Ani Oji Kristofonyo ni ‘Eda yɛ Mumɔŋ’?

“BENI miji abifao lɛ, miwieɔ tamɔ abifao, mijwɛŋɔ nii ahe tamɔ abifao, misusuɔ tamɔ abifao.” Nɛkɛ ji bɔ ni bɔfo Paulo ŋma. Eji anɔkwale akɛ, be ko lɛ, wɔ fɛɛ wɔji abifabii ni nyɛɛɛ nɔ ko afee. Shi kɛlɛ, wɔhiii shi nakai kɛyaa naanɔ. Paulo kɛɛ akɛ: “Beni mitsɔ̃ nuu nukpa lɛ, mishɛrɛ abifabii anii lɛ mishwie sɛɛ.”—1 Korintobii 13:11.

Yɛ nakai gbɛ nɔ nɔŋŋ lɛ, Kristofoi fɛɛ je shishi akɛ mumɔŋ abifabii. Shi yɛ be ni sa mli lɛ, wɔ fɛɛ wɔbaanyɛ wɔshɛ “Nyɔŋmɔ bi lɛ nɔ hemɔkɛyeli kɛ ehe nilee ekomefeemɔ lɛ he ni wɔfee nuu ni eye emuu yɛ Kristo dalɛ muu lɛ susumɔ naa.” (Efesobii 4:13) Awoɔ wɔ hewalɛ yɛ 1 Korintobii 14:20 akɛ: “Anyɛmimɛi, nyɛkafea nyɛhe gbekɛbii yɛ jwɛŋmɔ gbɛfaŋ . . . nyɛfea nyɛhe mɛi ni edara.”

Kristofoi ni edara yɛ mumɔŋ ni yɔɔ wɔteŋ lɛ ji jɔɔmɔ kɛha Nyɔŋmɔ webii ŋmɛnɛ, titri lɛ, akɛni mɛi heei babaoo yɔɔ lɛ hewɔ. Kristofoi ni edara yɛ mumɔŋ lɛ haa asafo lɛ fiɔ shi shiŋŋ. Amɛnáa hewalɛ kpakpa yɛ asafo fɛɛ asafo ni amɛkɛ bɔɔ lɛ su loo baŋ ni jeɔ kpo waa lɛ nɔ.

Eyɛ mli akɛ gbɔmɔtsoŋ dalɛ baa lɛ diɛŋtsɛ moŋ, shi mumɔŋ dalɛ baa yɛ be kɛ mɔdɛŋbɔɔ pɛ naa. Ebɛ naakpɛɛ mɔ akɛ, yɛ Paulo gbii lɛ amli lɛ, Kristofoi komɛi nyɛɛɛ ‘afoŋ kɛya dalɛ mli’ yɛ be mli ni amɛkɛ afii babaoo esɔmɔ Nyɔŋmɔ lɛ fɛɛ sɛɛ. (Hebribii 5:12; 6:1) Ni bo hu? Kɛji okɛ afii babaoo esɔmɔ Nyɔŋmɔ loo okɛ be fioo jio lɛ, ebaahi jogbaŋŋ akɛ okɛ anɔkwayeli aaapɛi bo diɛŋtsɛ omli okwɛ. (2 Korintobii 13:5) Ani  ofata mɛi ni abaanyɛ atsɛ amɛ diɛŋtsɛ akɛ Kristofoi ni edara yɛ mumɔŋ lɛ he? Kɛ́ jeee nakai lɛ, te ooofee tɛŋŋ obatsɔ nakai mɔ?

‘Mɔ ni Eda yɛ Jwɛŋmɔ Gbɛfaŋ’

Etsɛɛɛ ni “tsɔɔmɔ kɔɔyɔɔ fɛɛ tsɔɔmɔ kɔɔyɔɔ hosoɔ” mɛi ni ji mumɔŋ abifabii lɛ, “ni ekpalaa amɛ kɛyaa kɛbaa yɛ gbɔmɛi aŋaa fɔŋ too mli, yɛ shishiumɔ ŋaa lɛ mli kutumpɔo naa.” No hewɔ lɛ, Paulo wo hewalɛ akɛ: “Wɔfee anɔkwafoi yɛ suɔmɔ mli, ní wɔdara yɛ nibii fɛɛ gbɛfaŋ yɛ lɛ Kristo lɛ nɔŋŋ ni ji yitso lɛ he.” (Efesobii 4:14, 15) Te mɔ ko feɔ tɛŋŋ efeɔ enɛ? Hebribii 5:14 kɛɔ akɛ: “Mɛi ni edara lɛ anɔ̃ ji niyenii kpakpa, mɛi ni fɔ ni amɛfɔɔ feemɔ lɛ eha amɛhenumɔ nii lɛ ele ekpakpa kɛ efɔŋ mlikpamɔ.”

Kadimɔ akɛ atsɔse mɛi ni edara yɛ mumɔŋ lɛ ajwɛŋmɔ nyɛmɔi kɛtsɔ ekɛ nitsumɔ loo Biblia shishitoo mlai kɛ nitsumɔ he niiashikpamɔ nɔ. Belɛ, eyɛ faŋŋ akɛ mɔ ko ebatsɔɔɔ mɔ ni eda yɛ mumɔŋ trukaa; eheɔ be ní akɛda yɛ mumɔŋ. Yɛ no po mli lɛ, obaanyɛ ofee babaoo ni okɛha omumɔŋ dalɛ lɛ afee mlɛo kɛtsɔ teemɔŋ nikasemɔ nɔ—titri lɛ, yɛ Nyɔŋmɔ Wiemɔ lɛ mli nibii ni mli kwɔlɔ lɛ he. Yɛ nyɛsɛɛ afii nɛɛ amli lɛ, Buu-Mɔɔ ewie saji ni mli kwɔlɔ babaoo he. Mɛi ni edara yɛ mumɔŋ lɛ tsiii amɛhe kɛjɛɛɛ nikasemɔi nɛɛ ahe akɛni “nibii komɛi ashishinamɔ miijara” yɛ mli lɛ hewɔ. (2 Petro 3:16) Yɛ no najiaŋ lɛ, amɛkɛ hehiamɔ yeɔ nakai niyenii ni tsii lɛ!

Shiɛlɔi kɛ Tsɔɔlɔ ni Yɔɔ Ekãa

Yesu fã esɛɛnyiɛlɔi lɛ akɛ: “No hewɔ lɛ nyɛyaa ni nyɛyafea jeŋmaji fɛɛ mikaselɔi, nyɛbaptisia amɛ nyɛwoa Tsɛ lɛ kɛ Bi lɛ kɛ Mumɔ krɔŋkrɔŋ lɛ gbɛi amli, ni nyɛtsɔɔ amɛ ni amɛye nii fiaa ni mikɛɛ nyɛ lɛ nɔ.” (Mateo 28:19, 20) Shiɛmɔ nitsumɔ lɛ ni okɛ ohe woɔ mli kɛ ekãa lɛ hu baanyɛ akanya omumɔŋ dalɛ lɛ. Mɛni hewɔ obɔɔɔ mɔdɛŋ ni okɛ ohe wo mli babaoo taakɛ oshihilɛ baaŋmɛ bo gbɛ lɛ?—Mateo 13:23.

Bei komɛi lɛ, shihilɛ lɛ mli nɔnyɛɛi lɛ baanyɛ aha be ni aaaná ni akɛhe awo shiɛmɔ nitsumɔ lɛ mli lɛ afee nɔ ni wa. Ni kɛlɛ, kɛji ‘omia ohiɛ’ akɛ shiɛlɔ lɛ, ojieɔ bɔ ni “sanekpakpa” lɛ he hiaa ha lɛ kpo. (Luka 13:24; Romabii 1:16) Kɛkɛ lɛ, abaanyɛ abu bo akɛ ‘okɛ ohe eto okadi oha mɛi ni heɔ yeɔ lɛ.’—1 Timoteo 4:12.

Emuuyeli Mlihiɛlɔi

Da ni oooda yɛ mumɔŋ lɛ hu kɔɔ mɔdɛŋ ni obɔɔ koni ohiɛ emuuyeli mli lɛ he. Taakɛ David ŋma fɔ̃ shi yɛ Lala 26:1 lɛ, ejaje akɛ: “Yehowa, kojomɔ mi, ejaakɛ emuuyeli mli mibaa mijeŋ yɛ.” Emuuyeli ji jeŋba kpakpa, pɛpɛɛpɛ ŋmɛɛ. Shi kɛlɛ, etsɔɔɔ emuu ni aye. David diɛŋtsɛ fee eshai ni hiɛdɔɔ yɔɔ mli babaoo. Shi akɛni ekpɛlɛ kãmɔ ni ejaje egbɛ lɛ hewɔ lɛ, etsɔɔ akɛ anɔkwa suɔmɔ kɛha Yehowa Nyɔŋmɔ kã he eyɛ etsui lɛ mli. (Lala 26:2, 3, 6, 8, 11) Emuuyeli kɔɔ tsui fɛɛ hetuu-kɛhamɔ he. David kɛɛ ebi Salomo akɛ: “Le otsɛ Nyɔŋmɔ lɛ, ni osɔmɔ lɛ kɛ otsui muu lɛ fɛɛ.”—1 Kronika 28:9.

‘Je lɛ fã ni ajeee,’ ni ji akɛ, he ni akɛ wooo maŋkwramɔŋ saji ni yɔɔ maji lɛ amli kɛ amɛtai lɛ amli lɛ fata emuuyeli mli ni wɔɔhiɛ lɛ he. (Yohane 17:16) Esa akɛ ote shi oshi nifeemɔi gbohii hu tamɔ, ajwamaŋbɔɔ, gbalafitemɔ, kɛ tsofai fɔji kɛ nitsumɔ. (Galatabii 5:19-21) Shi kɛlɛ, emuuyeli mli ni wɔɔhiɛ lɛ tsɔɔ babaoo fe nibii nɛɛ ni wɔɔtsi wɔhe kɛjɛ he lɛ he kɛkɛ. Salomo bɔ kɔkɔ akɛ: “Adɔdɔji ni egboi haa  tsofafutulɔ tsofa shaa ni ejeɔ fũ; kwashiafeemɔ fioo tsiiɔ fe nilee kɛ nyam.” (Jajelɔ 10:1) Hɛɛ, “kwashiafeemɔ fioo,” tamɔ fɛoyeli loo bɔɔ ni esaaa ni hii kɛ yei aaabɔ lɛ baanyɛ afite mɔ ni yɔɔ “nilee kɛ nyam” lɛ bulɛ ni eyɔɔ lɛ. (Hiob 31:1) No hewɔ lɛ, jiemɔ bɔ ni oda yɛ mumɔŋ lɛ kpo kɛtsɔ nɔkwɛmɔnɔ kpakpa ni ooofee yɛ ojeŋba mli lɛ nɔ, ni otsi ohe kɛjɛ “nɔ fɛɛ nɔ ni hiɛ efɔŋ su lɛ he.”—1 Tesalonikabii 5:22.

Anɔkwafoi

Kristofonyo ni eda yɛ mumɔŋ lɛ hu yeɔ anɔkwa. Taakɛ wɔkaneɔ yɛ Efesobii 4:24 lɛ, bɔfo Paulo woɔ Kristofoi ahewalɛ akɛ: “Nyɛwo gbɔmɔ hee ni abɔ yɛ Nyɔŋmɔ subaŋ nɔ yɛ anɔkwa jalɛ kɛ hetsemɔ mli lɛ.” Yɛ Hela Ŋmalɛi lɛ amli lɛ, shishijee wiemɔ kɛha “anɔkwayeli” hiɛ susumɔ ni ji krɔŋkrɔŋfeemɔ, jalɛnifeemɔ, kɛ gbeyeishemɔ. Mɔ ni yeɔ anɔkwa lɛ sumɔɔ Nyɔŋmɔ jamɔ; ekɛ henɔkwɛmɔ yeɔ egbɛnaa nii kɛha Nyɔŋmɔ lɛ fɛɛ nɔ.

Mɛɛ gbɛ̀i komɛi anɔ obaanyɛ otsɔ ni oná nakai anɔkwayeli su lɛ? Gbɛ kome ji kɛtsɔ ekome ni okɛ osafoŋ onukpai lɛ baafee lɛ nɔ. (Hebribii 13:17) Akɛni Kristofoi ni eda yɛ mumɔŋ lɛ yɔseɔ akɛ Kristo ji Kristofoi asafo lɛ Yitso ni ahala lɛ lɛ hewɔ lɛ, amɛyeɔ mɛi ni ahala amɛ ‘koni amɛlɛ Nyɔŋmɔ asafo lɛ’ anɔkwa. (Bɔfoi lɛ Asaji 20:28) Kwɛ bɔ ni ehiii kwraa akɛ wɔɔte shi wɔshi onukpai ni ahala lɛ anɔyeli hegbɛ lɛ! Esa akɛ oná anɔkwayeli henumɔ hu oha “tsulɔ anɔkwafo kɛ nilelɔ” lɛ, kɛ gbɛjianɔtoi ni ekɛtsuɔ nii koni ekɛ mumɔŋ ‘ŋmãa yɛ be ni sa nɔ lɛ’ aha lɛ. (Mateo 24:45) Ohe afee oya ni okane saji ni jeɔ kpo yɛ Buu-Mɔɔ, kɛ woji krokomɛi ni fata he lɛ mli lɛ, ni okɛtsu nii.

Suɔmɔ Kpo ní Ooojie Kɛtsɔ Onifeemɔ Nɔ

Paulo ŋma kɛyaha Kristofoi ni yɔɔ Tesalonika lɛ akɛ: “Nyɛfɛɛ nyɛteŋ mɔ fɛɛ mɔ suɔmɔ ni ekɛ sumɔɔ enanemɛi lɛ miifá kɛmiiya nɔ hu.” (2 Tesalonikabii 1:3) Suɔmɔ mli ni wɔɔda yɛ lɛ ji wɔmumɔŋ dalɛ lɛ fã ko ni he hiaa waa titri. Yesu kɛɛ taakɛ aŋma afɔ̃ shi yɛ Yohane 13:35 lɛ akɛ: “Kɛji nyɛsumɔɔ nyɛhe lɛ, no mɛi fɛɛ kɛaale akɛ mikaselɔi ji nyɛ.” Henumɔi kɛkɛ kadiii nakai nyɛmi suɔmɔ lɛ. Vine’s Expository Dictionary of Old and New Testament Words lɛ kɛɔ akɛ: “Abaanyɛ ale suɔmɔ pɛ kɛtsɔ nibii ni etsirɛɔ mɔ ni efeɔ lɛ nɔ.” Hɛɛ, ná hiɛyaa yɛ dalɛ mli yɛ enɛ gbɛfaŋ kɛtsɔ suɔmɔ ni okɛ woɔ nifeemɔ mli lɛ nɔ!

Ákɛ nɔkwɛmɔnɔ lɛ, wɔkaneɔ yɛ Romabii 15:7 akɛ: “Nyɛhereherea nyɛhe.” Gbɛ kome ni wɔɔtsɔ nɔ wɔjie suɔmɔ kpo ji kɛtsɔ ŋamɔ ni wɔɔŋa nanemɛi heyelilɔi kɛ mɛi heei ni eba yɛ asafoŋ kpeei ashishi lɛ—kɛ miishɛɛ! Le amɛ jogbaŋŋ. Ná mɛi krokomɛi ahe ‘miishɛɛ.’ (Filipibii 2:4) Ekolɛ, obaanyɛ ofee gbɔ ni ofɔ̃ mɛi srɔtoi anine kɛba oshia. (Bɔfoi lɛ Asaji 16:14, 15) Bei komɛi lɛ, emuu ni mɛi krokomɛi yeee lɛ baanyɛ aka suɔmɔ babaoo ni oyɔɔ lɛ, shi beni okaseɔ ‘ni ohiɛ amɛ yɛ suɔmɔ mli lɛ,’ otsɔɔ akɛ ootsɔ mɔ ni eda yɛ mumɔŋ.—Efesobii 4:2.

Wɔ Heloonaa Nii ni Wɔyɔɔ ni Wɔkɛwoɔ Jamɔ Krɔŋŋ Nɔ

Yɛ blema bei lɛ amli lɛ, jeee Nyɔŋmɔ webii fɛɛ tsu gbɛnaa nii ni kã amɛnɔ akɛ amɛfi Yehowa sɔlemɔwe lɛ sɛɛ he nii. No hewɔ lɛ, Nyɔŋmɔ tsu gbalɔi, tamɔ Hagai kɛ Maleaki koni amɛkanya E-webii lɛ yɛ enɛ gbɛfaŋ. (Hagai 1:2-6; Maleaki 3:10) Kristofoi ni edara yɛ mumɔŋ ŋmɛnɛ lɛ kɛ amɛheloo naa nibii fiɔ Yehowa jamɔ sɛɛ kɛ miishɛɛ. Kasemɔ gbɔmɛi ni tamɔ nɛkɛ kɛtsɔ shishitoo mla ni yɔɔ  1 Korintobii 16:1, 2 lɛ sɛɛ ni ooonyiɛ lɛ nɔ, akɛ, ‘daa lɛ obaasaa nɔ ko oto’ ni okɛye too yɛ asafo lɛ mli kɛha Yehowa Odasefoi ajeŋ muu fɛɛ nitsumɔ lɛ. Nyɔŋmɔ Wiemɔ lɛ woɔ shi akɛ: “Mɔ ni duɔ yɛ jɔɔmɔ mli lɛ, jɔɔmɔ mli nɔŋŋ eeekpa yɛ.”—2 Korintobii 9:6.

Kaaku ohiɛ oshwie nibii krokomɛi ni oyɔɔ lɛ nɔ, tamɔ obe kɛ hewalɛ. Bɔɔ mɔdɛŋ ni ‘ohe be’ kɛjɛ nitsumɔi ni he ehiaaa tsɔ lɛ mli. (Efesobii 5:15, 16; Filipibii 1:10) Kasemɔ bɔ ni ooofee ni okɛ obe atsu nii jogbaŋŋ. Nakai ni ooofee lɛ baaha onyɛ okɛ ohe awo Maŋtsɛyeli Asa saamɔ nitsumɔi kɛ nitsumɔi krokomɛi ni tamɔ nakai ni wóɔ Yehowa jamɔ nɔ lɛ mli. Nibii ni oyɔɔ ni okɛaatsu nii yɛ nɛkɛ gbɛ nɔ lɛ baatsɔɔ ekoŋŋ akɛ ootsɔ Kristofonyo ni eda yɛ mumɔŋ.

Nyɛyaa Hiɛ Kɛya Dalɛ Mli!

Hii kɛ yei ni kaseɔ nii ni le nii, ni shiɛɔ kɛ ekãa, ni jieɔ emuuyeli kpo babaoo, ni yeɔ anɔkwa ni yɔɔ suɔmɔ, ni miisumɔ ni amɛkɛ amɛgbɔmɔtso kɛ amɛheloonaa nibii afi Maŋtsɛyeli nitsumɔ lɛ sɛɛ lɛ ji jɔɔmɔ babaoo diɛŋtsɛ. Ŋwanejee ko bɛ he akɛ, no hewɔ ni bɔfo Paulo wo hewalɛ akɛ: “Nyɛhaa wɔfɔɔa Kristo shishijee saji lɛ ahe wiemɔ, ni wɔfoŋ kɛya dalɛ mli” lɛ!—Hebribii 6:1.

Ani oji Kristofonyo ni eda yɛ mumɔŋ? Aloo yɛ gbɛ̀i komɛi anɔ lɛ, okã he otamɔ mumɔŋ abifao lolo? (Hebribii 5:13) Yɛ eko fɛɛ eko mli lɛ, tswaa ofai shi akɛ obaabɔ mɔdɛŋ ni okɛ ohe awo teemɔŋ nikasemɔ, shiɛmɔ, kɛ suɔmɔ kpo ni ooojie otsɔɔ onyɛmimɛi lɛ amli. Kpɛlɛmɔ ŋaawoo fɛɛ ŋaawoo kɛ tsɔsemɔ fɛɛ tsɔsemɔ ni mɛi ni edara yɛ mumɔŋ lɛ kɛbaaha bo lɛ nɔ. (Abɛi 8:33) Teremɔ bo diɛŋtsɛ ojatsu ni ji Kristofoi agbɛnaa nii lɛ. Kɛtsɔ be kɛ mɔdɛŋbɔɔ nɔ lɛ, bo hu obaanyɛ oshɛ “Nyɔŋmɔ bi lɛ nɔ hemɔkɛyeli kɛ ehe nilee ekomefeemɔ lɛ he ni wɔfee nuu ni eye emuu yɛ Kristo dalɛ muu lɛ susumɔ naa.”—Efesobii 4:13.

[Wiemɔ ni akɔ ni akɛmiitsu nii ni yɔɔ baafa 27]

Kristofoi ni eda yɛ mumɔŋ lɛ haa asafo lɛ fiɔ shi shiŋŋ. Amɛnáa hewalɛ kpakpa yɛ su loo baŋ ni jeɔ kpo waa lɛ nɔ

[Mfonirii ni yɔɔ baafa 29]

Mɛi ni eda yɛ mumɔŋ lɛ haa mumɔ kpakpa hiɔ asafo lɛ mli kɛtsɔ mɛi krokomɛi ahe miishɛɛ ni amɛnáa lɛ nɔ