Ta ní Awuɔ Ashiɔ Ohia—Anyɛŋ Aye Omanye?

SHISHARALƆI ní miisara Jeŋmajiaŋ Ekomefeemɔ nitsumɔhe lɛ yɛ New York City lɛ na Economic and Social Council Chamber (Shika Helɛtemɔ kɛ Shihilɛ He Gbɛjianɔtoo Gwabɔɔ Nitsumɔhe Lɛ), kɛ emli paipi dadei kɛ fɔji ni akɛ sarawa hewalɛ kpãa tsɔɔ mli yɛ sɛndo ni yɔɔ yiteŋgbɛ lɛ mli yɛ maŋ nitɛŋmɔhe lɛ. Mɔ ni kɛ mɛi lɛ sharaa shi lɛ tsɔɔ mli akɛ: “Sɛndo ni ‘ágbeko naa’ lɛ ji okadi ni haa akaiɔ ákɛ, agbeko shika helɛtemɔ kɛ shihilɛ he gbɛjianɔtoo ahe nii ni Jeŋmajiaŋ Ekomefeemɔ lɛ tsuɔ lɛ naa; daa nɛɛ nibii babaoo yɛ ni abaanyɛ afee koni akɛha gbɔmɛi ashihilɛ yɛ je lɛ mli aya hiɛ.”

Eyɛ mli akɛ Gwabɔɔ lɛ etuu ehe eha nitsumɔ ni sɛɛnamɔ yɔɔ he, ni ji hewalɛwoo kɛha shihilɛ ni nɔ kwɔ kɛha mɛi fɛɛ moŋ, shi nitsumɔ lɛ tamɔ nɔ ni baaa naagbee. Miishɛɛ sane ji akɛ, yɛ Yesu Kristo sɔɔmɔ nitsumɔ yɛ shikpɔŋ lɛ nɔ yɛ klɛŋklɛŋ afii oha Ŋ.B. mli lɛ, ekɛɛ akɛ: “Nuntsɔ lɛ Mumɔ lɛ yɛ minɔ, no hewɔ lɛ efɔ mi mu, koni mijaje sanekpakpa lɛ mitsɔɔ ohiafoi.” (Luka 4:18) Mɛni ji “sanekpakpa” ni ejaje lɛ? Eji shɛɛ sane ni kɔɔ Maŋtsɛyeli ni Yehowa Nyɔŋmɔ, mɔ ni batsɔɔ ‘mɔɔ ehaa ohiafo yɛ fimɔ mli lɛ,’ baato ama shi kɛ Yesu Kristo akɛ enɔ Maŋtsɛ lɛ. Mɛni nakai Maŋtsɛyeli lɛ baatsu? Yesaia gba akɛ: “Yehowa Zebaot aaaŋmɛ okpɔlɔ . . . aha majimaji fɛɛ: fɔ nii kɛ wein kpakpa, fɔ nii kɛ wuiaŋ fɔ, wein kpakpa ní atsere nɔ. Eeemi gbele kɛaatee naanɔ; ni Nuntsɔ Yehowa aaatsumɔ hiɛaŋ fɛɛ yaafonui.”—Yesaia 25:4-6, 8.

Ani obaasumɔ ni ole babaoo yɛ bɔ ni Nyɔŋmɔ Maŋtsɛyeli lɛ “baaha gbɔmɛi ni yɔɔ je lɛ mli lɛ ashihilɛ aya hiɛ,” bɔni afee ni nɔ ko he akahia amɛ dɔŋŋ? Kwɛmɔ shishigbɛ koni okase bɔ ni ooofee oná tsɔɔlɔ ni he esa koni ebasara bo ni etsɔɔ bo nibii babaoo ni kɔɔ nɔ ni Biblia lɛ kɛɔ yɛ saji ni tamɔ enɛɛmɛi ahe.