Maŋtsɛyeli Jajelɔi Bɔ Amaniɛ

Mɛi ni Sumɔɔ Yehowa lɛ Ajara Wa yɛ Ehiɛ

ALE Lebanon jogbaŋŋ kɛjɛ Biblia beaŋ kɛbaa akɛ eyɛ nibii ni anáa kɛjɛɔ shikpɔŋ. (Lala 72:16; Yesaia 60:13) Nibii ni abuɔ akɛ ejara wa waa diɛŋtsɛ ji emli tsenedurui wujiwuji ni ataoɔ waa ákɛ tsumaa he nibii yɛ bɔ ni amɛyɔɔ fɛo ha, ní amɛjeɔ ŋma, kɛ bɔ ni etsɛɔ waa lɛ hewɔ. Yɛ klɛŋklɛŋ afii oha lɛ mli lɛ, nɔ ko ni jara wa kwraa fe nakai jɛ Lebanon kɛba. Marko Sanekpakpa lɛ bɔ amaniɛ akɛ, kɛjɛ Tiro kɛ Zidon yɛ Lebanon blema shikpɔŋkuku lɛ mli lɛ, “mɛi babaoo diɛŋtsɛ ni nu nii ni [Yesu] efee lɛ, amɛba eŋɔɔ.”—Marko 3:8.

Nakai nɔŋŋ ŋmɛnɛ, Lebanon yaa nɔ ewoɔ yibii ni jara wa waa yɛ Yehowa hiɛ. Niiashikpamɔi ni nyiɛ sɛɛ nɛɛ maa enɛ nɔ mi.

• Abi Odasefonyo oblanyo ko ni atsɛɔ lɛ Wissam koni eha wiemɔ ni heɔ minitii 30 etsɔɔ eklasbii lɛ yɛ skul. Wissam fee ejwɛŋmɔ akɛ eji hegbɛ diɛŋtsɛ akɛ eeeye odase. No hewɔ lɛ ekɛ wolo ni ji Life—How Did It Get Here? By Evolution or by Creation? lɛ tsu nii ni ekɛ adebɔɔ fee ewiemɔ ni esaa ehe yɛ mli lɛ saneyitso. Shi kɛlɛ, beni Wissam tsɔɔlɔ lɛ na saji ni eŋmala lɛ, ekɛɛ akɛ, akɛni eji saneyitso ko ni he hiaa waa aahu hewɔ lɛ, Wissam baanyɛ akpã ewiemɔ lɛ mli koni efee minitii 45.

Beni Wissam je ewiemɔ lɛ shishi lɛ, etsɔɔlɔ lɛ fo mli ni etsu koni ayatsɛ tsɔɔlɔ nukpa lɛ kɛba. Etsɛɛɛ nɔŋŋ ni tsɔɔlɔ nukpa lɛ bashɛ shi, ni Wissam je shishi ekoŋŋ. Beni tsɔɔlɔ nukpa lɛ bo sanebimɔi ni Wissam bi yɛ ewiemɔ lɛ hiɛkpamɔ wiemɔ lɛ mli lɛ toi lɛ, emii shɛ ehe waa ni ekɛɛ akɛ esa akɛ nikaselɔi lɛ fɛɛ afee ewiemɔ lɛ eko amɛha amɛhe.

Etsɛɛɛ kwraa ni tsɔɔlɔ kroko ni miiho lɛ yɔse miishɛɛ ni aná yɛ klastsu lɛ mli lɛ ni ebi nɔ ni yaa nɔ. Beni akɛɛ lɛ lɛ, ebi kɛji Wissam miibɔ mɔdɛŋ ni etsɔɔ kɛji adebɔɔ ja loo sutsakemɔ moŋ ja. Aha hetoo akɛ: “Adebɔɔ.” Beni tsɔɔlɔ lɛ ná ele akɛ Yehowa Odasefonyo ji Wissam lɛ, ekɛɛ klasbii lɛ akɛ: “Nyɛbaana yɛ ewiemɔ lɛ mli akɛ jeŋ nilee fĩɔ adebɔɔ sɛɛ, shi efĩii sutsakemɔ sɛɛ.”

Nɔ ni jɛ mli ba ji akɛ nɛkɛ tsɔɔlɔ nɛɛ ha aha lɛ Creation wolo lɛ eko ni ekɛ no tsuɔ nii kɛtsɔɔ nii yɛ univɛsiti lɛ! Dani ebaashi kɛya lɛ, ebi kɛji ebaanyɛ ekɛ enikaselɔi lɛ aku esɛɛ aba enɔjetsɛremɔ koni Wissam anyɛ ekɛ klasbii lɛ awie. No hu ha aye Yehowa he odase kroko ni ŋɔɔ.

• Anɔkwale nui lɛ he kumai miiye Nina ni eye afii 22 lɛ. Gbi ko lɛ, etsɛ nyɛmi yoo bi ko ha lɛ Biblia ko, ni ewie Pentekoste Sɔlemɔ lɛ he etsɔɔ lɛ. Nina kɛ miishɛɛ kane Biblia lɛ, ni ekase kɛjɛ enikanemɔ lɛ mli akɛ esa akɛ Kristofoi ashiɛ, no hewɔ lɛ ebɔi mɛi ni ele lɛ kɛ sanegbaa. Mɔ fɛɛ mɔ ni ekɛ lɛ wie lɛ bi lɛ akɛ: “Yehowa Odasefonyo ji bo?” Enɛ fee sane ni wa kɛha lɛ.

Afii ekpaa sɛɛ lɛ, Yehowa Odasefoi tee Nina shia ni amɛgba lɛ Nyɔŋmɔ Maŋtsɛyeli lɛ he sane. Klɛŋklɛŋ lɛ, ebɔ mɔdɛŋ koni etao tɔmɔ yɛ amɛtsɔɔmɔi lɛ ahe. Shi kɛlɛ, ena akɛ nilee yɛ hetooi ni amɛkɛhaa lɛ fɛɛ mli ni edamɔ Biblia lɛ nɔ hu.

Nɔ ni Nina kase yɛ naagbee—Nyɔŋmɔ gbɛi ni ji Yehowa; jɔɔmɔi ni Maŋtsɛyeli lɛ kɛbaaba; kɛ ekrokomɛi—ha ená nɔmimaa akɛ ena anɔkwale lɛ. Ejɔɔ ewala nɔ eha Nyɔŋmɔ ni abaptisi lɛ. Nina kɛ nɔ ni shɛɔ afii kpawo esɔmɔ akɛ be-fɛɛ sanekpakpa jajelɔ. Lɛɛlɛŋ, Yehowa jɔ́ɔ mɛi ni sumɔɔ lɛ jogbaŋŋ lɛ.—1 Korintobii 2:9.