‘Yehowa Wiemɔ lɛ Tee nɔ Shwere’
‘Yehowa Wiemɔ lɛ Tee nɔ Shwere’
“Etsuɔ ekita kɛbaa shikpɔŋ lɛ nɔ; ewiemɔ lɛ shaa foi oyayaayai.”—LALA 147:15.
1, 2. Mɛɛ nitsumɔ Yesu kɛha ekaselɔi lɛ, ni mɛni enɛ biɔ?
ANAA Biblia mli gbalɛi ni yɔɔ naakpɛɛ fe fɛɛ lɛ ateŋ ekome yɛ Bɔfoi lɛ Asaji 1:8 lɛ. Beni eshwɛ fioo ni Yesu baakwɔ kɛya ŋwɛi lɛ, ekɛɛ esɛɛnyiɛlɔi anɔkwafoi lɛ akɛ: “Kɛ́ Mumɔ krɔŋkrɔŋ lɛ na ba nyɛnɔ lɛ, nyɛaaná hewalɛ ni nyɛaatsɔmɔ midasefoi . . . kɛyashi shikpɔŋ lɛ naagbeehei lɛ.” Kwɛmɔ nitsumɔ kpele ni enɛ baaji nɛkɛ!
2 Etamɔ nɔ ni Nyɔŋmɔ wiemɔ ní aaajaje yɛ shikpɔŋ lɛ nɔ fɛɛ lɛ fee nitsumɔ ni da kɛha nakai kaselɔi fioo ní nine shɛ nɔ lɛ. Susumɔ nɔ ni no tsɔɔ lɛ he okwɛ. Esa akɛ amɛye amɛbua gbɔmɛi lɛ ní amɛnu Nyɔŋmɔ Maŋtsɛyeli lɛ he sanekpakpa lɛ shishi. (Mateo 24:14) Yesu he odase ní amɛbaaye lɛ hu biɔ akɛ amɛgba mɛi krokomɛi etsɔɔmɔi ni yɔɔ hewalɛ lɛ, ní amɛtsɔɔ nii ni etsuɔ yɛ Yehowa yiŋtoo mli lɛ mli. Kɛfata he lɛ, nɔ ni fata nakai nitsumɔ lɛ he ji gbɔmɛi lɛ ní aaafee amɛ kaselɔi ni no sɛɛ lɛ abaptisi amɛ. Ni esa akɛ amɛfee enɛ yɛ jeŋ fɛɛ!—Mateo 28:19, 20.
3. Mɛni he nɔmimaa Yesu kɛha esɛɛnyiɛlɔi lɛ, ni te amɛhere nitsumɔ ní akɛha amɛ lɛ nɔ amɛha tɛŋŋ?
3 Shi kɛlɛ, Yesu ma nɔ mi eha esɛɛnyiɛlɔi lɛ akɛ mumɔ krɔŋkrɔŋ baaye abua amɛ ni amɛtsu nitsumɔ ni ekɛha amɛ lɛ. No hewɔ lɛ, yɛ bɔ ni nitsumɔ lɛ da hã kɛ mɔdɛŋ ni shitee-kɛ-wolɔi kɛ yiwalɛ bɔ be fɛɛ be koni amɛkɛtsĩ Yesu mra be mli kaselɔi lɛ anaa lɛ fɛɛ sɛɛ lɛ, amɛtee nɔ amɛfee nɔ ni efã amɛ lɛ yɛ omanyeyeli mli. Eji yinɔsane mli anɔkwa sane ní anyɛŋ aje he ŋwane.
4. Mɛɛ gbɛ nɔ ajie Nyɔŋmɔ suɔmɔ lɛ kpo yɛ nitsumɔ ni ekɛha akɛ ashiɛ ni atsɔɔ mɛi krokomɛi nii lɛ mli?
4 Jeŋ muu fɛɛ shiɛmɔ kɛ nitsɔɔmɔ he tafaa lɛ ji suɔmɔ ní Nyɔŋmɔ yɔɔ kɛha mɛi ni leee lɛ lɛ kpojiemɔ. Eha amɛná hegbɛ koni amɛtsi amɛbɛŋkɛ Yehowa ni amɛnine ashɛ eshaifaa nɔ. (Bɔfoi lɛ Asaji 26:18) Shiɛmɔ kɛ nitsɔɔmɔ he nitsumɔ ni akɛha lɛ hu jie suɔmɔ ni Nyɔŋmɔ yɔɔ kɛha mɛi ni hiɛ nakai shɛɛ sane lɛ kpo, ejaakɛ eha amɛná hegbɛ ní amɛkɛjie hetuu-kɛ-hamɔ kɛha Yehowa lɛ kpo ni amɛjie suɔmɔ ni amɛyɔɔ kɛha nanemɛi adesai lɛ kpo. (Mateo 22:37-39) Bɔfo Paulo bu Kristofoi asɔɔmɔ nitsumɔ lɛ akɛ ejara wa aahu akɛ, etsɛ lɛ akɛ “jwetri.”—2 Korintobii 4:7.
5. (a) Nɛgbɛ wɔnaa mra be mli Kristofoi lɛ ahe yinɔsane ní akɛ he fɔɔ nɔ fe fɛɛ lɛ yɛ, ni mɛɛ shweremɔ atsɔɔ mli yɛ jɛmɛ? (b) Mɛni hewɔ Bɔfoi lɛ Asaji awolo lɛ he yɔɔ sɛɛnamɔ kɛha Nyɔŋmɔ tsuji ŋmɛnɛ lɛ?
5 Wɔnaa mra be mli Kristofoi ashiɛmɔ nitsumɔ lɛ he yinɔsane ní akɛ he fɔ̃ɔ nɔ fe fɛɛ lɛ yɛ Bɔfoi lɛ Asaji awolo ní jɛ mumɔŋ ní kaselɔ Luka ŋma lɛ mli. Eji shweremɔ ni ba oyayaayai he yinɔsane ni yɔɔ naakpɛɛ. Nyɔŋmɔ Wiemɔ lɛ he nilee ni shwereɔ nɛɛ kaiɔ wɔ Lala 147:15, ní kɛɔ akɛ: ‘Yehowa tsuɔ ewiemɔ lɛ kɛbaa shikpɔŋ lɛ nɔ; ewiemɔ lɛ shaa foi oyayaayai’ lɛ. Mra be mli Kristofoi ní mumɔ krɔŋkrɔŋ lɛ wo amɛ hewalɛ lɛ ahe amaniɛbɔɔ lɛ yɛ miishɛɛ ni sɛɛnamɔ babaoo yɛ he kɛha wɔ ŋmɛnɛ. Yehowa Odasefoi kɛ amɛhe ewo shiɛmɔ kɛ kaselɔfeemɔ nitsumɔ kome too lɛ nɔŋŋ eko mli, shi yɛ gbɛ ni da nɔ. Wɔkɛ naagbai ni tamɔ nɔ ni klɛŋklɛŋ afii oha lɛ mli Kristofoi lɛ kɛkpe lɛ nɔŋŋ eko miikpe. Kɛ́ wɔsusu bɔ ni Yehowa jɔɔ mra be mli Kristofoi lɛ ní ewo amɛ hewalɛ lɛ he lɛ, ewajeɔ hemɔkɛyeli ni wɔyɔɔ akɛ efiɔ wɔsɛɛ lɛ.
Kaselɔi lɛ Ayifalɛ Shwere
6. Mɛɛ wiemɔ kuku ní kɔɔ shweremɔ he pueɔ shii etɛ yɛ Bɔfoi lɛ Asaji awolo lɛ mli, ni mɛni he ekɔɔ?
6 Gbɛ kome ni wɔɔtsɔ nɔ wɔpɛi Bɔfoi lɛ Asaji 1:8 lɛ mlibaa mli ji ní wɔsusu wiemɔi ni ji ‘Yehowa wiemɔ lɛ tee nɔ eshwere’ lɛ he, wiemɔ kuku ní srɔto fioo yɔɔ mli ní pueɔ shii etɛ pɛ yɛ Biblia lɛ mli, ní fɛɛ yɔɔ Bɔfoi lɛ Asaji awolo lɛ mli lɛ. (Bɔfoi lɛ Asaji 6:7; 12:24; 19:20) ‘Yehowa wiemɔ,’ loo “Nyɔŋmɔ wiemɔ lɛ,” ní yɔɔ saji nɛɛ amli lɛ kɔɔ sanekpakpa lɛ—ni ji ŋwɛi anɔkwa shɛɛ sane ni kanyaa tsui, nɔ ni wala yɔɔ mli, shɛɛ sane ni yɔɔ hewalɛ ní tsake mɛi ni kpɛlɛ nɔ lɛ ashihilɛi lɛ he.—Hebribii 4:12.
7. Mɛni akɛ Nyɔŋmɔ wiemɔ ní shwereɔ lɛ tsa yɛ Bɔfoi lɛ Asaji 6:7 lɛ, ni mɛni ba yɛ Pentekoste afi 33 Ŋ.B. gbi lɛ nɔ?
7 Nyɔŋmɔ wiemɔ ní yaa nɔ shwereɔ lɛ he wiemɔ pueɔ klɛŋklɛŋ yɛ Bɔfoi lɛ Asaji 6:7. Wɔkaneɔ yɛ jɛmɛ akɛ: “Ni Nyɔŋmɔ wiemɔ lɛ shwere, ni kaselɔi lɛ ayi bafá babaoo diɛŋtsɛ yɛ Yerusalem; ni osɔfoi lɛ tete ateŋ mɛi pii boɔ hemɔkɛyeli lɛ toi.” Akɛ shweremɔ tsa kaselɔi lɛ ayifalɛ lɛ yɛ biɛ. Átsɔ hiɛ afɔse Nyɔŋmɔ mumɔ krɔŋkrɔŋ lɛ ashwie kaselɔi aaafee 120 ní ebua amɛhe naa yɛ ŋwɛitsu ko mli lɛ nɔ yɛ Pentekoste 33 Ŋ.B. Nakai gbi lɛ, bɔfo Petro kɛ wiemɔ ni kanyaa mɔ ha, ni yɛ mɛi ni bo toi lɛ ateŋ lɛ, mɛi aaafee 3,000 batsɔmɔ heyelilɔi. Kwɛ hoofeemɔ ni eeefee akɛ eba jɛmɛ yɛ be mli ni gbɔmɛi akpei abɔ yaa kpaakpo loo kpaakpoi ni yɔɔ Yerusalem kɛ ehewɔ lɛ ahe koni ayabaptisi amɛ awo Yesu, mɔ ni asɛŋ lɛ ákɛ ojotswalɔ aaafee gbii 50 ni eho lɛ mli lɛ gbɛi amli lɛ!—Bɔfoi lɛ Asaji 2:41.
8. Mɛɛ gbɛ nɔ kaselɔi lɛ ayifalɛ tee hiɛ yɛ afii ni nyiɛ Pentekoste 33 Ŋ.B. sɛɛ lɛ?
8 Eji anɔkwale akɛ, enɛ ji shishijee pɛ kɛkɛ. Mɔdɛŋ ni Yudafoi ajamɔ mli hiɛnyiɛlɔi lɛ tee nɔ amɛbɔ koni amɛkɛtsĩ shiɛmɔ nitsumɔ lɛ naa lɛ fee efolo. ‘Yehowa tee nɔ eŋɔ kaselɔi ni ahere amɛyiwala lɛ efata asafo lɛ he gbi fɛɛ gbi’ ni eha nakai hiɛnyiɛlɔi lɛ anine nyɛ shi. (Bɔfoi lɛ Asaji 2:47) Etsɛɛɛ ni ‘hii lɛ ayibɔ bafee akpei enumɔ.’ No sɛɛ lɛ, “mɛi ni heɔ Nuntsɔ lɛ nɔ yeɔ, hii kɛ yei babaoo, bafata amɛhe.” (Bɔfoi lɛ Asaji 4:4; 5:14) Yɛ be ko sɛɛ lɛ, wɔkaneɔ akɛ: “Asafo lɛ ná hejɔlɛ yɛ Yudea kɛ Galilea kɛ Samaria fɛɛ, ni enane mɔ shi, ni enyiɛɔ yɛ Nuntsɔ lɛ gbeyeishemɔ mli, ni ekɛ Mumɔ krɔŋkrɔŋ miishɛjemɔ lɛ shwereɔ.” (Bɔfoi lɛ Asaji 9:31) Afii komɛi asɛɛ, ekolɛ aaafee afi 58 Ŋ.B. lɛ, awie mɛi “akpei abɔ ni ehe eye” lɛ ahe sane. (Bɔfoi lɛ Asaji 21:20) No mli lɛ, Jeŋmajiaŋbii heyelilɔi pii hu yɛ jɛmɛ.
9. Te obaatsɔɔ bɔ ni mra be mli Kristofoi lɛ yɔɔ lɛ mli oha tɛŋŋ?
9 Gbɔmɛi lɛ atsakemɔ titri ji nɔ ni kɛ shweremɔ nɛɛ ba. Jamɔ hee ni—shi eyɛ ekãa. Ákɛ nɔ ni tamɔɔɔ sɔlemɔ lɛ mli bii ní eshiɛɛɛ sane lɛ kwraa lɛ, kaselɔi lɛ tuu amɛhe kwraa amɛha Yehowa kɛ e-Wiemɔ lɛ, ni bei komɛi lɛ amɛkaseɔ anɔkwale lɛ kɛjɛɔ mɛi ni awaa amɛyi babaoo lɛ adɛŋ. (Bɔfoi lɛ Asaji 16:23, 26-33) Mɛi ni kpɛlɛ Kristojamɔ nɔ lɛ fee nakai kɛtsɔ sane lɛ ní amɛsusu he ní amɛjɛ henilee mli amɛkpɛ amɛyiŋ yɛ he lɛ nɔ. (Romabii 12:1) Atsɔse amɛ yɛ Nyɔŋmɔ gbɛ nɔ; anɔkwale lɛ yɛ amɛjwɛŋmɔ kɛ amɛtsuii amli. (Hebribii 8:10, 11) Amɛfee klalo akɛ amɛbaagboi amɛha amɛhemɔkɛyeli lɛ.—Bɔfoi lɛ Asaji 7:51-60.
10. Mɛɛ sɔ̃ mra be mli Kristofoi lɛ kpɛlɛ nɔ, ni mɛɛ ehenɔ wɔnaa ŋmɛnɛ?
10 Mɛi ni here Kristofoi atsɔɔmɔ lɛ nɔ lɛ yɔse sɔ̃ ni kã amɛnɔ akɛ amɛwie anɔkwale lɛ he amɛtsɔɔ mɛi krokomɛi. Enɛ ye ebua yɛ gbɛ ní yɔɔ tɛ̃ɛ nɔ ni eha amɛyifalɛ tee hiɛ. Biblia he nilelɔ ko kɛɛ akɛ: “Jeee mɔ ni yɔɔ ekãa lɛ loo mɔ ni aje gbɛ ahala lɛ akɛ sanekpakpa shiɛlɔ pɛ yɔɔ hegbɛ akɛ ewieɔ ehemɔkɛyeli lɛ he sane etsɔɔ. Sɔlemɔ lɛ mlinyo fɛɛ mlinyo yɛ hegbɛ, ni eji egbɛnaa nii akɛ etsu sanekpakpa shiɛmɔ nitsumɔ lɛ eko. . . . Kɛjɛ shishijee tɔŋŋ ní Kristofoi lɛ kɛ amɛhe wo mli lɛ ha kuu lɛ he wa waa lɛ.” Etee nɔ eŋma akɛ: “Sanekpakpa shiɛmɔ nitsumɔ lɛ ji blema Kristofoi lɛ anifeemɔ titri.” Nakai nɔŋŋ eji yɛ anɔkwa Kristofoi ahe ŋmɛnɛ.
Shweremɔ ni Eba yɛ Shikpɔŋkukuji Babaoo Nɔ
11. Mɛɛ shweremɔ awie he yɛ Bɔfoi lɛ Asaji 12:24 lɛ, ni te enɛ ba mli eha tɛŋŋ?
11 Wɔnaa Nyɔŋmɔ wiemɔ lɛ shweremɔ lɛ he sane ni ji enyɔ lɛ yɛ Bɔfoi lɛ Asaji 12:24: “Shi Nyɔŋmɔ wiemɔ lɛ shwere ni etee nɔ.” Akɛ wiemɔ kuku lɛ tsa shweremɔ ni eba yɛ shikpɔŋkukuji babaoo nɔ lɛ nɔ. Yɛ nɔyeli lɛ shitee-kɛ-woo fɛɛ sɛɛ lɛ, nitsumɔ lɛ tee nɔ eshwere. Klɛŋklɛŋ lɛ, afɔse mumɔ krɔŋkrɔŋ lɛ ashwie amɛnɔ yɛ Yerusalem, ni kɛjɛ jɛmɛ kɛyaa lɛ wiemɔ lɛ gbɛ eshwã oyayaayai. Yiwaa ni ba Yerusalem lɛ gbɛ kaselɔi lɛ eshwã Yudea kɛ Samaria fɛɛ. Mɛni jɛ mli ba? “Mɛi ni egbɛ eshwã lɛ yakpa shi, ni amɛjaje sanekpakpa lɛ.” (Bɔfoi lɛ Asaji 8:1, 4) Akudɔ Filipo koni eyaye nuu ko ní beni abaptisi lɛ sɛɛ lɛ, ekɛ shɛɛ sane lɛ tee Etiopia lɛ odase. (Bɔfoi lɛ Asaji 8:26-28, 38, 39) Etsɛɛɛ ni anɔkwale lɛ he shi yɛ Lida, Sharon Ŋã lɛ nɔ, kɛ Yopa. (Bɔfoi lɛ Asaji 9:35, 42) Sɛɛ mli lɛ, bɔfo Paulo fã gbɛ kilomitai babaoo kɛtsɔ ŋshɔ hiɛ kɛ shikpɔŋ nɔ, ni eto asafoi yɛ Mediteranea maji lɛ babaoo amli. Bɔfo Petro tee Babilon. (1 Petro 5:13) Beni afɔse mumɔ krɔŋkrɔŋ lɛ ashwie amɛnɔ yɛ Pentekoste lɛ sɛɛ afii 30 lɛ, Paulo ŋma akɛ ‘ashiɛ’ sanekpakpa lɛ “atsɔɔ bɔɔ nii fɛɛ ní yɔɔ ŋwɛi shishi lɛ,” ekolɛ no mli lɛ eewie shikpɔji ni ale jogbaŋŋ lɛ he.—Kolosebii 1:23.
12. Mɛɛ gbɛ nɔ Kristojamɔ he shitee-kɛ-wolɔi kpɛlɛ Nyɔŋmɔ wiemɔ ní shwere yɛ shikpɔŋkukuji babaoo nɔ lɛ nɔ yɛ?
12 Mɛi ní te shi wo Kristojamɔ lɛ po kpɛlɛ nɔ akɛ Nyɔŋmɔ wiemɔ lɛ ehe shi yɛ Roma Maŋtsɛyeli lɛ mli fɛɛ. Ákɛ nɔkwɛmɔnɔ lɛ, Bɔfoi lɛ Asaji 17:6 lɛ wie akɛ, shitee-kɛ-wolɔi bolɔ yɛ Tesalonika, yɛ Hela kooyigbɛ akɛ: “Mɛnɛɛmɛi ni etsɔ jeŋ hiɛ ebu shi nɛɛ eba biɛ nɛɛ hu.” Kɛfata he lɛ, yɛ afii ohai enyɔ lɛ shishijee mli lɛ, Pliny Bibioo lɛ ŋma wolo kɛjɛ Bitinia kɛyaha Roma Maŋtsɛ Trajan yɛ Kristojamɔ he. Eŋma akɛ: “Jeee maŋtiasei amli pɛ eyɔɔ, shi egbɛ enifitemɔ lɛ eshwã akrowai ni bɛŋkɛ lɛ kɛ maji fɛɛ mli.”
13. Mɛɛ gbɛ nɔ shweremɔ ni tee nɔ yɛ shikpɔŋkukuji babaoo nɔ lɛ jie suɔmɔ ni Nyɔŋmɔ yɔɔ kɛha adesai aweku lɛ kpo yɛ?
13 Shweremɔ ni ba yɛ shikpɔŋkukuji babaoo nɔ lɛ ji Yehowa suɔmɔ ní mli kwɔ ni ejie lɛ kpo etsɔɔ adesai ni sa kpɔmɔ lɛ. Beni Petro yɔse akɛ mumɔ krɔŋkrɔŋ eba Jeŋmajiaŋnyo Kornelio nɔ lɛ, ekɛɛ akɛ: “Lɛɛlɛŋ, miyoo akɛ, Nyɔŋmɔ jeee mɛi ahiɛaŋkwɛlɔ; shi moŋ maŋ fɛɛ maŋ mli lɛ, mɔ ni sheɔ lɛ gbeyei ni etsuɔ jalɛ nii lɛ, lɛ ji mɔ ni saa ehiɛ.” (Bɔfoi lɛ Asaji 10:34, 35) Hɛɛ, sanekpakpa lɛ ji shɛɛ sane kɛha gbɔmɛi fɛɛ, ni shweremɔ ni Nyɔŋmɔ wiemɔ lɛ shwere yɛ shikpɔŋkukuji babaoo nɔ lɛ ha gbɔmɛi ni yɔɔ he fɛɛ he lɛ ná hegbɛ ní amɛkɛhere Nyɔŋmɔ suɔmɔ lɛ nɔ. Yɛ afii ohai 21 nɛɛ mli lɛ, Nyɔŋmɔ wiemɔ lɛ egbɛ eshwã shikpɔŋ lɛ nɔ he fɛɛ he diɛŋtsɛ.
Shweremɔ ní Ye Kunim
14. Mɛɛ shweremɔ ko awie he yɛ Bɔfoi lɛ Asaji 19:20 lɛ, ni mɛɛ nibii anɔ kunim Nyɔŋmɔ wiemɔ ye?
14 Nyɔŋmɔ wiemɔ lɛ shweremɔ lɛ he sane ni ji etɛ lɛ pueɔ yɛ Bɔfoi lɛ Asaji 19:20: “Nɔ̃ hewalɛ ni [Yehowa, NW] wiemɔ lɛ ná ni ekɛda ni eye kunim nɛ.” Shishijee Hela wiemɔ ni atsɔɔ shishi akɛ “kunimyeli” lɛ hiɛ susumɔ ni ji “ená hewalɛ.” Kukuji ni tsɔ hiɛ lɛ wie akɛ mɛi babaoo ni yɔɔ Efeso lɛ batsɔmɔ heyelilɔi, ni mɛi komɛi ni ji ŋkunyaayelɔi lɛ shã amɛwoji lɛ yɛ mɛi fɛɛ hiɛ. No hewɔ lɛ, Nyɔŋmɔ wiemɔ lɛ ye apasa jamɔ mli hemɔkɛyelii lɛ anɔ kunim. Sanekpakpa lɛ hu ye gbɛtsii nibii krokomɛi tamɔ yiwaa nɔ kunim. Nɔ ko nɔ ko nyɛɛɛ atsĩ naa. Kɛ́ wɔkɛ enɛ hu to wɔ be nɛɛ mli anɔkwa Kristojamɔ he lɛ, wɔnaa nɔ ko ni yɔɔ miishɛɛ waa.
15. (a) Mɛni Biblia he yinɔsaneŋmalɔ ko ŋma yɛ mra be mli Kristofoi lɛ ahe? (b) Namɔ kaselɔi lɛ kɛ omanye ni amɛye lɛ he yijiemɔ lɛ haa?
15 Bɔfoi lɛ kɛ mra be mli Kristofoi krokomɛi lɛ jaje Nyɔŋmɔ wiemɔ lɛ kɛ ekãa. Biblia yinɔsaneŋmalɔ ko wie yɛ amɛhe akɛ: “Kɛ́ gbɔmɛi ná suɔmɔ akɛ amɛbaawie amɛ Nuntsɔ lɛ he lɛ, amɛnáa gbɛ̀i babaoo ní amɛbaatsɔ nɔ amɛwie. Yɛ anɔkwale mli lɛ, hii kɛ yei nɛɛ akanyamɔ lɛ ji nɔ ni náa wɔnɔ hewalɛ fe gbɛ ni amɛtsɔɔ nɔ lɛ.” Shi, nakai mra be mli Kristofoi lɛ yɔse akɛ omanye ni amɛye yɛ sɔɔmɔ nitsumɔ lɛ mli lɛ damɔɔɔ amɛ mɔdɛŋbɔɔ pɛ nɔ. Amɛyɛ ŋwɛi famɔ akɛ amɛtsu amɛnitsumɔ lɛ, ni amɛbaana ŋwɛi sɛɛfimɔ ni amɛkɛgbe naa. Mumɔŋ shweremɔ jɛɔ Nyɔŋmɔ ŋɔɔ. Bɔfo Paulo kpɛlɛ enɛ nɔ yɛ ewolo ni eŋma kɛyaha Korinto asafo lɛ mli. Eŋma akɛ: “Mi lɛ, mitɛo; Apolo shwie nɔ nu; shi Nyɔŋmɔ ha shwere. Ejaakɛ Nyɔŋmɔ hefatalɔi nitsulɔi ji wɔ.”—1 Korintobii 3:6, 9.
Mumɔ Krɔŋkrɔŋ lɛ Miitsu Nii
16. Mɛni tsɔɔ akɛ mumɔ krɔŋkrɔŋ lɛ wo kaselɔi lɛ hewalɛ ni amɛwie kɛ ekãa?
16 Kaimɔ akɛ Yesu ma nɔ mi eha ekaselɔi lɛ akɛ mumɔ krɔŋkrɔŋ lɛ baaná gbɛfaŋ nɔ ko yɛ Nyɔŋmɔ wiemɔ lɛ shweremɔ lɛ mli, ni akɛ mumɔ krɔŋkrɔŋ lɛ baawo kaselɔi lɛ hewalɛ yɛ amɛshiɛmɔ nitsumɔ lɛ mli. (Bɔfoi lɛ Asaji 1:8) Te enɛ ba lɛ tɛŋŋ? Beni afɔse mumɔ krɔŋkrɔŋ lɛ ashwie kaselɔi lɛ anɔ yɛ Pentekoste gbi lɛ sɛɛ be fioo lɛ, atsɛ Petro kɛ Yohane kɛtee Yudafoi Akuashɔŋ, ni ji saneyelihe wulu ni yɔɔ maŋ lɛ mli, ni emli kojolɔi lɛ ji mɛi ni Yesu Kristo gbele lɛ he sɔ̃ kã amɛnɔ lɛ hiɛ ní amɛya wie. Ani gbeyeishemɔ baaha bɔfoi lɛ ahe akpokpo yɛ nakai bɛgwafoi ni yitsoŋ wa lɛ ahiɛ? Dabi kwraa! Mumɔ krɔŋkrɔŋ lɛ wo Petro kɛ Yohane hewalɛ kɛ nakai ekãafeemɔ lɛ akɛ amɛshitee-kɛ-wolɔi lɛ anaa kpɛ amɛhe ni “amɛkɔ sɛɛ akɛ amɛkɛ Yesu hi shi.” (Bɔfoi lɛ Asaji 4:8, 13) Mumɔ krɔŋkrɔŋ lɛ ha Stefano hu kɛ ekãa ye Akuashɔŋ lɛ odase. (Bɔfoi lɛ Asaji 6:12; 7:55, 56) Kɛtsɔ hiɛ lɛ, mumɔ krɔŋkrɔŋ lɛ tsirɛ kaselɔi lɛ ní amɛshiɛ kɛ ekãa. Luka bɔ amaniɛ akɛ: “Beni amɛsɔle lɛ, he ni amɛnaa ebakpe shi yɛ lɛ hoso, ni Mumɔ krɔŋkrɔŋ yimɔ amɛ fɛɛ amɛmli obɔbɔ, ni amɛkɛ ekãa jaje Nyɔŋmɔ wiemɔ lɛ.”—Bɔfoi lɛ Asaji 4:31.
17. Mɛɛ gbɛ̀i krokomɛi anɔ mumɔ krɔŋkrɔŋ lɛ ye ebua kaselɔi lɛ yɛ amɛsɔɔmɔ nitsumɔ lɛ mli?
17 Yehowa tsɔ emumɔ krɔŋkrɔŋ lɛ hewalɛ lɛ, kɛ Yesu ni atee lɛ shi lɛ nɔ ekudɔ shiɛmɔ nitsumɔ lɛ. (Yohane 14:28; 15:26) Beni afɔse mumɔ krɔŋkrɔŋ lɛ ashwie Kornelio, ewekumɛi, kɛ enanemɛi ni bɛŋkɛ lɛ kpaakpa lɛ anɔ lɛ, bɔfo Petro yɔse akɛ Jeŋmajiaŋbii ni afolɔko amɛ ketia lɛ ahe baanyɛ asa ní abaptisi amɛ yɛ Yesu Kristo gbɛi amli. (Bɔfoi lɛ Asaji 10:24, 44-48) Sɛɛ mli lɛ, mumɔ lɛ tsu gbɛfaŋ nɔ ko ni he hiaa waa he nii ni akɛhala Barnaba kɛ Saulo (bɔfo Paulo) kɛha maŋsɛɛ sanekpakpa shiɛmɔ nitsumɔ lɛ, ni etsɔɔ he ni esa akɛ amɛya kɛ he ni esaaa akɛ amɛyaa. (Bɔfoi lɛ Asaji 13:2, 4; 16:6, 7) Ekudɔ bɔfoi lɛ kɛ onukpai ni yɔɔ Yerusalem lɛ ní amɛfee yiŋkpɛi. (Bɔfoi lɛ Asaji 15:23, 28, 29) Mumɔ krɔŋkrɔŋ lɛ kudɔ amɛ hu ni amɛhala nɔkwɛlɔi yɛ Kristofoi asafo lɛ mli.—Bɔfoi lɛ Asaji 20:28.
18. Mɛɛ gbɛ nɔ mra be mli Kristofoi lɛ jie suɔmɔ kpo yɛ?
18 Kɛfata he lɛ, mumɔ krɔŋkrɔŋ lɛ jieɔ ehe kpo yɛ Kristofoi lɛ amli diɛŋtsɛ, ni ewoɔ sui ni Nyɔŋmɔ gbeyeishemɔ yɔɔ mli, tamɔ suɔmɔ he hewalɛ. (Galatabii 5:22, 23) Suɔmɔ tsirɛ kaselɔi lɛ ni amɛkɛ mɛi krokomɛi ja amɛnibii. Ákɛ nɔkwɛmɔnɔ lɛ, yɛ Pentekoste afi 33 Ŋ.B. sɛɛ lɛ, akɛ fotro ko ma shi ní akɛtsu kaselɔi lɛ aheloo naa hiamɔ nii ahe nii yɛ Yerusalem. Biblia amaniɛbɔɔ lɛ kɛɔ akɛ: “Mɔ ko mɔ ko bɛ amɛteŋ ni efiɔ lɛ; ejaakɛ mɛi abɔ ni yɔɔ shikpɔji aloo shiai lɛ hɔɔhɔi, ni amɛkɛ nii ni ahɔɔ lɛ ayinii lɛ ba, amɛkɛbashwie bɔfoi lɛ anaji anaa, ni ajaa ahaa mɔ fɛɛ mɔ bɔ ni he hiaa lɛ lɛ.” (Bɔfoi lɛ Asaji 4:34, 35) Jeee nanemɛi heyelilɔi lɛ pɛ ajie suɔmɔ nɛɛ kpo atsɔɔ amɛ, shi moŋ ajie kpo atsɔɔ mɛi krokomɛi hu, kɛtsɔ wiemɔ ní awie sanekpakpa lɛ he atsɔɔ mɛi krokomɛi kɛ mlihilɛ nifeemɔi krokomɛi hu lɛ nɔ. (Bɔfoi lɛ Asaji 28:8, 9) Yesu kɛɛ akɛ he-kɛ-afɔleshaa suɔmɔ baakadi esɛɛnyiɛlɔi lɛ. (Yohane 13:34, 35) Eji anɔkwale akɛ, suɔmɔ su ni he hiaa lɛ gbala gbɔmɛi kɛbɛŋkɛ Nyɔŋmɔ ni eha shweremɔ ba yɛ klɛŋklɛŋ afii oha lɛ mli taakɛ eji ŋmɛnɛ lɛ pɛpɛɛpɛ.—Mateo 5:14, 16.
19. (a) Yɛ mɛɛ gbɛ̀i etɛ nɔ Yehowa wiemɔ lɛ shwere yɛ klɛŋklɛŋ afii oha lɛ mli? (b) Mɛni wɔbaasusu he yɛ nikasemɔ ni nyiɛ sɛɛ lɛ mli?
19 Yɛ fɛɛ mli lɛ, wiemɔ “Mumɔ krɔŋkrɔŋ” jeɔ kpo shii 41 yɛ Bɔfoi lɛ Asaji awolo lɛ mli. Eyɛ faŋŋ akɛ, anɔkwa Kristofoi ashweremɔ yɛ klɛŋklɛŋ afii oha lɛ mli lɛ kɛ mumɔ krɔŋkrɔŋ hewalɛ kɛ ekudɔmɔ lɛ yɛ tsakpaa kpaakpa. Kaselɔi lɛ ayifalɛ lɛ tee hiɛ, Nyɔŋmɔ wiemɔ lɛ gbɛ eshwã hei babaoo, ni eye jamɔi kɛ jeŋ nilee ni yɔɔ nakai be lɛ mli lɛ nɔ kunim. Shweremɔ ni ba yɛ klɛŋklɛŋ afii oha lɛ mli lɛ kɛ nitsumɔ ní Yehowa Odasefoi tsuɔ ŋmɛnɛ lɛ nyiɛɔ pɛpɛɛpɛ. Yɛ nikasemɔ ni nyiɛ sɛɛ lɛ mli lɛ, wɔbaasusu shweremɔ ni yɔɔ naakpɛɛ ni Nyɔŋmɔ wiemɔ lɛ náa yɛ ŋmɛnɛŋmɛnɛ beaŋ lɛ he.
Ani Okaiɔ?
• Mɛɛ gbɛ nɔ mra be mli kaselɔi lɛ ayibɔ lɛ tee hiɛ yɛ?
• Mɛɛ gbɛ nɔ Nyɔŋmɔ wiemɔ lɛ gbɛ eshwã shikpɔŋkukuji babaoo nɔ?
• Mɛɛ gbɛ nɔ Nyɔŋmɔ wiemɔ lɛ ye kunim yɛ klɛŋklɛŋ afii oha lɛ mli?
• Mɛɛ gbɛfaŋnɔ mumɔ krɔŋkrɔŋ lɛ ná yɛ Nyɔŋmɔ wiemɔ lɛ shweremɔ mli?
[Nikasemɔ lɛ he Sanebimɔi]
[Mfoniri ni yɔɔ baafa 12]
Filipo shiɛ etsɔɔ Etiopianyo lɛ, ni atsɔ no nɔ agbɛ sanekpakpa lɛ ashwã shikpɔŋkukuji babaoo nɔ
[Mfoniri ni yɔɔ baafa 13]
Mumɔ krɔŋkrɔŋ lɛ kudɔ bɔfoi lɛ kɛ onukpai lɛ yɛ Yerusalem
[He ni Mfoniri ni yɔɔ baafa 10 lɛ Jɛ]
Upper right corner: Reproduction of the City of Jerusalem at the time of the Second Temple - located on the grounds of the Holyland Hotel, Jerusalem