“Eŋmɛlɛtswaa lɛ Shɛko”
“Eŋmɛlɛtswaa lɛ Shɛko”
“Mɔ ko nyɛɛɛ ehe ata, ejaakɛ eŋmɛlɛtswaa lɛ shɛko.”—YOHANE 7:30.
1. Mɛɛ nibii titrii enyɔ kudɔ Yesu shihilɛ gbɛ lɛ?
YESU KRISTO kɛɛ ebɔfoi lɛ akɛ: “Gbɔmɔ bi lɛ baaa ni asɔmɔ lɛ, shi eba sɔɔmɔ moŋ, ní eŋɔ esusuma lɛ eha yɛ mɛi pii akpɔmɔ hewɔ.” (Mateo 20:28) Ekɛɛ Roma amralo Pontio Pilato akɛ: “Mi lɛ, enɛ hewɔ afɔ́ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.” (Yohane 18:37) Yesu le nɔ pɔtɛɛ hewɔ ni ebaagbo kɛ nitsumɔ ni ehe baahia akɛ etsu dani egbo. Ele be falɛ ni eyɔɔ ni ekɛaatsu enitsumɔ lɛ he nii hu. Esɔɔmɔ yɛ shikpɔŋ nɔ ákɛ Mesia lɛ sɛɛkɛlɛ baafee afii etɛ kɛ fã pɛ. Eje shishi kɛ enu mli baptisimɔ yɛ Yordan Faa lɛ mli (yɛ afi 29 Ŋ.B.) yɛ okadifeemɔŋ otsi ni gbeɔ yi feɔ 70 nɔ lɛ ni agba afɔ̃ shi lɛ shishijee, ni eba naagbee kɛ egbele yɛ sɛŋmɔtso nɔ yɛ nakai otsi (yɛ afi 33 Ŋ.B.) lɛ teŋ. (Daniel 9:24-27; Mateo 3:16, 17; 20:17-19) No hewɔ lɛ nibii titrii enyɔ ji nɔ ni kudɔ Yesu shihilɛ gbɛ lɛ fɛɛ yɛ shikpɔŋ lɛ nɔ, ni nomɛi ji: yiŋtoo hewɔ ni eba kɛ be henumɔ ni mli ka shi faŋŋ ni eyɔɔ.
2. Te afee Yesu Kristo su kɛ ebaŋ he mfoniri yɛ Sanekpakpai lɛ amli aha tɛŋŋ, ni mɛɛ gbɛ nɔ etsɔ etsɔɔ akɛ ehiɛ yɛ enitsumɔ lɛ nɔ?
2 Sanekpakpai lɛ amli saji lɛ jieɔ Yesu Kristo kpo akɛ gbɔmɔ ni tsuɔ nii waa ni fã gbɛ babaoo kɛtee kɛba yɛ Palestina shikpɔŋ muu lɛ fɛɛ nɔ, ni eejaje Nyɔŋmɔ Maŋtsɛyeli lɛ he sanekpakpa lɛ eetsɔɔ ni eetsu naakpɛɛ nitsumɔi wuji. Yɛ Yesu sɔɔmɔ nitsumɔ lɛ fã ni yɔɔ ekãa lɛ shishijee mli lɛ, awie ehe akɛ: “Eŋmɛlɛtswaa lɛ shɛko.” Yesu diɛŋtsɛ kɛɛ akɛ: “Mibe lɛ nako ashɛ.” Kɛmiiba esɔɔmɔ nitsumɔ lɛ naagbee lɛ, ekɛ wiemɔ “ŋmɛlɛtswaa . . . lɛ eshɛ” tsu nii. (Yohane 7:8, 30; 12:23) Bɔ ni Yesu hiɛ yɔɔ ŋmɛlɛtswaa, loo be ni ekɛbaatsu nitsumɔ ni akɛwo edɛŋ lɛ ni efɔleshaa gbele lɛ fata he lɛ nɔ lɛ ná nɔ ni ewie lɛ kɛ nɔ ni efee lɛ nɔ hewalɛ waa. Enɛ ni wɔɔnu shishi lɛ baanyɛ aha wɔyoo esu kɛ baŋ kɛ bɔ ni ejwɛŋɔ saji ahe ehaa lɛ sɛɛ, ni ebaaye ebua wɔ ‘koni wɔnyiɛ enanemaahei lɛ asɛɛ’ kpaakpa.—1 Petro 2:21.
Etswa Efai Shi akɛ Ebaafee Nyɔŋmɔ Suɔmɔnaa Nii
3, 4. (a) Mɛni ba yookpeemɔ okpɔlɔŋmɛɛ ko shishi yɛ Kana? (b) Mɛni hewɔ Nyɔŋmɔ Bi lɛ te shi ewo Maria jwɛŋmɔ akɛ efee wein ni etã lɛ he nɔ ko lɛ, ni mɛni wɔbaanyɛ wɔkase kɛjɛ enɛ mli?
3 Afi lɛ ji 29 Ŋ.B. Gbii fioo ko pɛ eho kɛjɛ be mli ni Yesu diɛŋtsɛ hala eklɛŋklɛŋ kaselɔi lɛ. Amɛ fɛɛ amɛ́ba Kana akrowa lɛ mli bianɛ yɛ Galilea kpokpaa lɛ nɔ koni amɛya yookpeemɔ okpɔlɔŋmɛɛ ko shishi. Yesu nyɛ Maria hu yɛ jɛmɛ. Wein lɛ tã. Beni Maria tsɔɔ ejwɛŋmɔ akɛ esa akɛ efee nɔ ko yɛ he lɛ, ekɛɛ ebi lɛ akɛ: “Amɛbɛ wein.” Shi Yesu ha hetoo akɛ: “Mɛɛ sane mikɛo yɔɔ, awó? Miŋmɛlɛtswaa lɛ shɛko.”—Yohane 1:35-51; 2:1-4.
4 Yesu hetoo akɛ: “Mɛɛ sane mikɛo yɔɔ, awó?” lɛ ji blema sanebimɔ ko ni tsɔɔ akɛ, akɛ jwɛŋmɔ ni atsɔɔ loo nɔ ni asusuɔ lɛ kpãaa gbee. Mɛni hewɔ Yesu te shi wo Maria wiemɔi lɛ? Ojogbaŋŋ, eye afii 30 agbɛnɛ. Otsii fioo komɛi nɛ ni abaptisi lɛ, ni akɛ mumɔ krɔŋkrɔŋ fɔ lɛ mu, ni Yohane Baptisilɔ lɛ kɛ lɛ tsɔɔ akɛ “Nyɔŋmɔ toobi lɛ ni wóɔ je lɛ he esha lɛ kɛyaa lɛ!” (Yohane 1:29-34; Luka 3:21-23) Amrɔ nɛɛ ehe miihia ni Hegbɛ ni Fe Fɛɛ ni tsu lɛ kɛba lɛ akudɔ lɛ. (1 Korintobii 11:3) Aŋmɛŋ mɔ ko gbɛ, kɛ eji weku lɛ mlinyo ni bɛŋkɛ kpaakpa po, koni egbá nitsumɔ ni Yesu ba shikpɔŋ nɔ koni ebatsu lɛ naa. Mɛɛ efai shi ni etswa akɛ ebaafee e-Tsɛ lɛ suɔmɔnaa nii po je kpo yɛ Yesu hetoo ni ekɛha Maria lɛ mli nɛkɛ! Eba akɛ wɔɔtswa wɔfai shi nakai nɔŋŋ akɛ wɔɔtsu ‘gbɛnaa nii fɛɛ ni kã wɔnɔ’ yɛ Nyɔŋmɔ hiɛ lɛ he nii.—Jajelɔ 12:13.
5. Mɛɛ naakpɛɛ nii Yesu Kristo fee yɛ Kana, ni te enɛ ná mɛi krokomɛi anɔ hewalɛ eha tɛŋŋ?
5 Akɛni Maria nu sane titri ni yɔɔ ebinuu lɛ wiemɔ lɛ mli lɛ shishi hewɔ lɛ, amrɔ nɔŋŋ ni etsi ehe, shi ekɛɛ tsuji lɛ akɛ: “Nɔ fɛɛ nɔ ni eeekɛɛ nyɛ lɛ, nyɛfea.” Kɛkɛ ni Yesu tsu naagba lɛ he nii. Eha tsuji lɛ wo botokui lɛ amli nu obɔbɔ, ni eha nu lɛ tsɔ wein ni hi fe fɛɛ. Enɛ ba akɛ nɔ ko ni jeɔ Yesu hewalɛ ni ekɛtsuɔ naakpɛɛ nii lɛ shishi, ni ekɛfee okadi akɛ Nyɔŋmɔ mumɔ lɛ yɛ enɔ. Beni kaselɔi heei lɛ na nɛkɛ naakpɛɛ nii nɛɛ lɛ, ewo amɛhemɔkɛyeli hewalɛ.—Yohane 2:5-11.
Eyɛ Hiɛdɔɔ Kɛha Yehowa We Lɛ
6. Mɛni hewɔ Yesu mli wo la yɛ nɔ ni enaa yɛ sɔlemɔwe lɛ yɛ Yerusalem lɛ hewɔ, ni mɛni efee yɛ he?
6 Etsɛɛɛ ni afi 30 Ŋ.B. agbiɛnaa be shɛ, ni Yesu kɛ enanemɛi lɛ nyiɛ gbɛ kɛmiiya Yerusalem koni amɛyaye Hehoo lɛ. Beni amɛyɔɔ jɛmɛ lɛ, ekaselɔi lɛ na ni amɛ Hiɛnyiɛlɔ lɛ miifee enii yɛ gbɛ ni ekolɛ amɛnako lɛ nakai da lɛ nɔ. Yudafoi jarayelɔi hiɛjoolɔi miihɔɔ kooloi kɛ loofɔji kɛha afɔleshaa yɛ sɔlemɔwe lɛ diɛŋtsɛ. Ni amɛmiihe shika ni fa fe nine kɛmiijɛ Yudafoi jálɔi anɔkwafoi lɛ adɛŋ. Akɛni Yesu mli efu waa hewɔ lɛ, efee he nɔ ko. Eŋɔ kpãai efee kpelebii ni ekɛshwie nihɔɔlɔi lɛ kɛjɛ jɛmɛ. Eshɛrɛ shika tsakelɔi lɛ ashika lɛ eshwie ni etsirɛ okpɔlɔi lɛ etswia shi. Ni efã mɛi ni hɔɔ okpoi lɛ akɛ: “Nyɛjiea nii nɛɛ kɛjea biɛ.” Beni Yesu kaselɔi lɛ na bɔ ni ekɛ henumɔ ni tamɔ nɛkɛ tsu nii lɛ, amɛkai gbalɛ ni kɔɔ Nyɔŋmɔ Bi lɛ he lɛ, akɛ: “Owe lɛ he hiɛdɔɔ lɛ eye mi.” (Yohane 2:13-17; Lala 69:10) Esa akɛ wɔ hu wɔkɛ hiɛdɔɔ atsu nii ni wɔkaŋmɛ gbɛ ni je lɛŋ sui miiwo wɔjamɔ lɛ he muji.
7. (a) Mɛni kanya Nikodemo koni eyasara Mesia lɛ? (b) Mɛni wɔkaseɔ kɛjɛɔ odase ni Yesu ye Samariayoo ko lɛ mli?
7 Beni Yesu yɔɔ Yerusalem lɛ, efee okadii komɛi ni yɔɔ naakpɛɛ, ni mɛi pii he enɔ amɛye. Nikodemo po, ni ji Akuashɔŋ lɛ loo Yudafoi akojomɔhe wulu lɛ mlinyo lɛ hiɛ sɔ Yesu, ni eba eŋɔɔ gbɛkɛ koni ebakase nii babaoo. Kɛkɛ ni Yesu kɛ ekaselɔi lɛ hi “Yudea shikpɔŋ lɛ nɔ” aaafee nyɔji kpaanyɔ, eshiɛɔ ni efeɔ mɛi kaselɔi. Shi beni awo Yohane Baptisilɔ lɛ tsuŋ lɛ sɛɛ lɛ, amɛshi Yudea kɛtee Galilea. Beni amɛfãa gbɛ kɛtsɔɔ Samaria kpokpaa lɛ nɔ lɛ, Yesu kɛ hegbɛ ni ená lɛ tsu nii koni eye Samariayoo ko odase jogbaŋŋ kɛmɔ shi. Enɛ gbele gbɛ koni Samariabii pii abatsɔmɔ heyelilɔi. Nyɛhaa wɔ hu wɔhiɛ ahia wɔhe nɔ kɛha hegbɛi ni baa koni wɔwie Maŋtsɛyeli lɛ he lɛ.—Yohane 2:23; 3:1-22; 4:1-42; Marko 1:14.
Nitsɔɔmɔ Babaoo yɛ Galilea
8. Mɛɛ nitsumɔ Yesu je shishi yɛ Galilea?
8 Yesu yɛ babaoo ni ebaatsu yɛ eŋwɛi Tsɛ lɛ sɔɔmɔ mli dani egbele “ŋmɛlɛtswaa” lɛ ashɛ. Yesu je sɔɔmɔ nitsumɔ ni da babaoo po shishi yɛ Galilea fe Yudea kɛ Yerusalem. Eyakpa “Galilea muu lɛ fɛɛ, etsɔɔ nii yɛ amɛkpeehei lɛ, ni eshiɛɔ maŋtsɛyeli lɛ he sanekpakpa lɛ etsɔɔ, ni etsaa hela fɛɛ hela kɛ hejaramɔ fɛɛ hejaramɔ yɛ maa lɛŋ.” (Mateo 4:23) Ewiemɔi ni ekɛkãnyaa amɛ, akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ” lɛ jije yɛ kpokpaa muu lɛ fɛɛ nɔ. (Mateo 4:17) Nyɔji fioo ko sɛɛ, beni Yohane Baptisilɔ lɛ kaselɔi enyɔ ba Yesu ŋɔɔ koni amɛbanu ni amɛna amaniɛbɔɔ ni kɔɔ Yesu he lɛ, ekɛɛ amɛ akɛ: “Nyɛyaa ni nyɛyagbaa Yohane nibii ni nyɛna ni nyɛnu lɛ, akɛ shwilafoi miina nii, obubuafoi miinyiɛ, kpitiyelɔi ahe miitse, toimulɔi miinu nii, gbohii miite shi, aajaje sanekpakpa lɛ aatsɔɔ ohiafoi; ni ajɔɔ mɔ ni mihe sane etɔtɔŋ enane.”—Luka 7:22, 23.
9. Mɛni hewɔ asafoi babaoo ke yuu kɛba Kristo Yesu ŋɔɔ lɛ, ni mɛni wɔbaanyɛ wɔkase kɛjɛ enɛ mli?
9 ‘Yesu he wiemɔ kpakpa gbɛ eshwã yɛ jɛi niiaŋ fɛɛ,’ ni asafoi babaoo baa eŋɔɔ—kɛjɛ Galilea, Dekapoli, Yerusalem, Yudea, kɛ Yordan Faa lɛ sɛɛgbɛ. (Luka 4:14, 15; Mateo 4:24, 25) Amɛbaa eŋɔɔ, ni jeee akɛ yɛ enaakpɛɛ helatsamɔi lɛ pɛ hewɔ, shi moŋ yɛ etsɔɔmɔi ni ŋɔɔ mɛi anaa lɛ hu hewɔ. Eshɛɛ sane lɛ ŋɔɔ mɛi anaa ni ewoɔ mɔ hewalɛ. (Mateo 5:1–7:27) Yesu wiemɔi lɛ kɔneɔ mɔ yiŋ ni eŋɔɔ. (Luka 4:22) Asafoi lɛ “ahe jɔ̃ amɛhe yɛ enitsɔɔmɔ lɛ hewɔ,” ejaakɛ ekɛ hegbɛ wieɔ kɛjɛɔ Ŋmalɛi lɛ amli. (Mateo 7:28, 29; Luka 4:32) Namɔ sumɔŋ akɛ eeebɛŋkɛ nuu ni tamɔ nɛkɛ? Eba akɛ wɔ hu wɔɔná nitsɔɔmɔ he ŋaa bɔni afee ni egbala aŋkroaŋkroi ni yɔɔ tsuijurɔ lɛ kɛba anɔkwale lɛ he.
10. Mɛni hewɔ Nazaret maŋ lɛ mli bii lɛ ka akɛ amɛaagbe Yesu lɛ, ni mɛni hewɔ amɛyeee omanye lɛ?
10 Shi, jeee mɛi ni boɔ Yesu toi lɛ fɛɛ kpɛlɛɔ sane lɛ nɔ. Yɛ esɔɔmɔ nitsumɔ lɛ shishijee mli po, beni etsɔɔ nii yɛ lɛ diɛŋtsɛ emaŋ kpeehe ko yɛ Nazaret lɛ, abɔ mɔdɛŋ koni agbe lɛ. Eyɛ mli akɛ maŋbii lɛ anaa kpɛ amɛhe yɛ ‘eduromɔ wiemɔi’ lɛ ahewɔ moŋ, shi amɛmiisumɔ ni amɛna naakpɛɛ nii. Shi yɛ nɔ najiaŋ ni Yesu aaafee naakpɛɛ nibii wuji pii yɛ jɛmɛ lɛ, ekpa amɛ pɛsɛmkunya kɛ hemɔkɛyeli ni amɛbɛ lɛ he mama. Akɛni mɛi ni yɔɔ kpeehe lɛ amli fu lɛ hewɔ lɛ, amɛte shi ni amɛmɔ Yesu, ni amɛtsirɛ eyisɛɛ waa kɛtee gɔŋ lɛ fã ko nɔ koni amɛyama eyi shi kɛshɛ lɛ amɛfɔ̃ kɛjɛ tɛsaai lɛ anɔ. Shi eje amɛdɛŋ, ni ejo foi kɛshi jɛmɛ shweshweeshwe. Egbele “ŋmɛlɛtswaa” lɛ shɛko lolo.—Luka 4:16-30.
11. (a) Mɛni hewɔ jamɔ mli hiɛnyiɛlɔi lɛ ekomɛi ba koni amɛbabo Yesu toi lɛ? (b) Mɛni hewɔ afolɔ Yesu naa akɛ ebule Hejɔɔmɔ Gbi lɛ?
11 Bei pii lɛ jamɔ mli hiɛnyiɛlɔi lɛ—woloŋmalɔi, Farisifoi, Sadukifoi kɛ mɛi krokomɛi lɛ—hu yɛ he ni Yesu shiɛɔ yɛ lɛ. Amɛteŋ mɛi pii yɛ jɛmɛ, ni jeee akɛ amɛaabo toi ni amɛkase nii, shi ni amɛtao tɔmɔ ni amɛbɔ mɔdɛŋ koni amɛtsɔ lɛ tsɔne. (Mateo 12:38; 16:1; Luka 5:17; 6:1, 2) Ákɛ nɔkwɛmɔnɔ lɛ, beni Yesu yasara Yerusalem kɛha afi 31 Ŋ.B. Hehoo lɛ yeli lɛ, etsa nuu ko ni ehe eye aahu afii 38 lɛ. Yudafoi ajamɔ mli hiɛnyiɛlɔi lɛ folɔ Yesu naa akɛ eebule Hejɔɔmɔ Gbi lɛ. Eha hetoo akɛ: “Mitsɛ miitsu nii kɛbashi be nɛɛ, no hewɔ ni mi hu mitsuɔ lɛ.” Agbɛnɛ Yudafoi lɛ folɔ enaa akɛ ebɔ musu, akɛni ekɛɛ Nyɔŋmɔ Bi ji lɛ lɛ hewɔ, ejaakɛ eetsɛ lɛ e-Tsɛ. Amɛmiitao ni amɛgbe Yesu, shi ekɛ ekaselɔi lɛ shi Yerusalem kɛtee Galilea. Nakai nɔŋŋ hu wɔɔfee nilelɔi kɛji akɛ wɔkɛ mɛi ni teɔ shi woɔ lɛ ejeee ŋwane ni he ehiaaa, yɛ be mli ni wɔkɛ wɔ hewalɛ woɔ Maŋtsɛyeli shiɛmɔ kɛ kaselɔfeemɔ nitsumɔ lɛ mli lɛ.—Yohane 5:1-18; 6:1.
12. Nɛgbɛ Yesu tsu Galilea shikpɔŋkuku lɛ nɔ nii kɛyashɛ?
12 Yesu tsu esɔɔmɔ nitsumɔ lɛ titri yɛ Galilea yɛ afi kɛ fã loo nɔ ni nyiɛ sɛɛ ba lɛ mli, ni eyasaraa Yerusalem beni eyaaye daa afi Yudafoi agbii juji etɛ lɛ pɛ mli. Yɛ fɛɛ mli lɛ, efã shiɛmɔ he gbɛfaa etɛ yɛ Galilea: klɛŋklɛŋ nɔ lɛ ekɛ kaselɔi heei ejwɛ tee, nɔ ni ji enyɔ lɛ ekɛ bɔfoi 12 lɛ tee, kɛ nɔ ni mli lɛɛ waa ní etsu bɔfoi ni etsɔse amɛ lɛ hu. Mɛɛ anɔkwale lɛ he odase babaoo aye yɛ Galilea nɛkɛ!—Mateo 4:18-25; Luka 8:1-3; 9:1-6.
Odase ni Aye Ekãa Naa yɛ Yudea kɛ Perea
13, 14. (a) Mɛɛ be Yudafoi lɛ tao akɛ amɛaamɔ Yesu? (b) Mɛni hewɔ maŋ nitsulɔi lɛ mɔɔɔ Yesu lɛ?
13 Áshɛ afi 32 Ŋ.B. gbo be mli, ni Yesu “ŋmɛlɛtswaa” lɛ yɛ wɔsɛɛ be mli lolo. Asesei Agbi Jurɔ lɛ ebɛŋkɛ. Yesu nyɛ bii lɛ tsirɛ eyisɛɛ agbɛnɛ akɛ: “Jee biɛ ni oya Yudea.” Amɛmiisumɔ ni Yesu ajie enaakpɛɛ hewalɛi lɛ akpo etsɔɔ mɛi fɛɛ ni amɛ́bua amɛhe naa yɛ gbijurɔyeli lɛ shishi yɛ Yerusalem lɛ. Shi Yesu le oshara ni yɔɔ nakai feemɔ he. No hewɔ lɛ, ekɛɛ enyɛmimɛi lɛ akɛ: “Mi lɛ minako maya, ejaakɛ mibe lɛ nako ashɛ.”—Yohane 7:1-8.
14 Beni Yesu shashao shi yɛ Galilea kɛyashi be ko lɛ, etee Yerusalem, “shi ejieee ehe shi, shi moŋ tamɔ teemɔ mli.” Yudafoi lɛ miitao lɛ yɛ gbijurɔyeli lɛ shishi, ni amɛmiikɛɛ akɛ: “Nɛgbɛ eyɔɔ?” Beni gbijurɔyeli lɛ fã eho lɛ, Yesu tee sɔlemɔwe lɛ ni ekɛ ekãa je nitsɔɔmɔ shishi. Amɛka lɛ mɔmɔ, ekolɛ koni amɛwo lɛ tsuŋ loo ni amɛha agbe lɛ. Kɛlɛ, amɛyeee omanye ejaakɛ “eŋmɛlɛtswaa lɛ shɛko.” Mɛi pii he Yesu nɔ amɛye agbɛnɛ. Maŋ nitsulɔi ni Farisifoi lɛ tsu amɛ koni amɛyamɔ lɛ kɛba lɛ po ku amɛsɛɛ amɛba efolo, ni amɛkɛɛ akɛ: “Bɔ ni gbɔmɔ nɛɛ wieɔ lɛ, mɔ ko ewieko nakai dã.”—Yohane 7:9-14, 30-46.
15. Mɛni hewɔ Yudafoi lɛ kɔlɔ tɛi koni amɛkɛtswia Yesu lɛ, ni mɛɛ shiɛmɔ he tafaa eje shishi yɛ no sɛɛ?
15 Béi ni kã Yesu kɛ eshitee-kɛ-wolɔi Yudafoi lɛ ateŋ lɛ tee nɔ beni etsɔɔ nibii ni kɔɔ e-Tsɛ lɛ he yɛ sɔlemɔwe lɛ yɛ gbijurɔyeli be lɛ mli lɛ. Yɛ gbijurɔyeli lɛ naagbee gbi lɛ nɔ lɛ, akɛni Yudafoi lɛ amli efu waa yɛ Yesu wiemɔi ni kɔɔ eshihilɛ dani ebatsɔ gbɔmɔ lɛ he hewɔ lɛ, amɛkɔlɔ tɛi koni amɛkɛtswia lɛ. Shi etee ehe ni ejo foi ni nɔ ko esaaa ehe. (Yohane 8:12-59) Yesu yahi Yerusalem sɛɛ ni etsu odaseyeli he ta ko ni naa wa waa ni mɔɔ shi jogbaŋŋ he nii yɛ Yudea. Ehala kaselɔi 70, ni beni ekɛ gbɛtsɔɔmɔ eha amɛ sɛɛ lɛ, etsu amɛ enyɔnyɔɔnyɔ koni amɛtsu nii yɛ shikpɔŋkuku lɛ mli. Amɛtsɔ hiɛ kɛtee he fɛɛ he kɛ maŋ fɛɛ maŋ ní Yesu, ní ebɔfoi lɛ fata ehe lɛ toɔ gbɛjianɔ koni amɛya jɛmɛ lɛ.—Luka 10:1-24.
16. Mɛɛ oshara Yesu jo naa foi yɛ Sɔlemɔtsu Naagbelemɔ Kaimɔ Gbi Jurɔ be lɛ mli, ni mɛɛ nitsumɔ ekɛ ehe wo mli waa shikome ekoŋŋ?
16 Yɛ afi 32 Ŋ.B. fɛ̃i be mli lɛ, no mli lɛ Yesu “ŋmɛlɛtswaa” lɛ miibɛŋkɛ. Eba Yerusalem kɛha Sɔlemɔtsu Naagbelemɔ Kaimɔ Gbi Jurɔ lɛ. Yudafoi lɛ miitao lɛ lolo ni amɛgbe lɛ. Beni Yesu sharaa shi yɛ sɔlemɔwe lɛ ablanaa lɛ nɔ lɛ, amɛbabɔle ehe. Amɛfolɔ enaa ekoŋŋ akɛ ebɔ musu, ni amɛkɔlɔ tɛi koni amɛgbe lɛ. Shi taakɛ Yesu fee yɛ bei ni etsɔ hiɛ lɛ amli lɛ, ejo foi. Etsɛɛɛ ni ana lɛ yɛ gbɛ lɛ nɔ ni eetsɔɔ nii, nɛkɛ be nɛɛ mli lɛ, kɛjɛ maŋ kome mli kɛmiiya ekroko mli, ni kɛjɛ akrowa kome mli kɛmiiya ekroko mli yɛ Perea kpokpaa lɛ nɔ, yɛ Yordan sɛɛ kɛjɛ Yudea. Ni mɛi pii he enɔ amɛye. Shi shɛɛ sane ko ni kɔɔ enaanyo Lazaro he lɛ ha eku esɛɛ kɛtee Yudea ekoŋŋ.—Luka 13:33; Yohane 10:20-42.
17. (a) Mɛɛ shɛɛ sane ko ni he hiaa Yesu nine shɛ nɔ beni eshiɛɔ yɛ Perea lɛ? (b) Mɛni tsɔɔ akɛ Yesu le yiŋtoo ni yɔɔ nɔ ni esa akɛ efee kɛ be ni abaato kɛha enɛɛmɛi afeemɔ lɛ sɛɛ?
17 Shɛɛ sane ni he hiaa lɛ jɛ Marta kɛ Maria, Lazaro nyɛmimɛi yei ni yɔɔ Betania yɛ Yudea lɛ ŋɔɔ. Mɔ ni hiɛ shɛɛ sane lɛ gba akɛ: “Nuntsɔ, naa, mɔ ni osumɔɔ lɛ he miiye.” Yesu ha hetoo akɛ: “Nɛkɛ hela nɛɛ jeee gbele hela ni, shi moŋ Nyɔŋmɔ anunyam lɛ hewɔ ni, beni afee ni awo Nyɔŋmɔ bi lɛ hiɛ nyam.” Bɔni afee ni etsu yiŋtoo nɛɛ he nii lɛ, Yesu je gbɛ emɛ fioo yɛ he ni eyɔɔ lɛ aaafee gbii enyɔ. Kɛkɛ ni ekɛɛ ekaselɔi lɛ akɛ: “Nyɛhaa wɔyaa Yudea ekoŋŋ.” Akɛ nɔ ko ni wa akɛ amɛaakpɛlɛ nɔ lɛ, amɛha hetoo akɛ: “Rabi, eyeko gbi ko ni Yudafoi lɛ tao bo tɛi atswia lɛ, ani ooya jɛi ekoŋŋ lo?” Shi Yesu le akɛ ‘shwane ŋmɛlɛtswai’ ni eshwɛ lɛ, aloo be ni Nyɔŋmɔ eto kɛha eshikpɔŋ nɔ sɔɔmɔ lɛ faaa. Ele nɔ̃ pɔtɛɛ ni esa akɛ efee kɛ nɔ̃ hewɔ.—Yohane 11:1-10.
Naakpɛɛ Nii ni Mɔ Ko Mɔ Ko Nyɛŋ Aku Ehiɛ Eshwie Nɔ
18. Beni Yesu shɛ Betania lɛ, no mli lɛ te shihilɛ ni yɔɔ jɛmɛ lɛ yɔɔ ha tɛŋŋ, ni mɛni ba beni ebashɛ shi lɛ sɛɛ?
18 Marta ji klɛŋklɛŋ mɔ ni kɛ Yesu kpe yɛ Betania, ni ekɛɛ lɛ akɛ: “Nuntsɔ, eji oyɛ biɛ kulɛ, minyɛmi lɛ naaa agbó.” Maria kɛ mɛi ni eba amɛshia lɛ nyiɛ esɛɛ. Amɛ fɛɛ amɛmiifó. Yesu bi akɛ: “Nɛgbɛ nyɛto lɛ yɛ?” Amɛha lɛ hetoo akɛ: “Nuntsɔ, ba ni obakwɛ.” Beni amɛshɛ kaimɔ gbonyobu—tɛkplo ni akɛ tɛ ebu naa—lɛ naa lɛ, Yesu fã akɛ: “Nyɛjiea tɛ lɛ.” Akɛni enuuu nɔ ni Yesu taoɔ afee lɛ shishi hewɔ lɛ, Marta te shi wo akɛ: “Nuntsɔ, be nɛɛ mli lɛ esha, ejaakɛ eye gbii ejwɛ.” Shi Yesu bi lɛ akɛ: “Ani mikɛɛɛo akɛ: Kɛji ohe oye lɛ, ooona Nyɔŋmɔ anunyam lɛ?”—Yohane 11:17-40.
19. Mɛni hewɔ Yesu sɔle yɛ mɛi ahiɛ dani etee Lazaro shi lɛ?
19 Beni ajie tɛ ni akɛbu Lazaro gbonyobu lɛ naa lɛ, Yesu sɔle waa bɔni afee ni gbɔmɛi lɛ aná ale akɛ Nyɔŋmɔ hewalɛ nɔ atsɔɔ atsuɔ nɔ ni ebaafee lɛ. Kɛkɛ ni ebo kɛ gbee waa akɛ: “Lazaro ee, jee kpo!” Lazaro je kpo ni fuu mamai fimɔ enaji kɛ eniji ahe lolo ni duku fi ehiɛ. Yesu kɛɛ: “Nyɛfɛnea lɛ, ni nyɛhaa eyaa.”—Yohane 11:41-44.
20. Te mɛi ni na akɛ Yesu etee Lazaro shi lɛ fee amɛnii yɛ he amɛha tɛŋŋ?
20 Beni Yudafoi lɛ ateŋ mɛi babaoo ni amɛba Marta kɛ Maria miishɛjemɔ lɛ na nɛkɛ naakpɛɛ nii nɛɛ lɛ, amɛhé Yesu nɔ amɛye. Mɛi krokomɛi hu tee ni amɛyagba Farisifoi lɛ nɔ ni ba lɛ. Mɛni amɛfee? Amrɔ nɔŋŋ ni amɛ kɛ amɛ osɔfonukpai lɛ tsɛ́ ni Akuashɔŋ lɛ kɛ hehiamɔ akpe. Amɛkɛ tsuifãa ye ŋkɔmɔ akɛ: “Te wɔfeɔ tɛŋŋ? shi nuu nɛɛ miifee okadii srɔtoi pii. Kɛji wɔŋmɛ lɛ gbɛ nɛkɛ lɛ, mɛi fɛɛ aaahe enɔ aye; ni Romabii lɛ aaaba ni amɛaabashɔ wɔmaŋ kɛ wɔshikpɔŋ lɛ fɛɛ.” Shi Osɔfonukpa Kaiafa kɛɛ amɛ akɛ: “Nyɛjwɛŋŋ . . . akɛ ehi ha wɔ akɛ mɔ kome agbó yɛ maŋ lɛ najiaŋ, fe nɔ ni maŋbii lɛ fɛɛ hiɛ aaakpata lɛ.” No hewɔ lɛ, kɛjɛ nakai gbi lɛ nɔ kɛyaa lɛ amɛkpɛ amɛyiŋ akɛ amɛbaagbe Yesu.—Yohane 11:45-53.
21. Lazaro shitee lɛ he naakpɛɛ nii lɛ ji nii ni tsɔɔ mɛni hiɛ?
21 Nakai eba lɛ akɛ akɛni Yesu mɛ fioo dani eyashɛ Betania hewɔ lɛ, enyɛ efee naakpɛɛ nii ni mɔ ko mɔ ko nyɛŋ aku ehiɛ eshwie nɔ lɛ. Akɛni Nyɔŋmɔ eha lɛ hewalɛ hewɔ lɛ, Yesu tée nuu ni egbó gbii ejwɛ lɛ shi. Enɛ nyɛ Akuashɔŋ ni ehe gbɛi lɛ po nɔ koni amɛkadi enɛ, ni eha amɛbu Naakpɛɛ Nitsulɔ lɛ gbele fɔ! Naakpɛɛ nii nɛɛ tsu nii akɛ nifeemɔ ni tsɔɔ tsakemɔ be ni he hiaa yɛ Yesu sɔɔmɔ nitsumɔ lɛ mli lɛ hiɛ—aashi be ni ‘eŋmɛlɛtswaa lɛ nako ashɛ’ lɛ kemiiya be ni ‘ŋmɛlɛtswaa lɛ eshɛ’ lɛ nɔ.
Te Obaaha Hetoo Oha Tɛŋŋ?
• Mɛɛ gbɛ nɔ Yesu tsɔ etsɔɔ akɛ ehiɛ yɛ nitsumɔ ni Nyɔŋmɔ kɛwo edɛŋ lɛ nɔ?
• Mɛni hewɔ Yesu te shi ewo jwɛŋmɔ ni enyɛ tsɔɔ yɛ wein lɛ he lɛ?
• Mɛni wɔbaanyɛ wɔkase kɛjɛ gbɛ ni yɛ bei babaoo mli lɛ Yesu tsɔɔ nɔ ekɛ shitee-kɛ-wolɔi yeɔ lɛ mli?
• Mɛni hewɔ Yesu mɛ fioo yɛ Lazaro hela lɛ he nitsumɔ mli lɛ?
[Nikasemɔ lɛ he Sanebimɔi]
[Mfonirii ni yɔɔ baafa 12]
Yesu tuu ehewalɛ eha Nitsumɔ ni Nyɔŋmɔ kɛwo edɛŋ lɛ