Wɔji Mɛi Ni Yɔɔ Hemɔkɛyeli

Nyɔŋmɔ Maŋtsɛyeli lɛ He Adafitswaa yɛ Fiji Ŋshɔkpɔi lɛ Anɔ

BE KO lɛ Yesu Kristo wie gbɛ̀i enyɔ komɛi ahe. Ekome lɛɛ ni ekɛ mɔ yaa gbele mli. Ekroko lɛ nɔ etsa, shi ekɛ mɔ yaa wala mli. (Mateo 7:13, 14) Yehowa Nyɔŋmɔ eto eyiŋ akɛ ashiɛ Maŋtsɛyeli lɛ he sanekpakpa lɛ atsɔɔ je lɛ fɛɛ, koni akɛye abua gbɔmɛi ni amɛhala gbɛ ni ja lɛ. (Mateo 24:14) Enɛ hewɔ lɛ, gbɔmɛi ni jɛ hei srɔtoi fɛɛ miibo Maŋtsɛyeli shɛɛ sane lɛ toi, ni amɛteŋ mɛi komɛi miihala wala kɛtsɔ “mɛi ní kɛ hemɔkɛyeli náa amɛsusuma yiwalaheremɔ lɛ ateŋ mɛi komɛi” ní amɛbatsɔmɔɔ lɛ nɔ. (Hebribii 10:39) Wɔmiifɔ̃ bo nine koni okane shihilɛ ni mɛi komɛi ni yɔɔ Fiji kɛ ŋshɔkpɔi krokomɛi ni bɛŋkɛ jɛmɛ yɛ Pasifik Wuoyigbɛ lɛ ehala lɛ he saji.

Amɛkɛ Amɛhe Fɔ̃ Yehowa Nɔ

Beni Mere nu Maŋtsɛyeli shɛɛ sane lɛ he klɛŋklɛŋ kwraa yɛ afi 1964 mli lɛ, no mli lɛ eji gbekɛ yoo ni miiya skul lolo. Shi akɛni etse ehe banee yɛ ŋshɔkpɔ ko ni yɔɔ shɔŋŋ nɔ hewɔ lɛ, ekɛ Yehowa Odasefoi lɛ efɔɔɔ sharamɔ. Shi yɛ naagbee lɛ, ebaná Biblia lɛ he anɔkwa nilee. Shi yɛ nakai beaŋ lɛ, ekɛ nuu ko ni eji maŋtsɛ yɛ akrowa lɛ mli lɛ ebote gbalashihilɛ mli. Yɛ nihalamɔ ni Mere fee akɛ ebaahi shi yɛ Biblia shishitoo mlai lɛ anaa hewɔ lɛ, ewu kɛ ewekumɛi fee lɛ niseniianii, ni enanemɛi ni yɔɔ akrowa lɛ mli lɛ kpoo lɛ. Shi yɛ fɛɛ sɛɛ lɛ, abaptisi lɛ yɛ afi 1991 mli.

No sɛɛ etsɛɛɛ nɔŋŋ ni Mere wu Josua he jɔ ni ebɔi Mere he fatamɔ kɛji akɛ ekɛ amɛbii lɛ miigba Biblia mli saji. Josua kpa Methodist Sɔlemɔ lɛ yaa. Shi ákɛ maŋtsɛ lɛ, eyaa ni eyakwɛɔ daa otsi kpee ni afeɔ yɛ akrowa lɛ mli lɛ nɔ. Yɛ akrowa lɛ mli bii lɛ ahiɛ lɛ, Josua yeee anɔkwa, ejaakɛ Methodist Sɔlemɔ lɛ ji Fiji akrowabii lɛ ajamɔ titri. Enɛ hewɔ lɛ, osɔfo ni yɔɔ jɛmɛ lɛ wo Josua hewalɛ akɛ eku esɛɛ kɛba etsutsu jamɔ lɛ mli.

Josua kɛ ekãa ma nɔ mi eha amɛ akɛ, lɛ kɛ eweku lɛ ehala nɔ ni amɛsumɔɔ momo, ni amɛtswa amɛfai shi akɛ amɛbaajá Yehowa Nyɔŋmɔ “yɛ mumɔ kɛ anɔkwale mli.” (Yohane 4:24) Yɛ kpee ni nyiɛ sɛɛ ni afee yɛ akrowa lɛ mli lɛ, maŋtsɛmɛi ateŋ onukpa fe fɛɛ lɛ wo akpɔ akɛ, Josua kɛ eweku lɛ ashi akrowa lɛ ákɛ mɛi ni atswa amɛ naneshi tu. Aha amɛ gbii kpawo koni amɛshi ŋshɔkpɔ lɛ nɔ, kɛ amɛshia, kɛ amɛshikpɔŋ, kɛ amɛŋmɔshi nibii—hɛɛ, amɛshihilɛ mli nɔ fɛɛ nɔ.

Mumɔŋ nyɛmimɛi jɛ ŋshɔkpɔ kroko nɔ ni amɛye amɛbua Josua kɛ eweku lɛ, ni amɛye amɛbua amɛ ni amɛná he ko ni amɛyahi, kɛ shikpɔŋ ni amɛbaaye okwaa yɛ nɔ. Amrɔ nɛɛ lɛ, abaptisi Josua kɛ ebinuu nukpa lɛ, ni ebinuu kroko miisɔmɔ akɛ sanekpakpa lɛ shiɛlɔ ni abaptisiko lɛ. Nyɛsɛɛ nɛɛ lɛ, Mere kɛ ehe wo daa gbɛgbamɔ (be-fɛɛ Maŋtsɛyeli jajelɔ) nitsumɔ lɛ mli. Halamɔ ni amɛhala akɛ amɛaasɔmɔ Yehowa lɛ ha hegbɛ kɛ heloonaa nii ni amɛyɔɔ lɛ je amɛdɛŋ, shi taakɛ bɔfo Paulo kɛɛ lɛ, amɛbuuu enɛɛmɛi akɛ nɔ ko kɛji amɛkɛto nɔ ni amɛnine eshɛ nɔ lɛ he.—Filipibii 3:8.

Nihalamɔ ni Kɔɔ Henilee He

Ebiɔ hemɔkɛyeli kɛ ekãa dani anyɛɔ atsuɔ henilee ní Biblia etsɔse lɛ lɛ he nii. Nakai ji bɔ ni eba lɛ yɛ oblayoo Suraang ni abaptisi lɛ etsɛko, ní eyɔɔ Tarawa, ni ji Kiribati ŋshɔkpɔi lɛ ateŋ ekome nɔ lɛ gbɛfaŋ. Suraang bi koni ajie lɛ kɛjɛ enitsumɔi lɛ ateŋ ekome ni ji helatsɛmɛi akwɛlɔ yɛ helatsamɔhe lɛ mli. Akpɛlɛɛɛ enibimɔ lɛ nɔ, ni yɛ no hewɔ lɛ, atsu lɛ kɛtee ŋshɔkpɔ ko ni etse ehe banee nɔ koni eyatsu nii yɛ helatsamɔhe bibioo ko ni yɔɔ jɛmɛ lɛ, ni enɛ ha ekɛ mɛi krokomɛi ni hiɛ ehemɔkɛyeli lɛ ateŋ bajɛkɛ.

Yɛ nakai ŋshɔkpɔ lɛ nɔ lɛ, eji kusum nifeemɔ ákɛ mɛi heei fɛɛ ni baa jɛmɛ lɛ baashã afɔle amɛha  “mumɔ” ni yɔɔ jɛmɛ lɛ. Gbɔmɛi lɛ heɔ amɛyeɔ akɛ kɛ afeee nakai lɛ, no lɛ, mɔ lɛ baagbo. Akɛni Suraang eŋmɛɛɛ gbɛ ni afee enɛ aha lɛ kɛ ekuu lɛ hewɔ lɛ, akrowabii lɛ miimɛ ni mumɔ ni atɔ̃ enɔ lɛ ashɔ̃tɔ̃ lɛ. Akɛni efɔŋ ko baaa Suraang loo ekuu mli bii lɛ anɔ hewɔ lɛ, enɛ ha ená hegbɛi babaoo ni eye odase ni mɔɔ shi jogbaŋŋ.

Shi Suraang kaai lɛ baaa naagbee yɛ jɛmɛ. Oblahii ni yɔɔ ŋshɔkpɔ lɛ nɔ lɛ ateŋ mɛi komɛi buɔ yei ni baa jɛmɛ lɛ alakamɔ akɛ mpoatswaa. Shi kɛlɛ, Suraang tsi ehe kɛjɛ amɛ bɔlɛnamɔ he lakamɔi lɛ ahe, ni ehiɛ emuuyeli mli kɛha Nyɔŋmɔ. Yɛ anɔkwale mli lɛ, enyɛ esɔmɔ akɛ daa gbɛgbalɔ yɛ ŋmɛlɛtswai 24 ni ekɛtsuɔ nii daa gbi ákɛ helatsɛmɛi akwɛlɔ lɛ fɛɛ sɛɛ.

Dani onukpai ni yɔɔ akrowa lɛ aaaŋmɛ Suraang okpɔlɔ ni amɛkɛwo ehiɛ nyam koni amɛkɛwo lɛ gbɛ beni eshiɔ ŋshɔkpɔ lɛ nɔ lɛ, amɛwie akɛ, lɛ ji klɛŋklɛŋ maŋsɛɛ sanekpakpa shiɛlɔ diɛŋtsɛ ni kɛ amɛ ebahi shi. Yɛ shiŋŋ ni efee kɛtsu Biblia shishitoo mlai ahe nii lɛ hewɔ lɛ, eha mɛi krokomɛi ni yɔɔ nakai ŋshɔkpɔ lɛ nɔ lɛ ehere Maŋtsɛyeli shɛɛ sane lɛ nɔ.

Gbɔmɔtsoŋ Kaai

Bɔ ni akrowai lɛ ekomɛi etse amɛhe banee hewɔ lɛ, ebiɔ ni Yehowa webii lɛ abɔ mɔdɛŋ waa dani amɛnyɛ amɛkɛ amɛhe awo sɔɔmɔ nitsumɔ lɛ mli, ni agbɛnɛ hu amɛya Kristofoi akpeei. Susumɔ Odasefoi ejwɛ ni abaptisi amɛ lɛ anɔkwɛmɔnɔ—nuu kome kɛ yei etɛ—ni kɛ ŋmɛlɛtswai abɔ fãa gbɛ kɛyaa kpeei ni amɛfãa gbɛ kɛbaa lɛ he okwɛ. Amɛfoɔ faai etɛ kɛyaa ni amɛfoɔ nakai nɔŋŋ kɛbaa. Kɛ́ faa lɛ yi lɛ, nyɛmi nuu lɛ klɛŋklɛŋ sereɔ kɛgbalaa kukwɛi agbo ko ni amɛbaagii kɛ woji kɛ atadei ni amɛbaawo kɛya kpee lɛ yɔɔ mli lɛ. No sɛɛ lɛ, ekuɔ esɛɛ esereɔ kɛbaa ni ebayeɔ ebuaa nyɛmimɛi yei etɛ lɛ.

Kuu bibioo kroko ni yaa kpee yɛ Nonouti ŋshɔkpɔ ni yɔɔ Kiribati ni etse ehe banee lɛ nɔ lɛ hu kɛ kaai ní yɔɔ srɔto kwraa kpeɔ. Mɛi kpawo loo kpaanyɔ pɛ náa gbɛ yɛ shia ni amɛfeɔ kpee lɛ yɛ mli lɛ mli. Mɛi krokomɛi lɛ taraa agbo lɛ naa ni amɛfiliɔ kɛtsɔɔ dade afabaŋ kɛ emli fɔji bibii lɛ amli. Akrowa lɛ mli bii ni ekpa kɛjɛ amɛsɔlemɔtsũi fɛfɛji lɛ amli kɛ mɛi ni miiya kpaako lɛ fɛɛ naa he ni afeɔ kpee nɛɛ yɛ lɛ jogbaŋŋ diɛŋtsɛ. Yɛ anɔkwale mli lɛ, Yehowa tsuji lɛ le akɛ, gbɔmɛi ji mɛi ni jara wa yɛ Nyɔŋmɔ hiɛ, shi jeee tsũi. (Hagai 2:7) Nyɛmi yoo kome pɛ ní abaptisi lɛ yɛ ŋshɔkpɔ lɛ nɔ lɛ ji yoomo, ni enyɛɛɛ enyiɛ kɛya shɔŋŋ. Shi kɛlɛ, oblayoo ko ni ji shiɛlɔ ni abaptisiko lɛ ji mɔ ni yeɔ ebuaa lɛ ni etsiɔ lɛ yɛ shwiili mli yɛ sɔɔmɔ nitsumɔ lɛ mli. Kwɛ hiɛsɔɔ ni amɛyɔɔ kɛha anɔkwale lɛ!

Shiɛlɔi ni amɛyi fa fe 2,100 ni sɔmɔɔ yɛ Fiji ŋshɔkpɔi lɛ anɔ lɛ etswa amɛfai shi akɛ amɛbaaya nɔ amɛtswa Nyɔŋmɔ Maŋtsɛyeli sanekpakpa lɛ he adafi amɛtsɔɔ mɛi. Ni amɛyɛ hekɛnɔfɔɔ akɛ mɛi babaoo baaba lolo koni amɛbatsɔmɔ “mɛi ní kɛ hemɔkɛyeli náa amɛsusuma yiwalaheremɔ lɛ ateŋ mɛi komɛi.”

[Shikpɔŋ he mfoniri ni yɔɔ baafa 8]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

Australia

Fiji