Mɛni Hewɔ Esa akɛ Oná Jeŋba Kpakpa?

NYƐSƐƐ nɛɛ, Japannyo ko ni eye aaafee afii nyɔŋmai ejwɛ kɛ enumɔ kɛyaa ni egbɛi ji Kunihito lɛ fã kɛyahi United States. * Beni eyashɛ otsii komɛi asɛɛ lɛ, ekɛ shihilɛ ko ni kulɛ ebaanyɛ efite nitsumɔ ni ekase lɛ kpe hiɛ kɛ hiɛ. Kunihito kɛɛ: “Beni minitsumɔ nɔkwɛlɔ lɛ bi kɛji manyɛ matsu gbɛnaa nii ko he nii lɛ, miná hekɛnɔfɔɔ waa akɛ makpɛlɛ nɔ. Ni kɛlɛ, akɛni atsɔse mi koni mabu heshibaa akɛ jeŋba kpakpa hewɔ lɛ, miha hetoo akɛ: ‘Mibɛ nɔmimaa akɛ manyɛ mafee, shi mabɔ mɔdɛŋ ni mafee nɔ ni hi fe fɛɛ ni manyɛ.’ Yɛ minitsumɔ nɔkwɛlɔ Amerikanyo lɛ gbɛfaŋ lɛ, enɛ fee tamɔ nɔ ni mihe esako ni mibɛ hekɛnɔfɔɔ. Beni miná mile nakai lɛ, miyɔse akɛ ehe miihia ni matsake nɔ ni miwie lɛ.”

Maria ni yɔɔ New York City lɛ ji skul nikaselɔ ni le nii waa, ni eyɛ miishɛɛ be fɛɛ be akɛ eeeye ebua eklasbii lɛ. Juan ji naanyo nikaselɔ ni biɔ yelikɛbuamɔ kɛjɛɔ Maria dɛŋ yɛ bei komɛi amli. Shi ebaná suɔmɔ waa kɛha lɛ hu, ni ebɔ mɔdɛŋ koni esa ehiɛ. Yɛ suɔmɔ ni Maria yɔɔ akɛ eeehi shi akɛ mɔ ni jeŋba he tse lɛ fɛɛ sɛɛ lɛ, eŋmɛɛ ehe eha jeŋba shara mli nifeemɔi ni Juan jieɔ lɛ kpo lɛ, ni ekɛ ehe wo bɔlɛnamɔ mli jeŋba shara mli.

Ní aaajie jeŋba kpakpa kpo yɛ ŋmɛnɛŋmɛnɛ jeŋ kɛ emli kusumii srɔtoi srɔtoi kɛ emli jeŋba kpɔtɔi nɛɛ ji kaa diɛŋtsɛ. No hewɔ lɛ, mɛni hewɔ esa akɛ otsu jeŋba kpakpa he nii? Ejaakɛ jeŋba kpakpa nifeemɔ saa Nyɔŋmɔ hiɛ, ni eehe efee akɛ wɔteŋ mɔ fɛɛ mɔ miisumɔ ni wɔná ehiɛ duromɔ.

Nyɔŋmɔ Wiemɔ lɛ, ni ji Biblia lɛ woɔ mɛi ní kaneɔ lɛ hewalɛ ni amɛjie jeŋba kpakpa kpo. Ákɛ nɔkwɛmɔnɔ lɛ, bɔfo Paulo ŋma akɛ: “Kɛ jeŋba kpakpa ko yɛ, kɛ yijiemɔ ko hu yɛ lɛ, enɛɛmɛi anɔ nyɛjwɛŋa!” (Filipibii 4:8) Ni bɔfo Petro woɔ wɔ hewalɛ koni ‘wɔbɔ mɔdɛŋ waa ni wɔkɛ jeŋba kpakpa afata wɔhemɔkɛyeli lɛ he.’ (2 Petro 1:5) Shi mɛni ji jeŋba kpakpa? Ani abaanyɛ atsɔɔ yɛ skul? Te wɔɔfee tɛŋŋ wɔtsu he nii koni wɔná?

[Shishigbɛ niŋmaa]