Wala Shihilɛ He Sane

Kɛjɛ Tawuu Nibii Afeemɔ Mli Kɛtee Mɛi Ayiwalaheremɔ Mli

TAAKƐ ISIDOROS ISMAILIDIS GBA

No mli lɛ mikoto minakutsei anaa ni yaafonui miitsere kɛmiijɛ mikpaii ahe kɛmiishwie shi. Mikɛɛ yɛ sɔlemɔ mli akɛ: “Oo, Nyɔŋmɔ mihenilee miikɛɛ mi akɛ minyɛŋ maya nɔ matsu nii yɛ he ni afeɔ tawuu nibii yɛ nɛɛ dɔŋŋ. Mibɔ mɔdɛŋ koni maná nitsumɔ kroko, shi minyɛko maná eko. Wɔ́ lɛ, mikɛ wolo ni miŋma ni tsɔɔ akɛ mitsuuu nii lɛ dɔŋŋ lɛ baaha. Yehowa, ofainɛ kaaha hɔmɔ ye wɔbii ejwɛ lɛ.” Mɛni kɛ sane nɛɛ ba?

NO MLI lɛ wɔyɛ toiŋjɔlɛ yɛ he ni afɔ mi yɛ yɛ afi 1932 yɛ Drama, Greece kooyigbɛ, ni shihilɛ lɛ hu yɛ mlɛo. Bei pii lɛ, ataa kɛ mi gbaa nɔ ni esumɔɔ ni mafee lɛ he sane. Ewo mi hewalɛ koni maya United States ni mayakase nii. Beni aŋɔ nibii ni Greece yɔɔ lɛ kɛjɛ edɛŋ yɛ Jeŋ Ta II lɛ mli lɛ, kɛkɛ ni abɛbua nɛɛ he shi, nɔ ni kɛɔ akɛ: “Nyɛbaanyɛ nyɛju wɔ nibii, shi nyɛnyɛŋ nyɛju wɔnilee kɔkɔɔkɔ.” Mitswa mifai shi akɛ, makase nii waa diɛŋtsɛ ni maná nɔ ko ni mɔ ko mɔ ko nyɛŋ aju kɔkɔɔkɔ.

Kɛjɛ migbekɛbiiashi tɔŋŋ ni mikɛ oblahii akui srɔtoi ni Greek Ɔrtodɔks Sɔlemɔ lɛ to he gbɛjianɔ lɛ bɔi bɔɔ. Awo wɔ ŋaa koni wɔtsi wɔhe kɛjɛ jamɔ kui ni amɛhe yɔɔ oshara ni atsetsei lɛ ahe. Mikaiɔ akɛ atsĩɔ kuu kome ko tã waa—Yehowa Odasefoi—akɛni etamɔ nɔ ni amɛdamɔɔ anti-Kristo lɛ najiaŋ lɛ hewɔ.

Beni migbe tɛkinikal skul naa yɛ Athens yɛ afi 1953 mli lɛ, mifã gbɛ kɛtee Germany miyakwɛ akɛ maná nitsumɔ ko matsu lo koni yɛ nakai beaŋ nɔŋŋ lɛ maya skul hu. Shi akɛni miyeee omanye hewɔ lɛ, mifã gbɛ kɛtee maji krokomɛi anɔ. Yɛ otsii fioo komɛi asɛɛ lɛ, mishika tã kwraa beni miyɔɔ Belgium lɛ. Mikaiɔ akɛ mibote sɔlemɔtsu ko mli, miyata shi, ni mifo waa diɛŋtsɛ  ni anaa yaafo nui ni etsere eshwie shikpɔŋ lɛ yɛ mihiɛ. Misɔle mikɛɛ Nyɔŋmɔ akɛ kɛji eye ebua mi ni miná nitsumɔ yɛ United States lɛ, no lɛ mikɛ heloonaa nibii asɛɛtiumɔ efeŋ minitsumɔ, shi moŋ maya skul ni mabɔ mɔdɛŋ koni matsɔ Kristofonyo kpakpa kɛ maŋnyo kpakpa. Yɛ naagbee lɛ, miyashɛ jɛmɛ yɛ afi 1957 mli.

Shihilɛ Hee yɛ United States

Shihilɛ yɛ United States wa kɛha gbɔ ni lé amɛ wiemɔ lɛ ni bɛ shika hu. Mitsuɔ nii srɔtoi enyɔ gbɛkɛ ni mikɛ tɔlɛ yaa skul shwane. Mitee kɔlejii srɔtoi pii, ni miná gbekɛbii ayijiemɔ wolo. Kɛkɛ ni mitee University of Califonia yɛ Los Angeles, ni miyaná klɛŋklɛŋ yijiemɔ wolo yɛ jeŋ nilee nikasemɔ mli. Nɔ ni Ataa kɛɛ mi yɛ skulyaa he lɛ ji nɔ ni ha mitee hiɛ yɛ nɛkɛ jaramɔ afii nɛɛ amli.

Mina Greek gbɛkɛ yoo fɛfɛo ko ni atsɛɔ lɛ Ekaterini yɛ nɛkɛ be nɛɛ mli ni wɔbote gbalashihilɛ mli yɛ afi 1964 mli. Wɔfɔ wɔ klɛŋklɛŋ binuu lɛ yɛ afii etɛ sɛɛ, ni yɛ nɔ ni shɛɛ afii ejwɛ mli lɛ wɔfɔ bihii enyɔ kɛ yoo kome wɔfata he. Lɛɛlɛŋ, eji nitsumɔ wulu akɛ aaakwɛ weku ní yɛ nakai beaŋ nɔŋŋ lɛ aaya univɛrsiti hu.

No mli lɛ miitsu nii miiha U. S. Air Force (United States Kɔɔyɔŋ Lɛji ni Akɛwuɔ Ta) lɛ yɛ hei ni afeɔ okplɛmi wuji yɛ kɛ ŋwɛiniiaŋyaa he nitsumɔ yɛ Sunnyvale, California. Mifata he kɛtsu kɔɔyɔŋ kɛ ŋwɛiniiaŋ nitsumɔi babaoo ahe nii, ní Agena kɛ Apollo gbɛjianɔtoi lɛ hu fata he. Aha mi jweremɔ nii yɛ amɛhe ni mifata kɛtsu Apollo 8 kɛ Apollo 11 ahe nii lɛ ahewɔ. Yɛ no sɛɛ lɛ, mitsa miskulyaa lɛ nɔ, ni mituu mihe fɛɛ miha asraafoi aŋwɛiniiaŋ nitsumɔi srɔtoi lɛ fɛɛ. Kɛbashi nakai be lɛ mli lɛ, efee mi akɛ minine eshɛ nibii fɛɛ ni mitaoɔ lɛ anɔ—ŋa fɛfɛo, bii fɛfɛji ejwɛ, nitsumɔ kpakpa, kɛ shia fɛfɛo.

Naanyo ni Baa Miŋɔɔ Be fɛɛ Be

Yɛ afi 1967 mli lɛ, mikɛ Jim ni ji nuu ko ni baa ehe shi waa ni mli hi kpe yɛ minitsumɔhe lɛ. Be fɛɛ be nɛɛ Jim miiŋmɔ, ni daa gbi kɛ wɔba hejɔɔmɔ ni mitsɛ lɛ lɛ, ebaa. Ekɛ nɛkɛ be nɛɛ tsuɔ nii ni ekɛgbaa mi Biblia mli saji. Jim kɛɛ mi akɛ ekɛ Yehowa Odasefoi lɛ kaseɔ nii.

Beni minu akɛ ekɛ nɛkɛ jamɔ kuu nɛɛ miibɔ lɛ efee mi naakpɛɛ. Te fee tɛŋŋ ni owula fɛfɛo tamɔ nɛkɛ kɛ ehe yawo jamɔ kuu ni teɔ shi ewoɔ Kristo lɛ mli? Shi kɛlɛ, minyɛɛɛ matsĩ Jim naa yɛ mihe miishɛɛ ni eyɔɔ kɛ mlihilɛ kpo ni ejieɔ etsɔɔ mi lɛ hewɔ. Etamɔ nɔ ni daa gbi lɛ, Jim yɛ nɔ ko hee kɛha mi ní makane. Ákɛ nɔkwɛmɔnɔ lɛ, gbi ko lɛ, eba mi-ɔfis lɛ ni ebakɛɛ mi akɛ: “Isidoros, sane ni yɔɔ Buu-Mɔɔ lɛ mli lɛ wieɔ bɔ ni aaafee awaje weku shihilɛ. Kɛya shia ni okɛ oŋa akane.” Mikɛɛ lɛ akɛ makane, shi sɛɛ mli lɛ, mikɛtee niiasɛɛyaahe lɛ ni mitserɛ mli bibiibii ni mishɛ mifɔ̃ jwɛi nii lɛ amli.

Mikɛ afii etɛ tee nɔ mitserɛ woji fɛɛ kɛ woji tɛtrɛbii fɛɛ ni Jim kɛhaa mi lɛ mli. Akɛni mihe tsɛ̃ɔ Yehowa Odasefoi shi kɛlɛ mibɔɔ mɔdɛŋ koni mikafite mikɛ Jim teŋ naanyobɔɔ lɛ hewɔ lɛ, misusu akɛ ehi akɛ mabo saji ni ekɛɔ mi lɛ toi ni majie yɛ mijwɛŋmɔ mli amrɔ nɔŋŋ yɛ sɛɛ mli.

Shi kɛlɛ, mijɛ nakai saji ni wɔgba lɛ mli ni mina akɛ nibii ni miheɔ miyeɔ ni mifeɔ lɛ babaoo bɛ Biblia lɛ  mli. Mibayɔse akɛ Triniti, hɛl la, kɛ susuma ni gbooo tsɔɔmɔi lɛ ji nɔ ni bɛ Ŋmalɛ lɛ mli. (Jajelɔ 9:10; Ezekiel 18:4; Yohane 20:17) Akɛni mifiɔ Greek Ɔrtokɔks sɔlemɔ lɛ sɛɛ kpɛŋŋ hewɔ lɛ, misumɔɔɔ ni makpɛlɛ nɔ amrɔ nɔŋŋ yɛ Jim hiɛ akɛ esane ja. Shi akɛni be fɛɛ be lɛ, ekɛ Biblia lɛ tsuɔ nii, shi ejɛɛɛ lɛ diɛŋtsɛ esusumɔ mli ekɛɛɛ nɔ ko hewɔ lɛ, yɛ naagbee lɛ, miyɔse akɛ nɛkɛ nuu nɛɛ hiɛ Biblia mli shɛɛ saji ni jara wa kɛha mi.

Miŋa na akɛ nɔ ko miiya nɔ, ni no hewɔ lɛ, ebi kɛji akɛ mikɛ minaanyo ni kɛ Odasefoi lɛ bɔɔ lɛ gbaa sane. Ní miha lɛ hetoo akɛ hɛɛ lɛ, ekɛɛ akɛ: “Nyɛhaa wɔyaa sɔlemɔ fɛɛ sɔlemɔ, shi jeee Yehowa Odasefoi anɔ̃. Shi, etsɛɛɛ ni mi, miŋa kɛ mibii lɛ bɔi Odasefoi lɛ akpeei yaa daa.

YiŋKpɛɛ ni Mli Wa

Beni mikaseɔ Biblia lɛ, mikɛ gbalɔ Yesaia wiemɔi nɛɛ kpe: “Ni eeekojo jeŋmaji lɛ ateŋ, ni eeekã maji babaoo; ni amɛkɛ amɛklantei aaasɔ kɔii ni amɛkɛ amɛkpɔlɔi hu aaasɔ adedai. Jeŋmaŋ ko woŋ klante nɔ eshiŋ jeŋmaŋ ko, ni amɛkaseŋ tawuu dɔŋŋ!” (Yesaia 2:4) Mibi mihe akɛ, ‘Te aaafee tɛŋŋ ni toiŋjɔlɛ Nyɔŋmɔ ni yɔɔ suɔmɔ lɛ tsulɔ atsu nii yɛ he ni afeɔ okplɛmii ni akɛfiteɔ nii lɛ?’ (Lala 46:10) Etsɛɛɛ ni mimu sane naa akɛ esa akɛ matsake minitsumɔ.

Eji anɔkwale akɛ enɛ baafee kaa ko ni mli wa. Bulɛ yɛ nii ni mitsuɔ lɛ he waa. Mikɛ afii babaoo etsu nii waa kɛ tɔlɛ, mikase wolo, ni mikɛ mihe eshã afɔle kɛyashɛ he ni mishɛ nɛɛ. Mishɛ shɔŋŋ yɛ nitsumɔ lɛ mli, ni agbɛnɛ, naa, mikɛ kaa ekpe ni esa akɛ maŋmɛɛ he. Shi kɛlɛ, suɔmɔ ni mli kwɔ ni miyɔɔ kɛha Yehowa, kɛ bɔ ni mishweɔ ni mafee esuɔmɔnaa nii lɛ ji nɔ ni baaye omanye yɛ naagbee.—Mateo 7:21.

Mikpɛ miyiŋ akɛ mayatao nitsumɔ yɛ nitsumɔhe ko ni yɔɔ Seattle yɛ Washington. Shi, minijiaŋ je wui, ejaakɛ etsɛɛɛ ni mina akɛ mikɛ mihe miiwo nitsumɔ ni kɛ Yesaia 2:4 lɛ kpãaa gbee mli. Mɔdɛŋ ni mibɔ koni matsu nii yɛ nibii krokomɛi pɛ ahe lɛ fee efolo, ni shikome ekoŋŋ lɛ mihenilee gba minaa. Mina yɛ faŋŋ mli akɛ, minyɛŋ matsu nii lɛ, ni yɛ nakai beaŋ nɔŋŋ lɛ mahiɛ henilee kpakpa mli.—1 Petro 3:21.

Ebafee faŋŋ akɛ esa akɛ wɔfee tsakemɔi ni he hiaa. Eshɛɛɛ nyɔji ekpaa ni wɔtsake wɔshihilɛ, ni wɔtse shika ni wɔweku lɛ fiteɔ lɛ nɔ kɛba fã. Kɛkɛ ni wɔhɔɔ wɔshia fɛfɛo lɛ ni wɔyahe bibioo ko yɛ Denver, yɛ Colorado. Kɛkɛ ni misaa mihe kɛha oti ni he hiaa fe fɛɛ lɛ—minitsumɔ lɛ shimɔ. Mitswa wolo ni tsɔɔ akɛ miishi nitsumɔ lɛ, ni migbála mihenilee lɛ mli mitsɔɔ. Nakai gbɛkɛ lɛ, beni gbekɛbii lɛ yawɔ lɛ, mi kɛ miŋa kula shi ni wɔsɔle wɔha Yehowa taakɛ atsɔɔ mli yɛ sane nɛɛ shishijee mli lɛ.

Eshɛɛɛ nyɔŋ kome ni wɔshi kɛtee Denver, ni yɛ otsii enyɔɔ sɛɛ lɛ yɛ July 1975 mli lɛ, abaptisi mi kɛ miŋa. Nyɔji ekpaa ho ni minako nitsumɔ, ni fiofio lɛ, shika ni wɔkɛ́to lɛ miitã. Beni nyɔji kpawo shɛɔ lɛ, no mli lɛ shika ni eshwɛ yɛ nɔ ni wɔkɛto lɛ mli lɛ shɛɛ nɔ ni wɔkɛbaawo tsũ lɛ he nyɔmɔ. Kɛkɛ ni mibɔi nitsumɔ ko kɛkɛ ni mana ni matsu taomɔ, shi etsɛɛɛ ni minine shɛ  tsɔji asaamɔ nitsumɔ ko nɔ. Emli nyɔmɔwoo lɛ tamɔ tsutsu nɔ ni mitsuɔ lɛ fã, shi yɛ fɛɛ sɛɛ lɛ efa po fe bɔ ni mibi Yehowa lɛ. Kwɛ miishɛɛ ni miná akɛ mikɛ mumɔŋ nibii ye klɛŋklɛŋ gbɛhe!— Mateo 6:33.

Wɔtsɔse Wɔbii lɛ Koni Amɛsumɔ Yehowa

Yɛ nakai beaŋ nɔŋŋ lɛ mi kɛ Ekaterini bɛ dekã kwraa yɛ nitsumɔ ni wa, ni ji wɔbii ejwɛ lɛ atsɔsemɔ yɛ Nyɔŋmɔ gbeyeishemɔ mli lɛ mli. Miishɛɛ sane ji akɛ, yɛ Yehowa yelikɛbuamɔ naa lɛ, wɔna akɛ amɛ fɛɛ amɛtsɔmɔ Kristofoi ni eda yɛ mumɔŋ, ni amɛtuu amɛshihilɛ fɛɛ kɛha nitsumɔ ni he hiaa ni ji Maŋtsɛyeli lɛ shiɛmɔ lɛ. Wɔbihii etɛ lɛ, Christos, Lakes, kɛ Gregory fɛɛ egbe Sɔɔmɔ Tsɔsemɔ Skul lɛ naa, ni amrɔ nɛɛ amɛmiisɔmɔ yɛ nitsumɔi srɔtoi amli, amɛmiisara asafoi ni amɛmiiwo amɛ hewalɛ. Wɔbiyoo Toula miitsu nii yɛ Yehowa Odasefoi anitsumɔhe yitso lɛ yɛ New York. Wɔmli filiɔ wɔ waa yɛ be mli ni wɔnaa akɛ amɛ fɛɛ amɛkɛ nitsumɔi kpakpai ni nyɔmɔwoo babaoo yɔɔ mli eshã afɔle bɔni afee ni amɛsɔmɔ Yehowa lɛ.

Mɛi pii biɔ wɔ koni wɔtsɔɔ amɛ bɔ ni fee ni wɔye omanye nakai yɛ gbekɛbii lɛ atsɔsemɔ mli. Yɛ anɔkwale mli lɛ, abɛ gbɛ kome ni afo afɔ̃ shi ni atsɔɔ nɔ atsɔseɔ gbekɛbii, shi wɔbɔ mɔdɛŋ wɔdu suɔmɔ kɛha Yehowa kɛ nanemɛi wɔwo amɛtsuii amli. (5 Mose 6:6, 7; Mateo 22:37-39) Gbekɛbii lɛ kase ni amɛle akɛ, wɔnyɛŋ wɔkɛɛ Yehowa akɛ wɔsumɔɔ lɛ, akɛ ja wɔkɛ wɔnifeemɔi etsɔɔ akɛ wɔsumɔɔ lɛ.

Be babaoo lɛ wɔkɛ Hɔɔ yɛ otsi fɛɛ otsi mli tsuɔ nii kutuu akɛ weku yɛ sɔɔmɔ nitsumɔ lɛ mli. Wɔfeɔ wɔweku Biblia mli nikasemɔ lɛ daa Ju gbɛkɛ beni wɔye nii wɔgbe naa, ni wɔkɛ gbekɛbii lɛ ateŋ mɔ fɛɛ mɔ kaseɔ Biblia lɛ akɛ aŋkroaŋkro. Beni gbekɛbii lɛ darako lɛ, wɔhaa be ni wɔyeɔ ni wɔkɛ amɛ kaseɔ nii lɛ feɔ kuku, shi wɔfeɔ lɛ nɔtonɔto yɛ otsi lɛ mli, shi yɛ be mli ni amɛdaraa lɛ wɔhaa nikasemɔ lɛ sɛɛ tsɛɔ, ni wɔfeɔ nakai shikome yɛ otsi mli. Yɛ nɛkɛ nikasemɔi nɛɛ amli lɛ, wɔbii lɛ wieɔ nɔ fɛɛ nɔ ni amɛsumɔɔ ni amɛgbaa wɔ amɛnaagbai ni amɛsheee gbeyei.

Wɔnáa weku hiɛtserɛjiemɔ ni tswaa mɔ emaa shi hu mli ŋɔɔmɔ. Wɔsumɔɔ saŋkui kɛ amɛhenɔi lɛ tswaa kutuu, ni gbekɛbii lɛ ateŋ mɔ fɛɛ mɔ sumɔɔ ni amɛ diɛŋtsɛ amɛtswa lalai lɛ ateŋ nɔ ni ŋɔɔ amɛnaa fe fɛɛ. Yɛ otsi lɛ naagbee komɛi amli lɛ wɔfɔ̃ɔ nine wɔtsɛɔ wekumɛi krokomɛi ni amɛbafataa wɔhe kɛbɔɔ naanyo ni tswaa mɔ emaa shi. Wɔfãa gbɛ akɛ weku kɛyaa he ko ni wɔyajieɔ wɔhiɛtserɛ. Yɛ nɛkɛ gbɛfaa nɛɛ eko mli lɛ, wɔtee Colorado gɔji lɛ anɔ wɔyakwɛ jɛmɛ, ni wɔkɛ asafoi ni yɔɔ jɛmɛ lɛ tsu nii yɛ shiɛmɔ nitsumɔ lɛ mli. Wɔbii lɛ kɛ miishɛɛ kaiɔ be mli ni amɛtsuɔ nii yɛ kpokpaa wulu nɔ kpeei anitsumɔi srɔtoi  lɛ ashishi, kɛ agbɛnɛ amɛhe ni amɛkɛhaa kɛyeɔ ebuaa ni amaa Maŋtsɛyeli Asai yɛ hei srɔtoi lɛ hu. Beni wɔkɛ gbekɛbii lɛ tee Greece koni amɛyasara amɛwekumɛi lɛ, amɛ hu amɛnyɛ amɛkɛ Odasefoi anɔkwafoi ni awo amɛ tsuŋ yɛ amɛnɔkwayeli lɛ hewɔ lɛ kpe. Enɛ kanya amɛ ni eye ebua amɛ koni amɛtswa amɛfai shi ni amɛfee shiŋŋ kɛ ekãa yɛ anɔkwale lɛ mli.

Yɛ anɔkwale mli lɛ, bei komɛi lɛ gbekɛbii lɛ ekomɛi feɔ nii ni ehiii aloo amɛhalaa nanemɛi gbohii. Bei komɛi lɛ, wɔ, ni ji fɔlɔi lɛ hu gbaa amɛnaa, kɛji akɛ wɔfee kpɛŋŋ yɛ shihilɛi komɛi amli. Shi yelikɛbuamɔ ni wɔnaa yɛ “[Yehowa, NW] tsɔsemɔ mli” taakɛ anaa yɛ Biblia lɛ mli lɛ yeɔ ebuaa wɔ ni wɔjajeɔ shihilɛ lɛ ni ehiɔ kɛhaa wɔ fɛɛ.—Efesobii 6:4; 2 Timoteo 3:16, 17.

Mishihilɛ Mli Be ni Yɔɔ Miishɛɛ Fe Fɛɛ

Beni wɔbii lɛ kɛ amɛhe wo be-fɛɛ sɔɔmɔ nitsumɔ lɛ mli lɛ, Ekaterini kɛ mi bɔi nɛkɛ yiwalaheremɔ nitsumɔ nɛɛ he susumɔ waa diɛŋtsɛ yɛ bɔ ni wɔɔfee ni wɔnyɛ wɔkɛ wɔhe awo mli babaoo. Enɛ hewɔ lɛ, mra mli yɛ afi 1994 beni mikpa nitsumɔ lɛ nɔŋŋ ni wɔ fɛɛ wɔbɔi sɔɔmɔ akɛ daa gbɛgbalɔi. Nɔ ni fata wɔsɔɔmɔ nitsumɔ lɛ he ji shiɛmɔ ni wɔyashiɛɔ wɔhaa nikaselɔi ni yɔɔ kɔlejii lɛ kɛ univɛrsitii lɛ ni yɔɔ jɛmɛ lɛ amli, ni wɔkɛ amɛ feɔ Biblia mli nikasemɔi hu. Akɛni mi hu etsɛko tsɔ ni mije shihilɛ mli ni amɛyɔɔ mli lɛ mli hewɔ lɛ, minuɔ bɔ ni ewa kɛha amɛ lɛ shishi—enɛ hewɔ lɛ, miye omanye babaoo kɛye ebua amɛ ni amɛkase Yehowa he nii. Kwɛ miishɛɛ ni eji akɛ mikɛ nikaselɔi ni jɛ Bolivia, Brazil, Chile, China, Egypt, Ethiopia, Mexico, Thailand, kɛ Turkey kase nii! Mináa tɛlifoŋ nɔ Odaseyeli hu mli ŋɔɔmɔ, titri lɛ kɛ mikɛ gbɔmɛi ni wieɔ mimaŋ wiemɔ lɛ miigba sane.

Eyɛ mli akɛ minyɛɛɛ matsɛ nibii ni yɔɔ Hela wiemɔ mli lɛ agbɛi jogbaŋŋ yɛ gbɔ ni migbɔɔ lɛ hewɔ moŋ, shi mibɔɔ mɔdɛŋ ni mikɛ mihe haa, ni mináa Yesaia mumɔ lɛ eko, mɔ ni jaje akɛ: “Naa mi, tsu mi” lɛ. (Yesaia 6:8) Wɔye wɔbua mɛi fe ekpaa ni amɛjɔɔ amɛwala nɔ amɛha Yehowa. Nɛkɛ be nɛɛ ebafee be ni wɔkɛná miishɛɛ waa diɛŋtsɛ.

Be ko ni eho lɛ, mikɛ mihe wo okplɛmii ni yɔɔ gbeyei ni akɛbaagbe minanemɛi adesai lɛ afeemɔi amli. Shi, Yehowa jɛ emlihilɛ ni esaaa wɔ lɛ mli egbele gbɛ eha mi kɛ miweku lɛ koni wɔbatsɔmɔ etsuji ni amɛjɔɔ amɛwala nɔ amɛha lɛ, ni wɔtuu wɔhe wɔwo sanekpakpa ni haa mɔ yi náa wala yɛ paradeiso shikpɔŋ nɔ lɛ mli. Kɛ miikai yiŋkpɛɛ ni mli wa ni ehe bahia ni mafee lɛ, ehaa mikaiɔ Maleaki 3:10 lɛ, he ni kɛɔ akɛ: “‘Nyɛkaa mi nyɛkwɛa,’ Yehowa Zebaot kɛɛ, ‘akɛ migbeleŋ ŋwɛi samfɛji lɛ mihaŋ nyɛ, ni mifɔseŋ jɔɔmɔ mihaŋ nyɛ ni ateke nɔ lo?’” Lɛɛlɛŋ, efee nakai pɛpɛɛpɛ—taakɛ wɔtsui taoɔ!

[Akrabatsa/Mfoniri ni yɔɔ baafa 27]

Lakes: Mitsɛ sumɔɔɔ osatofeemɔ. Ebɔɔ mɔdɛŋ waa koni ekafee osato, titri yɛ be mli ni etaoɔ akɛ eto okadi kpakpa efɔ̃ shi eha weku lɛ. Bei pii lɛ efɔɔ wɔ kɛɛmɔ akɛ: “Kɛji akɛ wɔjɔɔ wɔwala nɔ wɔha Yehowa lɛ, no tsɔɔ nɔ ko. Esa akɛ osumɔ akɛ okɛ ohe baashã afɔle oha Yehowa. No nɔŋŋ ji nɔ ni he hiaa kɛji akɛ akɛɛ mɔ ko ji Kristofonyo.” Nɛkɛ wiemɔi nɛɛ ehi mijwɛŋmɔ mli, ni eye ebua mi ni minyiɛ enɔkwɛmɔnɔ lɛ sɛɛ, ni mikɛ mihe eshã afɔle eha Yehowa.

[Akrabatsa/Mfoniri ni yɔɔ baafa 27]

Christos: Mihiɛ esɔ mifɔlɔi lɛ asusuma muu fɛɛ mli ni amɛjɛ amɛsɔmɔ Yehowa yɛ anɔkwayeli mli lɛ waa, kɛ ekãa ni amɛkɛtsu amɛgbɛnaa nii ahe nii akɛ fɔlɔi lɛ hu waa. Ákɛ weku lɛ, wɔfeɔ ekome kɛfeɔ nɔ fɛɛ nɔ—yɛ wɔsɔɔmɔ nitsumɔ lɛ mli, be mli ni wɔba hejɔɔmɔ fioo. Eyɛ mli akɛ amɛyɛ nibii krokomɛi pii ni amɛbaatsu moŋ, shi mifɔlɔi tee nɔ amɛha amɛshihilɛ fee mlɛo, ni amɛkɛ amɛjwɛŋmɔ fɔ sɔɔmɔ nitsumɔ lɛ nɔ. Ŋmɛnɛ, mile akɛ miyɛ miishɛɛ diɛŋtsɛ, yɛ be mli ni mikɛ mihe woɔ Yehowa sɔɔmɔ lɛ mli kwraa kɛmɔɔ shi lɛ.

[Akrabatsa/Mfoniri ni yɔɔ baafa 28]

Gregory: Mifɔlɔi anɔkwɛmɔnɔ lɛ, kɛ odaseyeli ni tsɔɔ akɛ amɛyɛ miishɛɛ yɛ Yehowa sɔɔmɔ lɛ mli lɛ woɔ mi hewalɛ fe wiemɔi ni amɛkɛwoɔ mi ekãa koni malɛɛ misɔɔmɔ lɛ mli lɛ, ni enɛ haa misaa misusuɔ shihilɛ lɛ he ekoŋŋ, mijieɔ naagbai fɛɛ kɛ be-fɛɛ sɔɔmɔ lɛ ni maje shishi lɛ he susumɔ hu fɛɛ kɛyaa, ni mikɛ mihe woɔ Yehowa nitsumɔ lɛ mli kɛwulaa shi. Miida mifɔlɔi ashi akɛ amɛye amɛbua mi ni mina ŋɔɔmɔ ni jɛɔ hiɛ ni amia kɛtsuɔ nii lɛ mli baa.

[Akrabatsa/Mfoniri ni yɔɔ baafa 28]

Toula: Be fɛɛ be lɛ, mifɔlɔi maa nɔ mi akɛ wɔ kɛ Yehowa teŋ wekukpaa ji nɔ ni he hiaa fe nɔ fɛɛ nɔ ni wɔbaanyɛ wɔná, ni ákɛ, gbɛ pɛ ni wɔbaanyɛ wɔná anɔkwale miishɛɛ daa ji ni wɔbaatuu wɔhe wɔha Yehowa. Amɛha Yehowa fee mɔ ko ni yɔɔ waa diɛŋtsɛ kɛha wɔ. Bei pii lɛ Ataa kɛɔ wɔ akɛ, kɛji akɛ mɔ ko yaakã shi ewɔ ni ele akɛ ebɔ mɔdɛŋ efee bɔ fɛɛ bɔ ni eeenyɛ ni ekɛha Yehowa mii ashɛ ehe lɛ, ehaa mɔ lɛ náa henumɔ ko ni anyɛɛɛ atsɔɔ mli.

[Mfoniri ni yɔɔ baafas 25]

Beni miji asraafonyo yɛ Greece, yɛ afi 1951 mli

[Mfoniri ni yɔɔ baafas 25]

Mi kɛ Ekaterini yɛ afi 1966 mli

[Mfoniri ni yɔɔ baafas 26]

Miweku lɛ yɛ afi 1996 mli: (abɛkugbɛ kɛmiiya ninejurɔgbɛ, sɛɛgbɛ) Gregory, Christos, Toula; (hiɛgbɛ) Lakes, Ekaterini, kɛ mi