Nyɛdamɔa Shi akɛ Mɛi ni Eye Emuu kɛ Nɔmimaa ni Ma Shi Shiŋŋ
Nyɛdamɔa Shi akɛ Mɛi ni Eye Emuu kɛ Nɔmimaa ni Ma Shi Shiŋŋ
“Daa nɛɛ ekɛ mɔdɛŋbɔɔ hiɛɔ sɔlemɔi amli kɛhaa nyɛ, koni yɛ naagbee lɛ nyɛdamɔa shi akɛ mɛi ni eye emuu, kɛ nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli.”—KOLOSEBII 4:12, NW.
1, 2. (a) Mɛni ji nɔ ni mɛi ni yɔɔ sɛɛ lɛ yɔse yɛ mra be mli Kristofoi lɛ ahe? (b) Kolosebii awolo lɛ jieɔ suɔmɔ ni miishɛɛ yɔɔ mli kpo yɛ mɛɛ gbɛ nɔ?
YESU sɛɛnyiɛlɔi lɛ amii shɛɔ amɛnanemɛi jálɔi lɛ ahe waa diɛŋtsɛ. Tertullian (afii ohai enyɔ kɛ etɛ Ŋ.B. lɛ mli niŋmalɔ) lɛ wie mlihilɛ ni amɛjie lɛ kpo amɛtsɔɔ awusai, ohiafoi, kɛ mɛi ni egbɔlɔ lɛ he. Nakai suɔmɔ nifeemɔ he odaseyelii lɛ ná mɛi ni heee yeee lɛ anɔ hewalɛ aahu akɛ amɛteŋ mɛi komɛi wie Kristofoi lɛ ahe akɛ, ‘Nyɛkwɛa bɔ ni amɛsumɔɔ amɛhe.’
2 Kolosebii awolo lɛ jieɔ suɔmɔ ni miishɛɛ yɔɔ mli ni tamɔ nɛkɛ ni bɔfo Paulo kɛ ehefatalɔ Epafra yɔɔ kɛha nyɛmimɛi hii kɛ yei ni yɔɔ Kolose lɛ kpo. Paulo ŋma amɛ akɛ: “Daa nɛɛ [Epafra] kɛ mɔdɛŋbɔɔ hiɛɔ sɔlemɔi amli kɛhaa nyɛ, koni yɛ naagbee lɛ nyɛdamɔa shi akɛ mɛi ni eye emuu, kɛ nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli.” Yɛ afi 2001 nɛɛ mli lɛ, Yehowa Odasefoi kɛ wiemɔi ni yɔɔ Kolosebii 4:12 lɛ baafee amɛ afi ŋmalɛ, akɛ: ‘Nyɛdamɔa shi shiŋŋ akɛ mɛi ni yɔɔ Nyɔŋmɔ suɔmɔnaa nii lɛ fɛɛ mli hemɔkɛyeli.’
3. Mɛɛ nibii enyɔ Epafra sɔle yɛ he?
3 Obaanyɛ ona akɛ Epafra sɔlemɔi kɛha esuɔlɔi lɛ hiɛ fãi enyɔ: (1) akɛ ‘yɛ naagbee lɛ amɛdamɔ shi ni amɛye emuu’ kɛ (2) amɛdamɔ shi kɛ ‘nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli.’ Akɛ amaniɛbɔɔ nɛɛ fata Ŋmalɛi lɛ ahe kɛha wɔsɛɛnamɔ. No hewɔ lɛ, bi ohe akɛ, ‘Mɛni ehe hiaa ni mi diɛŋtsɛ lɛ mafee koni madamɔ shi ni maye emuu kɛ nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli? Ni yɛ be mli ni mifeɔ nakai lɛ, mɛni baajɛ mli aba?’ Nyɛhaa wɔkwɛa.
Bɔɔ Mɔdɛŋ ‘Odamɔ Shi ni Oye Emuu’
4. Ehe miihia ni Kolosebii lɛ aye “emuu” yɛ mɛɛ shishinumɔ naa?
4 Epafra miisumɔ waa koni “yɛ naagbee lɛ” emumɔŋ nyɛmimɛi hii kɛ yei ni yɔɔ Kolose lɛ ‘adamɔ shi ni amɛye emuu.’ Wiemɔ ni Paulo kɛtsu nii yɛ biɛ akɛ ‘aye emuu’ lɛ baanyɛ aná shishinumɔ ni ji áfee pɛpɛɛpɛ, ádara kɛmɔ shi, loo ahi kɛwula shi. (Mateo 19:21; Hebribii 5:14; Yakobo 1:4, 25) Ekolɛ ole akɛ mɔ ni abaptisiɔ lɛ akɛ Yehowa Odasefoi lɛ ateŋ mɔ kome lɛ diɛŋtsɛ etsɔɔɔ akɛ eji Kristofonyo ni eda kɛmɔ shi. Paulo ŋma wolo eyaha Efesobii ni yɔɔ Kolose anaigbɛ lɛ, ákɛ nɔkwɛlɔi kɛ tsɔɔlɔi lɛ fɛɛ abɔ mɔdɛŋ ni amɛye amɛbua ‘kɛyashi beyinɔ ni mɔ fɛɛ mɔ aaashɛ Nyɔŋmɔ bi lɛ nɔ hemɔkɛyeli kɛ ehe nilee ekomefeemɔ lɛ he ni amɛfee nuu ni eye emuu yɛ Kristo dalɛ muu lɛ susumɔ naa.’ Paulo wo Kristofoi lɛ hewalɛ yɛ he kroko hu akɛ yɛ “jwɛŋmɔ gbɛfaŋ lɛ, nyɛfea nyɛhe mɛi ni edara.”—Efesobii 4:8-13; 1 Korintobii 14:20.
5. Te wɔɔfee tɛŋŋ wɔha emuu ni wɔɔye lɛ afee oti ni ma wɔhiɛ?
5 Kɛji akɛ mɛi ni yɔɔ Kolose lɛ ateŋ mɛi komɛi darako lolo yɛ mumɔŋ, loo amɛhiko kɛwulako shi lɛ, ehe miihia ni amɛkɛ no afee oti ni ma amɛhiɛ. Ani esaaa akɛ enɛ nɔŋŋ hu feɔ anɔkwale ŋmɛnɛ? Kɛji akɛ afii nyɔŋmai abɔ nɛ ni abaptisi wɔ aloo yɛ nyɛsɛɛ nɛɛ lɛ, ani wɔnyɛɔ wɔnaa faŋŋ akɛ wɔtee wɔhiɛ yɛ wɔjwɛŋmɔŋ nyɛmɔ kɛ susumɔi amli? Ani wɔsusuɔ Biblia mli shishitoo mlai ahe dani wɔkpɛɔ wɔyiŋ? Ani saji ni kɔɔ Nyɔŋmɔ kɛ asafo lɛ he lɛ miiná wɔshihilɛ nɔ hewalɛ babaoo, moŋ fe nibii ni baa trukaa lɛ? Wɔnyɛŋ wɔfee gbɛi fɛɛ ni ekolɛ wɔɔtsɔ nɔ wɔjie emuu ni wɔye loo dalɛ ni tamɔ nɛkɛ kpo lɛ he nɔkwɛmɔnɔ yɛ biɛ, shi susumɔ nɔkwɛmɔnii enyɔ ko he.
6. Mɛni mli nɛkɛ mɔ ko baanyɛ aya ehiɛ yɛ, kɛbɛŋkɛ emuu ni eeeye he, taakɛ Yehowa ji lɛ?
6 Klɛŋklɛŋ nɔkwɛmɔnɔ: Ŋɔɔ lɛ akɛ wɔdara yɛ shihilɛi ni haa wɔnáa mɛi ahe jwɛŋmɔ fɔŋ loo wɔteɔ shi wɔwoɔ mɛi ni jɛ weku kroko mli, amɛjɛ maŋ kroko nɔ, loo kpokpaa kroko nɔ lɛ mli. Wɔle akɛ Nyɔŋmɔ jeee mɛi ahiɛaŋkwɛlɔ ni esaaa akɛ wɔfeɔ nakai. (Bɔfoi lɛ Asaji 10:14, 15, 34, 35) Wɔyɛ aŋkroaŋkroi ni jɛ shihilɛi krokomɛi amli yɛ wɔ asafo loo kpokpaa lɛ mli, no hewɔ lɛ wɔkɛ amɛ yɔɔ. Ni kɛlɛ, nɛgbɛ wɔnáa gbɔmɛi ni jeee wɔmaŋ bii nɛɛ ahe jwɛŋmɔ loo henumɔ fɔŋ kɛyashɛɔ? Ani wɔfeɔ wɔnii ‘tamɔ mɛi ni tutuaa mɔ,’ ni wɔhe feɔ oya kɛnáa gbɔmɛi ni jɛ wiemɔ loo maŋ kroko nɔ lɛ ahe jwɛŋmɔ fɔŋ kɛji amɛteŋ mɔ ko tɔ̃ wɔnɔ yɛ gbɛ bibioo po nɔ? Bi ohe akɛ, ‘Ani ehe miihia ni maya mihiɛ babaoo koni mikɛná su ni haaa Nyɔŋmɔ akwɛ mɛi ahiɛaŋ lɛ eko?’
7. Ni mɔ ko aaaye emuu akɛ Kristofonyo lɛ biɔ ni ená mɛɛ jwɛŋmɔ yɛ mɛi krokomɛi ahe?
7 Nɔkwɛmɔnɔ ni ji enyɔ: Taakɛ Filipibii 2:3 tsɔɔ lɛ, ‘wɔkaŋmɛ mligbalamɔi loo yaka anunyam taomɔ gbɛ, shi moŋ wɔkɛ heshibaa jwɛŋmɔ abubua wɔnanemɛi fe wɔ diɛŋtsɛ wɔhe.’ Te wɔyaa nɔ yɛ enɛ mli wɔhaa tɛŋŋ? Mɔ fɛɛ mɔ yɛ gbɔjɔmɔi kɛ nyɛmɔi. Kɛji akɛ tsutsu ko lɛ wɔhe feɔ oya kɛ mɛi krokomɛi agbɔjɔmɔi akadimɔ lɛ, ani wɔtee hiɛ jogbaŋŋ yɛ enɛ mli, ni wɔkpaaa gbɛ kwraa dɔŋŋ akɛ amɛaaye “emuu”? (Yakobo 3:2) Agbɛnɛ, nɔ ni he hiaa babaoo fe tsutsu lɛ, ani wɔnyɛɔ wɔnaa—aloo wɔtaoɔ po akɛ wɔɔna—gbɛ̀i ni mɛi krokomɛi anɔ kwɔlɔ yɛ mli loo amɛhi yɛ mli lɛ? ‘Esa akɛ makpɛlɛ nɔ akɛ nɛkɛ nyɛmi yoo nɛɛ hi fe mi yɛ tsuishitoo mli.’ ‘Nɛkɛ mɔ nɛɛ jieɔ hemɔkɛyeli ni mli wa kpo fe mi.’ ‘Yɛ anɔkwale mli lɛ eji tsɔɔlɔ kpakpa fe mi.’ ‘Nyɛmi yoo nɛɛ nyɛɔ eyeɔ emlifu nɔ fe bɔ ni mifeɔ.’ Ekolɛ ehe miihia ni Kolosebii lɛ ateŋ mɛi komɛi aná hiɛyaa yɛ enɛ mli. Ani wɔ hu nakai nɔŋŋ?
8, 9. (a) Mɛɛ shishinumɔ naa Epafra sɔle kɛha Kolosebii lɛ koni ‘amɛdamɔ shi’ ni amɛye emuu lɛ? (b) Ni ‘aaadamɔ shi ni aye emuu’ lɛ tsɔɔ mɛni yɛ wɔsɛɛ be he?
8 Epafra sɔle koni Kolosebii lɛ ‘adamɔ shi akɛ mɛi ni eye emuu.’ Eyɛ faŋŋ akɛ Epafra miisɔle aha Nyɔŋmɔ akɛ, yɛ he ni Kolosebii lɛ eye emuu, amɛdara, amɛhi kɛwula shi akɛ Kristofoi kɛyashɛ lɛ, ‘amɛdamɔ shi,’ loo amɛhi shi nakai.
9 Wɔnyɛŋ wɔkɛɛ akɛ mɔ fɛɛ mɔ ni batsɔɔ Kristofonyo, mɔ ni eda yɛ mumɔŋ po lɛ, baakã he aya nɔ nakai. Yesu kɛɛ akɛ, Nyɔŋmɔ bi ko ni ji ŋwɛibɔfo ‘damɔɔɔ anɔkwale lɛ mli.’ (Yohane 8:44) Ni Paulo kai Korintobii lɛ yɛ mɛi komɛi ni tsutsu ko lɛ amɛsɔmɔ Yehowa kɛyashi be ko shi amɛŋmɛɛ he lɛ ahe. Ebɔ nyɛmimɛi ni akɛ mumɔ efɔ amɛ mu lɛ kɔkɔ akɛ: “Mɔ ni susuɔ akɛ edamɔ shi lɛ akwɛ ehe ni ahi koni ekagbee shi.” (1 Korintobii 10:12) Enɛ kɛ hewalɛ woɔ sɔlemɔ lɛ akɛ “yɛ naagbee lɛ” Kolosebii lɛ ‘adamɔ shi ni amɛye emuu’ lɛ mli. Kɛji akɛ amɛná amɛye emuu, ni amɛdara kɛwula shi pɛ lɛ, ehe baahia ni amɛya nɔ nakai, ni amɛkakpale kɛmiiya sɛɛsɛɛ, ni amɛtɔ biti, loo amɛkpalaŋ kɛtee sɛɛ. (Hebribii 2:1; 3:12; 6:6; 10:39; 12:25) Kɛkɛ lɛ ‘amɛbaaye emuu’ yɛ amɛsaramɔ kɛ naagbee nɔkpɛlɛmɔ gbi lɛ nɔ.—2 Korintobii 5:10; 1 Petro 2:12.
10, 11. (a) Mɛɛ nɔkwɛmɔnɔ Epafra fee kɛha wɔ yɛ sɔlemɔ he? (b) Yɛ nɔ ni Epafra fee lɛ kɛ gbeekpamɔ naa lɛ, mɛɛ faishitswaa obaasumɔ ni ofee?
10 Wɔtsɔ hiɛ wɔsusu bɔ ni ehe hiaa ni wɔtsĩ mɛi krokomɛi atã ni wɔsɔle wɔha amɛ lɛ he momo, ni wɔwie nɔ̃ tuuntu yɛ wɔ nibimɔ akɛ Yehowa aye abua amɛ, eshɛje amɛmii, ejɔɔ amɛ, ni ekɛ emumɔ krɔŋkrɔŋ lɛ aha amɛ lɛ he. Nakai Epafra sɔlemɔi kɛha Kolosebii lɛ tamɔ. Ni wɔbaanyɛ—ni yɛ anɔkwale mli lɛ esa akɛ—wɔná ŋaawoo ni sɛɛnamɔ yɔɔ he kɛjɛ nakai wiemɔi lɛ amli ni tsɔɔ saji ni wɔkɛfɔ̃ɔ Yehowa hiɛ yɛ sɔlemɔ mli ni kɔɔ wɔ diɛŋtsɛ wɔhe lɛ mli. Ŋwanejee ko bɛ he akɛ, esa akɛ wɔbi Yehowa yelikɛbuamɔ koni yɛ naagbee lɛ wɔ aŋkroaŋkroi lɛ ‘wɔdamɔ shi ni wɔye emuu kwraa.’ Ani osɔleɔ nakai?
11 Mɛni hewɔ otsĩii oshihilɛ lɛ tã yɛ sɔlemɔ mli? Okɛ Nyɔŋmɔ awie yɛ he ni otee hiɛ kɛyashɛ yɛ ‘emuu ni oooye kwraa,’ ní ooohi kɛwula shi, ní oooda lɛ he. Kpa lɛ fai ni eye ebua bo koni oyoo hei ni ehe hiaa lolo ni oda yɛ mumɔŋ yɛ mli lɛ he. (Lala 17:3; 139:23, 24) Ŋwanejee ko bɛ he akɛ, oyɛ hei komɛi ni tamɔ nɛkɛ. Kɛkɛ lɛ, yɛ nɔ najiaŋ ni onijiaŋ aaaje wui yɛ enɛ he lɛ, feemɔ enɛ faŋŋ ni okpa Nyɔŋmɔ fai yɛ he, titri lɛ, koni eye ebua bo ni oya ohiɛ. Feemɔ enɛ fe shikome. Yɛ anɔkwale mli lɛ, mɛni hewɔ otswaaa ofai shi akɛ, obaasɔle babaoo yɛ otsi ni baa nɛɛ mli koni ‘yɛ naagbee lɛ odamɔ shi akɛ mɔ ni eye emuu kwraa.’ Ni too gbɛjianɔ koni otsu he nii babaoo yɛ be mli ni osusuɔ afi ŋmalɛ lɛ he lɛ. Yɛ osɔlemɔi amli lɛ, susumɔ sui ni ekolɛ oyɔɔ ni baaha okpale kɛya sɛɛ, etɔ bo, aloo okpalaŋ kɛjɛ Nyɔŋmɔ sɔɔmɔ kɛ bɔ ni ooofee okwa nakai feemɔ lɛ he.—Efesobii 6:11, 13, 14, 18.
Nyɛsɔlea Kɛhaa Nɔmimaa ni Ma Shi Shiŋŋ
12. Mɛni hewɔ “nɔmimaa ni ma shi shiŋŋ” he hiaa Kolosebii lɛ titri nakai lɛ?
12 Epafra sɔle hu kɛha nɔ kroko ni he hiaa, ni ji akɛ, kɛji akɛ yɛ naagbee lɛ aaana Kolosebii lɛ akɛ amɛdamɔ shi akɛ mɛi ni Nyɔŋmɔ ekpɛlɛ amɛnɔ. Nakai nɔŋŋ ehe hiaa wɔ hu. Mɛni ji no? Esɔle koni amɛdamɔ shi “kɛ nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli.” Nɔ ni ebɔle amɛhe ji hemɔkɛyeli kwamɔ, jeŋ nilee ni fiteɔ mɔ, ni ekomɛi shishiuɔ mɔ ejaakɛ efeɔ tamɔ nɔ ni eji anɔkwa jamɔ. Ákɛ nɔkwɛmɔnɔ lɛ, anyɛ amɛnɔ koni amɛye gbii krɛdɛɛi komɛi kɛ ŋmãahilɛ loo okpɔlɔŋmɛɛ, taakɛ be ko lɛ ehe hiaa yɛ Yudafoi ajamɔ mli lɛ. Apasa tsɔɔlɔi gbala jwɛŋmɔ kɛtee ŋwɛibɔfoi anɔ, nakai mumɔi ni yɔɔ hewalɛ ni be ko lɛ akɛ amɛ tsu nii koni amɛkɛ Mla lɛ abaha Mose lɛ. Susumɔ nɔnyɛɛ ni tamɔ nɛkɛ ni akɛbaa onɔ lɛ he okwɛ! Susumɔi ni teɔ shi woɔ ehe ni futuɔ mɔ jwɛŋmɔ lɛ babaoo yɛ.—Galatabii 3:19; Kolosebii 2:8, 16-18.
13. Mɛni ni Kolosebii lɛ baayoo baanyɛ aye abua amɛ, ni enɛ baanyɛ aye abua wɔ yɛ mɛɛ gbɛ nɔ?
13 Paulo te shi wo susumɔ nɛɛ kɛtsɔ nii ni Yesu Kristo tsu lɛ nɔmimaa nɔ. “Bɔ ni nyɛhere Kristo Yesu, Nuntsɔ lɛ, atuu lɛ, nyɛnyiɛa yɛ emli, ní nyɛshishifãi amɔmɔ shi, ni amamɔ nyɛ yɛ enɔ, ní nyɛfĩ shi yɛ hemɔkɛyeli lɛ mli, taakɛ bɔ nɔŋŋ ni atsɔ̃ɔ nyɛ lɛ.” Hɛɛ, ehe miihia ni (Kolosebii lɛ kɛ wɔ hu) wɔná nɔmimaa ni ma shi shiŋŋ yɛ Kristo nitsumɔ yɛ Nyɔŋmɔ yiŋtoo mli kɛ wɔshihilɛ mli lɛ he. Paulo tsɔɔ mli akɛ: “Emli Nyɔŋmɔ obɔyimɔ lɛ fɛɛ hiɔ yɛ gbɔmɔtso su mli; ni nyɛyimɔ obɔbɔ yɛ emli, lɛ mɔ ni ji onukpayeli kɛ hegbɛ fɛɛ yitso lɛ.”—Kolosebii 2:6-10.
14. Mɛni hewɔ hiɛnɔkamɔ ji nɔ ko pɔtɛɛ kɛha mɛi ni yɔɔ Kolose lɛ?
14 Kolosebii lɛ ji Kristofoi ni akɛ mumɔ efɔ amɛ mu. Amɛyɛ hiɛnɔkamɔ ni yɔɔ srɔto, wala yɛ ŋwɛi, ni amɛyɛ nɔ fɛɛ nɔ ni amɛaadamɔ nɔ amɛha nakai hiɛnɔkamɔ lɛ aya nɔ akpɛ́. (Kolosebii 1:5) Eji “Nyɔŋmɔ suɔmɔnaa nii” akɛ amɛná nɔmimaa ni ma shi shiŋŋ yɛ anɔkwale ni amɛ hiɛnɔkamɔ lɛ ji lɛ he. Ani esa akɛ amɛteŋ mɔ ko yiŋ afee lɛ kɔshikɔshi yɛ nakai hiɛnɔkamɔ lɛ he? Dabi kwraa! Ani esa akɛ efee srɔto ŋmɛnɛ kɛha mɛi fɛɛ ni yɔɔ shikpɔŋ nɔ paradeiso shihilɛ he gbɛkpamɔ ni Nyɔŋmɔ kɛha lɛ? Dabi kwraa! Eyɛ faŋŋ akɛ nakai hiɛnɔkamɔ ni ji anɔkwale lɛ ji “Nyɔŋmɔ suɔmɔnaa nii” lɛ fã. Agbɛnɛ susumɔ nɛkɛ sanebimɔi nɛɛ ahe: Kɛji akɛ oobɔ mɔdɛŋ ni ofee “asafo babaoo” ni baaje “amanehulu kpeteŋkpele lɛ” mli shweshweeshwe lɛ ateŋ mɔ kome lɛ, belɛ te ohiɛnɔkamɔ lɛ ji nɔ ni yɔɔ pɔtɛɛ ha tɛŋŋ? (Kpojiemɔ 7:9, 14) Ani eji “nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli” lɛ fã?
15. Mɛɛ saji ni Paulo to naa hiɛnɔkamɔ fata he lɛ?
15 Kɛji akɛ wɔmiiwie “hiɛnɔkamɔ” he lɛ, wɔtsɔɔɔ nɔ ko ni ashweɔ kɛkɛ, aloo yiŋsusumɔ folo ko kɛkɛ. Wɔbaanyɛ wɔna enɛ kɛjɛ saji otii ni ato naa ni Paulo tsɔ hiɛ ekɛha Romabii lɛ amli. Nɔ fɛɛ nɔ ni etsĩ tã yɛ saji ni eto naa lɛ amli lɛ kɔɔ sane ni nyiɛ sɛɛ lɛ he loo ekɛ mɔ boteɔ no mli. Gbalamɔ ojwɛŋmɔ kɛya he ni Paulo kɛ “hiɛnɔkamɔ” wo yɛ esusumɔ lɛ mli lɛ nɔ: “Wɔshwãa yɛ amanehului amli hu, ejaakɛ wɔle akɛ amanehulu lɛ tsɛ́ɔ tsuishiŋmɛɛ kɛbaa, ni tsuishiŋmɛɛ lɛ hu tsɛ́ɔ [nɔkpɛlɛmɔ shihilɛ, (NW)] kɛbaa; ni [nɔkpɛlɛmɔ shihilɛ, (NW)] lɛ tsɛ́ɔ nɔhiɛkamɔ kɛbaa; ni nɔhiɛkamɔ lɛ wooo mɔ hiɛgbele; ejaakɛ átsɔ Mumɔ krɔŋkrɔŋ ni aŋɔha wɔ lɛ nɔ afɔse Nyɔŋmɔ suɔmɔ awo wɔtsuii amli.”—Romabii 5:3-5.
16. Mɛɛ hiɛnɔkamɔ oná, beni okase Biblia mli anɔkwale lɛ?
16 Beni Yehowa Odasefoi kɛ Biblia mli shɛɛ sane lɛ baha bo klɛŋklɛŋ kwraa lɛ, ekolɛ anɔkwale ko gbala ojwɛŋmɔ, tamɔ shihilɛ mli ni gbohii lɛ yɔɔ loo gbohiiashitee lɛ. Kɛha mɛi pii lɛ, shishinumɔ hee ni amɛbayɔse ji shikpɔŋ nɔ shihilɛ he hiɛnɔkamɔ ni baanyɛ aba ni damɔ Biblia lɛ nɔ lɛ. Kaimɔ be mli ni onu nakai tsɔɔmɔ lɛ klɛŋklɛŋ kwraa lɛ. Mɛɛ hiɛnɔkamɔ ni yɔɔ naakpɛɛ nɛ—hela kɛ gbɔlɛ baafee nɔ ni bɛ dɔŋŋ, obaanyɛ ohi shi daa ni oná oninenaa nitsumɔ mli ŋɔɔmɔ, ni toiŋjɔlɛ baahi gbɔmɔ kɛ kooloi ateŋ! (Jajelɔ 9:5, 10; Yesaia 65:17-25; Yohane 5:28, 29; Kpojiemɔ 21:3, 4) Onine shɛ hiɛnɔkamɔ ni yɔɔ naakpɛɛ nɔ!
17, 18. (a) Te fee tɛŋŋ ni saji ni Paulo to naa ekɛha Romabii lɛ yagbe naa yɛ hiɛnɔkamɔ nɔ lɛ? (b) Mɛɛ hiɛnɔkamɔ nɛkɛ atsɔɔ yɛ Romabii 5:4, 5 lɛ, ni ani oyɛ enɛ eko lo?
17 Beni be shwieɔ mli lɛ, ekolɛ okɛ shitee-kɛ-woo loo yiwaa kpe. (Mateo 10:34-39; 24:9) Shi yɛ nyɛsɛɛ bei nɛɛ amli po lɛ, ahà Odasefoi ni yɔɔ maji srɔtoi amli lɛ anibii loo ányɛ amɛnɔ koni amɛtsɔmɔ abobalɔi. Áyi amɛteŋ mɛi komɛi, áshɔ̃ amɛ Biblia kasemɔ woji kɛjɛ amɛdɛŋ, aloo amɛtsɔmɔ mɛi ni adafitswaa woji amli amaniɛbɔi maleɔ amɛhe. Bɔ fɛɛ bɔ ni shitee-kɛ-woo ni okɛkpe lɛ ji ha lɛ, taakɛ Romabii 5:3 kɛɔ lɛ, omli baanyɛ afili bo yɛ amanehulu lɛ mli, ni nɔ ni jɛ mli ba lɛ hi naakpa. Taakɛ Paulo ŋma lɛ, amanehulu lɛ tsɛ́ tsuishiŋmɛɛ kɛba omli. Kɛkɛ ni tsuishiŋmɛɛ lɛ kɛ nɔkpɛlɛmɔ shihilɛ ba. Ole akɛ oofee nɔ ni ja, oofee Nyɔŋmɔ suɔmɔnaa nii, no hewɔ lɛ oná nɔmimaa akɛ oyɛ enɔkpɛlɛmɔ. Yɛ Paulo wiemɔi lɛ anaa lɛ, onu he akɛ oyɛ “nɔkpɛlɛmɔ shihilɛ” mli. Beni Paulo yaa nɔ lɛ, eŋma akɛ ‘nɔkpɛlɛmɔ shihilɛ lɛ kɛ hiɛnɔkamɔ baa.’ Enɛ baatamɔ nɔ ko ni yɔɔ naakpɛɛ fioo. Mɛni hewɔ Paulo to ‘hiɛnɔkamɔ’ naa efata he kɛtee sɛɛ nakai lɛ? Ani hiɛnɔkamɔ jeee nɔ ni oyɔɔ jeeŋmɔ, dani onu sanekpakpa lɛ he klɛŋklɛŋ kwraa lɛ?
18 Eyɛ faŋŋ akɛ, jeee shihilɛ ni yeɔ emuu he hiɛnɔkamɔ ni wɔnuɔ he kɛjɛɔ shishijee lɛ he Paulo wieɔ lɛ. Nɔ ni ewieɔ he lɛ yaa shɔŋŋ fe nakai; emli kwɔ waa, ni ekanyaa mɔ waa. Kɛ́ wɔŋmɛ wɔtsui shi yɛ anɔkwayeli mli ni wɔkɛ nakai feemɔ yɔse akɛ wɔyɛ Nyɔŋmɔ nɔkpɛlɛmɔ lɛ, enɛ náa wɔnɔ hewalɛ aahu akɛ ekɛ nɔ ko fataa wɔ shishijee hiɛnɔkamɔ lɛ he ni ewajeɔ lɛ. Hiɛnɔkamɔ ni wɔná lɛ bafeɔ nɔ ni yɔɔ pɔtɛɛ babaoo agbɛnɛ, emaa shi shiŋŋ, ebafeɔ mɔ diɛŋtsɛ nɔ̃. Hiɛnɔkamɔ ni mli wa nɛɛ kpɛ́ɔ waa agbɛnɛ. Egbɛɔ eshwãa wɔ gbɔmɔtso muu lɛ fɛɛ mli, wɔ fãji amli fɛɛ. ‘Ni hiɛnɔkamɔ lɛ wooo mɔ hiɛgbele; ejaakɛ átsɔ mumɔ krɔŋkrɔŋ ni aŋɔha wɔ lɛ nɔ afɔse Nyɔŋmɔ suɔmɔ awo wɔtsuii amli.’
19. Te esa akɛ ohiɛnɔkamɔ lɛ afee odaa sɔlemɔi lɛ fã aha tɛŋŋ?
19 Epafra sɔlemɔ ni hiɛdɔɔ yɔɔ mli ji akɛ, nɔ ni kã enyɛmimɛi hii kɛ yei ni yɔɔ Kolose lɛ ahiɛ lɛ aya nɔ aná amɛnɔ hewalɛ ni amɛyiŋ atsɔ yɛ he, kɛ “nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli.” Nyɛhaa wɔteŋ mɔ fɛɛ mɔ ayaa Nyɔŋmɔ ŋɔɔ nakai nɔŋŋ daa yɛ wɔ hiɛnɔkamɔ lɛ he. Okɛ ohiɛnɔkamɔ ni kɔɔ jeŋ hee lɛ he lɛ afata oteemɔŋ sɔlemɔi ahe. Wiemɔ bɔ ni oshweɔ enɛ waa lɛ he otsɔɔ Yehowa, kɛ nɔmimaa ni ma shi shiŋŋ akɛ ebaaba. Kpa lɛ fai ni eye ebua bo koni eha onɔmimaa lɛ mli akwɔ ni emli alɛɛ. Taakɛ Epafra sɔle akɛ Kolosebii lɛ aná “nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli” lɛ, feemɔ nakai nɔŋŋ. Feemɔ lɛ shii abɔ.
20. Kɛ akɛto he lɛ, kɛji akɛ mɛi fioo ko gbala amɛhe shi kɛjɛ Kristofoi agbɛ lɛ nɔ lɛ, mɛni hewɔ ehe ehiaaa ni enɛ aje mɔ nijiaŋ wui lɛ?
20 Esaaa akɛ ohaa anɔkwale ni eji akɛ jeee mɛi fɛɛ damɔ shi akɛ mɛi ni eye emuu kɛ nɔmimaa ni ma shi shiŋŋ lɛ miigbala ojwɛŋmɔ loo eeje onijiaŋ wui. Mɛi komɛi yeŋ omanye, amɛbaatsɔ amɛhe kɛya afã, aloo amɛbaaŋmɛɛ he kwraa. Eba lɛ nakai yɛ mɛi ni bɛŋkɛ Yesu kpaakpa lɛ ateŋ, ebɔfoi lɛ. Shi beni Yuda batsɔ sɛɛgbɛtsɔɔlɔ lɛ, ani bɔfoi krokomɛi lɛ fee shɔ̃ɔ loo amɛkpá? Dabi kwraa! Petro kɛ Lala 109:8 tsu nii ni ekɛtsɔɔ akɛ mɔ kroko baaŋɔ Yuda gbɛhe lɛ. Ahala mɔ kroko ato enajiaŋ, ni mɛi ni yeɔ Nyɔŋmɔ anɔkwa lɛ tee nɔ yɛ ekãa naa yɛ amɛshiɛmɔ nitsumɔ lɛ mli. (Bɔfoi lɛ Asaji 1:15-26) Amɛtswa amɛfai shi akɛ amɛbaadamɔ shi akɛ mɛi ni eye emuu kɛ nɔmimaa ni ma shi shiŋŋ.
21, 22. Mɛɛ shishinumɔ naa abaayoo oshidaamɔ akɛ mɔ ni eye emuu kɛ nɔmimaa ni ma shi shiŋŋ lɛ yɛ?
21 Obaanyɛ oná nɔmimaa ni ma shi shiŋŋ akɛ, shi ni odamɔɔ akɛ mɔ ni eye emuu kɛ nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli lɛ efeŋ nɔ ni anaaa. Abaana, ni hiɛ baasɔ. Shi namɛi baafee nakai?
22 Ojogbaŋŋ, onyɛmimɛi hii kɛ yei, ni le bo ni sumɔɔ bo lɛ baayoo. Kɛji akɛ mɛi ni fa lɛ po kɛ wiemɔi etsɔɔɔ enɛ lɛ, nɔ ni baajɛ mli aba lɛ baatamɔ nɔ ni wɔkaneɔ yɛ 1 Tesalonikabii 1:2-6 lɛ, akɛ: “Wɔdaa Nyɔŋmɔ shi daa yɛ nyɛ fɛɛ nyɛ hewɔ, ni wɔtsĩɔ nyɛ tã yɛ wɔsɔlemɔi lɛ amli, ni wɔfɔ̃ko, ni wɔkaiɔ nyɛhemɔkɛyeli nitsumɔ lɛ kɛ nyɛsuɔmɔ mɔdɛŋbɔɔ lɛ kɛ wɔ-Nuntsɔ Yesu Kristo he hiɛnɔkamɔ mli tsuishitoo lɛ yɛ Nyɔŋmɔ kɛ wɔtsɛ lɛ hiɛ . . . akɛ wɔsanekpakpa lɛ baaa nyɛŋɔɔ yɛ wiemɔ mli kɛkɛ, shi moŋ yɛ hewalɛ kɛ Mumɔ krɔŋkrɔŋ kɛ nɔmimaa babaoo mli, . . . Ni nyɛ lɛ, nyɛtsɔmɔ wɔkɛ Nuntsɔ lɛ kaselɔi.” Kristofoi anɔkwafoi ni ebɔleo lɛ baanu he nakai nɔŋŋ, yɛ be mli ni amɛnaa akɛ ‘nyɛdamɔ shi akɛ mɛi ni eye emuu, kɛ nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli’ lɛ.—Kolosebii 1:23.
23. Mɛni esa akɛ efee ofaishitswaa, yɛ afi nɛɛ mli?
23 Nakai pɛpɛɛpɛ eji, akɛ oŋwɛi Tsɛ lɛ baayoo ni ebaaŋɔɔ enaa. Ná hekɛnɔfɔɔ yɛ no he. Mɛni hewɔ? Ejaakɛ odamɔ shi akɛ mɔ ni eye emuu kɛ nɔmimaa ni ma shi shiŋŋ “yɛ Nyɔŋmɔ suɔmɔnaa nii fɛɛ mli.” Paulo ŋma hewalɛwoo wiemɔi eyaha Kolosebii lɛ yɛ bɔ ni esa akɛ ‘amɛnyiɛ bɔ ni sa Yehowa ni asa ehiɛ kwraa’ lɛ he. (Kolosebii 1:10) Hɛɛ, adesai ni yeee emuu baanyɛ asa ehiɛ kwraa. Onyɛmimɛi hii kɛ yei ni jɛ Kolose lɛ fee nakai. Kristofoi ni ebɔleo bianɛ lɛ miifee nakai. Bo hu obaanyɛ ofee nakai! No hewɔ lɛ, yɛ afi nɛɛ mli lɛ, ha odaa gbi sɔlemɔi lɛ kɛ odaa gbi nifeemɔi lɛ aye odase akɛ otswa ofai shi akɛ ‘yɛ naagbee lɛ obaadamɔ shi akɛ mɔ ni eye emuu, kɛ nɔmimaa ni ma shi shiŋŋ yɛ Nyɔŋmɔ suɔmɔnaa nii fɛɛ mli.’
Ani Obaanyɛ Okai?
• Ni ‘ooodamɔ shi akɛ mɔ ni eye emuu’ lɛ kɔɔ mɛni he?
• Mɛni nibii ni kɔɔ bo diɛŋtsɛ ohe esa akɛ okɛwo sɔlemɔ mli?
• Taakɛ awo he ŋaa yɛ Romabii 5:4, 5 lɛ, mɛɛ hiɛnɔkamɔ nɛkɛ osumɔɔ ni oná?
• Wɔ nikasemɔ lɛ ekanya bo koni okɛ mɛɛ oti ama ohiɛ yɛ afi nɛɛ mli?
[Nikasemɔ lɛ he Sanebimɔi]
[Mfoniri ni yɔɔ baafa 20]
Epafra sɔle koni enyɛmimɛi lɛ adamɔ shi akɛ mɛi ni eye emuu kɛ nɔmimaa ni ma shi shiŋŋ yɛ Kristo kɛ amɛhiɛnɔkamɔ lɛ he
[Mfonirii ni yɔɔ baafa 23]
Mɛi krokomɛi akpekpei abɔ hu yɛ ohiɛnɔkamɔ ni ma shi shiŋŋ kɛ nɔmimaa nɛɛ eko