Blonya He Kusumii—Ani Eji Kristofoi Anifeemɔ?

BLONYA be lɛ eshɛ. Mɛni no tsɔɔ kɛha bo, oweku, kɛ onanemɛi? Ani eji mumɔŋ gbijurɔyeli, loo eji miishɛɛ kɛ mlifilimɔ be kɛkɛ? Ani eji be ni esa akɛ asusu Yesu Kristo fɔmɔ he, aloo esaaa akɛ asusuɔ Kristofoi anifeemɔi ahe?

Be mli ni osusuɔ sanebimɔi nɛɛ ahe lɛ, kaimɔ akɛ Blonya kusumii baanyɛ afee srɔto yɛ he ni oyɔɔ lɛ. Ákɛ nɔkwɛmɔnɔ lɛ, yɛ Mexico kɛ Latin Amerika maji komɛi amli lɛ, ehiɛ gbɛi kroko. Ɛnsaiklopedia ko tsɔɔ mli akɛ aná Ŋleshi gbɛi Christmas [Blonya] lɛ “kɛjɛ teŋgbɛ afii lɛ amli Christes Masse, Kristo Niyeli Krɔŋkrɔŋ lɛ mli.” Shi kɛlɛ, La Navidad, loo Fɔmɔ Be, taakɛ atsɛɔ lɛ yɛ nɛkɛ Latin Amerika shikpɔji nɛɛ anɔ lɛ, kɔɔ Kristo fɔmɔ be lɛ he. Ŋɔɔ be fioo ni okɛsusu nibii komɛi ni afeɔ yɛ Mexico lɛ he okwɛ. Ekolɛ, enɛ baanyɛ aye ebua bo koni ojaje bo diɛŋtsɛ osusumɔ yɛ hejɔɔmɔ gbi nɛɛ he.

Posadas, “Nilelɔi Etɛ lɛ,” kɛ Nacimiento

Akɛ posadas lɛ jeɔ gbijurɔyeli lɛ shishi yɛ December 16. Mexico’s Feasts of Life wolo lɛ kɛɔ akɛ: “Eji posadas be, gbii nɛɛhu ní yɔɔ miishɛɛ ní nyiɛ Blonya Be lɛ hiɛ, ní akɛkaiɔ be ni Yosef kɛ Maria kome too kpà Betlehem maŋ lɛ mli kɛ be ni naagbee kwraa lɛ ajie mlihilɛ kpo atsɔɔ amɛ ni amɛná shihilɛhe ko lɛ. Wekui kɛ nanemɛi kpeɔ kutuu daa gbɛkɛ ni amɛfeɔ nibii ni ba yɛ gbii ni tsɔ Kristo fɔmɔ lɛ hiɛ lɛ amli lɛ he nɔkwɛmɔnɔ.”

Yɛ kusum naa lɛ, gbɔmɛi akuu ko hiɛɔ Maria kɛ Yosef amagai kɛyaa shia ko mli ni amɛláa kɛtaoɔ shihilɛhe, loo posada. Mɛi ni yɔɔ shia lɛ mli lɛ hereɔ nɔ kɛ lala kɛyashi naagbee mli lɛ aŋmɛɔ amɛ gbɛ koni amɛba mli. Kɛkɛ lɛ, niyeli henaabuamɔ ko jeɔ shishi, he ni mɛi komɛi—ni afimɔ amɛhiɛ ni akɛ tso ewo amɛdɛŋ lɛ—bɔɔ mɔdɛŋ koni amɛjwa piñata, ni ji gbɛ ni akɛ sũ fee ni awula lɛ ni akɛ kpãa efi lɛ kɛtsotsoro shi lɛ. Kɛ́ ajwa gbɛ lɛ, mɛi ni eba gbijurɔyeli lɛ buaa nɔ ni yɔɔ mli (siklitɛ, aduawa, kɛ ekrokomɛi ni tamɔ no lɛ) naa. Nɔ ni nyiɛɔ enɛ sɛɛ ji niyenii, dãai, lalai, kɛ jooi. Kɛjɛ December 16 kɛyashi December 23 lɛ, afeɔ posada henaabuamɔi kpaanyɔ. Gbi ni ji 24 lɛ nɔ lɛ, ayeɔ Nochebuena (Blonya Be lɛ), ni wekui bɔɔ mɔdɛŋ koni amɛkpe kutuu kɛye gbɛkɛ niyenii krɛdɛɛ ko.

Etsɛɛɛ kɛkɛ lɛ, Afi Hee Gbi lɛ eshɛ, ni akɛ niyeli henaabuamɔi ni yɔɔ hoo yeɔ. Atsɔɔ akɛ yɛ January 5 gbɛkɛ lɛ, Tres Reyes Magos (“nilelɔi etɛ”) kɛ shwɛmɔ nii bahaa gbekɛbii lɛ. Akɛ niyeli henaabuamɔ ni afeɔ yɛ January 6 lɛ gbeɔ naa kwraa, beni ayeɔ rosca de Reyes (keeki ni afee lɛ kokroo tamɔ ga) lɛ. Beni ayeɔ keeki dɔkɔdɔkɔ nɛɛ, mɔ ko baana tsobi bibioo ko ni damɔ shi kɛha abifao Yesu, yɛ enɔ̃ lɛ mli. Sɔ̃ kã mɔ ni baana lɛ nɔ akɛ eto gbɛjianɔ koni efee niyeli henaabuamɔ lɛ naagbee nɔ̃ kwraa lɛ yɛ February 2 mli. (Yɛ hei komɛi lɛ, eji tsobii bibii etɛ ni damɔ shi kɛha “nilelɔi etɛ lɛ.”) Taakɛ obaanyɛ ona lɛ, Blonya he niyeli henaabuamɔ lɛ kãa he eyaa nɔ.

Yɛ nɛkɛ be nɛɛ mli lɛ, aleɔ nacimiento (Fɔmɔ Be nikwɛmɔhe) lɛ jogbaŋŋ. Mɛni yɔɔ enɛ mli?  Ojogbaŋŋ, anaa mfonirii (ewuji loo bibii) ni akɛ sũ, tso, loo nishɔ̃ɔ sũ fee lɛ yɛ hei ni anaa maŋbii yɛ kɛ agbɛnɛ jamɔhei kɛ shiai amli. Amɛdamɔ shi kɛha Yosef kɛ Maria ní amɛkoto shi yɛ kooloi aniyeniianɔ, ní abifao lɛ yɔɔ mli lɛ hiɛ. Bei pii lɛ tookwɛlɔi kɛ Los Reyes Magos (“nilelɔi etɛ lɛ”) fataa he. Nɔ ni obaana yɛ sɛɛ ji kooloi atsũ, ni ekolɛ kooloi komɛi ebɔle he kɛkpe. Shi kɛlɛ, nɔ titri ni yɔɔ mli lɛ ji abifao lɛ, ni atsɛɔ lɛ el Niño Dios (Abifao Nyɔŋmɔ) yɛ Spania wiemɔ mli lɛ. Anyɛɔ akɛ nɔ̃ titri nɛɛ maa shi yɛ Blonya Gbi lɛ nɔ.

Fɔmɔ Be He Kusumii lɛ Ahesusumɔ Jogbaŋŋ

Yɛ nɔ ni kɔɔ Blonyayeli taakɛ ale yɛ je lɛŋ he fɛɛ he lɛ he lɛ, The Encyclopedia Americana kɛɛ akɛ: “Kusumii babaoo ni afeɔ yɛ Blonya he lɛ jeee Blonya kusum kɛjɛ shishijee mli, shi moŋ eji kusum ni yɔɔ dani Kristofoi abe lɛ shɛ kɛ kusum ni jeee Kristofoi anɔ̃ ni Kristofoi asɔlemɔ lɛ eŋɔ. Blonya kusum babaoo ni akɛjieɔ hiɛtserɛ lɛ ji nɔkwɛmɔnɔ ni aná kɛjɛ Saturnalia, Roma gbijurɔyeli ko ni ayeɔ yɛ December teŋgbɛ lɛ mli. Ákɛ nɔkwɛmɔnɔ lɛ, nɛkɛ gbijurɔyeli nɛɛ mli aná okpɔlɔŋmɛɛ wulu, nikeenii ni akɛhaa, kɛ kenɛrɛi ni asuɔ lɛ kɛjɛ.”

Yɛ Latin Amerika lɛ, anyɛɔ afeɔ jɛmɛ kusumii afataa Fɔmɔ Be mli nɔ̃ titri lɛ he. Ekolɛ, obaabi akɛ ‘nɛgbɛ amɛná kɛjɛ.’ Yɛ anɔkwale mli lɛ, mɛi ni sumɔɔ ni amɛkpɛtɛ Biblia lɛ he lɛ naa akɛ kusumii lɛ ekomɛi ji Aztecbii akusumii. El Universal, ni ji adafitswaa wolo ko ni yɔɔ Mexico City lɛ kɛɛ akɛ: “Mɔ kome shihilɔi babaoo ŋɔ hegbɛ lɛ ni amɛkɛ bɔ ni Indiabii agbijurɔyeli bei lɛ kɛ Katolik gbijurɔyeli kalenda be lɛ kpeɔ lɛ tsu nii, ni no hewɔ lɛ, amɛkɛ enɛ tsu nii ni amɛkɛfi amɛ maŋsɛɛ sanekpakpa shiɛmɔ nitsumɔ lɛ sɛɛ. Amɛkɛ Kristofoi anyɔŋmɔi agbijurɔyelii baye Latin Amerikabii anyɔŋmɔi lɛ anɔ̃ lɛ najiaŋ, amɛkɛ Europabii agbijurɔyelii kɛ nifeemɔ bawo mli, ni amɛkɛ Indianbii agbijurɔyelii amli nifeemɔi bafata he, ni eha amɛná kusumii babaoo ní  efutu ni atsɔ nɔ aná Mexicobii anifeemɔi kɛjɛ mli.”

The Encyclopedia Americana tsɔɔ mli akɛ: “Fɔmɔ Be he shwɛmɔi bafee Blonyayeli mli nifeemɔ kɛjɛ shishijee . . . Atsɔɔ mli akɛ Hetselɔ Francis ji mɔ ni kɛ Fɔmɔ Be he mfoniri [kooloi aniyeniianɔ mli mfoniri] lɛ bɔi nitsumɔ.” Afee shwɛmɔi ni kɔɔ Kristo fɔmɔ he nɛɛ yɛ sɔlemɔi lɛ amli yɛ be mli ni ajeɔ Mexico maŋ lɛ shihemɔ lɛ shishi lɛ. Francisca mɔ kome shihilɔi lɛ to he gbɛjianɔ bɔni afee ni amɛnyɛ amɛkɛtsɔɔ Indiabii lɛ Fɔmɔ Be lɛ he nii. Sɛɛ mli lɛ posadas bafee nɔ ni ale waa. Ekɔɔɔ he eko jwɛŋmɔ ni ahiɛ yɛ he kɛjɛ shishijee lɛ, gbɛ ni atsɔɔ nɔ ayeɔ posadas ŋmɛnɛ lɛ diɛŋtsɛ jieɔ nɔ ni eji lɛ kpo. Kɛji oyɛ Mexico yɛ nɛkɛ be nɛɛ mli lɛ, obaanyɛ ona loo okadi nɔ ko ni mɔ ni ŋma El Universal adafitswaa wolo lɛ ma nɔ mi yɛ ewiemɔ lɛ mli lɛ, akɛ: “Posadas, ni kaiɔ wɔ bɔ ni Yesu fɔlɔi kpa shi kɛtao shihilɛhe ní abaafɔ Abifao Nyɔŋmɔ lɛ yɛ lɛ, etsɔ dãatɔɔ, nii ni afeɔ kɛtekeɔ nɔ, fufeemɔ, yakayaka nifeemɔi, kɛ awuiyeli babaoo ŋmɛnɛ.”

Nacimiento he susumɔ lɛ te shi yɛ Maŋ Shihemɔ bei amli, be mli ni akɛ adesai diɛŋtsɛ feɔ he mfoniri yɛ sɔlemɔtsui amli kɛjɛ shishijee lɛ. Yɛ be mli ni mɛi komɛi kpɛlɛɔ enɛ nɔ lɛ, ani eji nɔ ni yɔɔ Biblia lɛ mli diɛŋtsɛ? Eji sanebimɔ ni sa. Beni mɛi ni akɛɛ atsɛɔ amɛ nilelɔi etɛ—ni yɛ anɔkwale mli lɛ amɛji ŋulamiiaŋkwɛlɔi lɛ—ba saramɔ lɛ, no mli lɛ Yesu kɛ eweku lɛ bɛ kooloi atsũ lɛ mli dɔŋŋ. Be eshwie mli, ni weku lɛ yɛ shia diɛŋtsɛ mli. Ebaafee bo miishɛɛ akɛ ooole enɛ mli sane fitsofitso, yɛ nɔ ni ajɛ mumɔŋ aŋma yɛ Mateo 2:1, 11 lɛ mli. Obaanyɛ ona hu akɛ Biblia lɛ etsɔɔɔ ŋulamiiaŋkwɛlɔi abɔ ni amɛji. *

Yɛ Latin Amerika lɛ, nilelɔi etɛ lɛ yeɔ Santa Claus najiaŋ. Shi kɛlɛ, taakɛ eji yɛ shikpɔji krokomɛi anɔ lɛ, fɔlɔi babaoo kɛ tsobii toɔ amɛshia mli. Kɛkɛ lɛ, yɛ January 6 leebi lɛ, gbekɛbii lɛ taoɔ, oookɛɛ nɔ ni nilelɔi etɛ lɛ kɛba. Enɛ ji be ni mɛi ni hɔ̃ɔ tsobii kɛnáa shika, ni mɛi komɛi etsɔ bɔ ni gbɔmɛi ni hiɛ tsui kpakpa lɛ buɔ lɛ akɛ miishɛɛ nɔ ko kɛkɛ lɛ nɔ amɛná nii babaoo. Miishɛɛ ni mɛi babaoo yɔɔ yɛ nilelɔi etɛ lɛ ahe adesã lɛ he lɛ miilaaje, yɛ gbekɛbii bibii po atɛŋ. Eyɛ mli akɛ mɛi komɛi náaa he miishɛɛ akɛ mɛi komɛi náaa adesa nɛɛ he miishɛɛ moŋ, shi te aaafee tɛŋŋ ni mɔ ko akwɛ gbɛ akɛ mɛi komɛi baahiɛ miishɛɛ ko mli yɛ blema sane kɛ guɔyeli mli sɛɛnamɔ pɛ hewɔ?

Mra be mli Kristofoi lɛ yeee Blonya, loo Fɔmɔ Be lɛ. Ɛnsaiklopedia ko kɛɛ yɛ enɛ he akɛ: “Ayeee gbi jurɔ lɛ yɛ klɛŋklɛŋ afii oha Kristofoi a-Sɔlemɔ lɛ mli, ejaakɛ nifeemɔ ni Kristofoi fɛɛ kpɛlɛ nɔ ji gbɔmɛi krɛdɛɛi komɛi agbele he gbijurɔyeli shi jeee amɛfɔmɔ.” Biblia lɛ kɛ fɔmɔ gbi he gbijurɔyelii tsáa wɔŋjamɔ, shi jeee kɛ Nyɔŋmɔ anɔkwa jalɔi ahe.—Mateo 14:6-10.

Shi kɛlɛ, enɛ etsɔɔɔ akɛ ehe ehiaaa akɛ wɔɔkase nibii diɛŋtsɛ ni ba yɛ Nyɔŋmɔ Bi lɛ fɔmɔ be mli lɛ ni wɔkai. Anɔkwa saji ni yɔɔ Biblia lɛ mli lɛ haa mɛi ni sumɔɔ ni amɛfee Nyɔŋmɔ suɔmɔnaa nii lɛ náa sɛɛyoomɔ kɛ nikasemɔi ni he hiaa.

 Yesu Fɔmɔ Taakɛ Biblia lɛ Tsɔɔ

Obaanyɛ ona Yesu fɔmɔ he saji ni anyɛɔ akɛ he fɔ̃ɔ nɔ yɛ Mateo kɛ Luka Sanekpakpai lɛ amli. Amɛtsɔɔ akɛ bɔfo Gabriel tee oblayoo ko ni boteko gbalashihilɛ mli ni atsɛɔ lɛ Maria lɛ ŋɔɔ yɛ Galilea maŋ ni ji Nazaret lɛ mli. Mɛɛ shɛɛ sane ekɛyaha lɛ? “Naa, obaaná musu ni ooofɔ́ binuu, ni ooowo lɛ gbɛi akɛ Yesu. Eeetsɔ agbo, ni aaatsɛ lɛ Ŋwɛinyo lɛ bi, ni [Yehowa, NW] Nyɔŋmɔ aaaŋɔ etsɛ David maŋtsɛsɛi lɛ aha lɛ. Ni eeeye Yakob we lɛ nɔ maŋtsɛ kɛaatee naanɔ, ni emaŋtsɛyeli lɛ sɛɛ efoŋ.”—Luka 1:31-33.

Shɛɛ sane nɛɛ ha Maria hiɛ fee lɛ yaa. Akɛni eboteko gbalashihilɛ mli hewɔ lɛ, ekɛɛ akɛ: “Te aaafee tɛŋŋ ni enɛ aaaba mliŋ, akɛni mileee nuu nɛɛ?” Bɔfo lɛ to he akɛ: “Mumɔ krɔŋkrɔŋ aaaba onɔ, ni Ŋwɛinyo lɛ hewalɛ aaabahà onɔ, no hewɔ lɛ nakai bi krɔŋkrɔŋ lɛ hu ni ooofɔ́ lɛ, aaatsɛ́ lɛ Nyɔŋmɔ bi.” Beni Maria yɔse akɛ enɛ ji Nyɔŋmɔ suɔmɔnaa nii lɛ, ekɛɛ akɛ: “Naa, [Yehowa, NW] weyoo ji mi; ába mli aha mi yɛ owiemɔ lɛ naa!”—Luka 1:34-38.

Bɔfo ko wie naakpɛɛ fɔmɔ lɛ he sane etsɔɔ Yosef bɔni afee ni ekatse Maria gbala, nii ni etoɔ gbɛjianɔ ní efee beni ena akɛ yoo lɛ ená musu lɛ. Agbɛnɛ ekpɛlɛ nɔ akɛ ebaaŋɔ Nyɔŋmɔ Bi lɛ kwɛmɔ he gbɛnaa nii lɛ efɔ̃ enɔ.—Mateo 1:18-25.

Kɛkɛ ni akpɔ ko ni jɛ Kaisare Augusto ŋɔɔ lɛ nyɛ Yosef kɛ Maria nɔ koni amɛfã gbɛ kɛjɛ Nazaret yɛ Galilea kɛya Betlehem ni yɔɔ Yudea lɛ, ni ji amɛtsɛmɛi amaŋ koni ayakane amɛ. “Shi eba mli akɛ, beni amɛyɔɔ jɛi lɛ, egbii shɛ ni ebaafɔ́. Ni efɔ́ binuu, ekromɔ bi lɛ, ni eŋɔ mama ebala ehe, ni eŋɔ lɛ eŋmɛ kooloi aniyenii anɔ̃ mli, ejaakɛ amɛnaaa gbɛ yɛ gbɔiatoohe lɛ.”—Luka 2:1-7.

Luka 2:8-14 tsɔɔ nɔ ni nyiɛ sɛɛ kɛba lɛ mli, akɛ: “Ni tookwɛlɔi komɛi yɛ ŋa nɔ yɛ jɛi niiaŋ nɔŋŋ ni amɛmiishi kpe amɛmiibu amɛtooi ahe nyɔɔŋ. Ni naa, [Yehowa, NW] bɔfo ko badamɔ amɛmasɛi, ni [Yehowa, NW] anunyam kpɛ́ bɔle amɛ, ni amɛshe gbeyei naakpa. Ni bɔfo lɛ kɛɛ amɛ akɛ: Nyɛkashea gbeyei; ejaakɛ naa, mibagba nyɛ miishɛɛ sane kpele ni ji maŋ fɛɛ nɔ̃; akɛ ŋmɛnɛ afɔ́ walaherelɔ ni ji Kristo, Nuntsɔ lɛ, aha nyɛ yɛ David maŋ lɛŋ. Ni enɛ aaafee okadi aha nyɛ: nyɛaana abifao ni aŋɔ mama abala ehe, ni ekã kooloi aniyenii anɔ̃ mli. Ni trukaa lɛ ŋwɛi ta kpele bafata bɔfo lɛ he, ni amɛjie Nyɔŋmɔ yi amɛkɛɛ: Anunyam aha Nyɔŋmɔ yɛ ŋwɛi flooflo, ní hejɔlɛ aba shikpɔŋ lɛ nɔ, ní aná gbɔmɛi ahe tsuijurɔ!”

Ŋulamiiaŋkwɛlɔi Lɛ

Mateo amaniɛbɔɔ lɛ tsĩ tã akɛ ŋulamiiaŋkwɛlɔi jɛ Boka shɔŋŋ amɛba Yerusalem ni amɛbatao he ni afɔ́ Yudafoi a-Maŋtsɛ lɛ yɛ. Maŋtsɛ Herode ná enɛ he miishɛɛ waa—shi jeee kɛ jwɛŋmɔ kpakpa. “Eha amɛtee Betlehem ni ekɛɛ: Nyɛyaa ni nyɛyataoa abifao lɛ fitsofitso; shi kɛ nyɛna lɛ lɛ, nyɛbakɛɛa mi, koni mi hu maba ni mabajá lɛ.” Ŋulamiiaŋkwɛlɔi lɛ na gbekɛ lɛ ni “amɛfɛne amɛnibii anaa, ni amɛkekee lɛ nii: shika kɛ krɔbɔo kɛ mire.” Shi amɛkuuu amɛsɛɛ kɛyaaa Herode ŋɔɔ. “Ajie atsɔɔ amɛ yɛ wɔlamɔ mli akɛ amɛkaya Herode ŋɔɔ dɔŋŋ.” Nyɔŋmɔ ha bɔfo ko bɔ Yosef kɔkɔ yɛ jwɛŋmɔ ni Herode hiɛ lɛ he. Ni Yosef kɛ Maria kɛ amɛbi lɛ jo foi kɛtee Mizraim. No sɛɛ lɛ, bɔni afee ni Maŋtsɛ Herode yitsoŋwalɔ lɛ akpata Maŋtsɛ hee lɛ hiɛ lɛ, efã ni akpata gbekɛbii hii ni yɔɔ Betlehem niiaŋ lɛ ahiɛ. Mɛɛ gbekɛbii hii? Mɛi ni eye kɛjɛ afii enyɔ kɛbaa shi.—Mateo 2:1-16.

Mɛni Wɔbaanyɛ Wɔkase Kɛjɛ Nɔ ni Aŋma Afɔ̃ Shi lɛ Mli?

Ŋulamiiaŋkwɛlɔi ní tee saramɔ—ekɔɔɔ he eko bɔ ni amɛyibɔ ji lɛ—jáaa anɔkwa Nyɔŋmɔ lɛ. Biblia shishitsɔɔmɔ ni ji La Nueva Biblia Latinoamérica (1989 Nɔ̃) lɛ kɛɛ yɛ shishigbɛ niŋmaa ko mli akɛ: “Ŋkunyaayelɔi lɛ jeee maŋtsɛmɛi, shi moŋ mɛi ni kalaa kɛ okɔmfoi.” Amɛba ní amɛbakwɛ anɔkwale ní ŋulamii ahe nilee ní amɛtuu amɛhe amɛha lɛ ji lɛ kɛkɛ. Eji Nyɔŋmɔ miisumɔ ni etsɔɔ amɛ gbɛ kɛya gbekɛ lɛ ŋɔɔ kulɛ, abaatsɔɔ amɛ gbɛ tɛ̃ɛ kɛya jɛmɛ  diɛŋtsɛ ni ehe ebahiaŋ ni klɛŋklɛŋ lɛ amɛya Yerusalem kɛ Herode, ni ji maŋtsɛ lɛ shia. Yɛ sɛɛ mli lɛ, Nyɔŋmɔ kɛ ehe wo sane lɛ mli kɛtsake amɛgbɛ lɛ ni ekɛbu gbekɛ lɛ he.

Bei pii lɛ, atãa adesãi kɛkɔɔ nɛkɛ sane nɛɛ he yɛ Blonya be mli ni ehaaa otii ni he hiaa waa lɛ afee faŋŋ: ákɛ afɔ́ abifao nɛɛ koni ebatsɔ Maŋtsɛ kpanaa, taakɛ atswa he adafi atsɔɔ Maria kɛ tookwɛlɔi lɛ. Dabi, Yesu Kristo jeee abifao, loo gbekɛ po dɔŋŋ. Lɛ ji Nyɔŋmɔ Maŋtsɛyeli lɛ, ní etsɛŋ ni ebaajie nɔyelii fɛɛ ni teɔ shi woɔ Nyɔŋmɔ suɔmɔnaa nifeemɔ lɛ kɛya lɛ nɔ Maŋtsɛ, ni ebaatsu adesai anaagbai fɛɛ ahe nii. No ji Maŋtsɛyeli ni wɔsɔleɔ wɔbiɔ yɛ Nuntsɔ lɛ Sɔlemɔ lɛ mli lɛ.—Daniel 2:44; Mateo 6:9, 10.

Kɛtsɔ sane ni bɔfoi lɛ jaje amɛtsɔɔ tookwɛlɔi lɛ anɔ lɛ nɔ lɛ, wɔnaa akɛ hegbɛ kɛha yibaamɔ lɛ naa egbele kɛha mɔ fɛɛ mɔ ni miisumɔ ni ebo sanekpakpa lɛ he shɛɛ sane lɛ toi. Mɛi ni náa Nyɔŋmɔ nɔkpɛlɛmɔ lɛ batsɔmɔɔ ‘gbɔmɛi ni ená amɛhe tsuijurɔ.’ Toiŋjɔlɛ ni baaba jeŋ fɛɛ yɛ Yesu Kristo Maŋtsɛyeli lɛ shishi lɛ he gbɛkpamɔ ni yɔɔ miishɛɛ yɛ, shi esa akɛ gbɔmɛi asumɔ akɛ amɛbaafee Nyɔŋmɔ suɔmɔnaa nii. Ani Blonya be lɛ sa kɛha enɛ, ni ani ejieɔ nakai suɔmɔ lɛ kpo? Gbɔmɛi anɔkwafoi babaoo ni miisumɔ ni amɛnyiɛ Biblia lɛ sɛɛ lɛ nuɔ he akɛ hetoo lɛ yɛ faŋŋ.—Luka 2:10, 11, 14.

[Shishigbɛ niŋmaa]

[Akrabatsa ni yɔɔ baafa 4]

MƐI KOMƐI ANAA BAAKPƐ AMƐHE

Yɛ woloŋmalɔ Tom Flynn wolo ni ji The Trouble With Christmas lɛ mli lɛ, ewie hetooi ni enine shɛ nɔ beni ekɛ afii babaoo epɛi Blonya mli lɛ he akɛ:

“Kusumii babaoo ni ayeɔ yɛ Blonya mli ŋmɛnɛ lɛ ná amɛshishijee kɛjɛ wɔŋjalɔi ni hi shi dani Kristofoi abe lɛ je shishi lɛ akusumii amli. Shihilɛ, bɔlɛnamɔ, kɛ ŋulamiiaŋkwɛmɔ he saji komɛi yɛ mli ni kɛ́ ŋmɛnɛŋmɛnɛ beaŋ bii ni yɔɔ nilee, ní sumɔɔ kusum lɛ ná amɛle he ni ena eshishijee kɛjɛ lɛ, amɛbaakpa sɛɛnyiɛmɔ.”—Baafa 19.

Beni Flynn kɛ odaseyelii babaoo efi esane lɛ sɛɛ lɛ, eku sɛɛ eba sane titri lɛ nɔ ekoŋŋ, akɛ: “Blonya he saji ni yɔɔ naakpɛɛ waa lɛ ateŋ ekome ji bɔ ni emli nibii babaoo ni afeɔ lɛ jeee Kristofoi anifeemɔ lɛ. Kɛji wɔjie nibii ni afeɔ dani Kristofoi abe lɛ shɛ lɛ kɛjɛ mli lɛ, nɔ ni shwɛɔ lɛ mli babaoo ba yɛ Kristofoi abe lɛ sɛɛ, ni ejeee Kristofoi anifeemɔi kwraa.”—Baafa 155.

[Mfoniri ni yɔɔ baafa 7]

Yesu fɔmɔ he adafitswaa lɛ je nɔ ni ebaatsu wɔsɛɛ akɛ Nyɔŋmɔ Maŋtsɛ ni ehala lɛ lɛ shishi