Bolɔmɔ Kɛha Yelikɛbuamɔ

YOO ko ni jɛ Brazil lɛ bolɔ ekɛɛ akɛ: “Nyɔŋmɔ hiɛ ekpa minɔ!” Yɛ ewu kpatu gbele lɛ sɛɛ lɛ, enu he akɛ shishinumɔ ko kwraa bɛ eshihilɛ he dɔŋŋ. Ani obɔ he mɔdɛŋ akɛ oooye obua mɔ ko ni ehao nakai pɛŋ aloo mɔ ko ni ekolɛ eebolɔ kɛha yelikɛbuamɔ?

Mɛi komɛi anijiaŋ jeɔ wui aahu akɛ amɛfoɔ amɛwala sɛɛ—ni amɛteŋ mɛi pii ji oblahii kɛ oblayei. Taakɛ adafitswaa wolo ni ji Folha de S. Paulo tsɔɔ lɛ, nibii amlipɛimɔ ko ni afee yɛ Brazil lɛ tsɔɔ akɛ “he ni agbeɔ yɛ oblahii kɛ oblayei ateŋ lɛ etee hiɛ oha mlijaa 26.” Ákɛ nɔkwɛmɔnɔ lɛ, susumɔ Walter, * ni ji oblanyo ko ni yɔɔ São Paulo lɛ sane lɛ he okwɛ. Ebɛ fɔlɔi, ebɛ shia, ebɛ teemɔhe, ebɛ nanemɛi ni ebaanyɛ ekɛ ehe afɔ̃ amɛnɔ. Bɔni afee ni ehaomɔi lɛ sɛɛ afo lɛ, Walter kpɛ eyiŋ akɛ ebaatu kɛjɛ nu hiɛ agba ko nɔ.

Edna, ni ji fɔlɔ kome ni ji nyɛ lɛ yɛ bii enyɔ momo dani ekɛ nuu kroko kpe. Yɛ nyɔŋ kome pɛ sɛɛ lɛ, amɛje shishi amɛfee ekome kɛhi shi yɛ nuu lɛ mami, mɔ ni kɛ ehe woɔ mumɔi atsɛmɔ mli ni etɔɔ dãa lɛ shia. Edna fɔ́ bi kroko, eje shishi ebɔi dãanumɔ fe nine, ni ehao aahu akɛ ebɔ mɔdɛŋ koni egbe ehe. Yɛ naagbee lɛ, ebii lɛ akwɛmɔ hegbɛ ŋmɛɛ lɛ.

Ni mɛi ni edara lɛ hu? Kulɛ Maria ji mɔ ko ni sumɔɔ shwɛmɔ ni ewieɔ babaoo hu. Shi kɛlɛ, beni edaa lɛ ebɔi haomɔ yɛ enitsumɔ akɛ helatsɛmɛi akwɛlɔ lɛ he, ejaakɛ eeshe gbeyei akɛ ebaatɔ tɔmɔi komɛi. Enɛ ha enu nɔnyɛɛ he waa. Beni eka akɛ ebaatsa ehe sɛɛ lɛ, etao tsofafeemɔ sɛɛgbɛ, ni etamɔ nɔ ni kwɛmɔ ni ená lɛ ye bua lɛ. Shi beni enitsumɔ lɛ je edɛŋ yɛ be mli ni eye afii 57 lɛ, nɔnyɛɛ lɛ ku sɛɛ eba yɛ gbɛ ni mli wa nɔ akɛ, enáaa enaa tsabaa. Maria je shishi ebɔi susumɔ akɛ ebaagbe ehe.

Nilelɔ José Alberto Del Porto ni yɔɔ São Paulo University lɛ wie akɛ: “Gbɔmɛi aaashɛ oha mlijaa 10 ni kɛ nɔnyɛɛ kpeɔ lɛ kaa akɛ amɛbaagbe amɛhe.” U. S. Amerika datrɛfonyo nukpa Dr. David Satcher bɔ amaniɛ akɛ: “Ewa waa akɛ abaahe aye akɛ mɛi babaoo egboi yɛ mɔ diɛŋtsɛ he gbee mli fe mɛi ni agbeɔ, shi eji anɔkwale sane ni yɔɔ mɔbɔ.”

Bei komɛi lɛ mɔdɛŋ ni abɔɔ koni agbe he lɛ bafeɔ, bolɔmɔ kɛha yelikɛbuamɔ. Ni eji anɔkwale akɛ weku mli bii kɛ nanemɛi miisumɔ ni amɛfee nɔ ni ja kɛha mɔ ni nijiaŋ eje wui lɛ. Yɛ anɔkwale mli  lɛ, ebafeŋ nɔ ni baaye abua akɛ akɛ wiemɔi tamɔ: “Kaaha onii miifee ohe mɔbɔ,” “Ohi fe mɛi pii” aloo, “Jeee daa gbi ehiɔ haa mɔ fɛɛ mɔ” aaatsu nii. Yɛ no najiaŋ lɛ, mɛni hewɔ ofeee naanyo ni yɔɔ diɛŋtsɛ kɛ toibolɔ kpakpa? Hɛɛ, bɔɔ mɔdɛŋ koni oye obua mɔ ni nijiaŋ eje wui lɛ koni ena akɛ esa akɛ ahi wala mli.

French niŋmalɔ Voltaire ŋma akɛ: “Kulɛ nuu ni gbɔmɔtsoŋ tutuamɔ haa enii feɔ mɔbɔ, ni egbeɔ ehe ŋmɛnɛ lɛ, baashwe koni kulɛ ehi shi eji emɛ otsi ko kulɛ.” Ojogbaŋŋ, te gbɔmɛi ni nijiaŋ eje wui lɛ aaafee tɛŋŋ ayoo akɛ sɛɛnamɔ yɛ wala he?

[Shishigbɛ niŋmaa]

[Mfoniri ni yɔɔ baafa 3]

Oblahii kɛ oblayei kɛ onukpai ni amɛyifalɛ yaa hiɛ gbeɔ amɛhe

[Mfoniri ni yɔɔ baafa 4]

Te obaafee tɛŋŋ oye obua mɔ ko ni nijiaŋ eje wui?