‘Tsamɔ Kɛha Olaŋmɔ’

AHEƆ ayeɔ akɛ, nɔ ni teeɔ helai babaoo ni adesai yeɔ lɛ shi ji henumɔŋ nɔnyɛɛi tamɔ gbeyei, ŋkɔmɔyeli, nyɛ̃ɛ, mlifu, hetsɛ̃, kɛ fɔyeli. Enɛ hewɔ lɛ, kwɛ bɔ ni sane ni yɔɔ Biblia lɛ mli akɛ, ‘Yehowa gbeyeishemɔ’ ji ‘tsamɔ kɛha olaŋmɔ, ni eeeha owui amli awao’ lɛ ji nɔ ni haa mɔ mii shɛɔ ehe ha!—Abɛi 3:7, 8.

Wui lɛ ji nɔ ni hiɛ gbɔmɔtso lɛ. No hewɔ lɛ, Biblia lɛ kɛ wiemɔ ni ji ‘wui’ tsuɔ nii yɛ mfonirifeemɔ mli kɛdamɔɔ shi kɛhaa adesa—titri lɛ kɛ ekɛ henumɔŋ ni naa wa waa kɛ naagbai ekpe. Shi mɛɛ gbɛ nɔ Yehowa gbeyeishemɔ bafeɔ ‘tsamɔ kɛha olaŋmɔ’?

Biblia he nilelɔi hiɛ susumɔi srɔtoi yɛ nɔ ni kɔɔ ‘laŋmɔ’ ni atsĩ tã yɛ sane nɛɛ mli lɛ he. Sanemlitsɔɔlɔ ko kɛɛ akɛ, akɛni ‘laŋmɔ’ lɛ yɛ “gbɔmɔtso lɛ teŋ tuuntu” hewɔ lɛ, edamɔɔ shi kɛhaa gbɔmɔtso lɛ he nibii krokomɛi ni he hiaa lɛ. Sanemlitsɔɔlɔ kroko hu tsɔɔ akɛ, wiemɔ ni ji ‘laŋmɔ’ lɛ baanyɛ atsɔɔ laŋmɔ ni anaa yɛ musu lɛ teŋ, taakɛ akɛtsu nii yɛ Ezekiel 16:4 lɛ. Kɛji enɛ ji anɔkwale lɛ, belɛ Abɛi 3:8 miima bɔ ni ehe hiaa ni wɔkɛ wɔhe afɔ̃ Nyɔŋmɔ nɔ kwraa lɛ nɔ mi—tamɔ bɔ ni abifao ni nyɛɛɛ nɔ ko afee lɛ kɛ ehe fɔ̃ɔ enyɛ nɔ kɛha niyenii lɛ. Yiŋsusumɔ kroko hu ji akɛ, abaanyɛ awie ‘laŋmɔ’ lɛ he akɛ gbɔmɔtso lɛŋ talɔi kɛ faji. Tamɔ bɔ ni kuku nɛɛ tsɔɔ lɛ naa lɛ, ebaanyɛ ebalɛ akɛ akɛ gbɔmɔtso he nii nɛɛ miito ‘wui’ lɛ ahe—ni ji gbɔmɔtso lɛ he nii ni yɔɔ hewalɛ waa lɛ.

Bɔ fɛɛ bɔ ni eshishinumɔ lɛ ji eha diɛŋtsɛ lɛ, wɔyɛ nɔmimaa yɛ nɔ kome he: Woo ni gbeyeishemɔ yɔɔ mli ní wɔɔná wɔha Yehowa lɛ ji nilee gbɛ. Shishitoo mlai ni Nyɔŋmɔ efolɔ eshwie shi ní wɔɔhi shi yɛ naa lɛ baanyɛ aha wɔná gbɔmɔtsoŋ hewalɛ bianɛ. Nɔ ni fe fɛɛ lɛ, ebaanyɛ eha wɔná Yehowa nɔkpɛlɛmɔ, ní baaha wɔhi shi kɛya naanɔ yɛ gbɔmɔtsoŋ hewalɛ kpakpa mli—gbɔmɔtsoŋ kɛ henumɔŋ—yɛ ejeŋ hee ni baa lɛ mli lɛ.—Yesaia 33:24; Kpojiemɔ 21:4; 22:2.

[He ni Mfoniri ni yɔɔ baafa 32 lɛ Jɛ]

Dr. G. Moscoso/SPL/Photo Researchers