Bɔ ni Wɔɔfee Wɔná Jeŋba Kpakpa

ŊMƐNƐŊMƐNƐ beaŋ wiemɔi komekomei ashishitsɔɔmɔ woji tsɔɔ “jeŋba kpakpa” shishi akɛ “jeŋba ni hi kɛteke nɔ; ejurɔfeemɔ.” Eji “nifeemɔ kɛ jwɛŋmɔ ni ja; subaŋ kpakpa.” Wiemɔ komekomei ashishitsɔɔmɔ naabualɔ Marvin R. Vincent kɛɛ akɛ shishinumɔ ni yɔɔ Hela wiemɔ ni akɛ shishijee woloŋlee tsɔɔ shishi akɛ “jeŋba kpakpa” lɛ tsɔɔ “nɔ fɛɛ nɔ ni hi kɛteke nɔ.” Belɛ ebɛ naakpɛɛ akɛ ajie sui komɛi tamɔ ŋaa, ekãafeemɔ, he tsɔsemɔ, jalɛsaneyeli, mɔbɔnalɛ, nii ni akãa he afeɔ, anɔkwale wiemɔ, heshibaa, kɛ anɔkwayeli yi akɛ jeŋbai kpakpai yɛ be kome loo be kroko mli. Átsɔɔ jeŋba kpakpa shishi hu akɛ “he ni akɛkpɛtɛɔ tɛi ni ja ni afolɔ ashwie shi he.”

Namɔ jeŋba ni tekeɔ nɔ, ejurɔfeemɔ, kɛ jalɛ nifeemɔ he tɛi ni afolɔ ashwie shi esa akɛ wɔkɛtsu nii? Newsweek wolo tɛtrɛɛ lɛ kɛɛ akɛ: “Taakɛ jeŋba he nilee ni ehe shi waa lɛ tsɔɔ lɛ, yiŋkɔshikɔshifeemɔ ni Jeŋ Nilee Kuu lɛ kɛba lɛ eba nɔ ni ja kɛ nɔ ni ejaaa he susumɔi fɛɛ shi ni eha etsɔ saji ni mɔ diɛŋtsɛ sumɔɔ, nɔ ni esumɔɔ yɛ henumɔŋ loo nɔ ni ehalaa yɛ kusum nifeemɔ gbɛfaŋ.” Shi ani nɔ ni mɔ diɛŋtsɛ sumɔɔ kɛkɛ lɛ ji gbɛ ni ja ni atsɔɔ nɔ akɛleɔ nɔ ni ja kɛ nɔ ni ejaaa? Dabi. Bɔni afee ni wɔná jeŋba kpakpa lɛ, ekpakpa kɛ efɔŋ he tɛi ni afolɔ ashwie shi ni akɛ he fɔ̃ɔ nɔ he miihia wɔ—tɛi ni afolɔ ashwie shi ni abaanyɛ atsɔ nɔ abu nifeemɔ ko, subaŋ, loo su ko akɛ eja loo ejaaa.

Anɔkwa Jɛɛhe Kome Pɛ Kɛha Jeŋba He Tɛi ni Afolɔ Ashwie Shi

Anɔkwa Jɛɛhe kome pɛ yɔɔ kɛha jeŋba he tɛi ni afolɔ ashwie shi—adesai a-Bɔlɔ lɛ, Yehowa Nyɔŋmɔ. Beni Yehowa Nyɔŋmɔ bɔ klɛŋklɛŋ gbɔmɔ ni ji Adam lɛ, etsɛɛɛ ni ekɛ nɛkɛ fãmɔ nɛɛ ha gbɔmɔ lɛ akɛ: “Trom lɛ mli tsei lɛ fɛɛ nɔ yibii lɛ ye bɔ ni osumɔɔ; shi ekpakpa kɛ efɔŋ lee tso  lɛ yibii lɛ kaaye eko; ejaakɛ gbi nɔ ni oooye eko lɛ, gbo ooogbo!” (1 Mose 2:16, 17) Yehowa Nyɔŋmɔ kɛ nakai gbɛi ni yɔɔ srɔto lɛ ha tso lɛ ní ekɛtsɔɔ hegbɛ ni lɛ pɛ eyɔɔ akɛ eeetsɔɔ nɔ ni hi kɛ nɔ ni ehiii kɛha ebɔɔ nii. No hewɔ lɛ, tɛi ni Nyɔŋmɔ efolɔ eshwie shi ni kɔɔ ekpakpa kɛ efɔŋ he lɛ batsɔ nɔ ni adamɔɔ nɔ akojoɔ, aloo akɛleɔ bɔ ni mɔ ko nifeemɔi, bɔ ni esusuɔ nii ahe, kɛ sui ni ejieɔ lɛ kpo etsɔɔ lɛ yɔɔ ha. Kɛ afolɔko tɛi ni tamɔ nɛkɛ ashwieko shi lɛ, kulɛ wɔnyɛŋ wɔle nɔ ni ja kɛ nɔ ni ejaaa lɛ mli srɔtofeemɔ jogbaŋŋ.

Kitã ni kɔɔ ekpakpa kɛ efɔŋ lee tso lɛ he lɛ kɛ nihalamɔ ko fɔ̃ Adam kɛ Hawa hiɛ—ákɛ amɛaafee toiboo loo amɛfeŋ toiboo. Yɛ amɛgbɛfaŋ lɛ, jeŋba kpakpa tsɔɔ toiboo ni amɛaafee amɛha nakai kitã lɛ. Etsɛɛɛ ni Yehowa tee nɔ ejie nɔ ni sa ehiɛ kɛ nɔ ni esaaa ehiɛ lɛ kpo, ni eha aŋma enɛ awo Biblia lɛ mli aha wɔ. Belɛ ní wɔɔná jeŋba kpakpa lɛ biɔ ni wɔkɛ jalɛ tɛi ni Yehowa efolɔ eshwie shi yɛ Ŋmalɛi lɛ amli lɛ atsu nii.

Lé Tɛi ni Nyɔŋmɔ Efolɔ Eshwie Shi lɛ Jogbaŋŋ

Akɛni Yehowa Nyɔŋmɔ etsɔɔ ekpakpa kɛ efɔŋ he tɛi ni efolɔ eshwie shi ni ejie enɛɛmɛi akpo yɛ Biblia lɛ mli hewɔ lɛ, ani esaaa akɛ wɔleɔ enɛɛmɛi jogbaŋŋ? Bɔfo Paulo ŋma akɛ: “Ŋmalɛ fɛɛ ŋmalɛ ni jɛ Nyɔŋmɔ Mumɔ lɛŋ lɛ ehi ha nitsɔɔmɔ kɛ hiɛkamɔ kɛ mɔsaamɔ kɛ tsɔsemɔ ni yɔɔ jalɛ mli lɛ, koni Nyɔŋmɔ gbɔmɔ lɛ aye emuu ni asaa lɛ pɛpɛɛpɛ aha nitsumɔ kpakpa fɛɛ nitsumɔ kpakpa.”—2 Timoteo 3:16, 17.

Ákɛ nɔkwɛmɔnɔ lɛ, susumɔ shishinumɔ ni bɛ ni Kunihito ni atsĩ etã yɛ sane ni tsɔ hiɛ lɛ mli lɛ kɛkpe beni ejieɔ heshibaa kpo taakɛ ekusum nifeemɔ tsɔɔ lɛ lɛ he okwɛ. Ŋmalɛ naa tɛi ni afolɔ ashwie shi ni esusu he jogbaŋŋ yɛ sɛɛ mli lɛ ye ebua lɛ koni eŋmɛ pɛpɛɛpɛ jogbaŋŋ yɛ ewiemɔ lɛ mli. Eka shi faŋŋ akɛ Biblia lɛ woɔ heshibaa he hewalɛ, ni ewieɔ eshiɔ hekɛnɔfɔɔ ni ayɔɔ fe nine kɛ henɔwomɔ. (Abɛi 11:2; Mika 6:8) Ni kɛlɛ, beni bɔfo Paulo tsɔɔ hesaai kɛha “nɔkwɛmɔ nitsumɔ” lɛ, ewie nakai hegbɛ lɛ ni ‘aaatao’ lɛ he. (1 Timoteo 3:1) Esa akɛ mɔ lɛ atsu ‘nitaomɔ’ nɛɛ he nii, ni jeee akɛ nɔ ni shwãa loo henɔwomɔ bɛ mli kɛkɛ, shi agbɛnɛ hu ni efeee nii kɛbaaa bulɛ ni eyɔɔ lɛ shi bɔ ni esaaa.

Mɛni ji nɔ ni Biblia lɛ kɛɔ yɛ jeŋba ni tekeɔ nɔ yɛ jarayeli nitsumɔ mli lɛ he? Nifeemɔ gbɛ̀i ni yiŋkɔshikɔshifeemɔ yɔɔ mli ni akɛaatsu nii, aloo ni wɔkɛ hiɛdɔɔ tsuuu nɔyeli lɛ mlai kɛ tooyeli he mlai ahe nii lɛ ji nifeemɔ ni yaa nɔ waa yɛ ŋmɛnɛ jarayeli nitsumɔ mli. Shi kɛlɛ, yɛ nɔ ni mɛi krokomɛi feɔ lɛ fɛɛ sɛɛ lɛ, tɛi ni Biblia lɛ efolɔ eshwie shi ji akɛ esa akɛ “wɔba wɔjeŋ fɛfɛo yɛ nii fɛɛ mli.” (Hebribii 13:18) No hewɔ lɛ, wɔtsuɔ jeŋba kpakpa he nii kɛtsɔ nitsumɔtsɛmɛi, nitsulɔi, nihelɔi, kɛ jeŋ nɔyelii ni wɔkɛ amɛ aaaye yɛ anɔkwale kɛ jalɛ nifeemɔ mli lɛ nɔ. (5 Mose 25:13-16; Romabii 13:1; Tito 2:9, 10) Nɔ ni anɔkwayeli kɛbaa yɛ faŋŋ mli ji hekɛnɔfɔɔ kɛ nɔkpɛlɛmɔ. Ni bei pii lɛ, saji ahe gbeekpamɔi ni aŋmaa afɔ̃ɔ shi lɛ tsĩɔ shishinumɔi ni bɛ kɛ shihilɛi ni yɔɔ hwanyaŋŋ ni baanyɛ ate shi yɛ “nibii ni aleee ni baa trukaa” hewɔ lɛ anaa.—Jajelɔ 9:11, NW; Yakobo 4:13, 14.

Atadewoo kɛ hesaamɔ ji nɔ kroko hu ni ehe hiaa ni wɔkɛ jeŋba kpakpa atsu he nii. Kusum fɛɛ kusum yɛ atade ni asumɔɔ ni awo, ni ekolɛ nɔnyɛɛ ni naa wa baaba mɔ nɔ koni aya nɔ awo eheei ni eba nɔ fe fɛɛ kɛ nɔ ni yɔɔ nɔ fe fɛɛ lɛ. Shi mɛni hewɔ esa akɛ wɔkɛ atadei ni eba nɔ ehee lɛ fɛɛ atsu nii lɛ? Biblia lɛ woɔ wɔ ŋaa koni ‘wɔjeŋba akatamɔ jeŋbii ajeŋba.’ (Romabii 12:2) Yɛ nɔ najiaŋ ni bɔfo Paulo aaafee mlai lɛ, eŋma yɛ mumɔ lɛ kanyamɔ naa akɛ: “Yei hu, amɛkɛ atade ni sa kɛ hiɛ ni gboɔ nɔ̃ kɛ jwɛŋmɔ ni sa awula amɛhe, jeee kɛ yigbɔɔ loo shika loo adiagbai loo atade ni jara wa, shi moŋ kɛ nitsumɔi kpakpai ni sa yei ni tsɔɔ amɛhe akɛ Nyɔŋmɔ jálɔi lɛ.” (1 Timoteo 2:9, 10) Nɛkɛ tɛ ni afo afɔ̃ shi ni he hiaa nɛɛ kɔɔ hii kɛ yei fɛɛ he. Yɛ anɔkwale mli lɛ, hegbɛ yɛ akɛ abaawo atadei srɔtoi ni feɔ mɔ fɛo yɛ nɔ ni asumɔɔ, ní awoɔ yɛ he ni ayɔɔ loo nɔ ni mɔ diɛŋtsɛ sumɔɔ ni ewo hewɔ.

Agbɛnɛ hu lɛ, Biblia lɛ yɔseɔ jeŋba shara nifeemɔi ni Nyɔŋmɔ buɔ lɛ fɔ́ yɛ faŋŋ mli. Wɔkaneɔ kɔkɔbɔɔ ni yɔɔ 1 Korintobii 6:9, 10 akɛ: “Ani nyɛleee akɛ amimyelɔi anine shɛŋ Nyɔŋmɔ maŋtsɛyeli lɛ nɔ? Nyɛkahaa alakaa nyɛ!  Ajwamaŋbɔlɔi loo wɔŋjalɔi loo gbala mli kulɔi loo mɛi ni kɛ amɛ diɛŋtsɛ amɛheloo feɔ yakayakanii loo hii ni kɛ hii feɔ yakayakanii, loo julɔi loo hiɛjoolɔi loo dãatɔlɔi loo mɛi ajɛlɔi loo amimyelɔi anine shɛŋ Nyɔŋmɔ maŋtsɛyeli lɛ nɔ kwraa.” Nɛkɛ ŋmalɛ nɛɛ ye ebua Maria ní atsĩ etã kɛtsɔ hiɛ lɛ, koni ena akɛ yɛ jeŋba ni teke nɔ he shishitoo mla ni Bɔlɔ lɛ efo efɔ̃ shi lɛ naa lɛ, Juan ni ekɛ lɛ bɔɔ gbagbalii lɛ ji tɔmɔ, ni esa akɛ efo sɛɛ kɛ́ ebaaná Nyɔŋmɔ nɔkpɛlɛmɔ. Eka shi faŋŋ akɛ, bɔni afee ni wɔtsu jeŋba kpakpa he nii lɛ, ehe baahia ni wɔle tɛi ni Yehowa efolɔ eshwie shi lɛ jogbaŋŋ diɛŋtsɛ.

Okɛ Tsui lɛ Akase Nii

Jeŋba kpakpa jeee nii ni ehiii ni akɛ he wooo mli kɛkɛ. Eyɛ jeŋba hewalɛ. Mɔ ni yɔɔ jeŋba kpakpa lɛ feɔ ejurɔ. Univɛsiti tsɔɔlɔ ko kɛɛ akɛ: “Ehe miihia ni akɛ tsui lɛ kɛ yitso lɛ hu akase jeŋba kpakpa.” Belɛ, nɔ ni fata jeŋba kpakpa ni aaatsu he nii lɛ he ji nɔ ko ni yaa hiɛ fe Nyɔŋmɔ Wiemɔ lɛ ni aaale jogbaŋŋ kɛkɛ. Ebiɔ ni ajwɛŋ nɔ ni aŋma yɛ jɛmɛ lɛ he jogbaŋŋ koni hiɛsɔɔ ni wɔyɔɔ kɛha Yehowa lɛ ayi wɔtsui mli obɔ, ni etsirɛɔ wɔ koni wɔkɛ Ŋmalɛ naa shishitoo mlai atsu nii yɛ wɔshihilɛi amli.

Lalatsɛ lɛ jaje akɛ: “Misumɔɔ omla lɛ akɛ nɔ ko! Jenamɔ fɛɛ lɛ no he mijwɛŋɔ.” (Lala 119:97) Ni Maŋtsɛ David ŋma akɛ: “Mikaiɔ blema gbii lɛ, mijwɛŋɔ [Nyɔŋmɔ] onitsumɔi lɛ fiaa he, misusuɔ oninenaa nitsumɔi lɛ ahe.” (Lala 143:5) Wɔ hu esa akɛ wɔkɛ sɔlemɔ ajwɛŋ nii ahe jogbaŋŋ akɛ nɔ ni he hiaa waa yɛ Biblia lɛ kɛ woji ni damɔ Biblia lɛ nɔ lɛ kasemɔ mli.

Eji anɔkwale akɛ, ní aaatao be kɛha nikasemɔ diɛŋtsɛ ni sane he ni ajwɛŋɔ waa fata he lɛ baanyɛ afee kaa. Shi jeŋba kpakpa sɛɛ ni wɔtiuɔ lɛ biɔ ni wɔhé be kɛjɛ nitsumɔi krokomɛi amli. (Efesobii 5:15, 16) Aaron ni eye afii 24 lɛ heɔ be ni tamɔ nɛkɛ daa gbi kɛtsɔ shi ni eteɔ minitii 30 mra fe bɔ ni eteɔ shi be ko ni eho lɛ nɔ. Egba akɛ: “Be ko ni etsɔ hiɛ lɛ, mikaneɔ Biblia lɛ yɛ ŋmɛlɛtswaa fã muu lɛ fɛɛ mli. Nyɛsɛɛ nɛɛ nɔŋŋ ji beni mibale bɔ ni ehe hiaa ni majwɛŋ sane he jogbaŋŋ. No hewɔ lɛ, amrɔ nɛɛ mikɛ nakai be lɛ fã jwɛŋɔ nɔ ni mikane kɛtsɔ hiɛ nɔŋŋ lɛ he. Nyɔmɔwoo ejɛ enɛ mli kɛba lɛɛlɛŋ.” Abaanyɛ ajwɛŋ sane he jogbaŋŋ yɛ bei krokomɛi amli. David lá lala ko eha Yehowa akɛ: “Mijwɛŋɔ ohe yɛ nyɔɔŋbuu bei lɛ amli.” (Lala 63:7) Ni Biblia lɛ gbaa akɛ: “Gbɛkɛnaashi lɛ Isak eje kpo etee eyiŋshwiemɔ yɛ ŋa lɛ nɔ.”—1 Mose 24:63.

Sane he jwɛŋmɔ he yɛ sɛɛnamɔ waa yɛ jeŋba kpakpa ni atsuɔ he nii lɛ mli, ejaakɛ eyeɔ ebuaa wɔ koni wɔnu he tamɔ bɔ ni Yehowa nuɔ he lɛ, ni ehaa esusumɔi lɛ feɔ wɔsusumɔi. Ákɛ nɔkwɛmɔnɔ lɛ, Maria le akɛ Nyɔŋmɔ ekpɛlɛɛɛ ajwamaŋbɔɔ nɔ. Shi kɛ́ ‘eeehi efɔŋ kwraa ni ekpɛtɛ ekpakpa he’ lɛ, ehe baahia ni ejwɛŋ Biblia mli ŋmalɛi titrii ni kɔɔ he lɛ ahe. (Romabii 12:9) Aye abua lɛ koni ena bɔ ni ehe hiaa ni efee tsakemɔi beni ekane Kolosebii 3:5, ni woɔ wɔ hewalɛ koni ‘wɔgbe wɔhe nii ni yɔɔ ni ji ajwamaŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ’ egbe naa lɛ. Kulɛ esa akɛ Maria abi ehe akɛ: ‘Mɛɛ bɔlɛnamɔ mli akɔnɔ fɔŋ esa akɛ magbe lɛ? Mɛni ni baanyɛ atee akɔnɔi ni he tseee shi esa akɛ makpoo? Ani tsakemɔi yɛ ni esa akɛ mafee yɛ bɔ ni mikɛ mɛi ni esoro amɛbɔɔ su lɛ yeɔ haa lɛ mli?’

 Nɔ ni fata sane ni ajwɛŋɔ he lɛ he ji nɔ ni jɛɔ nifeemɔ ko mli kɛbaa lɛ he susumɔ. Paulo wo Kristofoi ŋaa koni amɛtsi amɛhe kɛjɛ ajwamaŋbɔɔ he ni amɛye amɛhe nɔ “koni mɔ ko akaye enyɛmi amim ní eshishiu lɛ yɛ sane ko mli.” (1 Tesalonikabii 4:3-7) Sanebimɔi kpakpai ni esa akɛ asusu he ji: ‘Mɛɛ awui maye mihe, miweku lɛ, loo mɛi krokomɛi, kɛ́ mikɛ mihe wo enɛ feemɔ mli? Te ebaasa mihe eha tɛŋŋ yɛ mumɔŋ, henumɔŋ kɛ gbɔmɔtsoŋ? Te nibii etee nɔ eha mɛi krokomɛi ni te shi amɛwo Nyɔŋmɔ mla lɛ be ko ni eho lɛ ha tɛŋŋ?’ Sane he susumɔ ni tamɔ nɛkɛ ha Maria waje etsui, ni nakai nɔŋŋ ebaafee eha wɔ.

Nii ni Akaseɔ Kɛjɛɔ Nɔkwɛmɔnii Amli

Ani abaanyɛ atsɔɔ jeŋba kpakpa yɛ skul? Nɛkɛ sanebimɔ nɛɛ ji nɔ ni kɛ yiŋfutumɔ eba mɛi ni susuɔ nii ahe lɛ ajwɛŋmɔŋ afii akpei abɔ nɛ. Hela jeŋ nilelɔ Plato kɛ ehe ha susumɔ ni tsɔɔ akɛ ebaanyɛ eba lɛ nakai. Yɛ gbɛ kroko nɔ lɛ, Aristotle susu he akɛ anáa jeŋba kpakpa kɛtsɔɔ ekɛ nitsumɔ daa nɔ. Adafitswaa woloŋmalɔ ko mu naataamɔ lɛ naa yɛ sane lɛ he yɛ nɛkɛ gbɛ nɔ akɛ: “Yɛ ekukufoo mli lɛ, anyɛŋ akase jeŋba kpakpa nifeemɔi lɛ pɛ he nii. Anyɛŋ akɛ nikasemɔ woji hu atsɔɔ. Anáa subaŋ kpakpa kɛjɛɔ akutsei amli shihilɛ mli . . . he ni awoɔ jeŋba kpakpa he hewalɛ ni awoɔ he nyɔmɔ yɛ lɛ.” Shi nɛgbɛ ji he ni wɔbaanyɛ wɔná aŋkroaŋkroi ni jieɔ jeŋba kpakpa kpo diɛŋtsɛ yɛ? Yɛ be mli ni hiŋmɛigbelemɔi babaoo kɛ jeŋba kpakpa he nɔkwɛmɔnii komɛi haa lɛ, kɛ hoo lɛ yɛ amɛ adesai amli gbɔmɛi kɛ blemasaji ahe lɛ, Biblia lɛ yɛ nɔkwɛmɔnii kpakpai babaoo ni ji anɔkwale.

Mɔ ni fee jeŋba kpakpa he nɔkwɛmɔnii ni mɔɔ shi fe fɛɛ ji Yehowa. Ekɛ jeŋba kpakpa tsuɔ nii be fɛɛ be ni efeɔ nɔ ni ja kɛ nɔ ni hi. Wɔbaanyɛ wɔtsu jeŋba kpakpa he nii kɛtsɔ “Nyɔŋmɔ kaselɔi” ni wɔɔtsɔmɔ nɔ. (Efesobii 5:1) Ni Nyɔŋmɔ Bi, Yesu Kristo ‘to okadi efɔ̃ shi eha wɔ, koni wɔnyiɛ enanemaahei lɛ asɛɛ.’ (1 Petro 2:21) Kɛfata he lɛ, aŋkroaŋkroi anɔkwafoi babaoo tamɔ Abraham, Sara, Yosef, Rut, Hiob, kɛ Daniel kɛ enanemɛi Hebribii etɛ lɛ ahe saji yɛ Biblia lɛ mli. Mɛi ni fata he ji mɛi ni feɔ jeŋba kpakpa he nɔkwɛmɔnii ni yɔɔ ŋmɛnɛŋmɛnɛ Yehowa tsuji ateŋ lɛ.

Wɔbaanyɛ Wɔye Omanye

Ani wɔbaanyɛ wɔye omanye lɛɛlɛŋ yɛ nɔ ni ji jeŋba kpakpa ni wɔɔtsu he nii yɛ Nyɔŋmɔ hiɛ lɛ mli? Akɛni wɔná emuu ni ayeee akɛ gboshinii hewɔ lɛ, bei komɛi lɛ mpleshii ni yɔɔ gbeyei baanyɛ aya nɔ yɛ wɔmli yɛ jwɛŋmɔ lɛ kɛ heloo lɛ teŋ—yɛ suɔmɔ ni wɔyɔɔ akɛ wɔɔfee nɔ ni ja, kɛ eshafeemɔ akɔnɔi ni wɔɔnyiɛ sɛɛ lɛ teŋ. (Romabii 5:12; 7:13-23) Shi abaanyɛ akɛ Nyɔŋmɔ yelikɛbuamɔ aye ta lɛ nɔ kunim. (Romabii 7:24, 25) Yehowa kɛ e-Wiemɔ kɛ woji ni damɔ Biblia lɛ nɔ lɛ eha. Kɛ wɔkase Ŋmalɛi lɛ waa ni wɔkɛ sɔlemɔ jwɛŋ he lɛ, wɔtsui mli baanyɛ atse. Nɔ ni jɛɔ tsui ni mli tse ni tamɔ nɛkɛ mli baa ji susumɔ wiemɔi kpakpai, kɛ nifeemɔi kpakpai. (Luka 6:45) Wɔbaanyɛ wɔdamɔ Yehowa Nyɔŋmɔ kɛ Yesu Kristo nɔkwɛmɔnii lɛ anɔ wɔtswa subaŋ ni Nyɔŋmɔ gbeyeishemɔ yɔɔ mli wɔma shi. Ni eka shi faŋŋ akɛ wɔbaanyɛ wɔkase babaoo kɛjɛ aŋkroaŋkroi ni kɛ anɔkwayeli sɔmɔɔ Nyɔŋmɔ ŋmɛnɛ lɛ ahe.

Bɔfo Paulo wo mɛi ni kaneɔ ewoji lɛ hewalɛ koni ‘amɛya nɔ amɛjwɛŋ’ jeŋba kpakpa kɛ nibii krokomɛi ni sa yijiemɔ lɛ “anɔ.” Eka shi faŋŋ akɛ enɛ feemɔ kɛ Nyɔŋmɔ jɔɔmɔ baaba. (Filipibii 4:8, 9) Wɔbaanyɛ wɔkɛ Yehowa dɛŋ yelikɛbuamɔ aye omanye yɛ jeŋba kpakpa ni wɔɔná lɛ mli.

[Mfoniri ni yɔɔ baafa 6]

Ha sane nɔjwɛŋmɔ afee o-Biblia mli nikasemɔ lɛ fã

[Mfoniri ni yɔɔ baafa 7]

Tswaa subaŋ ni Nyɔŋmɔ gbeyeishemɔ yɔɔ mli oma shi kɛtsɔ Kristo Yesu kasemɔ nɔ