Shihilɛ ni Yeɔ Emuu Jeee Lamɔ ko Kɛkɛ!

Jeŋ ni yeɔ emuu—mɛni etsɔɔ kɛha bo? Bo lɛ susumɔ he okwɛ ní oona adesai ashihilɛ ko ni awuiyeli, tsofa fɔŋ kɛ nitsumɔ, hɔmɔ, ohia loo saneyeli ni ejaaa bɛ mli. Mɔ fɛɛ mɔ miiná hewalɛ kpakpa mli ŋɔɔmɔ yɛ henumɔŋ kɛ gbɔmɔtsoŋ. Awerɛhoyeli loo tsuiyeli bɛ jɛmɛ ejaakɛ áfo gbele po sɛɛ. Ani ehi akɛ ashweɔ koni jeŋ ko ni tamɔ nɛkɛ aba?

YƐ BE mli ni mɛi babaoo ekuuu amɛhiɛ amɛshwieee hiɛyaa ni anáa yɛ jeŋ nilee kɛ tsɔnei ahe nilee mli lɛ, amɛheee amɛyeee diɛŋtsɛ akɛ adesai anilee loo nikasemɔ baanyɛ ekɛ jeŋ ni yeɔ emuu ni mɛi fɛɛ baahi mli yɛ toiŋjɔlɛ kɛ miishɛɛ mli lɛ aba. Yɛ gbɛ kroko nɔ lɛ, ŋwanejee ko bɛ he akɛ adesai asu ji ni amɛha shihilɛ aya hiɛ ni eye emuu. Yɛ anɔkwale mli lɛ, lamɔ kɛkɛ yeŋ ebuaŋ mɛi ni bɛ wɔɔhe kɛ ohiafoi lɛ, ni ehaŋ kpajelɔi kɛ helatsɛmɛi ni taoɔ koni amɛye amɛhe kɛjɛ amɛ piŋmɔ mli lɛ hu atsui anyɔ amɛmli. Jeŋ ni eye emuu baŋ kɛkɛ kɛtsɔŋ adesai anyɛmɔ nɔ. Yɛ awerɛhoyeli kɛ nɔnyɛɛ fɛɛ sɛɛ lɛ, yiŋtoi kpakpai yɛ ni aaadamɔ nɔ ahe aye akɛ jeŋ ni obaatsɛ lɛ akɛ nɔ ni yeɔ emuu ebɛŋkɛ lɛɛlɛŋ.

Kɛ oosusu shihilɛ ni yeɔ emuu he lɛ, ekolɛ Yesu Kristo shihilɛ ji nɔ ni baaba ojwɛŋmɔ mli. Jeee Yesu pɛ ji adesa ni yeɔ emuu ni ehi shikpɔŋ nɔ pɛŋ. Adam kɛ Hawa ni abɔ amɛ yɛ Nyɔŋmɔ subaŋ nɔ lɛ, ná shihilɛ ni yeɔ emuu mli ŋɔɔmɔ yɛ paradeiso. Fɛɛ sɛɛ lɛ, nɛkɛ shihilɛ ni hi jogbaŋŋ nɛɛ ŋmɛɛ amɛ yɛ atua ni amɛtse amɛshi amɛŋwɛi Tsɛ lɛ hewɔ. (1 Mose 3:1-6) Shi kɛlɛ, Bɔlɔ lɛ dũ suɔmɔ ni ayɔɔ akɛ aaahi shi kɛya naanɔ lɛ ewo adesai amli. Jajelɔ 3:11 yeɔ he odase akɛ: ‘Nyɔŋmɔ feɔ nɔ fɛɛ nɔ fɛfɛo yɛ ebe mli, asaŋ eŋɔ naanɔ hu ewo amɛtsui mli; na kɛkɛ gbɔmɔ enaaa nitsumɔ ni Nyɔŋmɔ tsuɔ kɛjɛɔ shishijee kɛyaa naagbee lɛ.’

Eyɛ mli moŋ akɛ emuu ni ayeee kɛ esha ha adesai bote “yakayakanii” ashihilɛ mli kɛ ‘heyeli kɛmiijɛ fitemɔ nyɔŋyeli’ mli moŋ, shi kadimɔ bɔfo Paulo miishɛjemɔ wiemɔi ni ji: “Bɔɔ nii lɛ agbɛkwɛmɔ kpɛ̃kpɛ̃ɛkpɛ̃ lɛ miimɛ Nyɔŋmɔ bii lɛ akpojiemɔ lɛ. Ejaakɛ aŋɔ bɔɔ nii lɛ awo yakayakanii ashishi, jeee amɛ diɛŋtsɛ amɛsuɔmɔnaa, shi moŋ yɛ mɔ ni ba amɛ shi lɛ hewɔ, yɛ nɔhiɛkamɔ mli;  akɛ bɔɔ nii lɛ diɛŋtsɛ hu baaye amɛhe kɛjɛ fitemɔ nyɔŋyeli lɛ mli kɛya Nyɔŋmɔ bii lɛ anunyam heyeli lɛ mli.” (Romabii 8:19-21) Biblia lɛ feɔ lɛ faŋŋ akɛ akɛ gbɛjianɔ ni Nyɔŋmɔ eto koni akɛná adesa wala ni yeɔ emuu ekoŋŋ lɛ haa kɛtsɔɔ Yesu Kristo nɔ.—Yohane 3:16; 17:3.

Kɛfata nɛkɛ naakpɛɛ hiɛnɔkamɔ ni yɔɔ kɛha wɔsɛɛ be nɛɛ he lɛ, wɔ fɛɛ wɔyɛ nyɛmɔ ni wɔkɛaaya hiɛ yɛ mumɔŋ, koni amrɔ nɛɛ, wɔha wɔ nɔyaa lɛ afee faŋŋ.

Bɔɔ Mɔdɛŋ ni Ofee Mɔ ni Nuɔ Sane Shishi

Yesu Kristo bu emuuyeli sane lɛ akɛ nɔ ni he hiaa aahu akɛ ekɛɛ gbɔmɛi babaoo ko akɛ: “No hewɔ lɛ nyɛhia kɛwulaa shi, tamɔ bɔ ni nyɛtsɛ ni yɔɔ ŋwɛi lɛ hi kɛwula shi lɛ.” (Mateo 5:48) Ani Yesu miikpa gbɛ lɛɛlɛŋ akɛ wɔɔfee mɛi ni tɔmɔ bɛ amɛhe yɛ ŋmɛnɛŋmɛnɛ nibii agbɛjianɔtoo fɔŋ nɛɛ mli? Dabi. Eka shi faŋŋ akɛ, esa akɛ wɔmia wɔhiɛ ni wɔjie sui ni ji nikee, mlihilɛ, kɛ suɔmɔ kpo wɔtsɔɔ wɔnanemɛi gbɔmɛi, ni kɛlɛ bei pii lɛ, wɔnyɛɛɛ wɔfee nɔ ni ja. Yesu bɔfoi lɛ ateŋ mɔ kome po ŋma akɛ: “Kɛji wɔjaje wɔhe eshai lɛ, anɔkwafo kɛ jalɔ ji lɛ, koni ekɛ wɔhe eshai lɛ afa wɔ ni etsumɔ wɔhe kɛjɛ nii ni ejaaa gbɛ fiaa mli. Kɛji wɔkɛɛ akɛ wɔfeko esha lɛ, belɛ wɔmiitsɔ̃ lɛ amalelɔ, ni ewiemɔ lɛ bɛ wɔmli.”—1 Yohane 1:9, 10.

Fɛɛ sɛɛ lɛ, wɔbaanyɛ wɔha bɔ ni wɔnaa wɔhe wɔhaa ni wɔkɛ mɛi krokomɛi yeɔ wɔhaa lɛ aya hiɛ, ní wɔkafee nibii kɛteke nɔ. Namɔ baanyɛ aná gbɛtsɔɔmɔ kpakpa kɛha subaŋ ni ŋmɛɔ pɛpɛɛpɛ, ni sane shishinumɔ yɔɔ mli ni fe nɔ ni yɔɔ Nyɔŋmɔ Wiemɔ, Biblia lɛ mli lɛ? Miishɛɛ su ni aaaná kɛ shihilɛ ni yɔɔ mlɛo mli ni aaahi lɛ baaye ebua wɔ koni wɔnyɛ wɔkɛ mɛi krokomɛi ni yɔɔ nitsumɔhe, wɔ gbalashihilɛ mli hefatalɔi kɛ wɔfɔlɔi loo wɔbii ahi shi ojogbaŋŋ. Bɔfo Paulo wo Kristofoi ŋaa akɛ: “Nyɛmii ashɛa yɛ Nuntsɔ lɛ mli daa! misaa miikɛɛ: Nyɛmii ashɛa! Nyɛmlijɔlɛ lɛ nyɛhaa gbɔmɛi fɛɛ alea! Nuntsɔ lɛ ebɛŋkɛ.”—Filipibii 4:4, 5.

Sɛɛnamɔi ni Yɔɔ Sane Shishi ni Aaanu lɛ Mli

Kɛ okɛ sane shishinumɔ tsu nii yɛ nibii ni okpaa gbɛ lɛ ahe ni okpaaa emuuyeli gbɛ kɛjɛɛɛ mɔ dɛŋ koni ekɛ piŋmɔ kɛ awuiyeli akaba lɛ, bo kɛ mɛi krokomɛi fɛɛ náa he sɛɛ. Nɔ ni fata onyɛmɔi diɛŋtsɛ ni ooole lɛ he ji ni ooofee onii yɛ faŋŋ mli ni okɛ sane shishinumɔ atsu nii yɛ nɔ ni otaoɔ ni ofee lɛ mli. Kaimɔ akɛ Nyɔŋmɔ bɔ wɔ koni wɔhi shikpɔŋ nɔ, ni wɔtsui anyɔ wɔmli yɛ nitsumɔ ni he yɔɔ sɛɛnamɔ mli, ni wɔ kɛ mɛi krokomɛi fɛɛ baaná he sɛɛ.—1 Mose 2:7-9.

Kɛ okpaa babaoo tsɔ̃ gbɛ kɛjɛɔ bo diɛŋtsɛ odɛŋ lɛ, mɛni hewɔ okɛ ekãa bɛŋkɛɛɛ Yehowa yɛ sɔlemɔ mli? Nyɔŋmɔ hiɛ duromɔ ni oooná lɛ baaha oná hejɔlɛ babaoo. Yehowa le wɔbɔɔ su kɛ emuu ni wɔyeee lɛ, no hewɔ lɛ ejeee mɔ ni nuuu sane shishi loo mɔ ni ewa akɛ aaasa ehiɛ. Lalatsɛ lɛ maa nɔ mi ehaa wɔ akɛ: “Bɔ ni tsɛ musuŋ tsɔɔ lɛ yɛ ebii ahe lɛ, nakai Yehowa musuŋ tsɔɔ lɛ yɛ mɛi ní sheɔ lɛ lɛ ahe. Ejaakɛ ele wɔsu kɛ wɔbaŋ, ekaiɔ akɛ sũ kɛkɛ ji wɔ.” (Lala 103:13, 14) Kwɛ bɔ ni wɔdaa shi akɛ Nyɔŋmɔ kɛ adesai yeɔ yɛ mɔbɔnalɛ gbɛ ni tamɔ nɛkɛ nɔ! Ele he ni wɔfeɔ wɔnii kɛyashɛɔ, ni kɛlɛ wɔbaanyɛ wɔfee mɛi ni jara wa yɛ ehiɛ tamɔ bii ni asumɔɔ.

 Yɛ nɔ najiaŋ ni wɔɔtiu emuuyeli ni akpaa gbɛ kɛjɛɔ mɔ dɛŋ lɛ sɛɛ lɛ, kwɛ bɔ ni nilee yɔɔ mli akɛ wɔɔná mumɔŋ sɛɛyoomɔ kɛ sane he susumɔ ni ŋmɛɔ pɛpɛɛpɛ! Kɛfata he lɛ, wɔbaanyɛ wɔná nɔmimaa akɛ mɔ ko mɔ ko nyɛŋ atsĩ Yehowa naa koni ekanyɛ etsu eyiŋtoo ni ehiɛ akɛ ebaawó adesai anɔ kɛya emuuyeli mli yɛ Nyɔŋmɔ Maŋtsɛyeli lɛ mli lɛ he nii. Shi, mɛni ji nɔ ni emuu ni adesai aaaye lɛ tsɔɔ?

Shihilɛ ni Yeɔ Emuu Hi Fe Nɔ ni Aaakpa Emuuyeli Gbɛ Kɛjɛ Mɔ Dɛŋ

Emuuyeli shihilɛ etsɔɔɔ akɛ esa akɛ akpa emuuyeli gbɛ kɛjɛ mɔ dɛŋ. Eka shi faŋŋ akɛ, mɛi ni ená hegbɛ akɛ amɛaahi Paradeiso yɛ shikpɔŋ nɔ yɛ Nyɔŋmɔ Maŋtsɛyeli lɛ mli lɛ efeŋ mɛi ni kpaa nii babaoo gbɛ, ní buɔ amɛhe jalɔi. Taomɔ nii ni baaha aná yibaamɔ kɛfo amanehulu kpeteŋkpele lɛ ateŋ ekome ji hiɛsɔɔ ni jɛ tsuiŋ ni aaaná aha afɔleshaa kpɔmɔ nɔ lɛ, taakɛ majimaji ateŋ asafo babaoo lɛ tsɔɔ lɛ, mɛi ni bɔfo Yohane wie amɛhe akɛ: “Yiwalaheremɔ lɛ ji wɔ-Nyɔŋmɔ ni ta maŋtsɛsɛi lɛ nɔ̃ lɛ, kɛ toobi lɛ nɔ̃” lɛ. (Kpojiemɔ 7:9, 10, 14) Mɛi fɛɛ ni baaná yibaamɔ kɛfo amanehulu kpeteŋkpele ni bɛŋkɛɔ lɛ baaná hiɛsɔɔ eha suɔmɔ mli ni Kristo jɛ egbo eha amɛ kɛ mɛi fɛɛ ni náa emli hemɔkɛyeli lɛ. Suɔmɔ mli ni ejɛ ekɛ efɔleshaa lɛ ha lɛ kɛ shishitoo nɔ ni amɛaatsɔ nɔ amɛye amɛhe kɛjɛ amɛtɔmɔi kɛ gbɔjɔmɔi amli lɛ ha.—Yohane 3:16; Romabii 8:21, 22.

Te shihilɛ ni yeɔ emuu baatamɔ aha tɛŋŋ? Yɛ nɔ najiaŋ ni akaŋshii kɛ otii ni pɛsɛmkunya yɔɔ mli ni akɛmaa hiɛ lɛ aaaya nɔ lɛ, suɔmɔ kɛ mlihilɛ ni baaya nɔ yɛ adesai ateŋ lɛ baaha shihilɛ aŋɔɔ, ní ejie yeyeeyefeemɔ kɛ susumɔ ni anáa akɛ sɛɛnamɔ bɛ mɔ he lɛ kɛya. Ni kɛlɛ, shihilɛ ni yeɔ emuu lɛ efeŋ tamɔ tɔlɛ loo nɔ ni jeɔ mɔ tsine. Nyɔŋmɔ Wiemɔ lɛ kɛ Paradeiso he saji fɛɛ ni yɔɔ fitsofitso haaa, shi etsɔɔ shihilɛ ni wɔbaanyɛ wɔkpa gbɛ akɛ: “Amɛaamamɔ tsũi, ni amɛaahi mli, ni amɛaafee weintromi, ni amɛaaye mli yibii! Amɛmamɔŋ tsũi, ní mɔ kroko ahi mli, ni amɛhuŋ hu, ní mɔ kroko aye; ejaakɛ mimaŋ lɛ gbii aaatamɔ tsei agbii, ni mɛi ni mihala lɛ aaaye amɛnine naa nitsumɔ lɛ mli nii aahu po. Amɛgboŋ deŋme yakatswaa, ni amɛfɔŋ amɛhaŋ oshara.”—Yesaia 65:21-23.

Yɛ nɔ najiaŋ ni wɔɔsusu nɔ̃ hiɛtserɛjiemɔ, jarayeli tsũi, tsɔne he nilee, loo gbɛfaa tsɔne ni Maŋtsɛyeli lɛ kɛbaaha lɛ he lɛ, susumɔ ní ooná wiemɔi nɛɛ amlibaa mli ŋɔɔmɔ, nɔ ni kɛɛ: “Klaŋ kɛ too gwantɛŋ bi aaaye nii yɛ he kome, ni jata aaaye jwɛi tamɔ tsina; ni onufu lɛ, sũ aaafee eniyenii: ayeŋ awui ni akpataŋ hiɛ dɔŋŋ yɛ migɔŋ krɔŋkrɔŋ lɛ nɔ fɛɛ, Yehowa kɛɛ.” (Yesaia 65:25) Kwɛ bɔ ni shihilɛ ni yeɔ emuu baafee srɔto yɛ nɔ ni onaa ŋmɛnɛ lɛ he! Kɛ obafee mɛi ni abuɔ amɛ akɛ amɛji mɛi ni sa akɛ amɛaahi shi yɛ nakai be lɛ mli lɛ ateŋ mɔ kome lɛ, obaaná nɔ ni obaadamɔ nɔ oná nɔmimaa akɛ oŋwɛi Tsɛ ni yɔɔ suɔmɔ lɛ baaná bo kɛ oweku lɛ he miishɛɛ. “Omii ashɛ Yehowa he, ni eeehao nii ni otsui taoɔ lɛ.”—Lala 37:4.

Shihilɛ ni yeɔ emuu lɛ jeee lamɔ ko kɛkɛ. Yehowa yiŋtoo ni suɔmɔ yɔɔ mli ni kɔɔ adesai ahe lɛ baaba mli kwraa kɛmɔ shi. Bo kɛ oweku lɛ baanyɛ afata mɛi ni abaatee amɛ shi kɛya adesai emuuyeli mli ni amɛhi shi kɛya naanɔ yɛ Nyɔŋmɔ jeŋ hee lɛ mli lɛ ahe. Biblia lɛ gbaa akɛ: “Jalɔi lɛ, shikpɔŋ lɛ aaatsɔ amɛnɔ̃ ni amɛaahi nɔ daa.”—Lala 37:29.

[Mfoniri ni yɔɔ baafa 6]

Wɔbaanyɛ wɔha bɔ ni wɔbuɔ wɔhe kɛ mɛi krokomɛi wɔhaa lɛ aya hiɛ, koni wɔkakpa emuuyeli gbɛ kɛjɛ mɔ dɛŋ loo wɔkapɛi nɔ fɛɛ nɔ mli fitsofitso

[Mfoniri ni yɔɔ baafa 7]

Mɛni hewɔ ofeee he mfoniri akɛ ooná toiŋjɔlɛ shihilɛi ni jalɛ hiɔ mli lɛ mli ŋɔɔmɔ momo yɛ Paradeiso?