“Maŋ Hewalɛnamɔ Mli Teemɔŋ Oshara”

NAAKPƐƐ sane ko ji akɛ, niiamlipɛimɔ ni afee nyɛsɛɛ nɛɛ ni kɔɔ hei pɔtɛɛi komɛi ni akɛ bɔlɛnamɔ woɔ yɛ kɔmpiuta nɔ lɛ he lɛ ejie kpo etsɔɔ akɛ, onukpai ni yɔɔ United States ni kɛ Internet tsuɔ nii lɛ ayibɔ lɛ mlijaa etɛ mli ekome egbele kɛtee he ko ni kɔɔ bɔlɛnamɔ he. Amrɔ nɛɛ, mɛi babaoo miitsu amɛbɔlɛnamɔ kanyamɔi lɛ ahe nii kɛtsɔ Internet lɛ nɔ. Datrɛfonyo Al Cooper ni ji jwɛŋmɔ he nilelɔ ní fee niiamlipɛimɔ lɛ kɛɛ akɛ: “Enɛ ji maŋ hewalɛnamɔ mli teemɔŋ oshara ni miifɛ́ yɛ gbɛ ko nɔ, ejaakɛ mɛi fioo ko pɛ yɔseɔ lɛ nakai loo amɛkɛ hiɛdɔɔ tsuɔ he nii.”

Namɛi ji mɛi ni bɔlɛnamɔ he kɔmpiuta mli sanegbaa ni tamɔ nɛkɛ nyɛɔ enáa amɛnɔ hewalɛ titri lɛ? Datrɛfonyo Cooper kɛɛ akɛ: “Mɛi ni kɛtsuɔ nii ni ekolɛ atsĩ amɛnaa koni amɛkaná bɔlɛ ni ahaaa amɛná heyeli yɛ amɛshihilɛ fɛɛ mli lɛ” ni “amrɔ nɔŋŋ kɛkɛ lɛ amɛnáa bɔlɛnamɔ mli hegbɛi ni akɛhaa babaoo ni baaa naagbee” yɛ Internet lɛ nɔ lɛ.

Shi kɛlɛ, mɛi ni fɔɔ bɔlɛnamɔ ni yɔɔ kɔmpiuta nɔ lɛ kwɛmɔ lɛ ateŋ mɛi babaoo buɔ nifeemɔ lɛ akɛ eyeee awui ko. Shi ani nakai eji? Tamɔ bɔ ni mɔ ni tsofa fɔŋ kɛ nitsumɔ eka ehe lɛ nyɛɔ edamɔɔ tsofa ni ekɛtsuɔ nii lɛ mli naagbai anaa lɛ, mɛi ni bɔlɛnamɔ mli kɔmpiuta he sanegbaa eka amɛhe lɛ ateŋ mɛi babaoo taoɔ bɔlɛnamɔ lɛ “mli saji” babaoo yɛ Internet lɛ nɔ koni amɛkɛgbe amɛkɔnɔi lɛ. Shi, ekolɛ amɛbaafite amɛnitsumɔ kɛ wekukpaa ni kã amɛkɛ amɛhefatalɔ lɛ teŋ lɛ!

Shi kɛlɛ, mɛi ni sumɔɔ ni amɛsa Nyɔŋmɔ hiɛ lɛ yɛ yiŋtoi babaoo ni amɛaadamɔ nɔ amɛtsi amɛhe kɛjɛ bɔlɛnamɔ hei ni amɛaakwɛ yɛ Internet lɛ nɔ lɛ. Nyɔŋmɔ Wiemɔ lɛ woɔ ŋaa akɛ: “No hewɔ lɛ nyɛgbea nyɛhe nii ni yɔɔ shikpɔŋ lɛ nɔ lɛ: ajwamaŋbɔɔ, nyaŋemɔ nitsumɔ, mlila, akɔnɔ fɔŋ, kɛ hiɛjoomɔ ni ji wɔŋjamɔ lɛ, nii ahewɔ ni Nyɔŋmɔ mlifu baa toigbele bii lɛ anɔ lɛ.” (Kolosebii 3:5, 6) Bɔni afee ni mɔ lɛ ‘agbe ehe nii’ ni kɔɔ bɔlɛnamɔ mli akɔnɔ fɔŋ ni he tseee he lɛ, ehe miihia ni mɔ lɛ aná suɔmɔ ni mli wa eha Yehowa Nyɔŋmɔ. (Lala 97:10) Kɛ ena akɛ bɔlɛnamɔ he kɔmpiuta he sanegbaa he maŋ hewalɛnamɔ mli oshara miilaka lɛ lɛ, esa akɛ eha suɔmɔ ni eyɔɔ kɛha Yehowa lɛ mli awa kɛtsɔ Nyɔŋmɔ Wiemɔ ni ji Biblia lɛ kasemɔ nɔ. Yehowa Odasefoi ni akɛ amɛ bɔɔ jogbaŋŋ yɛ Maŋtsɛyeli Asa ni yɔɔ jɛmɛ lɛ nɔ lɛ baanyɛ atsu babaoo koni eye ebua mɔ lɛ ni eha fai shi ni etswa akɛ ebaasa Nyɔŋmɔ hiɛ lɛ mli awa.