Nyɛkɛ Nɔmimaa ni Mli Wa Adamɔa Shi Shiŋŋ

‘Naa! Asafo Kuu Babaoo Lɛ!’

EJI sanebimɔ ko ni efutu Yehowa webii ayiŋ afii nyɔŋmai abɔ. Ajɛ jeeŋmɔ beebe abɔ mɔdɛŋ koni akɛ Ŋmalɛ aha hetoo. Sane lɛ étee sanegbaai babaoo shi. Shi yɛ naagbee lɛ aná hetoo ni jɛ Biblia lɛ mli, ni etamɔ nɔ ni eha toibolɔi ni yɔɔ kpee ko ni afee yɛ Washington, D.C. yɛ afi 1935 lɛ shishi lɛ amli fili amɛ waa fe nine.

Nɔ ni kɛ sanegbaa lɛ fɛɛ ba ji sanebimɔ fioo ko kɛkɛ ni ji: Mɛni akɛyɔseɔ “asafo babaoo” ni atsĩ tã yɛ Kpojiemɔ 7:9 lɛ? Ani nɛkɛ heyelilɔi akuu nɛɛ baahi ŋwɛi?

Sanebimɔ ko ni Etsɛ Aahu

Kɛjɛ bɔfo Yohane be mli kɛbashi wɔgbii nɛɛ amli lɛ, Kristofoi ayiŋ efutu amɛ yɛ mɛi ni “asafo babaoo” lɛ ji he. Biblia Kaselɔi lɛ bu asafo babaoo lɛ akɛ ŋwɛiyaa kuu ni ji enyɔ, ní ji kuu ni yɔɔ Biblia he anɔkwa nilee shi amɛkɛ amɛhe wooo egbɛɛ-kɛ-shwamɔ mli babaoo.

Shi kɛlɛ, mɛi komɛi yɛ ni kɛ amɛhe bɔ Kristofoi ni afɔ amɛ mu lɛ ahe ni amɛbatsɔ mɛi ni yɔɔ ekãa waa yɛ shiɛmɔ nitsumɔ lɛ mli. Amɛbɛ oti ko ni ma amɛhiɛ akɛ amɛmiisumɔ ni amɛya ŋwɛi. Yɛ anɔkwale mli lɛ, amɛhiɛnɔkamɔ lɛ kɛ maŋshiɛmɔ ni ji “Mɛi Akpekpei Abɔ ni Yɔɔ Bianɛ lɛ Gboiŋ Gbi ko Gbi Ko” ni Yehowa webii wie he kɛjɛ afi 1918 kɛbashi afi 1922 lɛ kpãa gbee. Akɛ naanɔ wala yɛ shikpɔŋ nɔ baajɔɔ aŋkroaŋkroi ni tamɔ nɛkɛ.

October 15, 1923 The Watch Tower lɛ gba Yesu abɛbua ni kɔɔ gwantɛŋi kɛ abotiai ahe lɛ he sane, ni ekɛɛ akɛ: “Gwantɛŋi damɔ shi kɛha maji lɛ fɛɛ amli gbɔmɛi ní akɛ mumɔ fɔko amɛ shi amɛsumɔɔ jalɛ nifeemɔ, ní amɛkɛ amɛjwɛŋmɔ kpɛlɛɔ Yesu Kristo nɔ akɛ Nuntsɔ ni amɛmiitao shihilɛ kpakpa yɛ enɔyeli lɛ shishi ni amɛkɛ no feɔ amɛhiɛnɔkamɔ lɛ.”—Mateo 25:31-46.

La Kpɛmɔi Babaoo

Vindication Klɛŋklɛŋ Kpo lɛ gba Ezekiel yitso 9 lɛ he sane yɛ afi 1931 lɛ mli, ni eyɔse mɛi ni akadi amɛhiɛnaa kɛha yibaamɔ yɛ je lɛŋ naagbee ákɛ Yesu abɛbua lɛ mli gwantɛŋi lɛ. Vindication Kpo ni Ji Etɛ (ni akala yɛ afi 1932) lɛ wie nuu Yehonadab ni jeee Israelnyo lɛ tsui ni ja lɛ he, mɔ ni bote Israel Maŋtsɛ Yehu ni afɔ lɛ mu lɛ shwiili lɛ mli ni ekɛ lɛ tee koni eyana ekãa ni Yehu feɔ yɛ apasa jálɔi ahiɛ ni ekpataa lɛ mli lɛ. (2 Maŋtsɛmɛi 10:15-28) Wolo lɛ kɛɛ akɛ: “Yehonadab damɔ shi kɛha nakai gbɔmɛi akuu ni yɔɔ shikpɔŋ nɔ amrɔ nɛɛ ni kɛ Satan gbɛjianɔtoo lɛ bɛ nɔ ko feemɔ loo efeɔ amɛhe mfoniri lɛ, mɛi ni kɔɔ jalɛ shidaamɔ, ni amɛji mɛi ni Nuntsɔ lɛ baabaa amɛyi yɛ Harmagedon be lɛ mli ni ekɛ amɛ afo amanehulu kpeteŋkpele lɛ, ní eha amɛ naanɔ wala yɛ shikpɔŋ nɔ. Mɛnɛɛmɛi ji mɛi ni feɔ ‘gwantɛŋ’ kuu lɛ.”

The Watchtower lɛ ha efee faŋŋ yɛ afi 1934 akɛ esa akɛ Kristofoi ni yɔɔ shikpɔŋ nɔ hiɛnɔkamɔ lɛ ajɔɔ amɛhe nɔ amɛha Yehowa ni abaptisi amɛ. Lɛɛlɛŋ, la ni kɔɔ shikpɔŋ nɔ kuu nɛɛ he lɛ miikpɛ waa kaŋkaŋ be fɛɛ be!—Abɛi 4:18.

Shishinumɔ He La ni Kpɛ́ɔ Kaŋkaŋ

Etsɛŋ ni Kpojiemɔ 7:9-17 lɛ shishinumɔ lɛ baakpɛ aha yɛ la kpɛmɔ kaŋkaŋ mli. (Lala 97:11) The Watchtower lɛ etsɔɔ hiɛnɔkamɔ ni yɔɔ ni tsɔɔ akɛ kpee ni ato he gbɛjianɔ kɛha May 30 kɛyashi June 3, 1935 yɛ Washington, D.C. yɛ U.S.A. lɛ baafee “miishɛjemɔ kɛ sɛɛnamɔ diɛŋtsɛ” kɛha mɛi ni Yehonadab feɔ amɛhe mfoniri lɛ. Ni eba mli anɔkwale lɛɛlɛŋ!

Yɛ wiemɔ ni kanyaa mɔ, ni yitso ji “Asafo Babaoo Lɛ” ni aha, ni mɛi aaashɛ  20,000 ni eba kpee lɛ shishi lɛ bo toi lɛ mli lɛ, J. F. Rutherford kɛ Ŋmalɛ naa odaseyeli ko ha ni tsɔɔ akɛ, ŋmɛnɛŋmɛnɛ beaŋ “tooi krokomɛi” lɛ ji “asafo babaoo” ni yɔɔ Kpojiemɔ 7:9 lɛ. (Yohane 10:16) Beni wielɔ lɛ shɛ enaagbee yɛ wiemɔ nɛɛ mli lɛ, ebi akɛ: “Nyɛfainɛ, mɛi fɛɛ ni yɔɔ hiɛnɔkamɔ akɛ amɛaahi shi kɛya naanɔ yɛ shikpɔŋ nɔ lɛ ate shi adamɔ shi?” Beni toibolɔi lɛ ateŋ mɛi babaoo te shi damɔ shi lɛ, Rutherford jaje faŋŋ akɛ: “Naa! Asafo babaoo lɛ!” Jɛmɛ fee dioo, ni nɔ ni nyiɛ sɛɛ ba ji bolɔmɔ kɛ dɛtswaa. Enɔjetsɛremɔ lɛ, abaptisi Yehowa Odasefoi heei 840, ni mɛnɛɛmɛi ateŋ mɛi babaoo ji mɛi ni kɛɛ amɛji asafo babaoo lɛ mli bii.

Ba ni Aba ni Sa Kadimɔ

Dani afi 1935 baashɛ lɛ, no mli lɛ mɛi ni bo Biblia shɛɛ sane lɛ toi ni amɛyi fáa babaoo ni jie ekãafeemɔ kpo yɛ sanekpakpa lɛ shiɛmɔ nitsumɔ lɛ mli lɛ jie miishɛɛ ni amɛyɔɔ yɛ Paradeiso shikpɔŋ lɛ ni amɛaahi nɔ kɛya naanɔ lɛ he. Amɛbɛ shwelɛ ko kwraa akɛ amɛaaya ŋwɛi, ejaakɛ Nyɔŋmɔ hako amɛ ŋwɛi shihilɛ he hiɛnɔkamɔ lɛ. Asafo babaoo lɛ ni ji tooi krokomɛi lɛ ni amɛkɛ amɛhe yabɔ amɛhe lɛ tsɔɔ akɛ beni shɛɔ afi 1935 lɛ, no mli lɛ Kristofoi 144,000 ni afɔ amɛ mu lɛ atsɛmɔ lɛ miihe aba naagbee kwraa.—Kpojiemɔ 7:4.

Beni Jeŋ Ta II lɛ fɛ́ lɛ, Satan Abonsam bɔ mɔdɛŋ jogbaŋŋ diɛŋtsɛ koni etsĩ mɛi ni baafee asafo babaoo lɛ ni abuaa amɛnaa lɛ naa. Atsĩ Maŋtsɛyeli shiɛmɔ nitsumɔ lɛ naa yɛ maji babaoo amli. Yɛ nakai awerɛhoyeli gbii lɛ amli, beni eshwɛ fioo ni J. F. Rutherford baagbo yɛ January 1942 lɛ, ekɛɛ akɛ: “Etamɔ nɔ ni yɛ fɛɛ sɛɛ lɛ ‘asafo babaoo’ lɛ ayi ebafaŋ babaoo.”

Shi yɛ ŋwɛi jɔɔmɔ hewɔ lɛ, saji lɛ bafee nɔ kroko kwraa. ‘Akɛni amɛkɛ nɔmimaa ni mli wa damɔ shi shiŋŋ hewɔ lɛ,’ mɛi ni afɔ amɛ mu lɛ kɛ amɛnanemɛi tooi krokomɛi lɛ miitsu famɔ ni akɛha akɛ afee kaselɔi lɛ he nii. (Kolosebii 4:12; Mateo 24:14; 28:19, 20) Beni shɛɔ afi 1946 lɛ, Yehowa Odasefoi ni shiɛɔ yɛ jeŋ fɛɛ lɛ ayifalɛ ji 176,456—ni mɛnɛɛmɛi ateŋ mɛi babaoo ji asafo babaoo lɛ mli bii. Mɛi ni fa fe Odasefoi 6,000,000 kɛ anɔkwayeli miisɔmɔ Yehowa yɛ shikpɔji 235 nɔ yɛ afi 2000—asafo babaoo diɛŋtsɛ lɛɛlɛŋ! Ni yibɔ lɛ kã he eeya hiɛ lolo.