Hiŋmɛi He Datrɛfonyo ko Du Dumɔwu Ko
Hiŋmɛi He Datrɛfonyo ko Du Dumɔwu Ko
Mɛni hiŋmɛi he datrɛfonyo ko ni yɔɔ Lviv, Ukraine mɔdɛŋbɔɔ tsu yɛ Yehowa Odasefoi asafo ni ato yɛ Russia-wiemɔ mli lɛ mli yɛ Haifa, Israel, he ni jɛkɛmɔ shɛɔ kilomitai 2,000, ni abaaho maji babaoo ahe lɛ mli? Nɛkɛ sane nɛɛ tsɔɔ bɔ ni Biblia mli wiemɔ ni yɔɔ Jajelɔ 11:6 lɛ ji anɔkwale ha: “Leebi lɛ dũ odũmɔnii lɛ, ni gbɛkɛ hu kaajie onine yɛ he; ejaakɛ oleee emli nɔ ni baahi, enɛ jio, enɛ jio, aloo ekolɛ enyɔ lɛ fɛɛ baahi pɛpɛɛpɛ jio.”
WƆ SANE lɛ jeɔ shishi kɛjɛ afi 1990 lɛ mli, beni Ella, ni ji oblayoo Yudanyo lɛ yɔɔ Lviv lɛ. Ella kɛ eweku lɛ miisaa amɛhe koni amɛshi kɛya Israel. Beni eshwɛ fioo ni amɛbaashi lɛ, Ella kɛ hiŋmɛi he datrɛfonyo ko ni eji Yehowa Odasefoi lɛ ateŋ mɔ kome lɛ eto gbɛjianɔ ni amɛkpe. Yɛ nakai beaŋ lɛ, agu Yehowa Odasefoi lɛ anitsumɔ lɛ yɛ Ukraine. Kɛlɛ, hiŋmɛi he datrɛfonyo lɛ ŋɔ hegbɛ lɛ ni ekɛ Ella susu hemɔkɛyeli ni eyɔɔ yɛ Biblia lɛ mli lɛ he. Eha enaa kpɛ ehe beni ekɛɛ lɛ akɛ Nyɔŋmɔ yɛ lɛ diɛŋtsɛ egbɛi lɛ. Ella ná he miishɛɛ waa ni eetao ni ele babaoo, kɛkɛ ni aje Biblia mli sane ni ŋɔɔ shishi.
Ella ná sanegbaa ni tee nɔ lɛ he miishɛɛ aahu akɛ, ebi koni aku sɛɛ aba eŋɔɔ ekoŋŋ yɛ otsi ni nyiɛ sɛɛ lɛ mli, ni no sɛɛ hu lɛ, esaa ebi ni aba ekoŋŋ. Miishɛɛ ni ená lɛ miida, shi kɛlɛ, naagba ko yɛ. Be ni ewekumɛi lɛ baashi kɛya Israel lɛ miishɛ. Ni nibii babaoo yɛ lolo ni Ella baakase! Bɔni afee ni ekɛ be ni eshwɛ lɛ atsu nii jogbaŋŋ lɛ, ebi koni daa gbi lɛ akɛ lɛ abafee Biblia mli nikasemɔ kɛyashi be ni amɛbaashi kɛya. Eyɛ mli akɛ Ella tsaaa enikasemɔ lɛ nɔ beni eyashɛ Israel nɔŋŋ lɛ moŋ, shi anɔkwale wui lɛ ená shishifa yɛ etsuiŋ. Beni afi lɛ baa naagbee lɛ, no mli lɛ, eje Biblia lɛ kasemɔ shishi kɛ hiɛdɔɔ ekoŋŋ.
Ta fɛ yɛ Persian Gulf lɛ nɔ, ni Iraq fɔ̃ okplɛmii wuji kɛtutua Israel. Enɛ bafee sane ni afɔɔ he wiemɔ waa. Gbi ko beni Ella etee eheɔ nii yɛ shwapo ko mli lɛ, enu ni wekui komɛi ni efã kɛba jɛmɛ miigba sane yɛ Russia wiemɔ mli. Eyɛ mli akɛ Ella kã he eekase Biblia lɛ diɛŋtsɛ moŋ, shi etsi ebɛŋkɛ weku lɛ ni egba amɛ shiwoo ni yɔɔ Biblia lɛ mli ni tsɔɔ akɛ toiŋjɔlɛ jeŋ ko baaba lɛ he sane. Nɔ ni jɛ mli ba ji akɛ, Galina, ni ji amɛnaa; Natasha ni ji amɛnyɛ lɛ; amɛbinuu Sasha (Ariel); kɛ amɛbiyoo Ilana fɛɛ fata he ni amɛkɛ Ella kase Biblia lɛ.
Sasha bafee klɛŋklɛŋ mɔ yɛ weku lɛ mli ní tee hiɛ kɛyashɛ baptisimɔ he—ekɔɔɔ he eko kaai srɔtoi ni ba enɔ lɛ fɛɛ sɛɛ. Eyɛ mli akɛ eji skul nikaselɔ ni bɔɔ mɔdɛŋ fe mɔ fɛɛ mɔ moŋ, shi ashwie lɛ kɛjɛ skul lɛ akɛni e-Kristofoi ahenilee eŋmɛɛɛ lɛ gbɛ koni ekɛ ehe awo asraafoi atsɔsemɔ ni fata skul nifeemɔi ahe lɛ mli lɛ hewɔ. (Yesaia 2:2-4) Akɛ Sasha sane lɛ tee Israeli High Court (Israel Saneyelihe Wulu) ni yɔɔ Jerusalem lɛ, ni akɛ famɔ hã koni ahe lɛ ekoŋŋ awo skul lɛ mli ni enyɛ egbe naa. Sane lɛ gbɛ eshwã maŋ muu lɛ fɛɛ. Nɔ ni jɛ mli ba ji akɛ, Israelbii babaoo bale Yehowa Odasefoi lɛ ahemɔkɛyelii lɛ. *
Beni Sasha gbe skul lɛ naa lɛ, ekɛ ehe wo Yehowa Odasefoi lɛ abe-fɛɛ sɔɔmɔ nitsumɔ lɛ mli. Eesɔmɔ akɛ gbɛgbalɔ krɛdɛɛ ŋmɛnɛ, kɛ asafoŋ onukpa hu. Enyɛmiyoo Ilana eyafata ehe yɛ be-fɛɛ sɔɔmɔ nitsumɔ lɛ mli. Ábaptisi amɛnyɛ, kɛ amɛnaa fɛɛ ákɛ Odasefoi. Nakai wu ni hiŋmɛi he datrɛfonyo lɛ dũ lɛ miiwo yibii lolo!
Yɛ nakai beaŋ nɔŋŋ lɛ, Ella miiya nɔ eeya hiɛ yɛ mumɔŋ, ni etsɛɛɛ ni ekɛ ehe wo shia-kɛ-shia shiɛmɔ nitsumɔ lɛ mli. Yɛ klɛŋklɛŋ shia ni etee lɛ mli lɛ, ekɛ Faina ni ejɛ Ukraine eba etsɛko lɛ kpe. Faina ehao yɛ shihilɛ mli. Sɛɛ mli lɛ Ella ná ele akɛ, beni eshwɛ fioo ni ebaatswa Faina shinaa lɛ, nɛkɛ yoo ni ehao nɛɛ sɔle eha Nyɔŋmɔ akɛ: “Mile bo moŋ, shi kɛji akɛ oobo mi toi lɛ, belɛ ye obua mi.” Ekɛ Ella gba sane ni kanyaa mɔ waa. Faina bi saji babaoo, ni esusu hetooi ni akɛhaa lɛ lɛ ahe jogbaŋŋ. Yɛ be ni sa mli lɛ, ekpɛlɛ nɔ akɛ Yehowa Odasefoi lɛ ji mɛi ni tsɔɔ anɔkwale lɛ kɛjɛɔ Biblia lɛ mli. Etsake egbɛjianɔtoo yɛ univɛsiti nikasemɔi lɛ amli bɔni afee ni ená be babaoo ní ekɛ asafo lɛ abɔ, kɛ agbɛnɛ hu yɛ shiɛmɔ nitsumɔ lɛ mli. Yɛ May 1994 mli lɛ, abaptisi Faina. Ekɛ ehe wo gbɛgbamɔ nitsumɔ lɛ mli hu, ni ekɛ be fã tsu nii yɛ kɔmpuita nitsumɔhe ko ni ekɛkwɛ ehe.
Yɛ November 1994 mli lɛ, Ella gbɔjɔ yɛ gbɔmɔtsoŋ trukaa be ko ni ekɛ ehe ewo shiɛmɔ nitsumɔ lɛ mli lɛ. Etee helatsamɔhe ni akwɛ lɛ, ni ana akɛ emusuŋ kotoku lɛ he eba fala ni eeho lá. Beni gbɛkɛ shɛɔ lɛ, ana akɛ emlinu ni gbalaa kɔɔyɔɔ kɛwoɔ elá lɛ mli lɛ eba shi kwraa kɛshɛ 7.2. Asafo mli ni Ella yɔɔ lɛ mli onukpa ni ji Hospital Liaison Committee (HLC) ni yɔɔ jɛmɛ lɛ sɛinɔtalɔ lɛ tsɔɔ datrɛfoi lɛ tsofafeemɔ gbɛ̀i pii ni abaanyɛ akɛtsu nii ni biŋ ni akɛ lá ni agbalaa awoɔ mɔ mli lɛ atsu nii. * Afee Ella opireshɛn yɛ omanyeyeli mli ní lá fataaa he, ni ená hewalɛ kwraa.—Bɔfoi lɛ Asaji 15:28, 29.
Karl, ní eji datrɛfonyo ni tsuɔ yei ahe nii ní eji Yudafonyo ni afɔ́ lɛ yɛ Germany ni kwɛɔ Ella hewalɛnamɔ nɔ lɛ, ná miishɛɛ waa. Kɛkɛ ni ekɛɛ akɛ, efɔlɔi ni je Mɛi Ahiɛkpatamɔ lɛ mli shweshweeshwe lɛ ná le Yehowa Odasefoi lɛ yɛ yiwalɛ nsrai lɛ amli. Karl bi saji babaoo. Eyɛ mli akɛ ebɛ dekã kwraa yɛ datrɛfonyo ni eji lɛ hewɔ moŋ, shi Karl náa be ehaa Biblia lɛ kasemɔ daa gbi. Beni afi ni nyiɛ sɛɛ lɛ shɛ lɛ, no mli lɛ eyaa Kristofoi akpeei ní afeɔ daa otsi lɛ shishi.
Mɛni ejɛ wu ni hiŋmɛi he datrɛfonyo lɛ yadũ lɛ mli eba? Wɔna nɔ ni ba Sasha kɛ eweku lɛ nɔ momo. Ella ji gbɛgbalɔ krɛdɛɛ. Ebiyoo Eina ni gbe nɔtsamɔ skul naa etsɛko lɛ kɛ ehe miiwo gbɛgbamɔ nitsumɔ lɛ mli akɛ enitsumɔ. Faina hu miisɔmɔ akɛ gbɛgbalɔ krɛdɛɛ. Ni amrɔ nɛɛ lɛ abaptisi Karl, ni ji datrɛfonyo ni tsuɔ yei ahe nii ni kwɛ Ella hewalɛnamɔ nɔ lɛ, ni eji asafoŋ sɔɔlɔ, ni eegba tsamɔ hewalɛ ni Biblia mli anɔkwale lɛ yɔɔ lɛ he sane eetsɔɔ helatsɛmɛi ni ekwɛɔ lɛ kɛ mɛi krokomɛi hu.
Kuu fioo ni wieɔ Russia ni fã kɛba ni fata he kɛje Haifa Hebrew Asafo lɛ shishi lɛ, ebatsɔ Russia wiemɔ Asafo ni he wa, ni amrɔ nɛɛ amɛyɛ Maŋtsɛyeli shiɛlɔi 120. Anɔkwale ni yɔɔ mli lɛ ji akɛ, nɛkɛ shweremɔ nɛɛ fã jɛ hiŋmɛi he datrɛfonyo ko ni yɔɔ Lviv ní eŋɔ hegbɛ lɛ ekɛdũ dumɔwu ko lɛ!
[Shishigbɛ niŋmai]
^ kk. 6 Kɛha emli saji fitsofitso lɛ, kwɛmɔ November 8, 1994, Awake! lɛ baafa 12-15 lɛ mli.
^ kk. 9 HLC lɛ damɔɔ Yehowa Odasefoi lɛ anajiaŋ yɛ jeŋ fɛɛ ni amɛyeɔ amɛbuaa sanegbaa ni bakaa helatsɛ lɛ kɛ helatsamɔhe lɛ nitsulɔi lɛ ateŋ. Agbɛnɛ hu, amɛkɛ saji heei ni kɔɔ tsofafeemɔ gbɛ̀i ni ataoɔ nibii amli aleɔ lɛ hu haa.
[Shikpɔŋ he mfoniri ni yɔɔ baafa 29]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
UKRAINE
ISRAEL
[He ni Sane lɛ Jɛ]
Mountain High Maps® Copyright © 1997 Digital Wisdom, Inc.
[Mfonirii ni yɔɔ baafa 30]
Ella kɛ ebiyoo Eina
[Mfoniri ni yɔɔ baafa 31]
Odasefoi akuu ni yɔɔ miishɛɛ ni wieɔ Russia yɛ Haifa. Kɛjɛ abɛku kɛmiiya ninejurɔ: Sasha, Ilana, Natasha, Galina, Faina, Ella, Eina, kɛ Karl