Te Suɔmɔ ni Oyɔɔ lɛ Mli Lɛɛ Ha Tɛŋŋ?
Te Suɔmɔ ni Oyɔɔ lɛ Mli Lɛɛ Ha Tɛŋŋ?
“Suɔmɔ onaanyo tamɔ bɔ ni osumɔɔ bo diɛŋtsɛ ohe.”—MATEO 22:39.
1. Kɛji wɔsumɔɔ Yehowa lɛ, mɛni hewɔ esa akɛ wɔhu wɔsumɔ wɔnaanyo lɛ?
BENI abi Yesu nɔ ni ji kitai lɛ amli nɔ ni fe fɛɛ lɛ, eha hetoo akɛ: “Suɔmɔ [Yehowa, “NW”], o-Nyɔŋmɔ lɛ, kɛ otsui muu lɛ fɛɛ kɛ osusuma muu lɛ fɛɛ kɛ ojwɛŋmɔ muu lɛ fɛɛ.” Kɛkɛ ni ewie kita ni ji enyɔ ni tamɔ klɛŋklɛŋ nɔ lɛ he akɛ: “Suɔmɔ onaanyo tamɔ bɔ ni osumɔɔ bo diɛŋtsɛ ohe.” (Mateo 22:37, 39) Hɛɛ, naanyo suɔmɔ ji Kristofoi akadimɔ nii. Lɛɛlɛŋ, kɛji wɔsumɔɔ Yehowa lɛ, esa akɛ wɔsumɔ wɔnaanyo hu. Mɛni hewɔ? Ejaakɛ wɔjieɔ suɔmɔ ni wɔyɔɔ kɛha Nyɔŋmɔ lɛ kpo kɛtsɔ e-Wiemɔ lɛ toiboo nɔ, ni e-Wiemɔ lɛ fãa wɔ ní wɔsumɔ wɔnaanyo. No hewɔ lɛ, kɛji wɔsumɔɔɔ wɔnyɛmimɛi hii kɛ yei lɛ, no lɛ suɔmɔ ni wɔyɔɔ kɛha Nyɔŋmɔ lɛ nyɛŋ afee anɔkwa nɔ̃.—Romabii 13:8; 1 Yohane 2:5; 4:20, 21.
2. Mɛɛ suɔmɔ esa akɛ wɔná wɔha wɔnaanyo?
2 Beni Yesu kɛɛ akɛ esa akɛ wɔsumɔ wɔnaanyo lɛ, no mli lɛ eeewie nɔ ko ni fe naanyobɔɔ kɛkɛ he. No mli lɛ eewie suɔmɔ ni yɔɔ srɔto yɛ nɔ ni yɔɔ wekui loo nuu kɛ yoo teŋ lɛ he. No mli lɛ eewie suɔmɔ ni Yehowa yɔɔ kɛha etsuji ni ejɔɔ amɛhe nɔ, ní amɛ hu amɛyɔɔ kɛha lɛ lɛ he. (Yohane 17:26; 1 Yohane 4:11, 19) Yudanyo woloŋmalɔ ko—ní Yesu yɔse akɛ eewie yɛ nilee mli lɛ—kɛ Yesu kpã gbee akɛ esa akɛ suɔmɔ kɛha Nyɔŋmɔ lɛ ajɛ “tsui fɛɛ kɛ nilee fɛɛ kɛ susuma fɛɛ kɛ nyɛmɔ fɛɛ mli.” (Marko 12:28-34) Esane lɛ ja. Suɔmɔ ni Kristofonyo náa kɛha Nyɔŋmɔ kɛ naanyo lɛ kɔɔ wɔhenumɔi kɛ wɔjwɛŋmɔ he. Wɔnuɔ he yɛ wɔtsui mli, ni wɔjwɛŋmɔ kudɔɔ lɛ.
3. (a) Mɛɛ gbɛ nɔ Yesu tsɔɔ “mlatsɔɔlɔ ko” akɛ esa akɛ esusu enaanyo he yɛ gbɛ ni mli kwɔ waa nɔ yɛ? (b) Yesu abɛbua lɛ kɔɔ Kristofoi ahe ŋmɛnɛ yɛ mɛɛ gbɛ nɔ?
3 Taakɛ Luka bɔ amaniɛ lɛ, beni Yesu kɛɛ akɛ esa akɛ wɔsumɔ wɔnaanyo lɛ, “mlatsɔɔlɔ ko” bi lɛ akɛ: “Namɔ ji minaanyo?” Yesu kɛ abɛbua ko ha hetoo. Ayi nuu ko, aju lɛ, ni ashi lɛ ní nɔ̃ enyɔ̃ enɔ yɛ gbɛ lɛ toi. Klɛŋklɛŋ lɛ, osɔfo ko baho ni no sɛɛ lɛ Levinyo. Amɛ fɛɛ amɛshi lɛ. Naagbee lɛ, Samarianyo ko baho, ena nuu ní epila lɛ, ni ejie mlihilɛ babaoo kpo etsɔɔ lɛ. Te mɛi etɛ nɛɛ ateŋ mɔ ni ji nuu ní epila lɛ naanyo? Hetoo lɛ yɛ faŋŋ. (Luka 10:25-37) Ekolɛ Mlatsɔɔlɔ lɛ naa baakpɛ ehe akɛ eeenu ni Yesu miikɛɛ akɛ Samarianyo baanyɛ afee naanyo kpakpa fe osɔfo kɛ Levinyo. Eyɛ faŋŋ akɛ, Yesu miiye eebua nakai nuu lɛ koni esumɔ enaanyo yɛ gbɛ ni yaa shɔŋŋ nɔ. Kristofoi hu sumɔɔ mɔ yɛ nɛkɛ gbɛ nɔ. Susumɔ mɛi fɛɛ ni amɛjieɔ amɛsuɔmɔ kpo amɛtsɔɔ amɛ lɛ he okwɛ.
Suɔmɔ yɛ Weku lɛ Mli
4. Nɛgbɛ Kristofonyo jieɔ suɔmɔ kpo yɛ klɛŋklɛŋ?
4 Kristofoi sumɔɔ amɛweku mli bii—ŋamɛi sumɔɔ amɛwumɛi, wumɛi sumɔɔ amɛŋamɛi, fɔlɔi sumɔɔ amɛbii. (Jajelɔ 9:9; Efesobii 5:33; Tito 2:4) Eji anɔkwale akɛ suɔmɔ yɛ wekui babaoo mli. Shi kɛlɛ, amaniɛbɔi ni kɔɔ gbalamlitsemɔ, hefatalɔ niseniianiifeemɔ, kɛ gbekɛbii ni akpooɔ amɛ loo afeɔ amɛ niseniianii lɛ he lɛ tsɔɔ akɛ weku lɛ yɛ nɔnyɛɛ shishi ŋmɛnɛ, ni ekolɛ henumɔi ni yɔɔ weku lɛ mli lɛ mli waaa bɔ ni ebaanyɛ efee lɛ ekome. (2 Timoteo 3:1-3) Bɔni afee ni Kristofoi aye omanye diɛŋtsɛ yɛ amɛweku shihilɛ mli lɛ, suɔmɔ ni Yehowa kɛ Yesu kɛhaa lɛ he nitsumɔ miihia amɛ.—Efesobii 5:21-27.
5. Namɔ fɔlɔi kɛ amɛhe fɔ̃ɔ enɔ kɛha yelikɛbuamɔ ni amɛkɛtsɔse amɛbii lɛ, ni mɛni ejɛ mli kɛbaha amɛteŋ mɛi babaoo?
5 Fɔlɔi ni ji Kristofoi buɔ amɛbii lɛ akɛ nɔ ko ni jara wa ni Yehowa etuu ewo amɛdɛŋ, ni amɛkɛ amɛhe fɔ̃ɔ enɔ koni eye ebua amɛ ni amɛkɛtsɔse amɛ. (Lala 127:3-5; Abɛi 22:6) Kɛtsɔ nɛkɛ gbɛ nɔ lɛ, amɛnáa Kristofoi asuɔmɔ, ni eyeɔ ebuaa amɛ koni amɛbu amɛbii lɛ ahe kɛjɛ hewalɛi ni fiteɔ nii ni gbekɛbii baanyɛ agbee mli lɛ he. Enɛ hewɔ lɛ, fɔlɔi ni ji Kristofoi babaoo ená miishɛɛ ni tamɔ nɔ ni nyɛ ko ni yɔɔ Netherlands ná lɛ mli ŋɔɔmɔ lɛ. Beni ekwɛ ni abaptisi ebi nuu—ni ji mɛi aŋkroaŋkroi 575 ni abaptisi yɛ Netherlands nyɛsɛɛ afi lɛ ateŋ mɔ kome lɛ—eŋma nɔ ni nyiɛ sɛɛ nɛɛ: “Amrɔ nɛɛ, mɔdɛŋbɔɔ kɛ nyɛmɔ babaoo ni mifite yɛ afii 20 ni eho lɛ mli lɛ he eba sɛɛnamɔ. Amrɔ nɛɛ, mihiɛ ekpa be kɛ hewalɛ—kɛ agbɛnɛ hu dɔlɛ, mɔdɛŋbɔɔ, kɛ awerɛho—lɛ fɛɛ nɔ.” Kwɛ miishɛɛ ni eyɔɔ akɛ ebi lɛ ejɛ lɛ diɛŋtsɛ esuɔmɔ mli ehala akɛ ebaasɔmɔ Yehowa. Shiɛlɔi ayibɔ ni fe fɛɛ, ni ji 31,089 ni bu amɛshiɛmɔ nitsumɔ lɛ he akɔntaa yɛ Netherlands nyɛsɛɛ afi lɛ ateŋ mɛi komɛi ji mɛi babaoo ni kase suɔmɔ ni amɛaaná amɛha Yehowa lɛ kɛjɛ amɛfɔlɔi adɛŋ.
6. Kristofoi asuɔmɔ baanyɛ awaje gbalashihilɛ ekomefeemɔ lɛ yɛ mɛɛ gbɛ nɔ?
6 Paulo tsɛ suɔmɔ akɛ “emuuyeli kpãa,” ni ebaanyɛ ebaa gbalashihilɛ ekomefeemɔ po yi yɛ jaramɔ bei amli. (Kolosebii 3:14, 18, 19; 1 Petro 3:1-7) Beni Yehowa Odasefoi kɛ nuu ko ni yɔɔ Rurutu, ni ji ŋshɔkpɔ bibioo ko ni kɛ Tahiti jɛkɛmɔ feɔ kilomitai 700 lɛ je Biblia lɛ kasemɔ shishi lɛ, eŋa te shi ewo enɛ waa diɛŋtsɛ. Yɛ naagbee lɛ, emɔmɔ gbekɛbii lɛ, ni eshi lɛ etee ni eyahi Tahiti. Shi kɛlɛ, ejie suɔmɔ kpo etsɔɔ lɛ kɛtsɔ shika ni ekɛmajeɔ lɛ be fɛɛ be, kɛ tɛlifoŋ ni etswaa ni ebiɔ kɛji nɔ ko he miihia lɛ loo gbekɛbii lɛ lo lɛ nɔ. No hewɔ lɛ, efee nɔ fɛɛ nɔ ni eeenyɛ koni etsu e-Kristofoi agbɛnaa nii lɛ he nii. (1 Timoteo 5:8) Esɔle be fɛɛ be koni ekɛ eweku lɛ asaa afee ekome ekoŋŋ, ni naagbee mli lɛ eŋa lɛ ku esɛɛ. Beni yoo lɛ ku esɛɛ eba lɛ, nuu lɛ kɛ lɛ ye yɛ “suɔmɔ, tsuishiŋmɛɛ kɛ mlijɔlɛ” mli. (1 Timoteo 6:11) Yɛ afi 1998 mli lɛ, abaptisi lɛ, ni yɛ sɛɛ mli lɛ, ená miishɛɛ babaoo beni eŋa kpɛlɛ akɛ akɛ lɛ akase Biblia lɛ. Nakai nikasemɔ lɛ ji 1,351 ni afee yɛ shikpɔŋkuku ni yɔɔ Tahiti nitsumɔhe nine lɛ shishi nyɛsɛɛ afi lɛ ateŋ ekome.
7. Taakɛ nuu ko ni yɔɔ Germany lɛ tsɔɔ lɛ, mɛni waje egbalashihilɛ lɛ?
7 Yɛ Germany lɛ, nuu ko te shi wo miishɛɛ ni eŋa yɔɔ yɛ Biblia mli anɔkwale lɛ he lɛ, ni ehe eye akɛ Yehowa Odasefoi miitao ni amɛlaka lɛ. Shi sɛɛ mli lɛ, eŋma wolo kɛyaha Odasefonyo ni ba eŋa ŋɔɔ klɛŋklɛŋ lɛ, akɛ: “Miida bo shi akɛ oha miŋa le Yehowa Odasefoi. Klɛŋklɛŋ lɛ, mitsui ye ejaakɛ minu nibii gbohii babaoo yɛ amɛhe. Shi amrɔ nɛɛ, kpeei ní mikɛ miŋa yaa lɛ eha mina bɔ ni mitɔ̃ kwraa. Mile akɛ miikase anɔkwale lɛ, ni enɛ ewaje wɔgbalashihilɛ lɛ waa diɛŋtsɛ.” Yehowa Odasefoi 162,932 ni yɔɔ Germany—kɛ mɛi 1,773 ni yɔɔ ŋshɔkpɔi ni yɔɔ Tahiti nitsumɔhe lɛ shishi lɛ—ateŋ mɛi komɛi ji wekui babaoo ni efee ekome yɛ suɔmɔ ni Nyɔŋmɔ gbeyeishemɔ yɔɔ mli lɛ mli.
Suɔmɔ Kɛha Wɔnyɛmimɛi Kristofoi Lɛ
8, 9. (a) Namɔ tsɔɔ wɔ koni wɔsumɔ wɔnyɛmimɛi, ni mɛni suɔmɔ tsirɛɔ wɔ koni wɔfee? (b) Okɛ nɔkwɛmɔnɔ ni tsɔɔ bɔ ni suɔmɔ baanyɛ aye abua nyɛmimɛi koni amɛye amɛbua amɛhe lɛ aha.
8 Paulo kɛɛ Tesalonika Kristofoi lɛ akɛ: “Nyɔŋmɔ etsɔɔ nyɛ akɛ nyɛsumɔsumɔɔ nyɛhe.” (1 Tesalonikabii 4:9) Hɛɛ, mɛi ni ‘Yehowa etsɔɔ amɛ nii’ lɛ sumɔɔ amɛhe. (Yesaia 54:13) Suɔmɔ ni amɛyɔɔ lɛ jeɔ kpo yɛ nifeemɔ mli, taakɛ Paulo tsɔɔ mli beni ekɛɛ akɛ: “Nyɛtsɔa suɔmɔ mli nyɛsɔmɔsɔmɔa nyɛhe.” (Galatabii 5:13; 1 Yohane 3:18) Ákɛ nɔkwɛmɔnɔ lɛ, amɛfeɔ enɛ beni amɛyasara nyɛmimɛi hii kɛ yei ni he yeɔ lɛ, beni amɛwoɔ mɛi ni ehao lɛ hewalɛ lɛ, kɛ beni amɛyeɔ amɛbuaa mɛi ni egbɔjɔ lɛ. (1 Tesalonikabii 5:14) Wɔ anɔkwa Kristofoi asuɔmɔ lɛ yeɔ ebuaa ni ehaa wɔmumɔŋ paradeiso lɛ daa.
9 Yɛ Ancón Asafo—ni ji asafoi 544 ni yɔɔ Ecuador lɛ ateŋ ekome mli lɛ—nyɛmimɛi lɛ jie suɔmɔ ni amɛyɔɔ lɛ kpo yɛ gbɛ ni anyɛɔ atsuɔ he nii nɔ. Shika he naagba ha amɛnitsumɔ je amɛdɛŋ, no hewɔ lɛ, shiɛlɔi lɛ ekomɛi kpɛ amɛyiŋ akɛ amɛbaabua shika naa kɛtsɔ niyenii ni amɛaahɔɔ amɛha wolɛi ni yɔɔ jɛmɛ beni amɛjɛ gbɛkɛ wuo amɛba shia lɛ nɔ. Mɔ fɛɛ mɔ kɛ ehe wo mli, ni gbekɛbii lɛ fata he. Esa akɛ amɛje shishi nyɔɔŋ ŋmɛlɛ 1:00 bɔni afee ni niyenii lɛ abe leebi 4:00 mli beni wolɛi lɛ eba. Nyɛmimɛi lɛ jaa shika ní amɛnáa lɛ yɛ bɔ ni mɔ fɛɛ mɔ hiamɔ nii ji lɛ naa. Nakai yelikɛbuamɔ lɛ jie anɔkwa Kristofoi asuɔmɔ kpo.
10, 11. Te wɔɔfee tɛŋŋ wɔjie suɔmɔ kpo wɔtsɔɔ nyɛmimɛi ni wɔleee amɛ diɛŋtsɛ lɛ?
10 Shi kɛlɛ, jeee Kristofoi ni wɔle amɛ jogbaŋŋ lɛ pɛ wɔsumɔɔ. Bɔfo Petro kɛɛ akɛ: ‘Nyɛsumɔa nyɛnyɛmimɛi akuu lɛ fɛɛ.’ (1 Petro 2:17) Wɔsumɔɔ wɔnyɛmimɛi hii kɛ yei lɛ fɛɛ ejaakɛ amɛ fɛɛ amɛji wɔnanemɛi Yehowa Nyɔŋmɔ jálɔi. Jaramɔ bei baanyɛ aha wɔná hegbɛ ni wɔkɛjie suɔmɔ nɛɛ kpo. Ákɛ nɔkwɛmɔnɔ lɛ, yɛ afi 2000 sɔɔmɔ afi lɛ mli lɛ, nu afua kpata nii ahiɛ yɛ Mozambique, ni maŋ ta ni yaa nɔ yɛ Angola lɛ eha mɛi babaoo miiye ohia. Shihilɛi nɛɛ esa nyɛmimɛi 31,725 ni yɔɔ Mozambique kɛ mɛi 41,222 ni yɔɔ Angola lɛ he. No hewɔ lɛ, Odasefoi ni yɔɔ South Africa lɛ kɛ nibii babaoo maje koni akɛba nɔnyɛɛ ni amɛnyɛmimɛi ni yɔɔ nakai shikpɔji lɛ anɔ lɛ yɔɔ mli lɛ shi. Suɔmɔ mli ni amɛjɛ amɛkɛ “amɛnɔtekemɔ” lɛ yaha nyɛmimɛi ni ehia amɛ lɛ jie suɔmɔ ni amɛyɔɔ lɛ kpo.—2 Korintobii 8:8, 13-15, 24.
11 Wɔnaa suɔmɔ hu yɛ be mli ni nyɛmimɛi ni yɔɔ maji babaoo nɔ lɛ tsuɔ onia koni akɛma Maŋtsɛyeli Asai kɛ Kpeei Asai yɛ shikpɔji ni bɛ nɔ ko tsɔ lɛ anɔ lɛ. Enɛ he nɔkwɛmɔnɔ ji Solomon Islands. Eyɛ mli akɛ basabasafeemɔi babaoo etee nɔ yɛ Solomon Islands yɛ nyɛsɛɛ afi ni ho lɛ mli moŋ, shi amɛná shiɛlɔi ayifalɛ ni tee hiɛ oha mlijaa 6, ni amɛyifalɛ yashɛ mɛi 1,697. Amɛto gbɛjianɔ koni amɛma Kpee Asa. Eyɛ mli akɛ ŋshɔkpɔ lɛ nɔ bii babaoo miijo foi kɛmiishi maŋ lɛ mli moŋ, shi nyɛmimɛi ni kɛ amɛhe eha jɛ Australia ba ni amɛbaye amɛbua kɛma. Naagbee mli lɛ ehe bahia ni mɛi ni kɛ amɛhe eha lɛ ashi kɛya, shi amɛtsɔse nyɛmimɛi ni yɔɔ jɛmɛ lɛ kɛgbe tsũ lɛ faneshi lɛ naa dani amɛtee. Akɛ asa lɛ akulashiŋ ni akɛ dade efee lɛ jɛ Australia kɛba, ni abaagbe tsũ fɛfɛo ni asɔmɔɔ yɛ mli nɛɛ naa—yɛ be mli ni tsũi babaoo mamɔ shi ní ashi—ni ebaafee Yehowa gbɛi lɛ yijiemɔ kɛ nyɛmimɛi asuɔmɔ lɛ he odaseyeli.
Taakɛ Nyɔŋmɔ Ji lɛ, Wɔsumɔɔ Je Lɛ
12. Te wɔfeɔ tɛŋŋ wɔkaseɔ Yehowa yɛ bɔ ni wɔkɛ mɛi ni bɛ wɔhemɔkɛyeli lɛ mli lɛ yeɔ lɛ mli?
12 Ani wɔsumɔɔ wɔweku kɛ wɔnyɛmi pɛ? Dabi, jeee be mli ni wɔji “Nyɔŋmɔ kaselɔi.” Yesu kɛɛ akɛ: “Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.” (Efesobii 5:1; Yohane 3:16, wɔma efã ko nɔ mi.) Wɔsumɔɔ mɛi fɛɛ taakɛ Yehowa Nyɔŋmɔ ji lɛ—ni mɛi ni kɛ wɔ ehiɛɛɛ hemɔkɛyeli kome lɛ fata he. (Luka 6:35, 36; Galatabii 6:10) Yɛ enɛ gbɛfaŋ titri lɛ, wɔshiɛɔ Maŋtsɛyeli lɛ he sanekpakpa lɛ ni wɔgbaa mɛi krokomɛi Nyɔŋmɔ suɔmɔ kpele ní eyɔɔ kɛha amɛ lɛ he sane. Enɛ baanyɛ aha mɔ fɛɛ mɔ ni baabo toi lɛ aná yiwalaheremɔ.—Marko 13:10; 1 Timoteo 4:16.
13, 14. Mɛɛ niiashikpamɔi komɛi yɔɔ ni tsɔɔ bɔ ni nyɛmimɛi ni tsɔ shihilɛ ni mli wawai amli po lɛ jie suɔmɔ kpo amɛtsɔɔ mɛi ni jeee Odasefoi lɛ?
13 Susumɔ gbɛgbalɔi krɛdɛɛi ejwɛ ni yɔɔ Nepal lɛ he ni okwɛ. Aha amɛ nitsumɔ yɛ maŋ lɛ wuoyi-anaigbɛ, ni afii enumɔ ni eho nɛ lɛ, amɛjie suɔmɔ ni amɛyɔɔ lɛ kpo kɛtsɔ tsuishitoo ni amɛkɛye odase yɛ maŋ lɛ kɛ akrowai ni ebɔle he kɛkpe lɛ mli lɛ nɔ. Bɔni afee ni amɛtsu amɛshikpɔŋkuku lɛ fɛɛ mli nii lɛ, bei pii lɛ amɛkɛ baisikel fãa gbɛ ŋmɛlɛtswai babaoo yɛ kɔɔyɔŋ dɔlɛ ni fe digrii celsius 40 nɔ. Amɛsuɔmɔ kɛ “ekpakpafeemɔ mli tsuishiŋmɛɛ” lɛ wo yibii kpakpai beni ato asafo woloŋ nikasemɔ kuu shishi yɛ akrowai lɛ ateŋ ekome mli lɛ. (Romabii 2:7) Yɛ March 2000 mli lɛ, mɛi 32 babo maŋshiɛmɔ ni kpokpaa nɔkwɛlɔ ni basara amɛ lɛ ha lɛ toi. Nyɛsɛɛ afi lɛ, Nepal ná shiɛlɔi ayifalɛ 430—ni ji oha mlijaa 9 nɔyaa. Eyɛ faŋŋ akɛ, Yehowa miijɔɔ ekãa kɛ suɔmɔ ni nyɛmimɛi ni yɔɔ nakai shikpɔŋ lɛ nɔ lɛ yɔɔ lɛ nɔ.
14 Yɛ Colombia lɛ, be kukuoo gbɛgbalɔi krɛdɛɛi tee shiɛmɔ yɛ Wayuu Indianbii lɛ ateŋ. Bɔni afee ni amɛnyɛ amɛfee enɛ lɛ, esa akɛ amɛkase wiemɔ hee, shi awo miishɛɛ ni suɔmɔ yɔɔ mli ni amɛná lɛ he nyɔmɔ beni yɛ nugbɔ ni naa wa ni nɛ lɛ fɛɛ sɛɛ lɛ, mɛi 27 ba maŋshiɛmɔ lɛ shishi lɛ. Nakai ekãa ni suɔmɔ yɔɔ mli ni gbɛgbalɔi lɛ jie lɛ kpo lɛ fata he ni eha Colombia náa nɔyaa oha mlijaa 5 kɛ shiɛlɔi ayifalɛ 107,613. Yɛ Denmark lɛ, nyɛmi yoo onukpa ko miitao ni egba mɛi krokomɛi sanekpakpa lɛ he sane, shi enyɛɛɛ enyiɛ. Akɛni enijiaŋ ejeee wui hewɔ lɛ, etsɔ woloŋmaa nɔ ekɛ mɛi ni yɔɔ he miishɛɛ lɛ gba sane. Amrɔ nɛɛ, ekɛ mɛi 42 gbaa sane ni efeɔ Biblia mli nikasemɔi 11. Efata shiɛlɔi 14,885 ni bu amɛshiɛmɔ nitsumɔ lɛ he akɔntaa yɛ Denmark nyɛsɛɛ afi lɛ ahe.
Nyɛsumɔa Nyɛhenyɛlɔi
15, 16. (a) Te Yesu kɛɛ akɛ esa akɛ wɔsuɔmɔ lɛ mli alɛɛ aha tɛŋŋ? (b) Te nyɛmimɛi ni sɔ kã amɛnɔ lɛ kɛ mɔ ko ni folɔ Yehowa Odasefoi anaa yɛ gbɛ ni ejaaa nɔ lɛ ye yɛ suɔmɔ mli amɛha tɛŋŋ?
15 Yesu kɛɛ Mlatsɔɔlɔ lɛ akɛ abaanyɛ abu Samarianyo akɛ naanyo. Yɛ Yesu Gɔŋ nɔ Shiɛmɔ lɛ mli lɛ, ewie kɛshɛ shɔŋŋ beni ekɛɛ akɛ: “Nyɛnu akɛ, akɛɛ akɛ: ‘Suɔmɔ onaanyo,’ ni onyɛ̃ ohenyɛlɔ. Shi mi lɛ, miikɛɛ nyɛ akɛ: Nyɛsumɔa nyɛhenyɛlɔi, nyɛjɔɔa mɛi ni lomɔɔ nyɛ, nyɛfea mɛi ni nyɛ̃ɔ nyɛ lɛ ekpakpa, ni nyɛsɔlea nyɛhaa mɛi ni haoɔ nyɛ ni amɛwaa nyɛ yi lɛ; koni nyɛtsɔmɔ nyɛtsɛ ni yɔɔ ŋwɛi lɛ bii.” (Mateo 5:43-45) Kɛji mɔ ko te shi ewo wɔ po lɛ, wɔbɔɔ mɔdɛŋ ni ‘wɔkɛ ekpakpafeemɔ aye efɔŋ nɔ kunim.’ (Romabii 12:19-21) Kɛ eeehi lɛ, wɔgbaa lɛ wɔnibii ni jara wa fe fɛɛ, ni ji anɔkwale lɛ he sane.
16 Yɛ Ukraine lɛ, sane ko ni je kpo yɛ Kremenchuk Herald adafitswaa wolo lɛ mli lɛ wie Yehowa Odasefoi ahe akɛ kuu ko ni he yɔɔ oshara. Hiɛdɔɔ yɛ enɛ he ejaakɛ yɛ Europa lɛ, mɛi komɛi wieɔ Yehowa Odasefoi ahe yɛ nɛkɛ gbɛ nɔ bɔni afee ni amɛwo mɛi hewalɛ akɛ esa akɛ atsĩ Odasefoi lɛ anitsumɔ lɛ naa. No hewɔ lɛ, atee niŋmalɔ lɛ ŋɔɔ ni ayakɛɛ lɛ koni eŋma wolo koni ekɛjaje sane lɛ. Ekpɛlɛ, shi saji ni eŋma lɛ tsɔɔ akɛ saji ni ewie he tsutsu lɛ damɔ anɔkwalei komɛi anɔ. No hewɔ lɛ, nyɛmimɛi ni sɔ kã amɛnɔ lɛ tee eŋɔɔ ekoŋŋ ni amɛkɛ lɛ yawie nibii babaoo he. Yɛ naagbee lɛ, woloŋmalɔ lɛ yɔse akɛ klɛŋklɛŋ sane lɛ ejaaa, ni eŋma wolo ko ni ekɛfo mli. Ye ní akɛ lɛ ye yɛ faŋŋ kɛ mlihilɛ mli lɛ ji gbɛ ni suɔmɔ yɔɔ mli ni akɛtsu nakai shihilɛ lɛ he nii, ni ewo yibii kpakpai.
Te Wɔɔfee Tɛŋŋ Wɔná Suɔmɔ?
17. Mɛni tsɔɔ akɛ jeee be fɛɛ be ebaafee mlɛo akɛ wɔkɛ mɛi krokomɛi aaaye yɛ suɔmɔ mli lɛ?
17 Kɛ́ afɔ́ abifao lɛ, efɔlɔi lɛ sumɔɔ lɛ amrɔ nɔŋŋ. Jeee be fɛɛ be wɔjɛɔ henumɔ mli wɔkɛ onukpai yeɔ yɛ suɔmɔ mli. Eka shi faŋŋ akɛ, enɛ hewɔ ni Biblia lɛ kɛɔ wɔ shii abɔ akɛ wɔsumɔ wɔhe lɛ—eji nɔ ko ni esa akɛ wɔtsu he nii. (1 Petro 1:22; 4:8; 1 Yohane 3:11) Beni Yesu kɛɛ akɛ esa akɛ wɔkɛ wɔnyɛmimɛi ahe ake amɛ “shii kpawo toi nyɔŋmai kpawo” lɛ, no mli lɛ ele akɛ abaaka wɔsuɔmɔ lɛ. (Mateo 18:21, 22) Paulo hu wo wɔ hewalɛ koni “wɔnanaa wɔha wɔhe.” (Kolosebii 3:12, 13) Ebɛ naakpɛɛ akɛ akɛɔ wɔ akɛ: “Nyɛdia suɔmɔ sɛɛ”! (1 Korintobii 14:1) Te wɔɔfee tɛŋŋ wɔfee enɛ?
18. Mɛni baaye ebua wɔ ni wɔná suɔmɔ wɔha mɛi krokomɛi?
18 Klɛŋklɛŋ lɛ, wɔbaanyɛ wɔha suɔmɔ ni wɔyɔɔ kɛha Yehowa Nyɔŋmɔ lɛ ahi wɔjwɛŋmɔ mli be fɛɛ be. Nɛkɛ suɔmɔ nɛɛ ji nɔ ko ni mli wa ni baaha wɔsumɔ wɔnanemɛi. Mɛni hewɔ? Ejaakɛ kɛji wɔfee nakai lɛ, esaa wɔ ŋwɛi Tsɛ lɛ he yɛ gbɛ kpakpa nɔ ni ekɛ woo kɛ yijiemɔ bahaa lɛ. (Yohane 15:8-10; Filistibii 1:9-11) Nɔ ni ji enyɔ lɛ, wɔbaanyɛ wɔbɔ mɔdɛŋ ni wɔkwɛ nii taakɛ Yehowa kwɛɔ lɛ. Be fɛɛ be ni wɔbaafee esha lɛ, wɔfeɔ wɔshiɔ Yehowa; shi kɛlɛ, ekɛkeɔ wɔ yɛ bei babaoo mli ni eyaa nɔ esumɔɔ wɔ. (Lala 86:5; 103:2, 3; 1 Yohane 1:9; 4:18) Kɛ wɔná Yehowa jwɛŋmɔ lɛ, ebaaha wɔsumɔ mɛi krokomɛi ni wɔkɛ nɔ ni amɛfeɔ amɛshiɔ wɔ lɛ baake amɛ. (Mateo 6:12) Nɔ ni ji etɛ lɛ, wɔbaanyɛ wɔkɛ mɛi krokomɛi aye taakɛ bɔ ni wɔbaasumɔ ni amɛkɛ wɔ aye lɛ. (Mateo 7:12) Akɛni wɔyeee emuu hewɔ lɛ, bei pii lɛ eshaifaa he hiaa wɔ. Ákɛ nɔkwɛmɔnɔ lɛ, kɛji wɔkɛɛ nibii ni edɔ mɛi krokomɛi lɛ, wɔkpaa gbɛ akɛ amɛbaakai akɛ mɔ fɛɛ mɔ kɛ elilɛi feɔ esha yɛ be kɛ bei amli. (Yakobo 3:2) Kɛ́ wɔmiisumɔ ni mɛi krokomɛi kɛ wɔ aye yɛ suɔmɔ mli lɛ, no lɛ esa akɛ wɔ hu wɔkɛ amɛ aye yɛ suɔmɔ mli.
19. Te wɔɔfee tɛŋŋ wɔbi ni mumɔ krɔŋkrɔŋ lɛ aye abua wɔ ni wɔná suɔmɔ?
19 Nɔ ni ji ejwɛ lɛ, wɔbaanyɛ wɔtao mumɔ krɔŋkrɔŋ lɛ yelikɛbuamɔ ejaakɛ suɔmɔ ji mumɔ lɛ yibii lɛ eko. (Galatabii 5:22, 23) Bei pii lɛ, naanyobɔɔ, weku mli henumɔi, kɛ nuu kɛ yoo teŋ suɔmɔ damɔ henumɔ nɔ. Shi Yehowa mumɔ lɛ yelikɛbuamɔ he miihia wɔ koni wɔkɛná suɔmɔ ni Yehowa yɔɔ lɛ, suɔmɔ ni ji emuuyeli kpãa lɛ eko. Wɔbaanyɛ wɔtao mumɔ krɔŋkrɔŋ lɛ yelikɛbuamɔ kɛtsɔ Biblia lɛ ni jɛ mumɔŋ lɛ kanemɔ nɔ. Ákɛ nɔkwɛmɔnɔ lɛ, kɛji wɔkase Yesu shihilɛ he sane lɛ, wɔbaana bɔ ni ekɛ gbɔmɛi ye ha, ni wɔbaanyɛ wɔkase lɛ. (Yohane 13:34, 35; 15:12) Kɛfata he lɛ, wɔbaanyɛ wɔbi ni Yehowa aha wɔ mumɔ krɔŋkrɔŋ lɛ, titri lɛ yɛ shihilɛi ni haa ewaa kɛhaa wɔ akɛ wɔɔfee nii yɛ gbɛ ni suɔmɔ yɔɔ mli nɔ lɛ amli. (Luka 11:13) Naagbee lɛ, wɔbaanyɛ wɔtiu suɔmɔ sɛɛ kɛtsɔ Kristofoi asafo lɛ ni wɔkɛ lɛ aaabɔ gbagbalii lɛ nɔ. Nyɛmimɛi hii kɛ yei ni yɔɔ suɔmɔ ni wɔkɛ amɛ bɔɔ lɛ yeɔ ebuaa wɔ ni wɔnáa suɔmɔ.—Abɛi 13:20.
20, 21. Mɛɛ suɔmɔ kpojiemɔ ni sa kadimɔ Yehowa Odasefoi fee yɛ afi 2000 sɔɔmɔ afi lɛ mli?
20 Nyɛsɛɛ afi lɛ, aná sanekpakpa shiɛlɔi ayifalɛ ni fe fɛɛ, ni ji 6,035,564 yɛ jeŋ fɛɛ. Yehowa Odasefoi kɛ ŋmɛlɛtswai 1,171,270,425 tsu nii ni amɛkɛtao aŋkroaŋkroi ni amɛgba amɛ nakai sanekpakpa lɛ he sane. Suɔmɔ ji nɔ ni ha amɛdamɔ dɔlɛ, nugbɔ, kɛ fɛ̃i naa yɛ be mli ni amɛtsuɔ nitsumɔ nɛɛ he nii lɛ. Suɔmɔ ji nɔ ni tsirɛ amɛ ni amɛkɛ skulbii, kɛ nanemɛi nitsulɔi gba sane ni amɛtee mɛi ni amɛleee amɛ kwraa lɛ aŋɔɔ yɛ gbɛjegbɛi ahe kɛ hei krokomɛi lɛ. Mɛi babaoo ni Odasefoi lɛ tee amɛŋɔɔ lɛ fee shikpilikpii, ni mɛi fioo te shi amɛwo amɛ. Shi kɛlɛ, mɛi komɛi jie miishɛɛ kpo, no hewɔ lɛ, anyɛ afee sɛɛsaramɔi 433,454,049, kɛ Biblia mli nikasemɔi 4,766,631. *
21 Kwɛ bɔ ni enɛ fɛɛ ji suɔmɔ ni Yehowa Odasefoi yɔɔ kɛha Nyɔŋmɔ kɛ amɛnaanyo gbɔmɔ lɛ he odaseyeli! Nakai suɔmɔ lɛ he ejɔŋ kɔkɔɔkɔ. Wɔyɛ nɔmimaa akɛ wɔbaaye adesai odase babaoo fe nɛkɛ yɛ afi 2001 sɔɔmɔ afi lɛ mli. Eba akɛ Yehowa jɔɔmɔ baaya nɔ ahi ejálɔi anɔkwafoi ni yɔɔ ekãa lɛ anɔ yɛ be mli ni ‘amɛfeɔ amɛnii fɛɛ yɛ suɔmɔ mli’ lɛ!—1 Korintobii 16:14.
[Shishigbɛ niŋmaa]
^ kk. 20 Kɛ ootao afi 2000 Sɔɔmɔ Afi Akɔntaabuu lɛ mlitsɔɔmɔ fitsofitso lɛ, kwɛmɔ tao ni yɔɔ baafai 18-21 lɛ.
Ani Obaanyɛ Otsɔɔ Mli?
• Kɛ wɔsumɔ wɔnanemɛi lɛ, namɔ wɔkaseɔ?
• Te esa akɛ suɔmɔ ni wɔyɔɔ lɛ mli alɛɛ aha tɛŋŋ?
• Mɛni ji niiashikpamɔi komɛi ni jieɔ Kristofoi asuɔmɔ kpo?
• Te wɔɔfee tɛŋŋ wɔná Kristofoi asuɔmɔ?
[Nikasemɔ lɛ he Sanebimɔi]
[Akrabatsa ni yɔɔ baafa 18-21]
2000 YEHOWA ODASEFOI AJEŊ FƐƐ SƆƆMƆ AKƆNTAABUU
(Kwɛmɔ “bound volume”)
[Mfonirii ni yɔɔ baafa 15]
Kristofoi asuɔmɔ baanyɛ afee weku ekome
[Mfonirii ni yɔɔ baafa 17]
Suɔmɔ tsirɛɔ wɔ ni wɔgbaa wɔhiɛnɔkamɔ lɛ he sane wɔtsɔɔ mɛi krokomɛi