Adafitswaa Krɛdɛɛ Ko

BENI agbeɔ Watch Tower Bible and Tract Society of Pennsylvania daa afi kpee lɛ naa yɛ October 7, afi 2000 lɛ, Nɔyeli Kuu lɛ sɛinɔtalɔ John E. Barr kɛ adafitswaa krɛdɛɛ ko ha. Adafitswaa nɛɛ tsɔɔ wiemɔi ni Theodore Jaracz kɛ Daniel Sydlik etsɔ hiɛ amɛkɛha yɛ nakai gbi lɛ nɔ lɛ mli.—Kwɛmɔ wolo tɛtrɛɛ nɛɛ baafai 12-16 kɛ 28-31.

Beni Nyɛminuu Barr tsɔɔ sane oti ko ni sa kadimɔ waa mli lɛ, ekɛɛ akɛ: “Akɛ nibii ni nɔ kwɔlɔ ni fa ni kɔɔ nɔ fɛɛ nɔ he ewo ‘Tsulɔ anɔkwafo kɛ nilelɔ’ lɛ kɛ e-Nɔyeli Kuu lɛ dɛŋ fe nɔ ni akɛha mla nitsumɔ gbɛjianɔtoi lɛ. Nɔ ni akɛwo mla gbɛjianɔtoi nɛɛ ateŋ eko fɛɛ eko dɛŋ akɛ yiŋtoi ni akɛwo mla shishi lɛ ji saji ni afo husu awo amɛfalɛ he. Shi, wɔ Nuntsɔ Yesu Kristo, ehala tsulɔ anɔkwafo kuu lɛ eto ‘enibii’ loo Maŋtsɛyeli lɛ he nibii fɛɛ kwa ni yɔɔ shikpɔŋ nɛɛ nɔ lɛ nɔ.”—Mateo 24:45-47.

Yɛ Pennsylvania mla gbɛjianɔtoo lɛ he lɛ, Nyɛminuu Barr kɛfata he akɛ: “Kɛjɛ be mli ni akɛwo mla shishi yɛ afi 1884 kɛbaa nɛɛ, Watch Tower Bible and Tract Society of Pennsylvania lɛ etee nɔ etsu nitsumɔ ni he hiaa waa yɛ wɔ ŋmɛnɛŋmɛnɛ beaŋ yinɔsane mli. Ni kɛlɛ, eji mla naa gbɛjianɔtoo kɛkɛ ni yɔɔ ni ‘tsulɔ anɔkwafo kɛ nilelɔ’ lɛ kɛtsuɔ nii kɛ́ ehe miihia.”

Nyɛminuu Sydlik kɛ Nyɛminuu Jaracz etsɔɔ mli yɛ wiemɔi ni amɛha lɛ amli akɛ, yɛ anɔkwale ni eji ákɛ akɛ Nuntsɔ lɛ shikpɔŋ nɔ nibii fɛɛ ewo “tsulɔ anɔkwafo kɛ nilelɔ” lɛ dɛŋ lɛ etsiii tsulɔ kuu lɛ gbɛ koni ekaŋmɛ hii ni he esa ni jɛ “tooi krokomɛi” lɛ ateŋ lɛ gbɛ koni amɛkwɛ nɔkwɛmɔ gbɛnaa nii ni áto naa lɛ ekomɛi anɔ. (Yohane 10:16) Asaŋ Ŋmalɛ naa yiŋtoo ko bɛ ni abaadamɔ nɔ ama nɔ mi akɛ esa akɛ mla gbɛjianɔtoi ni Yehowa Odasefoi kɛtsuɔ nii lɛ anɔkwɛlɔi fɛɛ loo amɛteŋ mɛi komɛi afee Kristofoi ni afɔ amɛ mu.

Nyɛminuu Barr kɛɛ toibolɔi lɛ akɛ, nyɛsɛɛ nɛɛ Yehowa Odasefoi a-Nɔyeli Kuu lɛ mli bii komɛi ni sɔmɔɔ ákɛ nɔkwɛlɔi kɛ onukpai lɛ jɛ amɛsuɔmɔ mli amɛje mla naa nitsumɔ gbɛjianɔtoi fɛɛ ni “tsulɔ anɔkwafo kɛ nilelɔ” lɛ kɛtsuɔ nii yɛ United States lɛ anɔkwɛlɔi akuu lɛ mli. Ahala nyɛmimɛi hii ni he esa jogbaŋŋ ni jɛ tooi krokomɛi lɛ ateŋ ato amɛnajiaŋ.

Nɛkɛ yiŋkpɛɛ nɛɛ he yɛ sɛɛnamɔ waa. Ehaa Nɔyeli Kuu lɛ mli bii náa hegbɛ koni amɛkɛ be babaoo awo mumɔŋ niyenii lɛ ahe gbɛjianɔtoo mli, koni yɛ gbɛ ko nɔ lɛ amɛkwɛ jeŋ muu fɛɛ nyɛmifeemɔ lɛ amumɔŋ hiamɔ nii anɔ.

Beni sɛinɔtalɔ lɛ muɔ sane lɛ naa lɛ, ekɛɛ etoibolɔi ni ená miishɛɛ lɛ akɛ: “Yɛ be mli ni akɛ mla kɛ nɔkwɛmɔ nitsumɔi srɔtoi ewo nɔkwɛlɔi ni he esa lɛ adɛŋ lɛ, . . . amɛ fɛɛ amɛsɔmɔɔ yɛ Nɔyeli Kuu lɛ mumɔŋ gbɛtsɔɔmɔ shishi. . . . Wɔ fɛɛ wɔkɛ sɔlemɔ kwɛɔ Yehowa gbɛ koni ejɔɔ wɔ mɔdɛŋbɔi yɛ ekomefeemɔ mli yɛ esuɔmɔnaa nifeemɔ mli lɛ nɔ, kɛha egbɛi kpeteŋkpele lɛ hiɛnyamwoo kɛ enunyam.”