Maŋtsɛyeli Jajelɔi Bɔ Amaniɛ

Latvia Kpɛlɛ Sanekpakpa lɛ Nɔ

BIBLIA lɛ tsɔɔ faŋŋ akɛ Nyɔŋmɔ suɔmɔnaa nii ji ni “ehere gbɔmɛi fɛɛ yiwala, koni amɛshɛ anɔkwale lɛ lee mli.” (1 Timoteo 2:4) Mɛi ni kulɛ afii babaoo nɛ ni amɛnáaa hegbɛ ni amɛkɛaabo sanekpakpa lɛ toi lɛ miibo toi bianɛ! Taakɛ eji yɛ je lɛŋ hei krokomɛi lɛ, gbɔmɛi ni esoro afii srɔtoi ni amɛye ni jɛ shihilɛi srɔtoi amli lɛ miihere shɛɛ sane lɛ nɔ yɛ Latvia, taakɛ niiashikpamɔi ni nyiɛ sɛɛ nɛɛ tsɔɔ lɛ.

• Nyɛ ko kɛ ebiyoo ni yeko afii nyɔŋmai enyɔ ni amɛyɔɔ Rēzekne ni ji maŋ ko ni yɔɔ Latvia bokagbɛ lɛ bi yoo ko yɛ gbɛjegbɛ lɛ nɔ koni etsɔɔ lɛ gbɛ kɛya he ko. Beni yoo ni eji Yehowa Odasefoi lɛ ateŋ mɔ kome lɛ etsɔɔ amɛ gbɛ lɛ egbe naa lɛ, efɔ̃ amɛnine kɛtee Odasefoi akpeei lɛ eko.

Akɛni nyɛ lɛ kɛ ebiyoo lɛ fɛɛ sumɔɔ jamɔ hewɔ lɛ, amɛkpɛ amɛyiŋ akɛ amɛbaaya kpee lɛ. Beni amɛyaa lɛ, amɛkpɛlɛ nɔ akɛ kɛ́ amɛnáaa nɔ ko kpakpa ko yɛ jɛmɛ lɛ, amɛbaashĩ jɛmɛ amrɔ nɔŋŋ. Shi kɛlɛ, kpee lɛ yɛ miishɛɛ aahu akɛ ebaaa amɛjwɛŋmɔ mli kwraa akɛ amɛaashĩ jɛmɛ amɛya. Amɛkpɛlɛ ni akɛ amɛ akase Biblia lɛ, ni amɛbɔi kpeeiyaa daa. Yɛ nyɔji etɛ pɛ mli lɛ, amɛtsɔɔ bɔ ni amɛsumɔɔ akɛ amɛaafata amɛhe yɛ shiɛmɔ nitsumɔ lɛ mli, ni amɛmiikpa gbɛ akɛ abaabaptisi amɛ wɔsɛɛ ko.

• Yɛ Latvia anaigbɛ maŋtiase ko mli lɛ, Odasefonyo ko kɛ Anna ni eye afii 85, ni jie miishɛɛ diɛŋtsɛ kpo ni kpɛlɛ ni akɛ lɛ akase Biblia lɛ kpe. Ebiyoo lɛ kɛ weku lɛ mli bii krokomɛi te shi amɛwo lɛ waa diɛŋtsɛ. Shi Anna eŋmɛɛɛ gbɛ koni enɛ loo egbɔlɛ kɛ egbɔmɔtsoŋ hela lɛ atsĩ enaa akɛ ekatsa e-Biblia mli nikasemɔ lɛ nɔ.

Gbi ko lɛ Anna kɛɛ ebiyoo lɛ akɛ eshwɛ fioo abaabaptisi lɛ. Anna biyoo lɛ here nɔ akɛ: “Kɛ abaptisi bo lɛ, mikɛ bo baaya helatsɛmɛi akwɛmɔ shia.” Shi kɛlɛ, nɛkɛ hegbeyeiwoo nɛɛ ejeee Anna nijiaŋ wui. Yɛ bɔ ni egbɔmɔtsoŋ shihilɛ yɔɔ hewɔ lɛ, abaptisi lɛ yɛ lɛ diɛŋtsɛ eshia.

Te Anna biyoo lɛ fee enii yɛ enɛ he eha tɛŋŋ? Etsake etsui, ni ehoo niyenii krɛdɛɛ ko eha enyɛ beni abaptisi lɛ lɛ. Kɛkɛ ni ebi enyɛ akɛ, “Amrɔ nɛɛ ni ábaptisi bo lɛ, te onuɔ he tɛŋŋ?” Te Anna here nɔ eha tɛŋŋ? “Tamɔ mɔ ni kpaako afɔ́ lɛ!”

• Odasefoi enyɔ kɛ tsutsu Soviet Union asraafonyo ko ni eba hejɔɔmɔ kpe yɛ December 1998. Akɛni eheɔ Bɔlɔ ko eyeɔ hewɔ lɛ, ekpɛlɛ Biblia mli nikasemɔ nɔ, ni eŋa lɛ fata he yɛ sɛɛ mli. Amɛtee hiɛ oyayaayai ni etsɛɛɛ ni amɛbatsɔmɔ shiɛlɔi ni abaptisiko amɛ. Beni shɛɔ hulutsoo be ni nyiɛ sɛɛ lɛ mli lɛ, abaptisi nuu ní tsutsu ko lɛ eji asraafonyo lɛ. Suɔmɔ kpele ni gbalashihilɛ mli hefatalɔi nɛɛ yɔɔ kɛha mumɔŋ nibii lɛ efee hewalɛwoo kɛha mɛi fɛɛ ni yɔɔ asafo lɛ mli lɛ. Kɛfata he lɛ, amɛkɛ amɛhe wo shia ko ni yɔɔ jɛmɛ lɛ saamɔ jogbaŋŋ lɛ mli ni atsɔ lɛ Maŋtsɛyeli Asa fɛfɛo ko.