Ani Oha Anɔkwale lɛ Etsɔ Onɔ̃?
Ani Oha Anɔkwale lɛ Etsɔ Onɔ̃?
“Nyɛkɛ nyɛjwɛŋmɔ ní etsɔ ehee lɛ atsakea nyɛhe, koni nyɛyoo nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.”—ROMABII 12:2.
1, 2. Mɛni hewɔ ebɛ mlɛo akɛ mɔ ko aaafee anɔkwa Kristofonyo ŋmɛnɛ lɛ?
ÁKƐ aaafee anɔkwa Kristofonyo yɛ naagbee gbii—ni ji “jaramɔ bei”—nɛɛ amli lɛ bɛ mlɛo. (2 Timoteo 3:1) Yɛ anɔkwale mli lɛ, kɛji mɔ ko baanyiɛ Kristo nɔkwɛmɔnɔ lɛ sɛɛ lɛ, esa akɛ mɔ lɛ aye je lɛ nɔ kunim. (1 Yohane 5:4) Kaimɔ nɔ ni Yesu wie yɛ Kristofoi agbɛ lɛ he lɛ, akɛ: “Nyɛbotea agbó fintɔ̃ɔ lɛ mli! Ejaakɛ agbó ni lɛɛ kɛ gbɛ tɛtrɛɛ ji nɔ ni kɛ mɔ yaa hiɛkpatamɔ mli lɛ, ni mɛi ní boteɔ mli lɛ fá pii. Shi agbó fintɔ̃ɔ kɛ gbɛ ni etsa ji nɔ ni kɛ mɔ yaa wala mli lɛ, ni mɛi fioo ji mɛi ni naa no.” Ewie hu akɛ: “Kɛji mɔ ko miisumɔ akɛ enyiɛ misɛɛ lɛ, ha ni ekwa ehe, ní ewó esɛŋmɔtso lɛ etere daa nɛɛ kɛnyiɛ misɛɛ.”—Mateo 7:13, 14; Luka 9:23.
2 Kɛ́ Kristofonyo lɛ baná ele gbɛ ní etsa ní kɛ mɔ yaa wala mli lɛ, kaa ní ekɛkpeɔ yɛ no sɛɛ ji ní eya nɔ enyiɛ nɔ daa. Mɛni hewɔ eji kaa lɛ? Eji kaa ejaakɛ wɔ henɔjɔɔmɔ kɛ baptisimɔ lɛ haa wɔbafeɔ mɛi ní Satan kɛ eŋaa gbɛ̀i, loo eŋaatsɔɔi ní yɔɔ nigii lɛ tsuɔ nii eshiɔ. (Efesobii 6:11; NW shishigbɛ niŋmaa) Ekadiɔ wɔgbɔjɔmɔi lɛ, ni ebɔɔ mɔdɛŋ akɛ ekɛaatsu nii ní ekɛfite wɔ mumɔŋ shidaamɔ. Ejaakɛ kɛ́ hoo lɛ, eka akɛ ebaafite Yesu mumɔŋ shidaamɔ, no hewɔ lɛ mɛni hewɔ wɔ lɛ ebaaha wɔye wɔhe?—Mateo 4:1-11.
Satan Ŋaa Gbɛ̀i Lɛ
3. Mɛɛ gbɛ nɔ Satan tsɔ edũ yiŋkɔshikɔshifeemɔi ewo Hawa yiŋ?
3 Ŋaa gbɛ kome ní Satan kɛtsuɔ nii ji ní edũ yiŋkɔshikɔshifeemɔ ewo wɔjwɛŋmɔ mli. Etaoɔ gbɔjɔmɔi yɛ wɔmumɔŋ tawuu nii lɛ mli. Kɛjɛ shishijee kwraa lɛ, ekɛ nakai ŋaa gbɛ lɛ tsu nii yɛ Hawa gbɛfaŋ, ni ebi lɛ akɛ: “Lɛɛlɛŋ, Nyɔŋmɔ kɛɛ akɛ: Nyɛkaye trom lɛ mli tsei ayibii lɛ fɛɛ eko lɛ?” (1 Mose 3:1) Yɛ gbɛ kroko nɔ lɛ, Satan miibi akɛ, ‘Ani eeenyɛ eba lɛɛlɛŋ akɛ Nyɔŋmɔ kɛ naatsii ní tamɔ nɛkɛ aaafɔ̃ nyɛnɔ? Ani ebaatsĩ nyɛnaa ní nyɛkaná nɔ ko kpakpa ní tamɔ nɛkɛ? Ejaakɛ, Nyɔŋmɔ le akɛ gbi nɔ ní nyɛaaye tso lɛ yibii lɛ eko lɛ, nyɛhiŋmɛii baagbele, ni nyɛbaatsɔmɔ tamɔ Nyɔŋmɔ, ni nyɛbaale ekpakpa kɛ efɔŋ!’ Satan dũ yiŋkɔshikɔshifeemɔ wu ewo amɛyiŋ, ni emɛ koni ekwɛ̃.—1 Mose 3:5.
4. Mɛɛ yiŋkɔshikɔshifeemɔi baanyɛ asa mɛi komɛi ahe ŋmɛnɛ?
4 Mɛɛ gbɛ nɔ Satan tsɔɔ ekɛ ŋaa gbɛ nɛɛ tsuɔ nii ŋmɛnɛ? Kɛ́ wɔku wɔhiɛ wɔfɔ̃ wɔ Biblia kanemɔ, wɔ teemɔŋ nikasemɔ, wɔ sɔlemɔi, kɛ wɔ Kristofoi asɔɔmɔ nitsumɔ lɛ kɛ kpeei anɔ lɛ, no lɛ wɔmiiha hegbɛ koni yiŋkɔshikɔshifeemɔi ní mɛi krokomɛi teeɔ lɛ shi lɛ aná wɔnɔ hewalɛ. Ákɛ nɔkwɛmɔnɔ lɛ: “Te wɔfeɔ tɛŋŋ wɔleɔ akɛ anɔkwale lɛ nɛ, taakɛ Yesu tsɔɔ lɛ?” “Ani naagbee gbii lɛ nɛ lɛɛlɛŋ? Ejaakɛ kɛ́ hoo lɛ, amrɔ nɛɛ wɔbote afii ohai 21 lɛ mli momo.” “Ani Harmagedon ebɛŋkɛ kpaakpa, aloo eyɛ wɔsɛɛ be ní yɔɔ shɔŋŋ?” Kɛ́ yiŋkɔshikɔshifeemɔi ní tamɔ nɛkɛ te shi lɛ, mɛni wɔbaanyɛ wɔfee ní wɔkɛjie kɛjɛ jɛmɛ?
5, 6. Kɛji yiŋkɔshikɔshifeemɔi te shi lɛ, mɛni esa akɛ wɔfee?
5 Yakobo kɛ ŋaawoo ní anyɛɔ akɛtsuɔ nii ha beni eŋma akɛ: “Kɛ́ nilee eshwɛ nyɛteŋ mɔ ko lɛ, ékpa Nyɔŋmɔ ni haa mɛi fɛɛ faa ni ewieee mɔ ko hiɛ lɛ fai, ni aaaŋɔha lɛ. Shi ha ní ekpa fai yɛ hemɔkɛyeli mli, ni ekaje nɔ ko nɔ ko he ŋwane; ejaakɛ ŋwanejelɔ lɛ etamɔ ŋshɔke ní kɔɔyɔɔ tswaa kɛyaa kɛbaa. Ejaakɛ nakai gbɔmɔ ko akasusu akɛ eeená nɔ ko yɛ Nuntsɔ lɛ dɛŋ; jwɛŋmɔi enyɔnyɔtsɛ ko fĩii shi yɛ egbɛi fɛɛ mli.”—Yakobo 1:5-8.
6 Belɛ, mɛni esa akɛ wɔfee? Esa akɛ ‘wɔya nɔ wɔkpa Nyɔŋmɔ fai’ yɛ sɔlemɔ mli kɛha hemɔkɛyeli kɛ sane shishinumɔ koni wɔwo mɔdɛŋ ní wɔbɔɔ yɛ teemɔŋ nikasemɔ ní wɔfeɔ kɛhaa sanebimɔi loo yiŋkɔshikɔshifeemɔi ahetoo lɛ mli hewalɛ. Wɔbaanyɛ wɔbi yelikɛbuamɔ kɛjɛ mɛi ní he wa yɛ hemɔkɛyeli lɛ mli lɛ hu adɛŋ, ní wɔkaje ŋwane kɔkɔɔkɔ akɛ Yehowa kɛ sɛɛfimɔ ní he hiaa wɔ lɛ baaha wɔ. Yakobo wie hu akɛ: “No hewɔ lɛ nyɛbaa nyɛhe shi nyɛhaa Nyɔŋmɔ; nyɛtea shi nyɛwoa abonsam, ni eeejo nyɛnaa foi. Nyɛtsia nyɛbɛŋkɛa Nyɔŋmɔ, ni eeetsi ebɛŋkɛ nyɛ.” Hɛɛ, kɛ́ wɔtsi wɔbɛŋkɛ Nyɔŋmɔ kɛtsɔ nikasemɔ kɛ sɔlemɔ nɔ lɛ, no lɛ wɔ yiŋkɔshikɔshifeemɔi lɛ sɛɛ baafo kwraa.—Yakobo 4:7, 8.
7, 8. Mɛni ji shishijee kadimɔ nii komɛi ní anyɛɔ akɛnaa jamɔ gbɛ ní Yesu tsɔɔ lɛ, ni namɛi shɛɔ nɛkɛ kadimɔ nii nɛɛ ahe?
7 Ŋɔɔ sanebimɔ nɛɛ ákɛ nɔkwɛmɔnɔ: Te wɔfeɔ tɛŋŋ wɔleɔ akɛ wɔmiitsu jamɔ gbɛ ní Yesu tsɔɔ lɛ he nii hu? Mɛɛ kadimɔ nii esa akɛ asusu he, kɛha sane nɛɛ hetoohamɔ? Biblia lɛ tsɔɔ faŋŋ akɛ esa akɛ anɔkwa Kristofoi ajie anɔkwa suɔmɔ kpo yɛ amɛteŋ. (Yohane 13:34, 35) Esa akɛ amɛha Nyɔŋmɔ gbɛi, Yehowa lɛ he atse. (Yesaia 12:4, 5; Mateo 6:9) Ni esa akɛ amɛha ale nakai gbɛi lɛ.—2 Mose 3:15; Yohane 17:26.
8 Anɔkwa jamɔ kadimɔ nii kroko hu ji bulɛ ní eyɔɔ kɛha Nyɔŋmɔ Wiemɔ, ni ji Biblia lɛ. No ji wolo krɛdɛɛ ní jieɔ Nyɔŋmɔ su kɛ eyiŋtoi akpo etsɔɔ. (Yohane 17:17; 2 Timoteo 3:16, 17) Kɛfata he lɛ, anɔkwa Kristofoi jajeɔ Nyɔŋmɔ Maŋtsɛyeli lɛ amɛtsɔɔ ákɛ adesai ahiɛnɔkamɔ koome pɛ ní yɔɔ kɛha naanɔ wala namɔ yɛ paradeiso shikpɔŋ nɔ. (Marko 13:10; Kpojiemɔ 21:1-4) Amɛtsiɔ amɛhe kwraa kɛjɛɔ je nɛɛ maŋkwramɔ saji ní fiteɔ mɔ lɛ kɛ eshihilɛ ní buleɔ mɔ lɛ ahe. (Yohane 15:19; Yakobo 1:27; 4:4) Namɛi yɔɔ ŋmɛnɛ ní amɛshɛɔ kadimɔ nii nɛɛ ahe lɛɛlɛŋ? Anɔkwa saji lɛ maa nɔ mi faŋŋ akɛ hetoo koome pɛ yɔɔ—Yehowa Odasefoi.
Kɛji Yiŋkɔshikɔshifeemɔi yɛ Lolo Hu?
9, 10. Mɛni wɔbaanyɛ wɔfee ní wɔkɛye yiŋkɔshikɔshifeemɔi ní sɛɛ tsɛɔ lɛ anɔ?
9 Shi kɛji wɔna akɛ wɔmiiná yiŋkɔshikɔshifeemɔi ní mli wa hu? Belɛ mɛni esa akɛ wɔfee? Nilelɔ Maŋtsɛ Salomo kɛ hetoo lɛ haa akɛ: “Mibi, kɛ́ omɔ miwiemɔi lɛ amli, ní okɛ mikitai lɛ to omasɛi, koni oba otoi shi oha nilee, ní okɛ otsui ha sanesɛɛkɔmɔ; hɛɛ, kɛ́ obolɔ otsɛ́ sɛɛyoomɔ, ní owó ogbee nɔ oha sane shishinumɔ, kɛji otao esɛɛgbɛ tamɔ jwiɛtɛi, ní otao tamɔ jwetrii ní aŋɔtee lɛ: No dani ooonu Yehowa gbeyeishemɔ shishi, ni oooná Nyɔŋmɔ he nilee.”—Abɛi 2:1-5, wɔma efã ko nɔ mi.
10 Ani jeee susumɔ ní yɔɔ naakpɛɛ diɛŋtsɛ nɛ? Kɛ́ wɔmiisumɔ ní wɔbo Nyɔŋmɔ nilee lɛ toi jogbaŋŋ lɛ, no lɛ ‘wɔbaaná Nyɔŋmɔ he nilee.’ Hɛɛ, wɔnine baanyɛ ashɛ jeŋ muu fɛɛ Nuntsɔ Maŋtsɛ lɛ he nilee nɔ kɛji wɔmiisumɔ ní wɔbo ewiemɔi atoi ní wɔnu he akɛ amɛjara wa waa kɛha wɔ. Enɛ tsɔɔ wɔhe ní wɔɔtsɔ kɛya Yehowa ŋɔɔ yɛ sɔlemɔ mli kɛ agbɛnɛ kɛtsɔ teemɔŋ nikasemɔ nɔ. Jwetrii ní aŋɔtée ní yɔɔ e-Wiemɔ lɛ mli lɛ baanyɛ ajie yiŋkɔshikɔshifeemɔi fɛɛ kɛya kwraa, ni ebaaye ebua wɔ ní wɔna anɔkwale la lɛ.
11. Te yiŋkɔshikɔshifeemɔ sa Elisha tsulɔ lɛ he eha tɛŋŋ?
11 Anaa bɔ ni sɔlemɔ ye ebua Nyɔŋmɔ tsulɔ ko ní sheɔ gbeyei, ni eyiŋ feɔ lɛ kɔshikɔshi hu lɛ he nɔkwɛmɔnɔ ní yɔɔ faŋŋ yɛ 2 Maŋtsɛmɛi 6:11-18. Elisha tsulɔ lɛ bɛ mumɔŋ shishinumɔ. Enyɛɛɛ ena akɛ mumɔŋ tai babaoo eba ní amɛbaaye amɛbua Nyɔŋmɔ gbalɔ, ní no mli lɛ Aram asraafoi ebawo amɛhe ká lɛ. Tsulɔ lɛ kɛ gbeyeishemɔ bolɔ akɛ: “Ao, minuntsɔ! té wɔbaafee tɛŋŋ ko?” Te Elisha ha hetoo eha tɛŋŋ? “Kaashe gbeyei; ejaakɛ mɛi ni kɛ wɔ yɔɔ lɛ fá fe mɛi ni kɛ amɛ yɔɔ lɛ.” Shi te tsulɔ lɛ baafee tɛŋŋ ená nɔmimaa? Enaaa ŋwɛi tai babaoo lɛ.
12. (a) Mɛɛ gbɛ nɔ atsɔ ajie tsulɔ lɛ yiŋkɔshikɔshifeemɔi lɛ? (b) Mɛɛ gbɛ nɔ wɔɔtsɔ wɔjie yiŋkɔshikɔshifeemɔi ní ekolɛ wɔɔná lɛ kwraa?
12 “Elisha sɔle ni ekɛɛ: Yehowa, miikpao fai, gbelemɔ ehiŋmɛii ni ena nii! Ni Yehowa gbele oblanyo lɛ hiŋmɛii, ni ena nii: ni naa, gɔŋ lɛ nɔ eyi tɔ́ kɛ la okpɔŋɔi kɛ shwiilii kɛbɔle Elisha kɛkpe.” Yɛ nakai shihilɛ lɛ mli lɛ, Yehowa ha tsulɔ lɛ na ŋwɛi tai babaoo ní buɔ Elisha he lɛ. Shi kɛlɛ, esaaa akɛ wɔkpaa ŋwɛi yelikɛbuamɔ ní tamɔ nakai nɔŋŋ gbɛ ŋmɛnɛ. Kaimɔ akɛ, no mli lɛ nakai gbalɔ lɛ tsulɔ lɛ bɛ Biblia muu lɛ fɛɛ ní ebaanyɛ ekase koni no awo ehemɔkɛyeli hewalɛ. Shi wɔ lɛ, wɔyɛ Biblia lɛ. Kɛ́ wɔkɛtsu nii jogbaŋŋ kɛmɔ shi lɛ, no lɛ ebaawo wɔhemɔkɛyeli lɛ hewalɛ nakai nɔŋŋ. Ákɛ nɔkwɛmɔnɔ lɛ, ekolɛ wɔbaasusu saji babaoo ní tsɔɔ bɔ ni Yehowa ji yɛ eŋwɛi gwabɔɔ lɛ mli lɛ he. Enɛ jieɔ yiŋkɔshikɔshifeemɔ kɛyaa kwraa akɛ Yehowa yɛ ŋwɛi gbɛjianɔtoo ní fĩɔ etsuji asɛɛ yɛ jeŋ muu fɛɛ tsɔsemɔ nitsumɔ lɛ mli ŋmɛnɛ.—Yesaia 6:1-4; Ezekiel 1:4-28; Daniel 7:9, 10; Kpojiemɔ 4:1-11; 14:6, 7.
Kwɛmɔ Jogbaŋŋ yɛ Satan Ŋaatsɔɔi lɛ Ahe!
13. Mɛɛ gbɛ̀i anɔ Satan tsɔɔ ebɔɔ mɔdɛŋ ní egbɔjɔ bɔ ni wɔhiɛ anɔkwale lɛ mli kpɛŋŋ lɛ mli?
13 Mɛɛ gbɛ̀i krokomɛi Satan tsɔɔ nɔ egbɔjɔɔ wɔmumɔŋ shidaamɔ kɛ bɔ ni wɔhiɛɔ anɔkwale lɛ mli kpɛŋŋ lɛ ekomɛi? Amɛteŋ ekome ji jeŋba shara, yɛ gbɛ̀i srɔtoi ní ejeɔ kpo yɛ mli lɛ fɛɛ mli. Yɛ ŋmɛnɛ jeŋ ní bɔlɛnamɔ eyí amɛjwɛŋmɔ mli obɔ̃ nɛɛ mli lɛ, nɔ ni atsɛ́ɔ lɛ suɔmɔ kpojiemɔ kɛha mɔ kroko, (ní ji gbalafitemɔ wiemɔ ní ahà hiɛ), kɛ bɔlɛnamɔ yɛ gbɛkɛ kome pɛ mli, (ni ji be kukuoo mli ajwamaŋbɔɔ lɛ) ebatsɔ daa gbi nifeemɔ yɛ yinɔ ní sumɔɔ ŋɔɔmɔyeli, ní etswa amɛfai shi akɛ amɛbaaná amɛhe miishɛɛ yɛ gbɛ fɛɛ gbɛ nɔ nɛɛ mli. Sinii, TV, kɛ vidioi woɔ shihilɛ gbɛ nɛɛ he hewalɛ. Bɔlɛnamɔ he mfonirii egbɛ eshwã kɛtsɔ adafitswaa gbɛ̀i fɛɛ anɔ, titri lɛ Internet lɛ. Kaa miimɛ mɛi ní taoɔ ní amɛle nibii amli lɛ.—1 Tesalonikabii 4:3-5; Yakobo 1:13-15.
14. Mɛni hewɔ Kristofoi komɛi egbee Satan ŋaatsɔɔi amli lɛ?
14 Kristofoi komɛi eŋmɛ gbɛ ni bɔ ni amɛtaoɔ ní amɛle nibii amli lɛ ená amɛnɔ hewalɛ waa, ni efite amɛjwɛŋmɔi kɛ amɛtsuii kɛtsɔ bɔlɛnamɔ he mfonirii fɔji, loo mfonirii ní yɔɔ nyaŋemɔ diɛŋtsɛ po lɛ akwɛmɔ nɔ. Amɛŋmɛ gbɛ ni amɛgbee Satan tsɔne ní lakaa mɔ lɛ mli. Bei pii lɛ, nakai feemɔ haa amɛyasháa shi yɛ mumɔŋ. Mɛi ní tamɔ nakai lɛ ehiii shi akɛ ‘abifabii yɛ efɔŋ gbɛfaŋ.’ Amɛtsɔmɔko ‘mɛi ní edara yɛ jwɛŋmɔ gbɛfaŋ.’ (1 Korintobii 14:20) Daa afi lɛ, mɛi akpei abɔ náa nibii ní jɛɔ shishitoo mlai kɛ tɛi ní afolɔ ashwie shi yɛ Nyɔŋmɔ Wiemɔ lɛ mli ní amɛkɛtsuuu nii lɛ mli baa lɛ mli amanehulu. Amɛkpoo akɛ amɛaawo “Nyɔŋmɔ tawuu nii lɛ fɛɛ” ni amɛha ehi amɛhe be fɛɛ be.—Efesobii 6:10-13; Kolosebii 3:5-10; 1 Timoteo 1:18, 19.
Buu Nɔ ni Wɔyɔɔ lɛ akɛ Ejara Wa Waa
15. Mɛni hewɔ ekolɛ ewa kɛha mɛi komɛi akɛ amɛhiɛ aaasɔ amɛmumɔŋ gboshinii lɛ?
15 Yesu kɛɛ akɛ: “Nyɛaale anɔkwale lɛ, ni anɔkwale lɛ aaaha nyɛye nyɛhe.” (Yohane 8:32) Odasefoi lɛ ateŋ mɛi babaoo ji mɛi ní ehe bahia ní amɛtsi amɛhe kwraa kɛjɛ amɛ tsutsu shihilɛ gbɛ kɛ jamɔ gbɛjianɔtoi ní amɛkɛbɔɔ lɛ ahe. No hewɔ lɛ, ekolɛ amɛhiɛ baasɔ heyeli ní anɔkwale lɛ kɛbaa lɛ amrɔ nɔŋŋ. Yɛ gbɛ kroko nɔ lɛ, ekolɛ ewa kɛha oblahii kɛ oblayei bibii ní fɔlɔi ní yɔɔ anɔkwale lɛ mli lɛ tsɔse amɛ lɛ akɛ amɛhiɛ aaasɔ amɛmumɔŋ gboshinii lɛ. Amɛfeko apasa jamɔ loo jeŋ ní maa akɔnɔ kɛ miishɛɛnamɔ sɛɛdii, tsofai fɔji kɛ nitsumɔ, kɛ jeŋba shara nɔ mi babaoo nɛɛ fã dã. Enɛ hewɔ lɛ, ekolɛ amɛnaaa srɔtofeemɔ ní mli kã shi faŋŋ, ní yɔɔ wɔ mumɔŋ paradeiso lɛ kɛ Satan jeŋ ní ekpɔtɔ nɛɛ teŋ lɛ. Amɛteŋ mɛi komɛi po ŋmɛɛɔ amɛhe amɛhaa kaa ní akaa amɛ ní amɛyasa je lɛ ebɔɔ lɛ naa koni amɛkwɛ nɔ ni amɛsusuɔ akɛ eeŋmɛɛ amɛ lɛ!—1 Yohane 2:15-17; Kpojiemɔ 18:1-5.
16. (a) Mɛɛ saji wɔbaanyɛ wɔbi wɔhe? (b) Mɛni atsɔɔ wɔ ni awoɔ wɔ hewalɛ hu ní wɔfee?
16 Ani ehe miihia lɛɛlɛŋ ní wɔkɛ wɔwaobii awo la mli ní eshã wɔ koni wɔkɛle bɔ ni piŋmɔ kɛ amanehulu ji? Ani wɔnyɛŋ wɔkase nii kɛjɛ mɛi krokomɛi aniiashikpamɔi ní ehiii lɛ amli? Ani ehe miihia ní wɔyagbee je nɛŋ “ŋmɔtɔ” lɛ mli koni wɔkɛkwɛ akɛ ani nɔ ko miiŋmɛɛ wɔ lɛɛlɛŋ lo? (2 Petro 2:20-22) Petro kai Kristofoi ní hi shi yɛ klɛŋklɛŋ afii oha lɛ mli, ní tsutsu ko lɛ amɛji Satan je lɛ fã lɛ akɛ: “Efá ha wɔ akɛ wala be ni eho momo lɛ mli lɛ wɔtsu jeŋmajiaŋbii atsui naa nii lɛ, ni wɔba wɔjeŋ yɛ nyenyeŋtswibɔi, akɔnɔi, dãatɔɔi, shwɛmɔi, fufeemɔi kɛ wɔŋjamɔi ní ahiɔ lɛ amli.” Eka shi faŋŋ akɛ, ehe ehiaaa ní wɔná je lɛ “sakasakafeemɔ shɛii” lɛ mli niiashikpamɔ koni wɔkɛle he ni shihilɛ lɛ baanyɛ afite kɛyashɛ. (1 Petro 4:3, 4) Nɔ ni tamɔɔɔ enɛ kwraa lɛ, atsɔɔ wɔ Yehowa jeŋba he tɛi ní nɔ kwɔlɔ lɛ yɛ wɔ Maŋtsɛyeli Asai anɔ, ní ji Biblia mli tsɔsemɔ shikwɛ̃ɛhei lɛ. Ni awoɔ wɔ hewalɛ ní wɔkɛ wɔjwɛŋmɔŋ nyɛmɔ atsu nii ní wɔkɛma nɔ mi wɔha wɔhe akɛ anɔkwale lɛ mli wɔyɔɔ lɛ, koni wɔtsɔ no nɔ wɔha anɔkwale lɛ atsɔ wɔnɔ̃.—Yoshua 1:8; Romabii 12:1, 2; 2 Timoteo 3:14-17.
Wɔgbɛi lɛ Jeee Kadimɔ Nɔ̃ ko Kɛkɛ
17. Mɛɛ gbɛ nɔ wɔɔtsɔ ní wɔfee Yehowa Odasefoi ní nitsumɔ mɔɔ shi jogbaŋŋ?
17 Kɛ́ wɔha anɔkwale lɛ tsɔ wɔnɔ̃ lɛ, no lɛ wɔbaabɔ mɔdɛŋ ní wɔkɛ mɛi krokomɛi agba he sane yɛ be fɛɛ be ní hi mli. Enɛ etsɔɔɔ akɛ wɔbaaka akɛ wɔkɛbaanyɛ mɛi ní ejieee miishɛɛ kpo yɛ he lɛ anɔ. (Mateo 7:6) Shi moŋ, wɔsheŋ gbeyei akɛ wɔɔha ale wɔ akɛ Yehowa Odasefoi. Kɛ́ mɔ ko jie miishɛɛ bibioo kpo kɛtsɔ sane ko ní ekɛ anɔkwayeli bi, aloo kɛtsɔ Biblia kasemɔ wolo ko hemɔ nɔ lɛ, no lɛ wɔbaafee klalo ni wɔbaasaa wɔhe akɛ wɔkɛ lɛ baagba wɔ hiɛnɔkamɔ lɛ he sane. Yɛ anɔkwale mli lɛ, enɛ miijie yi kɛmiiha wɔ akɛ esa akɛ wɔhiɛ woji ní akaseɔ lɛ eko yɛ wɔhe be fɛɛ be, ekɔɔɔ he eko hé ni ekolɛ wɔyɔɔ—shia jio, nitsumɔhe, skul, shwapo naa, aloo yɛ hiɛtserɛjiemɔhei jio.—1 Petro 3:15.
18. Wɔhe kpo ní wɔɔjie faŋŋ akɛ Kristofoi lɛ he baanyɛ aba sɛɛnamɔ kpele diɛŋtsɛ yɛ wɔshihilɛ mli yɛ mɛɛ gbɛ nɔ?
18 Kɛ́ wɔjie wɔhe kpo faŋŋ akɛ Kristofoi ji wɔ lɛ, wɔwoɔ nibii ní wɔkɛfãa wɔhe wɔshiɔ Satan tutuamɔi ní yɔɔ nigii lɛ amli hewalɛ. Kɛ́ aatsɛ́ fɔmɔ gbi loo Blonya okpɔlɔŋmɛɛ, loo aafee ɔfis atsiatsi lɛ, bei pii lɛ, wɔnanemɛi nitsulɔi lɛ baakɛɛ akɛ, “Nyɛkatsɛ́a lɛ nyɛwoa mli. Yehowa Odasefonyo ji lɛ.” Yɛ nakai yiŋtoo lɛ nɔŋŋ hewɔ lɛ, gbɔmɛi sumɔŋ ní amɛwie yakayaka fɛoyeli wiemɔi kɛji wɔyɛ jɛmɛ. Enɛ hewɔ lɛ, wɔ Kristofoi ashidaamɔ ní wɔɔha ale lɛ he yɛ sɛɛnamɔ kpele diɛŋtsɛ yɛ wɔshihilɛ mli, tamɔ bɔ ni bɔfo Petro tsɔɔ mli lɛ pɛpɛɛpɛ, akɛ: “Ni kɛ́ nyɛji mɛi ní bɔɔ ekpakpa he mɔdɛŋ lɛ, namɔ ji mɔ ni aaafee nyɛ efɔŋ? Shi kɛ́ jalɛ hewɔ nyɛnaa amanehulu tete lɛ, ajɔɔ nyɛ.”—1 Petro 3:13, 14.
19. Te wɔfeɔ tɛŋŋ wɔleɔ akɛ wɔbote naagbee gbii lɛ amli vii hu?
19 Sɛɛnamɔ kroko ní anɔkwale lɛ ní wɔɔha etsɔ wɔnɔ̃ lɛ kɛbaaba ji akɛ, ebaaha wɔná nɔmimaa akɛ wɔyɛ nibii agbɛjianɔtoo nɛɛ naagbee gbii lɛ amli lɛɛlɛŋ. Wɔbaale akɛ Biblia gbalɛi babaoo miibɛŋkɛ amɛnaagbee kwraa yɛ wɔbe nɛɛ mli. * Nibii ní yɔɔ gbeyei, ní ba yɛ afii oha ní ho lɛ mli lɛ ema kɔkɔbɔɔ ní Paulo kɛha akɛ “naagbee gbii lɛ anɔ lɛ jaramɔ bei baaba” lɛ nɔ mi jogbaŋŋ diɛŋtsɛ. (2 Timoteo 3:1-5; Marko 13:3-37) Adafitswaa wolo ko mli sane ko ní aŋma nyɛsɛɛ nɛɛ, ní kɔɔ afii ohai 20 lɛ he lɛ yitso ji “Abaakai lɛ akɛ Yiwalɛ Yinɔ ní Hiŋmɛigbelemɔ Bɛ Mli.” Sane lɛ wie akɛ: “Afi 1999 bafee afi ní agbe gbɔmɛi yɛ mli fe fɛɛ, yɛ afii oha ní agbe gbɔmɛi yɛ mli fe fɛɛ lɛ fã ní ji enyɔ lɛ mli.”
20. Amrɔ nɛɛ ji be kɛha mɛɛ nifeemɔ?
20 Jeee be ní esa akɛ wɔyiŋ afee wɔ kɔshikɔshi nɛ. Eyɛ faŋŋ akɛ Yehowa jɔɔmɔ yɛ Biblia mli tsɔsemɔ nitsumɔ kpeteŋkpele fe fɛɛ ní atsu dã yɛ je lɛŋ fɛɛ ákɛ odaseyeli kɛha jeŋmaji lɛ fɛɛ lɛ nɔ. (Mateo 24:14) Hã anɔkwale lɛ atsɔ onɔ̃, ní okɛ mɛi krokomɛi agba he sane. Onaanɔ wɔsɛɛ be shihilɛ damɔ nɔ ni ofeɔ bianɛ lɛ nɔ. Onijiaŋ ní ooogbɔjɔ lɛ haŋ oná Yehowa dɛŋ jɔɔmɔ. (Luka 9:62) Shi moŋ, amrɔ nɛɛ ji be ní esa akɛ “nyɛfia shi ní nyɛkagbugbaa, ní nyɛtekea nɔ yɛ Nuntsɔ lɛ nitsumɔ lɛ mli daa nɛɛ, ejaakɛ nyɛle akɛ nyɛmɔdɛŋbɔɔ lɛ efeee yaka yɛ Nuntsɔ lɛ mli.”—1 Korintobii 15:58.
[Shishigbɛ niŋmaa]
^ kk. 19 Kwɛmɔ Buu-Mɔɔ, January 15, 2000, baafa 12-14. Kukuji 13-18 lɛ kɛ odaseyelii ekpaa ní tsɔɔ mɔ yiŋ, ní tsɔɔ akɛ wɔhi naagbee lɛ mli aahu, kɛjɛ afi 1914 kɛbaa nɛɛ amlitĩi haa.
Ani Okaiɔ?
• Mɛɛ gbɛ nɔ wɔɔtsɔ wɔjie yiŋkɔshikɔshifeemɔi kɛya kwraa?
• Mɛni wɔbaanyɛ wɔkase kɛjɛ Elisha tsulɔ lɛ nɔkwɛmɔnɔ lɛ mli?
• Mɛɛ jeŋba he kaai esa akɛ wɔhiɛ ahi wɔhe nɔ yɛ he be fɛɛ be?
• Mɛni hewɔ esa akɛ wɔjie wɔhe kpo faŋŋ akɛ Yehowa Odasefoi lɛ?
[Nikasemɔ lɛ he Sanebimɔi]
[Mfonirii ni yɔɔ baafa 10]
Daa gbi Biblia kasemɔ kɛ sɔlemɔ baanyɛ aye abua wɔ ní wɔjie yiŋkɔshikɔshifeemɔi kɛya kwraa
[Mfoniri ni yɔɔ baafa 11]
Atsɔ ninaa nɔ ajie Elisha tsulɔ lɛ yiŋkɔshikɔshifeemɔ lɛ kɛtee kwraa
[Mfoniri ni yɔɔ baafa 12]
Atsɔɔ wɔ Yehowa jeŋba he tɛi ní nɔ kwɔlɔ lɛ yɛ Maŋtsɛyeli Asai, tamɔ nɔ ní yɔɔ Benin nɛɛ anɔ