“Yehowa Efee Mi Ejurɔ!”

YƐ GBƐKƐ ko ni yɔɔ miishɛɛ ni ŋɔɔ waa mli yɛ March 1985 mli lɛ, hii kɛ yei ni yɔɔ Niŋmaa Nitsumɔhe lɛ yɛ Yehowa Odasefoi anitsumɔhe yitso lɛ yɛ New York, U.S.A. lɛ, yɔse nifeemɔ ko ni sa kadimɔ waa. Karl F. Klein kɛ afii 60 esɔmɔ yɛ nakai beaŋ yɛ be-fɛɛ sɔɔmɔ nitsumɔ lɛ mli. Nyɛminuu Klein kɛ miishɛɛ kɛɛ akɛ: “Yehowa efee mi ejurɔ!” Eyɔse akɛ Lala 37:4 lɛ ji Biblia ŋmalɛ ni esumɔɔ waa. Sɛɛ mli lɛ, eha amɛ fɛɛ amɛná miishɛɛ kɛtsɔ esaŋku ni gbee da ni etswa lɛ nɔ.

Yɛ afii 15 ni nyiɛ sɛɛ ba lɛ mli lɛ, Nyɛminuu Klein tee nɔ etsu nii akɛ niŋmaa kuu lɛ mlinyo ni esɔmɔ akɛ Yehowa Odasefoi a-Nɔyeli Kuu lɛ mlinyo. Kɛkɛ ni, yɛ January 3, 2001, beni Karl Klein eye afii 95 lɛ, egbe eshikpɔŋ nɔ nitsumɔ naa yɛ anɔkwayeli mli.

Afɔ́ Karl yɛ Germany. Efɔlɔi fã kɛtee United States, ni Karl da yɛ Chicago maŋ bibioo ni ji Illinois lɛ mli. Beni Karl ji gbekɛ lolo lɛ ekɛ enyɛmi nuu fioo Ted baná miishɛɛ babaoo yɛ Biblia lɛ mli. Abaptisi Karl yɛ afi 1918 mli, ni nibii ni ŋɔɔ ni enu yɛ Biblia Kaselɔi akpee wulu ko shishi yɛ afi 1922 lɛ kanya wala gbii abɔ fɛɛ suɔmɔ kɛha shiɛmɔ nitsumɔ lɛ yɛ emli. Esumɔɔɔ ni otsi ko hoɔ ni enáaa gbɛfaŋnɔ yɛ shiɛmɔ nitsumɔ lɛ mli, ni efee nakai yɛ ewala naagbee otsii lɛ po mli.

Karl batsɔ mɛi ni tsuɔ nii yɛ nitsumɔhe yitso lɛ ateŋ mɔ kome yɛ afi 1925 mli, ni etsu nii klɛŋklɛŋ yɛ woji akalamɔhe lɛ. Esumɔɔ lala waa diɛŋtsɛ, ni ekɛ afii komɛi etswa saŋku ni gbee da lɛ yɛ lalɔi akuu ko ni baa Kristofoi a-redio wiemɔi ni akɛtswaa adafi lɛ nɔ lɛ mli. Yɛ no sɛɛ lɛ, etsu nii yɛ Nitsumɔhe ni Kwɛɔ Sɔɔmɔ Nitsumɔ lɛ Nɔ lɛ, ni ená T. J. Sullivan ní kwɛɔ nitsumɔ lɛ nɔ lɛ kɛ bɔɔ he miishɛɛ waa diɛŋtsɛ. Yɛ nɛkɛ be nɛɛ mli nɔŋŋ lɛ, Ted bote gbalashihilɛ mli ni ekɛ eŋa, Doris, kɛ amɛhe wo maŋsɛɛ sanekpakpa shiɛmɔ nitsumɔ lɛ mli yɛ Puerto Rico.

Karl Klein kɛ afii nyɔŋmai enumɔ tsu nii yɛ Niŋmaa Nitsumɔhe lɛ, he ni ekɛ yelikɛbuamɔ ni sa kadimɔ waa ha yɛ lɛ, akɛni esumɔɔ ni etao saji amli ni ele Biblia lɛ mli jogbaŋŋ lɛ hewɔ. Yɛ afi 1963 mli lɛ, Karl kɛ Margareta, ni ji maŋsɛɛ sanekpakpa shiɛlɔ ko ni jɛ Germany ni miisɔmɔ yɛ Bolivia lɛ bote gbalashihilɛ mli. Kɛtsɔ eŋa lɛ sɛɛfimɔ ni suɔmɔ yɔɔ mli lɛ nɔ lɛ, titri lɛ be mli ni enáaa gbɔmɔtsoŋ hewalɛ lɛ, ha ewo yibii ni fa kɛteke afi ni mɛi pii kɛbaa hejɔɔmɔ lɛ. Karl adebɔɔ naa su ni ji wiemɔ yɛ faŋŋ mli lɛ, ni lalafolɔ ekãafeemɔ fata he lɛ, ye bua ni akaiɔ wiemɔi ni eyaha yɛ asafoi komɛi amli kɛ yɛ kpeei ashishi. Be fioo ni tsɔ hiɛ dani egbo lɛ, lɛ ekwɛ leebi ŋmalɛ lɛ he susumɔ kɛha New York Betel Weku ni da lɛ nɔ, ni eha mɔ fɛɛ mɔ ná miishɛɛ ni amɛná he sɛɛ.

Mɛi babaoo ni fɔɔ The Watchtower lɛ kanemɔ daa lɛ baakai Nyɛminuu Klein wala shihilɛ he sane, ni ji eniiashikpamɔi ahe saji ni ŋɔɔ ni je kpo yɛ October 1, 1984 nɔ̃ lɛ mli lɛ. Obaaná he miishɛɛ akɛ obaakane loo osaa okane nakai sane lɛ, beni ohaa ehiɔ ojwɛŋmɔ mli akɛ eŋmalɔ lɛ kɛ afii nyɔŋma kɛ enumɔ kroko tsu nii akɛ anɔkwafo kɛ Kristofonyo ni etuu ehe ehã.

Ákɛ Nuntsɔ lɛ mɛi ni efɔ amɛ mu lɛ ateŋ mɔ kome lɛ, Nyɛminuu Klein shwe kɛ etsui fɛɛ akɛ ekɛ Kristo baaye nɔ yɛ ŋwɛi. Wɔyɛ nɔ ni wɔɔdamɔ nɔ wɔhe wɔye akɛ Yehowa eha nakai shwelɛ lɛ eba mli amrɔ nɛɛ.—Luka 22:28-30.

[Mfoniri ni yɔɔ baafa 31]

Karl kɛ T. J. Sullivan kɛ Ted kɛ Doris yɛ afi 1934 lɛ mli

[Mfoniri ni yɔɔ baafa 31]

Karl kɛ Margareta, October afi 2000