Osharai ni Akɛhiɔ Shi

“Nɔ kome ko kwraa bɛ ni obaanyɛ ofee kɛkɛ yɛ gbi fɛɛ gbi nɔ—ni wɔɔ fata he—ní oshara bɛ he tsɔ bɔ ní no aaafee naagbee nii ni ofee eko pɛŋ kɛjɛ no sɛɛ.”—Discover wolo tɛtrɛɛ.

AKƐ wala eto shikpɔŋ ni atsa shi akɛ okplɛmii bibii ni akɛhɔlɔɔ shikpɔŋ eto mli lɛ he, ejaakɛ obaanyɛ opila loo ogbo be fɛɛ be ni bei pii lɛ kɔkɔbɔɔ ko bɛ he. Esoro maŋ fɛɛ maŋ kɛ nibii ni kɛ oshara baa yɛ jɛmɛ. Nɔ ni fata he ji tsɔnei anyiɛmɔ mli osharai, maŋ ta, hɔmɔ, AIDS, kansa, tsuihela, kɛ nibii krokomɛi babaoo. Ákɛ nɔkwɛmɔnɔ lɛ, yɛ Afrika Sahara lɛ shishigbɛ lɛ, AIDS ebafee nɔ ni gbeɔ mɔ fe fɛɛ, ni yɛ nyɛsɛɛ afi ko mli lɛ “egbe mɛi akpekpei 2.2 ní shɛɔ gbɔmɛi fɛɛ ni egboi yɛ Afrika maŋ tai amli lɛ toi 10,” taakɛ U.S.News & World Report tsɔɔ mli lɛ.

Yɛ nakai beaŋ nɔŋŋ lɛ, je lɛ fiteɔ shika akpekpei toi akpei abɔ koni akɛha wala sɛɛ atsɛ ni akɛba hela kɛ kpajee ni baanyɛ aba lɛ shi. Susumɔi ni akɛtsuɔ nii lɛ babaoo, tamɔ niyeli kɛ ninumɔ sui kɛ gbɔmɔtsoŋ kpɔiaŋgbɔlemɔ ni jeee tɔmɔ lɛ he baanyɛ aba sɛɛnamɔi komɛi. Shi kɛlɛ, saji ajɛɛhe yɛ ni anyɛɔ akɛ he fɔ̃ɔ nɔ, ní kɔɔ shihilɛ mli nifeemɔ gbɛ̀i fɛɛ ni he hiaa lɛ ahe ni baanyɛ aye abua bo koni oná shweshweeshwe shihilɛ ni hi jogbaŋŋ mli ŋɔɔmɔ. Nakai jɛɛhe lɛ ji Biblia lɛ. Gbɛtsɔɔmɔi ní akɛtsuɔ naagbai babaoo ni saa wɔ hewalɛnamɔ kɛ hilɛ-kɛha-mɔ he lɛ he nii yɛ mli. Yɛ anɔkwale mli lɛ, Biblia lɛ tsuuu naagba fɛɛ naagba he nii fitsofitso. Ni kɛlɛ, ekɛ shishitoo mlai ni nɔ bɛ haa koni ekudɔ wɔ yɛ saji ni kɔɔ niyeli sui, gbɔmɔtsoŋ hewalɛnamɔ, bɔ ni asusuɔ nii ahe, bɔlɛnamɔ, dãanumɔ, tawa, kɛ nɔ ni afɔɔ lɛ tsɛmɔ akɛ tsofai ni akɛjieɔ hiɛtserɛ, kɛ nibii krokomɛi ni fa babaoo he.

Shika he naagbai ni aleee nɔ ni baajɛ mli aba hu eyi mɛi babaoo ashihilɛ mli obɔ. Biblia lɛ yeɔ ebuaa wɔ yɛ enɛ hu gbɛfaŋ. Jeee akɛ ewoɔ wɔ hewalɛ koni wɔkɛ shika kɛ shika he gbɛjianɔtoo atsu nii yɛ nilee mli kɛkɛ shi etsɔɔ gbɛ ni aaatsɔ nɔ afee nitsulɔ loo nitsumɔtsɛ kpakpa. Yɛ kukufoo mli lɛ, Biblia lɛ ji gbɛtsɔɔmɔ kpakpa, ni jeee kɛha shika gbɛfaŋ shweshweeshwefeemɔ kɛ gbɔmɔtsoŋ hilɛ-kɛhamɔ kɛkɛ, shi kɛha wala diɛŋtsɛ hu. Ani obaasumɔ ni ona bɔ ni abaanyɛ akɛ Biblia lɛ atsu nii jogbaŋŋ ŋmɛnɛ? Kɛ nakai ni lɛ, ofainɛ tsa nɔ okane.