Anɔkwa Kristojamɔ Miiye Kunim!
Anɔkwa Kristojamɔ Miiye Kunim!
“Nɔ̃ hewalɛ ni [Yehowa, NW] wiemɔ lɛ ná ni ekɛda ni eye kunim nɛ.”—BƆFOI LƐ ASAJI 19:20.
1. Tsɔɔmɔ klɛŋklɛŋ afii oha lɛ mli Kristojamɔ shweremɔ lɛ mli.
AKƐNI mumɔ krɔŋkrɔŋ hewalɛ lɛ wo mra be mli Kristofoi lɛ hewalɛ hewɔ lɛ, amɛkɛ ekãa ni anyɛɛɛ agbe jaje Nyɔŋmɔ wiemɔ lɛ. Yinɔsaneŋmalɔ ko ŋma akɛ: “Kristojamɔ gbɛ eshwã oyayaayai yɛ gbɛ ni yɔɔ naakpɛɛ nɔ yɛ Roma je lɛ mli. Ekolɛ, beni shɛɔ afii 100 lɛ mli lɛ, no mli lɛ Kristofoi yɛ shikpɔŋkuku fɛɛ shikpɔŋkuku ni bɛŋkɛ Mediteranea lɛ mli.”
2. Mɛɛ gbɛ nɔ Satan ka akɛ eeetsĩ sanekpakpa lɛ naa yɛ, ni agba enɛ he sane afɔ̃ shi yɛ mɛɛ gbɛ nɔ?
2 Satan Abonsam nyɛɛɛ aha mra be mli Kristofoi lɛ abu amɛnaa. Shi moŋ etsɔ gbɛ kroko—hemɔkɛyeli kwamɔ—nɔ ekpee sanekpakpa lɛ naa. Yesu egba nɔ ni ba nɛɛ he sane efɔ̃ shi yɛ ebɛbua ní kɔɔ ŋmãa kɛ jwɛi lɛ he lɛ mli. (Mateo 13:24-30, 36-43) Bɔfo Petro hu ebɔ kɔkɔ akɛ apasa tsɔɔlɔi baate shi yɛ asafo lɛ mli, ni amɛkɛ hiɛkpatamɔ kui baaba. (2 Petro 2:1-3) Nakai nɔŋŋ bɔfo Paulo ebɔ kɔkɔ diɛŋtsɛ akɛ hemɔkɛyeli kwamɔ baatsɔ Yehowa gbi ní baaba lɛ hiɛ.—2 Tesalonikabii 2:1-3.
3. Mɛni ba yɛ bɔfoi lɛ agbele sɛɛ?
3 Yɛ bɔfoi lɛ agbele sɛɛ lɛ, wɔŋjalɔi atsɔɔmɔi kɛ jeŋ nilee bahà sanekpakpa lɛ nɔ. Taakɛ agba afɔ̃ shi lɛ, apasa tsɔɔlɔi tsɔ̃mɔ anɔkwa shɛɛ sane ni yɔɔ krɔŋŋ lɛ ní amɛfite lɛ. Fiofio lɛ, apasa jamɔ ko ni atsɛɔ lɛ Kristendom bahà anɔkwa Kristojamɔ nɔ. Osɔfoi akuu ko ní bɔ mɔdɛŋ koni amɛkaha gbɔmɛi foji lɛ miikane Biblia lɛ te shi. Eyɛ mli akɛ mɛi ni tsɛɔ amɛhe Kristofoi lɛ ayifalɛ tee hiɛ moŋ, shi amɛjamɔ lɛ bɛ krɔŋŋ. Kristendom baheshi ni eshɛ shikpɔŋkukuji babaoo nɔ, ni ebafee gbɛjianɔtoo ni he wa ni yɔɔ hewalɛ yɛ Wuoyigbɛ maji lɛ anɔ, shi kɛlɛ, Nyɔŋmɔ jɔɔmɔi loo emumɔ lɛ bɛ amɛnɔ.
4. Mɛni hewɔ ŋaa ni Satan tsɔ koni ekɛfite Nyɔŋmɔ yiŋtoo lɛ yeee omanye lɛ?
4 Shi kɛlɛ, Satan nine nyɛ shi kɛ̃ yɛ ŋaa ní etsɔ koni ekɛfite Yehowa yiŋtoo lɛ mli. Yɛ hemɔkɛyeli kwamɔ bei ni yɔɔ gbeyei waa lɛ po mli lɛ, no mli lɛ anɔkwa Kristojamɔ miiya nɔ lolo yɛ mɛi komɛi ateŋ. Hii ní kwɛ Biblia lɛ nɔ amɛŋmala eko lɛ kwɛ jogbaŋŋ ni amɛŋma lɛ pɛpɛɛpɛ. No hewɔ lɛ, Biblia lɛ diɛŋtsɛ kã he eye emuu, eyɛ mli akɛ mɛi babaoo ní kɛɛ akɛ amɛyɛ hewalɛ ní akɛtsɔɔ lɛ tsake eshɛɛ sane lɛ hiɛ. Yɛ afii ohai babaoo ni ho lɛ mli lɛ, no mli lɛ woloŋlelɔi tamɔ Jerome kɛ Tyndale kɛ ekãa tsɔɔ Nyɔŋmɔ Wiemɔ lɛ shishi ni amɛja. Gbɔmɛi akpei abɔ anine shɛ Biblia lɛ nɔ ni amɛkɛ amɛhe wo Kristojamɔ ko mli, eyɛ mli akɛ lakamɔ yɛ mli.
5. Mɛni gbalɔ Daniel gba yɛ ‘anɔkwa nilee’ he?
5 Yɛ naagbee lɛ, taakɛ agba afɔ̃ shi yɛ Daniel wolo lɛ mli lɛ, ‘anɔkwa nilee lɛ bafa babaoo.’ Enɛ ba mli yɛ “naagbee be lɛ”—ni ji be ni wɔyɔɔ mli amrɔ nɛɛ mli. (Daniel 12:4) Mumɔ krɔŋkrɔŋ lɛ eha mɛi ni sumɔɔ anɔkwale lɛ yɛ jeŋ fɛɛ lɛ ená anɔkwa Nyɔŋmɔ lɛ kɛ eyiŋtoo he anɔkwa nilee. Beni hemɔkɛyeli kwamɔ tsɔɔmɔi ehi shi afii ohai abɔ lɛ fɛɛ sɛɛ po lɛ, Nyɔŋmɔ wiemɔ lɛ miiye kunim! Ŋmɛnɛ, aajaje sanekpakpa lɛ yɛ he fɛɛ he, ni eeha gbɔmɛi miiná jeŋ hee ni yɔɔ miishɛɛ lɛ he hiɛnɔkamɔ. (Lala 37:11) Agbɛnɛ nyɛhaa wɔpɛia ŋmɛnɛŋmɛnɛ beaŋ shweremɔ ni Nyɔŋmɔ wiemɔ lɛ naa lɛ mli.
Bɔ ni Wiemɔ lɛ Eshwere Ŋmɛnɛ
6. Beni shɛɔ afi 1914 lɛ, no mli lɛ mɛɛ anɔkwalei Biblia Kaselɔi lɛ enu shishi?
6 Yɛ afii ohai 19 lɛ naagbee gbɛ lɛ, Biblia mli anɔkwale lɛ kanya Biblia Kaselɔi akuu bibioo ko ni ale amɛ ŋmɛnɛ akɛ Yehowa Odasefoi lɛ. Beni shɛɔ afi 1914 lɛ, no mli lɛ amɛnu Biblia lɛ shishi. Amɛnu anɔkwalei ni yɔɔ naakpɛɛ ni kɔɔ Nyɔŋmɔ yiŋtoi ahe lɛ shishi. Yehowa suɔmɔ ní ha etsu e-Bi lɛ kɛba shikpɔŋ lɛ nɔ, ní no hewɔ lɛ, egbele gbɛ kɛha naanɔ wala lɛ tsirɛ amɛ waa. Amɛbale Nyɔŋmɔ gbɛi kɛ esui lɛ, ni amɛhiɛ sɔ enɛ. Kɛfata he lɛ, amɛyɔse akɛ “jeŋmaji abei” lɛ eba naagbee momo, ni etsɔɔ akɛ be eshɛ ní Nyɔŋmɔ Maŋtsɛyeli nɔyeli lɛ kɛ jɔɔmɔi baaba abaha adesai aweku lɛ. (Luka 21:24) Mɛɛ anunyam sanekpakpa po nɛ! Esa akɛ awie anɔkwalei ni mli wa nɛɛ he sane atsɔɔ mɔ fɛɛ mɔ yɛ he fɛɛ he. Adesai awala yɛ oshara mli!
7. Biblia mli anɔkwalei eye kunim yɛ ŋmɛnɛŋmɛnɛ beaŋ yɛ mɛɛ gbɛ nɔ?
7 Yehowa jɔɔ nakai Kristofoi fioo ní afɔ amɛ mu lɛ. Ŋmɛnɛ, mɛi ni ekpɛlɛ anɔkwa Kristojamɔ nɔ lɛ ayifalɛ eteke akpekpei ekpaa. Nyɔŋmɔ wiemɔ lɛ hu egbɛ eshwã shikpɔŋkukuji babaoo nɔ ejaakɛ anaa Yehowa Odasefoi yɛ shikpɔji 235 nɔ. Kɛfata he lɛ, hewalɛ yɛ Biblia mli anɔkwale lɛ mli, eyeɔ gbɛtsii nii, ni ji jamɔ kɛ ekrokomɛi fɛɛ nɔ. Nɛkɛ jeŋ fɛɛ shiɛmɔ nitsumɔ nɛɛ kɛ odaseyeli ni anyɛŋ aku hiɛ ashwie nɔ haa ákɛ, Yesu yɛ Maŋtsɛyeli hewalɛ mli amrɔ nɛɛ.—Mateo 24:3, 14.
8. Mɛni mɛi komɛi ewie yɛ shweremɔ ni Yehowa Odasefoi lɛ náa lɛ he?
8 Taakɛ bɔ ni yinɔsaneŋmalɔi wie shweremɔ ni yɔɔ naakpɛɛ ni Kristojamɔ ná yɛ klɛŋklɛŋ afii oha lɛ mli lɛ he lɛ, nakai nɔŋŋ woloŋlelɔi babaoo ewie shweremɔ ni Yehowa webii ni yɔɔ ŋmɛnɛŋmɛnɛ beaŋ lɛ náa lɛ he sane. Yɛ United States lɛ, woloŋlelɔi enyɔ komɛi fee ekome ní amɛŋma akɛ: “Yɛ afii 75 ni eho lɛ mli lɛ, Yehowa Odasefoi etee nɔ eshwere yɛ naakpɛɛ gbɛ nɔ . . . ni amɛfee enɛ yɛ je lɛŋ fɛɛ.” Adafitswaa wolo ko ni yɔɔ Afrika Bokagbɛ lɛ tsɛ Odasefoi lɛ akɛ “je lɛŋ jamɔi ní shwereɔ oyayaayai ní abuɔ lɛ waa lɛ ateŋ ekome, yɛ amɛhe ní amɛkɛkpɛtɛɔ Biblia tsɔɔmɔi ahe kpɛŋŋ lɛ hewɔ.” Ni Katolik adafitswaa wolo ko ni hiɛ blema kusum mli, ní akalaa yɛ Europa lɛ wie “shweremɔ babaoo ni Yehowa Odasefoi náa” lɛ he sane. Mɛni kɛ shweremɔ nɛɛ fɛɛ ba?
Mumɔ Krɔŋkrɔŋ lɛ Miitsu Nii Ŋmɛnɛ
9. (a) Mɛni ji yiŋtoo titri ní haa Nyɔŋmɔ wiemɔ lɛ yeɔ kunim lɛ? (b) Mɛɛ gbɛ nɔ Yehowa gbalaa mɛi kɛbɛŋkɛɔ ehe?
9 Yiŋtoo titri ní haa Nyɔŋmɔ wiemɔ lɛ yeɔ kunim ŋmɛnɛ lɛ ji akɛ, Yehowa mumɔ lɛ miitsu nii waa taakɛ eji yɛ klɛŋklɛŋ afii oha lɛ mli lɛ. Yesu kɛɛ akɛ: “Mɔ ko nyɛŋ aba miŋɔɔ, akɛ ja tsɛ lɛ ní tsu mi lɛ gbala lɛ dã.” (Yohane 6:44) Wiemɔ nɛɛ tsɔɔ akɛ Nyɔŋmɔ gbalaa mɛi ni sa lɛ blɛoo, ni ekanyaa amɛtsuii. Yehowa miitsɔ shiɛmɔ ni e-Dasefoi lɛ shiɛɔ lɛ nɔ eegbala “jeŋmaji lɛ fɛɛ anii ni jara wa lɛ”—mɛi ni he jɔ lɛ, gbɔmɛi ni tamɔ gwaŋtɛŋi ni yɔɔ shikpɔŋ lɛ nɔ lɛ kɛmiiba esɔɔmɔ mli.—Hagai 2:6, 7.
10. Mɛɛ gbɔmɛi ekpɛlɛ Nyɔŋmɔ wiemɔ lɛ nɔ?
10 Jeee hewalɛ pɛ mumɔ krɔŋkrɔŋ lɛ ewo Nyɔŋmɔ webii lɛ koni amɛkɛ Nyɔŋmɔ wiemɔ lɛ ayashɛ shikpɔŋ lɛ naagbeehei lɛ; etsirɛ gbɔmɛi srɔtoi fɛɛ ní amɛkpɛlɛ sanekpakpa lɛ nɔ. Eji anɔkwale akɛ, mɛi ni ekpɛlɛ Nyɔŋmɔ wiemɔ lɛ nɔ lɛ jɛ “akutso fɛɛ akutso kɛ wiemɔ fɛɛ wiemɔ kɛ maŋ fɛɛ maŋ kɛ jeŋmaŋ fɛɛ jeŋmaŋ mli.” (Kpojiemɔ 5:9; 7:9, 10) Anaa amɛ yɛ niiatsɛmɛi kɛ ohiafoi ateŋ, mɛi ni le woloŋ waa kɛ mɛi ni leee woloŋ lɛ ateŋ. Mɛi komɛi kpɛlɛ wiemɔ lɛ nɔ yɛ ta kɛ jaramɔ shihilɛ ni mli wa waa mli, yɛ be mli ni mɛi krokomɛi fee nakai yɛ toiŋjɔlɛ kɛ shweremɔ be mli. Hii kɛ yei, kɛ nɔyelii kɛ kusumii fɛɛ shishi, kɛjɛ yiwalɛ nsrai amli kɛyashi maŋtsɛmɛi ashiai amli ekpɛlɛ sanekpakpa lɛ nɔ.
11. Mɛɛ gbɛ nɔ mumɔ krɔŋkrɔŋ lɛ tsuɔ nii yɛ Nyɔŋmɔ webii ashihilɛi amli ŋmɛnɛ, ni mɛɛ srɔtofeemɔ efee faŋŋ?
11 Yɛ shihilɛi srɔtoi ní yɔɔ naakpɛɛ ní Nyɔŋmɔ webii yɔɔ mli lɛ fɛɛ sɛɛ lɛ, amɛfee ekome ni amɛyɛ toiŋjɔlɛ mli. (Lala 133:1-3) Enɛ hu kɛ odaseyeli haa akɛ mumɔ krɔŋkrɔŋ lɛ miitsu nii yɛ mɛi ni sɔmɔɔ Nyɔŋmɔ lɛ ashihilɛ mli. Emumɔ lɛ ji hewalɛ kpakpa ní yeɔ ebuaa etsuji lɛ ni amɛjieɔ suɔmɔ, miishɛɛ, toiŋjɔlɛ, mlihilɛ, kɛ sui kpakpai krokomɛi akpo. (Galatabii 5:22, 23) Ŋmɛnɛ, wɔnaa nɔ ni gbalɔ Maleaki gba efɔ̃ shi jeeŋmɔ beebe lɛ faŋŋ. “[Nyɛaana] srɔto ni yɔɔ jalɔ kɛ efɔŋfeelɔ teŋ, kɛ mɔ ni sɔmɔɔ Nyɔŋmɔ kɛ mɔ ni sɔmɔɔɔ lɛ teŋ.”—Maleaki 3:18.
Nyɔŋmɔ Wiemɔ lɛ Miiye Kunim yɛ Nitsulɔi ni Yɔɔ Ekãa Anɔ
12. Te Yehowa Odasefoi nuɔ sanekpakpa jajemɔ nitsumɔ lɛ he amɛhaa tɛŋŋ, ni mɛɛ naatsii amɛkpaa gbɛ yɛ amɛshiɛmɔ nitsumɔ lɛ mli?
12 Yehowa Odasefoi ni yɔɔ ŋmɛnɛ lɛ jeee sɔlemɔyalɔi ni eshiɛɛɛ sane lɛ. Amɛkɛ amɛhe woɔ sanekpakpa shiɛmɔ nitsumɔ lɛ mli kɛ ekãa. Taakɛ mra be mli Kristofoi lɛ ji lɛ, amɛjɛɔ amɛsuɔmɔ mli amɛkɛ amɛhe haa ni amɛfeɔ Nyɔŋmɔ suɔmɔnaa nii, ni amɛtaoɔ koni amɛye amɛbua mɛi krokomɛi ní amɛkase Yehowa Maŋtsɛyeli shiwoi lɛ ahe nii. Amɛji Nyɔŋmɔ nanemɛi nitsulɔi, ní feɔ nii ní kɛ mumɔ krɔŋkrɔŋ lɛ kpãa gbee, ni amɛbuaa mɛi krokomɛi anaa kɛbaa Yehowa sɔɔmɔ mli. Kɛtsɔ nakai feemɔ nɔ lɛ, amɛjieɔ Yehowa mɔbɔnalɛ kɛ suɔmɔ ní ejie lɛ kpo etsɔɔ adesai aweku ni heee yeee lɛ kpo. Ni amɛfeɔ enɛ yɛ shikpilikpiifeemɔ, hefɛoyeli, kɛ yiwaa ní amɛkɛkpeɔ lɛ fɛɛ sɛɛ. Yesu saa esɛɛnyiɛlɔi lɛ eha naatsii srɔtoi ni abaajie lɛ kpo yɛ sanekpakpa lɛ he. Ekɛɛ akɛ: “Nyɔŋ efeee enuntsɔ. Kɛ́ amɛwa mi yi lɛ, amɛaawa nyɛ hu yi; kɛ́ amɛye miwiemɔ nɔ lɛ, amɛaaye nyɛ hu nyɛnɔ̃ nɔ.”—Yohane 15:20.
13. Mɛɛ nibii ni bɛ Kristendom ebu babaoo yɛ Yehowa Odasefoi ateŋ?
13 Wɔnyɛŋ wɔku wɔhiɛ wɔshwie bɔ ni Yehowa Odasefoi ni yɔɔ ŋmɛnɛ kɛ mɛi ni kpɛlɛ anɔkwa Kristojamɔ nɔ yɛ klɛŋklɛŋ afii oha lɛ mli lɛ je amɛhe ha lɛ nɔ. Nɔ kroko hu ni sa kadimɔ waa ji srɔtofeemɔ ni yɔɔ Yehowa Odasefoi kɛ Kristendom teŋ ŋmɛnɛ lɛ. Beni woloŋlelɔ ko eŋma ekãa ni mra be mli Kristofoi lɛ kɛshiɛ sanekpakpa lɛ sɛɛ lɛ, ekɛɛ akɛ: “Kɛ́ afeee tsakemɔ ko yɛ sɔlemɔ lɛ gbɛjianɔtoo lɛ mli koni eha amɛbu shiɛmɔ nitsumɔ lɛ ekoŋŋ akɛ eji Kristofonyo fɛɛ Kristofonyo ni abaptisi lɛ lɛ gbɛnaa nii, ní ekɛ shihilɛ gbɛ ni hi fe nɔ ni mɛi ni bɛ hemɔkɛyeli lɛ baanyɛ aná lɛ haa lɛ, no lɛ ebaawa akɛ wɔbaaná nɔyaa.” Nibii ni Kristendom shɛɛɛ he lɛ ebu babaoo yɛ Yehowa Odasefoi ateŋ! Amɛyɛ hemɔkɛyeli ní hiɛ kã, anɔkwa hemɔkɛyeli, kɛ hemɔkɛyeli ni damɔ Biblia mli anɔkwale nɔ, ní no tsirɛɔ amɛ koni amɛgba mɛi fɛɛ ní baabo toi lɛ.—1 Timoteo 2:3, 4.
14. Te Yesu bu esɔɔmɔ nitsumɔ lɛ eha tɛŋŋ, ni mɛɛ su ekaselɔi lɛ jieɔ lɛ kpo ŋmɛnɛ?
14 Yesu bu esɔɔmɔ nitsumɔ lɛ kɛ hiɛdɔɔ, ni eha efee eshihilɛ mli nɔ titri. Ekɛɛ Pilato akɛ: “Enɛ hewɔ afɔ́ mi ni enɛ hewɔ nɔŋŋ miba je lɛ mli, koni mibaye anɔkwale lɛ he odase.” (Yohane 18:37) Nyɔŋmɔ webii nuɔ he taakɛ Yesu fee lɛ. Akɛni Biblia mli anɔkwale lɛ yɔɔ amɛtsui mli hewɔ lɛ, amɛbɔɔ mɔdɛŋ amɛtaoɔ gbɛ̀i ní amɛaatsɔ nɔ amɛgba mɛi babaoo bɔ ni amɛaanyɛ. Gbɛi nɛɛ ateŋ ekomɛi jieɔ hesaa ní sa kadimɔ kpo.
15. Mɛi komɛi ejie hesaa kpo yɛ sanekpakpa shiɛmɔ nitsumɔ lɛ mli yɛ mɛɛ gbɛ nɔ?
15 Yɛ Amerika Wuoyigbɛ maŋ ko nɔ lɛ, Odasefoi lɛ fãa gbɛ kɛtsɔɔ faa nine ko ni tsaa Amazon Faa lɛ nɔ ní amɛyagba mɛi ni yɔɔ jɛmɛ lɛ anɔkwale lɛ he sane. Shi kɛlɛ, beni maŋ teŋ béi fɛ́ yɛ afi 1995 mli lɛ, atsĩ maŋbii ni tsɔɔ faa lɛ nɔ lɛ naa. Akɛni Odasefoi lɛ etswa amɛfai shi akɛ amɛkɛ Biblia kasemɔ he woji baaha mɛi ni yɔɔ he miishɛɛ lɛ hewɔ lɛ, amɛkpɛ mli akɛ amɛkɛ amɛshɛɛ sane lɛ baatsɔ nu lɛ hiɛ. Amɛŋmala woji ni amɛkɛ Buu-Mɔɔ kɛ Awake! woji tɛtrɛbii lɛ fata he ni amɛkɛwo rɔba tɔi amli. No sɛɛ lɛ amɛshɛrɛ tɔi lɛ amɛshwie nu lɛ mli. Amɛtee nɔ amɛfee enɛ aahu afii ejwɛ kɛ fã kɛyashi aha maŋbii lɛ gbɛ ní amɛtsɔ faa lɛ nɔ ekoŋŋ. Gbɔmɛi ni yɔɔ faa lɛ naa lɛ da Odasefoi lɛ ashi yɛ woji lɛ ahewɔ. Awula ko ni no mli lɛ eji Biblia kaselɔ lɛ kɛ hiɛ yaafonui fua amɛ ni ekɛɛ: “Misusu akɛ minaŋ nyɛ dɔŋŋ. Shi kɛlɛ, beni minine bɔi woji ni yɔɔ tɔi lɛ amli lɛ nɔ shɛɛ lɛ, mina akɛ nyɛhiɛ kpako minɔ!” Mɛi krokomɛi hu ni yɔɔ faa lɛ he lɛ kɛɛ akɛ amɛkane woji tɛtrɛbii lɛ shii abɔ. Akrowai lɛ babaoo yɛ “post ɔfis”—ni ji hei ni faa lɛ foɔ ehe yɛ, ní nibii ni tɛo nui lɛ ahiɛ lɛ buaa amɛhe naa yɛ jɛmɛ, yɛ be kuku mli. Jɛmɛ ji he ni mɛi ni yɔɔ he miishɛɛ lɛ fɔɔ yaa ni amɛkwɛɔ akɛ amɛnine eshɛ “majemɔ” ko nɔ kɛjɛ faa lɛ yiteŋgbɛ lo.
16. Mɛɛ gbɛ nɔ bei komɛi lɛ, wɔhe ni wɔkɛhaa lɛ gbeleɔ gbɛ kɛha kaselɔfeemɔ lɛ?
16 Yehowa Nyɔŋmɔ kɛ ebɔfoi ni yɔɔ hewalɛ lɛ kudɔɔ sanekpakpa shiɛmɔ lɛ ni amɛfiɔ sɛɛ. (Kpojiemɔ 14:6) Kɛ́ wɔkɛ wɔhe ha lɛ, bei pii lɛ hegbɛi ní akɛfeɔ kaselɔi anaa gbeleɔ ní wɔkpaaa gbɛ. Yɛ Nairobi, Kenya lɛ, nyɛmimɛi yei enyɔ ko ni yɔɔ shiɛmɔ nitsumɔ lɛ mli lɛ etsu shikpɔŋkuku ni akɛha amɛ ni amɛtsu mli nii lɛ amɛgbe naa. Oblayoo ko ba ebanina amɛ trukaa ni ekɛ miishɛɛ kɛɛ akɛ: “Miisɔle koni mikɛ mɛi ni tamɔ nyɛ akpe.” Ekpa Odasefoi lɛ fai ní amɛkɛ lɛ aya eshia lɛ amrɔ nɔŋŋ kɛha sanegbaa, ni akɛ lɛ je Biblia mli nikasemɔ shishi nakai gbi lɛ nɔŋŋ. Mɛni hewɔ yoo lɛ tsi ebɛŋkɛ Kristofoi enyɔ lɛ kɛ hehiamɔ nakai lɛ? No mli lɛ, ebi abifao egbo aaafee otsii enyɔ ni eho nɛ. No hewɔ lɛ, beni ena akɛ gbekɛ ko hiɛ dɛhiɛmɔ wolo ni ji “Mɛɛ Hiɛnɔkamɔ Yɔɔ Kɛha Suɔlɔi ni Amɛgboi?” lɛ, enya he waa, ni ekɛɛ gbekɛ nuu lɛ ní ekɛha lɛ. Gbekɛ lɛ kɛ dɛhiɛmɔ wolo lɛ haaa lɛ, shi eha ele akɛ Odasefoi lɛ ji mɛi ni kɛha lɛ. Etsɛɛɛ ni yoo lɛ ná mumɔŋ hiɛyaa ni miishɛɛ yɔɔ mli, ni enyɛ edamɔ ebi ni egbo lɛ he awerɛho lɛ naa jogbaŋŋ.
Esa akɛ Nyɔŋmɔ Suɔmɔ lɛ Aye Kunim
17-19. Mɛɛ suɔmɔ Yehowa ejie lɛ kpo etsɔɔ adesai kɛtsɔ kpɔmɔ nɔ lɛ nɔ?
17 Shweremɔ ni Nyɔŋmɔ wiemɔ lɛ shwereɔ yɛ shikpɔŋ lɛ nɔ he fɛɛ he lɛ kɛ Kristo Yesu kpɔmɔ afɔleshaa lɛ yɛ tsakpaa gbagbalii. Taakɛ kpɔmɔ nɔ lɛ ji lɛ, shiɛmɔ nitsumɔ lɛ ji suɔmɔ ni Yehowa yɔɔ kɛha adesai ní yɔɔ he fɛɛ he lɛ kpojiemɔ. Akɛ mumɔ tsirɛ bɔfo Yohane ni eŋma akɛ: “Nɛkɛ Nyɔŋmɔ sumɔ je lɛ, akɛ eŋɔ ebi koome lɛ eha, koni mɔ fɛɛ mɔ ni heɔ enɔ yeɔ lɛ hiɛ akakpata, shi moŋ ená naanɔ wala.”—Yohane 3:16.
18 Susumɔ suɔmɔ ni Yehowa jie lɛ kpo yɛ kpɔmɔ nɔ ní ekɛha lɛ he okwɛ. Nyɔŋmɔ kɛ e-Bi koome, ni ji “Nyɔŋmɔ nibɔɔ lɛ shishijee lɛ” ená wekukpaa ni yɔɔ gbagbalii mli ŋɔɔmɔ afii babaoo nɛ. (Kpojiemɔ 3:14) Yesu sumɔɔ e-Tsɛ lɛ jogbaŋŋ, ni Yehowa sumɔɔ e-Bi lɛ “dani ato je lɛ shishi.” (Yohane 14:31; 17:24) Yehowa ŋmɛ esuɔmɔ Bi lɛ gbɛ ni egbo bɔni afee ni adesai anyɛ aná naanɔ wala. Mɛɛ suɔmɔ ni yɔɔ naakpɛɛ ni ajie lɛ kpo atsɔɔ adesai po nɛ!
19 Yohane 3:17 lɛ kɛɔ akɛ: “Nyɔŋmɔ tsuuu ebi lɛ kɛbaaa je lɛ mli koni ebakojo je lɛ, shi moŋ koni atsɔ enɔ ahere je lɛ yiwala.” No hewɔ lɛ, Yehowa tsu e-Bi lɛ koni ebatsu yiwalaheremɔ nitsumɔ ni suɔmɔ yɔɔ mli, shi jeee kojomɔ loo fɔbuu nɔ̃. Enɛ kɛ Petro wiemɔi lɛ kpãa gbee akɛ: “[Yehowa] sumɔɔɔ akɛ mɛi komɛi alaaje, shi moŋ akɛ mɛi fɛɛ atsake amɛtsui.”—2 Petro 3:9.
20. Mɛɛ gbɛ nɔ yiwalaheremɔ kɛ sanekpakpa lɛ shiɛmɔ yɔɔ tsakpaa?
20 Akɛni Yehowa kɛ mla naa gbɛjianɔtoo ni jara wa ni ebaadamɔ nɔ ekɛ yiwalaheremɔ aha lɛ eha hewɔ lɛ, eesumɔ ni mɛi babaoo ni baanyɛ lɛ kɛ hegbɛ lɛ atsu nii jogbaŋŋ. Bɔfo Paulo ŋma akɛ: “‘Mɔ fɛɛ mɔ ni aaabo atsɛ́ Nuntsɔ lɛ gbɛi lɛ, aaahere eyiwala.’ Shi te aaafee tɛŋŋ ni amɛaabo amɛtsɛ́ mɔ ni amɛheko lɛ amɛyeko lɛ? ni te aaafee tɛŋŋ ni amɛaahe mɔ ni amɛnuko ehe sane lɛ amɛyeŋ? ni asaŋ te aaafee tɛŋŋ ni amɛaanu kɛ́ shiɛlɔ ko bɛ lɛ?”—Romabii 10:13, 14.
21. Te esa akɛ wɔnu hegbɛ ni wɔná akɛ wɔkɛ wɔhe aaawo shiɛmɔ nitsumɔ lɛ mli lɛ he wɔha tɛŋŋ?
21 Kwɛ hegbɛ ni yɔɔ nyam ní eji akɛ okɛ ohe aaawo jeŋ fɛɛ shiɛmɔ kɛ nitsɔɔmɔ nitsumɔ lɛ mli! Ejeee nitsumɔ ni yɔɔ mlɛo, shi kɛlɛ kwɛ bɔ ni Yehowa nyaa kɛji ena akɛ ewebii kɛ anɔkwayeli miihi shi yɛ anɔkwale lɛ mli ni amɛmiigba mɛi krokomɛi sanekpakpa lɛ he sane lɛ! No hewɔ lɛ, bɔ fɛɛ bɔ ni oshihilɛ ji lɛ, ha Nyɔŋmɔ mumɔ lɛ kɛ suɔmɔ ni yɔɔ otsui mli lɛ atsirɛ bo koni okɛ ohe awo nitsumɔ nɛɛ mli. Ni kaimɔ akɛ nɔ ni wɔnaa ni atsuɔ yɛ jeŋ fɛɛ lɛ kɛ odaseyeli ní mli wa haa akɛ etsɛŋ ni Yehowa Nyɔŋmɔ baaha eshiwoo akɛ ekɛ “ŋwɛi hee kɛ shikpɔŋ hee” ni “jalɛ hiɔ mli lɛ” baaba lɛ aba mli.—2 Petro 3:13.
Ani Okaiɔ?
• Mɛni hewɔ hemɔkɛyeli kwamɔ nyɛɛɛ atsĩ sanekpakpa shiɛlɔi lɛ anaa lɛ?
• Mɛɛ gbɛ nɔ Nyɔŋmɔ wiemɔ lɛ eye kunim yɛ wɔ gbii nɛɛ amli yɛ?
• Mɛɛ gbɛ̀i anɔ Nyɔŋmɔ mumɔ lɛ tsuɔ nii ŋmɛnɛ?
• Mɛɛ gbɛ nɔ akɛ kpɔmɔ nɔ lɛ etsa sanekpakpa shiɛmɔ nitsumɔ lɛ yɛ?
[Nikasemɔ lɛ he Sanebimɔi]
[Akrabatsa/Mfoniri ni yɔɔ baafa 16]
(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)
Shweremɔ ni ba yɛ Maŋtsɛyeli jajelɔi lɛ amli yɛ afii ohai 20 lɛ mli
Shiɛlɔi Amlijaa (yɛ akpekpei amli)
6.0
5.5
5.0
4.5
4.0
3.5
3.0
2.5
2.0
1.5
1.0
0.5
1900 1910 1920 1930 1940 1950 1960 1970 1980 1990 2000
[Mfonirii ni yɔɔ baafa 15]
JEROME
TYNDALE
GUTENBERG
HUS
[He ni Sane lɛ Jɛ]
Gutenberg kɛ Hus: Kɛjɛ The Story of Liberty, 1878 wolo lɛ mli
[Mfoniri ni yɔɔ baafa 15]
Biblia Kaselɔi ní amɛmiijaje sanekpakpa lɛ yɛ afi 1920 afii lɛ amli
[Mfonirii ni yɔɔ baafa 16, 17]
Gbɔmɛi ní yɔɔ je lɛŋ he fɛɛ he lɛ miibo sanekpakpa lɛ toi
[Mfoniri ni yɔɔ baafa 18]
Taakɛ Yesu Kristo kpɔmɔ afɔleshaa lɛ ji lɛ, shiɛmɔ nitsumɔ lɛ wóɔ Nyɔŋmɔ suɔmɔ lɛ nɔ gojoo