Sanebimɔi ni Jɛ Kanelɔi Adɛŋ

Te esa akɛ anɔkwa Kristofoi akwɛ nifeemɔ ko ni yaa nɔ yɛ aŋkroaŋkroi ateŋ ni ji kɔmpiuta jarayeli nibii ahe gbɛjiantoi ni afeɔ eko ahaa mɛi krokomɛi lɛ amɛha tɛŋŋ?

Ekolɛ mɛi komɛi baadamɔ nɔ ni Yesu wie akɛ, “yaka nyɛná, yaka nyɛŋɔhaa” lɛ nɔ ni amɛbaabɔ mɔdɛŋ amɛjie amɛnaa. Yɛ anɔkwale mli lɛ, jeee woji loo kɔmpiuta gbɛjianɔtoi ní akɛwo mla shishi, nibii ni mla kudɔɔ ni akɛtsuɔ nii ní akɛ ekomɛi aaaha mɛi yaka lɛ he Yesu wieɔ lɛ. Nɔ ni etsɔɔ ji akɛha akɛ sɔɔmɔ nitsumɔ lɛ fã. Yesu kɛɛ bɔfoi ni baaya maji kɛ akrowai srɔtoi amli lɛ akɛ amɛyashiɛ Maŋtsɛyeli lɛ, amɛtsa helatsɛmɛi, ni amɛfamɔ daimomioi. Yɛ nɔ najiaŋ ni amɛaabi ni awo enɛ he nyɔmɔ lɛ, esa akɛ bɔfoi lɛ “aŋɔha yaka.”—Mateo 10:7, 8.

Yɛ aŋkroaŋkroi akɔmpiutai kɛ nitsumɔŋ nɔ ni yaa nɔ efaa lɛ hewɔ lɛ, mɛi babaoo ena emli nibii ni ato he gbɛjianɔ kɛha nitsumɔ pɔtɛɛ ko ni he hiaa amɛ lɛ. Be pii lɛ ebiɔ ni ayahe enɛ. Abaanyɛ akpɛlɛ nɔ akɛ aŋkroaŋkroi komɛi feɔ nibii nɛɛ ekomɛi ni amɛkɛ haa yaka ni amɛkɛɔ akɛ abaanyɛ afee ekomɛi ni akɛha mɛi krokomɛi hu. Shi ahɔɔ kɔmpiuta mli nibii ni ato he gbɛjianɔ kɛha nitsumɔ pɔtɛɛ ko nɛɛ ateŋ babaoo. Kɛji kɛha mɔ aŋkro nitsumɔ yɛ shia loo kɛha nitsumɔ mli nɔ jio lɛ, aakpa mɛi ni kɛ nibii nɛɛ tsuɔ nii lɛ fɛɛ gbɛ akɛ amɛyahe, ni amɛwo he nyɔmɔ. Kɛji akɛ mɔ ko kɔ aloo efee nɛkɛ nii nɛɛ eko ni ewooo he nyɔmɔ lɛ, ebaafee nɔ ni mla eŋmɛɛɛ gbɛ, taakɛ eji yɛ woji ni afeɔ lɛ babaoo, kɛji akɛ enɛɛmɛi po baaha yaka.

Kɔmpiuta mli nibii nɛɛ ateŋ babaoo (ni shwɛmɔ nɔ fata he lɛ) ji nɔ ni gbɛŋmɛɛ wolo yɔɔ he, ni ebiɔ ni nɔtsɛ lɛ kɛ mɔ ni kɛbaatsu nii lɛ ahi shi yɛ nibii pɔtɛɛ ni ekɛhaa kɛ husui lɛ anaa. Gbɛŋmɛɛ  woji nɛɛ ateŋ babaoo jajeɔ akɛ mɔ kome pɛ baanyɛ ekɛ gbɛjianɔtoo lɛ awo ekɔmpiuta lɛ nɔ ni ekɛtsu nii—bei pii lɛ ni akɛaawo kɔmpiuta kome pɛ nɔ, kɛji yɛ shia kɔmpiuta loo nɔ ni yɔɔ nitsumɔhe loo skul lɛ nɔ. Gbɛŋmɛɛ woji lɛ ekomɛi kɛɔ akɛ mɔ ni kɛtsuɔ nii lɛ baanyɛ afee eko kɛto kɛha lɛ diɛŋtsɛ ehe, shi esaaa akɛ efeɔ ekomɛi ehaa mɛi krokomɛi. Kɛji nɔtsɛ lɛ miisumɔ ni ekɛ gbɛjianɔtoo lɛ fɛɛ (ní gbɛŋmɛɛ wolo lɛ kɛ ehe saji krokomɛi ni aŋma awo wolo mli lɛ fata he) aha lɛ, ebaanyɛ efee nakai. Shi kɛlɛ, ekɛ hegbɛ ni lɛ diɛŋtsɛ eyɔɔ akɛ ekɛbaatsu nii lɛ eba naagbee. Srɔtofeemɔ yɛ gbɛŋmɛɛ woji lɛ ahe, no hewɔ lɛ mɔ ni heɔ gbɛjianɔtoo lɛ eko loo ahaa lɛ lɛ atao nɔ pɔtɛɛ ni nakai gbɛŋmɛɛ wolo lɛ jajeɔ.

Maji babaoo fiɔ coypright (mla naa gbɛŋmɛɛ) he gbeekpamɔi ni aba koni akɛbu “woloŋlee gboshinii” ni tamɔ kɔmpiuta mli gbɛjianɔtoi lɛ ahe lɛ sɛɛ, ni amɛbɔɔ mɔdɛŋ koni amɛha atsu mla naa gbɛŋmɛɛ mlai lɛ ahe nii. Ákɛ nɔkwɛmɔnɔ lɛ, The New York Times ni je kpo yɛ January 14, 2000 lɛ bɔ amaniɛ akɛ, “Germany kɛ Denmark polisifoi mɔmɔ mɛi ni atsɔɔ mli akɛ amɛji julɔi akuu ni fe fɛɛ ni juɔ kɔmpiuta gbɛjianɔtoi lɛ ateŋ mɛi komɛi” ni feɔ eko ni amɛjaa kɔmpiuta mli gbɛjianɔtoi kɛ shwɛmɔ nii lɛ, ni amɛhɔɔ ekomɛi po yɛ Internet lɛ nɔ lɛ.

Nɛgbɛ ji he ni Kristofoi asafo lɛ damɔ yɛ sane nɛɛ mli? Ojogbaŋŋ, Yesu kɛɛ akɛ: “Nyɛŋɔa Kaisare nii nyɛhaa Kaisare, ni nyɛŋɔa Nyɔŋmɔ nii nyɛhaa Nyɔŋmɔ.” (Marko 12:17) Enɛ biɔ ni Kristofoi afee toiboo amɛha maŋ lɛ mlai ni eteee shi ewooo Nyɔŋmɔ mla lɛ. Yɛ nɔ ni kɔɔ nɔyelii ahe lɛ, bɔfo Paulo ŋma akɛ: “Mɔ fɛɛ mɔ aba ehe shi aha hegbɛi ni yeɔ nɔ lɛ . . . Mɔ fɛɛ mɔ ni kuɔ hegbɛ lɛ naa lɛ, Nyɔŋmɔ gbɛjianɔtoo lɛ eteɔ shi ewoɔ; ni mɛi ni teɔ shi nakai lɛ aaaná amɛkojomɔ.”—Romabii 13:1, 2.

Onukpai ni yɔɔ Kristofoi asafo lɛ mli lɛ jeee mɛi ni yɔɔ hegbɛ akɛ amɛaakwɛ mɛi krokomɛi akɔmpiutai anɔ, tamɔ nɔ ni afã amɛ koni amɛtsɔɔ ní amɛha atsu mla naa gbɛŋmɛɛ he mlai lɛ ahe nii. Shi moŋ amɛheɔ amɛyeɔ ni amɛtsɔɔ akɛ esa akɛ Kristofoi akpoo nɔ ni jeee amɛnɔ lɛ ní amɛbɔ mɔdɛŋ ni amɛfee mɛi ni yeɔ mla nɔ. Enɛ buɔ Kristofoi ahe kɛjɛɔ amɛtoi ni aaagbala akɛ mɛi ni kuɔ mla mli lɛ he, ni eyeɔ ebuaa amɛ koni amɛná henilee kpakpa yɛ Nyɔŋmɔ hiɛ. Paulo ŋma akɛ: “No hewɔ lɛ sa akɛ abaa he shi, jeee yɛ mlifu lɛ kɛkɛ hewɔ, shi moŋ henilee hewɔ hu.” (Romabii 13:5) Paulo jie anɔkwa Kristofoi ashwelɛ ni tamɔ nakai nɔŋŋ kpo kɛ nɛkɛ wiemɔi nɛɛ akɛ: “Wɔhiɛ kã nɔ akɛ wɔyɛ henilee kpakpa, ni wɔmiitao akɛ wɔba wɔjeŋ fɛfɛo yɛ nii fɛɛ mli.”—Hebribii 13:18.

[Akrabatsa ni yɔɔ baafa 29]

Nitsumɔhei kɛ skul komɛi ehé gbɛŋmɛɛ woji kɛ nitsumɔi ni fa fe ekome ní tsɔɔ yibɔ falɛ ko ni hegbɛ yɔɔ akɛ amɛbaanyɛ amɛkɛ gbɛjianɔtoo lɛ atsu nii. Yɛ afi 1995 mli lɛ, Yehowa Odasefoi asafoi lɛ susu saneyitso ko ni nɔ ni fata he ji ŋaawoo nɛɛ akɛ:

“Nitsumɔhei wuji babaoo ni toɔ nibii ni akɛkakseɔ bɔ ni akɛ kɔmpiutai tsuɔ nii ahaa lɛ he gbɛjianɔ ni amɛhɔɔ lɛ kɛ hegbɛ ni amɛyɔɔ yɛ enɛɛmɛi ahe lɛ woɔ mla shishi, ni amɛkɛ ehe hegbɛ yɛ bɔ ni akɛ nibii ni tamɔ nɛkɛ aaatsu nii yɛ mla naa lɛ haa. Bei pii lɛ hegbɛ lɛ kɛɔ akɛ nifeelɔ lɛ nyɛŋ ekɛ nibii lɛ aha mɛi krokomɛi; yɛ anɔkwale mli lɛ, majimaji ateŋ mla naa gbɛŋmɛɛ he mla lɛ eŋmɛɛɛ nakai feemɔ gbɛ. . . . Nitsumɔhei wuji komɛi hɔɔ kɔmpiutai ni afee emli gbɛjianɔtoi ni yɔɔ mli lɛ momo ni akɛwo mla shishi. Shi kɛlɛ, kɔmpiutai ashwapoi komɛi bɛ mla naa hegbɛ, akɛni gbɛjianɔtoi ni akɛwo mli momo lɛ kɛ mla kpãaa gbee hewɔ, ní tsɔɔ akɛ nihelɔ lɛ kuɔ mla mli yɛ gbɛjianɔtoo lɛ kɛ nitsumɔ mli. Yɛ enɛ hewɔ lɛ, esa akɛ Kristofoi akwa saji ni akɛwo mla shishi (taakɛ Asafo lɛ woji lɛ ji lɛ) ni ajieɔ kɛjɛɔ he kroko kɛbawoɔ elɛtrɔnik adafitswaa taoi anɔ loo ni ajieɔ kɛjɛɔ nɔ yɛ be mli ni abiko mla naa hegbɛ kɛjɛko efeelɔi lɛ adɛŋ lɛ.”