Yehowa Odasefoi—Amɛkɛ Shidaamɔ ni Yɔɔ Shiŋŋ Miiya Amɛhiɛ!

Daa Afi Kpee He Amaniɛbɔɔ

ANAA Yehowa Odasefoi akɛ Kristofoi ni damɔ shi shiŋŋ, yɛ nɛkɛ yiŋkɔshikɔshifeemɔ kɛ ŋwanejee gbii nɛɛ amli. Afee enɛ faŋŋ yɛ Watch Tower Bible and Tract Society of Pennsylvania lɛ daa afi kpee ní afee yɛ Jersey City, New Jersey, Assembly Hall of Jehovah’s Witnesses lɛ mli yɛ Hɔɔ, October 7, 2000. *

Sɛinɔtanɔ John E. Barr, ni ji Yehowa Odasefoi a-Nɔyeli Kuu lɛ mlinyo lɛ wie yɛ ehiɛkpamɔ wiemɔ lɛ mli akɛ: “Yɛ mɛi akpekpei akpei abɔ ni yɔɔ shikpɔŋ nɔ lɛ ateŋ lɛ, wɔle ni wɔheɔ wɔyeɔ akɛ amrɔ nɛɛ akɛ Yehowa suɔmɔ Bi, Kristo Yesu eta maŋtsɛsɛi nɔ yɛ ŋwɛi, ni eeye nɔ yɛ ehenyɛlɔi ateŋ.” Akɛ amaniɛbɔi ekpaa ni yɔɔ miishɛɛ ni jɛ je lɛŋ fɛɛ ni maa shidaamɔ ni yɔɔ shiŋŋ ni tamɔ nɛkɛ nɔ mi lɛ he odaseyeli hã.

Biblia Mli Anɔkwalei lɛ ní Akɛye Mumɔi Atsɛmɔ nɔ Kunim yɛ Haiti

Mumɔi atsɛmɔ fa babaoo diɛŋtsɛ yɛ Haiti. Nitsumɔhe Nine Ajinafoi Akuu lɛ sɛinɔtalɔ John Norman gba akɛ: “Bei pii lɛ, gbɔmɛi kɛ amɛhe woɔ wɔŋjamɔ kusumii amli nifeemɔ mli koni amɛkɛbu amɛhe.” Wɔŋtsɛ ko yiŋ fee lɛ kɔshikɔshi beni enane kome fo yɛ oshara ko mli lɛ. Ebi ehe akɛ, ‘Te aaafee tɛŋŋ ni enɛ aba minɔ kɛji mumɔi lɛ miibu mihe?’ Taakɛ mɛi krokomɛi babaoo ji lɛ, Yehowa Odasefoi tsɔɔ nuu nɛɛ anɔkwale lɛ ni aye abua lɛ ni eye ehe kwraa kɛjɛ mumɔi atsɛmɔ he. Anɔkwale ni eji akɛ yɛ April 19, 2000 lɛ nɔ lɛ, mɛi ni shɛɔ Maŋtsɛyeli shiɛlɔi ayibɔ ni yɔɔ nakai shikpɔŋ lɛ nɔ lɛ toi ejwɛ ba Kristo gbele lɛ Kaimɔ lɛ shishi ji nɔ ni tsɔɔ akɛ abaanyɛ aná nɔyaa yɛ Haiti.

Ekãafeemɔ yɛ Korea Shikpɔŋkuku Agbo lɛ Nɔ

Yehowa Odasefoi ni naa shɛɔ oha mlijaa 40 yɛ be-fɛɛ sɔɔmɔ lɛ mli yɛ Korea. Nitsumɔhe Nine Ajinafoi Akuu lɛ sɛinɔtalɔ Milton Hamilton gba akɛ: “Yɛ nɛkɛ shiɛlɔi ni fa babaoo nɛɛ ahewɔ lɛ, wɔtsuɔ wɔshikpɔŋkuku ní emli gbɔmɛi fe akpekpei 47 lɛ fɛɛ mli nii aaafee shikome daa nyɔŋ.” Nɔyaa ni anáa yɛ mumuii awiemɔ asafoi amli lɛ ji nɔ ni sa kadimɔ waa. Yɛ mumuii awiemɔ kpokpaa kome mli lɛ, afeɔ shia Biblia mli nikasemɔi 800. Kɛ aja mli lɛ, shiɛlɔ fɛɛ shiɛlɔ feɔ nikasemɔ kome. Dɔlɛ sane ji akɛ, aakã he aawo nyɛmimɛi oblahii atsuŋ lolo yɛ maŋkwramɔŋ saji ní amɛkɛ amɛhe wooo mli lɛ hewɔ. Kɛlɛ, onukpai ni kwɛɔ tsuŋwoohei lɛ anɔ lɛ kɛ nɛkɛ Kristofoi anɔkwafoi nɛɛ yeɔ jogbaŋŋ, ni bei pii lɛ ahaa amɛ nitsumɔi ni biɔ hekɛnɔfɔɔ.

 Mexico Nɔyaa Taomɔ Nii lɛ ní Aaatsu He Nii

Maŋtsɛyeli shiɛlɔi ni fa fe fɛɛ ni ji 533,665 bu amɛshiɛmɔ nitsumɔ lɛ he akɔntaa yɛ Mexico yɛ August 2000 mli. Aŋkroaŋkroi ni fa fe nakai yibɔ lɛ toi etɛ ba Kaimɔ lɛ shishi. Nitsumɔhe Nine Ajinafoi Akuu lɛ sɛinɔtalɔ Robert Tracy jaje akɛ: “Oti ni ma wɔhiɛ afi nɛɛ ji ni wɔma Maŋtsɛyeli Asai 240 kɛfata he.” Ekɛfata he akɛ: “Mɛi babaoo he miihia wɔ lolo.”

Oblahii kɛ oblayei ni yɔɔ Yehowa Odasefoi ateŋ yɛ Mexico lɛ feɔ nɔkwɛmɔnɔ kpakpa. Katolik osɔfo ko wie yɛ oblanyo ko he akɛ: “Masumɔ ni maná mɔ kome pɛ ni tamɔ lɛ yɛ misɛɛnyiɛlɔi lɛ ateŋ. Mináa gbɔmɛi nɛɛ ahe miishɛɛ yɛ amɛshwelɛ ni mli wa kɛ Biblia lɛ ni amɛkɛtsuɔ nii yɛ nilee mli lɛ hewɔ. Amɛkɛ amɛwala tete po fã Nyɔŋmɔ he.”

Emuuyeli Mlihiɛmɔ yɛ Basabasafeemɔ Shihilɛ Mli yɛ Sierra Leone

Kɛjɛ April 1991, beni maŋ ta fɛ yɛ Sierra Leone lɛ, agbe gbɔmɛi akpekpei abɔ, apila mɛi, loo aha amɛje kpa. Nitsumɔhe Nine Ajinafoi Akuu lɛ sɛinɔtalɔ Bill Cowan bɔ amaniɛ akɛ: “Ta kɛ shihilɛ ni mli wa ená hewalɛ waa yɛ gbɔmɛi anɔ. Mɛi babaoo ni kulɛ amɛyɔɔ shikpilikpii yɛ wɔshɛɛ sane lɛ he lɛ kɛ miishɛɛ boɔ toi amrɔ nɛɛ. Ejeee nɔ ni efɔɔɔ kaa akɛ mɛi aaanyiɛ kɛba wɔ Maŋtsɛyeli Asai lɛ anɔ kɛba amɛ klɛŋklɛŋ kpeei yɛ be mli ni afɔ̃ko amɛ nine. Bei pii lɛ, awaa nyɛmimɛi lɛ yɛ gbɛjegbɛ lɛ nɔ ni abiɔ Biblia mli nikasemɔ.” Yɛ maŋ lɛ shihilɛ ní etee nɔ efee basabasa lɛ fɛɛ sɛɛ lɛ, Maŋtsɛyeli shiɛmɔ nitsumɔ lɛ miiwo yibii yɛ Sierra Leone.

Tsumaa Nitsumɔ Agbo He Gbɛjianɔtoo yɛ South Africa

Amrɔ nɛɛ, Maŋtsɛyeli Asai akpei babaoo ahe miihia yɛ shikpɔŋkuku ni South Africa nitsumɔhe nine lɛ kwɛɔ nɔ lɛ mli. Amamɔ asai ohai abɔ momo. Nitsumɔhe Nine Ajinafoi Akuu lɛ mlinyo John Kikot wie akɛ: “Yɛ nɔ najiaŋ ni abaakpe yɛ tsũi koikoi amli loo yɛ tso ko shishi, taakɛ afeɔ yɛ be ni eho lɛ mli lɛ, wɔnyɛmimɛi lɛ nyɛɔ amɛkpeɔ yɛ hei ni sa kɛ emli sɛii kpakpai. Eyɛ mli akɛ Maŋtsɛyeli Asai nɛɛ ateŋ babaoo bɛ haŋtsii moŋ, shi bei pii lɛ amɛbafeɔ tsũi ni abuɔ waa yɛ akutso lɛ mli. Yɛ hei komɛi lɛ, ana akɛ beni ama Maŋtsɛyeli Asa lɛ agbe naa sɛɛ lɛ, asafo lɛ bɔɔ he nɔ ni fe toi enyɔ yɛ afi ni nyiɛ sɛɛ lɛ mli.”

Odasefoi Ayinɔ Hee ko yɛ Ukraine

Yɛ afii 2000 sɔɔmɔ afi lɛ mli lɛ, aná shiɛlɔi ayibɔ ni fe fɛɛ ni ji 112,720 yɛ shikpɔŋ nɛɛ nɔ. Amɛteŋ mɛi ni fa fe 50,000 ekase Biblia mli anɔkwale lɛ yɛ afii enumɔ ni eho lɛ mli. John Didur ni ji Nitsumɔhe Nine Ajinafoi Akuu lɛ sɛinɔtalɔ lɛ wie akɛ: “Eji anɔkwale akɛ, Yehowa etée oblahiaŋ Odasefoi ayinɔ hee ko shi koni amɛjaje egbɛi lɛ!” Ekɛfata he akɛ: “Yɛ afii enyɔ ni eho lɛ amli lɛ, wɔkɛ woji tɛtrɛbii ni fa fe akpekpei 50, ni kɛ maŋ lɛ mli bii ayibɔ yeɔ egbɔ lɛ ehã. Daa nyɔŋ nɔ lɛ, kɛ aja mli lɛ, wɔnine shɛɔ woji akpe nɔ kɛjɛɔ gbɔmɛi ni yɔɔ wiemɔ lɛ he miishɛɛ lɛ adɛŋ ni miibi saji babaoo.”

Gbɛjianɔtoo lɛ Mli Nibii Krokomɛi ni Kanyaa Mɔ

Daniel Sydlik, ni ji Nɔyeli Kuu lɛ mlinyo lɛ hã wiemɔ ko ni gbalaa mɔ jwɛŋmɔ waa. Saneyitso ni ji “Bɔ ni Esoro Nɔyeli Kuu lɛ yɛ Nitsumɔ ni Akɛwo Mla Shishi lɛ He,” ni je kpo yɛ wolo tɛtrɛɛ nɛɛ mli lɛ, damɔ nakai wiemɔ ni kɛ adafitswaa haa lɛ nɔ.

Theodore Jaracz ni yɔɔ Nɔyeli Kuu lɛ mli lɛ hã wiemɔ ni kanyaa sane hesusumɔ ni yitso ji “Nɔkwɛlɔi kɛ Asafoŋ Sɔɔlɔi ni Ahalaa Amɛ yɛ Teokrase Gbɛ Nɔ.” Saneyitsei lɛ ateŋ ekome ni je kpo yɛ wolo tɛtrɛɛ nɛɛ mli lɛ damɔ nakai sane lɛ nɔ.

Nɔ ni fata daa afi kpee lɛ he hu ji wiemɔ ni kanyaa mɔ ni Nɔyeli Kuu lɛ mlinyo David Splane hã ni kɔɔ afi ŋmalɛ kɛha afi 2001 lɛ he. Enɛ damɔ bɔfo Paulo wiemɔi ni ji: ‘Nyɛdamɔa shi shiŋŋ akɛ mɛi ni yɔɔ Nyɔŋmɔ suɔmɔnaa nii lɛ fɛɛ mli hemɔkɛyeli’ lɛ nɔ. (Kolosebii 4:12) Yehowa Odasefoi ni yɔɔ jeŋ fɛɛ lɛ etswa amɛfai shi akɛ amɛbaafee nakai yɛ be mli ni amɛkɛ anɔkwayeli shiɛɔ Nyɔŋmɔ Maŋtsɛyeli lɛ he sanekpakpa lɛ yɛ jeŋ fɛɛ lɛ.—Mateo 24:14.

[Shishigbɛ niŋmaa]