɔ mli lɛ nɔ mi. Nyɛminuu Herd wie akɛ: “Etsɛŋ ni nyɛ mumɔŋ nitsumɔ lɛ baafa babaoo beni nyɛkɛ nyɛhe woɔ nyɛ nitsumɔ ni ji shiɛmɔ kɛ nitsɔɔmɔ nitsumɔ lɛ mli lɛ. No hewɔ lɛ, ehe baahia ní nyɛha mumɔŋ niyenii ni nyɛyeɔ lɛ afa babaoo kɛya hiɛ bɔni afee ni nyɛha nyɛ hewalɛi lɛ aŋmɛ pɛpɛɛpɛ ní ekã ŋɛlɛ kome nɔ.” Mumɔŋ niyenii kpakpa ní maŋsɛɛ sanekpakpa shiɛlɔ aaaye daa lɛ baaye abua lɛ ní ekwa mumɔŋ nɔnyɛɛ kɛ hiɛ ní tseɔ shia. Eyeɔ ebuaa kɛhaa tsui ní nyɔɔ mɔ mli kɛ faishitswaa akɛ aaaya nɔ ahi nitsumɔ ni ji sɔɔmɔ krɔŋkrɔŋ lɛ mli.—Filipibii 4:13.

Gilead tsɔɔlɔi lɛ ekome, ni ji Lawrence Bowen, wo nikaselɔi ní egbe nikasemɔ naa lɛ hewalɛ ní “Amɛku Amɛsɛɛ Kɛya Shishijee Lɛ.” Mɛni etsɔɔ lɛ? Eha toibolɔi lɛ fɛɛ gbele Abɛi 1:7, he ni kɛɔ akɛ: “Yehowa gbeyeishemɔ ji nilee shishijee” lɛ. Wielɔ lɛ tsɔɔ mli akɛ: “Nɔ fɛɛ nɔ ni ekpɛlɛɛɛ shishijee anɔkwa sane ni tsɔɔ akɛ Yehowa yɛ diɛŋtsɛ lɛ nɔ lɛ nyɛŋ afee nɔ ni sa akɛ aaabu lɛ akɛ anɔkwa nilee  diɛŋtsɛ, ni shishinumɔ kpakpa ko hu nyɛŋ ajɛ mli aba.” Nyɛminuu Bowen kɛ Nyɔŋmɔ Wiemɔ, ni ji Biblia lɛ mli saji otii lɛ to mfoniri ko fãi ní futuɔ mɔ lɛ ahe. Kɛ́ akɛ fãi lɛ bɔi tsaramɔ lɛ, ehaa mfoniri lɛ jeɔ kpo. Beni fãi lɛ miifa lɛ, belɛ mfoniri lɛ miida ni eefee faŋŋ, ni ehaa mɔ ni naa lɛ jieɔ hiɛsɔɔ babaoo kpo yɛ he. Enɛ baanyɛ aye abua mɛi fɛɛ ní amɛkɛ sɔɔmɔ krɔŋkrɔŋ aha Nyɔŋmɔ.

Wallace Liverance, Gilead Skul lɛ nɔ onukpa lɛ, kɛ wiemɔi ní aha lɛ fɛɛ ba naagbee. Ewiemɔ lɛ yitso ji “Okɛ Shidaa Aha Nyɔŋmɔ akɛ Ofɔleshaa.” Egbala jwɛŋmɔ kɛtee sane ní kɔɔ kpitiyelɔi nyɔŋma ní Yesu tsá amɛ lɛ he lɛ nɔ. (Luka 17:11-19) Amɛteŋ mɔ kome pɛ ku esɛɛ ni ekɛ yijiemɔ baha Nyɔŋmɔ ni eda Yesu shi. Nyɛminuu Liverance wie akɛ: “Ŋwanejee ko bɛ he akɛ, mɛi krokomɛi lɛ hu ná miishɛɛ waa akɛ amɛhe etse. Eŋɔɔ amɛnaa waa diɛŋtsɛ akɛ amɛhe etse, shi etamɔ nɔ ni nɔ̃ pɛ ní amɛtao ji ni osɔfo lɛ atsɛ amɛ akɛ mɛi ni he tse.” Esa akɛ mumɔŋ hetsemɔ ni jɛɔ anɔkwale lɛ kasemɔ, kɛ shidaa ní ajieɔ lɛ kpo lɛ mli baa lɛ, akanya wɔ ní wɔjie shidaa kpo wɔtsɔɔ Nyɔŋmɔ yɛ emlihilɛ lɛ hewɔ. Awo Gilead klas ni ji 108 lɛ mli nikaselɔi lɛ hewalɛ ní amɛjwɛŋ Nyɔŋmɔ nitsumɔi lɛ kɛ emlihilɛ lɛ fɛɛ nɔ, koni amɛha amɛ sɔɔmɔ kɛ afɔleshaai lɛ afee shidaa ní amɛkɛhaa Nyɔŋmɔ lɛ kpojiemɔ.—Lala 50:14, 23; 116:12, 17.

Niiashikpamɔi kɛ Sanegbaai ni Tsɔɔ Bɔ ni Afeɔ lɛ Ahaa

Mark Noumair, ni ji Gilead tsɔɔlɔi lɛ ateŋ mɔ kroko lɛ, kwɛ gbɛjianɔtoo lɛ fã ni nyiɛ sɛɛ lɛ nɔ. Ekɔɔ shiɛmɔ nitsumɔ lɛ mli niiashikpamɔi ní klasbii lɛ ná yɛ amɛ nikasemɔ be lɛ mli lɛ he. Kɛ́ aja mli lɛ, nikaselɔi lɛ ateŋ mɔ fɛɛ mɔ kɛ nɔ ni miihe ashɛ afii 12 etsu nii yɛ be-fɛɛ sɔɔmɔ lɛ mli dani amɛba Gilead. Beni amɛyɔɔ skul lɛ, amɛkɛ gbɔmɛi ní jɛ shihilɛi srɔtoi amli je Biblia mli nikasemɔi babaoo ashishi, ni tsɔɔ akɛ nikaselɔi lɛ le bɔ ni amɛfeɔ ‘amɛtsɔmɔɔ amɛhe nɔ fɛɛ nɔ amɛhaa mɛi srɔtoi fɛɛ.’—1 Korintobii 9:22.

Yɛ nikaselɔi lɛ aniiashikpamɔi lɛ asɛɛ lɛ, Charles Molohan kɛ William Samuelson kɛ Betel weku lɛ mli bii kɛ nɔkwɛlɔi gbɛfalɔi ní eba Gilead dã lɛ ekomɛi gba sane. Nyɛmimɛi ní amɛkɛgba sane lɛ ateŋ mɔ kome, ni ji Robert Pevy, yasɔmɔ yɛ Philippines beni egbe nikasemɔ naa yɛ Gilead klas ni ji 51 lɛ mli lɛ. Ekai klasbii lɛ akɛ: “Be fɛɛ be ni naagba ko aaate shi lɛ, mɔ fɛɛ mɔ kɛ eŋaawoo haa ni ekɛtsɔɔ bɔ ni aaafee aná enaa tsabaa. Be fɛɛ be nɛɛ, mɔ ko yɛ ní ehe yɛ oya kwraa fe bo, mɔ ko ní baanyɛ ekɛ susumɔ ní fe onɔ lɛ aha. Shi kɛ́ okwɛ Biblia lɛ mli ní obɔ mɔdɛŋ ní otao bɔ ni Nyɔŋmɔ susuɔ yɛ saji ahe lɛ, no lɛ mɔ ko mɔ ko nyɛŋ ekɛ susumɔ ní fe no aha. No baafee hetoo ni ja be fɛɛ be.”

John Barr, ni ji Nɔyeli kuu lɛ mlinyo lɛ, wie naagbee wiemɔ ní muɔ mumɔŋ gbɛjianɔtoo fɛfɛo lɛ naa, ni esaneyitso lɛ ji “Okɛ Sɔɔmɔ Krɔŋkrɔŋ ní Akpɛlɛɔ nɔ Aha Yehowa.” Etsɔɔ bɔ ni aaafee ajie sɔɔmɔ krɔŋkrɔŋ kpo yɛ shiɛmɔ nitsumɔ lɛ mli ní akɛye abua mɛi ni yɔɔ jalɛ tsuii lɛ ní amɛjá Nyɔŋmɔ yɛ gbɛ ní ekpɛlɛɔ nɔ lɛ nɔ. Beni egbala jwɛŋmɔ kɛtee Yesu wiemɔi ni yɔɔ Mateo 4:10 lɛ nɔ sɛɛ lɛ, Nyɛminuu Barr wie akɛ: “Kɛ́ wɔɔjá Yehowa koome pɛ lɛ, no lɛ esa akɛ wɔkwa wɔŋjamɔ gbɛ̀i ni yɔɔ nigii, tamɔ hiɛjoomɔ, ninamɔ he akɔnɔ, kɛ hiɛnyam taomɔi fɛɛ. Kwɛ bɔ ni ehaa wɔnáa miishɛɛ kɛ́ wɔsusu he akɛ wɔ maŋsɛɛ sanekpakpa shiɛlɔi ní etsu nii aahu afii abɔ, kɛjɛ afi 1940 afii lɛ ashishijee gbɛ kɛbaa nɛɛ efee nɔkwɛmɔnɔ kpakpa amɛfɔ̃ shi yɛ enɛ gbɛfaŋ! Ni wɔyɛ nɔmimaa waa akɛ nyɛ Gilead klas ni ji 108 ní egbe nikasemɔ naa nɛɛ hu baanyiɛ amɛ nɔkwɛmɔnɔ kpakpa lɛ sɛɛ. Nyɛkɛ sɔɔmɔ krɔŋkrɔŋ baaha Yehowa, mɔ ni lɛ ekoome pɛ esa akɛ akɛha lɛ lɛ.”

Enɛ fee gbɛjianɔtoo ní tswaa mɔ emaa shi nɛɛ naagbee fɛfɛo diɛŋtsɛ. Agbɛnɛ be bashɛ ní akɛbaabo ŋamɔi ni jɛ mɛi ni sumɔɔ amɛsane ni yɔɔ je lɛŋ hei srɔtoi fɛɛ lɛ aŋɔɔ lɛ toi, kɛ amɛyijiemɔ woji lɛ kɛhamɔ, kɛ agbɛnɛ, wolo ní klas lɛ eŋma kɛmiitsɔɔ hiɛsɔɔ ní amɛná kɛha tsɔsemɔ ní amɛnine eshɛ nɔ lɛ hu kanemɔ. Awo klas ní egbe nikasemɔ naa lɛ ŋaa ní amɛjie su ni ji anɔkwayeli ní akɛkpɛtɛɔ nɔ ko he lɛ kpo yɛ amɛnitsumɔi lɛ kɛ Yehowa sɔɔmɔ hu mli. Mɛi fɛɛ ní ba jɛmɛ, kɛ gbɔi ni jɛ maji 25 nɔ kɛba lɛ, fɛɛ fee ekome ni akɛgbe gbɛjianɔtoo lɛ naa kɛ lala kɛ sɔlemɔ.

[Shishigbɛ niŋmaa]

[Akrabatsa ni yɔɔ baafa 23]

KLASBII LƐ AHE SAJI

Maji srɔtoi anɔ ní amɛjɛ kɛba: 10

Maji srɔtoi ní aha amɛ nitsumɔ yɛ mli: 17

Nikaselɔi lɛ ayifalɛ: 46

Afii abɔ ní amɛye lɛ mlijaa: 34

Afii abɔ ní amɛkɛhi anɔkwale lɛ mli lɛ mlijaa: 16

Afii abɔ ní amɛkɛsɔmɔ kɛ amɛbe fɛɛ mlijaa: 12

[Mfoniri ni yɔɔ baafa 24]

Buu Mɔɔ Biblia Gilead Skul Klasbii ni Ji 108 ní Gbe Nikasemɔ Naa

Gbɛi ni yɔɔ shishigbɛ lɛ miitsɔɔ bɔ ni amɛdamɔ shi lɛ mli, kɛjɛ hiɛ gbɛ kɛyaa sɛɛ gbɛ, ni amɛgbɛi lɛ jeɔ shishi kɛjɛɔ abɛku kɛyaa ninejurɔ gbɛ.

(1) Amadori, E.; Cook, O.; Byrne, M.; Lee, A. (2) Newsome, D.; Pederzolli, A.; Bigras, H.; Kato, T.; Gatewood, D. (3) Eade, D.; Eade, J.; Wells, S.; Jamison, J.; Gonzales, M.; Gonzales, J. (4) Kato, T.; Lohn, D.; Niklaus, Y.; Preiss, S.; Foster, P.; Ibarra, J. (5) Amadori, M.; Manning, M.; James, M.; Boström, A.; Gatewood, B.; Newsome, D. (6) Foster, B.; Jamison, R.; Hifinger, A.; Koffel, C.; Koffel, T.; Byrne, G. (7) Hifinger, K.; Manning, C.; Cook, J.; Boström, J.; Lohn, E.; Pederzolli, A. (8) James, A.; Wells, L.; Preiss, D.; Niklaus, E.; Lee, M.; Ibarra, P.; Bigras, Y.