Ani Obaanyɛ Oná Miishɛɛ Lɛɛlɛŋ?

GEORGE ŋaa mɔ fɛɛ mɔ kɛ miishɛɛ. Kɛha lɛ lɛ, wala ji nikeenii ni jara wa ni esa akɛ aná mli ŋɔɔmɔ. Miishɛɛ kɛ nɔ kpakpa gbɛkpamɔ ni eyɔɔ lɛ ji esu—ni efee nakai babaoo po yɛ egbɔlɛ mli piŋmɔi beaŋ po. Ale George akɛ mɔ ko ni yɛ miishɛɛ daa, aahu kɛyashi egbo. Ani oyɛ miishɛɛ tamɔ George? Ani onaa gbi fɛɛ gbi akɛ nikeenii ni esa akɛ ahi mli kɛ ŋɔɔmɔ? Aloo ani gbɛkpamɔi kɛha gbi hee fɛɛ ni baa lɛ haa ofeɔ shikpilikpii aloo osheɔ gbeyei? Ani nɔ ko yɛ ni haaa oná miishɛɛ?

Atsɔɔ miishɛɛ shishi akɛ shihilɛ ni tsɔɔ hejɔlɛ mli ni mɔ ko yɔɔ ni sɛɛ tsɛɔ saŋŋ. Anaa enɛ yɛ mɔ lɛ henumɔ kɛ bɔ ni etsui nyɔɔ emli, ni emii shɛɔ ehe, kɛ agbɛnɛ hu kɛtsɔ bɔ ni eshweɔ ni nakai shihilɛ lɛ atsa nɔ lɛ nɔ. Ani miishɛɛ ni tamɔ nakai yɛ lɛɛlɛŋ?

Ŋmɛnɛ, mɛi hiɛ jwɛŋmɔ akɛ, ninamɔ bɔ ni sa pɛ baaha gbɔmɛi aná miishɛɛ. Gbɔmɛi akpekpei abɔ tsuɔ nii dɛŋdɛŋ koni amɛná nii. Yɛ nakai feemɔ mli lɛ, amɛteŋ mɛi babaoo kɛ wekukpaa ni baakã amɛ kɛ gbɔmɛi ateŋ kɛ shihilɛ mli nibii krokomɛi ni he hiaa lɛ shãa afɔle. Amɛfeɔ nɔ fɛɛ nɔ gidigidi be fɛɛ be tamɔ tsatsu ni miikpelekɛ shi kɛmiijɛ egɔŋ ni eshɔ lɛ nɔ, ni mɛi náaa be fioo po ni amɛkɛaasusu amɛhe aloo mɛi krokomɛi ahe. Belɛ shishinumɔ yɛ nɔ ni Los Angeles Times adafitswaa wolo lɛ kɛɛ lɛ mli akɛ: “Gbɔmɛi ni ana akɛ amɛná nɔnyɛɛ lɛ miifa daa gbi, ni oblahii kɛ oblayei babaoo ji mɛi ni náa nakai naagba. . . . Tsofa ni ahɔɔ fe fɛɛ yɛ tsofafeemɔ he lɛ ji tsofai ni akɛkuɔ nɔnyɛɛ naa.” Mɛi akpekpei abɔ kɔlɔɔ tsofai ni esaaa aloo amɛbɔɔ mɔdɛŋ koni amɛkɛ  daanumɔ aku amɛnaagbai lɛ anaa. Mɛi komɛi jieɔ amɛhiɛtserɛ waa kɛji akɛ amɛná nɔnyɛɛ. Yɛ niiamlipɛimɔ ko ni afee lɛ mli lɛ, Britania adafitswaa wolo, The Guardian lɛ kɛɛ akɛ: “Yei kɛ nihemɔ tsaa amɛnɔnyɛɛ. Etamɔ nɔ ni amɛteŋ mɛi ni heɔ nii kɛ́ amɛná nɔnyɛɛ lɛ ayifalɛ shɛɔ hii ni feɔ nakai ayifalɛ toi etɛ.”

Shi kɛlɛ, jeee shwapo ko mli anáa miishɛɛ diɛŋtsɛ kɛjɛɔ, aloo dãa ko, tsofa ko, abui ko, aloo shika ni ayɔɔ yɛ shikatoohe ko mli. Ahɔɔɔ miishɛɛ; eji nɔ ko ni akɛhaa yaka. Nɛgbɛ wɔbaanyɛ wɔná nikeenii ni jara wa nɛɛ kɛjɛ? Wɔbaasusu enɛ he yɛ sane ni nyiɛ sɛɛ lɛ mli.