Wɔji Mɛi ni Yɔɔ Hemɔkɛyeli

Maŋtsɛyeli lɛ Shiɛmɔ yɛ Altiplano lɛ Nɔ yɛ Peru

ALTIPLANO kã kooyigbɛ kɛ anaigbɛ Andes Gɔji—he ni Bolivia kɛ Peru kpeɔ yɛ—lɛ teŋ. Egbɛi lɛ shishi ji “hei ni kwɔ” aloo “gɔŋ kɛ eyiteŋ tɛtrɛɛ.” Efã titri lɛ kã Bolivia.

Altiplano lɛ lɛɛmɔ ji kilomitai 100 ni ekɛlɛ ji kilomitai 1,000, ni ekwɔ fe ŋshɔ lɛ aaafee mitai 3,700. Kɛ ota kɔɔyɔŋ lɛlɛ mli kɛjɛ Peru maŋtiase ni kã ŋshɔ lɛ naa, ni ji Lima lɛ kɛmiiya lɛ, ekɛ bo tsɔɔ El Misti ni snoo ehà nɔ fɛɛ, ni ji lasu gɔŋ ko ni nɔ kwɔ waa kɛyaa atatui lɛ amli ni enɔkwɔlɛ shɛɔ mitai 5,822 lɛ yiteŋ. Agbɛnɛ onaa Nevado Ampato kɛ Nevado Coropuna gɔji ni amɛnɔkwɔlɔ fe mitai 6000 ni snoo ehà amɛyiteŋ fɛɛ lɛ yɛ shɔŋŋ. Nɔ ni ohiɛ gbaa nɔ amrɔ nɔŋŋ ji tɛsaa ni lɛɛ—ni ji Peru wuoyigbɛ Altiplano lɛ.

Peru Altiplano lɛ maŋtiase lɛ gbɛi ji Puno, ni ekã Titicaca Kpaakpo ni lɛji nyiɛɔ nɔ waa fe kpaakpoi fɛɛ ni yɔɔ je lɛŋ lɛ naagbee gbɛ yɛ kooyigbɛ. Akɛni kpokpaa nɛɛ kwɔ fe kilomitai etɛ hewɔ lɛ, etsɛɔ fioo dani saralɔi nyɛɔ amɛdamɔɔ kɔɔyɔɔ ni mli ejɔ ŋanii lɛ naa. Quechua kɛ India Aymarabii yɔɔ Titicaca Kpaakpo lɛ naa. Anaa amɛ kɛ amɛtadei etsuji kɛ bluu fɛfɛji ni amɛmiitsu nii yɛ amɛ chacras aloo ŋmɔji bibii lɛ amli. Eyɛ mli akɛ Spain wiemɔ ji nɔ ni afɔɔ wiemɔ yɛ Peru moŋ, shi awieɔ Quechua kɛ Aymara wiemɔi hu yɛ Altiplano.

Shiɛmɔ Nitsumɔ lɛ Hiɛnyiɛmɔ

Etsɛko tsɔ ni heshibalɔi babaoo ni tsuɔ nii waa ni wieɔ Quechua kɛ Aymara lɛ baná Biblia anɔkwa nilee lɛ. Yehowa jɔɔmɔ titri ni yɔɔ be-fɛɛ Maŋtsɛyeli jajelɔi ni sɔmɔɔ akɛ gbɛgbalɔi krɛdɛɛ lɛ nɔ lɛ hewɔ eba lɛ nakai.

Ákɛ nɔkwɛmɔnɔ lɛ, akɛ gbɛgbalɔi krɛdɛɛi, José kɛ Silvia tee Putina maŋ, ní kɛjɛ Titicaca Kpaakpo lɛ he kɛyaa jɛmɛ lɛ, eheɔ kilomitai 50 lɛ nɔ. Yɛ nyɔji enyɔ mli lɛ Silvia miifee shia Biblia mli nikasemɔi 16, ni José miifee 14. Yɛ nyɔji ekpaa pɛ mli lɛ, shiɛlɔi ni yɔɔ asafo lɛ mli lɛ ayifalɛ tee hiɛ kɛjɛ 23 kɛyashɛ 41. Ni yɛ nakai beaŋ nɔŋŋ lɛ, mɛi abɔ ni baa kpee lɛ ayifalɛ tee hiɛ kɛjɛ 48 kɛyashɛ 132.

José kɛɛ akɛ: “Beni wɔje asafoŋ kpeei afeemɔ shishi yɛ nɛkɛ hei ni amɛtse amɛhe banee nɛɛ amli lɛ, wɔna akɛ ehi akɛ wɔkɛ Maŋshiɛmɔ kɛ Asafo Woloŋ Nikasemɔ kpeei lɛ aaaje shishi. Enɛ ha efee mlɛo kɛha mɛi heei ni yɔɔ sane lɛ he miishɛɛ lɛ koni amɛnyɛ amɛje kpeei baa shishi.”

Nyɛmimɛiyei enyɔ—mɔ kome ji gbɛgbalɔ—kɛ sanekpakpa lɛ ba Muñani maŋ ni etse ehe banee lɛ mli klɛŋklɛŋ, ni kɛjɛ Putina kɛmiiya jɛmɛ lɛ eheɔ aaafee kilomitai 20. Amɛkɛ shwilafo ko ni atsɛɔ lɛ Lucio je Biblia mli nikasemɔ shishi yɛ jɛmɛ. * Efɔ enyɛminuu Miguel ni ji Katolik maŋsɛɛ sanekpakpa shiɛlɔ ni eyako osɔfoi askul lɛ eko ni eji akutso ko ni bɛŋkɛ jɛmɛ lɛ mli onukpa lɛ nine. Beni Miguel naanyo ko bi lɛ nɔ hewɔ ni eyaa Muñani daa otsi lɛ, ekɛɛ akɛ eyaa jɛmɛ koni eyakase Yehowa kɛ e-Wiemɔ lɛ he nii. Kɛkɛ ni sanebimɔ lɛ te shi akɛ: “Mɛni hewɔ ohaaa wɔkase Biblia lɛ yɛ biɛ?” Akɛni gbɔmɛi ni yɔɔ Miguel maŋ lɛ mli lɛ jie miishɛɛ kpo hewɔ lɛ, Odasefoi lɛ to gbɛjianɔ nɔŋŋ koni amɛfee kpee yɛ jɛmɛ.

Miguel kɛ mɛi bɔi nɔ ni ekaseɔ lɛ he sanegbaa. Shi mɛni efee yɛ hegbɛ ni ehiɛ akɛ Katolik maŋsɛɛ sanekpakpa shiɛlɔ ni eyako osɔfoi askul lɛ eko kɛ agbɛnɛ hu akɛ amralo sɛɛyelɔ lɛ he? Yɛ kpee ko ni afee yɛ maŋ lɛ asa lɛ nɔ lɛ mli lɛ, eha mɛi lɛ le akɛ eshi Katolik maŋsɛɛ sanekpakpa shiɛmɔ nitsumɔ lɛ. Ani abaahala mɔ kroko? Mɔ ko bi yɛ toibolɔi lɛ ateŋ akɛ: “Mɛni hewɔ ehe hiaa ni wɔná maŋsɛɛ sanekpakpa shiɛlɔi ekoŋŋ yɛ be mli ni wɔmiikase anɔkwale lɛ?” Yɛ anɔkwale mli lɛ, no mli lɛ amɛmiitsɔɔ nibii ni Yehowa Odasefoi etsɔɔ  amɛ lɛ. Mɔ kroko hu kɛfata he akɛ: “Wɔkɛ bo kpãaa gbee akɛ bo pɛ obaakpa. Mɛni hewɔ wɔ fɛɛ wɔkpaaa?” Kɛkɛ ni mɛi ni yɔɔ jɛmɛ lɛ fɛɛ kɛ ekomefeemɔ bo akɛ: “Wɔ fɛɛ wɔkpa!”

No sɛɛ lɛ etsɛɛɛ ni agba amagai kɛ krɔs ahe saji yɛ maŋ lɛ kpeehe lɛ. Nuu ko bi koni mɛi fɛɛ ni eba jɛmɛ lɛ agbele 5 Mose 7:25 lɛ ni kɛɔ akɛ: “Amɛ nyɔŋmɔi lɛ amagai lɛ nyɛkɛ la ashãa; ohiɛ akakɔ jwiɛtɛi loo shika ni yɔɔ amɛhe lɛ nɔ ni oŋɔ oha ohe, koni no akafee tsɔne ni eduɔ; ejaakɛ Yehowa, o-Nyɔŋmɔ lɛ, miihi.”

Kɛkɛ ni nuu lɛ bi koni mɔ fɛɛ mɔ ni fiɔ sɛɛ akɛ ashã amagai lɛ awo enine nɔ. Amrɔ nɔŋŋ ni mɛi lɛ fɛɛ hole amɛniji anɔ. (Bɔfoi lɛ Asaji 19:19, 20) Amrɔ nɛɛ, wekui 25 ni yɔɔ maŋ nɛɛ mli lɛ ateŋ wekui 23 miikase Nyɔŋmɔ Wiemɔ lɛ. Mɛi enyɔ miisɔmɔ akɛ shiɛlɔi ni abaptisiko amɛ, ni gbalashihilɛ mli hefatalɔi enumɔ miito gbɛjianɔ ni amɛkɛ amɛgbalashihilɛ lɛ awo mla shishi, bɔni afee ni amɛná shidaamɔ kpakpa yɛ Yehowa hiɛ.—Tito 3:1; Hebribii 13:4.

Wiemɔi ni Amɔmɔ Awo Kasɛt nɔ ni Akɛtsɔɔ Nii

Akɛni mɛi ni le nikanemɔ kɛ niŋmaa faaa tsɔ yɛ Altiplano lɛ nɔ hewɔ lɛ, Buu Mɔɔ vidioi kɛ wiemɔi ni amɔmɔ awo kasɛt nɔ lɛ ni afee yɛ amɛwiemɔi amli lɛ miiye miibua waa diɛŋtsɛ—anyɛɔ akɛfeɔ shia Biblia mli nikasemɔi po. Gbɛgbalɔ krɛdɛɛ ko ni atsɛɔ lɛ Dora kɛ kasɛt tsu nii ni ekɛfee nikasemɔi yɛ Mɛni Nyɔŋmɔ Taoɔ yɛ Wɔdɛŋ? wolo bibioo lɛ mli. Kɛji etswa kuku kome lɛ, ebiɔ Biblia kaselɔ lɛ saji yɛ nɔ ni enu lɛ mli.

Redio nitsumɔhe ko ni yɔɔ jɛmɛ lɛ tswaa Taoɔ wolo lɛ mli saji lɛ ekomɛi ahe adafi yɛ Quechua wiemɔ mli yɛ redio lɛ nɔ daa gbi. Amɛfeɔ nakai nɔŋŋ kɛhaa Awake! ni yɔɔ Spania wiemɔ mli lɛ hu. Enɛ hewɔ lɛ, mɛi pii bale Maŋtsɛyeli shɛɛ sane lɛ, ni amɛsumɔɔ akɛ amɛkase babaoo kɛji akɛ Yehowa Odasefoi ba amɛshiai amli lɛ.

Yɛ je lɛ hiɛ lɛ, Altiplano lɛ yɛ shɔŋŋ, shi jeee nakai eji yɛ Nyɔŋmɔ hiɛ. Yɛ suɔmɔ ni Yehowa yɔɔ kɛha adesai hewɔ lɛ, mɛi babaoo ni yɔɔ shɔŋŋ yɛ Ande Altiplano lɛ nɔ lɛ miifata mɛi ni woɔ enɔkwale jamɔ shia ni je agbo lɛ hiɛ nyam lɛ he.—Hagai 2:7.

[Shishigbɛ niŋmaa]