Okɛ Miishɛɛ Nyɔŋmɔ lɛ Aná Miishɛɛ
Okɛ Miishɛɛ Nyɔŋmɔ lɛ Aná Miishɛɛ
“Nɔ ni eshwɛ lɛ, anyɛmimɛi, nyɛmii ashɛa, . . . ni suɔmɔ kɛ hejɔlɛ Nyɔŋmɔ lɛ kɛ nyɛ aaahi shi.”—2 KORINTOBII 13:11.
1, 2. (a) Mɛni hewɔ mɛi babaoo bɛ miishɛɛ yɛ shihilɛ mli lɛ? (b) Mɛni ji miishɛɛ, ni te wɔɔfee tɛŋŋ wɔná?
YƐ JARAMƆ bei nɛɛ amli lɛ, mɛi babaoo bɛ miishɛɛ. Kɛ́ oshara ba amɛ loo mɔ ko ni amɛsumɔɔ lɛ lɛ nɔ lɛ, amɛnyɛɔ amɛnuɔ he tamɔ Hiob ni hi shi yɛ blema lɛ nu he lɛ, mɔ ni kɛɛ akɛ: “Gbɔmɔ ni yoo fɔ́ lɛ yɔɔ nɛɛ, kukuoo kɛkɛ ji egbii lɛ, ni emli eyi tɔ́ kɛ haomɔ sɔŋŋ.” (Hiob 14:1) Kristofoi yeee amɛhe kɛjɛɛɛ haomɔi ni yɔɔ “jaramɔ bei” nɛɛ amli lɛ mli, ni ebɛ naakpɛɛ akɛ bei komɛi lɛ Yehowa anɔkwa tsuji anijiaŋ jeɔ wui.—2 Timoteo 3:1.
2 Shi, Kristofoi baanyɛ aná miishɛɛ, beni amɛyɔɔ kaa shishi po. (Bɔfoi lɛ Asaji 5:40, 41) Bɔni afee ni onyɛ onu bɔ ni enɛ baanyɛ aba lɛ nakai lɛ shishi lɛ, klɛŋklɛŋ lɛ susumɔ nɔ ni miishɛɛ ji he. Atsɔɔ miishɛɛ shishi akɛ “henumɔ ni nɔ ko loo gbɛkpamɔ kpakpa ni ayɔɔ lɛ teɔ lɛ shi.” * No hewɔ lɛ, kɛ́ wɔhe be ni wɔkɛsusu jɔɔmɔi ni wɔnáa bianɛ lɛ he yɛ be mli ní wɔsusuɔ miishɛɛ ni mɛɔ wɔ yɛ Nyɔŋmɔ jeŋ hee lɛ mli lɛ he lɛ, wɔbaanyɛ wɔná miishɛɛ.
3. Mɛɛ shishinumɔ naa abaanyɛ akɛɛ akɛ kɛ hoo lɛ, mɔ fɛɛ mɔ yɛ yiŋtoi ni eeedamɔ nɔ ená miishɛɛ lɛ?
3 Mɔ fɛɛ mɔ yɛ jɔɔmɔi komɛi ní edaa shi yɛ he. Weku yitso ko nitsumɔ baanyɛ afite. Yɛ adebɔɔ naa lɛ, ebaahao. Eesumɔ ni ekwɛ esuɔlɔi lɛ. Shi, kɛ́ eyɛ gbɔmɔtsoŋ hewalɛ kpakpa lɛ, ebaanyɛ eda shi yɛ no hewɔ. Kɛ́ ená nitsumɔ lɛ, ebaanyɛ etsu nii waa. Yɛ gbɛ kroko nɔ lɛ, hela ní gbɔjɔɔ mɔ baanyɛ amɔ Kristofonyo yoo ko trukaa. Ni kɛlɛ, ebaanyɛ eda shi yɛ suɔmɔ kwɛmɔ ni nanemɛi kɛ weku mli bii kɛfiɔ esɛɛ koni enyɛ ekpee ehela lɛ naa kɛ woo kɛ ekãa lɛ he. Ni anɔkwa Kristofoi fɛɛ baanyɛ aná miishɛɛ yɛ hegbɛ ni amɛná akɛ amɛaale Yehowa, ni ji ‘miishɛɛ Nyɔŋmɔ lɛ’ kɛ Yesu Kristo, ni ji “nɔyelɔ kome ni ajɔɔ lɛ” lɛ hewɔ, ní shihilɛi ní amɛyɔɔ mli lɛ kɔɔɔ he eko. (1 Timoteo 1:11; 6:15) Hɛɛ, Yehowa Nyɔŋmɔ kɛ Yesu Kristo yɛ miishɛɛ waa diɛŋtsɛ. Amɛhiɛ amɛmiishɛɛ lɛ mli yɛ anɔkwale ní eji akɛ shihilɛi ní yɔɔ shikpɔŋ nɔ lɛ yɛ srɔto kwraa yɛ bɔ ni Yehowa to eyiŋ kɛjɛ shishijee lɛ he lɛ fɛɛ sɛɛ. Amɛnɔkwɛmɔnɔ lɛ baanyɛ atsɔɔ wɔ nii babaoo yɛ bɔ ni wɔɔfee wɔhiɛ wɔmiishɛɛ lɛ mli lɛ gbɛfaŋ.
Amɛŋmɛɛko Amɛmiishɛɛ lɛ He Kɔkɔɔkɔ
4, 5. (a) Te Yehowa fee enii eha tɛŋŋ beni klɛŋklɛŋ adesai lɛ tse atua lɛ? (b) Mɛɛ gbɛ nɔ Yehowa tee nɔ ehiɛ jwɛŋmɔ kpakpa mli yɛ adesai ahe?
4 Yɛ Eden abɔɔ lɛ mli lɛ, Adam kɛ Hawa ná gbɔmɔtsoŋ hewalɛ kpakpa kɛ jwɛŋmɔ ni yeɔ emuu mli ŋɔɔmɔ. Amɛná nitsumɔ ni woɔ yibii ní amɛbaatsu kɛ shihilɛ kpakpa ní amɛbaatsu yɛ mli. Nɔ ni fe fɛɛ lɛ, amɛná hegbɛ akɛ amɛkɛ Yehowa aaagba sane daa. Nyɔŋmɔ yiŋtoo ji ní amɛná wɔsɛɛ be ni yɔɔ miishɛɛ mli ŋɔɔmɔ. Shi wɔ klɛŋklɛŋ fɔlɔi lɛ atsui enyɔɔɔ amɛmli yɛ nikeenii kpakpai nɛɛ fɛɛ he; amɛju aduawa ni agu eyeli lɛ kɛjɛ “ekpakpa kɛ efɔŋ lee tso lɛ” nɔ. Nɛkɛ toigbele nifeemɔ nɛɛ bafee shishitoo nɔ kɛha miishɛɛ fɛɛ ni bɛ ni wɔ, ni ji amɛshwiei lɛ kɛkpeɔ ŋmɛnɛ lɛ.—1 Mose 2:15-17; 3:6; Romabii 5:12.
5 Shi kɛlɛ, Yehowa haaa Adam kɛ Hawa hiɛ ni esɔɔɔ nii nɛɛ afite miishɛɛ ni eyɔɔ lɛ. Ená nɔmimaa akɛ kɛ hoo lɛ, eshwiei lɛ ateŋ mɛi komɛi atsuii baatsirɛ amɛ ni amɛbasɔmɔ lɛ. Ená nɔmimaa aahu akɛ, yɛ anɔkwale mli lɛ, dani Adam kɛ Hawa aaafɔ́ amɛ klɛŋklɛŋ bi lɛ, etswa eyiŋtoo akɛ ebaakpɔ amɛshwiei toibolɔi lɛ he adafi! (1 Mose 1:31; 3:15) Yɛ afii ohai abɔ ni nyiɛ sɛɛ ba lɛ mli lɛ, adesai lɛ ateŋ mɛi babaoo nyiɛ Adam kɛ Hawa nanemaahei lɛ asɛɛ, shi Yehowa ekuuu ehiɛ eshwieee adesai aweku lɛ nɔ yɛ nakai toigbele ni egbɛ eshwã lɛ hewɔ. Shi moŋ, egbala ejwɛŋmɔ ema hii kɛ yei ní ‘haa etsui nyɔɔ emli,’ mɛi ni bɔɔ mɔdɛŋ waa akɛ amɛaasa ehiɛ akɛni amɛsumɔɔ lɛ lɛ anɔ.—Abɛi 27:11; Hebribii 6:10.
6, 7. Mɛɛ nibii ye ebua Yesu ni ehiɛ emiishɛɛ lɛ mli?
6 Ni Yesu hu—mɛɛ gbɛ nɔ etsɔ ehiɛ emiishɛɛ lɛ mli? Ákɛ mumɔŋ bɔɔ nɔ ni he wa ni yɔɔ ŋwɛi lɛ, Yesu ná hegbɛ fɛɛ hegbɛ ní ekɛaakwɛ hii kɛ yei anifeemɔi yɛ shikpɔŋ nɔ. Emuu ni amɛyeee lɛ bafee faŋŋ, ni kɛlɛ, Yesu sumɔ amɛ. (Abɛi 8:31) Sɛɛ mli, beni eba shikpɔŋ nɔ ni “ebashĩ buu” yɛ adesai ateŋ lɛ, bɔ ni ebuɔ adesai ehaa lɛ tsakeee. (Yohane 1:14) Mɛni ha Nyɔŋmɔ Bi ni yeɔ emuu lɛ nyɛ ehiɛ nakai jwɛŋmɔ kpakpa ni eyɔɔ yɛ adesai aweku eshafeelɔi lɛ ahe lɛ mli lɛ?
7 Klɛŋklɛŋ kwraa lɛ, Yesu kɛ jwɛŋmɔ kpakpa tsu nii yɛ nibii ni ekpaa gbɛ yɛ lɛ diɛŋtsɛ kɛ mɛi krokomɛi adɛŋ lɛ mli. Ele akɛ enyɛŋ etsake je lɛ. (Mateo 10:32-39) No hewɔ lɛ, kɛ́ anɔkwafo kome po kpɛlɛ Maŋtsɛyeli shɛɛ sane lɛ nɔ lɛ, enáa miishɛɛ waa. Eyɛ mli akɛ jeee be fɛɛ be Yesu kaselɔi lɛ ajeŋba kɛ amɛsui lɛ saa ehiɛ moŋ, shi ele akɛ yɛ amɛtsui mli lɛ amɛmiisumɔ ní amɛfee Nyɔŋmɔ suɔmɔnaa nii, ni esumɔɔ amɛ yɛ no hewɔ. (Luka 9:46; 22:24, 28-32, 60-62) Nɔ ni sa kadimɔ ji akɛ, Yesu ewie gbɛ kpakpa ní ekaselɔi lɛ ekɔ kɛyashi nakai be lɛ mli lɛ he kuku, yɛ sɔlemɔ ko ní esɔle eha eŋwɛi Tsɛ lɛ mli akɛ: “Amɛye owiemɔ lɛ nɔ.”—Yohane 17:6.
8. Tsĩi gbɛi komɛi ni wɔbaanyɛ wɔkase Yehowa kɛ Yesu kɛ́ eba lɛ akɛ wɔmiihiɛ wɔmiishɛɛ lɛ mli lɛ tã.
8 Ŋwanejee ko bɛ he akɛ wɔ fɛɛ wɔbaanyɛ wɔná susumɔ ní wɔɔsusu nɔkwɛmɔnɔ ni Yehowa Nyɔŋmɔ kɛ Yesu Kristo efee efɔ̃ shi yɛ enɛ gbɛfaŋ lɛ he lɛ he sɛɛ. Ani ekolɛ, wɔbaanyɛ wɔkase Yehowa kɛmɔ shi kɛtsɔ wɔhe ni wɔhaooo babaoo tsɔ beni nibii eyaaa nɔ bɔ ni wɔkpaa gbɛ lɛ? Ani wɔbaanyɛ wɔnyiɛ Yesu nanemaahei lɛ asɛɛ kɛtsɔ jwɛŋmɔ kpakpa ni wɔɔná yɛ wɔ amrɔ nɛɛ shihilɛi ahe, kɛ jwɛŋmɔ kpakpa hu ni wɔɔná yɛ nibii ni wɔkpaa gbɛ kɛha wɔ diɛŋtsɛ wɔhe kɛ mɛi krokomɛi lɛ nɔ? Nyɛhaa wɔkwɛa bɔ ni wɔbaanyɛ wɔkɛ shishitoo mlai nɛɛ ekomɛi atsu nii yɛ gbɛ ni anyɛɔ atsuɔ he nii nɔ, yɛ nitsumɔ ko ní Kristofoi ni yɔɔ he fɛɛ he ni yɔɔ ekãa lɛ sumɔɔ waa—ni ji shiɛmɔ nitsumɔ lɛ mli.
Hiɛmɔ Jwɛŋmɔ Kpakpa Mli yɛ Shiɛmɔ Nitsumɔ lɛ He
9. Mɛɛ gbɛ nɔ atsɔ atsĩɛ Yeremia miishɛɛ lɛ hiɛ, ni mɛɛ gbɛ nɔ enɔkwɛmɔnɔ lɛ baanyɛ aye abua wɔ yɛ?
9 Yehowa miisumɔ ni wɔná miishɛɛ yɛ esɔɔmɔ lɛ mli. Esaaa akɛ wɔmiishɛɛ lɛ damɔɔ nibii ni jɛɔ mli kɛbaa lɛ nɔ. (Luka 10:17, 20) Gbalɔ Yeremia kɛ afii babaoo shiɛ yɛ shikpɔŋkuku ni wooo yibii mli. Beni ekɛ ejwɛŋmɔ ma bɔ ni gbɔmɛi lɛ booo lɛ toi lɛ nɔ lɛ, miishɛɛ ni eyɔɔ lɛ sɛɛ fo. (Yeremia 20:8) Shi beni ejwɛŋ bɔ ni shɛɛ sane lɛ ji sanekpakpa diɛŋtsɛ lɛ nɔ lɛ, etsĩɛ emiishɛɛ lɛ hiɛ ekoŋŋ. Yeremia kɛɛ Yehowa akɛ: “Kɛ́ mina owiemɔi lɛ miyeɔ; owiemɔi lɛ ji mimiishɛɛ kɛ mitsui mlifilimɔ; ejaakɛ aŋɔ ogbɛi awo mi, Yehowa.” (Yeremia 15:16) Hɛɛ, Yeremia ná miishɛɛ yɛ hegbɛ ni ená akɛ eeeshiɛ Nyɔŋmɔ wiemɔ lɛ he. Wɔ hu wɔbaanyɛ wɔfee nakai nɔŋŋ.
10. Te wɔɔfee tɛŋŋ wɔbaa miishɛɛ ni wɔyɔɔ yɛ shiɛmɔ nitsumɔ lɛ mli lɛ yi kɛji amrɔ nɛɛ wɔshikpɔŋkuku lɛ wooo yibii po lɛ?
10 Kɛ́ mɛi babaoo kpoo akɛ amɛaabo sanekpakpa lɛ toi po lɛ, wɔyɛ yiŋtoi babaoo ni wɔɔdamɔ nɔ wɔná miishɛɛ yɛ be mli ni wɔkɛ wɔhe woɔ shiɛmɔ nitsumɔ lɛ mli lɛ. Kaimɔ akɛ Yehowa ná hekɛnɔfɔɔ diɛŋtsɛ akɛ nɔ ko baatsirɛ adesai komɛi ní amɛsɔmɔ lɛ. Taakɛ Yehowa ji lɛ, esaaa akɛ wɔnijiaŋ jeɔ wui kɔkɔɔkɔ akɛ, kɛ hoo lɛ, yɛ naagbee lɛ mɛi komɛi baayɔse sane lɛ, ni amɛbaakpɛlɛ Maŋtsɛyeli shɛɛ sane lɛ nɔ. Esaaa akɛ wɔhiɛ kpaa nɔ akɛ gbɔmɛi ashihilɛi tsakeɔ. Kɛ́ aŋkroaŋkroi ni tsui enyɔ amɛmli babaoo lɛ po kɛ haomɔ ko ni akpaaa gbɛ kpe lɛ, amɛnyɛɔ amɛkɛ hiɛdɔɔ susuɔ shishinumɔ ni yɔɔ shihilɛ sɛɛ lɛ he. Ani obaahi jɛmɛ ni oye obua kɛji nakai gbɔmɔ lɛ ‘hiɛ ba emumɔŋ hiamɔ nii anɔ’? (Mateo 5:3) Ekolɛ mɔ ko ni yɔɔ oshikpɔŋkuku lɛ mli lɛ baanyɛ afee klalo koni ebo sanekpakpa lɛ toi yɛ be kroko ní oooya jɛmɛ lɛ!
11, 12. Mɛni ba yɛ maŋ ko mli, ni mɛni wɔbaanyɛ wɔkase kɛjɛ mli?
11 Bɔ ni wɔshikpɔŋkuku lɛ yɔɔ lɛ hu baanyɛ atsake. Susumɔ nɔkwɛmɔnɔ ko he. Yɛ maŋ bibioo ko mli lɛ, oblahii kɛ oblayei gbalashihilɛ mli hefatalɔi akuu ko ní efee ekome kɛ amɛbii yɔɔ jɛmɛ. Beni Yehowa Odasefoi tee jɛmɛ lɛ, amɛkɛ naajiemɔ kome too lɛ nɔŋŋ kpe yɛ shinaa fɛɛ shinaa naa, “Wɔbɛ he miishɛɛ!” Kɛ́ mɔ ko jie miishɛɛ kpo diɛŋtsɛ yɛ Maŋtsɛyeli shɛɛ sane lɛ he lɛ, akutsoŋbii lɛ ahe feɔ oyá ni amɛtsĩɔ ekɛ Odasefoi lɛ akpee ekoŋŋ lɛ naa. Ebafee faŋŋ akɛ, eji kaa akɛ aaashiɛ yɛ jɛmɛ. Shi kɛlɛ, Odasefoi lɛ anijiaŋ ejeee wui; amɛtee nɔ amɛshiɛ. Mɛni jɛ mli ba?
12 Yɛ be ni sa mli lɛ, nakai maŋ lɛ mli gbekɛbii lɛ ateŋ mɛi babaoo dara, ni amɛbote gbalashihilɛ mli, ni amɛhi maŋ lɛ mli nɔŋŋ. Akɛni oblahii kɛ oblayei nɛɛ yɔse akɛ amɛshihilɛ gbɛ lɛ haaa amɛná anɔkwa miishɛɛ hewɔ lɛ, amɛteŋ mɛi komɛi bɔi anɔkwale lɛ taomɔ. Amɛnine shɛ nɔ beni amɛbo sanekpakpa ní Odasefoi lɛ jajeɔ lɛ toi lɛ. Nɛkɛ ji bɔ ni eba lɛ, akɛ yɛ afii babaoo sɛɛ lɛ, asafo bibioo lɛ bɔi daa. Susumɔ miishɛɛ ní Maŋtsɛyeli shiɛlɔi ní nijiaŋ ejeee wui lɛ baaná lɛ he okwɛ! Eba akɛ bɔ ni wɔkãa he wɔgbaa Maŋtsɛyeli shɛɛ sane ni yɔɔ nyam lɛ kɛ miishɛɛ baaha wɔ hu!
Nanemɛi Heyelilɔi Baafi Osɛɛ
13. Kɛ́ wɔnijiaŋ je wui lɛ, namɛi aŋɔɔ wɔbaanyɛ wɔya?
13 Kɛ́ nɔnyɛɛi lɛ fá loo okɛ amanehulu ko kpe yɛ oshihilɛ mli lɛ, nɛgbɛ obaanyɛ oya kɛha miishɛjemɔ? Yehowa tsuji akpekpei abɔ ni ejɔɔ amɛhe nɔ lɛ yaa Yehowa ŋɔɔ klɛŋklɛŋ yɛ sɔlemɔ mli, no sɛɛ lɛ amɛyaa amɛnyɛmimɛi Kristofoi hii kɛ yei lɛ aŋɔɔ. Beni Yesu yɔɔ shikpɔŋ nɔ lɛ, lɛ diɛŋtsɛ ena sɛɛnamɔ ni yɔɔ ekaselɔi lɛ asɛɛfimɔ he. Gbi gbɛkɛ dani ebaagbo lɛ, ewie amɛhe akɛ “mɛi ni kɛ mi ehi shi yɛ mikaai lɛ amli.” (Luka 22:28) Eji anɔkwale akɛ, nakai kaselɔi lɛ yeee emuu, shi anɔkwa ni amɛyeɔ lɛ ji miishɛjemɔ nɔ kɛha Nyɔŋmɔ Bi lɛ. Wɔ hu wɔbaanyɛ wɔná hewalɛwoo kɛjɛ nanemɛi jálɔi adɛŋ.
14, 15. Mɛni ye ebua gbalashihilɛ mli hefatalɔi komɛi ni amɛkpee amɛbi nuu ko gbele naa lɛ, ni mɛni okaseɔ yɛ amɛniiashikpamɔ lɛ mli?
14 Kristofoi gbalashihilɛ mli hefatalɔi ni atsɛɔ amɛ Michel kɛ Diane na bɔ ni amɛnyɛmimɛi hii kɛ yei lɛ asɛɛfimɔ he baanyɛ aba sɛɛnamɔ aha. Ayɔse akɛ amɛbi nuu Jonathan ni eye afii 20, ni ji Kristofonyo ni yɔɔ gbɔmɔtsoŋ hewalɛ kɛ gbɛkpamɔi kpakpai lɛ miiye ansɔ fuumɔ hela. Datrɛfoi lɛ bɔ he mɔdɛŋ waa akɛ amɛaahere eyiwala, shi Jonathan hela lɛ mli wo wu kɛyashi gbi ko shwane mli lɛ, egbo. Michel kɛ Diane hao waa. Amɛyɔse akɛ eshwɛ fioo ní abaagbe Sɔɔmɔ Kpee ni ato he gbɛjianɔ nakai gbekɛ lɛ naa. Shi, akɛni amɛmiitao miishɛjemɔ waa hewɔ lɛ, amɛkɛɛ onukpa ni yɔɔ amɛmasɛi lɛ ní efata amɛhe kɛya Maŋtsɛyeli Asa lɛ nɔ. Beni amɛshɛ jɛmɛ lɛ, no mli lɛ aatswa Jonathan gbele lɛ he adafi aatsɔɔ asafo lɛ. Yɛ kpee lɛ sɛɛ lɛ, nyɛmimɛi hii kɛ yei lɛ babɔle fɔlɔi ní foɔ lɛ ahe kɛkpe ni amɛfua amɛ, ni amɛkɛ miishɛjemɔ wiemɔi ha amɛ. Diane kaiɔ akɛ: “Wɔnu he akɛ wɔfee shwɛm beni wɔyashɛ asa lɛ nɔ lɛ, shi kwɛ miishɛjemɔ ní wɔná kɛjɛ nyɛmimɛi lɛ adɛŋ—bɔ ni amɛwo wɔ hewalɛ amɛha! Eyɛ mli akɛ amɛnyɛɛɛ amɛjie wɔpiŋmɔ lɛ kɛya moŋ, shi amɛye amɛbua wɔ ní wɔmia wɔhiɛ yɛ nɔnyɛɛ lɛ shishi!”—Romabii 1:11, 12; 1 Korintobii 12:21-26.
15 Amanehulu ha Michel kɛ Diane tsi amɛbɛŋkɛ amɛnyɛmimɛi lɛ. Eha amɛtsi amɛbɛŋkɛ amɛhe hu. Michel kɛɛ akɛ: “Enɛ eha mibaná suɔmɔ babaoo diɛŋtsɛ kɛha miŋa. Yɛ nijiaŋwujee bei amli lɛ, wɔkɛ wɔhe wieɔ Biblia mli anɔkwale lɛ kɛ bɔ ni Yehowa wajeɔ wɔ lɛ he.” Diane kɛfataa he akɛ: “Maŋtsɛyeli hiɛnɔkamɔ lɛ tsɔɔ babaoo kɛhaa wɔ agbɛnɛ.”
16. Mɛni hewɔ ehe hiaa ni wɔ klɛŋklɛŋ wɔha wɔnyɛmimɛi lɛ ale wɔhiamɔ nii lɛ?
16 Hɛɛ, wɔ nyɛmimɛi hii kɛ yei Kristofoi lɛ baanyɛ afee “tsuiwoo” kɛha wɔ yɛ jaramɔ bei amli, ni amɛbaaye amɛbua wɔ ni wɔbaa wɔmiishɛɛ lɛ yi. (Kolosebii 4:11) Eji anɔkwale akɛ, amɛnyɛŋ amɛle wɔjwɛŋmɔi. No hewɔ lɛ, kɛ́ yelikɛbuamɔ he miihia wɔ lɛ, ehi akɛ wɔɔha amɛle. Kɛkɛ lɛ wɔbaanyɛ wɔjie anɔkwa hiɛsɔɔ kpo yɛ miishɛjemɔ fɛɛ ni wɔnyɛmimɛi lɛ baanyɛ amɛkɛha wɔ lɛ he, ni wɔbu no akɛ ejɛ Yehowa ŋɔɔ.—Abɛi 12:25; 17:17.
Kwɛmɔ Osafo lɛ Mli
17. Mɛɛ kaai fɔlɔ kome mɔ ko kɛkpeɔ, ni te wɔbuɔ gbɔmɛi ni tamɔ lɛ wɔhaa tɛŋŋ?
17 Babaoo ni otsiɔ obɛŋkɛɔ nanemɛi heyelilɔi lɛ, babaoo ní ohiɛ baasɔ amɛ ni obaaná amɛkɛ naanyobɔɔ he miishɛɛ ji no. Kwɛmɔ osafo lɛ mli. Mɛni onaa? Ani nyɛyɛ fɔlɔ kome mɔ ní miibɔ mɔdɛŋ ní etsɔse ebii yɛ anɔkwale gbɛ lɛ nɔ lɛ yɛ nyɛ asafo lɛ mli? Ani osusu nɔkwɛmɔnɔ kpakpa ni efeɔ lɛ he jogbaŋŋ dã? Bɔɔ mɔdɛŋ ni osusu naagbai ni ekɛkpeɔ lɛ ekomɛi ahe okwɛ. Fɔlɔ kome mɔ ko ni atsɛɔ lɛ Jeanine tsĩ enɛɛmɛi ateŋ ekomɛi atã: shoofeemɔ, bɔlɛnamɔ fɔŋ he nifeemɔi ní yɔɔ nigii ní jɛɔ hii aŋɔɔ yɛ nitsumɔhe, shika he gbɛjianɔtoo ni yɔɔ kpɛŋŋ. Shi ekɛɛ akɛ, nɔ ni fe fɛɛ ni esa akɛ eye nɔ kunim ji bɔ ni eeefee etsu gbekɛbii lɛ ahenumɔŋ hiamɔ nii ahe nii, ejaakɛ esoro gbekɛ fɛɛ gbekɛ. Jeanine tée naagba kroko shi akɛ: “Ebaanyɛ efee kaa diɛŋtsɛ akɛ oootsĩ henumɔ akɛ ooofee obi nuu lɛ wekuyitso koni okɛye wu ni bɛ lɛ najiaŋ lɛ naa. Miyɛ bi yoo, ni ewa waa akɛ makai akɛ esaaa akɛ migbaa lɛ miteemɔŋ saji ni mikɛgbaa enaa.” Taakɛ fɔlɔi komekomei akpekpei abɔ ni sheɔ Nyɔŋmɔ gbeyei lɛ ji lɛ, Jeanine tsuɔ nii be fɛɛ ni ekɛkwɛɔ mɛi ni yɔɔ eshia lɛ. Ekɛ ebii lɛ hu kaseɔ Biblia lɛ, ni etsɔseɔ amɛ yɛ sɔɔmɔ nitsumɔ lɛ mli, ni ekɛ amɛ baa asafoŋ kpeei. (Efesobii 6:4) Kwɛ miishɛɛ ni Yehowa baaná beni enaa be fɛɛ be akɛ nɛkɛ weku nɛɛ miibɔ mɔdɛŋ koni amɛhiɛ emuuyeli mli lɛ! Ani ehaaa wɔtsuii anya kɛ miishɛɛ akɛ wɔyɛ gbɔmɛi ní tamɔ nɛkɛ yɛ wɔteŋ? Hɛɛ, wɔtsuii nyaa.
18, 19. Feemɔ bɔ ni wɔbaanyɛ wɔha hiɛsɔɔ ni wɔyɔɔ kɛha asafo lɛ mli bii lɛ mli akwɔ lɛ he mfoniri.
18 Kwɛmɔ osafo lɛ mli ekoŋŋ. Ekolɛ, obaana yoo okulafoi loo hii okulafoi ní ‘efooo’ kpeei ‘amli.’ (Luka 2:37) Ani amɛhe feɔ shoo bei komɛi? Hɛɛ. Amɛhiɛ tseɔ amɛhefatalɔi lɛ waa diɛŋtsɛ! Shi amɛbɛ dekãa kwraa yɛ Yehowa sɔɔmɔ mli ni amɛnáa mɛi krokomɛi ahe miishɛɛ. Amɛ shiŋŋfeemɔ kɛ su kpakpa lɛ haa miishɛɛ ni asafo lɛ yɔɔ lɛ yaa hiɛ! Kristofonyo ko ni kɛ nɔ ni fe afii 30 esɔmɔ yɛ be-fɛɛ sɔɔmɔ nitsumɔ lɛ mli lɛ wie akɛ: “Miishɛɛ ni miyɔɔ fe fɛɛ lɛ ateŋ ekome ji na ni minaa nyɛmimɛi hii kɛ yei ni edara ni etsɔmɔ niiashikpamɔi babaoo amli, ní amɛkã he amɛmiisɔmɔ Yehowa yɛ anɔkwale mli lɛ!” Hɛɛ, Kristofoi ni egbɔlɔ ni yɔɔ wɔteŋ lɛ ji ekãawoo kpele kɛha oblahii kɛ oblayei lɛ.
19 Ni mɛi heei ni nyɛsɛɛ nɛɛ nɔŋŋ amɛkɛ asafo lɛ bɔi bɔɔ lɛ hu? Ani ekanyaaa wɔ kɛji amɛjie amɛhemɔkɛyeli lɛ kpo yɛ kpeei ashishi? Susumɔ hiɛyaa ni amɛná kɛjɛ beni amɛbɔi Biblia lɛ kasemɔ lɛ he okwɛ. Yehowa baaná amɛhe miishɛɛ waa diɛŋtsɛ. Ani wɔ hu wɔnáa amɛhe miishɛɛ? Ani wɔjieɔ bɔ ni wɔkpɛlɛɔ amɛnɔ lɛ kpo, ni wɔjieɔ amɛyi yɛ mɔdɛŋ ni amɛbɔɔ lɛ he?
20. Mɛni hewɔ abaanyɛ akɛɛ akɛ asafo lɛ mli bii fɛɛ tsuɔ gbɛfaŋ nɔ ni he hiaa waa he nii yɛ asafo lɛ mli?
20 Ani obote gbalashihilɛ mli, oshijafonyo, loo oji fɔlɔ kome mɔ? Ani oji awusã, yoo okulafo loo nuu okulafo? Ani oji mɔ ko ni kɛ asafo lɛ ebɔ afii babaoo loo oji mɔ ko ni nyɛsɛɛ nɛɛ okɛ asafo lɛ bɔi bɔɔ? Ná nɔmimaa akɛ onɔkwɛmɔnɔ kpakpa lɛ ji hewalɛwoo nɔ kɛha wɔ fɛɛ. Ni kɛ́ okɛ ohe wo Maŋtsɛyeli lalai lɛ alamɔ mli, kɛ́ oha saji ahetoo loo otsu nikaselɔ nifeemɔ ko he nii yɛ Teokrase Sɔɔmɔ Skul lɛ mli lɛ, ebaaha wɔ miishɛɛ lɛ ada. Nɔ ni he hiaa fe fɛɛ lɛ, ehaa Yehowa tsui nyaa.
21. Mɛni wɔyɔɔ yiŋtoi babaoo ni wɔɔdamɔ nɔ wɔfee, shi mɛɛ sanebimɔi teɔ shi?
21 Hɛɛ, wɔbaanyɛ wɔná miishɛɛ yɛ jamɔ ni wɔkɛhaa miishɛɛ Nyɔŋmɔ lɛ mli yɛ haomɔ bei nɛɛ amli po. Wɔyɛ yiŋtoi babaoo ni wɔɔdamɔ nɔ wɔbo Paulo hewalɛwoo nɛɛ toi akɛ: “Nyɛmii ashɛa, . . . ni suɔmɔ kɛ hejɔlɛ Nyɔŋmɔ lɛ kɛ nyɛ aaahi shi.” (2 Korintobii 13:11) Shi kɛ́ wɔkɛ adebɔɔ naa oshara, yiwaa, loo shika he naagba ni mli wa kpe hu? Ani wɔbaanyɛ wɔhiɛ wɔmiishɛɛ lɛ mli yɛ nakai shihilɛ lɛ po mli? Bo diɛŋtsɛ muu saji anaa oha ohe beni wɔsusuɔ nikasemɔ ni nyiɛ sɛɛ lɛ he lɛ.
[Shishigbɛ niŋmaa]
^ kk. 2 Kwɛmɔ Insight on the Scriptures, Kpo 2, baafa 119, ní Yehowa Odasefoi fee lɛ.
Ani Obaanyɛ Oha Hetoo?
• Te atsɔɔ miishɛɛ mli aha tɛŋŋ?
• Mɛɛ gbɛ nɔ jwɛŋmɔ kpakpa ni wɔɔhiɛ mli lɛ baaye abua wɔ ni wɔhiɛ wɔmiishɛɛ lɛ mli?
• Mɛni baanyɛ aye abua wɔ ni wɔná jwɛŋmɔ kpakpa yɛ wɔ asafo lɛ shikpɔŋkuku lɛ he?
• Mɛɛ gbɛ̀i anɔ ohiɛ sɔɔ nyɛmimɛi hii kɛ yei ni yɔɔ osafo lɛ mli lɛ?
[Nikasemɔ lɛ he Sanebimɔi]
[Mfonirii ni yɔɔ baafa 10]
Gbɔmɛi ni yɔɔ wɔshikpɔŋkuku lɛ mli lɛ baanyɛ atsake
[Mfoniri ni yɔɔ baafa 12]
Mɛɛ kaai mɛi ni yɔɔ asafo mli ni oyɔɔ lɛ kɛkpeɔ?