Opireshɛn ni Lá Bɛ Mli—“Tsakemɔ Wulu ko yɛ Tsofafeemɔ Mli”

SANEYITSO ni ji “Opireshɛn ni ‘Lá Bɛ Mli’” lɛ mli lɛ, Maclean’s wolo tɛtrɛɛ lɛ bɔ amaniɛ akɛ datrɛfoi ni yɔɔ Canada lɛ “miiŋɔ ŋaa gbɛ̀i heei ni yɛ afii enumɔ ni eho lɛ amli kɛbaa nɛɛ lɛ, etsake nɔ ni akɛɛ atsɛɔ lɛ opireshɛn ni lá bɛ mli lɛ efee lɛ tsofafeemɔ mli nifeemɔ gbɛ titri ko lɛ.” Brian Muirhead, ni ji datrɛfonyo ni kɛ tsofafeemɔ haa mɔ wɔɔ vii kɛha opireshɛn feemɔ yɛ Winnipeg’s Health Sciences Centre lɛ ji amɛteŋ mɔ kome. Mɛni tsirɛ eniiamlitaomɔ kɛha nibii krokomɛi ni lá fataaa he kɛha tsofafeemɔ lɛ?

Yɛ afi 1986 mli lɛ, Datrɛfonyo Muirhead ŋɔ nitsumɔ ni wa efɔ̃ ehe nɔ, ákɛ ebaafee nuu ko ni eye afii 70 ni ená musuŋ fala ni miiho lá lɛ opireshɛn, mɔ ni yɛ e-Biblia mli hemɔkɛyelii ákɛ Yehowa Odasefoi lɛ ateŋ mɔ kome hewɔ lɛ, ebi ni akɛ tsofafeemɔ ni biii ni agbala lá awo mɔ mli lɛ atsu ehe nii. (Bɔfoi lɛ Asaji 15:28, 29) Wolo tɛtrɛɛ Maclean’s lɛ bɔ amaniɛ akɛ, Datrɛfonyo Muirhead “kɛ nifeemɔ gbɛ ko ni afɔɔɔ kɛ nitsumɔ ni ji nu ni tamɔ ŋoo nu ni ashiɔ awoɔ helatsɛ lɛ mli lɛ bɔi nitsumɔ koni eha elá falɛ aya hiɛ.” “Omanyeyeli jɛ gbɛ nɛɛ kɛ nitsumɔ mli ba, ni esaa ewo Muirhead hemɔkɛyeli ni mli waa akɛ ‘wɔmiigbala lá babaoo tsɔ wɔmiiwo mɛi amli’ lɛ mli hewalɛ. Misusuɔ akɛ be eshɛ ni esa akɛ wɔkwɛ gbɛ̀i krokomɛi ni abaanyɛ akɛtsu nii.’”

Nɔ ni “kanya” opireshɛn feemɔ ni lá bɛ mli ni ataoɔ lɛ “ji lá ni mɛi baajie wɔsɛɛ ko, ní akɛbaaha lɛ he susumɔ—kɛ gbeyei ni helatsɛmɛi babaoo sheɔ akɛ amɛbaanyɛ amɛná hela mli muawa kɛjɛ lá ni agbalaa awoɔ mɔ mli lɛ.” Yɛ niiamlitaomɔ hee ni datrɛfoi fee hewɔ lɛ, jeee Yehowa Odasefoi pɛ ená he sɛɛ shi moŋ mɛi krokomɛi babaoo hu. Maclean’s wie akɛ: “Yɛ bɔ ni ehe hiaa akɛ abaajie lá ni agbalaa awoɔ mɔ mli lɛ kɛjɛ shihilɛi babaoo amli lɛ sɛɛ lɛ, opireshɛn feemɔ ni lá bɛ mli lɛ haa oshara ni yɔɔ akɛ abaanyɛ aná hela kɛjɛ lá ni hela yɔɔ mli lɛ mli lɛ baa shi—kɛ́ jeee oshara babaoo po.” Shi lá ni “hela bɛ mli” po baanyɛ ekɛ oshara ni ji hela aha kɛtsɔ helatsɛmɛi lɛ agbɔmɔtsoŋ hewalɛ ni tsĩɔ hela naa lɛ ni eeeha ekpa nitsumɔ fioo lɛ nɔ.

Mɛni hɔ Yehowa Odasefoi ahemɔkɛyeli ni yɔɔ shiŋŋ ni kɔɔ nibii krokomɛi ni lá fataaa he kɛha tsofafeemɔ lɛ sɛɛ? Ekolɛ obaaná he miishɛɛ akɛ oookane wolo bibioo ni ji How Can Blood Save Your Life? (Mɛɛ Gbɛ Nɔ Lá Baanyɛ Ahere Oyiwala Yɛ?) Yehowa Odasefoi baaná he miishɛɛ akɛ amɛkɛ bo baasusu enɛ he.