Jwɛŋmɔ Mumɔ lɛ Nɔ Koni Oná Wala!
Jwɛŋmɔ Mumɔ lɛ Nɔ Koni Oná Wala!
‘Mumɔ lɛ nɔ jwɛŋmɔ lɛ, wala ni.’—ROMABII 8:6.
1, 2. Mɛɛ srɔtofeemɔ Biblia lɛ kɛbaa “heloo” kɛ “mumɔ” teŋ?
ÁKƐ aaahiɛ jeŋba ni he tse mli yɛ Nyɔŋmɔ hiɛ yɛ gbɔmɛi ni amɛ́kpɔtɔ ni woɔ helooŋ akɔnɔ hiɛ nyam lɛ ateŋ lɛ jeee kaa bibioo. Shi kɛlɛ, Ŋmalɛi lɛ kɛ srɔtofeemɔ baa “heloo” lɛ kɛ “mumɔ” lɛ teŋ, ni ehaa anaa srɔtofeemɔ ni ehiii ni baajɛ ŋmɛ ni mɔ ko aaaŋmɛ gbɛ koni eha esha heloo lɛ aye enɔ lɛ kɛ jɔɔmɔ ni baajɛ he ni aŋmɛɛɔ ahaa Nyɔŋmɔ mumɔ krɔŋkrɔŋ lɛ kudɔmɔ lɛ mli aba lɛ mli faŋŋ.
2 Ákɛ nɔkwɛmɔnɔ lɛ, Yesu Kristo kɛɛ akɛ: “Mumɔ lɛ ji nɔ ni haa wala lɛ; heloo lɛ ehe bɛ sɛɛnamɔ ko. Wiemɔi ni miwie nyɛ lɛ, mumɔ ni, ni wala ni.” (Yohane 6:63) Bɔfo Paulo ŋma wolo eyaha Kristofoi ni yɔɔ Galata lɛ akɛ: “Heloo lɛ diɔ nii asɛɛ eshiɔ mumɔ lɛ, ni mumɔ lɛ hu diɔ nii asɛɛ eshiɔ heloo lɛ; shi enɛɛmɛi kɛ amɛhe yeee.” (Galatabii 5:17) Paulo kɛɛ hu akɛ: “Mɔ ni dũɔ nii yɛ lɛ diɛŋtsɛ eheloo mli lɛ, eheloo lɛ mli ebaakpa fitemɔ kɛjɛ; shi mɔ ni dũɔ nii yɛ mumɔ mli lɛ, mumɔ lɛ mli nɔŋŋ ebaakpa naanɔ wala kɛjɛ.”—Galatabii 6:8.
3. Mɛni he hiaa koni wɔye wɔhe kwraa kɛjɛ akɔnɔi kɛ susumɔi ni ejaaa lɛ ahe?
3 Yehowa mumɔ krɔŋkrɔŋ lɛ—enifeemɔ hewalɛ lɛ—aaanyɛ ajie “heloo sɛɛdii nii” lɛ kɛjɛ wɔ esha heloo ni yeɔ wɔnɔ ni fiteɔ nii lɛ mli kɛya kwraa kɛmɔ shi. (1 Petro 2:11) Bɔni afee ni wɔye wɔhe kwraa kɛjɛ susumɔi fɔji ni eŋɔ wɔ nom lɛ mli lɛ, ehe miihia ni wɔnine ashɛ Nyɔŋmɔ mumɔ lɛ yelikɛbuamɔ nɔ, ejaakɛ Paulo ŋma akɛ: “Heloo jwɛŋmɔ lɛ, gbele ni, shi mumɔ jwɛŋmɔ lɛ, wala kɛ hejɔlɛ ni.” (Romabii 8:6) Ákɛ wɔjwɛŋ mumɔ lɛ nɔ lɛ tsɔɔ mɛni?
‘Mumɔ lɛ Nɔjwɛŋmɔ’
4. Mɛni ‘mumɔ lɛ nɔjwɛŋmɔ lɛ’ tsɔɔ?
4 Beni Paulo ŋma yɛ ‘mumɔ lɛ nɔjwɛŋmɔ’ he lɛ, ekɛ Hela wiemɔ ni tsɔɔ “gbɛ ni atsɔɔ nɔ ajwɛŋɔ, jwɛŋmɔ(-ni ato), . . . oti, nɔ ni apeleɔ ni aná, nɔ ni abɔɔ he mɔdɛŋ” tsu nii. Feemɔ wiemɔ ko ni tamɔ nakai lɛ shishi ji “ni asusu, ato jwɛŋmɔ lɛ ama gbɛ ko nɔ.” No hewɔ lɛ mumɔ lɛ nɔjwɛŋmɔ lɛ tsɔɔ Yehowa nifeemɔ hewalɛ lɛ ni aaakudɔ bo, aye onɔ, ni etsirɛ bo. Etsɔɔ akɛ wɔjɛɔ wɔsuɔmɔ mli wɔŋmɛɔ gbɛ koni wɔjwɛŋmɔ, wɔsusumɔi, kɛ nibii ni wɔpeleɔ koni wɔná lɛ abaje Nyɔŋmɔ mumɔ krɔŋkrɔŋ lɛ kudɔmɔ shishi kwraa.
5. Nɛgbɛ esa akɛ wɔkɛ wɔhe aha mumɔ krɔŋkrɔŋ lɛ kudɔmɔ kɛyashɛ?
5 Paulo ma he ni esa akɛ wɔba wɔhe shi wɔha mumɔ krɔŋkrɔŋ lɛ kudɔmɔ kɛyashɛ lɛ nɔ mi beni ewie ‘sɔɔlɔi kɛtsɔ mumɔ lɛ nɔ’ lɛ he lɛ. (Romabii 7:6) Yɛ hemɔkɛyeli ni Kristofoi yɔɔ yɛ Yesu kpɔmɔ afɔleshaa lɛ mli hewɔ lɛ, ákpɔ̃ amɛ kɛjɛ esha ni yeɔ amɛnɔ lɛ mli, ni yɛ enɛ hewɔ lɛ ‘amɛgboi’ kɛha amɛtsutsu shihilɛ ákɛ nyɔji lɛ. (Romabii 6:2, 11) Mɛi ni amɛgboi yɛ mfonirifeemɔŋ gbɛ nɔ nɛkɛ lɛ yɛ wala mli lolo yɛ gbɔmɔtsoŋ ni amɛye amɛhe agbɛnɛ akɛ amɛaanyiɛ Kristo sɛɛ ákɛ “jalɛ tsuji.”—Romabii 6:18-20.
Tsakemɔ ni Jeɔ Kpo Waa
6. Mɛɛ tsakemɔ mɛi ni batsɔmɔɔ “jalɛ tsuji” lɛ náa?
6 Tsakemɔ kɛmiijɛ “esha tsuji” kɛmiiya Nyɔŋmɔ ni asɔmɔɔ lɛ akɛ “jalɛ tsuji” lɛ mli lɛ jeɔ kpo waa diɛŋtsɛ. Paulo ŋma yɛ mɛi ni ná tsakemɔ ni tamɔ nɛkɛ lɛ ahe akɛ: ‘Aju nyɛhe, atsuu nyɛhe, abu nyɛ jalɔi yɛ wɔ-Nuntsɔ Yesu Kristo gbɛi amli kɛ wɔ-Nyɔŋmɔ lɛ mumɔ mli.’—Romabii 6:17, 18; 1 Korintobii 6:11.
7. Mɛni hewɔ ehe hiaa ni wɔná Yehowa jwɛŋmɔ yɛ saji ahe lɛ?
7 Bɔni afee ni wɔnine ashɛ tsakemɔ ni sa kadimɔ waa nɛɛ nɔ lɛ, klɛŋklɛŋ lɛ ehe miihia ni wɔkase Yehowa jwɛŋmɔ yɛ saji ahe. Afii ohai abɔ ni eho nɛ ni lalatsɛ David kɛ hiɛdɔɔ sɔle ekpa Nyɔŋmɔ fai akɛ: “Yehowa, tsɔɔmɔ mi ogbɛ̀i lɛ . . . Ha manyiɛ onɔkwale lɛ mli, ni otsɔɔ mi nii.” (Lala 25:4, 5) Yehowa bo David toi, ni E-baanyɛ eha eŋmɛnɛŋmɛnɛ beaŋ tsuji lɛ asɔlemɔ ni tamɔ nɛkɛ lɛ hu hetoo. Akɛni Nyɔŋmɔ gbɛ̀i kɛ enɔkwale lɛ ahe tse ni amɛyɛ krɔŋkrɔŋ hewɔ lɛ, amɛ nɔjwɛŋmɔ baaye abua kɛji akɛ aka wɔ koni wɔtsu helooŋ akɔnɔi ni he tseee lɛ ahe nii.
Nitsumɔ ni He Hiaa ni Nyɔŋmɔ Wiemɔ lɛ Tsuɔ
8. Mɛni hewɔ ehe hiaa ni wɔkase Biblia lɛ?
8 Nyɔŋmɔ Wiemɔ, ni ji Biblia lɛ, jɛ emumɔ lɛ mli. No hewɔ lɛ, gbɛ kome ni he hiaa ni baaha nakai mumɔ lɛ atsu nii yɛ wɔnɔ ji kɛtsɔ Biblia lɛ kanemɔ kɛ ekasemɔ nɔ—daa gbi kɛ aaahi. (1 Korintobii 2:10, 11; Efesobii 5:18) Biblia anɔkwalei kɛ shishitoo mlai ni wɔkɛaawo wɔjwɛŋmɔ kɛ tsui mli obɔ lɛ baaye abua wɔ ni wɔdamɔ tutuamɔi ni aaaba wɔmumɔŋ shidaamɔ lɛ nɔ lɛ naa. Hɛɛ, kɛ́ jeŋba shara he kaai te shi lɛ, Nyɔŋmɔ mumɔ lɛ kɛ Ŋmalɛ mli kaimɔi kɛ shishitoo mlai ni kudɔɔ mɔ ni wajeɔ wɔfaishitswaa akɛ wɔbaafee nii ni kɛ Nyɔŋmɔ suɔmɔnaa nii kpãa gbee lɛ baaba wɔjwɛŋmɔ mli. (Lala 119:1, 2, 99; Yohane 14:26) No hewɔ lɛ, alakaaa wɔ koni wɔyanyiɛ gbɛ ni ejaaa sɛɛ.—2 Korintobii 11:3.
9. Yɛ mɛɛ gbɛ nɔ Biblia kasemɔ wajeɔ wɔfaishitswaa akɛ wɔɔbaa wekukpaa ni ka wɔkɛ Yehowa teŋ lɛ yi lɛ?
9 Yɛ be mli ni wɔyaa nɔ ni wɔkɛ anɔkwayeli kɛ mɔdɛŋbɔɔ kaseɔ Ŋmalɛi lɛ kɛ Biblia kasemɔ he woji lɛ ayelikɛbuamɔ lɛ, Nyɔŋmɔ mumɔ lɛ náa wɔjwɛŋmɔ kɛ tsui nɔ hewalɛ, ni bulɛ ni wɔyɔɔ kɛha tɛi ni Yehowa efolɔ eshwie shi lɛ amli kwɔɔ. Wekukpaa ni kã wɔkɛ Nyɔŋmɔ teŋ lɛ bafeɔ nɔ ni he hiaa fe fɛɛ yɛ wɔshihilɛ mli. Kɛji akɛ wɔkɛ kaa miikpe lɛ, akɛ he wooo susumɔi ni kɔɔ bɔ ni eeeŋɔɔ eha ákɛ akɛ he aaawo nɔ fɔŋ feemɔ mli lɛ mli. Shi moŋ, nɔ ni wɔsusuɔ he amrɔ nɔŋŋ ji emuuyeli mli ni wɔɔhiɛ wɔha Yehowa. Hiɛsɔɔ ni mli wa kɛha wekukpaa ni kã wɔkɛ lɛ teŋ lɛ kanyaa wɔ koni wɔwuu wɔshi susumɔ fɛɛ susumɔ ni baanyɛ afite lɛ lɛ.
“Misumɔɔ Omla akɛ Nɔ Ko!”
10. Mɛni hewɔ Yehowa mla toiboo he hiaa bɔni afee ni wɔjwɛŋ mumɔŋ nibii ahe lɛ?
10 Kɛji akɛ wɔɔjwɛŋ mumɔ lɛ nɔ lɛ, belɛ Nyɔŋmɔ Wiemɔ lɛ he nilee kɛkɛ faaa. Maŋtsɛ Salomo le Yehowa mla lɛ jogbaŋŋ diɛŋtsɛ, shi enyɛɛɛ ehi shi yɛ naa yɛ eshihilɛ be lɛ naagbee afii lɛ amli. (1 Maŋtsɛmɛi 4:29, 30; 11:1-6) Kɛji akɛ wɔjwɛŋmɔ yɛ mumɔŋ nibii anɔ lɛ, wɔbaana bɔ ni ehe hiaa hu akɛ wɔɔjɛ wɔtsui muu fɛɛ mli wɔbo Nyɔŋmɔ mla toi, shi jeee le ni wɔɔle nɔ ni Biblia lɛ kɛɔ lɛ kɛkɛ. No tsɔɔ akɛ esa akɛ wɔkɛ anɔkwayeli apɛi tɛi ni Yehowa efolɔ eshwie shi lɛ amli ni wɔbɔ mɔdɛŋ waa wɔnyiɛ sɛɛ. Lalatsɛ lɛ yɛ subaŋ ni tamɔ nɛkɛ. Elá akɛ: “Misumɔɔ omla akɛ nɔ ko! Jenamɔ fɛɛ lɛ no he mijwɛŋɔ.” (Lala 119:97) Kɛ́ wɔsusuɔ Nyɔŋmɔ mla lɛ sɛɛnyiɛmɔ he lɛɛlɛŋ lɛ, wɔjeɔ shishi wɔjieɔ sui ni Nyɔŋmɔ gbeyeishemɔ yɔɔ mli lɛ akpo. (Efesobii 5:1, 2) Yɛ nɔ najiaŋ ni wɔkɛ wɔhe aaakpɛtɛ nɔ fɔŋ feemɔ he ni wɔnyɛɛɛ nɔ ko wɔfee lɛ, wɔjieɔ mumɔ lɛ yibii akpo, ni bɔ ni wɔshweɔ ni wɔsa Yehowa hiɛ lɛ gbalaa wɔ kɛjɛɔ “heloo lɛ nitsumɔi” ni ehiii lɛ ahe.—Galatabii 5:16, 19-23; Lala 15:1, 2.
11. Te oootsɔɔ bɔ ni Yehowa mla ni guɔ ajwamaŋbɔɔ lɛ ji hebuunɔ kɛha wɔ lɛ mli oha tɛŋŋ?
11 Te wɔɔfee tɛŋŋ wɔná bulɛ kɛ suɔmɔ ni mli kwɔ wɔha Yehowa mla? Gbɛ kome ji kɛtsɔ ejara loo sɛɛnamɔ ni yɔɔ he lɛ mlipɛimɔ jogbaŋŋ nɔ. Susumɔ Nyɔŋmɔ mla ni tsiɔ bɔlɛnamɔi anaa kɛhaa gbalashihilɛ pɛ, ni guɔ ajwamaŋbɔɔ kɛ gbalafitemɔ lɛ he okwɛ. (Hebribii 13:4) Ani mla nɛɛ ni ayeɔ nɔ lɛ haa nɔ ko kpakpa ko jeɔ wɔdɛŋ? Ani ŋwɛi Tsɛ ni yɔɔ suɔmɔ lɛ baafee mla ni haaa wɔnine ashɛ nɔ ko ni sɛɛnamɔ yɔɔ he lɛ nɔ? Dabi kwraa! Kwɛmɔ nɔ ni baa mɛi babaoo ni amɛhiii shi yɛ Yehowa jeŋba he tɛi ni efolɔ eshwie shi lɛ anaa lɛ nɔ lɛ ashihilɛi amli. Bei pii lɛ hɔ́ŋɔɔ ni asumɔɔɔ, kɛ musufitemɔ loo ekolɛ trukaa gbalashihilɛ ni miishɛɛ bɛ mli baa. Mɛi pii lɛɔ gbekɛ ni wu loo ŋa bɛ he. Agbɛnɛ hu, mɛi ni kɛ amɛhe woɔ ajwamaŋbɔɔ mli lɛ kɛ amɛhe haa bɔlɛnamɔ mli helai. (1 Korintobii 6:18) Ni kɛji akɛ Yehowa tsulɔ ko bɔ ajwamaŋ lɛ, nɔ ni jɛɔ mli baa yɛ henumɔŋ lɛ baanyɛ afite nii waa. Ni aaabɔ mɔdɛŋ atsĩ henilee ni eye fɔ lɛ kaimɔi anaa lɛ haaa awɔ nyɔɔŋ ni ekɛ jwɛŋmɔŋ haomɔi baa. (Lala 32:3, 4; 51:5) Ani ejeee nɔ ni ka shi faŋŋ akɛ, belɛ, ato Yehowa mla ni guɔ ajwamaŋbɔɔ lɛ he gbɛjianɔ koni ebu wɔhe? Hɛɛ, sɛɛnamɔ babaoo yɛ jeŋba hetsemɔ ni aaahiɛ mli lɛ he!
Sɔlemɔ Kɛha Yehowa Yelikɛbuamɔ
12, 13. Mɛni hewɔ eja akɛ wɔsɔleɔ beni esha akɔnɔi ebɔle wɔ kɛkpe lɛ?
12 Eka shi faŋŋ akɛ mumɔ lɛ nɔjwɛŋmɔ biɔ sɔlemɔ ni jɛ tsui mli. Eja gbɛ akɛ aaabi Nyɔŋmɔ mumɔ lɛ yelikɛbuamɔ, ejaakɛ Yesu kɛɛ akɛ: “Belɛ kɛji . . . nyɛle bɔ ni nyɛfeɔ ni nyɛkɛ nikeenii kpakpai keɔ nyɛbii lɛ, enyiɛ nɔŋŋ nyɛtsɛ ni yɔɔ ŋwɛi lɛ eŋɔŋ Mumɔ krɔŋkrɔŋ ehaŋ mɛi ni biɔ lɛ lɛ.” (Luka 11:13) Yɛ sɔlemɔ mli lɛ, wɔbaanyɛ wɔtsɔɔ wɔhe ni wɔkɛfɔ̃ɔ mumɔ lɛ nɔ kɛha yelikɛbuamɔ yɛ wɔgbɔjɔmɔi amli. (Romabii 8:26, 27) Kɛji akɛ wɔyɔse akɛ akɔnɔi kɛ subaŋi ni ji esha miiná wɔnɔ hewalɛ, aloo naanyo heyelilɔ ko gbala wɔjwɛŋmɔ kɛtee enɛ nɔ lɛ, ebaafee nilee gbɛ akɛ wɔɔtsĩ wɔ naagba pɔtɛɛ lɛ tã yɛ wɔ sɔlemɔi amli koni wɔbi Nyɔŋmɔ yelikɛbuamɔ kɛha hei ni wɔtsɔɔ wɔhe kɛyaa nɛɛ anɔ kunimyeli.
13 Yehowa baanyɛ aye abua wɔ koni wɔjwɛŋ nibii ni ja, ni he tse, ni ji anɔkwa, ni sa yijiemɔ lɛ anɔ. Ni kwɛ bɔ ni esa jogbaŋŋ akɛ wɔkɛ anɔkwayeli fɛɛ aaakpa lɛ fai koni ‘Nyɔŋmɔ toiŋjɔlɛ lɛ’ abu wɔtsuii kɛ wɔjwɛŋmɔŋ nyɛmɔi ahe! (Filipibii 4:6-8) No hewɔ lɛ nyɛhaa wɔsɔlea wɔbia Yehowa yelikɛbuamɔ koni wɔdi “jalɛ, Nyɔŋmɔ jamɔ, hemɔkɛyeli, suɔmɔ, tsuishiŋmɛɛ kɛ mlijɔlɛ” sɛɛ. (1 Timoteo 6:11-14) Yɛ wɔŋwɛi Tsɛ lɛ yelikɛbuamɔ naa lɛ, yeyeeyefeemɔi kɛ kaai faŋ kɛshɛŋ he ni wɔnyɛŋ nɔ wɔye. Shi moŋ nɔ ni baakadi wɔshihilɛ ji hejɔlɛ kɛ kpoofeemɔ ni Nyɔŋmɔ kɛha.
Kaafee Mumɔ lɛ Nidɔɔ Nii
14. Mɛni hewɔ Nyɔŋmɔ mumɔ lɛ ji hewalɛ kɛha hetsemɔ lɛ?
14 Yehowa tsuji ni amɛdara yɛ mumɔŋ lɛ diɛŋtsɛ kɛ Paulo ŋaawoo nɛɛ tsuɔ nii: “Nyɛkagbea Mumɔ lɛ.” (1 Tesalonikabii 5:19) Akɛni Nyɔŋmɔ mumɔ lɛ ji ‘hetsemɔ mumɔ lɛ’ hewɔ lɛ, ehe tse, eyɛ krɔŋŋ, kɛ krɔŋkrɔŋ. (Romabii 1:4) Kɛji akɛ eetsu nii yɛ wɔnɔ lɛ, nakai mumɔ lɛ haa wɔfeɔ krɔŋkrɔŋ, loo wɔhe tseɔ. Eyeɔ ebuaa ni ehaa wɔhiɔ shihilɛ gbɛ ni he tse ni toiboo kɛha Nyɔŋmɔ ekadi lɛ lɛ mli. (1 Petro 1:2) Nifeemɔ fɛɛ nifeemɔ ni he tseee lɛ tsɔɔ akɛ wɔbuuu nakai mumɔ lɛ, ni oshara baanyɛ ajɛ nakai feemɔ mli aba. Yɛ mɛɛ gbɛ nɔ?
15, 16. (a) Mɛɛ gbɛ nɔ wɔɔtsɔ wɔfee Nyɔŋmɔ mumɔ lɛ nidɔɔ nii? (b) Te wɔɔfee tɛŋŋ wɔkwa nidɔɔ nii ni wɔɔfee Yehowa mumɔ lɛ?
15 Ojogbaŋŋ, Paulo ŋma akɛ: “Nyɛkafea Nyɔŋmɔ Mumɔ krɔŋkrɔŋ lɛ nidɔɔ nii, mɔ mli ni asɔo nyɛ naa yɛ ato kpɔmɔ gbi lɛ.” (Efesobii 4:30) Ŋmalɛi lɛ haa aleɔ akɛ Yehowa mumɔ lɛ ji naasɔomɔ nɔ, aloo ‘nɔ ni baaba lɛ he okadi’ kɛha Kristofoi anɔkwafoi ni afɔ amɛ mu lɛ. Ni eji ŋwɛi shihilɛ ni gbele bɛ mli. (2 Korintobii 1:22; 1 Korintobii 15:50-57; Kpojiemɔ 2:10) Nyɔŋmɔ mumɔ lɛ baanyɛ akudɔ mɛi ni afɔ amɛ mu lɛ kɛ amɛ nanemɛi ni yɔɔ shikpɔŋ nɔ shihilɛ he hiɛnɔkamɔ lɛ yɛ anɔkwayeli shihilɛ gbɛ nɔ, ni ebaanyɛ eye ebua amɛ koni amɛkwa eshafeemɔ nitsumɔi.
16 Bɔfo lɛ bɔ kɔkɔ eshi malemɔ sui, juu, hiɛgbejianii, kɛ ekrokomɛi. Kɛji akɛ wɔŋmɛ gbɛ ni wɔkpalaŋ kɛtee nibii ni tamɔ nɛkɛ he lɛ, belɛ wɔmiite shi wɔmiishi Nyɔŋmɔ Wiemɔ lɛ mli ŋaawoo ni jɛ mumɔŋ lɛ. (Efesobii 4:17-29; 5:1-5) No tsɔɔ akɛ wɔmiifee Nyɔŋmɔ mumɔ lɛ nidɔɔ nii yɛ gbɛ ko nɔ, ni yɛ anɔkwale mli lɛ eji nɔ ko ni wɔbaasumɔ ni wɔkwa. Yɛ enɛ hewɔ lɛ, kɛji akɛ wɔteŋ mɔ ko je shishi akɛ eeeku ehiɛ eshwie Yehowa Wiemɔ lɛ mli ŋaawoo lɛ nɔ lɛ, no lɛ wɔbaaje shishi wɔná subaŋi komɛi ni nɔ ni baajɛ mli aba ji wɔsuɔmɔ mli ni wɔɔjɛ wɔfee esha kɛ ŋwɛi duromɔ ni aaaŋmɛɛ wɔ kwraa. (Hebribii 6:4-6) Eyɛ mli akɛ ekolɛ wɔjeee mɛi ni feɔ esha bianɛ moŋ, shi wɔbaanyɛ wɔfee mɛi ni kɛ wɔhiɛ etsɔɔ jɛmɛ gbɛ. Kɛji akɛ wɔkpalaŋ kɛjɛ mumɔ lɛ kudɔmɔ shishi lɛ, belɛ wɔmiifee lɛ nidɔɔ nii. Agbɛnɛ hu wɔmiite shi wɔwo Yehowa ni wɔmiifee mumɔ krɔŋkrɔŋ lɛ jɛɛhe lɛ nidɔɔ nii. Ákɛ mɛi ni sumɔɔ Nyɔŋmɔ lɛ, wɔsumɔŋ ni wɔfee nakai kɔkɔɔkɔ. Shi moŋ, wɔsɔle wɔbi Yehowa yelikɛbuamɔ koni wɔkafee emumɔ lɛ nidɔɔ nii, shi moŋ wɔnyɛ wɔwo egbɛi krɔŋkrɔŋ lɛ hiɛ nyam kɛtsɔ mumɔ lɛ ni wɔɔya nɔ wɔjwɛŋ nɔ lɛ nɔ.
Yaa nɔ Ojwɛŋ Mumɔ lɛ Nɔ
17. Mɛni ji mumɔŋ otii komɛi ni wɔbaanyɛ wɔkɛmamɔ wɔhiɛ, ni mɛni hewɔ nilee yɔɔ nakai feemɔ mli lɛ?
17 Gbɛ ni sa kadimɔ jogbaŋŋ ni wɔɔtsɔ nɔ wɔjwɛŋ mumɔ lɛ nɔ ji ni wɔkɛ mumɔŋ otii komɛi amamɔ wɔhiɛ ni wɔtsu he nii ni wɔnine ashɛ nɔ. Yɛ bɔ ni wɔhiamɔ nii kɛ shihilɛi yɔɔ hewɔ lɛ, ekolɛ nɔ ni baafata otii lɛ ahe ji wɔ nikasemɔ sui ni wɔɔha eya hiɛ, shiɛmɔ nitsumɔ lɛ mli ni wɔkɛ wɔhe aaawo babaoo, aloo ni wɔɔha wɔnine ashɛ sɔɔmɔ hegbɛ pɔtɛɛ ko nɔ, tamɔ be-fɛɛ gbɛgbamɔ sɔɔmɔ nitsumɔ lɛ, Betel sɔɔmɔ, loo maŋsɛɛ sanekpakpa shiɛmɔ nitsumɔ lɛ nɛkɛ. Enɛ baaha wɔjwɛŋmɔ ahi mumɔŋ nibii anɔ ni ebaaye ebua wɔ koni wɔte shi wɔwo wɔhe ni wɔɔŋmɛɛ wɔha wɔ helooŋ gbɔjɔmɔi aloo ni wɔɔha otii ni ji heloo naa nibii ataomɔ kɛ nibii agbɛjianɔtoo nɛɛ mli akɔnɔi ni egbɛ eshwã ni damɔɔɔ ŋmalɛ nɔ lɛ aaagbala wɔ lɛ. Eka shi faŋŋ akɛ, enɛ ji nilee gbɛ lɛ, ejaakɛ Yesu wo hewalɛ akɛ: “Nyɛkabɔa jwetrii nyɛhaa nyɛhe yɛ shikpɔŋ lɛ nɔ, he ni omlɛgɛ kɛ ŋkanale fiteɔ nii ni julɔi gbáa bajuɔ yɛ lɛ. Shi nyɛbɔa jwetrii nyɛhaa nyɛhe yɛ ŋwɛi, he ni omlɛgɛ kɛ ŋkanale fiteee nii ni julɔi gbáaa amɛyajuuu yɛ lɛ. Shi he ni nyɛjwetri yɔɔ lɛ, jɛi nyɛtsui aaahi.”—Mateo 6:19-21.
18. Mɛni hewɔ ehe hiaa waa akɛ wɔɔya nɔ wɔjwɛŋ mumɔ lɛ nɔ yɛ naagbee gbii nɛɛ amli lɛ?
18 Eka shi faŋŋ akɛ, mumɔ lɛ nɔjwɛŋmɔ kɛ je lɛŋ akɔnɔi ni wɔbaa amɛ shi lɛ ji nilee gbɛ diɛŋtsɛ yɛ “naagbee gbii” nɛɛ amli. (2 Timoteo 3:1-5) Fɛɛ sɛɛ lɛ, “je lɛ hoɔ eyaa kɛ emli sɛɛdii nii lɛ; shi mɔ ni feɔ Nyɔŋmɔ suɔmɔnaa nii lɛ hiɔ shi kɛyaa naanɔ.” (1 Yohane 2:15-17) Ákɛ nɔkwɛmɔnɔ lɛ, kɛji akɛ oblanyo loo oblayoo Kristofonyo kɛ ehe wo be-fɛɛ sɔɔmɔ lɛ mli lɛ, enɛ baatsɔ tamɔ la ni kudɔɔ lɛ yɛ onukpa-tsɔmɔ afii ni kaa mɔ lɛ amli. Kɛji akɛ aanyɛ enɔ koni eŋmɛɛ saji ahe po lɛ, gbɔmɔ ni tamɔ nɛkɛ baana nɔ ni etaoɔ ni etsu yɛ Yehowa sɔɔmɔ mli lɛ mli faŋŋ. Mumɔŋ gbɔmɔ ni tamɔ nɛkɛ lɛ baabu mumɔŋ otii ni enine aaashɛ nɔ lɛ ni eeeŋmɛɛ he kɛha heloonaa nibii asɛɛdii loo akɔnɔ fɛɛ akɔnɔ ni esha woɔ shi akɛ ekɛaaha lɛ akɛ eji nii ni nilee bɛ mli aloo kwashiai asane po. Kaimɔ akɛ mumɔŋ nibii asɛɛdii ha Mose ‘hala akɛ ekɛ Nyɔŋmɔ webii aaana amanehulu moŋ fe ni eeeye esha mli ŋɔɔmɔ be fioo ko.’ (Hebribii 11:24, 25) Wɔdara jio, wɔdarako jio, wɔhalaa nii ni tamɔ nɛkɛ kɛji akɛ wɔtee nɔ wɔjwɛŋ mumɔ lɛ nɔ fe heloo ni egbee shi lɛ.
19. Mɛɛ sɛɛnamɔi wɔbaaná mli ŋɔɔmɔ kɛji akɛ wɔtee nɔ wɔjwɛŋ mumɔ lɛ nɔ?
19 “Heloo jwɛŋmɔ lɛ, Nyɔŋmɔ nyɛ̃ɛ ni,” yɛ be mli ni “mumɔ jwɛŋmɔ lɛ, wala kɛ hejɔlɛ ni.” (Romabii 8:6, 7) Kɛji akɛ wɔtee nɔ wɔjwɛŋ mumɔ lɛ nɔ lɛ, wɔbaaná toiŋjɔlɛ ni jara wa waa. Abaabu wɔtsuii kɛ jwɛŋmɔŋ nyɛmɔi ahe babaoo kɛjɛ hewalɛ ni wɔ eshafeemɔ shihilɛ lɛ náa yɛ wɔnɔ lɛ he. Wɔbaanyɛ wɔte shi wɔwo kaai ni baaha wɔkɛ wɔhe awo efɔŋfeemɔ mli lɛ jogbaŋŋ. Ni wɔbaaná ŋwɛi yelikɛbuamɔ koni wɔkɛdamɔ mpleshii ni yaa nɔ yɛ heloo lɛ kɛ mumɔ teŋ lɛ naa.
20. Mɛni hewɔ wɔbaanyɛ wɔná nɔmimaa akɛ wɔbaanyɛ wɔye kunim yɛ ta ni heloo lɛ kɛ mumɔ lɛ wuɔ lɛ mli lɛ?
20 Kɛji akɛ wɔtee nɔ wɔjwɛŋ mumɔ lɛ nɔ lɛ, wɔhiɛɔ wɔkɛ Yehowa, wala kɛ mumɔ krɔŋkrɔŋ lɛ fɛɛ jɛɛhe lɛ teŋ tsakpaa ni he hiaa waa mli. (Lala 36:10; 51:13) Satan Abonsam kɛ esamaŋfoi lɛ miifee nɔ fɛɛ nɔ ni amɛaanyɛ koni amɛfite wekukpaa ni kã wɔkɛ Yehowa Nyɔŋmɔ teŋ lɛ. Amɛbɔɔ mɔdɛŋ ni amɛná wɔjwɛŋmɔi anɔ hewalɛ, ejaakɛ amɛle akɛ kɛji akɛ wɔŋmɛɛ he lɛ, nɔ ni baajɛ mli aba ji nyɛ̃ɛ ni aaakã wɔkɛ Nyɔŋmɔ teŋ kɛ gbele. Shi wɔbaanyɛ wɔye kunim yɛ ta ni heloo lɛ kɛ mumɔ lɛ wuɔ nɛɛ mli. No ji niiashikpamɔ ni Paulo ná, ejaakɛ yɛ be mli ni eŋmaa lɛ diɛŋtsɛ etawuu lɛ he sane lɛ, klɛŋklɛŋ lɛ ebi akɛ: “Namɔ aaajie mi kɛaajɛ nɛkɛ gbele gbɔmɔtso nɛɛ dɛŋ?” Kɛkɛ ni beni etsɔɔ akɛ jiemɔ baanyɛ aba lɛ, ebo akɛ: “Miitsɔ wɔ-Nuntsɔ Yesu Kristo nɔ miida Nyɔŋmɔ shi.” (Romabii 7:21-25) Wɔ hu wɔbaanyɛ wɔtsɔ Kristo nɔ wɔda Nyɔŋmɔ shi akɛni ekɛ nɔ ni wɔbaanyɛ wɔtsɔ nɔ wɔdamɔ adesa gbɔjɔmɔi lɛ anaa eha wɔ koni wɔya nɔ wɔjwɛŋ mumɔ lɛ nɔ kɛ naanɔ wala he hiɛnɔkamɔ ni yɔɔ naakpɛɛ lɛ.—Romabii 6:23.
Ani Okaiɔ?
• Ákɛ aaajwɛŋ mumɔ lɛ nɔ lɛ tsɔɔ mɛni?
• Te wɔɔfee tɛŋŋ wɔŋmɛ gbɛ ni Yehowa mumɔ lɛ atsu nii yɛ wɔnɔ?
• Tsɔɔmɔ nɔ hewɔ ni yɛ esha ni wɔwuɔ wɔshiɔ lɛ mli lɛ, ehe hiaa ni wɔkase Biblia lɛ, wɔbo Yehowa mlai atoi, ni wɔsɔle wɔha lɛ lɛ mli.
• Yɛ mɛɛ gbɛ nɔ mumɔŋ otii ni wɔkɛaamamɔ wɔhiɛ lɛ baaha wɔhi wala gbɛ lɛ nɔ?
[Nikasemɔ lɛ he Sanebimɔi]
[Mfoniri ni yɔɔ baafa 16]
Biblia kasemɔ yeɔ ebuaa wɔ ni wɔdamɔɔ wɔmumɔŋ shihilɛ lɛ ni atutuaa lɛ naa
[Mfoniri ni yɔɔ baafa 17]
Eja akɛ wɔɔsɔle wɔbi Yehowa yelikɛbuamɔ koni wɔye eshafeemɔ sui anɔ kunim
[Mfonirii ni yɔɔ baafa 18]
Mumɔŋ otii ni wɔkɛaama wɔhiɛ baaye ebua wɔ koni wɔya nɔ wɔjwɛŋ mumɔ lɛ nɔ