Maŋtsɛyeli Jajelɔi Bɔ Amaniɛ

Ajie Heguɔgbee ni Akɛba Nyɔŋmɔ Gbɛi lɛ Nɔ Lɛ

NYƆŊMƆ Wiemɔ, ni ji Biblia lɛ kɛɔ akɛ: “[Nyɛbaa] nyɛjeŋ jogbaŋŋ yɛ jeŋmajiaŋbii lɛ ateŋ, koni nɔ̃ mli ni amɛwieɔ nyɛhe yɛ akɛ efɔŋfeelɔi lɛ, nyɛnitsumɔi kpakpai lɛ ni amɛnaa lɛ amɛkɛwo Nyɔŋmɔ hiɛ nyam, yɛ saramɔ gbi lɛ nɔ.” (1 Petro 2:12) No hewɔ lɛ, anɔkwa Kristofoi bɔɔ mɔdɛŋ ni amɛba amɛjeŋ jogbaŋŋ bɔni afee ni amɛkɛ heguɔgbee ko akaba Yehowa gbɛi lɛ nɔ.

Yɛ akutso ko ni etse ehe banee ko mli yɛ Zambia, ní gbɛi ji Senanga lɛ mli lɛ, aju skul tsɔɔlɔ ko redio kɛjɛ shia mli ní eyɔɔ lɛ. Akɛni Yehowa Odasefoi shiɛɔ yɛ akutso lɛ mli hewɔ lɛ, nuu lɛ folɔ amɛnaa akɛ amɛ amɛju e-redio lɛ. Eyawó polisifoi lɛ atoi nɔ, ni etsɔɔ mli akɛ Odasefoi lɛ ebaju e-redio. Bɔni afee ni etsɔɔ akɛ Odasefoi lɛ eba eshia lɛ mli lɛ, ekɛ dɛhiɛmɔ wolo ko ní ena ni ekã shi lɛ hã ákɛ odaseyeli. Shi kɛlɛ, polisifoi lɛ heee lɛ amɛyeee. Amɛwo lɛ ŋaa koni eya ni eyatao saji amli jogbaŋŋ.

Onukpai akuu lɛ wo Odasefoi ni yashiɛ nakai gbi lɛ yɛ akutso lɛ ní tsɔɔlɔ lɛ yɔɔ mli lɛ hewalɛ koni amɛkɛ tsɔɔlɔ lɛ ayawie he. Nyɛmimɛi lɛ ateŋ mɛi komɛi tee ni amɛkɛ lɛ yagba he sane, ni amɛtsɔɔ mli akɛ amɛmiitao ni amɛjie heguɔgbee ni akɛba Yehowa gbɛi lɛ nɔ lɛ. Beni sanegbaa lɛ yaa nɔ lɛ, amɛkɛɛ lɛ akɛ amɛna oblanyo ko yɛ eshia lɛ, ni lɛ ji mɔ ni amɛkɛ dɛhiɛmɔ wolo lɛ ha. Bɔ ni amɛtsɔɔ mɔ lɛ su amɛha lɛ ha tsɔɔlɔ lɛ yɔse mɔ ni ji. Yɛ anɔkwale mli lɛ, amɛyi enyɔ lɛ fɛɛ ji sɔlemɔ kome too lɛ nɔŋŋ mli bii. Tsɔɔlɔ lɛ kɛ oblanyo lɛ gba he sane, shi etso akɛ ekɔko nɔ ko. No hewɔ lɛ, tsɔɔlɔ lɛ kɛ oblanyo lɛ fɔlɔi gba nɔ ni eba lɛ he sane, ni eshi etee shia. Aaafee ŋmɛlɛtswaa kome mli lɛ, oblanyo lɛ nyɛ kɛ redio ni aju lɛ ku sɛɛ kɛba.

Bɔ ni tsɔɔlɔ lɛ shwa ehe sɔŋŋ eha hewɔ lɛ, eyanina onukpai akuu lɛ ni ekpa amɛ fai ní amɛkɛ ehe ake lɛ yɛ naafolɔmɔ wiemɔi ni ejaaa ni ekɛshi amɛ lɛ hewɔ. Onukpai lɛ kpɛlɛ efaikpamɔ lɛ nɔ, shi amɛkɛɛ lɛ akɛ, eha maŋbii lɛ ale anɔkwale lɛ bɔni afee ni mɔ fɛɛ mɔ aná ale akɛ Odasefoi lɛ leee nɔ ni ba lɛ he nɔ ko. Atswa adafi yɛ skul lɛ, ni atsɔ no nɔ akɛjie heguɔgbee ni akɛba Yehowa gbɛi lɛ nɔ lɛ kɛjɛ jɛmɛ. Yehowa Odasefoi baanyɛ amɛya nɔ amɛshiɛ yɛ nakai akutso lɛ mli ni naagba ko kwraa baaa.

[Shikpɔŋ he mfonirii/Mfoniri ni yɔɔ baafa 19]

(Kɛ́ ootao ona bɔ ni saji nɛɛ ji diɛŋtsɛ lɛ, no lɛ kwɛmɔ wolo lɛ mli)

AFRIKA

Zambia

[He ni Sane lɛ Jɛ]

Mountain High Maps® Copyright © 1997 Digital Wisdom, Inc.