Maŋtsɛyeli Sanekpakpa Lɛ—Mɛni Ni?

Nyɛsɛɛ afi lɛ, yɛ shikpɔji 235 nɔ yɛ jeŋ muu lɛ fɛɛ lɛ, gbɔmɛi ni naa shɛɔ 6,035,564, gbekɛbii kɛ onukpai fɛɛ kɛ ŋmɛlɛtswai 1,171,270,425 tsu nii ní amɛkɛ mɛi krokomɛi miiwie he. Kɛfata wiemɔ nɔ ni amɛtsɔ amɛtsu enɛ he nii lɛ he lɛ, amɛkɛ woji komekomei ni fa fe akpekpei 700 wo maŋbii lɛ adɛŋ koni etswa he adafi ni etsɔɔ shishi. Amɛja kasɛt kɛ vidiokasɛt akpei abɔ hu koni amɛkɛha mɛi fɛɛ ale. Mɛni “ni”?

‘NO’ JI Nyɔŋmɔ Maŋtsɛyeli lɛ he sanekpakpa lɛ. Yɛ anɔkwale mli lɛ, ebako yɛ bei ni eho yɛ adesai ayinɔsane mli dã, ní ashiɛ “maŋtsɛyeli lɛ he sanekpakpa nɛɛ” kɛyashɛ he ni wɔnaa ŋmɛnɛ nɛɛ.—Mateo 24:14.

Mɛi fɛɛ ni tsuɔ nɛkɛ jeŋ muu fɛɛ shiɛmɔ kɛ nitsɔɔmɔ nitsumɔ nɛɛ ji mɛi ni ejɛ amɛsuɔmɔ mli amɛkɛ amɛhe eha. Yɛ je lɛŋ nikwɛmɔ naa lɛ, ekolɛ amɛbaatamɔ mɛi ni shɛɛɛ taomɔ nɔ kɛha nitsumɔ lɛ he. Belɛ, mɛni ha amɛná ekãa ni amɛye omanye lɛ? Hewalɛ ni Maŋtsɛyeli sanekpakpa lɛ yɔɔ lɛ ji yelikɛbuamɔ nɔ titri, ejaakɛ eji saji ni kɔɔ jɔɔmɔi ni adesai anine baashɛ nɔ lɛ he. Enɛɛmɛi ji jɔɔmɔi ni gbɔmɛi fɛɛ shweɔ—miishɛɛ, heyeli kɛmiijɛ shika he naagba mli, nɔyeli kpakpa, toiŋjɔlɛ kɛ shweshweeshwe shihilɛ, kɛ nɔ kroko hu ni mɛi pii susuɔ akɛ eji nɔ ni anyɛŋ ahe aye—naanɔ wala! Enɛ ji sanekpakpa lɛɛlɛŋ kɛha gbɔmɛi ni taoɔ shishinumɔ kɛ yiŋtoo ni yɔɔ shihilɛ mli lɛ. Hɛɛ, jɔɔmɔi nɛɛ fɛɛ kɛ babaoo baanyɛ atsɔ onɔ kɛji okpɛlɛ nɔ ni ofee onii bɔ ni sa yɛ Maŋtsɛyeli sanekpakpa ni ajajeɔ lɛ he.

Mɛni Ji Maŋtsɛyeli Lɛ?

Shi kɛlɛ, mɛni ji Maŋtsɛyeli lɛ ni ajajeɔ akɛ sanekpakpa lɛ? Eji Maŋtsɛyeli ni atsɔɔ mɛi akpekpei abɔ koni amɛsɔle ni eba yɛ wiemɔi ni ale jogbaŋŋ nɛɛ mli akɛ: “Wɔtsɛ ni yɔɔ ŋwɛi, ogbɛi lɛ he atse; omaŋtsɛyeli lɛ aba; afee nɔ ni osumɔɔ yɛ shikpɔŋ lɛ nɔ, taakɛ afeɔ yɛ ŋwɛi lɛ.”—Mateo 6:9, 10.

No ji Maŋtsɛyeli ni Hebri gbalɔ Daniel wie he yɛ afii ohai 25 ni eho lɛ mli beni eŋma akɛ: “Nyɔŋmɔ ni yɔɔ ŋwɛi lɛ aaatee maŋtsɛyeli ko shi ama shi ni efiteŋ dɔŋŋ kɛaatee naanɔ, ni ashiŋ maŋtsɛyeli nɛɛ ahaŋ maŋ kroko; eeejwara maŋtsɛyelii nɛɛ fɛɛ wɔtsɔwɔtsɔ, ni eeekpata amɛhiɛ, shi lɛ diɛŋtsɛ lɛ eeedamɔ shi kɛaatee naanɔ.”—Daniel 2:44.

No hewɔ lɛ, sanekpakpa lɛ kɔɔ Maŋtsɛyeli, loo nɔyeli, kɛtsɔ Nyɔŋmɔ nɔ ni baajie efɔŋfeemɔi fɛɛ ni ebaaye shikpɔŋ muu lɛ fɛɛ nɔ yɛ toiŋjɔlɛ mli. Ebaaha Bɔlɔ lɛ shishijee yiŋtoo  kɛha adesai kɛ shikpɔŋ lɛ aba mli diɛŋtsɛ.—1 Mose 1:28.

“Ŋwɛi Maŋtsɛyeli lɛ Ebɛŋkɛ”

Nɔ ni miihe ashɛ afii 2,000 ni eho lɛ, nuu ko ni ejɔɔ ehe nɔ ni esu kɛ gbɛ ni etsɔɔ nɔ efeɔ enii lɛ biɔ toiboo babaoo lɛ ji mɔ ni jaje Maŋtsɛyeli sanekpakpa lɛ klɛŋklɛŋ kwraa yɛ faŋŋ mli. Nakai nuu lɛ ji Yohane Baptisilɔ lɛ, ni ji Yuda osɔfo Zakaria kɛ eŋa Elizabeth binuu lɛ. Yohane woɔ atade ni akɛ yooma he tsɔi fee, ni ekɛ too he wolo kpãai efi emliteŋ, taakɛ gbalɔ Elia ni fee ehe mfoniri lɛ ji lɛ. Shi eshɛɛ sane lɛ ji nɔ ni gbala mɛi babaoo ajwɛŋmɔ lɛ. Ejaje akɛ: “Nyɛtsakea nyɛtsuii; shi ŋwɛi maŋtsɛyeli lɛ ebɛŋkɛ”—Mateo 3:1-6.

Mɛi ni boɔ Yohane toi lɛ ji Yudafoi ní kɛɔ akɛ amɛji anɔkwa Nyɔŋmɔ, Yehowa lɛ jálɔi. Ákɛ maŋ lɛ, amɛnine shɛ Mla kpaŋmɔ lɛ nɔ kɛtsɔ Mose nɔ aaafee afii 1,500 ni etsɔ hiɛ mli. Yerusalem sɔlemɔtsu ni yɔɔ fɛo lɛ ma shi lolo, he ni yɛ Mla lɛ kɛ gbeekpamɔ naa lɛ ashãa afɔle yɛ lɛ. Yudafoi lɛ ná nɔmimaa akɛ amɛjamɔ lɛ ja yɛ Nyɔŋmɔ hiɛ.

Shi kɛlɛ, beni amɛboɔ Yohane toi lɛ, mɛi komɛi je shishi amɛbɔi yɔsemɔ akɛ amɛjamɔ lɛ jeee nɔ ni amɛsusuɔ akɛ eji lɛ. Hela kusum kɛ jeŋ nilee ebabote Yudafoi ajamɔ tsɔɔmɔi amli. Afite mla ni nine shɛ nɔ kɛjɛ Nyɔŋmɔ dɛŋ kɛtsɔ Mose nɔ lɛ, amɛgu lɛ po, kɛtsɔ adesai ahemɔkɛyelii kɛ kusumii anɔ. (Mateo 15:6) Kɛtsɔ amɛjamɔŋ hiɛnyiɛlɔi ni tsui wa ni enaaa mɔbɔ lɛ alakamɔ nɔ lɛ, amɛteŋ mɛi babaoo jaaa Nyɔŋmɔ yɛ gbɛ ni ekpɛlɛɔ nɔ lɛ nɔ dɔŋŋ. (Yakobo 1:27) Ehe miihia ni amɛtsake amɛtsui ni amɛshwa amɛhe yɛ eshai ni amɛfee amɛshi Nyɔŋmɔ kɛ Mla kpaŋmɔ lɛ.

Yɛ nakai beaŋ lɛ, Yudafoi babaoo miikpa Mesia, loo Kristo ni awo shi yɛ ehe lɛ puemɔ gbɛ, ni amɛteŋ mɛi komɛi miisusu yɛ Yohane he akɛ: “Benɛ ekolɛ lɛ ji Kristo lɛ?” Shi kɛlɛ, Yohane kpoo akɛ lɛ ni, ni yɛ no najiaŋ lɛ etsɔɔ amɛgbɛ kɛtee mɔ kroko ŋɔɔ, mɔ ni ewie yɛ ehe akɛ: “Misaaa mɔ ni fɛneɔ etokotai anaa kpãa.” (Luka 3:15, 16) Beni Yohane tsɔɔ mɔ ni Yesu ji etsɔɔ ekaselɔi lɛ, ejaje akɛ: “Naa, Nyɔŋmɔ toobi lɛ ni wóɔ je lɛ he esha lɛ kɛyaa lɛ!”—Yohane 1:29.

Eji sanekpakpa lɛɛlɛŋ, ejaakɛ Yohane kɛ nakai feemɔ miitsɔɔ gbɔmɛi fɛɛ gbɛ ni kɛ mɔ yaa wala kɛ miishɛɛ mli lɛ—Yesu, mɔ ni “wóɔ je lɛ he esha lɛ kɛyaa lɛ.” Ákɛ Adam kɛ Hawa shwiei lɛ, afɔ adesai fɛɛ yɛ esha kɛ gbele nɔnyɛɛ shishi. Romabii 5:19 lɛ tsɔɔ mli akɛ: “Taakɛ bɔ ni atsɔ gbɔmɔ kome [Adam] lɛ toigbele lɛ nɔ aha mɛi pii tsɔmɔ eshafeelɔi lɛ, nakai nɔŋŋ kɛ̃ aaatsɔ̃ mɔ kome [Yesu] lɛ toiboo lɛ nɔ aha mɛi pii hu atsɔmɔ jalɔi.” Ehe bahia ni Yesu, ni tamɔ afɔleshaa toobi lɛ ‘awó esha kɛya’ koni etsake adesai anifeemɔ shihilɛ ni yɔɔ mɔbɔ lɛ. Biblia lɛ tsɔɔ mli akɛ: “Esha dɛŋ nyɔmɔwoo lɛ gbele ni; shi Nyɔŋmɔ duromɔ nɔkeenɔ lɛ naanɔ walaŋ  yɛ Kristo Yesu, wɔ-Nuntsɔ lɛ, mli.”—Romabii 6:23.

Ákɛ nuu ni eye emuu lɛ—yɛ anɔkwale mli lɛ, gbɔmɔ ni fe mɔ fɛɛ mɔ ni ehi shi pɛŋ lɛ—Yesu kɛ ehe wo sanekpakpa lɛ shiɛmɔ nitsumɔ mli. Biblia mli amaniɛbɔɔ ni yɔɔ Marko 1:14, 15 lɛ kɛɔ wɔ akɛ: “Agbɛnɛ beni amɔ Yohane sɛɛ lɛ, Yesu ba Galilea, ni ebashiɛ Nyɔŋmɔ maŋtsɛyeli lɛ he sanekpakpa lɛ, ni ekɛɛ: Be lɛ eshɛ, ni Nyɔŋmɔ maŋtsɛyeli lɛ enina nyɛ: nyɛtsakea nyɛtsuiiaŋ, ni nyɛhea sanekpakpa lɛ nyɛyea!”

Ajɔɔ mɛi ni bo Yesu shɛɛ sane lɛ toi ni amɛjie hemɔkɛyeli kpo yɛ sanekpakpa lɛ mli lɛ babaoo. Yohane 1:12 lɛ kɛɔ akɛ: “Mɛi abɔ ní here [Yesu] lɛ, eha amɛ hegbɛ akɛ amɛtsɔmɔ Nyɔŋmɔ bii, mɛi ní heɔ egbɛi lɛ nɔ yeɔ lɛ.” Ákɛ bii, loo Nyɔŋmɔ bii lɛ, amɛyɛ gbɛ ni baaha amɛná nyɔmɔwoo ni ji naanɔ wala.—1 Yohane 2:25.

Shi hegbɛ akɛ nine aaashɛ Maŋtsɛyeli jɔɔmɔi anɔ lɛ bɛ kɛha gbɔmɛi ni yɔɔ klɛŋklɛŋ afii oha lɛ mli lɛ pɛ. Taakɛ atsĩ tã kɛtsɔ hiɛ lɛ, aajaje Nyɔŋmɔ Maŋtsɛyeli lɛ he sanekpakpa lɛ ni aatsɔɔ yɛ je lɛŋ fɛɛ ŋmɛnɛ. No hewɔ lɛ Maŋtsɛyeli jɔɔmɔi yɛ lolo. Mɛni esa akɛ ofee koni onine ashɛ jɔɔmɔi nɛɛ anɔ? Sane ni nyiɛ sɛɛ lɛ baatsɔɔ mli.