Maŋtsɛyeli Jɔɔmɔi Lɛ Baanyɛ Atsɔ Onɔ

KRISTOFONYO bɔfo Paulo naa tse yɛ wiemɔi pɔtɛɛ komɛi ni awieɔ yɛ egbii lɛ amli lɛ ateŋ ekomɛi amli. Enine shɛ nɔ ni tamɔ ŋmɛnɛŋmɛnɛ beaŋ univɛsiti tsɔsemɔ nɔ. Ená hegbɛi kpakpai ní enine shɛ nɔ lɛ fɛɛ kɛ Romanyo ní eji lɛ he miishɛɛ. (Bɔfoi lɛ Asaji 21:37-40; 22:3, 28) Kulɛ nɛkɛ hegbɛi nɛɛ baanyɛ aha ebatsɔ niiatsɛ kɛ mɔ ni ehe gbɛi waa. Ni kɛlɛ, ekɛɛ akɛ: “Shi kɛlɛ nii ni ji sɛɛnamɔ ha mi sá lɛ, mibu nomɛi laajemɔ nii yɛ Kristo hewɔ . . . ni mibuɔ amɛ akɛ tumu nɔ nii, koni Kristo moŋ afee minɔ.” (Filipibii 3:7, 8) Mɛni hewɔ Paulo kɛ wiemɔ ni tamɔ nɛkɛ tsu nii?

Paulo, mɔ ni tsutsu lɛ ale lɛ akɛ Saulo ni jɛ Tarso kɛ mɔ ni waa mɛi ni “hiɛ nɛkɛ tsɔɔmɔ nɛɛ mli lɛ” ayi lɛ, batsɔ heyelilɔ beni ajie ninaa ni kɔɔ Yesu ni átee lɛ shi ni awo ehiɛ nyam lɛ kpo atsɔɔ lɛ lɛ sɛɛ lɛ. (Bɔfoi lɛ Asaji 9:1-19) Kɛha Paulo lɛ, niiashikpamɔ ni ená beni eyaa Damasko lɛ kɛ sane naamuu haa lɛ akɛ Yesu ji Mesia ni awo shi yɛ he lɛ, loo Kristo lɛ, wɔsɛɛ nɔyelɔ kɛha Maŋtsɛyeli ni awo shi yɛ he lɛ. Ekɛ tsakemɔ kpele hu ba Paulo shihilɛ mli, taakɛ ewiemɔ ni ekãa yɔɔ mli ni yɔɔ yiteŋgbɛ lɛ tsɔɔ lɛ. Yɛ gbɛ kroko nɔ lɛ, ákɛ anɔkwafo kɛ mɔ ni yɔɔ jalɛ tsui lɛ, Paulo tsake etsui.—Galatabii 1:13-16.

Yɛ Biblia lɛ mli lɛ, bei pii lɛ  atsɔɔ feemɔ wiemɔ ni ji “atsake tsui” lɛ shishi kɛjɛɔ Hela wiemɔ ko ni shishinumɔ diɛŋtsɛ ji “beni aná ale sɛɛ,” kɛ akɛmiito “hiɛ ni atsɔɔ aleɔ” lɛ he. No hewɔ lɛ, nɔ ni fata tsui tsakemɔ he ji mɔ lɛ jwɛŋmɔ, nifeemɔ, loo eyiŋtoo, mɔ lɛ tsutsu shihilɛ gbɛi ni ebaakpoo akɛ nɔ ni haaa mɔ tsui anyɔ emli. (Bɔfoi lɛ Asaji 3:19; Kpojiemɔ 2:5) Yɛ Paulo sane lɛ mli lɛ, ehaaa nakai nifeemɔ ni he hiaa diɛŋtsɛ ni ba yɛ gbɛ ni yaa Damasko lɛ nɔ lɛ akã he afee henumɔŋ nɔ ko loo nɔ ni atsɛɔ lɛ jamɔŋ niiashikpamɔ ko kɛkɛ. Kɛha lɛ lɛ eji shihɛlemɔ yɛ anɔkwale ni eji akɛ etsutsu shihilɛ gbɛ, yɛ be mli ni eleee Kristo lɛ yeee omanye. Eyɔse hu akɛ, bɔni afee ni ená nilee hee ni ená ní kɔɔ Kristo he lɛ he sɛɛ lɛ, esa akɛ efee nɔ ko koni ekɛ saa eshihilɛ gbɛ lɛ.—Romabii 2:4; Efesobii 4:24.

Tsakemɔ ko ni kɛ Jɔɔmɔi Ba

Tsutsu lɛ, Nyɔŋmɔ he nilee ni Paulo yɔɔ lɛ babaoo jɛ Farisifoi akuu, ni eji emlinyo lɛ mli. Nɔ ni fata amɛhemɔkɛyelii lɛ he ji adesai ajeŋ nilee babaoo kɛ blema saji. Yɛ mɛi ahe jwɛŋmɔ fɔŋ ni anáa ni jɛ jamɔ he hewɔ lɛ, eha ekãa kɛ mɔdɛŋ ni Paulo bɔɔ lɛ gba afã. Eyɛ mli akɛ esusu akɛ eesɔmɔ Nyɔŋmɔ moŋ, shi yɛ anɔkwale mli lɛ eewuu eeshi lɛ.—Filipibii 3:5, 6.

Be mli ni Paulo nine eshɛ anɔkwa nilee ni kɔɔ Kristo kɛ gbɛfaŋnɔ ni etsuɔ yɛ Nyɔŋmɔ yiŋtoo mli lɛ sɛɛ lɛ, ebana akɛ esa akɛ efee tsakemɔ: Ani esa akɛ ekã he ehi shi akɛ Farisifonyo ni eya nɔ ená gbɛhe kɛ woo ni eyɔɔ mli lɛ mli miishɛɛ, loo ani esa akɛ etsake eshihilɛ gbɛ koni eje shishi efee nɔ fɛɛ nɔ ni he hiaa koni ekɛná Nyɔŋmɔ nɔkpɛlɛmɔ? Miishɛɛ sane ji akɛ, Paulo hala nɔ ni ja lɛ, ejaakɛ ekɛɛ akɛ: “Mihiɛ gbooo Kristo sanekpakpa lɛ he, ejaakɛ eji Nyɔŋmɔ hewalɛ, ni aŋɔhereɔ mɔ fɛɛ mɔ ni heɔ yeɔ lɛ yiwala, Yudanyo lɛ tsutsu kɛ Helanyo hu.” (Romabii 1:16) Paulo batsɔ sanekpkapa ni kɔɔ Kristo kɛ Maŋtsɛyeli lɛ he lɛ he shiɛlɔ ni yɔɔ ekãa.

Afii babaoo sɛɛ lɛ, Paulo kɛɛ enanemɛi Kristofoi lɛ akɛ: “Mibuuu mihe akɛ minine eshɛ nɔ, shi nɔ kome kɛkɛ: nii ni yɔɔ sɛɛgbɛ lɛ miijie mihiɛ yɛ nɔ, shi nii ni yɔɔ hiɛgbɛ lɛ ahe moŋ mipeleɔ, ni miitiu oti lɛ kɛyashɛ Nyɔŋmɔ tsɛ́mɔ ni jɛ ŋwɛi yɛ Kristo Yesu mli lɛ he juromɔnɔ lɛ he.” (Filipibii 3:13, 14) Paulo ná sanekpakpa lɛ hesɛɛ akɛni ejɛ esuɔmɔ mli eŋmɛɛ nɔ ni gbalaa lɛ kɛjɛɔ Nyɔŋmɔ he lɛ he ni ejɛ etsui muu fɛɛ mli etiu otii ni kɛ Nyɔŋmɔ yiŋtoo kpãa gbee lɛ asɛɛ lɛ hewɔ.

Mɛni Obaafee?

Ekolɛ nyɛsɛɛ nɛɛ nɔŋŋ onu Maŋtsɛyeli sanekpakpa lɛ he. Ani hiɛnɔkamɔ akɛ abaahi shi kɛya naanɔ yɛ paradeiso shihilɛ ko ni yeɔ emuu mli lɛ ŋɔɔ onaa? Ebaafee adebɔɔ naa nifeemɔ ko kɛkɛ kɛji ebalɛ nakai, ejaakɛ wɔteŋ mɔ fɛɛ mɔ yɛ mligbɛ shwelɛ ko akɛ wɔbaahi shi koni wɔná shihilɛ mli miishɛɛ yɛ toiŋjɔlɛ kɛ shweshweeshwe mli. Biblia lɛ kɛɔ akɛ Nyɔŋmɔ kɛ “naanɔ” ewo wɔtsui mli. (Jajelɔ 3:11) No hewɔ lɛ, eji adebɔɔ naa nifeemɔ kɛha wɔ akɛ wɔɔshwe be ni gbɔmɛi baanyɛ ahi shi kɛya naanɔ yɛ toiŋjɔlɛ kɛ miishɛɛ mli. Ni no ji nɔ ni Maŋtsɛyeli sanekpakpa lɛ kɛhaa lɛ.

Shi kɛlɛ, bɔni afee ni oha nakai hiɛnɔkamɔ lɛ afee nɔ ni yɔɔ diɛŋtsɛ lɛ, ehe miihia ni otao saji amli koni ona nɔ ni he ni sanekpakpa lɛ kɔɔ. Bɔfo Paulo wo ŋaa akɛ: “Koni [oyoo] nii ni ji Nyɔŋmɔ suɔmɔnaa nii kpakpai ní sa ehiɛ jogbaŋŋ ní hi kɛwula shi lɛ.” (Romabii 12:2) No hewɔ lɛ, taakɛ Paulo ji lɛ, beni oná nilee kɛ shishinumɔ sɛɛ lɛ, esa akɛ okwɛ nɔ ni obaahala.

Yɛ gbɛ kroko nɔ lɛ, ekolɛ oyɛ hemɔkɛyelii komɛi momo ni kɔɔ owɔsɛɛ shihilɛ he. Kaimɔ akɛ Saulo yɛ lɛ diɛŋtsɛ esusumɔi ni kɔɔ Nyɔŋmɔ suɔmɔnaa nifeemɔ he dani ebatsɔ bɔfo Paulo lɛ. Shi yɛ nɔ najiaŋ ni obaakpa naakpɛɛ kpojiemɔ kɛmiijɛ Nyɔŋmɔ ŋɔɔ gbɛ lɛ, mɛni hewɔ osusuuu sane lɛ he yɛ nilee mli? ‘Bi ohe akɛ: Ani mile nɔ ni Nyɔŋmɔ suɔmɔnaa nii diɛŋtsɛ ji yɛ nɔ ni kɔɔ adesai kɛ shikpɔŋ lɛ he? Mɛɛ odaseyeli manyɛ mikɛha kɛma mihemɔkɛyelii lɛ anɔ mi? Ani odaseyeli ni mikɛhaa lɛ baafee nɔ ni ja yɛ be mli ni apɛi la ni jɛ Nyɔŋmɔ Wiemɔ lɛ, ni ji Biblia lɛ mli lɛ?’ Nɔ ko eŋmɛŋ bo yɛ ojamɔŋ hemɔkɛyelii amli ni abaapɛi yɛ gbɛ ni tamɔ nɛkɛ lɛ nɔ. Yɛ anɔkwale mli lɛ, esa akɛ osumɔ akɛ  obaafee nakai ejaakɛ Biblia lɛ woɔ wɔ hewalɛ akɛ: “Shi nyɛkaa nii fiaa nyɛkwɛa, ni nɔ ni hi lɛ nyɛmɔa mli.” (1 Tesalonikabii 5:21) Fɛɛ sɛɛ lɛ, ani jeee Nyɔŋmɔ nɔkpɛlɛmɔ ji nɔ ni he hiaa?—Yohane 17:3; 1 Timoteo 2:3, 4.

Ekolɛ jamɔŋ hiɛnyiɛlɔi baawo wɔ shi yɛ naanɔ wɔsɛɛ ko he. Shi ja nakai shiwoo lɛ damɔ Biblia mli tsɔɔmɔi lɛ anɔ, kɛ jeee nakai lɛ eyeŋ ebuaŋ wɔ koni wɔná Nyɔŋmɔ Maŋtsɛyeli lɛ jɔɔmɔi lɛ. Yɛ Yesu Gɔŋ nɔ shiɛmɔ ni ehe gbɛi lɛ mli lɛ, ekɛ ekãa bɔ kɔkɔ akɛ: “Jeee mɔ fɛɛ mɔ ni kɛɔ mi akɛ: Nuntsɔ, Nuntsɔ! lɛ, aaabote ŋwɛi maŋtsɛyeli lɛ mli; shi moŋ mɔ ni feɔ mitsɛ ni yɔɔ ŋwɛi lɛ suɔmɔnaa nii lɛ.”—Mateo 7:21.

Kadimɔ nɔmimaa ni Yesu kɛha ni kɔɔ etsɛ suɔmɔnaa nii ni aaafee ákɛ kadimɔ nɔ ni abaadamɔ nɔ koni nine ashɛ Nyɔŋmɔ Maŋtsɛyeli jɔɔmɔi lɛ anɔ. Yɛ gbɛ kroko nɔ lɛ, nɔ ni ekolɛ ebaatamɔ Nyɔŋmɔ jamɔ lɛ jeee nɔ titri ni Nyɔŋmɔ kpɛlɛɔ nɔ. Yɛ anɔkwale mli lɛ, Yesu tee nɔ ewie akɛ: “Mɛi pii aaakɛɛ mi yɛ no gbi lɛ nɔ akɛ: Nuntsɔ, Nuntsɔ! ani jeee bo ogbɛi lɛ mli wɔgba yɛ, ni ogbɛi lɛ mli wɔfamɔ daimonioi yɛ, ni ogbɛi lɛ mli wɔfee hewalɛ nibii pii yɛ lo? Ni no lɛ magba mli makɛɛ amɛ akɛ: Mileee nyɛ kwraa, nyɛjea minɔ nyɛyaa, nyɛ mɛi ni nyɛtsuɔ nibii ni ejaaa gbɛ!” (Mateo 7:22, 23) Eyɛ faŋŋ akɛ, nɔ ni he hiaa lɛ ji akɛ wɔná nɔmimaa akɛ wɔhiɛ anɔkwa shishinumɔ yɛ nɔ ni Maŋtsɛyeli sanekpakpa lɛ ji diɛŋtsɛ lɛ he, koni agbɛnɛ wɔkɛtsu nii yɛ gbeekpamɔ naa.—Mateo 7:24, 25.

Yelikɛbuamɔ Yɛ

Yehowa Odasefoi kɛ nɔ ni fe afii 100 miishiɛ Nyɔŋmɔ Maŋtsɛyeli lɛ he sanekpakpa lɛ. Kɛtsɔ woji kɛ wiemɔ nɔ lɛ, amɛmiiye kɛmiibua gbɔmɛi ni yɔɔ je lɛŋ fɛɛ koni amɛná anɔkwa nilee yɛ nɔ ni Maŋtsɛyeli lɛ ji, nɔ jɔɔmɔi ni ekɛ baaba, kɛ nɔ ni ebiɔ ni mɔ afee koni enine ashɛ nakai jɔɔmɔi lɛ anɔ.

Wɔmiiwo bo hewalɛ koni obo shɛɛ sane ni Yehowa Odasefoi shiɛɔ lɛ toi. Kɛtsɔ sanekpakpa lɛ ni obaakpɛlɛ nɔ ni okɛtsu nii lɛ nɔ lɛ, obaanyɛ oná jɔɔmɔi ni yɔɔ nyam jeee amrɔ nɛɛ kɛkɛ shi moŋ yɛ wɔsɛɛ hu beni Nyɔŋmɔ Maŋtsɛyeli lɛ yeɔ shikpɔŋ muu lɛ fɛɛ nɔ lɛ.—1 Timoteo 4:8.

Tsu he nii amrɔ nɛɛ, ejaakɛ Nyɔŋmɔ Maŋtsɛyeli jɔɔmɔi lɛ eshɛ shi etã!

[Mfonirii ni yɔɔ baafa 7]

Yehowa Odasefoi tsɔɔ woji kɛ wiemɔ nɔ amɛshiɛɔ Nyɔŋmɔ Maŋtsɛyeli lɛ he sanekpakpa lɛ