Bɔ ni Esoro Nɔyeli Kuu lɛ yɛ Nitsumɔ Gbɛjianɔtoo ni Akɛwo Mla Shishi lɛ He

AJE Watch Tower Bible and Tract Society of Pennsylvania daa afi kpeei ni afeɔ lɛ shishi kɛjɛ January, afi 1885. Beni abuaa Kristofoi ni afɔ amɛ mu lɛ anaa yɛ afii ohai 19 lɛ naagbee gbɛ lɛ, no mli lɛ nɛkɛ nitsumɔ nɛɛ mli nɔkwɛlɔi kɛ nitsulɔi lɛ yɛ ŋwɛi hiɛnɔkamɔ lɛ. Yɛ anɔkwale mli lɛ, etamɔ nɔ ni enɛ etee nɔ nakai aahu.

Shi nɔ kome ko yɛ ni esoro no. Yɛ afi 1940 lɛ, ahala Hayden C. Covington—ní no mli lɛ eji Asafo lɛ mla he ŋaawolɔ kɛ “tooi krokomɛi” lɛ ateŋ mɔ kome ni hiɛ shikpɔŋ nɔ hiɛnɔkamɔ lɛ—koni efee Asafo lɛ nitsumɔ nɔkwɛlɔ. (Yohane 10:16) Esɔmɔ akɛ Asafo lɛ sɛinɔtalɔ sɛɛkwɛlɔ kɛjɛ afi 1942 kɛyashi afi 1945. Yɛ nakai be lɛ mli lɛ, Nyɛminuu Covington ŋmɛɛ nitsumɔ akɛ nitsumɔ nɔkwɛlɔ lɛ he bɔni afee ni ekɛ nɔ ni yɛ nakai beaŋ lɛ etamɔ Yehowa suɔmɔnaa nii lɛ akpã gbee—ákɛ esa akɛ nitsumɔ nɔkwɛlɔi kɛ nitsulɔi fɛɛ ni yɔɔ Pennsylvania nitsumɔ lɛ mli lɛ afee Kristofoi ni afɔ amɛ mu lɛ. Lyman A. Swingle baye Hayden C. Covington najiaŋ yɛ nitsumɔ nɔkwɛlɔi akuu lɛ mli, ni ahala Frederick W. Franz akɛ sɛinɔtalɔ sɛɛkwɛlɔ.

Mɛni hewɔ ni Yehowa sɔɔlɔi heɔ yeɔ akɛ esa akɛ Watch Tower Bible and Tract Society of Pennsylvania nitsumɔ nɔkwɛlɔi kɛ nitsulɔi lɛ fɛɛ afee Kristofoi ni afɔ amɛ mu lɛ? Ejaakɛ yɛ nakai be lɛ mli lɛ, Yehowa Odasefoi a-Nɔyeli Kuu ni be fɛɛ be lɛ mɛi ni yɔɔ mli pɛ ji hii ni akɛ mumɔ efɔ amɛ mu lɛ ji nɔ ni akɛyɔseɔ Pennsylvania nitsumɔ lɛ nɔkwɛlɔi akuu kɛ nitsulɔi lɛ jogbaŋŋ.

Daa Afi Kpee ni Fee Yinɔsane

Pennsylvania nitsumɔ lɛ mli bii lɛ kpɛlɛ yiŋkpɛi ekpaa ni baatsake emla gbɛjianɔtoo lɛ mli lɛ nɔ yɛ daa afi kpee ni afee yɛ Pittsburgh yɛ October 2, 1944 lɛ shishi. Mla gbɛjianɔtoo lɛ tsɔɔ akɛ esa akɛ aha mɛi ni kɛ shika fĩɔ Asafo lɛ nitsumɔ sɛɛ lɛ oshikifɔ̃ɔ hewalɛ ko, shi nibii amli tsakemɔ ni ji etɛ lɛ jie nakai gbɛjianɔtoo lɛ kɛjɛ mli. Sane ko ni aŋma afɔ̃ shi yɛ nakai daa afi kpee lɛ he lɛ kɛɛ akɛ: “Ahaŋ mɛi ni kɛ amɛhe woɔ Asafo lɛ mli lɛ afá fe 500 . . . Esa akɛ mɔ fɛɛ mɔ ni abaahala lɛ lɛ afee Asafo lɛ be-fɛɛ sɔɔlɔ loo Yehowa Odasefoi akuu [asafo] lɛ be-fã sɔɔlɔ, ni esa akɛ ejie Nuntsɔ lɛ mumɔ lɛ kpo.”

Kɛjɛ no sɛɛ kɛyaa lɛ, esa akɛ aŋkroaŋkroi ni etuu amɛhe kwraa amɛha Yehowa ni shika ni amɛkɛyeɔ amɛbuaa koni Maŋtsɛyeli nitsumɔ lɛ aya hiɛ lɛ falɛ kɔɔɔ he eko lɛ kɛ oshikifɔ̃ɔ ahala Asafo lɛ nitsumɔ nɔkwɛlɔi. Enɛ bafee tamɔ nɔ ko ni kɛ hiɛyaai ni baa fiofio ni agba afɔ̃ shi yɛ Yesaia 60:17 lɛ kpãa gbee, he ni wɔkaneɔ yɛ akɛ: “Akɔɔble najiaŋ lɛ mikɛ shika aaaba, ni dade najiaŋ lɛ mikɛ jwiɛtɛi aaaba, ni tsei anajiaŋ lɛ akɔɔble, ni tɛi anajiaŋ lɛ dade; ni maŋɔ hejɔlɛ mafee onɔyelɔi, ni maŋɔ jalɛ mafee o-nukpai.” Beni gbalɛ nɛɛ wieɔ ‘nɔyelɔi’ kɛ ‘onukpai’ ahe lɛ, etsɔɔ hiɛyaai ni afeɔ yɛ gbɛjianɔtoo mli nifeemɔi amli yɛ Yehowa webii ateŋ.

Nɛkɛ nii ni he hiaa ni afeɔ koni ekɛha gbɛjianɔtoo lɛ kɛ teokrase nifeemɔ akpã gbee lɛ ba naagbee yɛ “jenamɔi kɛ jetsɛremɔi akpei enyɔ kɛ ohai etɛ” lɛ naagbee taakɛ eyɔɔ Daniel 8:14 lɛ. Yɛ nakai be lɛ mli lɛ, “aaasaa” “hekrɔŋkrɔŋ lɛ.”

Shi kɛlɛ, yɛ daa afi kpee ni afee yɛ afi 1944 ni fee yinɔsane lɛ mli lɛ sɛɛ lɛ, sanebimɔ ko yɛ ni he hiaa ni aha hetoo. Akɛni no mli lɛ Pennsylvania nitsumɔ lɛ nitsumɔ nɔkwɛlɔi akuu mli bii kpawo lɛ ji mɛi ni akɛyɔseɔ Nɔyeli  Kuu lɛ jogbaŋŋ hewɔ lɛ, ani enɛ tsɔɔ akɛ Nɔyeli Kuu lɛ nyɛŋ afee mɛi ni fa fe Kristofoi kpawo ni afɔ amɛ mu? Kɛfata he lɛ, akɛni nitsumɔ lɛ mli bii lɛ ji mɛi ni halaa nitsumɔ nɔkwɛlɔi lɛ hewɔ lɛ, ani nitsumɔ lɛ mli bii lɛ miihala Nɔyeli Kuu lɛ mli bii lɛ yɛ daa afi kpee lɛ shishi afi fɛɛ afi? Ani Watch Tower Bible and Tract Society of Pennsylvania nitsumɔ nɔkwɛlɔi kɛ nitsulɔi lɛ kɛ Nɔyeli Kuu lɛ mli bii lɛ ji gbɔmɛi kome too lɛ nɔŋŋ, aloo esoro amɛ?

Daa Afi Kpee Kroko ni Hiɛ Kpaŋ Nɔ

Aha nɛkɛ sanebimɔi nɛɛ ahetoo yɛ daa afi kpee ni afee yɛ October 1, 1971 lɛ shishi. Yɛ nakai nifeemɔ lɛ shishi lɛ, wielɔi lɛ ateŋ mɔ kome tsɔɔ mli akɛ “tsulɔ anɔkwafo kɛ nilelɔ” lɛ nɔyeli kuu lɛ hi shi afii ohai abɔ dani Watch Tower Bible and Tract Society of Pennsylvania lɛ ba. (Mateo 24:45-47) Ato nɔyeli kuu ko shishi yɛ Pentekoste afi 33 Ŋ.B., nɔ ni fe afii ohai 18 dani Pennsylvania nitsumɔ lɛ ba shihilɛ mli. Klɛŋklɛŋ lɛ, no mli lɛ nɔyeli kuu lɛ feɔ bɔfoi 12, shi jeee hii 7. Eka shi faŋŋ akɛ, alɛɛ yibɔ lɛ mli yɛ sɛɛ mli, ejaakɛ “bɔfoi lɛ kɛ onukpai lɛ ni yɔɔ Yerusalem lɛ” miinyiɛ hiɛ yɛ nakai beaŋ.—Bɔfoi lɛ Asaji 15:2, wɔma efã ko nɔ mi.

Nakai wielɔ lɛ nɔŋŋ tsɔɔ mli yɛ afi 1971 akɛ Buu Mɔɔ Asafo lɛ mli bii lɛ nyɛŋ afɔ̃ oshiki kɛhala mɛi ni afɔ amɛ mu lɛ kɛba Nɔyeli Kuu lɛ mli. Mɛni hewɔ? Ekɛɛ akɛ: “Ejaakɛ jeee gbɔmɔ ko hala ‘tsulɔ’ kuu lɛ nɔyeli kuu lɛ. Yesu Kristo ni ji anɔkwa Kristofoi asafo lɛ Yitso kɛ ‘tsulɔ anɔkwafo kɛ nilelɔ’ kuu lɛ Nuntsɔ lɛ ji mɔ ni . . . halaa.” Belɛ eka shi faŋŋ akɛ, nitsumɔ ni akɛwo mla shishi lɛ mli bii ko kwraa bɛ ni baanyɛ ahala Nɔyeli Kuu lɛ mli bii awo nitsumɔ mli.

Beni wielɔ lɛ yaa nɔ lɛ, ewie wiemɔ ni sa kadimɔ waa nɛɛ ni ji: “Nɔyeli kuu lɛ bɛ nitsulɔi taakɛ bɔ ni Asafo lɛ Nitsumɔ Nɔkwɛlɔi Akuu lɛ yɔɔ lɛ ni ji, sɛinɔtalɔ, sɛinɔtalɔ sɛɛkwɛlɔ, shikatolɔ kɛ shikatolɔ sɛɛkwɛlɔ. Sɛinɔtalɔ kɛkɛ eyɔɔ.” Afii babaoo nɛ ní Pennsylvania nitsumɔ lɛ sɛinɔtalɔ lɛ efee Nɔyeli Kuu lɛ mli bii lɛ ahiɛnyiɛlɔ hu. Enɛ baŋ lɛ nakai dɔŋŋ. Yɛ be mli ni Nɔyeli Kuu lɛ mli bii lɛ bɛ niiashikpamɔ loo nyɛmɔ ni yeɔ egbɔ lɛ, gbɛnaa nii ni amɛtsuɔ he nii lɛ baafee pɛpɛɛpɛ. Wielɔ lɛ kɛfata he akɛ: “Yɛ no hewɔ lɛ, nɔyeli kuu lɛ mlinyo fɛɛ mlinyo baanyɛ afee sɛinɔtalɔ yɛ be mli ni yɛ nakai beaŋ nɔŋŋ lɛ, ejeee sɛinɔtalɔ kɛha . . . Asafo lɛ . . . Fɛɛ damɔ sɛinɔtalɔ nitsumɔ lɛ ni atoɔ naa atsakeɔ akɛhaa mɔ fɛɛ mɔ yɛ nɔyeli kuu lɛ mli lɛ nɔ.”

Atsɔɔ srɔtofeemɔ ni yɔɔ Nɔyeli Kuu lɛ mli bii ni akɛ mumɔ efɔ amɛ mu lɛ kɛ Pennsylvania nitsumɔ lɛ nɔkwɛlɔi lɛ ateŋ lɛ mli faŋŋ yɛ nakai daa afi kpee ni afee yɛ afi 1971 ni hiɛ kpaŋ nɔ lɛ shishi. Kɛlɛ, Nɔyeli Kuu lɛ mli bii tee nɔ amɛsɔmɔ akɛ Asafo lɛ nitsumɔ nɔkwɛlɔi kɛ nitsulɔi. Shi kɛlɛ, sanebimɔ ni ateeɔ lɛ shi ŋmɛnɛ ji: Ani Ŋmalɛ naa yiŋtoo ko yɛ hewɔ ni esa akɛ Watch Tower Bible and Tract Society of Pennsylvania lɛ nitsumɔ nɔkwɛlɔi lɛ afee Nɔyeli Kuu lɛ mli bii?

Hetoo lɛ ji dabi. Jeee Pennsylvania nitsumɔ lɛ pɛ ji nitsumɔ kuu ni akɛwo mla shishi ni Yehowa Odasefoi kɛtsuɔ nii. Ekrokomɛi hu yɛ. Ekome ji Watchtower Bible and Tract Society of New York, Incorporated. Ehaa wɔnitsumɔ lɛ yaa nɔ jogbaŋŋ yɛ United States. Yehowa jɔɔmɔ ehi nakai nitsumɔ lɛ nɔ yɛ faŋŋ mli, eyɛ mli akɛ emli nitsumɔ nɔkwɛlɔi kɛ nitsulɔi lɛ etee nɔ efee “tooi krokomɛi” lɛ ateŋ mɛi titri. Akɛ International Bible Students Association lɛ tsuɔ nii yɛ Britain. Akɛ nitsumɔ kui krokomɛi ni akɛwo mla shishi lɛ tsuɔ nii koni akɛha Maŋtsɛyeli nibii aya hiɛ yɛ shikpɔji krokomɛi anɔ. Amɛ fɛɛ amɛyeɔ amɛbuaa yɛ ekomefeemɔ mli, ni amɛtsuɔ amɛgbɛfaŋnɔ koni akɛha ashiɛ sanekpakpa lɛ yɛ jeŋ fɛɛ. He ni nitsumɔ kui ni akɛwo mla shishi nɛɛ loo mɛi ni sɔmɔɔ akɛ nitsumɔ nɔkwɛlɔi loo nitsulɔi lɛ yɔɔ lɛ kɔɔɔ he eko, Nɔyeli Kuu lɛ ji mɛi ni kudɔɔ enɛɛmɛi yɛ teokrase gbɛ nɔ, ni amɛkɛtsuɔ nii. No hewɔ lɛ, nakai mla nitsumɔ kui lɛ yɛ nitsumɔi ni atuu awo amɛdɛŋ ni esa akɛ amɛtsu he nii koni amɛkɛha Maŋtsɛyeli nibii lɛ aya hiɛ.

Sɛɛnamɔ yɛ he akɛ wɔɔná nitsumɔ kui ni akɛwo mla shishi. Kɛtsɔ no nɔ lɛ, wɔkɛ mlai ni yɔɔ he ni wɔyɔɔ kɛ maŋ mlai kpãa gbee, taakɛ Nyɔŋmɔ Wiemɔ lɛ kpaa gbɛ lɛ. (Yeremia 32:11;  Romabii 13:1) Nitsumɔ kui ni akɛwo mla shishi lɛ haa wɔ Maŋtsɛyeli shɛɛ sane lɛ gbɛɛ-kɛ-shwãmɔ nitsumɔ lɛ yaa hiɛ kɛtsɔ Bibliai, woji wuji, woji tɛtrɛbii, woji bibii, kɛ nibii krokomɛi akalamɔ nɔ. Nakai nitsumɔ kui lɛ hu tsuɔ nii akɛ dɛŋdadei ni akɛwo mla shishi koni akɛtsu saji ni tsɔɔ shikpɔŋ namɔ, yelikɛbuamɔ nitsumɔi, gbeekpamɔi kɛha hei ni akɛbaafee kpeei, kɛ ekrokomɛi ahe nii. Wɔmiida shi kɛha nitsumɔ kui ni tamɔ nɛkɛ ni akɛwo mla shishi lɛ anitsumɔi lɛ.

Yehowa Gbɛi ni Aaawo Nɔ Gojoo

Yɛ afi 1944 lɛ, atsake Watch Tower Bible and Tract Society of Pennsylvania lɛ mla gbɛjianɔtoo lɛ Mla ni ji II lɛ mli koni ema nɛkɛ nitsumɔ nɛɛ yiŋtoi anɔ mi. Taakɛ mla gbɛjianɔtoo lɛ tsɔɔ lɛ, nɔ ni fata Asafo lɛ yiŋtoi ahe ji nɛkɛ yiŋtoo titri nɛɛ: “Koni ashiɛ Nyɔŋmɔ maŋtsɛyeli lɛ he sanekpakpa ni yɔɔ Kristo Yesu shishi lɛ aha maji fɛɛ ákɛ nɔ ni akɛyeɔ Nyɔŋmɔ Ofe YEHOWA gbɛi, wiemɔ kɛ enɔkwɔlɛ lɛ he odase.”

Kɛjɛ afi 1926 kɛyaa lɛ, “tsulɔ anɔkwafo” lɛ ewó Yehowa gbɛi nɔ gojoo. Nɔ ni sa kadimɔ waa titri ji afi 1931, beni Biblia Kaselɔi lɛ kpɛlɛ gbɛi Yehowa Odasefoi lɛ nɔ lɛ. (Yesaia 43:10-12) Woji ni fata Asafo lɛ woji ni éma Nyɔŋmɔ gbɛi lɛ nɔ mi lɛ ahe ji Jehovah (1934), “Let Your Name Be Sanctified” (1961), kɛ “The Nations Shall Know That I Am Jehovah”—How? (1971).

Esa akɛ atsĩ New World Translation of the Holy Scriptures ni akala fɛɛ yɛ Blɔfo mli yɛ afi 1960 lɛ tã yɛ gbɛ krɛdɛɛ nɔ. He fɛɛ he ni Tetragrammaton lɛ jeɔ kpo yɛ Hebri Ŋmalɛi lɛ amli lɛ, Yehowa gbɛi yɛ jɛmɛ. Nɔ ni yɔɔ shishitsɔɔmɔ nɛɛ mli hu ji ŋwɛi gbɛi lɛ ni jeɔ kpo yɛ hei 237 yɛ Kristofoi a-Hela Ŋmalɛi lɛ amli lɛ, ni saji amlitaomɔ jogbaŋŋ tsɔɔ akɛ ama enɛ nɔ mi lɛ. Kwɛ shi ni wɔdaa akɛ Yehowa eŋmɛ “tsulɔ” lɛ kɛ e-Nɔyeli Kuu lɛ gbɛ koni amɛkɛ woji ni amɛkalaa kɛ nitsumɔ kui ni akɛwo mla shishi lɛ atsu nii jogbaŋŋ yɛ gbɛ̀i srɔtoi anɔ koni akɛha ale egbɛi yɛ jeŋ fɛɛ!

Aha Nyɔŋmɔ Wiemɔ lɛ Gbɛɛ-kɛ-Shwãmɔ Tee Hiɛ

Yehowa webii étee nɔ amɛye egbɛi lɛ he odase aahu ni amɛ́fi e-Wiemɔ lɛ sɛɛ kɛtsɔ woji akpekpei abɔ ni damɔ Biblia nɔ lɛ akalamɔ kɛ ejaa nɔ kɛ Biblia lɛ diɛŋtsɛ hu. Yɛ afi 1900 afii lɛ mra be mli lɛ, Buu Mɔɔ Asafo lɛ batsɔ nitsumɔ ni yɔɔ mla naa hegbɛ akɛ ekala The Emphatic Diaglott ni ji Kristofoi a-Hela Ŋmalɛi lɛ ni hiɛ wiemɔi srɔtoi ni ji Hela kɛ Blɔfo nɔ̃ ni afee lɛ ekome ni Benjamin Wilson fee lɛ. Asafo lɛ kala King James Version kɛha Biblia Kaselɔi ni nɔ ni fata he ji saji ni feɔ baafai 500 ni fata he lɛ. Ekala King James Version ni nɔ ni akɛtaoɔ saji amli yɔɔ enaabui anaa lɛ yɛ afi 1942. Kɛkɛ ni yɛ afi 1944 lɛ, Asafo lɛ bɔi American Standard Version ni je kpo yɛ afi 1901 ni kɛ ŋwɛi gbɛi lɛ tsuɔ nii lɛ kalamɔ. Akɛ gbɛi ni ji Yehowa lɛ tsu nii waa hu yɛ The Bible in Living English, ni Stephen T. Byington fee, ni Asafo lɛ kala yɛ afi 1972 lɛ mli.

Nɛkɛ nitsumɔ kui ni akɛwo mla shishi ni Yehowa Odasefoi kɛtsu nii lɛ ye ebua yɛ Biblia shishitsɔɔmɔi nɛɛ fɛɛ akalamɔ kɛ ejaa mli. Shi kɛlɛ, nɔ ni sa kadimɔ fe fɛɛ ji ekomefeemɔ ni mli wa ni kã Buu Mɔɔ Asafo lɛ kɛ Yehowa Odasefoi akuu ni afɔ amɛ mu ni feɔ New World Bible Translation Committee lɛ mli bii lɛ ateŋ lɛ. Wɔmli filiɔ wɔ akɛ, kɛbashi amrɔ nɛɛ akala nɔ ni fa fe shishitsɔɔmɔ nɛɛ ekomekomei 106,400,000 lɛ fɛɛ loo efã ko yɛ wiemɔi 38 mli. Watch Tower Bible and Tract Society of Pennsylvania lɛ ji Biblia asafo lɛɛlɛŋ!

‘Ahala tsulɔ anɔkwafo lɛ ato enuntsɔ lɛ nibii anɔ.’ Nɔ ni fata enɛɛmɛi ahe ji tsũi ni yɔɔ nitsumɔhe yitso lɛ ni yɔɔ New York State, U.S.A. lɛ, kɛ  nitsumɔhe niji 110 ni tsuɔ nii amrɔ nɛɛ yɛ jeŋ fɛɛ lɛ. Tsulɔ kuu lɛ mli bii lɛ le akɛ abaabi ni amɛbu amɛhe akɔntaa yɛ bɔ ni amɛkɛ nɔ ni atuu awo amɛdɛŋ lɛ etsu nii amɛha lɛ mli. (Mateo 25:14-30) Ni kɛlɛ, enɛ etsĩii “tsulɔ” lɛ naa akɛ ekaha nɔkwɛlɔi ni he esa yɛ “tooi krokomɛi” lɛ ateŋ lɛ miikwɛ mla kɛ nɔkwɛmɔ nitsumɔi anɔ. Yɛ anɔkwale mli lɛ, enɛ haa Nɔyeli Kuu lɛ kɛ be babaoo ‘hiɛɔ sɔlemɔ kɛ wiemɔ lɛ he sɔɔmɔ lɛ mli.’—Bɔfoi lɛ Asaji 6:4.

Be mli ni je nɛŋ shihilɛi ŋmɛɔ efeemɔ gbɛ lɛ, Nɔyeli Kuu lɛ ni damɔ “tsulɔ anɔkwafo kɛ nilelɔ” lɛ najiaŋ lɛ kɛ nitsumɔ kui ni akɛwo mla shishi lɛ baatsu nii. Nɛkɛ nibii nɛɛ sa, shi amɛjeee nɔ ni he hiaa kwraa tsɔ̃. Kɛ amralo lɛ wo akpɔ ko kɛfite nitsumɔ kuu ni akɛwo mla shishi lɛ, shiɛmɔ nitsumɔ lɛ baaya nɔ lolo. Amrɔ nɛɛ po lɛ, yɛ shikpɔji ni naatsii yɔɔ nɔ, ní akɛ nitsumɔ kui ni akɛwo mla shishi ko tsuuu nii yɛ jɛmɛ lɛ, aajaje Maŋtsɛyeli shɛɛ sane lɛ, aafee kaselɔi, ni teokrase hiɛyaa miiya nɔ lolo. Enɛ miiya nɔ, ejaakɛ Yehowa Odasefoi dũɔ ni amɛshwieɔ nɔ nu, ni ‘Nyɔŋmɔ haa eshwereɔ.’—1 Korintobii 3:6, 7.

Be mli ni wɔkwɛɔ wɔsɛɛ be gbɛ lɛ, wɔnáa hekɛnɔfɔɔ akɛ Yehowa baatsu ewebii lɛ amumɔ kɛ heloonaa hiamɔ nii ahe nii. Lɛ kɛ e-Bi Yesu Kristo baaya nɔ amɛkɛ ŋwɛi gbɛtsɔɔmɔ kɛ sɛɛfimɔ ni he hiaa lɛ aha koni akɛgbe Maŋtsɛyeli shiɛmɔ nitsumɔ lɛ naa. Yɛ anɔkwale mli lɛ, nɔ fɛɛ nɔ ni wɔfeɔ ákɛ Nyɔŋmɔ tsuji lɛ, wɔfeɔ ni ‘jeee nyɛmɔ naa lɛ, jeee hewalɛ naa, shi Yehowa mumɔ lɛ naa.’ (Zakaria 4:6) No hewɔ lɛ, wɔsɔleɔ wɔbiɔ ŋwɛi yelikɛbuamɔ, ejaakɛ wɔle akɛ yɛ nyɛmɔ ni Yehowa kɛhaa lɛ naa lɛ, wɔbaanyɛ wɔgbe nitsumɔ ni ekɛha wɔ akɛ wɔtsu yɛ nɛkɛ naagbee be nɛɛ mli lɛ naa!