Ani ‘Ootsu Odekã He Nii’?

BƆFO Paulo wo Kristofoi ni yɔɔ Efeso yɛ klɛŋklɛŋ afii oha lɛ mli lɛ ŋaa akɛ: “Nyɛkwɛa bɔ ni nyɛaafee ní nyɛkɛ hiɛtɛjemɔ anyiɛ, jeee tamɔ mɛi ni leee nii, shi moŋ tamɔ nilelɔi, mɛi ni tsuɔ amɛdekã he nii, ejaakɛ gbii nɛɛ gbii fɔji ni.” (Efesobii 5:15, 16) Mɛni hewɔ ŋaawoo nɛɛ he bahia lɛ? Hetoo kɛha nakai sanebimɔ lɛ biɔ ni aná nilee ni kɔɔ shihilɛ ni Kristofoi ni yɔɔ nakai blema maŋtiase lɛ mli lɛ kɛkpe lɛ he.

Ale Efeso jogbaŋŋ yɛ eninamɔ babaoo lɛ hewɔ, jeŋba shara ni mli wa, awuiyeli ni egbɛ eshwã, kɛ daimonioi anifeemɔi srɔtoi lɛ ahe. Kɛfata he lɛ, ehe bahia ni Kristofoi ni yɔɔ jɛmɛ lɛ awuu ashi jeŋ nilee hemɔkɛyelii ni kɔɔ be he. Helabii ni jeee Kristofoi ni yɔɔ Efeso lɛ heee yeee akɛ be nyiɛɔ yɛ liamɔ ni yɔɔ trɔmɔɔ nɔ. Hela jeŋ nilee etsɔɔ amɛ akɛ wala kuɔ sɛɛ ebaa nɔtonɔto ni ebaaa naagbee. Mɔ ni fiteɔ ebe yɛ wala shibɔlemɔ kome mli lɛ nine baanyɛ ashɛ fɛɛ nɔ ekoŋŋ yɛ shibɔlemɔ kroko mli. Kulɛ susumɔ ni tamɔ nɛkɛ baanyɛ atsɔ Efeso Kristofoi lɛ ayiŋ koni amɛkɛ su ni ji Yehowa nifeemɔi be he akɔntaabuu ni kɔɔɔ mɔ he eko ní eŋwɛi kojomɔ be he akɔntaabuu hu ni kɔɔɔ mɔ he eko fata he lɛ atsu nii. No hewɔ lɛ, Paulo ŋaawoo akɛ ‘atsu dekã he nii’ lɛ ji nɔ ni sa.

Jeee shishinumɔ ni mli lɛɛ ni kɔɔ be he kɛkɛ Paulo wieɔ he lɛ. Hela wiemɔ ni ekɛtsu nii lɛ tsɔɔ be pɔtɛɛ ko ni ato, be ni sa kɛha yiŋtoo pɔtɛɛ ko. Paulo miiwo klɛŋklɛŋ afii oha lɛ mli Kristofoi lɛ ŋaa koni amɛkɛ be ni hi jogbaŋŋ, loo be ni hi ni amɛnáa mli miishɛɛ amrɔ nɛɛ lɛ atsu nii jogbaŋŋ yɛ nilee gbɛ nɔ dani enaagbee aba ní ajie ŋwɛi mɔbɔnalɛ kɛ yiwalaheremɔ ni akɛha lɛ kɛya kwraa ni ehiŋ shi dɔŋŋ.—Romabii 13:11-13; 1 Tesalonikabii 5:6-11.

Wɔyɛ be ni hi jogbaŋŋ ni tamɔ nakai nɔŋŋ mli. Yɛ nɔ najiaŋ ni aaafite nɛkɛ be ni duromɔ fa yɛ mli ni ekuŋ sɛɛ ebaŋ dɔŋŋ nɛɛ kɛtsɔ hiɛtserɛjiemɔi ni hiɔ shi be kukuoo lɛ ni je lɛ kɛhaa lɛ sɛɛtiumɔ mli lɛ nɔ lɛ, Kristofoi bafeɔ nilelɔi kɛji amɛkɛ be ni amɛyɔɔ lɛ tsu “Nyɔŋmɔ jamɔi” ahe nii ni amɛkɛwaje wekukpaa ni kã amɛkɛ Bɔlɔ lɛ, Yehowa Nyɔŋmɔ teŋ.—2 Petro 3:11; Lala 73:28; Filipibii 1:10.