‘Nibii Agbɛjianɔtoo Be’ lɛ Ebɛŋkɛ!

Beni eshwɛ fioo dani Yesu kwɔ kɛtee ŋwɛi lɛ, enɔkwa kaselɔi lɛ ateŋ mɛi komɛi bi lɛ akɛ: “Nuntsɔ, ani nɛkɛ be nɛɛ mli obaatee maŋtsɛyeli lɛ shi oma shi oha Israel lɛ?” Hetoo ni Yesu kɛha lɛ tsɔɔ akɛ be ko baashwie mli dani Maŋtsɛyeli lɛ baaba. Yɛ nakai be lɛ mli lɛ, ekaselɔi lɛ baatsu nitsumɔ kpele ko. Amɛbaatsɔmɔ Yesu he odasefoi “yɛ Yerusalem kɛ Yudea kɛ Samaria fɛɛ, kɛyashi shikpɔŋ lɛ naagbeehei lɛ.”—Bɔfoi lɛ Asaji 1:6-8.

ANYƐŊ atsu nakai nitsumɔ lɛ agbe naa yɛ gbii, otsii aloo nyɔji fioo komɛi amli. Shi kɛlɛ, amrɔ nɔŋŋ ni kaselɔi lɛ bɔi shiɛmɔ. Shi amɛnijiaŋ ejeee wui yɛ sane ni kɔɔ nibii agbɛjianɔtoo lɛ he. Bɔfo Petro wie enɛ he etsɔɔ mɛi babaoo ni ebua amɛhe naa yɛ Yerusalem lɛ akɛ: “Nyɛtsakea nyɛtsuiiaŋ, ni nyɛkua nyɛsɛɛ, koni agbe nyɛhe eshai lɛ, beni afee ni hejɔɔmɔ yinɔ ajɛ Nuntsɔ lɛ hiɛ aba, ní etsu Yesu Kristo mɔ ni ejie eto nyɛ momo lɛ; mɔ ni sa akɛ eyahi ŋwɛi kɛyashi nibii fɛɛ agbɛjianɔtoo be lɛ ni Nyɔŋmɔ ewie he yɛ egbalɔi krɔŋkrɔŋi lɛ anaa kɛjɛ teteete lɛ.” (Wɔma efã ko nɔ mi.)—Bɔfoi lɛ Asaji 3:19-21.

Esa akɛ nɛkɛ “nibii fɛɛ agbɛjianɔtoo be” nɛɛ kɛ “hejɔɔmɔ yinɔ” ajɛ Yehowa ŋɔɔ aba. Esa akɛ gbɛjianɔtoo ni agba yɛ he lɛ aba yɛ gbɛ̀i srɔtoi enyɔ nɔ. Klɛŋklɛŋ lɛ, mumɔŋ nibii agbɛjianɔtoo ni haa mɔ he jɔɔ lɛ baaba, ni amrɔ nɛɛ eeya nɔ. Nɔ ni ji enyɔ ji, paradeiso diɛŋtsɛ ni abaato shishi yɛ shikpɔŋ nɔ ní baanyiɛ enɛ sɛɛ.

Nibii Agbɛjianɔtoo Be lɛ Eje Shishi

Taakɛ bɔfo Petro ma nɔ mi eha mɛi babaoo ni ebua amɛhe naa yɛ Yerusalem lɛ, ŋwɛi ‘diɛŋtsɛ Yesu hi.’ Nakai ji bɔ ni eba lɛ kɛyashi afi 1914, beni Yesu ŋɔ emaŋtsɛyeli hewalɛ lɛ ni ebɔi nɔyeli akɛ Maŋtsɛ ni Nyɔŋmɔ ehala lɛ. Petro gba akɛ, yɛ nakai be lɛ mli lɛ, Yehowa ‘baatsu’ e-Bi lɛ yɛ shishinumɔ naa akɛ E-baaŋmɛ Yesu gbɛ koni etsu egbɛfaŋnɔ lɛ he nii akɛ mɔ ni ji oti yɛ Nyɔŋmɔ yiŋtoi ahe nitsumɔ mli. Biblia lɛ tsɔɔ nɔ ni ba lɛ mli yɛ okadi wiemɔ mli akɛ: “Ni [Nyɔŋmɔ ŋwɛi gbɛjianɔtoo lɛ] efɔ binuu [Nyɔŋmɔ Maŋtsɛyeli ni yɔɔ Yesu Kristo dɛŋ lɛ] ni kɛ dadetso baakpala jeŋmaji lɛ fɛɛ lɛ.”—Kpojiemɔ 12:5.

Shi jeŋmaji lɛ etoko amɛyiŋ akɛ amɛbaaba amɛhe shi kɛha Kristo nɔyeli lɛ. Yɛ anɔkwale mli lɛ, amɛkɛ tutuamɔ wiemɔi te shi amɛshi eshishibii anɔkwafoi ni yɔɔ shikpɔŋ nɔ lɛ, mɛi ni ale ŋmɛnɛ akɛ Yehowa Odasefoi lɛ. Taakɛ bɔfoi ni tsɔ amɛhiɛ lɛ ji lɛ, Odasefoi lɛ eŋɔ ‘nitsumɔ ni ji Kristo he odaseyeli’ lɛ ni shishashaomɔ ko kwraa bɛ mli. (Kpojiemɔ 12:17) Shitee-kɛ-woo kɛmiishi nitsumɔ ni nɛkɛ Kristofoi anɔkwafoi nɛɛ tsuɔ lɛ je shishi kɛjɛ maŋ kome mli kɛtee ekroko mli. Yɛ afi 1918 mli lɛ, akɛ mɛi ni akɛ gbɛnaa nii ahe nitsumɔ ewo amɛdɛŋ yɛ Buu Mɔɔ Asafo lɛ nitsumɔhe yitso ni yɔɔ Brooklyn, New York lɛ mli bii lɛ tee saneyelihe yɛ apasa naafolɔmɔi ahewɔ ni akɛ be kakadaŋŋ wo amɛ tsuŋ yɛ gbɛ ni ejaaa nɔ. Yɛ be saŋŋ ko sɛɛ lɛ, ebafee  tamɔ nɔ ni ŋmɛnɛŋmɛnɛ beaŋ odaseyeli nitsumɔ “kɛyashi shikpɔŋ lɛ naagbeehei lɛ” yeŋ omanye.—Kpojiemɔ 11:7-10.

Shi kɛlɛ, yɛ afi 1919 mli lɛ, ajie nitsumɔhe yitso lɛ mli bii ni áwo amɛ tsuŋ lɛ, kɛkɛ ni sɛɛ mli lɛ ajie amale naafolɔmɔi lɛ fɛɛ kwraa. Amrɔ nɔŋŋ ni amɛje mumɔŋ nibii fɛɛ agbɛjianɔtoo nitsumɔ lɛ shishi ekoŋŋ. Kɛjɛ nakai beaŋ kɛbaa nɛɛ, Yehowa webii miiná mumɔŋ shweremɔ ko ni anako eko dã mli ŋɔɔmɔ.

Aje tafãa wulu ko shishi koni akɛtsɔɔ gbɔmɛi ni yɔɔ jeŋmaji lɛ amli lɛ fɛɛ anii koni amɛye nii fiaa ni Kristo ekɛɛ koni esɛɛnyiɛlɔi lɛ afee lɛ anɔ. (Mateo 28:20) Kwɛ bɔ ni eyɔɔ miishɛɛ waa akɛ aaana mɛi komɛi ni tsutsu lɛ amɛjie sui komɛi ni tamɔ kooloi anɔ kpo lɛ akɛ amɛtsake amɛsusumɔi! Amɛjie gbɔmɔ momo lɛ, ni jieɔ sui tamɔ “mlila,” “musubɔɔ wiemɔ,” kɛ “hiɛgbeji awiemɔ” kɛjɛ amɛhe, ni amɛwo gbɔmɔ hee lɛ, “ní tsɔɔ ehee ekoŋŋ kɛyaa nilee mli yɛ [Nyɔŋmɔ] ni bɔ lɛ lɛ subaŋ lɛ naa.” Yɛ mumɔŋ shishinumɔ naa lɛ, aawo gbalɔ Yesaia wiemɔi obɔ ŋmɛnɛ po akɛ: “Klaŋ [mɔ ko ni tsutsu ko ejieɔ klaŋ nifeemɔ sui komɛi akpo] kɛ gwantɛŋ bi [mɔ ko ni jieɔ heshibaa su kpo] aaahi shi, ni kootsɛ kɛ abotia bi aaabu shi; ni tsina bi kɛ jata bi kɛ kooloo ní ewo fɔ fɛɛ aaahi he kome.”—Kolosebii 3:8-10; Yesaia 11:6, 9.

Nibii Krokomɛi Ahe Gbɛjianɔtoo lɛ Ebɛŋkɛ!

Kɛfata nɔ ni ejɛ mumɔŋ paradeiso gbɛjianɔtoo lɛ mli kɛba ŋmɛnɛ lɛ he lɛ, be mli ni wɔshibɔlemɔ ŋulami lɛ baatsɔ paradeiso diɛŋtsɛ lɛ be lɛ miibɛŋkɛ oyayaayai. Shikpɔŋ lɛ fã fioo ko pɛ bafee paradeiso beni Yehowa kɛ wɔ blematsɛmɛi Adam kɛ Hawa to jɛmɛ yɛ Eden abɔɔ lɛ mli lɛ. (1 Mose 1:29-31) No hewɔ ni wɔbaanyɛ wɔwie Paradeiso he akɛ aaku sɛɛ akɛmiiba ekoŋŋ lɛ. Shi, dani no baaba lɛ, esa akɛ ajie apasa jamɔ ni wooo Nyɔŋmɔ hiɛ nyam lɛ kɛjɛ shikpɔŋ lɛ nɔ. Je nɛŋ maŋkwramɔŋ hemɛi lɛ baatsu enɛ he nii. (Kpojiemɔ 17:15-18) Kɛkɛ lɛ, abaakpata maŋkwramɔ kɛ jarayeli nibii lɛ, kɛ mɛi ni fiɔ amɛsɛɛ lɛ ahiɛ. Yɛ naagbee lɛ, abaatsĩ mɛi ni teɔ shi woɔ Nyɔŋmɔ lɛ ateŋ naagbee mɔ—Satan Abonsam kɛ edaimonioi lɛ anaa afii akpe—ni ji be ni nibii fɛɛ agbɛjianɔtoo nitsumɔ lɛ baahe. Yɛ nakai be lɛ mli lɛ, “ŋã kpataa kɛ shikpɔŋ gbiŋ lɛ aaanyá, ŋã kplanaa lɛ hu mli aaafili lɛ, ni eeegba afoforo tamɔ fɔfɔi!” (Yesaia 35:1) Hoofeemɔ ehiŋ shikpɔŋ lɛ nɔ he ko he ko. (Yesaia 14:7) Abaatee mɛi akpekpei abɔ ni égboi lɛ ashi kɛba wala mli yɛ shikpɔŋ lɛ nɔ. Mɔ fɛɛ mɔ baaná kpɔmɔ afɔleshaa gbɛjianɔtoo lɛ mli sɛɛnamɔi lɛ amli niiashikpamɔ. (Kpojiemɔ 20:12-15; 22:1, 2) Shwilafoi, toimulɔi, loo obubuafoi ehiŋ shikpɔŋ lɛ nɔ. “Maŋbii lɛ ateŋ mɔ ko ekɛɛŋ akɛ: Migbɔjɔ!” (Yesaia 33:24) Yɛ Kristo Afii Akpe Nɔyeli lɛ naagbee lɛ sɛɛ nɔŋŋ lɛ, abaafɛne Abonsam kɛ edaimonioi lɛ be fioo ni amɛbaana bɔ ni atsu Nyɔŋmɔ yiŋtoo kɛha shikpɔŋ lɛ he nii kɛyashɛ he ni eshɛ lɛ. Naagbee lɛ, abaakpata amɛhiɛ kɛya naanɔ.—Kpojiemɔ 20: 1-3.

Kɛji shikpɔŋ lɛ yashɛ afii akpe nibii agbɛjianɔtoo lɛ naagbee lɛ, “nɔ fɛɛ nɔ ni muɔ lɛ” baajie Yehowa yi, ni amɛbaafee nakai kɛya naanɔi anaanɔ. (Lala 150:6) Ani obaafata amɛhe? Obaanyɛ ofata amɛhe.