Bɔ ni Okulafo Shihilɛ Ná Yei Enyɔ Komɛi Anɔ Hewalɛ

SANDRA ji okulafo ko ni yɔɔ Australia. Beni Sandra wu gbo afii komɛi ni eho nɛ lɛ, enifeemɔ amrɔ nɔŋŋ ji enaa ni kpɛ ehe waa. “Yɔsemɔ ni miyɔse akɛ mihefatalɔ kɛ minaanyo ni misumɔɔ lɛ fe fɛɛ lɛ etsɔ esɛɛ trukaa lɛ ná minɔ hewalɛ waa. Yɛ anɔkwale mli lɛ, mileee bɔ ni fee ni mijɛ helatsamɔhe lɛ kɛyashɛ shia, loo nɔ ni mikɛ nakai gbi lɛ mli be ni shwɛ lɛ fee. Yɛ otsii fioo komɛi ni nyiɛ sɛɛ lɛ amli lɛ, migbeyeishemɔ lɛ tsake kɛbatsɔ daa gbi gbɔmɔtsoŋ piŋmɔ.”

Sandra yɛ naanyo onukpa ko, Elaine, ni eji okulafo nɔ ni miihe ashɛ afii ekpaa sɔŋŋ. Elaine kɛ nyɔji ekpaa kwɛ ewu David dani kansa gbe lɛ sɛɛ mli. Ewerɛhoyeli lɛ naa wa aahu akɛ yɛ ewu gbele sɛɛ etsɛɛɛ lɛ, ehiŋmɛi anɔ hà. Afii enyɔ sɛɛ lɛ egbee shi yɛ maŋ. Datrɛfonyo ni kwɛɔ lɛ lɛ enaaa gbɔmɔtsoŋ hela he okadi ko yɛ ehe. Shi kɛlɛ, ena akɛ Elaine ejieee ewerɛhoyeli lɛ kpo yɛ kponɔgbɛ, no hewɔ lɛ ejie yi akɛ eya shia koni eyabɔ mɔdɛŋ ni efó. Elaine kpɛlɛ nɔ akɛ: “Ehe be saŋŋ dani minyɛ miye miwerɛhoyeli lɛ nɔ,” ni ekɛfata he akɛ kɛ mihe fee shoo lɛ “mifɔɔ sɛɛtsu lɛ mli yaa ni mikɛ David atadei lɛ hàa miyiteŋ.”

Hɛɛ, suɔlɔ ko gbele baanyɛ atee nifeemɔi srɔtoi babaoo shi, nibii babaoo diɛŋtsɛ fata okulafo shihilɛ he fe shi ni ahiɔ kɛkɛ ni wu fataaa he. Ákɛ nɔkwɛmɔnɔ lɛ, Sandra nu he yɛ be ko mli akɛ ejeee mɔ ni eji tsutsu lɛ dɔŋŋ. Taakɛ okulafoi babaoo ni agboi yɛ amɛnɔ nyɛsɛɛ nɛɛ ji lɛ, lɛ hu enu he akɛ eji mɔ ni baanyɛ abote oshara mli, mɔ ni bɛ shweshweeshwe. Sandra tsɔɔ mli akɛ: “Akɛni miwu lɛ yiŋkpɛɛ ji nɔ ni mihaa akɛtsuɔ nii yɛ bei babaoo mli hewɔ lɛ, trukaa lɛ ashi mikome too koni makpɛ miyiŋ yɛ saji ahe. Míwɔ fite. Etɔ mi waa fe nine. Ewa akɛ male nɔ ni kɛkɛ ni esa akɛ mafee.”

Niiashikpamɔi ni tamɔ Sandra kɛ Elaine nɔ lɛ fɔɔ baa daa gbi yɛ jeŋ muu lɛ fɛɛ. Hela, osharai, tai, weku shishi bulemɔ, kɛ basabasafeemɔ fɛɛ ji nibii ni fata he ní haa okulafoi ayibɔ faa babaoo lɛ. * Yei nɛɛ ateŋ mɛi babaoo piŋɔ ni amɛjieee lɛ kpo, akɛni amɛleee nɔ ni amɛbaafee lɛ hewɔ. Mɛni nanemɛi kɛ wekumɛi baanyɛ amɛfee kɛye amɛbua mɛi ni amɛshihilɛ tsakeɔ kɛbajeɔ okulafo shihilɛ mli lɛ? Sane ni nyiɛ sɛɛ lɛ hiɛ ŋaawoi ni ekolɛ ebaaye ebua.

[Shishigbɛ niŋmaa]