Nyɛdamɔa Shi Kɛ Nɔmimaa ni Yɔɔ Shiŋŋ

“Nitsumɔ Ko ni Hi Waa”

KƐJƐ ŋmɛnɛŋmɛnɛ beaŋ Yehowa Odasefoi ashishijee be mli yinɔsane mli lɛ, amɛkɛ hiɛdɔɔ etsu Yesu Kristo gbalɛi lɛ ateŋ ekome he nii waa diɛŋtsɛ: “Ni aaashiɛ maŋtsɛyeli lɛ he sanekpakpa nɛɛ atsɔɔ je nɛŋ fɛɛ, ní akɛye jeŋmaji lɛ fɛɛ odase; ni no dani naagbee lɛ aaaba.” (Mateo 24:14) Beni afi 1914—ni ji “naagbee gbii” lɛ shishijee—bɛŋkɛɔ lɛ, anɔkwa Biblia Kaselɔi lɛ kɛ nɔmimaa ni ma shi shiŋŋ tsu jeŋ muu fɛɛ nitsumɔ ko ni he hiaa waa he nii, ni ji nikasemɔ he tafaa ni damɔ Ŋmalɛ Krɔŋkrɔŋ lɛ nɔ.—2 Timoteo 3:1.

Bɔni afee ni amɛnine ashɛ oti ni ma amɛhiɛ ni ji maŋtsɛyeli sanekpakpa lɛ shiɛmɔ kɛmiitsɔɔ jeŋ fɛɛ lɛ nɔ lɛ, nɛkɛ Yehowa tsuji nɛɛ kɛ gbɛ hee, ni yɔɔ faŋŋ tsu nii kɛ ekãa. Bɔni afee ni wɔle ehe saji babaoo lolo lɛ nyɛhaa wɔkua wɔsɛɛ kɛyaa nakai be lɛ mli.

Gbɛ Hee ni Aaatsɔ Nɔ Ajaje Sanekpakpa Lɛ

Nakai gbi lɛ ji January yɛ afi 1914. Ŋɔɔ lɛ akɛ ofata mɛi 5,000 ni tara asa ni mli ewo duŋ ni yɔɔ New York City lɛ mli lɛ he. Nɔ ni ma ohiɛ ji sini ashwishwɛ agbo ko. Kɛkɛ ni nuu ko ni yiteŋ eyɛ waŋ ni wo atade wuyaa bapue yɛ sini lɛ mli. Ókwɛ sinii ni awieee yɛ mli dã, shi nɛkɛ nuu nɛɛ miiwie ni oonyɛ oonu ewiemɔi lɛ. Oona tsɔne hee ko ni onako eko dã, ni saji ni ekɛhaa lɛ yɛ naakpɛɛ. Mɔ ni wieɔ lɛ ji Charles Taze Russell, Buu Mɔɔ Asafo lɛ klɛŋklɛŋ sɛinɔtalɔ lɛ, ni nɔ ni ajieɔ lɛ ji “Photo-Drama of Creation” lɛ.

C. T. Russell na nɔ ni sinii ni mɛi ni yɔɔ mli lɛ tsirɛɔ amɛhe lɛ baanyɛ atsu koni nine ashɛ mɛi babaoo anɔ. No hewɔ lɛ, yɛ afi 1912 mli lɛ, eje “Photo-Drama of Creation” lɛ feemɔ shishi. Yɛ naagbee lɛ enyɛ efee mfonirii kɛha sini ni atsiii he yɛ mli kɛ nɔ ni atsiɔ he yɛ mli ni heɔ ŋmɛlɛtswaai kpaanyo, ni emli sui kɛ gbɛɛmɔi lɛ yɛ faŋŋ.

Ato he gbɛjianɔ koni ajie yɛ fãi srɔtoi ejwɛ mli, “Photo-Drama” lɛ haa ekwɛlɔi lɛ leɔ nibii kɛjɛ adebɔɔ mli aahu kɛbaa adesa yinɔsane mli kɛyashiɔ be mli ni Yehowa Nyɔŋmɔ yiŋtoo kɛha shikpɔŋ kɛ adesai lɛ baaba mli kwraa yɛ Kristo Afii Akpe Nɔyeli lɛ naagbee mli. Afii baaho dani nakai tsɔnei ahe nitsumɔ mli hiɛyaa lɛ baaye omanye yɛ shika gbɛfaŋ. Kɛlɛ, mɛi akpekpei abɔ kwɛ “Photo-Drama of Creation” lɛ yaka ni aheee nɔ ko!

Akɛ lalai ni hi kɛ maŋshiɛmɔi 96 ni amɔmɔ awo kpãa nɔ fata he kɛfee “Photo-Drama” lɛ. Afee mfonirii ni miitsɔɔ jeŋ yinɔsaji. Ehe bahia hu ni atɛŋ ni apɛŋte mfonirii ohai abɔ. Akɛ nine pɛŋte nɛkɛ sinii nɛɛ ateŋ ekomɛi kɛ tɔlɛ diɛŋtsɛ.  Ni afee enɛ nɔtonɔto, ejaakɛ yɛ be ni sa mli lɛ afee 20 ni aja mli awo fai srɔtoi ejwɛ mli. Enɛ ha anyɛ ajie “Photo-Drama” sini lɛ yɛ maŋtiasei srɔtoi 80 mli yɛ gbi fɛɛ gbi ni ahala lɛ nɔ!

Nɔ ni Afeɔ kɛ́ Aajie Sini Lɛ

Mɛni afeɔ yɛ be mli ni ajieɔ “Photo-Drama” sini lɛ? Biblia Nikaselɔ Alice Hoffman wie akɛ: “Kɛ aje Drama lɛ shishi lɛ, onaa Nyɛminuu Russell. Kɛ epue yɛ sini lɛ mli, ni enaabu bɔi gbelemɔ pɛ kɛkɛ lɛ abɔi gramafoŋ plɛte ko tswaa . . . ni eŋɔɔ wɔnaa akɛ wɔmiinu egbee.”

Yɛ bei abɔ ni mfonirii lɛ yeɔ lɛ gbɛfaŋ lɛ, Zola Hoffman kai akɛ: “Mita jɛmɛ, ni minaa ekpɛ mihe kɛmiikwɛ adebɔɔ gbii ni afee he mfonirii lɛ. Wɔmiina fɔfɔi ni amɛnaa miigbele blɛoo yɛ jɛmɛ.”

Karl F. Klein ni sumɔɔ lala waa ni ji Yehowa Odasefoi lɛ a-Nɔyeli Kuu lɛ mlinyo lɛ kɛfata he akɛ: “Beni aajie sini lɛ, belɛ aatswa lala ŋɔɔmɔŋɔɔmɔ ko yɛ sɛɛ, lalai tamɔ Narcissus kɛ Humoreske.”

Shihilɛi krokomɛi ni yɔɔ miishɛɛ hu ba. Clayton J. Woodworth Jr. kaiɔ akɛ: “Naagbai bibii ni yɔɔ ŋmɔlɔ baa bei komɛi. Gbi ko lɛ, aatswa lala ko ni kɛɔ akɛ, ‘Filikimɔ Tamɔ Loofɔlɔ Kɛya Ogɔŋ lɛ Nɔ,’ shi mfoniri ni ajieɔ yɛ sini lɛ mli beni atswaa lala lɛ ji kooloo agbo ko ni hi shi dani Nu Afua lɛ ba”!

Ajieɔ “Eureka Drama” lɛ kɛfataa “Photo-Drama of Creation” sini lɛ he. (Kwɛmɔ akrabatsa lɛ mli) Afee amɛteŋ ekome kɛjɛ wiemɔ ni amɔmɔ awo kpãa nɔ lɛ mli, kɛ emli lalai ni atswaa lɛ hu. Nɔ ni fata ekroko lɛ he ji wiemɔi ni amɔmɔ awo kpãa nɔ kɛ sini mfoniri lɛ fɛɛ. Eyɛ mli akɛ yɛ “Eureka Drama” sini lɛ mli lɛ mfonirii lɛ tsirɛɛɛ amɛhe moŋ, shi eyeɔ omanye yɛ hei ni mɛi ayi faaa yɛ.

Odaseyeli Dɛŋdade ni Yɔɔ Hewalɛ

Beni afi 1914 afi lɛ baa enaagbee lɛ, no mli lɛ ájie “Photo-Drama” lɛ atsɔɔ mɛi 9,000,000 yɛ North Amerika, Europa, kɛ Australia. Eyɛ mli akɛ Biblia Kaselɔi ni yɔɔ nakai beaŋ lɛ ayi faaa moŋ, shi amɛyɛ hemɔkɛyeli ni mli wa ni he hiaa ni aná koni akɛjaje sanekpakpa yɛ nɛkɛ gbɛ hee nɛɛ nɔ. Amɛkɛ miishɛɛ tsu onia bɔni afee ni amɛnine ashɛ shika ni he hiaa nɔ koni akɛyahai heei ni sa ni abaajie yɛ. No hewɔ lɛ, “Photo-Drama of Creation” lɛ tsu nii waa ni eha mɛi ni kwɛɔ lɛ le Nyɔŋmɔ Wiemɔ lɛ kɛ eyiŋtoi lɛ ahe saji.

Wolo ko ni mɔ ko ŋma eyaha C. T. Russell lɛ tsɔɔ akɛ: “Nakai klɛŋklɛŋ gbi ni mikɛkwɛ o-Drama lɛ tsake mishihilɛ kwraa; aloo kɛ makɛɛ lɛ, etsake nilee ni miyɔɔ yɛ Biblia lɛ mli lɛ he.” Mɔ kroko hu kɛɛ akɛ: “Shwɛ fioo kɛkɛ ni miyagbee shihilɛ ni tsɔɔ hefatalɔ ni ayeee lɛ anɔkwa mli, shi minuɔ he akɛ ‘Photo-Drama of Creation’ lɛ ni ajie yɛ biɛ nyɛsɛɛ latsaabe lɛ here mi kɛjɛ mli. . . . Amrɔ nɛɛ, miyɛ toiŋjɔlɛ ni minyɛŋ maná yɛ je lɛ mli he ko he ko, ni mikɛhaŋ mɔ kroko hu.”

Demetrius Papageorge, Asafo lɛ nitsumɔhe yitso lɛ mlinyo ni etsɛ waa lɛ wie akɛ: “Kɛji akɛ wɔsusu Biblia Kaselɔi ayifalɛ fioo lɛ kɛ shika fioo ni amɛyɔɔ lɛ he yɛ nakai beaŋ lɛ he lɛ, ehaa wɔnaa akɛ, ‘Photo-Drama’ lɛ ji nitsumɔ ko ni hi waa. Lɛɛlɛŋ, Yehowa mumɔ lɛ fi sɛɛ!”

[Akrabatsa/Mfonirii ni yɔɔ baafa 8, 9]

“Eureka Drama” Lɛ

Nyɔji kpaanyɔ sɛɛ beni ajie “Photo-Drama” lɛ klɛŋklɛŋ kwraa atsɔɔ maŋbii lɛ, Asafo lɛ na bɔ ni ehe hiaa ni afee ehenɔ kroko ni atsɛɔ lɛ “Eureka Drama” lɛ. Yɛ be mli ni aajie “Photo-Drama” lɛ yɛ maŋtiasei wuji amli lɛ, belɛ aajie “Eureka” nɔ lɛ ni hiɛ saji tamɔ nakai nɔŋŋ lɛ hu yɛ akrowai lɛ amli. Atsɔɔ akɛ, “Eureka Drama” lɛ haa “nyɛmimɛi yei lɛ hegbɛ pɔtɛɛ ko” koni amɛshiɛ. Mɛni hewɔ? Nɔ hewɔ lɛ ji akɛ, adeka ni akɛ nibii lɛ fɛɛ woɔ mli lɛ tsiimɔ ji kilogram 14 pɛ. Kɛ eebi ni ajie atsɔɔ mɛi lɛ, belɛ esa akɛ akɛ gramɔfoŋ plɛte lɛ afata he.