Maŋtsɛyeli Jajelɔi Bɔ Amaniɛ

Anɔkwale Wui lɛ Anɔ Nushwiemɔ yɛ Chile

YƐ SHIA-ŊÃ ni yɔɔ Chile kooyigbɛ lɛ nɔ lɛ, ekolɛ afii babaoo hoɔ dani nugbɔ nɛɔ. Shi kɛji ebɔi nɛmɔ lɛ, etsakeɔ shikpɔŋ ni nɔ egbi kɛ tɛsaa ni egbɛ eshwã lɛ efeɔ lɛ fɔfɔii diɛŋtsɛ ni hiɛ sui srɔtoisrɔtoi tamɔ shikpɔŋ kuntu. Nɛkɛ naakpɛɛ nii nɛɛ gbalaa shisharalɔi kɛjɛɔ maŋ lɛŋ he fɛɛ he kɛbaa.

Shi kɛlɛ, nɔ ko ni yɔɔ naakpɛɛ kwraa fe no miiya nɔ yɛ gbɔmɛi ni yɔɔ Chile lɛ ateŋ. Biblia mli anɔkwale lɛ he nu miiho kɛmiiya shikpɔŋ lɛ nɔ he fɛɛ he, ni gbɔmɛi anɔkwafoi pii “miishwere” kɛmiitsɔmɔ Yesu Kristo kaselɔi. Gbɛ kome ni atsɔɔ nɔ agbɛɔ nɛkɛ anɔkwale lɛ he nui nɛɛ ashwãa ji kɛtsɔ tɛlifoŋ nɔ. Niiashikpamɔi ni nyiɛ sɛɛ nɛɛ tsɔɔ yibiiwoo kpakpai ni nine shɛɔ nɔ kɛtsɔ nɛkɛ odaseyeli gbɛ nɛɛ nɔ.

• Abi ni be-fɛɛ sanekpakpa jajelɔ ko ni atsɛɔ lɛ Karina lɛ afee bɔ ni akɛ tɛlifoŋ yeɔ odase lɛ he nɔkwɛmɔnɔ yɛ kpokpaa nɔ kpee wiemɔ he gbɛjianɔtoo ko mli. Shi kɛlɛ, Karina kɛ ehe woko nakai odaseyeli nitsumɔ fã nɛɛ mli pɛŋ. Bɔni afee ni awo lɛ hewalɛ koni ekɛ ehe awo kpee wiemɔ he gbɛjianɔtoo lɛ mli lɛ, onukpa ko kɛ eŋa kɛ Karina susu saji otii komɛi ahe yɛ bɔ ni akɛ tɛlifoŋ yeɔ odase ahaa lɛ he. Amɛwo lɛ hewalɛ hu koni esɔle kɛha Yehowa gbɛtsɔɔmɔ yɛ sane lɛ he. Efee nakai, ni yɛ naagbee lɛ ekpɛ eyiŋ akɛ ebaabɔ mɔdɛŋ koni etswa.

Karina hala tɛlifoŋ nɔmba ko kɛjɛ akrowa ko ni bɛŋkɛ jɛmɛ lɛ mli. Tɛlifoŋ tswaa nitsulɔ ko wó nɔ, ni Karina gbála yiŋtoo hewɔ ni etswa lɛ lɛ mli. Tɛlifoŋ tswaa nitsulɔ lɛ kɛ miishɛɛ here nɔ, no hewɔ lɛ eto gbɛjianɔ kɛha sanegbaa ekoŋŋ yɛ gbii etɛ mli. Nɔ ni jɛ sɛɛkuu kɛ sramɔ kɛtsɔ tɛlifoŋ nɔ lɛ mli ba ji Biblia mli nikasemɔ, kɛtsɔ wolo tɛtrɛɛ ni ji Mɛni Nyɔŋmɔ Taoɔ yɛ Wɔdɛŋ? lɛ kɛ nitsumɔ nɔ. Kɛjɛ nakai beaŋ kɛbaa nɛɛ, amɛná nikasemɔ ni yɔɔ miishɛɛ mli ŋɔɔmɔ, ni Karina kɛ woji emaje koni ekɛha yoo lɛ saji lɛ ahetoo.

• Bernarda ŋɔ hegbɛ lɛ ni ekɛye nuu ko ni ejeee gbɛ ni etswa etɛlifoŋ nɔmba lɛ odase. Yɛ nɔ najiaŋ ni emli aaafu moŋ lɛ, Bernarda jie ehe kpo akɛ Yehowa Odasefoi lɛ ateŋ mɔ kome ni eye ebua lɛ. Sanegbaa nyiɛ sɛɛ, ni nuu lɛ bo lɛ toi beni egbalaa bɔ ni etsɛŋ ni Nyɔŋmɔ Maŋtsɛyeli lɛ baajie jalɛ sane ni ayeee kɛya lɛ mli etsɔɔ lɛ lɛ. Nuu lɛ ha Bernarda etɛlifoŋ nɔmba, ni efee sɛɛkuu kɛ saramɔi kɛtsɔ tɛlifoŋ nɔ. Yɛ amɛsanegbaa lɛ ekome mli lɛ, ekane Nilee Ni Kɛ Mɔ Yaa Naanɔ Wala Mli wolo lɛ fã ko eha lɛ. Ebi bɔ ni eeefee ni enine ashɛ eko nɔ, kɛkɛ ni Bernarda kɛ wolo lɛ ekome ni Biblia fata he maje lɛ. Ato gbɛjianɔ kɛha lɛ koni nyɛmi nuu ko ni yɔɔ jɛmɛ lɛ ayasara lɛ, ni amrɔ nɛɛ eeeya nɔ ekɛ “nu” miishwie nɛkɛ “tso” ni shwereɔ nɛɛ nɔ.

Hɛɛ, yɛ je nɛŋ mumɔŋ shia ni nɔ egbi nɛɛ nɔ lɛ, wui ni eteetee amɛhe lɛ miimɛ koni amɛkwɛ̃ kɛji amɛnine shɛ anɔkwale lɛ he nui ni haa wala lɛ nɔ. Mɛi akpekpei abɔ ni kumai yeɔ amɛ lɛ kã he “amɛmiikwɛ̃” ni “amɛmiigba afoforo” kɛmiitsɔmɔ Yehowa Nyɔŋmɔ tsuji anɔkwafoi.—Yesaia 44:3, 4.