Okɛ Yehowa Gbɛjianɔtoo lɛ Anyiɛ
Okɛ Yehowa Gbɛjianɔtoo lɛ Anyiɛ
“Shi hejɔlɛ Nyɔŋmɔ lɛ . . . esaa nyɛ eha nitsumɔ kpakpa fɛɛ nitsumɔ kpakpa, ni nyɛfee esuɔmɔnaa nii.”—HEBRIBII 13:20, 21.
1. Je lɛŋ gbɔmɛi ayifalɛ feɔ enyiɛ, ni mɛi enyiɛ ákane amɛ akɛ amɛji jamɔi komɛi amli bii?
YƐ AFI 1999 mli lɛ, gbɔmɛi ayifalɛ ni yɔɔ shikpɔŋ nɔ lɛ bashɛ akpekpei toi akpei ekpaa! The World Almanac wolo lɛ tsɔɔ akɛ, nɛkɛ yibɔ nɛɛ mli mɛi aaafee 1,165,000,000 ji Muslimbii; 1,030,000,000 ji Roma Katolikbii; 762,000,000 ji Hindubii; 354,000,000 ji Buddhabii; 316,000,000 ji Protestantbii; ni 214,000,000 ji Orthodoxbii.
2. Mɛni abaanyɛ awie yɛ jamɔŋ shihilɛ ni yɔɔ ŋmɛnɛ lɛ he?
2 Yɛ jamɔ mligbalamɔi kɛ yiŋfutumɔi ni yɔɔ ŋmɛnɛ lɛ hewɔ lɛ, ani mɛi akpekpei abɔ nɛɛ fɛɛ baanyɛ afee mɛi ni miifee nii ni kɛ Nyɔŋmɔ suɔmɔnaa nii kpãa gbee? Dabi, “ejaakɛ Nyɔŋmɔ lɛ, ejeee sakasakafeemɔ Nyɔŋmɔ, shi moŋ hejɔlɛ Nyɔŋmɔ ni.” (1 Korintobii 14:33) Yɛ gbɛ kroko nɔ lɛ, Yehowa tsuji majimaji ateŋ nyɛmifeemɔ lɛ hu? (1 Petro 2:17) Nibii amlipɛimɔ jogbaŋŋ yeɔ odase akɛ ‘toiŋjɔlɛ Nyɔŋmɔ lɛ kɛ nibii kpakpai fɛɛ wulaa amɛ koni amɛfee esuɔmɔnaa nii.’—Hebribii 13:20, 21.
3. Mɛni ba yɛ Yerusalem yɛ Pentekoste yɛ afi 33 Ŋ.B., ni mɛni hewɔ?
3 Shi kɛlɛ, gbɔmɛi ayibɔ ni kɛ amɛhe bɔɔ Yehowa Odasefoi ahe lɛ jeee nɔ ni adamɔɔ nɔ atsɔɔ kɛji akɛ amɛnáa ŋwɛi duromɔ mli ŋɔɔmɔ; ni asaŋ akɔntaabuu yibɔi hu esaaa Nyɔŋmɔ hiɛ. Ehalaaa Israelbii lɛ yɛ ‘fa ni amɛyi fa’ fe maji fɛɛ lɛ hewɔ. Yɛ anɔkwale mli lɛ, amɛji “mɛi ni faaa” yɛ maji fɛɛ ateŋ. (5 Mose 7:7) Shi akɛni Israel yeee anɔkwa hewɔ lɛ, Yehowa jie eduromɔ kɛjɛ amɛnɔ yɛ Pentekoste afi 33 Ŋ.B., ni ekɛyaha asafo hee lɛ ni feɔ Yesu Kristo sɛɛnyiɛlɔi lɛ. Akɛ Yehowa mumɔ krɔŋkrɔŋ fɔ amɛ mu, ni amɛkɛ ekãa tee nɔ amɛjaje anɔkwale ni kɔɔ Nyɔŋmɔ kɛ Kristo he lɛ amɛtsɔɔ mɛi krokomɛi.—Bɔfoi lɛ Asaji 2:41, 42.
Amɛyaa Amɛhiɛ Be Fɛɛ Be
4. Mɛni hewɔ obaakɛɛ akɛ mra be mli Kristofoi asafo lɛ yaa ehiɛ be fɛɛ be lɛ?
4 Kristofoi asafo lɛ yaa ehiɛ be fɛɛ be yɛ klɛŋklɛŋ afii oha lɛ mli, amɛgbeleɔ shikpɔŋkukuji heei anaa, amɛfeɔ kaselɔi, ni amɛtee nɔ amɛná Nyɔŋmɔ yiŋtoi ahe shishinumɔ babaoo. Mra be mli Kristofoi lɛ tee nɔ amɛnyiɛ mumɔŋ nibii ahe shishinumɔ ni atsɔ woji ni ajɛ ŋwɛi akɛ mumɔ kanya amɛŋmalamɔ ni akɛha lɛ asɛɛ. Akɛni bɔfoi lɛ kɛ mɛi krokomɛi asaramɔi lɛ waje amɛ hewɔ lɛ, amɛgbe amɛsɔɔmɔ lɛ naa. Atsɔɔ enɛ mli faŋŋ yɛ Kristofoi a-Hela Ŋmalɛi lɛ amli.—Bɔfoi lɛ Asaji 10:21, 22; 13:46, 47; 2 Timoteo 1:13; 4:5; Hebribii 6:1-3; 2 Petro 3:17, 18.
5. Mɛni hewɔ Nyɔŋmɔ gbɛjianɔtoo lɛ yaa ehiɛ ŋmɛnɛ lɛ, ni mɛni hewɔ esa akɛ wɔkɛ lɛ anyiɛ?
5 Taakɛ klɛŋklɛŋ Kristofoi lɛ ji lɛ, ŋmɛnɛŋmɛnɛ beaŋ Yehowa Odasefoi lɛ edara kɛjɛ shishijee bibiiaŋ. (Zakaria 4:8-10) Kɛjɛ afii ohai 19 lɛ naagbee gbɛ kɛbaa nɛɛ, odaseyeli eje kpo faŋŋ akɛ Nyɔŋmɔ mumɔ lɛ yɛ egbɛjianɔtoo lɛ nɔ. Akɛni wɔkɛ wɔhe efɔko adesa hewalɛ nɔ, shi mumɔ krɔŋkrɔŋ lɛ gbɛtsɔɔmɔ nɔ hewɔ lɛ, wɔtee nɔ wɔshwere yɛ Ŋmalɛi lɛ ahe shishinumɔ ni wɔnaa lɛ kɛ Nyɔŋmɔ suɔmɔnaa nii ni wɔfeɔ lɛ mli. (Zakaria 4:6) Akɛni “naagbee gbii” lɛ amli wɔyɔɔ bianɛ hewɔ lɛ, ehe miihia ni wɔkɛ Yehowa gbɛjianɔtoo ni yaa ehiɛ lɛ anyiɛ. (2 Timoteo 3:1-5) Nakai feemɔ haa wɔnyɛɔ wɔhaa wɔhiɛnɔkamɔ hiɔ shi, ni wɔnáa odase ni ayeɔ yɛ Nyɔŋmɔ Maŋtsɛyeli ni ato ama shi lɛ he lɛ mli gbɛfaŋnɔ dani naagbee kwraa lɛ abanina nibii agbɛjianɔtoo nɛɛ.—Mateo 24:3-14.
6, 7. Mɛɛ hei etɛ ni Yehowa gbɛjianɔtoo lɛ etee hiɛ yɛ mli wɔbaasusu he?
6 Mɛi ni fata wɔhe ji mɛi ni kɛ Yehowa gbɛjianɔtoo lɛ bɔi bɔɔ yɛ afi 1920, afi 1930, kɛ afi 1940 afii lɛ amli. Namɔ yɔɔ wɔteŋ kɛjɛ nakai shishijee afii lɛ amli ni baanyɛ asusu shweremɔ kɛ nɔyaa ni sa kadimɔ waa ni gbɛjianɔtoo lɛ ená kɛbashi ŋmɛnɛ lɛ he? Susumɔ nibii ni sa kadimɔ waa ni wɔnine eshɛ nɔ yɛ wɔ ŋmɛnɛŋmɛnɛ gbii nɛɛ amli yinɔsane lɛ he okwɛ! Eji mumɔŋ nyɔmɔwoo diɛŋtsɛ, akɛ wɔɔsusu nɔ ni Yehowa enyɛ etsu kɛtsɔ ewebii ni ato amɛ gbɛjianɔ yɛ teokrase gbɛ nɔ lɛ he.
7 Yehowa naakpɛɛ nitsumɔi lɛ ni David ni hi shi yɛ blema lɛ susu he lɛ ná enɔ hewalɛ waa diɛŋtsɛ. Ekɛɛ akɛ: “Kɛ mikɛɛ majaje ni mawie he lɛ, amɛfa fe bɔ ni aaanyɛ akane.” (Lala 40:6) Wɔkɛ nakai fatɔɔ lɛ nɔŋŋ kpeɔ, wɔnyɛɛɛ wɔgba Yehowa nitsumɔi ni dara babaoo ni sa yijiemɔ yɛ wɔgbii nɛɛ amli lɛ wɔtsɔɔ. Kɛlɛ, nyɛhaa wɔsusua hei etɛ ni Yehowa gbɛjianɔtoo lɛ etee hiɛ yɛ mli lɛ ahe: (1) mumɔŋ shishinumɔ ni yaa hiɛ fiofio, (2) sɔɔmɔ nitsumɔ ni ehi fe tsutsu ni álɛɛ mli, kɛ (3) tsakemɔi yɛ gbɛjianɔtoo nifeemɔi ni baa yɛ ebe naa pɛpɛɛpɛ.
Wɔdaa Shi yɛ Mumɔŋ Shishinumɔ lɛ Hewɔ
8. Yɛ Abɛi 4:18 kɛ gbeekpamɔ naa lɛ, mɛni mumɔŋ shishinumɔ eha wɔnyɛ wɔyoo yɛ Maŋtsɛyeli lɛ he?
8 Yɛ mumɔŋ shishinumɔ ni yaa hiɛ fiofio lɛ he lɛ, Abɛi 4:18 eba mli anɔkwale. Ekɛɔ akɛ: “Jalɔi atempɔŋ lɛ tamɔ la ni kpɛɔ ni eyaa nɔ ekpɛɔ aahu kɛyashiɔ shwane fintiŋŋ.” Kwɛ bɔ ni wɔdaa shi yɛ mumɔŋ shishinumɔ ni yaa hiɛ fiofio ni wɔnine eshɛ nɔ lɛ hewɔ! Ama Nyɔŋmɔ Maŋtsɛyeli lɛ nɔ mi yɛ Cedar Point, Ohio, kpee ni afee lɛ shishi yɛ afi 1919. Yehowa kɛ Maŋtsɛyeli lɛ tsuɔ nii koni ekɛtsuu egbɛi lɛ he ni ekɛbu jeŋ muu fɛɛ maŋtsɛ ni eji lɛ bem. Yɛ anɔkwale mli lɛ, mumɔŋ shishinumɔ eye ebua wɔ koni wɔyoo akɛ, Biblia lɛ yeɔ Yehowa yiŋtoo akɛ ebaatse egbɛi lɛ he kɛtsɔ Maŋtsɛyeli ni e-Bi lɛ yeɔ nɔ lɛ nɔ lɛ he odase kɛjɛ Mose Klɛŋŋklɛŋŋ Wolo lɛ nɔ aahu kɛyashi Kpojiemɔ. Jɛmɛ mɛi fɛɛ ni sumɔɔ jalɛ nifeemɔ lɛ ahiɛnɔkamɔ kpeteŋkpele lɛ yɔɔ.—Mateo 12:18, 21.
9, 10. Mɛni akase yɛ Maŋtsɛyeli lɛ kɛ gbɛjianɔtoi enyɔ ni teɔ shi woɔ amɛhe lɛ he yɛ afi 1920 afii lɛ amli, ni enɛ eye ebua yɛ mɛɛ gbɛ nɔ?
9 Yɛ Cedar Point kpee lɛ shishi yɛ afi 1922 lɛ, wielɔ titri J. F. Rutherford wo Nyɔŋmɔ webii lɛ hewalɛ koni ‘amɛtswa, amɛtswa, amɛtswa Maŋtsɛ lɛ kɛ emaŋtsɛyeli lɛ he adafi.’ Agbala jwɛŋmɔ kɛtee mumɔŋ shishinamɔ ni kɔɔ gbalɛi ni tsɔɔ be mli ni abaato Nyɔŋmɔ Maŋtsɛyeli lɛ ama shi yɛ afi 1914 lɛ he lɛ nɔ yɛ sane ni aŋma ni ji “Maŋ lɛ Fɔmɔ,” ni je kpo yɛ March 1, 1925, The Watch Tower lɛ mli lɛ mli. Ayoo hu yɛ afi 1920 afii lɛ amli akɛ gbɛjianɔtoi enyɔ ni teɔ shi woɔ amɛhe yɛ—Yehowa nɔ̃ lɛ kɛ Satan nɔ̃ lɛ. Tawuu lɛ miiya nɔ yɛ amɛteŋ, ni kɛji akɛ wɔbaahi fã ni baaye kunim lɛ masɛi lɛ, ja wɔkɛ Yehowa gbɛjianɔtoo lɛ nyiɛ.
10 Nɛkɛ mumɔŋ shishinumɔ nɛɛ eye ebua wɔ yɛ mɛɛ gbɛ nɔ? Akɛni Nyɔŋmɔ Maŋtsɛyeli lɛ kɛ Maŋtsɛ Yesu Kristo jɛɛɛ je lɛ mli hewɔ lɛ, wɔ hu wɔnyɛŋ wɔfee efã. Kɛji akɛ wɔtsi wɔhe kɛjɛ je lɛ he lɛ, wɔtsɔɔ akɛ wɔyɛ anɔkwale lɛ gbɛfaŋ. (Yohane 17:16; 18:37) Kɛji akɛ wɔyɔse naagbai ni yɔɔ hwanyaŋŋ ni haoɔ yiwalɛ gbɛjianɔtoo nɛɛ lɛ, kwɛ bɔ ni wɔdaa shi akɛ wɔjeee Satan gbɛjianɔtoo lɛ fã! Ni kwɛ bɔ ni aduro wɔ aha akɛ wɔná hebuu krɛdɛɛ ko yɛ Yehowa gbɛjianɔtoo lɛ mli!
11. Mɛɛ Ŋmalɛ naa gbɛi Nyɔŋmɔ webii kpɛlɛ nɔ yɛ afi 1931?
11 Yɛ Columbus, Ohio, kpee lɛ shishi yɛ afi 1931 lɛ, akɛ Yesaia 43:10-12 kɛyashi nɔ ni ekɔɔ he lɛ he yɛ gbɛ ni sa jogbaŋŋ nɔ. Biblia Kaselɔi lɛ kpɛlɛ gbɛi ni yɔɔ srɔto ni ji Yehowa Odasefoi lɛ nɔ. Mɛɛ hegbɛ ni da waa enɛ ji nɛkɛ akɛ aaaha ale Nyɔŋmɔ gbɛi lɛ bɔni afee ni mɛi krokomɛi atsɛ enɛ ni ahere amɛyiwala!—Lala 83:19; Romabii 10:13.
12. Mɛɛ mumɔŋ shishinumɔ ni kɔɔ asafo babaoo lɛ he akɛha yɛ afi 1935 mli?
12 Dani afi 1930 afii lɛ aaaba lɛ, no mli lɛ Nyɔŋmɔ webii lɛ ateŋ mɛi pii leee amɛhiɛnɔkamɔ kɛha wɔsɛɛ be mli wala lɛ mli jogbaŋŋ. Mɛi komɛi susu ŋwɛi shihilɛ he, shi Biblia tsɔɔmɔi ni kɔɔ shikpɔŋ nɔ paradeiso he lɛ mɔ amɛtsui. Akɛ miishɛɛ kase yɛ Washington, D.C., kpee ni afee yɛ afi 1935 lɛ shishi akɛ asafo babaoo lɛ ni yɔɔ Kpojiemɔ yitso 7 lɛ ji kuu ni yɔɔ shikpɔŋ nɔ hiɛnɔkamɔ. Kɛjɛ nakai be lɛ mli kɛbaa nɛɛ, asafo babaoo lɛ anaabuamɔ lɛ etee hiɛ kɛ foi. Ani wɔdaaa shi akɛ mɛi ni asafo babaoo lɛ ji lɛ jeee teemɔŋ sane kɛha wɔ? Anɔkwale ni eji akɛ aabua gbɔmɛi anaa babaoo kɛmiijɛ jeŋmaji, akutsei, kɛ wiemɔi amli lɛ kanyaa wɔ koni wɔhe afee oya yɛ be mli ni wɔkɛ Yehowa gbɛjianɔtoo lɛ nyiɛɔ pɛpɛɛpɛ kɛyaa lɛ.
13. Mɛɛ sane titri ko ama nɔ mi yɛ St. Louis kpee lɛ shishi yɛ afi 1941?
13 Ama sane titri ni esa akɛ ekɔ adesa weku lɛ he lɛ nɔ mi yɛ St. Louis, Missouri, kpee lɛ shishi yɛ afi 1941. Eji jeŋ muu fɛɛ nɔyeli loo maŋtsɛyeli. Enɛ ji sane ni etsɛŋ esa akɛ ana naa lɛ, ni gbi kpeteŋkpele ni yɔɔ gbeyei ni akɛbaafee nakai lɛ miiba kɛ foi! Nɔ ni aha ale faŋŋ hu yɛ afi 1941 ji emuuyeli mli hiɛmɔ he sane ni kɔɔ he, ni haa wɔnyɛɔ wɔtsɔɔ he ni wɔ aŋkroaŋkroi lɛ wɔdamɔ yɛ Nyɔŋmɔ maŋtsɛyeli lɛ he lɛ.
14. Mɛni akase yɛ lumɛi ni atsĩ amɛtã yɛ Yesaia 32:1, 2 lɛ ahe yɛ majimaji ateŋ kpee ni afee yɛ afi 1950 lɛ shishi?
14 Ayoo mɛi ni lumɛi ni yɔɔ Lala 45:17 lɛ ji lɛ faŋŋ yɛ afi 1950 majimaji ateŋ kpee ni afee yɛ New York City lɛ shishi. Eji be ni wo mɔ hewalɛ waa, beni Nyɛminuu Frederick Franz wie sane nɛɛ he ni etsɔɔ mli akɛ shikpɔŋ hee lɛ nɔ lumɛi yɛ wɔteŋ lɛ. Mumɔŋ lakpɛmɔi babaoo eje kpo yɛ nakai kpee lɛ kɛ ekrokomɛi ni afee kɛnyiɛ sɛɛ lɛ ashishi. (Lala 97:11) Kwɛ bɔ ni wɔdaa shi akɛ wɔ tempɔŋ lɛ “tamɔ la ni kpɛɔ ni eyaa nɔ ekpɛɔ aahu kɛyashiɔ shwane fintiŋŋ”!
Wɔhiɛ ni Wɔɔya yɛ Wɔ Sɔɔmɔ Nitsumɔ lɛ Mli
15, 16. (a) Nɛgbɛ wɔtee hiɛ kɛyashɛ yɛ wɔ sɔɔmɔ nitsumɔ lɛ mli yɛ afi 1920 kɛ afi 1930 afii lɛ amli? (b) Mɛɛ woji ewo Kristofoi asɔɔmɔ nitsumɔ lɛ mli hewalɛ yɛ nyɛsɛɛ afii nyɔŋmai nɛɛ amli?
15 Gbɛ ni ji enyɔ ni Yehowa gbɛjianɔtoo lɛ etee hiɛ yɛ mli lɛ kɔɔ wɔ nitsumɔ titri lɛ he—Maŋtsɛyeli shiɛmɔ kɛ kaselɔ feemɔ. (Mateo 28:19, 20; Marko 13:10) Bɔni afee ni atsu nitsumɔ nɛɛ agbe naa lɛ, gbɛjianɔtoo lɛ kɛ bɔ ni ehe hiaa ni wɔlɛɛ wɔ sɔɔmɔ nitsumɔ lɛ mli lɛ ema wɔhiɛ. Awo Kristofoi fɛɛ hewalɛ yɛ afi 1922 mli koni amɛkɛ amɛhe awo shiɛmɔ nitsumɔ lɛ mli. Ekã mɔ fɛɛ mɔ nɔ akɛ eha ela lɛ akpɛ́ koni mɔ lɛ diɛŋtsɛ aná anɔkwale lɛ he odase ni ayeɔ lɛ mli gbɛfaŋnɔ. (Mateo 5:14-16) Ato gbɛjianɔ yɛ afi 1927 mli koni ato Hɔgbaa ama shi akɛ gbi ni akɛbaaya shiɛmɔ. Kɛjɛ February 1940 shishijee mli lɛ, ebafee nɔ ni afɔɔ Odasefoi namɔ yɛ gbɛjegbɛi anɔ yɛ hei ni atsuɔ nitsumɔi yɛ ni amɛkɛ The Watchtower (Buu-Mɔɔ) lɛ kɛ Consolation (amrɔ nɛɛ Awake!) lɛ miiha.
16 Akɛ wolo bibioo, Model Study, ni maa bɔ ni ehe hiaa ni afee sɛɛsaramɔi koni atsɔɔ mɛi krokomɛi Biblia mli anɔkwale lɛ ha yɛ afi 1937 mli. Ama Biblia kasemɔ nitsumɔ lɛ nɔ mi waa yɛ afii ni nyiɛ sɛɛ ba lɛ amli. Wolo ni afee ni ji “Ha Nyɔŋmɔ Afee Anɔkwafo” yɛ afi 1946 lɛ kɛ Anɔkwale ni kɛ mɔ yaa Naanɔ Wala Mli Lɛ yɛ afi 1968 lɛ wo sɔɔmɔ nitsumɔ lɛ fã nɛɛ mli hewalɛ waa. Amrɔ nɛɛ, wɔkɛ wolo ni ji Nilee Ni Kɛ Mɔ Yaa Naanɔ Wala Mli lɛ tsuɔ nii. Woji nɛɛ akasemɔ haa anáa Ŋmalɛ naa shishitoo kpakpa kɛha kaselɔi afeemɔ.
Hiɛyaa yɛ Gbɛjianɔtoo Nifeemɔi Amli Tsakemɔi Amli
17. Te Yehowa gbɛjianɔtoo lɛ etee ehiɛ eha tɛŋŋ, yɛ Yesaia 60:17 he nitsumɔ mli?
17 Gbɛ ni ji etɛ ni Yehowa gbɛjianɔtoo lɛ etee hiɛ yɛ mli lɛ kɔɔ gbɛjianɔtoo nifeemɔi amli tsakemɔi ahe. Taakɛ Yesaia 60:17 tsɔɔ lɛ, Yehowa wo shi akɛ: “Akɔɔble najiaŋ lɛ mikɛ shika aaaba, ni dade najiaŋ lɛ mikɛ jwiɛtɛi aaaba, ni tsei anajiaŋ lɛ akɔɔble, ni tɛi anajiaŋ lɛ dade; ni maŋɔ hejɔlɛ mafee onɔyelɔi, ni maŋɔ jalɛ mafee o-nukpai.” Yɛ gbalɛ nɛɛ he nitsumɔ mli lɛ, ato gbɛjianɔ koni aha Maŋtsɛyeli shiɛmɔ nitsumɔ lɛ kɛ asafoku lɛ nɔkwɛmɔ lɛ aya hiɛ.
18, 19. Mɛɛ tsakemɔi yɛ gbɛjianɔtoo mli etee nɔ kɛtsɔ afii lɛ amli?
18 Yɛ afi 1919 mli lɛ, ahala sɔɔmɔ nɔkwɛlɔ yɛ asafo fɛɛ asafo ni bi koni ato gbɛjianɔ kɛha sɔɔmɔ nitsumɔ lɛ aha amɛ lɛ mli. Enɛ wo wɔ shiɛmɔ nitsumɔ lɛ mli hewalɛ. Afo onukpai kɛ osɔfo sɛɛbii ni afɔ̃ɔ oshiki ahalaa amɛ lɛ mli yɛ afi 1932, ni ekadi demokrase nifeemɔi ni wɔtsi wɔhe kɛjɛ he kwraa lɛ. Nine shɛ nɔ kroko hu ni sa kadimɔ waa nɔ yɛ afi 1938, beni aje shishi akɛ aaahala sɔɔlɔi fɛɛ ni yɔɔ asafo lɛ mli koni ekɛ gbɛjianɔtoo kɛha teokrase halamɔ yɛ klɛŋklɛŋ Kristofoi asafo lɛ mli lɛ akpã gbee pɛpɛɛpɛ diɛŋtsɛ lɛ. (Bɔfoi lɛ Asaji 14:23; 1 Timoteo 4:14) Yɛ afi 1972 mli lɛ, ahala nɔkwɛlɔi kɛ asafoŋ sɔɔlɔi koni amɛsɔmɔ, tamɔ bɔ ni hii ni tamɔ nɛkɛ sɔmɔ yɛ klɛŋklɛŋ Kristofoi lɛ ateŋ lɛ. Yɛ nɔ najiaŋ ni aaaha nuu kome asɔmɔ akɛ asafo ko nɔkwɛlɔ lɛ, Filipibii 1:1 kɛ ŋmalɛi krokomɛi tsɔɔ akɛ, mɛi ni anaa Ŋmalɛ naa taomɔ nii kɛha nɔkwɛlɔi yɛ amɛhe lɛ feɔ onukpai akuu.—Bɔfoi lɛ Asaji 20:28; Efesobii 4:11, 12.
19 Yɛ afi 1975 mli lɛ, ato gbɛjianɔ koni Yehowa Odasefoi a-Nɔyeli Kuu lɛ ajinafoi akui akwɛ Nyɔŋmɔ gbɛjianɔtoo lɛ nitsumɔi ni yaa nɔ yɛ jeŋ fɛɛ lɛ anɔ. Ahala Nitsumɔhe Nine Ajinafoi koni amɛkwɛ nitsumɔ ni yaa nɔ yɛ amɛ shikpɔŋkukuji srɔtoi lɛ amli lɛ anɔ. Kɛjɛ nakai be lɛ mli kɛbaa nɛɛ, ágbala jwɛŋmɔ kɛtee Buu Mɔɔ Asafo lɛ nitsumɔhe yitso lɛ kɛ nitsumɔhe niji lɛ anɔ koni ‘amɛyoo nibii ni he hiaa titri lɛ.’ (Filipibii 1:9, 10) Gbɛnaa nii srɔtoi ni jwere Kristo tookwɛlɔi bibii lɛ anɔ lɛ kɔɔ hiɛnyiɛmɔ yɛ sanekpakpa shiɛmɔ nitsumɔ lɛ mli, nitsɔɔmɔ yɛ asafo lɛ mli, kɛ Nyɔŋmɔ tookuu lɛ anɔkwɛmɔ jogbaŋŋ lɛ ahe.—1 Timoteo 4:16; Hebribii 13:7, 17; 1 Petro 5:2, 3.
Yesu Hiɛnyiɛmɔ ni Ekãa Yɔɔ Mli Lɛ
20. Yehowa gbɛjianɔtoo lɛ ni wɔkɛ lɛ aaanyiɛ lɛ biɔ ni wɔyɔse mɛni yɛ Yesu gbɛhe lɛ he?
20 Yehowa gbɛjianɔtoo ni yaa ehiɛ lɛ ni wɔkɛ lɛ aaanyiɛ lɛ biɔ ni wɔyɔse Yesu Kristo nitsumɔ ni Nyɔŋmɔ kɛwo edɛŋ akɛ “asafo lɛ yitso” lɛ. (Efesobii 5:22, 23) Nɔ ni sa kadimɔ hu ji Yesaia 55:4, he ni akɛɔ wɔ akɛ: “Naa, [Yehowa] mikɛ lɛ efee odase miha majimaji lɛ, lumɔ kɛ mlawolɔ ha majimaji lɛ!” Eka shi faŋŋ akɛ Yesu le bɔ ni anyiɛɔ hiɛ. Ele etooi lɛ hu kɛ amɛ nitsumɔi. Yɛ anɔkwale mli lɛ, beni ebasara asafoi kpawo ni yɔɔ Asia Bibioo lɛ, ekɛɛ amɛ shii enumɔ akɛ: “Mile onitsumɔi lɛ.” (Kpojiemɔ 2:2, 19; 3:1, 8, 15) Yesu le wɔ hiamɔ nii hu, taakɛ e-Tsɛ ni ji Yehowa le lɛ. Dani Yesu kɛ Sɔlemɔ Nɔkwɛmɔnɔ lɛ aaaha lɛ, ekɛɛ akɛ: ‘Nyɔŋmɔ ni ji nyɛ-Tsɛ lɛ le nibii ni he hiaa nyɛ dani nyɛbiɔ lɛ.’—Mateo 6:8-13.
21. Yesu hiɛnyiɛmɔ jeɔ kpo yɛ Kristofoi asafo lɛ mli yɛ mɛɛ gbɛ nɔ?
21 Yesu hiɛnyiɛmɔ lɛ jeɔ kpo yɛ mɛɛ gbɛ nɔ? Gbɛ kome ji kɛtsɔ nɔkwɛlɔi Kristofoi, ‘gbɔmɛi ateŋ nikeenii’ lɛ anɔ. (Efesobii 4:8) Kpojiemɔ 1:16 feɔ nɔkwɛlɔi ni afɔ amɛ mu lɛ ahe mfoniri akɛ amɛyɛ Kristo ninejurɔ dɛŋ, yɛ ekudɔmɔ shishi. Ŋmɛnɛ, Yesu kudɔɔ gbɛjianɔtoo kɛha onukpai lɛ, kɛji akɛ hii nɛɛ yɛ ŋwɛi loo shikpɔŋ nɔ hiɛnɔkamɔ. Taakɛ atsɔɔ mli yɛ nikasemɔ ni tsɔ hiɛ lɛ mli lɛ, mumɔ krɔŋkrɔŋ halaa amɛ yɛ Ŋmalɛ naa taomɔ nii lɛ kɛ gbeekpamɔ naa. (1 Timoteo 3:1-7; Tito 1:5-9) Yɛ klɛŋklɛŋ afii oha lɛ mli lɛ, no mli lɛ onukpai akuu ko ni yɔɔ Yerusalem ni feɔ nɔyeli kuu lɛ kwɛɔ asafoi lɛ kɛ Maŋtsɛyeli shiɛmɔ nitsumɔ lɛ fɛɛ nɔ. Anyiɛɔ nakai nɔkwɛmɔnɔ lɛ nɔŋŋ sɛɛ yɛ Yehowa gbɛjianɔtoo lɛ mli ŋmɛnɛ.
Okɛ lɛ Anyiɛa!
22. Mɛɛ yelikɛbuamɔ Nɔyeli Kuu lɛ kɛhaa?
22 Akɛ Maŋtsɛyeli lɛ he nibii ni yɔɔ shikpɔŋ nɔ lɛ ewo “tsulɔ anɔkwafo kɛ nilelɔ” lɛ ni Yehowa Odasefoi a-Nɔyeli Kuu lɛ damɔ enajiaŋ lɛ dɛŋ. (Mateo 24:45-47) Nɔ ni Nɔyeli Kuu lɛ susuɔ he titri ji mumɔŋ fãmɔ kɛ gbɛtsɔɔmɔ ni ekɛaaha Kristofoi asafo lɛ. (Bɔfoi lɛ Asaji 6:1-6) Shi kɛji akɛ adebɔɔ naa osharai komɛi ba nanemɛi jálɔi lɛ anɔ lɛ, Nɔyeli Kuu lɛ haa mla naa gbɛjianɔ ni ato ni yɔɔ lɛ ekome loo nɔ ni fe nakai kɛ nibii ni kɛ hejɔlɛ baa haa amɛ ni asaa shiai loo Maŋtsɛyeli Asai ni efite lɛ ekoŋŋ. Kɛji ákɛ akɛ Kristofoi komɛi ye dɛŋdɛŋ loo awa amɛyi lɛ, atoɔ gbɛjianɔ koni atswa amɛ ama shi yɛ mumɔŋ. Ni abɔɔ mɔdɛŋ fɛɛ ni aaanyɛ koni aha shiɛmɔ nitsumɔ lɛ aya hiɛ ‘yɛ haomɔ bei amli.’—2 Timoteo 4:1, 2.
23, 24. Mɛni Yehowa kɛhaa be fɛɛ be ni nɔ ni baa ewebii anɔ lɛ kɔɔɔ he eko, ni mɛni esa akɛ efee wɔfaishitswaa?
23 Yehowa yaa nɔ ekɛ mumɔŋ niyenii kɛ gbɛtsɔɔmɔ ni he hiaa lɛ haa be fɛɛ be ni nɔ ni baa ewebii anɔ lɛ kɔɔɔ he eko. Nyɔŋmɔ kɛ sane shishinumɔ kɛ sɛɛyoomɔ hu haa nyɛmimɛi hii ni akɛ gbɛnaa nii ewo amɛdɛŋ lɛ koni amɛsaa amɛhe kɛha nɔyaa kɛ nibii ajajemɔ lolo yɛ teokrase gbɛjianɔtoo mli. (5 Mose 34:9; Efesobii 1:16, 17) Yehowa kɛ nibii ni he hiaa wɔ lɛ haa wɔ pɛpɛɛpɛ, bɔni afee ni wɔtsu wɔ kaselɔ feemɔ nitsumɔ lɛ ni wɔgbe wɔ sɔɔmɔ lɛ naa kwraa yɛ jeŋ fɛɛ.—2 Timoteo 4:5.
24 Wɔyɛ hekɛnɔfɔɔ kwraa akɛ Yehowa kwaŋ ewebii anɔkwafoi lɛ; ebaahere amɛyiwala kɛtsɔ “amanehulu kpeteŋkpele” lɛ mli. (Kpojiemɔ 7:9-14; Lala 94:14; 2 Petro 2:9) Wɔyɛ nɔ ni wɔɔdamɔ nɔ wɔhiɛ hekɛnɔfɔɔ ni wɔyɔɔ kɛjɛ shishijee lɛ mli kpɛŋŋ kɛyashi naagbee. (Hebribii 3:14) No hewɔ lɛ, nyɛhaa wɔtswaa wɔfai shi akɛ wɔkɛ Yehowa gbɛjianɔtoo lɛ baanyiɛ.
Te Obaaha Hetoo Oha Tɛŋŋ?
• Mɛni hewɔ wɔbaanyɛ wɔkɛɛ akɛ Yehowa gbɛjianɔtoo lɛ yaa ehiɛ be fɛɛ be lɛ?
• Mɛɛ odaseyeli yɔɔ ni tsɔɔ akɛ Nyɔŋmɔ webii náa mumɔŋ shishinumɔ ni yaa hiɛ mli ŋɔɔmɔ?
• Kristofoi asɔɔmɔ nitsumɔ lɛ etee hiɛ yɛ mɛɛ gbɛ nɔ?
• Mɛɛ nibii amli tsakemɔi ni amɛba yɛ amɛbe naa pɛpɛɛpɛ afee yɛ gbɛjianɔtoo nifeemɔi amli yɛ Yehowa tsuji ateŋ?
[Nikasemɔ lɛ he Sanebimɔi]
[Mfoniri ni yɔɔ baafa 17]
Taakɛ David ji lɛ, wɔnyɛŋ wɔwie Yehowa naakpɛɛ nitsumɔi lɛ fɛɛ he
[Mfoniri ni yɔɔ baafa 18]
Nyɔŋmɔ asafoku lɛ ená tsakemɔi ni baa yɛ ebe naa pɛpɛɛpɛ yɛ gbɛjianɔtoo nifeemɔi amli lɛ he sɛɛ